1. Abantu abeesigwa nibabaasa kugira mukago ki na Yehova?

EKA y’abarikuramya Yehova erimu Yesu, “omujigaijo omu byahangirwe byona,” na baamaraika nyamwingi. (Kol. 1:15; Zab. 103:20) Obu Yesu yaabaire ari omu nsi, akooreka ngu abantu abeesigwa nibabaasa kweta Yehova Ishebo. Akagambira beegi be ngu, Yehova ni “Ishe kandi Shoimwe.” (Yoh. 20:17) Kandi ku turikwehayo ahari Yehova tukabatizibwa, nituba bamwe aha b’eka ye eya rukundo erimu ab’eishe-emwe na banyaanyazi-itwe.—Mak. 10:29, 30.

2. Nituza kushwijuma ki omu kicweka ki?

² Abamwe nibagumirwa kureeba Yehova nk’Ishebo orikubakunda. Abandi nibabaasa kuba batarikumanya oku baine kworeka ngu nibakunda ab’eishe-emwe na banyaanyabo. Omu kicweka eki, nituza kushwijuma oku Yesu arikutuhwera kureeba Yehova nka Tataitwe, ou turikubaasa kwirira haihi. Kandi nituza n’okureeba oku turikubaasa kutooreza Yehova omu muringo ogu turikutwariza ab’eishe-emwe na banyaanyazi-itwe.

3. Okushaba kw’eky’okureeberaho nikutuhwera kuta kwirira haihi Yehova?

³ Yehova ni Tataitwe oine rukundo. Yesu naayenda ngu tureebe Yehova nk’oku arikumureeba nk’omuzaire oine rukundo oyorobi kuhikwa, beitu atari ow’obushoboorozi orikutiinisa. Eki nikireebwa butunu omu bigambo ebi Yesu yaayegyeise abeegi be kukoresa omu kushaba. Akatandika okushaba kw’eky’okureeberaho arikukoresa ekigambo “Tataitwe.” (Mat. 6:9) Yesu akaba naabaasa kutugambira kweta Yehova “ow’Obushoboorozi Bwona,” “Omuhangi,” nari “Mukama otahwaho” ahakuba ebitiinisa ebyo byona bimushemereire kandi biri omu  Byahandiikirwe. (Kut. 49:25; Isa. 40:28; 1 Tim. 1:17) Kwonka, akakoresa ekitiinisa “Tataitwe” ekirikworeka omukago gw’aha mara.

4. Nitumanya tuta ngu Yehova naayenda ngu tumwirire haihi?

⁴ Noogumirwa kureeba Yehova nka Tataitwe oine rukundo? Abamwe nikibagumira. Nikibaasa kutugumira kureeba Yehova nk’omuzaire oine rukundo ahabw’okukurira omu mbeera mbi y’okubonabona. Ka nikihuumuriza kumanya ngu Yehova naayetegyereza gye enyehurira zaitu! Naayenda kutwirira haihi. Niyo nshonga ahabw’enki Ekigambo kye nikituhiga kiti: “Mwirire haihi Ruhanga, nawe abone kubairira haihi.” (Yak. 4:8) Yehova naatukunda kandi niwe Tataitwe orikukirayo ou turikubaasa kugira.

5. Kurugiirira ahari Luka 10:22, Yesu naatuhwera ata kwirira haihi Yehova?

⁵ Yesu naabaasa kutuhwera kwirira haihi Yehova. Yesu naamanya gye Yehova kandi ahabw’okworeka gye emitwarize nk’eye omuringo oguhikiriire, akabaasa kugira ati: “Ondeebire, biri areebire Isheboona.” (Yoh. 14:9) Nka mukuru waitu, Yesu naatwegyesa oku turikubaasa kworobera Tataitwe kandi tukamuha ekitiinisa, oku turikubaasa kwetantara kumugwisa kubi, n’oku turikubaasa kusiimwa omu maisho ge. Kwonka oku Yesu yaatwarize aha omu nsi nikworeka ngu Yehova n’omunyambabazi kandi aine rukundo. (Shoma Luka 10:22.) Teekateeka ahari bimwe aha by’okureeberaho ebi.

