1. Beʼoodląʼ dabidziilii haitʼéego Jiihóvah yił kʼé daʼahidiʼní?

JIIHÓVAH deidósinii, Jesus (tʼáá ałtsoní bítséedi ábiʼdiilyaii) dóó diyingo ndaalʼaʼí éí tʼáá ałtso Jiihóvah bifamily danilı̨́. (Col. 1:15; Ps. 103:20) Nihokáaʼgi naagháhą́ądą́ą́ʼ, Jesus éí diné beʼoodląʼ dabidziilii Jiihóvah Nihizhéʼé nahalingo baa nitsídaakees yidííniid. Bídahoołʼaahii ííłní: “Shizhéʼé tʼáá éí nihí ałdóʼ Nihizhéʼé.” (John 20:17, NW) Jiihóvah baa ázhditʼaahgo baptize áhoʼdilʼįįh, áko bighan hazʼą́ągi brothers dóó sisters ayóóʼádaʼóʼníinii bitah jigháá.—Matt. 19:29.

2. Haʼátʼíí baa nídadíitʼįįł?

² Jiihóvah, Azhéʼé ayóóʼóʼóʼníinii, Shizhéʼé deiłníi doogo łaʼ bá nidantłʼa. Łaʼ éí brothers dóó sisters ayóóʼádayóʼníi doo yę́ę bá nidantłʼa. Baa nídadíitʼįįłígíí éí Jiihóvah Shizhéʼé bidiiʼníi dooleełgi Jesus yee nihíká adoolwoł. Áko Jiihóvah Nihizhéʼé ayóóʼánihóʼní áádóó nihił hólǫ́ǫgo baa nitsíikees doo. Jiihóvah bedaʼiilʼı̨́įgo brothers dóó sisters ałdóʼ ayóóʼííníʼní dadiidleeł.

3. Jesus sodizin yee naʼneeztą́ą́ʼ yę́ę binahjįʼ haitʼéego Jiihóvah bééhodiilzįįł?

³ Jiihóvah éí Azhéʼé ayóóʼóʼóʼníinii nilı̨́. Jesus éí Jiihóvah yééhósingi átʼéego Jiihóvah bééhodiilzįįł nihóʼní. Azhéʼé ayóóʼóʼóʼníinii éí bá áhwiinítʼı̨́, doo éí tʼóó hashkée da. Jesus éí Shizhéʼé béédahodoosįįł hóʼníigo bídahoołʼaahii sodizin yee neineeztą́ą́ʼ. Sodizin kótʼéego hayííłtʼiʼ: “Nihizhéʼé.” (Matt. 6:9, NW) “Aláahgo Ayóóʼábóodziilii,” ‘Íʼiilaii,’ doodaiiʼ ‘Ahóyéelʼáágóó Naatʼáanii’ éí łahda Jiihóvah  bee wójí, ndi Jesus éí Jiihóvah “Shizhéʼé” yidííniid. (Gen. 49:25; Isa. 40:28; 1 Tim. 1:17) Shizhéʼé jiníigo éí tʼáá íiyisíí áhánígo kʼé haʼníinii átʼé.

4. Jiihóvah áhánígo nihił honishłǫ́ǫ doo nízinígíí haitʼéego nihił béédahózin?

⁴ Łaʼ Jiihóvah Shizhéʼé deiłníi doogo bá nidantłʼa. Niísh ákónítʼé? Azhéʼé ayóóʼóʼóʼní baa náhátʼı̨́įgo bá nidantłʼa, háálá bizhéʼé yéigo atídabiilaa doodaiiʼ bizhéʼé tʼáágééd daneeyą́, áko yínííł danilı̨́. Díí tʼáá ałtso Jiihóvah nihá yaa ákonízin, éí binahjįʼ nihaa joobaʼ. Ahánígo nihił honishłǫ́ǫ doo nihóʼní. Haʼahóní yee Bizaad kóní: “Diyin God ahánígo bił honiidlǫ́ǫ doo, áádóó bí ałdóʼ ahánígo nihił hólǫ́ǫ doo.” (Jas. 4:8, NW) Jiihóvah ayóóʼánihóʼní, áádóó Azhéʼé tʼáadoo bináłtʼéii nishłíi doo nízin.

