1. Oñgeni ovanthu vapondola okutala Siovaa?

OMBUNGA ya Siovaa, ovaumbili vae aveho na Sesusi “otyiveli kovipuka aviho atunga,” no noandyu ononyingi-nyingi. (Kolo. 1:15; Sal. 103:20) Etyi Sesusi eli pano pohi, wakuatesileko ovanthu ovakuatyili okunoñgonoka okuti vapondola okutala Siovaa ngatyina o Tate yavo. Etyi ekahi nokupopia novalanduli vae, Sesusi wapopile okuti Siovaa o ‘Tate yange tupu o Tate yenyi.’ (Suau 20:17) Tyina tuamapakula omuenyo wetu ku Siovaa atumbatisalwa tukala mombunga yovakuatate nonomphange velihole unene. — Malu. 10:29, 30.

2. Oityi matulilongesa monthele ei?

² Ovanthu vamwe, tyivepuiya okutala Siovaa nga He yavo una oluembia. Ovakuavo kavetyivili okulekesa okuti vehole ovakuatate vavo nonomphange. Monthele ei, matutale oñgeni Sesusi etukuatesako okutala Siovaa nga tate yetu yoluembia, una onthue tupondola okukala epanga liae. Tupu, matulilongesa oñgeni tupondola okuhetekela Siovaa mokutekula ovakuatate vetu nonomphange.

3. Oñgeni elikuambelo Sesusi etulongesa litukuatesako okufuena ku Siovaa?

³ Siovaa o Tate una oluembia. Sesusi uhanda tutale Siovaa ngetyi emutala, okumutala nga tate una oluembia tupondola okutomphola nae oola tuhanda, atuhemutale nga tate utukuluminya okulinga vala ovipuka ahanda. Otyo tutyitalela konkhalelo alongesile ovalongwa vae oñgeni vena okulikuambela. Sesusi wati likuambelei okuti: “Tate yetu.” (Mat. 6:9) Sesusi ankho upondola okutupopila opo tuiihane Siovaa okuti  “Mukulami,” “Mutungi,” ine “Ohamba ya apeho.” Ngetyi Ombimbiliya ipopia omanyina oo aeho aviuka. (Gên. 49:25; Isa. 40:28; 1 Tim. 1:17) Mahi Sesusi wetupopia opo tuiihane Siovaa okuti “Tate.”

4. Oñgeni tutyii okuti Siovaa uhanda tukale omapanga ae?

⁴ Okuti tyikupuiya okutala Siovaa nga Tate una oluembia? Vamwe tyivepuiya. Inkha ovo tate yetu ankho vetutekula onya, tyipondola okutupuiya okutala Siovaa nga tate una oluembia. Siovaa utyii omokonda yatyi tulitehelela ngotyo. Iya otyo tyitupameka! Siovaa uhanda tukale omapanga ae. Mokonda Mondaka yae Ombimbiliya wetupopila okuti: ‘Fuenei ku ame, na ame ndyifuene ku onwe.’ (Tia. 4:8) Siovaa utuhole unene iya wetupopila okuti o he ukahi vali nawa tupondola okukala nae.

5. Ngetyi tyipopia Luka 10:22, oñgeni Sesusi etukuatesako okufuena ku Siovaa?

⁵ Sesusi upondola utukuatesako okukala omapanga a Siovaa. Sesusi wii nawa Siovaa iya uhetekela nawa ovituwa viae. Otyo apopilile okuti: “Una weete ame, tupu weete Tate.” (Suau 14:9) Ngetyi omona omukulu alongesa onondenge mbae, okulinga onthilo nokutavela ovo tate yavo na Sesusi otyo alinga. Tupu, Sesusi utulongesa etyi tuesukisa okulityilika na tuhanumanese Siovaa netyi tuesukisa okulinga opo tumuhambukiswe. Mahi etyi ali pano pohi, Sesusi wetukuatesako okunoñgonoka okuti Siovaa una okankhenda noluembia. (Tanga Luka 10:22.) Tutalei onongeleka mbumwe.

