1. ¿Ken akinon uelis tikitaskej Jehová?

JEHOVÁ kinpiya miyekej itekipanojkauan, akin kimita ken ichanejkauan. Noijki, kimita ken ichanejkauan Jesús, akin “nemi desde ijkuak nochi tlen onkaj, xe onkatka”, niman melak miyekej ángeles (Col. 1:15; Sal. 103:20). Ijkuak Jesús nemiya nikan ipan tlaltikpaktli, okiteititi ika uelis tikitaskej Jehová ken toTaj. Sejpatipan, ijkuak Jesús tlajtotoya iuan inomachtijkauan, okijto: Jehová “noTajtsin niman nemoTajtsin” (Juan 20:17). Noijki, ijkuak tejuamej tosentemakaj itech Jehová niman toapolaktiaj, peua tikimitaj tokniuan ken tochanejkauan (Mar. 10:29, 30).

2. ¿Tlenon tikitaskej ipan yejuin tlamachtijli?

² Sekimej tokniuan ouijtika kitaj kitaskej Jehová ken inTaj. Niman kanaj sekimej xkimatij kenon kimititiskej tokniuan ika kintlasojtlaj. Ipan yejuin tlamachtijli, tikitaskej kenon Jesús techpaleuiya matikitakan Jehová ken se toTaj akin melak techtlasojtla, niman kenon uelis itech tonisiuiskej. Noijki, tikitaskej kenon uelis tikintlasojtlaskej tokniuan ijkon ken Jehová kintlasojtla.

3. ¿Tleka más tonisiuiyaj itech Jehová ijkuak tiknotsaj ijkon ken kijtoua Mateo 6:9?

³ Jehová se toTaj akin melak tetlasojtla. Jesús kineki matikitakan Jehová ijkon ken yejua kita: ken se tajtli akin melak tetlasojtla niman akin uelis tiknotsas maski san kemanon. Jesús xkineki matiknemilikan ika iTaj xtetlasojtla noso ika xkineki matiknotsakan. Ijkon tikijtouaj pampa ijkuak okinmachti inomachtijkauan kenon kichiuaskej teoyotl, okimijli ijkin makinotsakan:  “ToTajtsin” (Mat. 6:9). Jesús ueliskia kijtoskia ika, ijkuak tiknotsaskiaj iTaj, ijkin matikijlikan: “Dios Yejuan Nochi Ueli Kichiua”, akin “okichijchiu nochi in tlaltikpatli” noso “toueyiRey yejuan nemi nochipa”, ijkon ken miyekpa noixmati ipan Biblia (Gén. 49:25; Is. 40:28; 1 Tim. 1:17). San ika, Jesús okimijli makijlikan: “ToTajtsin”.

4. ¿Kenon tikmatij ika Jehová kineki matiknisiuikan?

⁴ ¿Xueli tikitaj Jehová ken se Tajtli akin melak tetlasojtla? Sekimej de tejuamej kema ouijtika tikitaj. Kanaj ijkon topan nochiua pampa ijkuak otechiskaltijkej xmás otechtlasojtlakej. Melak techyolseuiya ijkuak tikmatij ika yejua kasikamati tlen tikmachiliaj niman ika kineki matiknisiuikan. Ika yejon, Biblia techijlia: “Xnisiuikan Dios niman yejua mechnisiuis” (Sant. 4:8). Jehová melak techtlasojtla niman techijlia ika san yejua akin más kuajli Tajtli.

5. Itech tlen kijtoua Lucas 10:22, ¿tleka Jesús uelis techpaleuis más matiknisiuikan Jehová?

⁵ Jesús uelis techpaleuis más matiknisiuikan Jehová. Yejua kuajli kixmati niman, ipampa tlen kichiua, kiteititia kenon tlanemilia toTajtsin. Ika yejon, okijto: “On yejuan nechita, no kita on noTajtsin” (Juan 14:9). Ijkon ken tokniuj akin yenkuiyotl, Jesús techititia kenon tiktlakaitaskej, tiktlakamatiskej niman tikyolpaktiskej toTaj. Noijki, ijkuak onen nikan ipan tlaltikpaktli, otechititi ika Jehová melak kuajli iyojlo niman tetlasojtla (xpoua Lucas 10:22). Matikitakan kenon okiteititi.

6. ¿Tleka tikijtouaj ika Jehová kuajli okikak Jesús?