5. Luke 10:22 bikʼehgo Jesus haitʼéego nihíká adoolwołgo Jiihóvah bééhodiilzįįł?

⁵ Jesus nihíká adoolwołgo Jiihóvah bééhodiilzįįł. Jesus éí Jiihóvah áhánígo yee hósin, áko yee átʼéii nizhónígo yeełtʼé. Éí biniinaa ání, “Tʼáá háiida shiiłtsánígíí éí Azhéʼé yiyiiłtsą́.” (John 14:9, NW) Jesus éí nihínaaí nahalingo Nihizhéʼé nihił danilı̨́įgo bikʼeh dahonołʼı̨́ níigo yee nanihinitin. Akʼeh honiilʼı̨́įgo éí Jiihóvah nihaa bił hózhǫ́. Nihookáaʼgi Jesus hiná ńtʼééʼ yę́ę nélʼı̨́įgo éí Jiihóvah joobaʼ dóó ayóóʼóʼóʼní tʼáá bééhózíní. (Luke 10:22 yíníłtaʼ.) Jiihóvah átʼéii łaʼ dadíníilʼįįł.

6. Jesus bisodizin Jiihóvah yidiiztsʼą́ą́ʼ yę́ę łaʼ baa chʼíhoníʼaah.

⁶ Jiihóvah éí baʼáłchíní yiyíistsʼą́ą́ʼ. Jiihóvah biYeʼ Jesus, tsʼídá áłtsé bá yizhchíinii, yiyíistsʼą́ą́ʼ yę́ę baa nitsíníkees. Jiihóvah biYeʼ nihookáaʼgi naagháhą́ądą́ą́ʼ bisodizin tʼáá ałtso yidiiztsʼą́ą́ʼ. (Luke 5:16) Ídahoołʼaahii naakitsʼáadah néididoonił índa ílı̨́įgo bee nihodidootʼáałii yiniyé Jesus éí Bizhéʼé yichʼįʼ sodoolzin. (Luke 6:12, 13) Jesus tʼáá íiyisíí nitseeltłahgo sodilzingo ałdóʼ Bizhéʼé bidiiztsʼą́ą́ʼ. Diné bílákʼeejįʼ ninábidiʼdootʼááł  bichʼįʼ hoolzhishgo, Jesus éí bá nantłʼa dooleełii yéigo biʼdiiłʼáago Bizhéʼé yichʼįʼ sodoolzin. Hazhéʼé hodiiztsʼą́ąʼgo diyingo naalʼaʼí hadziil áhodoolííł biniyé hachʼįʼ ayííłʼaʼ.—Luke 22:41-44.

7. Jiihóvah bá ndaalʼaʼí bisodizin yidiitsʼaʼ, éísh nijéí nayiiłná?

⁷ Dííshjı̨́įdi, Jiihóvah bá ndaalʼaʼí bisodizin yiyíistsʼą́ą́ʼ, áádóó baa hwiilzhíishgo hoł ííshjání ádeileʼ. (Ps. 116:1, 2) Indiadi nihisister łaʼ bisodizin bá diistsʼą́ąʼgo baa haneʼ. Sister éí bíniʼ bide átʼéego yikʼee tiʼhoonííh, áko náʼookąąhgo Jiihóvah yichʼįʼ sodoolzin. Kóní: “May 2019 JW Broadcasting^® naaskid yę́ę éí shidaʼdiiłʼáhígíí índa shide ádaatʼéii biniyé sodiszin yę́ę shił ííshjání ályaa.”

8. Jiihóvah éí Jesus haitʼéego ayóóʼáyóʼníí ńtʼééʼ?

⁸ Nihokáaʼgi Jesus bichʼįʼ anáhóótʼiʼgo Bizhéʼé ayóóʼábóʼníigo baa áhályą́ą́ ńtʼééʼ, nihí ałdóʼ tʼáá ákótʼéego nihaa áhályą́. (John 5:20) Jesus éí diyin kʼehgo yigáał yę́ę, bíniʼ siláagi, áádóó bitsʼíís átʼéii Jiihóvah yee baa áhályą́ą́ ńtʼééʼ. Doo tʼą́ą́ʼ kótʼéégóó biYeʼ Jesus ayóóʼáyóʼníigi índa yaa bił hózhǫ́ǫgi yee yichʼįʼ yáłtiʼ ńtʼééʼ. (Matt. 3:16, 17) Yáʼąąshdę́ę́ʼ Bizhéʼé tʼáá áłahjįʼ bił hólǫ́, áko Jesus doo tʼáá sáhí áníshtʼé nízin da.—John 8:16.

