1. Singambiza ngokuthini uJehova?

UMNDENI wabantu bakaJehova abamlotjhako uhlanganisa uJesu “izibulo layo yoke indalo” neengidi zeengilozi. (Kol. 1:15; Rhu. 103:20) Nakasephasini, uJesu wasiza abantu bazwisisa bona bangabiza uJehova ngokuthi Baba. Nakakhuluma nabafundi bakhe, uJesu wabiza uJehova ngokuthi ‘nguBaba noYihlo.’ (Jwa. 20:17) Nasizinikela kuJehova besibhabhadiswe, siba yingcenye yomndeni othandanako wabafowethu nabodadwethu.—Mar. 10:29, 30.

2. Sizokucoca ngani esihlokwenesi?

² Abanye bakufumana kubudisi ukuqala uJehova njengoBababo onethando. Abanye kungenzeka bakufumana kubudisi ukuthanda abafowabo nabodadwabo. Esihlokwenesi, sizokufunda ngokuthi uJesu usisiza njani siqale uJehova njengoBaba onethando esingakghona ukutjhidelana naye. Sizokufunda kuJehova ukuthi singabaphatha njani abafowethu nabodadwethu.

3. Umthandazo osibonelo usitjhideza njani kuJehova?

³ UJehova nguBaba onethando. UJesu ufuna siqale uJehova ngendlela amqala ngayo, simqale njengombelethi onethando esingakhuluma naye ngananyana ngisiphi isikhathi, ingasi umuntu onganamusa ofuna ukusitjela lokho ekufuze sikwenze. Lokhu sikubona kilokhu uJesu afundisa abafundi bakhe ukuthi bakuthandazele. Wathoma umthandazo osibonelo ngamezwi athi: “Babethu.” (Mat. 6:9) UJesu bekangasitjela bona sibize uJehova ngokuthi ‘ngoSabekako,’[‘Mninimandla woke’ NW], “uMdali,” namkha ‘Kosi yaphakade’  ngombana iBhayibheli lisebenzisa woke amagama la nalihlathulula uJehova. (Gen. 49:25; Isa. 40:28; 1 Thim. 1:17) Nanyana kunjalo, uJesu wasitjela ukuthi sibize uJehova ngokuthi “Babethu.”

4. Sazi njani ukuthi uJehova ufuna sitjhidele kuye?

⁴ Inga-kghani kubudisi kuwe ukuqala uJehova njengoBaba onethando? Kwabanye kubudisi. Nangabe sikhuliswe ngubaba onganamusa, kubabudisi ukukholelwa ukuthi kunobaba osithandako. Nanyana kunjalo, uJehova uyizwisisa kuhle indlela esizizwa ngayo. Kungebangelo afuna sitjhidelane naye. EliZwini lakhe uyasimema uthi: “Tjhidelani kuZimu, naye uzokutjhidela kini.” (Jak. 4:8) UJehova uyasithanda begodu usithembisa ukuthi uzokuba nguBaba ongcono khulu.

5. Ngokomtlolo kaLukasi 10:22, uJesu angasisiza njani sitjhidelane noJehova?

⁵ UJesu usisiza sitjhidelane noJehova. UJesu umazi kuhle uJehova begodu ulingisa patsi ubuntu bakhe, kungebangelo wathi: “Nanyana ngubani ongibonileko ubone noBaba.” (Jwa. 14:9) Njengendodana elizibulo, uJesu usifundisa ukuthi singamhlonipha besimlalele njani uBabethu, singakubalekela njani ukumdanisa nokuthi ngiziphi izinto esingazenza ukuthi simthabise. Usisiza sizwisise kuhle ukuthi uJehova unomusa bewunethando. (Funda uLukasi 10:22.) Akhesicabangele iimbonelo nanzi ezilandelako.