⁶ Jehová kinkaki ikoneuan. Matikitakan kenon kuajli okikak iKoneuj akin yenkuiyotl. Kuajli tikmatstokej ika, ijkuak Jesús nemiya nikan ipan tlaltikpaktli, Jehová kuajli okikak nochi tlen okijli ipan iteoyouan (Luc. 5:16). Yejua kuajli okikak ijkuak okitlajtlanili makipaleui makintlapejpeni on 12 itlatitlankauan (Luc. 6:12, 13). Jehová noijki kuajli okikak Jesús ijkuak melak najmantoya. Ijkuak Judas xikitemaktiliaya, Jesús okitlajtlanili iTajtsin makipaleui makixiko nochi tlen kixnamikiskia. Ijkuakon, Jehová xsan okikak  itlasojkaKonetsin, yejua hasta okuajtitlanili se ángel para makiyolchikaua (Luc. 22:41-44).

7. ¿Kenon timomachilia ijkuak tikita ika Jehová kinnankilia moteoyouan?

⁷ Aman, Jehová noijki techkaki ijkuak tiknotsaj niman technankilia ijkuak noneki (Sal. 116:1, 2). Se tokniuj siuatl, akin chanti India, okitak kenon okinankili Jehová. Yejua melak ajmankamikiya niman okitlajtlanili Jehová makipaleui. Tokniuj kijtoua: “JW Broadcasting^® tlen onopanolti ipan mayo de 2019 kiteneuaya tlenon ueliskia tikchiuaskej tla melak tiajmankamikij. ¡Yejon tlen nejua niknekiya nikmatis! Onikitak kenon Jehová okinnankili noteoyouan”.

8. ¿Kenon Jehová okititi Jesús ika kitlasojtlaya?

⁸ Jehová melak techtlasojtla, ijkon ken okitlasojtlak Jesús ijkuak okixnamik tlen ouijtika nikan ipan tlaltikpaktli (Juan 5:20). Okipaleui machikaujto itlaneltokil, kuajli matlanemili niman okimakak nochi tlen kipolouaya. Jehová xopinauj kititis iKoneuj ika kitlasojtla niman ika kiyolpaktia tlen kichiua (Mat. 3:16, TNM; Mat. 3:17). Jesús xkeman san iselti onomachili pampa kuajli kimatstoya ika iTajtsin, akin melak tetlasojtla, nochipa kipaleuiskia (Juan 8:16).

9. ¿Kenon techititia Jehová ika techtlasojtla?

⁹ Tinochimej yotikitakej kenon Jehová techtlasojtla, ijkon ken Jesús okitak. San matikonnemilikan yejuin: Jehová yotechuajuikak ipan ikalpan, kampa nemij miyekej tokniuan akin tikimitaj ken tochanejkauan. Yejuamej melak techtlasojtlaj, techpaleuiyaj kuajli matitlanemilikan niman kuajli imiuan touikaj (Juan 6:44). Jehová, noijki techmaka tlen ika tikchikauaskej totlaneltokil niman techpaleuiya matiknextijtiakan tlen ika topanoltiskej (Mat. 6:31, 32). Ijkuak tikitaj kenon Jehová melak techtlasojtla, tejuamej noijki más tiktlasojtlaj.

10. ¿Kenon uelis tikchiuaskej ijkon ken Jehová kichiua?

¹⁰ Jehová kintlasojtla tokniuan. San ika, kanaj kemantika tejuamej ouijtika tikitaj tikimititiskej ika tikintlasojtlaj. Kemantika ijkon topan nochiua pampa oksekan tiualeuaj niman pampa xsan noijki ken otechiskaltijkej. Niman tinochimej kemantika tikchiuaj itlaj tlen kinkualania noso kinyolkokoua oksekimej. Maski ijkon, tinochimej uelis titlapaleuiskej para nochimej tokniuan manotlasojtlakan, ijkon ken Jehová techtlasojtla (Efes. 5:1, 2; 1 Juan 4:19). Matikitakan kenon techpaleuiya tlen Jehová kichiua.

11. ¿Kenon okiteititi Jesús ika Jehová “sanoyej teiknelia”?

¹¹ Jehová kiteititia ika “sanoyej teiknelia” (Luc. 1:78). Akin teiknelia, najmana ipampa akin tlajyouiyaj niman nokojtilia kinpaleuis niman kinyolseuis. Ijkuak Jesús oteikneli, okiteititi ika Jehová ijkon teikneliani (Juan 5:19). Biblia kijtoua ika ijkuak Jesús “okintak on tojlamej, sanoyej okimiknelij, pampa yejuamej najmanayaj niman xkipiyayaj yolchikaualistli. Yejuamej nemiyaj ken on borreguitos yejuan xkipiyaj intlajpixkau” (Mat. 9:36). San ika, yejua xsan okimikneli, yej okinpajti akin kualouayaj, okinyolchikauj akin chikauak tekitiyaj niman okinyolseui akin melak najmanayaj (Mat. 11:28-30; 14:14).