9. Jiihóvah ayóóʼánihóʼníigi haitʼéego nihił béédahózin?

⁹ Jesus nahalingo, tʼáá áníiltso Jiihóvah ayóóʼánihóʼníigo baa ákodaniidzin. Díí hazhóʼó nabikʼítsíníłkees: Jiihóvah wóshdę́ę́ʼ nihidííniid áádóó baʼáłchíní bił dahózhǫ́ǫgo dah yikahígíí éí nihił hózhǫ́ǫgo ádanihósin. Kótʼéego éí nihíniʼ doo nihide átʼée da doo. (John 6:44) Níłchʼi chʼiyáán bee nihidziil diidleeł. Jiihóvah éí níłchʼi chʼiyáán tʼáá áłahjįʼ nihichʼįʼ kwííłʼı̨́. Tʼáá ałtso bídin daniidlínígíí nihá yaa ákonízin. (Matt. 6:31, 32) Jiihóvah ayóóʼánihóʼníigi baa nitsíikeesgo, nihídę́ęʼgo ałdóʼ ayóóʼííníiʼní diidleeł.

10. Jiihóvah éí brothers dóó sisters ayóóʼáyóʼnínígi bitsʼą́ą́dóó haʼátʼíí bídahwiidiilʼááł?

¹⁰ Jiihóvah éí nihibrothers dóó nihisisters ayóóʼáyóʼní. Nihí éí ákódaniitʼée dooleełgi nihá nidantłʼa łeh. Háálá łahgo átʼéego nihiyaa dahooʼaʼ áádóó daʼníłtsʼą́ą́dę́ę́ʼ nideiikai. Nidaʼiyiilzíhígíí biniinaa łaʼ yikʼee doo bił dahózhǫ́ǫ da łeh. Ákótʼée ndi, ayóóʼóʼóʼní beego éí diyin kʼehgo nihił hazʼą́ą doo. Haitʼéego ádadiiʼnííł? Nihizhéʼé bedaʼiilʼı̨́įgo nihibrothers dóó nihisisters ayóóʼádeíníiʼníi doo. (Eph. 5:1, 2; 1 John 4:19) Iishją́ą́ shı̨́ı̨́ Jiihóvah ádzaaígíí bitsʼą́ą́dóó haʼátʼíí bídahwiidiilʼááł.

11. Jesus éí Bizhéʼé bibee “ajoobaʼ” haitʼéego nizhónígo yeełtʼé?

¹¹ Jiihóvah éí aa joobaʼ. (Luke 1:78) Diné aa joobaʼii éí diné tiʼdahooníihgo yaa ákonízin, áko joobaʼgo áká iilwoʼ. Jesus éí Bizhéʼé Jiihóvah yeʼełʼı̨́įgo aa joobaʼ. (John 5:19) Jesus kódzaago baa haneʼ, “Diné yílʼáhígíí . . . baa aʼááh jiniizı̨́ı̨́ʼ, háálá dibé yaa áhályáanii ádin nahalingo bichʼįʼ nidahwiiʼná áádóó tʼáadoo bíká oolyeedí da.” (Matt. 9:36) Jesus haa joobaʼgo háká eelwod, doo éí tʼóó ayóóʼádanihííníshʼní hodííniid da. Bąąh dah nahazʼánígíí náyííłdzííʼ áádóó naanish bide ádaatʼéii índa biyéél dandaazii éí háádaałyı̨́įhgo ánihideeshłííł, yidííniid.—Matt. 11:28-30; 14:14.

12. Haitʼéego aa dajiiniibaʼ doo? Łaʼ baa chʼíhoníʼaah.

¹² Nihibrothers dóó nihisisters bee bichʼįʼ anáhóótʼiʼígíí bá baa ákoniidzingo éí  baa jiiniibaʼ doo. Sister tʼáá yéigo bąąh dahazʼánígíí doo kóníshtʼé níi da łeh, ndi łaʼda háká oolyeed shı̨́ı̨́ nízin. Bighan hazʼą́ągi yaa áháyą́ągi shı̨́ı̨́ bá nantłʼago átʼé. Chʼiyáán álʼı̨́įgi doodaiiʼ hooghan hashtʼe hólzingi daatsʼí bíká adiilwołgo átʼé? Brother łaʼda binaanish daatsʼí bitsʼąą ásdįįd. Béeso tʼáá áłchʼı̨́dígo daatsʼí bee bíká adiilwoł? Nízhiʼ doo bikááʼgóó bá nidííłtsosgo átʼé.

13-14. Jiihóvah bił hadleeʼígi átʼéego, haitʼéego nihił hadleeʼ doo?