6. Popia onongeleka mbulekesa okuti Siovaa ankho utehelela Sesusi tyina elikuambela.

⁶Siovaa utehelela ovana vae. Tutalei onongeleka mbumwe mbulekesa okuti Siovaa ankho utehelela Omona wae wotyiveli. Siovaa apeho ankho utehelela omalikuambelo Omona wae etyi eli pano pohi. (Luka 5:16) Watehelele elikuambelo lya Sesusi etyi elikuambela akoye ono apositolu 12. (Luka 6:12, 13) Tupu watehelele elikuambelo lya Sesusi etyi eihamenwa unene. Etyi Sunda ehenemulavisi Sesusi welikuambelele unene ku  Siovaa emupopila eheteko ankho malambela. Siovaa ehemutehelela vala tyapwa, mahi tupu atumu oandyu opo imupameke. — Luka 22:41-44.

7. Oñgeni tukala okunoñgonoka okuti Siovaa ukumbulula omalikuambelo etu?

⁷ Hono Siovaa utualako okutehelela omalikuambelo etu, tupu weekumbulula momuvo watyo monkhalelo yaviuka. (Sal. 116:1, 2) Tutalei ongeleka ilekesa oñgeni omphange umwe ukala ko India amona okuti Siovaa wakumbulula elikuambelo liae. Omphange oo ankho walinga unene otyiho iya elikuambela ku Siovaa emupopila otyitateka tyae. Omphange oo wahoneka okuti: “O JW^® Broadcasting yohanyi ya Maio yo 2019 yapopile konthele yokukala notyiho otyipuka ankho nesukisa umwe pomuvo pana. Tyina ankho ekumbululo lielikuambelo liange.”

8. Omononkhalelo patyi Siovaa alekesa okuti uhole Sesusi?

⁸ Siovaa utuhole ngetyi ankho ehole omona wae Sesusi etyi eli pano pohi. (Suau 5:20) Siovaa ankho ukuatesako Sesusi okukala nekolelo liapama, nokumupameka tyina eihamenwa nokumuavela etyi esukisa opo elitekule. Tupu Siovaa wapopilile omona wae okuti umuhole iya wemupanda unene. (Mat. 3:16, 17) Sesusi ankho utyii okuti Tate yae woluembia makala nae nokumukuatesako, mokonda yotyo ankho kelitehelela okuti omulike. — Suau 8:16.

9. Ovipuka patyi tuna vilekesa okuti Siovaa utuhole?

⁹ Nga Sesusi nonthue tuna ovipuka ovinyingi vilekesa okuti Siovaa utuhole. Nkhele soka kovipuka evi: Siovaa wayeka tukale omapanga ae, wetuavela ovakuatate nonomphange vetuhole unene nokutupameka tyina tuna ovitateka. (Suau 6:44) Siovaa tupu utuavela atyiho tuesukisa opo tukale nekolelo liapama. Tupu Siovaa utuavela ovipuka tuesukisa tukale nomuenyo. (Mat. 6:31, 32) Tyina tusoka koluembia Siovaa ena nonthue, tumuhumba vali.

10. Oityi tulilongesila konkhalelo Siovaa atekula ovakuatate vetu nonomphange?

¹⁰ Siovaa uhole unene ovakuatate vetu nonomphange. Mahi ku onthue pamwe okulekesa okuti tuhole ovakuatate vetu nonomphange tyipondola okutupuiya. Tyipuiya tupu omokonda tuatuka monombunga mbelikalaila nokuna ovituwa vielikalela. Tupu, atuho tulinga ovipuka vipondola okuihamesa ine okunumanesa vakuetu. Mahi no ngotyo onthue atuho tupondola okulinga tyimwe opo, tuyawise koluembia luetu na vakuetu. Tutyilinga ñgeni? Oputyina tuhetekela Tate yetu Siovaa, atukala noluembia novakuatate vetu nonomphange. (Efe. 5:1, 2; 1 Suau 4:19) Tutalei etyi tulilongesila ku Siovaa.