6. Ha eby’okureeberaho ebirikworeka oku Yehova yaahuriire okushaba kwa Yesu.

⁶ Yehova naahurikiza abaana be. Teekateeka aha ku Yehova yaahurikiize Omwana we omujigaijo. Yehova buzima akaba naahurira okushaba kwingi kw’Omwana we obu yaabaire ari aha omu nsi. (Luk. 5:16) Yehova akahurira okushaba kwa Yesu aha bikwatiraine n’okucwamu kukuru nk’obu yaabaire naaza kutoorana entumwa ze 12. (Luk. 6:12, 13) Kandi Yehova akahurira okushaba kwa Yesu obu yaabaire aine amaganya. Yesu batakamureebize, akashaba munonga Ishe aha bikwatiraine n’okugyezibwa oku yaabaire ayorekyereire.  Yehova tarahuriire okushaba kw’Omwana we omukundwa kyonka, kureka akoohereza na maraika kumugumya.—Luk. 22:41-44.

7. Twine kwehurira tuta twamanya ngu Yehova naahurira okushaba kwaitu?

⁷ Obunaku obu, Yehova naagumizamu kuhurira okushaba kw’abaheereza be, kandi naakugarukamu omu bwire obuhikire n’omu muringo ogurikukirayo oburungi. (Zab. 116:1, 2) Teekateeka aha ku munyaanyazi-itwe omwe kuruga India yaareebire eki nikibaho. Akaba atwire naayehurira kubi ahabw’amaganya, kandi akaguma naashaba Yehova aha bikwatiraine n’enshonga egyo. Naagira ati: “JW Broadcasting^® eya Mei 2019 eyaabaire neegamba aha ku turikubaasa kusingura okwerarikirira n’amaganya, ekaba neehikaana gye n’embeera yangye. Ekaba eky’okugarukamu ky’okushaba kwangye.”

8. Yehova akooreka mu miringo ki ngu naakunda Yesu?

⁸ Yehova naatukunda kandi naatufaho nk’oku yaakunzire Omwana we, kandi akamureeberera n’omu mbeera zigumire obu yaabaire naaheereza omu nsi. (Yoh. 5:20) Akamureeberera omu by’omwoyo, omu nyehurira, n’omu by’omubiri. Kandi Yehova akahamiza Omwana we ngu naamukunda kandi ngu naamwesiimisa. (Mat. 3:16, 17) Ahabw’okugira ngu Yesu akaba naamanya ngu Ishe ow’omu iguru naamukunda, akaba atarikwehurira nk’otsigirweho wenka.—Yoh. 8:16.

9. Twine buhame ki oburikworeka ngu Yehova naatukunda?

⁹ Nka Yesu, twena tureebire oku Yehova arikutukunda omu miringo mingi. Kiteekateekyeho: Yehova atweyiriize haihi nawe, kandi yaatuha n’eka y’eby’omwoyo kugira ngu tushemererwe kandi twehurire gye. (Yoh. 6:44) Kandi Yehova naaguma naatuha eby’okurya by’omwoyo. N’ekindi, naatuhwera arikutuha eby’okutubaisaho buri izooba. (Mat. 6:31, 32) Twateekateeka ahari rukundo ei Yehova atwiniire, nitwongyera kumukunda.

10. Nitubaasa kwegyera ki aha ku Yehova arikutwariza ab’eishe-emwe na banyaanyazi-itwe?

¹⁰ Yehova naakunda ab’eishe-emwe na banyaanyazi-itwe. Kwonka nikibaasa kutatworobera butoosha kworeka ngu nitukunda ab’eka yaitu ey’eby’omwoyo. Eki nikireetwa okushanga ngu, tukakurira omu nganda n’embeera zitarikushushana. Kandi twena nitukora enshobe ezirikubaasa kugwisa kubi abandi. Kwonka, nitubaasa kuteeraho kwongyera kuhamya rukundo y’eka yaitu ey’eby’omwoyo. Mu muringo ki? Turikutooreza Tataitwe omu kukunda ab’eishe-emwe na banyaanyazi-itwe. (Efe. 5:1, 2; 1 Yoh. 4:19) Ka tureebe eki turikubaasa kwegyera ahari Yehova.