12. ¿Kenon uelis tikteititiskej ika titeikneliaj?

¹² Tla tiknekij tikimititiskej tokniuan ika tikimikneliaj niman ika tiknekij tikinpaleuiskej, noneki tikitaskej tlenon kixnamiktokej. San matikonnemilikan ika nemi se tokniuj siuatl akin melak kualo. Yejua xkeman itlaj kijtoua, san ika, tla tikpaleuiyaj kanaj melak kitlasojkamatis. ¿Ueli kinmaka tlen kinpoloua ichanejkauan? ¿Kuelitaskia matikpaleuikan ika tlakuajli niman matitlachipauakan  ichan? Noso matikonnemilikan ika se tokniuj tlakatl xok kipiya tekitl. Chika kinextia tekitl, ¿uelis tiktitlaniliskej achijtsin tomintsin maski xkimatis ika tejuamej otiktitlanilijkej?

13, 14. ¿Kenon uelis tikchiuaskej ijkon ken Jehová?

¹³ Jehová kuelita kitemakas tlen kipiya (Mat. 5:45). Tla tiknekij tikteititiskej ika titeikneliaj, xnoneki titepaleuiskej hasta ijkuak tokniuan techijliskej. Tejuamej matiknemilikan kenon uelis tikinpaleuiskej, ijkon ken Jehová kichiua. Maski tejuamej xtiktlajtlaniliaj, yejua mojmostla kichiua makisa tonaltsintli, niman tonaltsintli nochimej kinpaleuiya, xsan akin kitlasojkamachiliaj. ¿Xmelak ika Jehová techititia ika techtlasojtla pampa techmaka nochi tlen techpoloua? ¡Kuajli nesi ika yejua kipiya kuajli iyojlo niman kuelita kitemakas tlen kipiya, yejua ika, melak tiktlasojtlaj!

¹⁴ Miyekej tokniuan kichiuaj ijkon ken Jehová, pampa yejuamej ika nochi inyojlo kinektokej kinpaleuiskej oksekimej ika tlen kipiyaj. Matikitakan tlenon opanok ipan 2013 ijkuak ajakakiyaujtli Haiyan otlaijtlako ne Filipinas. Melak miyekej tokniuan oxoxotonkej inkaluan niman okipolojkej tlen kipiayaj. San ika, imikniuan akin nemij ipan nochi tlaltikpaktli nimantsin okinpaleuijkej. ¿Kenon? Ika tomintsin tlen tiktemakaj niman pampa sekimej tokniuan otlapaleuitoj. San ipan se xiuitl okinyektlalijkej niman okinchijchiujkej kanaj 750 inkaluan tokniuan. Ijkuak panotoya COVID-19, iteixpantijkauan Jehová onokojtilijkej kinmakaskej tokniuan nochi tlen kinpolouaya. Ijkuak nimantsin tikinpaleuiyaj tokniuan, tikimititiaj ika tikintlasojtlaj.

15, 16. Itech tlen kijtoua Lucas 6:36, ¿tlenon noneki tikchiuaskej tla tiknekij tikteititiskej ika tikchiuaj ijkon ken toTaj?

¹⁵ Jehová melak techtlasojtla niman techtlapopoluiya (xpoua Lucas 6:36). Mojmostla, Jehová techititia ika techtlasojtla (Sal. 103:10-14). Noijki ijkon, maski inomachtijkauan Jesús tlajtlakolejkej katkaj, okimititi ika kintlasojtla niman okintlapopolui. Niman yejua hasta okitemakak inemilis para toTajtsin matechtlapopolui ipampa totlajtlakoluan (1 Juan 2:1, 2). ¿Xmelak ika tiknekij más tikinnisiuiskej Jehová niman Jesús ijkuak tikitaj ika techtlasojtlaj niman techtlapopoluiyaj?

 ¹⁶ Ijkuak tikintlapopoluiyaj tokniuan ika nochi toyojlo, más totlasojtlaj (Efes. 4:32). Maski kemantika ouijtika tikitaj titetlapopoluiskej, noneki ijkon tikchiuaskej. Se tokniuj siuatl kijtoua ika melak okipaleui tlamachtijli “Perdónense liberalmente unos a otros” * tlen uajlaya ipan La Atalaya. Yejua kijtoua: “Yejuin tlamachtijli onechpaleui kuajli manitlanemili. Ompa kijtouaya ika, ijkuak titetlapopoluiyaj, xkijtosneki tla tikuelitaj tlen okichiuj akin otechyolkoko noso tla xueyi kijtosneki tlen okichiuj. Tiktlapopoluis akin omitsyolkoko kijtosneki xtiktlauelitas niman tikyejyekos kuajli iuan timouikas”. Ijkuak tikintlapopoluiyaj tokniuan ika nochi toyojlo, tikteititiaj ika tikintlasojtlaj niman ika tikchiuaj ijkon ken toTaj, Jehová.