11. Oñgeni Sesusi ahetekela “okankhenda ka Huku”?

¹¹Siovaa o Huku “yokankhenda.” (Luka 1:78) Omunthu wokuna okankhenda oyouna uti tyina amona vakuavo valambela movitateka alingi tyimwe nga evekuateseko nokuveungumanesa. Sesusi ankho uhetekela okankhenda ka Siovaa monkhalelo atekula ovanthu. (Suau 5:19) Etyi onthiki imwe Sesusi amona ovanthu ovanyingi ‘akala nokankhenda navo, mokonda vamoneswa ononkhumbi nokulingwa onya, ngonongi mbehena omunthita.’ (Mat. 9:36) Tyihe-kukala vala nokankhenda navo tupu alingi tyimwe opo evekuateseko. Sesusi ankho uhakula vokuavela nokukuatesako vana vena “ovilinga vialema, nokualemenwa.” — Mat. 11:28-30; 14:14.

12. Popia ongeleka ilekesa oñgeni tupondola okukala nokankhenda novakuatate vetu?

 ¹² Inkha tusoka kovitateka ovakuatate vetu nonomphange vena, matutyivili okukala nokankhenda navo. Mongeleka, soka ñgeno omphange umwe una otyitateka tyekongoko. Tyipondola ketupopila ovitateka viae mahi inkha tumukuatesako mahambukwa unene. Okuti ukahi nokutyivila okukuatesako ombunga yae? Okuti tupondola okumukuatesako okuteleka nokukomba meumbo ine otyipuka otyikuavo? Pahe soka ñgeno omukuatate umwe watewa movilinga. Okuti tupondola okumukuatesako atee avasa ovilinga ovikuavo?

13-14. Oñgeni tupondola okukala notyali nga Siovaa

¹³Siovaa una otyali. (Mat. 5:45) Katupondola okukevelela ovakuatate nonomphange vetuite tuvekuateseko opo tukale nokankhenda navo. Nga Siovaa, onthue tuesukisa okutetekela. Siovaa utundisa ekumbi ononthiki ambuho namphila tuhemuiti-tyo! Iya ovanthu aveho vakuatesuako nomutenya, atee umwe na vana vahapandula. Mokonda Siovaa utuavela atyiho tuesukisa, ulekesa okuti utuhole. Onthue tuhole unene Siovaa mokonda una okankhenda notyali!

¹⁴ Ovakuatate vetu nonomphange vahetekela Siovaa mokukala notyali na vakuavo. Mongeleka, mo 2013, kotyilongo tyo Filipinas kuaendele otyinimawe tyimwe otyinene tyahanyene ovipuka ovinyingi. Mokonda yotyo, onondyuo novipuka ovikuavo vyo vakuatate vetu avihanyauka. Mahi ovakuatate vatunda kovilongo vielikalaila avekevekuatesako. Vamwe vaavele onombongo mbavo, ovakuavo avakuatesako okutunga nokupindula-po onondyuo 750 momuvo wehehi! Pomukihi Wokolona Vilu, Onombangi mba Siovaa valinga ononkhono mbokukuatesako ovakuatate nonomphange. Tyina tukuatesako liwa-liwa ovakuatate vetu nonomphange tulekesa okuti tuvehole.

15-16. Oityi omukanda wa Luka 6:36 upopia, tuesukisa okulinga opo tuhetekele Tate yetu wokeulu?

¹⁵Siovaa una okankhenda nokuevela. (Tanga Luka 6:36.) Ononthiki ambuho Siovaa utuevela. (Sal. 103:10-14) Ovalanduli va  Sesusi ankho ovakuankhali; mahi no ngotyo Sesusi ankho una okankhenda navo nokuveevela. Tupu waava omuenyo wae opo tuyovolwe kononkhali mbetu. (1 Suau 2:1, 2) Onkhalelo Siovaa na Sesusi vakala nokankhenda no onthue nokutuevela tyitufueneka vali kuvo.

¹⁶ Tyina ‘tulievela nomutima auho’ na vakuetu oluembia luetu luliyawisa. (Efe. 4:32) Okuevela vakuetu katyapepukile, tuesukisa okulinga ononkhono. Omphange umwe wamona okuti onthele ili Momutala Womulavi wo 2012 yokuati “Lievelei Tyahakuluminyua” yemukuatesako okuevela. * Omphange oo wapopia okuti: “Onthele oyo yankhuatesako okunoñgonoka okuti tyina ndyievela vakuetu na ame tyinkhuatesako. Tupu yankhuatesako okunoñgonoka okuti, okuevela vakuetu katyilekesa okuti ame napanda etyi valinga ine katyendyihamene. Mahi okuevela tyilekesa okuyekapo onkhongo amutualako nombembwa.” Tyina tuevela nomutima auho ovakuatate vetu tulekesa oluembia iya tuhetekela Tate yetu Siovaa.