¹³ Jiihóvah éí bił hadleeʼ. (Matt. 5:45) Jiihóvah átʼéhígi átʼéego, shíká anílyeed nidiʼdooʼniił tʼáá bítséedi brothers dóó sisters baa jiiniibaʼgo bíká adiilwoł. Jiihóvah éí doo haʼátʼíhída bídeíníikeed da ndi, tʼáá ákwíí jı̨́ jóhonaaʼéí bitsʼádiʼnídínígíí índa bitsʼáníłdoii yee nihaa áhályą́. Azhą́ doo bichʼįʼ ahééh danízinígíí ndi yaa áhályą́. Nił yáʼátʼééh shı̨́ı̨́ Jiihóvah nihaa áhályánígíí, éí ayóóʼánihóʼníigo átʼı̨́. Jiihóvah nihaa joobaʼígíí dóó nihichʼįʼ bił hadleeʼígíí binahjįʼ ayóóʼádeíníiʼní!

¹⁴ Jiihóvah bił hadleeʼígi átʼéego, ląʼí brothers dóó sisters bił dahadleeʼ. Baa nitsíníkees, 2013 yę́ędą́ą́ʼ Philippinesdi, tó bitsʼą́ą́dóó níyoltsoh Haiyan wolyéego ayóó átʼéego hóółchǫʼ. Brothers dóó sisters bighan índa binaalyeʼé nidahaazhchxǫʼ. Ákondi daʼníłtsʼą́ą́ʼdę́ę́ʼ diyin kʼehgo bikʼis danilínígíí bíká ííjééʼ. Łaʼ béeso yee áká ííjééʼ, łaʼ éí kin dóó hooghan dááchxǫʼ yę́ę hashtʼéédayiidlaa. Łaʼ nááhaijįʼ hooghan 750 ánéelą́ą́ʼ hashtʼéédayiidlaa! COVID-19 naałniihgo, Jiihóvah bidineʼé ayóó átʼéego bibrothers dóó sisters yíká ííjééʼ. Nihibrothers dóó sisters bichʼįʼ anáhóótʼiʼ haleehgo, tsı̨́įłgo bíká adiilwołgo éí ayóóʼííníiʼníigo íitʼı̨́.

15-16. Luke 6:36 bikʼehgo, Nihizhéʼé yáʼąąshdi hólóonii haitʼéego nizhónígo bedaʼiilʼı̨́į doo?

¹⁵ Jiihóvah éí hojoobaʼ yee niʼiilzííh yóóʼidiyiiʼaah. (Luke 6:36 yíníłtaʼ.) Nihizhéʼé yáʼąąshdi hólóonii tʼáá ákwíí jı̨́ nidaʼayiilzííh nihá yóóʼidiyiiʼaah. (Ps. 103:10-14) Jesus bídahoołʼaahii nidaʼiisííh ńtʼééʼ, ákondi yaa joobaʼgo yá yóóʼidiyiiʼaah  ńtʼééʼ. Nidaʼayiilzííh nihá yóóʼadidootʼááł biniyé Jesus beʼiinaʼ nihá ninéidiníʼą́. (1 John 2:1, 2) Jiihóvah dóó Jesus éí hojoobaʼ yee niʼiilzííh á yóóʼidiyiiʼaah, éí binahjįʼ áhą́dígo bił honiidlǫ́ǫ doo daniidzin.

¹⁶ Niʼiilzííh ‘ahá yóóʼanídahidiitʼaahgo’ éí niheʼayóóʼóʼóʼniʼ bidziil dadooleeł. (Eph. 4:32) Łaʼda niʼiilzííh bá yóóʼazhdidooʼáałgo nanitłʼah ndi binjilnishgo hashtʼéédoolnííł. Sister łaʼ Watchtower bíhooʼaah “Forgive One Another Freely” wolyéhígíí háká eelwodgo náánáłaʼ niʼiilzííh bá yóóʼazhdííʼą́. * Kótʼéego hojilneʼ: “Díí bíhooʼaah binahjįʼ éí ná yóóʼadishʼaah haʼníigi yáʼátʼéehgo bikʼiʼdiitą́. Łaʼda niʼiilzííh bá yóóʼazhdiʼaahgo éí doo tʼóó bíniʼdii ádzaa haʼníigo áhyiłníi da. Asziihígíí doo bikʼijįʼ jisʼą́ą da, índa hoł hodéesyéel dooleełgo áhyiłní.” Niʼiilzííh ahá yóóʼanídahidiitʼaahgo éí Nihizhéʼé Jiihóvah ayóóʼánihóʼnínígíí bedaʼiilʼı̨́.