17. Itech tlen kijtoua Mateo 5:16, ¿tlenon noneki tikchiuaskej tla xtiknekij tiktsokuiloskej itoka toTajtsin?

¹⁷ Melak tiktlasojkamatij pampa tinemij ipan ikalpan Jehová, kampa nemij miyekej tokniuan akin melak techtlasojtlaj. Niman tiknekij ika más miyekej touan makiueyichiuakan Jehová. Ika yejon, xtiknekij tikchiuaskej itlaj tlen makitsokuilo itoka toTajtsin Jehová noso ikalpan. Nochipa tokojtiliaj tikchiuaskej tlen kuajli pampa tiknekij ika akin kipiyaj kuajli inyojlo makinisiuikan toTajtsin (xpoua Mateo 5:16).

18. ¿Tlenon techpaleuis maka matomojtikan tikteijliskej tlen tikneltokaj?

¹⁸ Pampa tikchiuaj ken toTajtsin kineki, kanaj kemantika sekimej xtechtlakaitaskej noso hasta techtlaueltokaskej. ¿Tlenon uelis tikchiuaskej tla tomojtiaj tikteijliskej tlen tikneltokaj? Matikilnamikikan ika Jehová niman iKoneuj techpaleuiskej. Jesús okimijli inomachtijkauan ika maka manomojtikan tla xkimatij tlenon kiteijliskej. Yejua okimijli: “Ijkuak ajsis on hora para nentlajtoskej, Dios mechmakas tlinon nenkijtoskej. On tlajtoltin yejuan nenkijtoskej xnemotech kisas, yej on iEspíritu nemoTajtsin yejua mechmakas on tlajtoltin” (Mat. 10:19, 20).

19. ¿Kenon Robert xonomojti kiteijlis tlen kineltokaya maski kemach yopeujka nomachtia Biblia?

¹⁹ Matikitakan tlenon ipan onochiuj tokniuj  Robert. Ijkuak yejua kemach yopeujka nomachtia Biblia niman ximás miyek kasikamatiya, okuikakej ixpan tekiuajkej ne Sudáfrica. Yejua xonomojti kiteijlis ika xontlapaleuiskia ipan guerra pampa kintlasojtla ikniuan. Kuajli nesi ika kitlasojkamati pampa nemi ipan ikalpan toTajtsin. Se akin kiyolkuitijtoya Robert, okitlajtolti: “¿Akinomej mokniuan?”. Robert xkinemiliaya tla yejon kitlajtoltiskiaj, san ika, okilnamik on texto tlen onoitak ipan yejon tonajli. Okilnamik Mateo 12:50, kampa kijtoua: “San akinon yejuan kichiua on tlen kineki noTa[j]tsin iluikak chanej, on yejua nokniu noso yejua nonanaj”. Maski Robert xiuejkauiya ika nomachtijtoya Biblia, iespíritu santo Jehová okipaleui makinankili nochi tlen okitlajtoltijkej. ¡Kuajli tikmatstokej ika Jehová melak okiyolpakti! Tejuamej noijki tikyolpaktiskej Jehová tla itech titlaneltokaj niman tla xtomojtiaj tikteijliskej tlen kijtoua iTlajtol.

20. ¿Tlenon noneki nochipa tikchiujtoskej? (Juan 17:11, 15).

²⁰ Nochipa matiktlasojkamatikan pampa tinemij ipan ikalpan toTajtsin. Maka matikilkauakan ika Jehová yejua akin más kuajli toTaj niman ika tikinpiyaj miyekej tokniuan tlakamej niman siuamej akin techtlasojtlaj. Satanás niman akin kichiuaj ijkon ken yejua, kinekij matiknemilikan ika toTajtsin Jehová xtechtlasojtla niman kinekij matoxelokan. San ika, Jesús okitlajtlanili iTajtsin matechpaleui nochipa san sekan matinemikan (xpoua Juan 17:11, 15). Niman aman, Jehová kichiujtok ijkon ken okitlajtlanili. Matikchiuakan ijkon ken Jesús niman maka keman matikilkauakan ika toTajtsin techtlasojtla niman techpaleuiya. Kuakon, matokojtilijtokan más tikinnisiuiskej tokniuan.