11. Yesu akooreka ata ngu aine ‘esaasi n’embabazi’ nka Yehova?

¹¹ Yehova atwiniire ‘esaasi n’embabazi.’ (Luka 1:78) Omuntu omunyambabazi naafayo kugira eki yaakora yaareeba abantu nibabonabona, naasherura oburyo bw’okubahwera n’okubahuumuriza. Oku Yesu yaatwariize abantu kukooreka ngu akaba naatooreza Yehova. (Yoh. 5:19) Yesu ku yaareebire abantu baingi “yaabagirira esaasi, ahakuba bakaba baburaburiirwe, bashobeirwe nk’entaama ezitaine muriisa.” (Mat. 9:36) Embabazi za Yesu zikaba nikikira aha kugira enyehurira kyona. Akagira eki yaakora yaakiza abarwaire kandi yaaruhuura “abaruhire n’abaremereirwe.”—Mat. 11:28-30; 14:14.

12. Ha eky’okureeberaho ekirikworeka oku turikubaasa kugirira abandi embabazi.

¹² Tutakoorekire ngu twiniire ab’eishe-emwe na banyaanyazi-itwe esaasi n’embabazi, twine kubanza twamanya oburemeezi obu baine. Nk’eky’okureeberaho, munyaanyazi-itwe naabaasa  kuba aine amagara mabi. Tarikwetomboita ahabw’endwara ye, kwonka nikibaasa kumushemeza yaatunga obuhwezi. Naareeberera ata ab’eka ye omu by’omubiri? Mbwenu shi naayenda obuhwezi omu kuteeka eby’okurya nari kuboneza enju ye? Nari ow’eishe-emwe naabaasa kuba afeereirwe omurimo gwe. Mbwenu shi nitubaasa kumuha esente ziringaniire kumuhweraho kuhitsya yaatunga omurimo ogundi, kwonka tutoorekire ngu niitwe tuzimuhaire?

13-14. Nitubaasa kuba tuta efura nka Yehova?

¹³ Yehova n’efura. (Mat. 5:45) Titwine kutegyereza ab’eishe-emwe na banyaanyazi-itwe kutushaba obuhwezi reero tukabona kubagirira embabazi. Nka Yehova, nitubaasa kwehabura kugira eki twakora kubahwera. Naatujwisiza omushana buri izooba nangwa tutamushabire kukikora! Kandi obutagatsi bw’omushana nibugasira buri omwe nangwa n’abatarikumusiima. Torikwikiriza ngu Yehova okutuha eby’okutubaisaho n’obuhame oburikworeka ngu naatukunda? Naitwe ka nitukunda Yehova ahabw’embabazi ze nyingi n’obufura bwe!

¹⁴ Ab’eishe-emwe na banyaanyazi-itwe baingi barikutooreza Tataitwe ow’omu iguru, nibeehabura kukunira abandi omu bufura. Nk’eky’okureeberaho, obu haabaho eshato y’amaani erikwetwa Haiyan omuri 2013, ebintu bingi bikacwekyerezibwa omuri Philippines. Ab’eishe-emwe na banyaanyazi-itwe baingi bakafeerwa amaka gaabo n’ebintu byabo. Kwonka ab’eka yaabo ey’eby’omwoyo omu nsi yoona bakaija kubahwera ahonaaho. Baingi bakahayo esente nari baayejumba omu murimo muhango gw’okwombeka. Eki kikarugamu okuhunduuza nari okwombeka amaka nka 750, omu bwire obutahikire mwaka! Omu bwire bw’ekigwererezi kya COVID-19, Abajurizi ba Yehova bakakora munonga kushagika ab’eishe-emwe na banyaanyabo. Twarahuka kushagika ab’eka yaitu ey’eby’omwoyo, nituba nitworeka ngu nitubakunda.

15-16. Kurugiirira ahari Luka 6:36, ni muringo ki omukuru ogu turikubaasa kutoorezamu Tataitwe ow’omu iguru?