6. Nikela iimbonelo ezitjengisa ukuthi uJehova wamlalela njani uJesu.

⁶ UJehova uyabalalela abantwana bakhe. Cabanga ngendlela uJehova alalela ngayo iNdodanakhe elizibulo. UJehova wayilalela imithandazo eminengi yeNdodanakhe lokha nayisephasini. (Luk. 5:16) Wamuzwa uJesu lokha nakathandaza ngeenqunto eziqakathekileko, njengalokha nakakhetha abapostoli abali-12. (Luk. 6:12, 13) UJehova wawuzwa godu umthandazo kaJesu lokha nakagandelelekileko. Ngaphambi kobana uJudasi amthengise, uJesu wathandaza kuBabakhe malungana nezinto ezibudisi ebezizomehlela kungasikade. UJehova akhenge ezwe umthandazo kaJesu kwaphela kodwana wathumela nengilozi  bona iyokuqinisa iNdodanakhe ayithandako.—Luk. 22:41-44.

7. Kufuze sizizwe njani ngokwazi ukuthi uJehova uyayilalela imithandazwethu?

⁷ Nanamhlanjesi, uJehova usaragela phambili nokulalela imithandazo yabantu bakhe begodu uyiphendula ngesikhathi esifaneleko nangendlela ephuma phambili. (Rhu. 116:1, 2) Akhuzizwele ukuthi udadwethu we-India uthini ngendaba le. Bekaqalene nomraro wokutshwenyeka khulu begodu wathandaza kuJehova ngendaba le. Watlola wathi: “Ihlelo le-JW Broadcasting^® lakaMeyi 2019 ebelikhuluma ngokuthi singaqalana njani nokutshwenyeka khulu langisiza. Beliyipendulo yemithandazwami.”

8. UJehova wamtjengisa njani uJesu ukuthi uyamthanda?

⁸ Indlela uJehova asithanda bekasitlhogomele ngayo iyafana nendlela ebekathanda bewatlhogomela ngayo uJesu nakasephasini enza isabelo sakhe esibudisi. (Jwa. 5:20) Wasiza uJesu ngokuqinisa ukukholwa kwakhe, wamkhuthaza nakagandelelekileko bewaqinisekisa ukuthi unazo zoke izinto azitlhogako bona akghone ukuphila. UJehova watjela indodanakhe ukuthi uyayithanda begodu uyathaba ngayo. (Mat. 3:16, 17) UJesu bekazi ukuthi uBabakhe uzomsiza bekabe naye, lokho kwamenza wazizwa angasi yedwa.—Jwa. 8:16.

9. Sazi njani ukuthi uJehova uyasithanda?

⁹ Soke sizizwele ithando lakaJehova njengoJesu. UJehova usivumele bona sibe bangani bakhe, wasinikela abafowethu nabodadwethu abasithandako nabasikhuthazako nasigandelelekileko. (Jwa. 6:44) UJehova uragela phambili nokusinikela zoke izinto esizitlhogako ezisisiza sibe netjhebiswano elihle naye begodu siragele phambili siphila. (Mat. 6:31, 32) Nasicabanga ngethando uJehova analo ngathi, lokho kusenza simthande khulu.

10. Singafundani endleleni uJehova aphatha ngayo abafowethu nabodadwethu?

¹⁰ UJehova uyabathanda abafowethu nabodadwethu. Nanyana kunjalo, ngezinye iinkhathi kungaba budisi ukuthanda abafowethu nabodadwethu ngebanga lamasiko ahlukileko nangeenzinda ezingafaniko esivela kizo. Soke siyayenza imitjhapho esilinga abanye beyibenze bangathabi. Nanyana kunjalo, soke singalinga ngamandla ukukhulisa ithando esinalo ngabafowethu nabodadwethu. Singakwenza njani lokho? Ngokuthi silingise uBabethu, sithande abafowethu nabodadwethu. (Efe. 5:1, 2; 1 Jwa. 4:19) Akhesibone ukuthi singafundani esibonelweni sakaJehova.

11. UJesu wasitjengisa njani ‘isirhawu’ sakaJehova?

¹¹ UJehova ‘unesirhawu.’ (Luk. 1:78) Umuntu onesirhawu uyatshwenyeka lokha nakabona abantu batlhaga, ngalokho ufuna iindlela zokubasiza nokubaduduza. Indlela uJesu ebekaphatha ngayo abantu, yatjengisa ukuthi uJehova ubaphatha njani abantu. (Jwa. 5:19) Ngesinye isikhathi, uJesu wathi nakabona isiqubuthu, ‘wasirhawukela, ngombana besihlukumezekile, silahliwe njengezimvu ezinganamelusi.’ (Mat. 9:36) UJesu akhenge abarhawukele kwaphela kodwana wenza okuthileko bona abasize. Walapha abagulako, waphumuza ‘abadiniweko nabadisibezwako.’—Mat. 11:28-30; 14:14.