17. Ngetyi tyipopia Mateusi 5:16, oityi tupondola okulinga opo tunkhimaneke Tate yetu wokeulu?

¹⁷ Onthue tuna elao liokukala mombunga yovakuatate nonomphange mouye auho velihole. Tuhanda okukuatesako ovanthu ovanyingi okufenda Huku. Mokonda yotyo, tuesukisa okulunguka opo tuhalinge natyike tyipondola okusilisa ovanthu va Siovaa na Tate yetu wokeulu. Tuesukisa okukala nonondunge opo ovanthu vetavele etyi tuvelongesa aveya okuumbila Siovaa. — Tanga Mateusi 5:16.

18. Oityi tyipondola okutukuatesako okuivisa tyihena owoma?

¹⁸ Pamwe, mokonda yokutavela ku Siovaa, ovanthu vapondola okutupenya nokutumonesa ononkhumbi. Okuti tuna owoma wokupopila ovanthu omatavelo etu? Siovaa na Sesusi vapondola okutukuatesako. Sesusi wapopilile ovalongwa vae opo vahasukalale  netyi mamupopi ine oñgeni mavapopi. Omokonda yatyi? Sesusi wati: ‘Omokonda etyi mamupopi mamutyipewa poola yatyo, hanwe vala mamupopi, mahi ononkhono mba Tate yenyi mambumukuatesako okupopia.’ — Mat. 10:19, 20.

19. Popia ongeleka yomukuatate umwe waivisile nomutima wakola?

¹⁹ Tutalei ongeleka ya Robert ukala ko Africa do Sul. Etyi ehimbika okulongeswa Ombimbiliya, apakala vala katutu aihanwa kombonge opo akapopie omokonda yatyi ehelihonekesile koufualali, ngwe ankho una vala enoñgonoko lihehi lyo Mbimbiliya. Robert nomutima wakola apopila vomombonge okuti kelihonekesile tupu koufualali omokonda uhole ovakuatate vae. Robert ankho wahambukilwa omphangu yae mombunga ya Siovaa! Omukoyesi emupulu okuti: “Ovakuatate vove ovalie?” Robert ankho kakevelela epulo olio, mahi liwa-liwa ahinangela o tesitu yonthiki oyo. Ankho o Mateusi 12:50 yati: “Una ulinga ehando lya Tate yange keulu, oe ondenge yange nomphange yange na me yange.” Namphila Robert ankho wahimbika vala okulongeswa Ombimbiliya pahe, mahi ononkhono mba Siovaa ambumukuatesako okukumbulula epulo olio, nomakuavo vali ankho ahakevelela. Siovaa wahambukilwe unene na Robert! Tupu tyina atala okuti tumuyumba onthumbi atuave oumbangi nomutima wakola namphila tyihapepukile, uhambukwa unene.

20. Oityi tuakoya okulinga? (Suau 17:11, 15)

²⁰ Tutualeiko okupandula elao tuna liokukala mombunga yovakuatate nonomphange velihole. Tuna Tate ukahi nawa novakuatate nonomphange vetuhole unene. Tuesukisa apeho okupandula ovipuka ovio. Mokonda Satanasi novanthu vae vetuhongilinya okusoka okuti Siovaa ketuhole-ale tupu vahanda okuhanya oupanga wetu novakuatate. Sesusi welikuambelele ku Tate yae, etuitila-ko opo etuyunge nokutukuatesako okutualako newaneko. (Tanga Suau 17:11, 15.) Siovaa wakumbulula umwe elikuambelo liae. Nga Sesusi no onthue tuna okukala nonthumbi yokuti Siovaa utuhole iya utukuatesako. Naina tukoyei okutualako okulinga apeho ononkhono mbokulikuata okapandi novakuatate vetu nonomphange.