17. Matthew 5:16 bikʼehgo, haitʼéego Nihizhéʼé yáʼąąshdi hólóonii baa dahwiiʼniih doo?

¹⁷ Nahasdzáán tʼáá siʼą́ą́ ńtʼééʼ brothers dóó sisters ayóóʼádaʼahóʼníigi baa ahééh hwiindzin. Ląʼí diné nihíighahdóó Jiihóvah deidósin doo daniidzin. Nihizhéʼé yáʼąąshdi hólóonii doodaiiʼ bidineʼé doo yáʼátʼééhgóó bidiʼnélʼı̨́ dooleełgi baa siitiʼ doo. Haneʼ yáʼátʼéehii deidínóozįįł biniyé ádeiʼníiłgi bee ádaa ádahwiilyą́ą doo.—Matthew 5:16 yíníłtaʼ.

18. Haʼátʼíí nihíká adoolwołgo doo nihił yééʼgóó nahwiilneʼ doo?

¹⁸ Nihizhéʼé yáʼąąshdi hólóonii bikʼeh honiilʼínígíí biniinaa łahda nihaa náhátʼı̨́ doodaiiʼ atínihiʼdilʼı̨́į łeh. Diyin Bizaad yiniidlą́ągi baa yéiiltiʼ bikʼee nihił yéeʼgoshąʼ? Jiihóvah dóó Jesus baʼííníidlíigo éí nihíká ahidíʼnóolchéełgo átʼé. Jesus bídahoołʼaahii éí nihá ádahwiinítʼı̨́įgo bee hadadoodzihígíí tʼáadoo ayóó nihidaʼdiiłʼáhí, yidííniid. Jesus áháłní: “Bee hadadoohdzihii  áadi índa nihił béédahodoozįįł, háálá nihí doo hadoohdzih da, ndi Nihizhéʼé biníłchʼi diyinii bee hadoodzih.”—Matt. 10:19, 20, NW.

19. Łaʼda doo bił yééʼgóó nahasneʼígíí baa chʼíhoníʼaah.

¹⁹ Robert ádzaaígi ádadiiʼnííł. Éí South Africadę́ę́ʼ nijighá áádóó Diyin Bizaad bíhojiiłʼaah. Military court bidááhdóó jizı̨́įgo haʼátʼíí biniinaa doo atah nanibaah da, hoʼdooʼniid. Shibrothers ayóóʼádeíníshʼní, éí biniinaa doo háájída atah naashbaah da jiníigo doo hoł yééʼgóó hajoodzííʼ. Ánahwiiʼaahii tʼáá naʼníleʼdii “Háísh éí nibrothers?” hodííniid. Robert éí díí naʼídíkid doo nijólíi da ńtʼééʼ, ndi Diyin Bizaad biiʼ Matthew 12:50 jííłtaʼ yę́ę bééjoolniiʼ. Éí ání: ‘Tʼáá háiida Shizhéʼé yáʼąąshdi hólóonii íinízinii biʼjiłʼínígíí éí shitsilí áádóó shideezhí índa shimá jílı̨́.’ Jiihóvah bidineʼé bitah jílínígíí baa ahééh jinízin! Azhą́ Robert kʼad índa Diyin Bizaad bíhojiiłʼaah ndi, Jiihóvah biníłchʼi diyinii háká eelwod, áko ląʼígóó nahódéékid yę́ę hazhóʼó baa hojoolneʼ. Jiihóvah éí Robert tʼáá íiyisíí yaa bił hózhǫ́! Azhą́ nihá nanitłʼah ndi, Robert ádzaaígi íidzaago, Jiihóvah nihaa bił hózhǫ́ǫ doo.

20. Wołí bee haa deiitʼı̨́į doo? (John 17:11, 15)

²⁰ Diyin kʼehgo hooghan atah niidlı̨́įgi baa ahééh daniidzin. Azhéʼé tʼáadoo bináłtʼéii Danihizhéʼé áádóó brothers dóó sisters ayóóʼádanihóʼníinii tʼóó ahayóí. Díí tʼáá ałtso baa ahééh daniidzin doo. Séítan dóó bikééʼ naazínígíí éí Nihizhéʼé Jiihóvah ayóóʼánihóʼnínígíí yoochʼííd átʼé daaní, áádóó łáʼí daniidlínígíí yikʼee diniih, áko Jiihóvah bitsʼá hizhdookah nihóʼní. Ákótʼée ndi, Jesus éí Bizhéʼé nihikʼi déezʼı̨́ı̨́ʼ índa łáʼí daniidlı̨́į doogo nihá sodoolzin. (John 17:11, 15 yíníłtaʼ.) Jiihóvah éí Jesus bisodizin yiʼoolííł. Jesus nahalingo, doo nihił naaki danilı̨́ı̨́góó Nihizhéʼé yáʼąąshdi hólóonii ayóóʼánihóʼní. Wołí bee ádeitʼı̨́įgo diyin kʼehgo hooghan hazʼą́ągi atah honiidlǫ́ǫ doo.