12. Nikela isibonelo sokuthi singatjengisa njani isirhawu.

¹² Lokha nasicabanga ngemiraro abafowethu nabodadwethu abaqalana nayo, sizokukghona ukuba nesirhawu. Ngokwesibonelo, kungenzeka udadwethu unomraro  obudisi wezepilo aqalene nawo. Nanyana kunjalo, akakhulumi ngawo umraro lo kodwana angakuthabela ukusizwa. Inga-kghani uyakghona ukuwutlhogomela umndenakhe? Inga-kghani singamsiza ngokuthi simphekele namkha simhlwengisele indlu? Akhesithi umfowethu ulahlekelwe msebenzi. Inga-kghani singakghona ukumupha imali yokumsiza bekafumane omunye umsebenzi ngaphandle kokumtjela ukuthi ivela kithi?

13-14. Singaba njani nesandla esivulekileko njengoJehova?

¹³ UJehova uyaphana. (Mat. 5:45) Akukafuzi silinde abafowethu nabodadwethu bona basitjele ukuthi batlhoga isizo ngaphambi kokuthi sibarhawukele. NjengoJehova singabenzela izinto ngaphambi kokuthi basibawe. Ngokwesibonelo, usikhanyisela ilanga ngaphandle kokuthi simbawe. Ukutjhisa kwelanga kufuthumeza woke umuntu, ingasi labo abathokozako kwaphela. Awuvumi na ukuthi ngokusenzela koke esikutlhogako, uJehova utjengisa indlela asithanda ngayo? Qala bona simthanda kangangani uJehova ngebanga lokuthi unomusa bewuyaphana.

¹⁴ Abafowethu nabodadwethu balingisa isibonelo sakaJehova ngokuthi babenesandla esivulekileko. Ngokwesibonelo, ngo-2013 isiwuruwuru esikhulu, u-Haiyan sabangela umonakalo omkhulu e-Philippines. Abafowethu nabodadwethu abanengi balahlekelwa mimizabo nezinto zabo. Nanyana kunjalo, abafowethu nabodadwethu ephasini loke bazimisela ukubasekela. Inengi lanikela ngemali, laba nengcenye ekwakheni nekuvuseleleni imakhiwo ebeyigirikile ebeyingaba ma-750 ngaphasi kwesikhathi esingangomnyaka. Ngesikhathi sesindabelaphi i-COVID-19, aboFakazi basebenza budisi ukusiza abafowabo nabodadwabo. Lokha nasingariyadi ukusiza abafowethu nabodadwethu, sisuke sitjengisa ukuthi siyabathanda.

15-16. ULukasi 6:36, uthi ngiyiphi indlela eqakathekileko esingalingisa ngayo uBabethu wezulwini?

¹⁵ UJehova unomusa bewuyalibalela. (Funda uLukasi 6:36.) Qobe lilanga  siyazizwela umusa kaBabethu osezulwini. (Rhu. 103:10-14) Abalandeli bakaJesu bebanesono kodwana nanyana kunjalo, wabalibalela bewabarhawukela. Bekazimisele ukunikela ngokuphila kwakhe bona silitjalelwe izono zethu. (1 Jwa. 2:1, 2) Kghani lokhu akukwenzi uthande uJehova noJesu ngebanga lokulibalela nesirhawu abanaso?

¹⁶ Siqinisa ithando ngabafowethu nabodadwethu ‘nasibalibalela ngokutjhaphulukileko.’ (Efe. 4:32) Nanyana kunjalo, ukulibalela akusilula ngaso soke isikhathi, kungebangelo kufuze sisebenze budisi. Omunye udadwethu uthi isihloko esifumaneka esiThaleni ebesithi “NiLibalelane NgokuTjhaphulukileko” samsiza wakwenza lokho *. Uthi: “Ukufunda isihlokwesi kungisize ngazwisisa ukuthi ukulibalela abanye kusiza mina. Sahlathulula nokuthi ukulibalela akutjho ukuthi sithi indlela embi esiphethwe ngayo ilungile namkha akhenge isizwise ubuhlungu. Kunalokho, ukulibalela kutjho ukuthi awusababambeli amavunda begodu uzokufumana ukuthula.” Nasilibalela abafowethu nabodadwethu ngokutjhaphulukileko, sitjengisa ukuthi siyabathanda besilingisa uBabethu uJehova.

17. Ngokomtlolo kaMatewu 5:16, singamdumisa njani uBabethu wezulwini?

¹⁷ Sikuthabela khulu ukuba mndeni nabafowethu nabodadwethu abavela ephasini loke abathandanako. Sifuna abantu abanengi bahlanganyele nathi ekulotjheni uZimethu. Akukafuzi senze nanyana yini engenza abantu bacabange kumbi ngoJehova namkha abantu bakhe. Silinga ukuziphatha ngendlela ezokwenza abantu bafunde ngoJehova begodu bamlotjhe.—Funda uMatewu 5:16.

18. Khuyini engasisiza sitjhumayele ngesibindi?

¹⁸ Ngezinye iinkhathi, abanye bangasihleka namkha basihlunguphaze ngebanga lokuthi silalela uBabethu wezulwini. Khuyini ekufuze siyenze nangabe siyasaba ukukhuluma nabanye ngalokho esikukholelwako? Singaqiniseka ngokuthi uJehova noJesu bazosisiza. UJesu watjela abafundi bakhe  ukuthi akukafuzi batshwenyeke ngalokho abazokutjho. Kubayini? Wahlathulula wathi: “Nizokunikelwa khonokho enizakukhuluma; ngombana akusini enizabe nikhuluma, kodwana kuzaba mmoya kaYihlo ozonikhulumela.”—Mat. 10:19, 20.

19. Nikela isibonelo somuntu owatjhumayela ngesibindi.

¹⁹ Cabanga ngesibonelo saka-Robert. Nakasafundelwa, bekanelwazi elincani ngeBhayibheli. Nanyana kunjalo, wakghona ukuziphendulela ekhotho yeSewula Afrika lapha bambuza khona ukuthi kubayini angafuni ukungenela ubusotja. Ngesibindi, wahlathululela ikhotho ukuthi bekangafuni ukuthatha ihlangothi ngebanga lokuthanda abafowabo nabodadwabo abamaKrestu. Bekakuthokozela ukuba yingcenye yomndeni kaJehova. Ijaji lambuza lathi, “Bobani abafowenu?” URobert bekangakawulindeli umbuzo loyo kodwana msinyana wakhumbula lokho okwatjhiwo mtlolo welangelo. BekunguMatewu 12:50 obewuthi: “Nanyana ngubani owenza intando kaBaba osezulwini, loyo nguye ongumfowethu nodadwethu nomma.” Ngitjho nanyana uRobert bekasafundelwa iBhayibheli, ummoya kaJehova wamsiza wakghona ukuphendula umbuzo loyo neminye eminengi ebekangakayilindeli. UJehova wazikhakhazisa khulu ngo-Robert. UJehova uyazikhakhazisa ngathi lokha nasithembela kuye besimjamele ngesibindi nasiqalene nobujamo obubudisi.

20. Kufuze sizimisele ukwenzani? (Jwanisi 17:11, 15)

²⁰ Asirageleni phambili sithabela iimbusiso zokuba malunga womndeni kaZimu. Sinobaba ophuma phambili ukubadlula boke nabafowethu nabodadwethu. Kufuze sihlale sikuthokoza lokho. USathana nabalandeli bakhe bafuna sizaze ithando lakaBabethu wezulwini begodu balinga ukuthikazisa ukuthula esikuthabelako. Nanyana kunjalo uJesu wathandaza kuBabethu wezulwini, wasibawela ukuthi umndenethu lo uhlale ubumbene. (Funda uJwanisi 17:11, 15.) UJehova uyawuphendula umthandazo loyo. NjengoJesu asingathomi sizaze ithando nesekelo lakaBabethu wezulwini. Asizimiseleni ukuragela phambili sitjhidelana noJehova nabafowethu nabodadwethu.