¹⁵ Yehova aine embabazi kandi naasaasira. (Shoma Luka 6:36.) Buri izooba nitureeba embabazi za Tataitwe. (Zab. 103:10-14) Abakuratsi ba Yesu bakaba batahikiriire, kwonka  akaba naabagirira embabazi kandi abasaasira. Nangwa akabaasa n’okuhayo amagara ge kugira ngu tusaasirwe ebibi byaitu. (1 Yoh. 2:1, 2) Mbwenu shi eki tikirikukureetera kwirira haihi Yehova na Yesu ahabw’embabazi zaabo n’okusaasira?

¹⁶ Rukundo y’eka yaitu ey’eby’omwoyo neehama ‘twasaasira’ tutataireho bushonshorekye. (Efe. 4:32) Kwonka, obumwe okusaasira abandi nikibaasa kukuguma, n’ahabw’ekyo nikyetengyesa okutamu amaani. Munyaanyazi-itwe omwe akashoma ekicweka kya Watchtower, “Musaasirane Mutataireho Bushonshorekye” kyamuhwera kuhinduraho. * Akahandiika ati: “Okwega ekicweka eki kimpweraire kuba omuntu w’omutaano, n’okureeba enshonga omu muringo murungi. Kikashoboorora ngu okuba oyeteekateekire kusaasira abandi tikirikumanyisa ngu noikirizana n’emitwarize yaabo mibi nari ngu nooyehuzya oburemeezi oburugiremu. Kwonka okusaasirana nikimanyisa okutabiika enziika ahabw’enshobe z’abandi n’okuguma oine obusingye bwawe.” Twasaasira ab’eishe-emwe na banyaanyazi-itwe tutataireho bushonshorekye, nitworeka ngu nitubakunda, kandi nituba nitutooreza Tataitwe, Yehova.

17. Kurugiirira ahari Matayo 5:16, nitubaasa kuhaisa tuta Tataitwe ow’omu iguru ekitiinisa?

¹⁷ N’omugisha gw’amaani kuba omwe aha ab’eka y’eby’omwoyo omu nsi yoona. Nitwenda ngu baingi baije batwegaiteho omu kuramya Ruhanga waitu. Twine eki omu biteekateeko, twine kwegyendesereza kutakora ekintu kyona ekirikujumisa abaheereza ba Yehova nari Tataitwe ow’omu iguru. Nituteeraho kutwaza omu muringo ogurikureetera abantu kukunda amakuru marungi.—Shoma Matayo 5:16.

18. Niki ekirikubaasa kutuhwera kubuurira tutaine kutiina?

¹⁸ Obumwe, abandi nibabaasa kutugaya nari kutuhiiganisa ahabw’okworobera Tataitwe ow’omu iguru. Kandi shi ku twakuba nitutiina kugambira abandi ebi turikwikiriza? Nitubaasa kwesiga Yehova na Yesu ngu nibaija kutuhwera.  Yesu akahamiza abeegi be ngu tibaine kwerarikirira aha ki baraagambe nari oku baraakigambe. Ahabw’enki? Akashoboorora ngu ‘nimwija kubiheebwa omu mwanya ogwo, mumanye ngu tiimwe murikwija kugamba, kureka omwoyo ogurikwera ogwa Shoimwe nigwo gurikwija kubagambisa.’—Mat. 10:19, 20.

19. Ha eky’okureeberaho ky’omuntu owaabuuriire aine obumanzi.

¹⁹ Teekateeka aha ky’okureeberaho kya Robert. Enyima obu yaabaire atandikire kwega Baibuli atarikumanya bingi, akatwarwa omu icwero ry’emanja ery’amahe omuri South Africa. N’obumanzi akabashoboororera ngu ahabw’okuba naakunda ab’eishe-emwe bagyenzi be, tarikwenda kwejwanzya omu by’obutegyeki. Akaba naasiima omwanya ogu aine omu ka ya Yehova ey’eby’omwoyo! Ahonaaho omuramuzi akamubuuza ati: “Ab’eishe-emwe bagyenzi baawe ni baahi?” Robert akaba ateeteekateekire kugarukamu ekibuuzo ekyo, kwonka omu kaire ako akaijuka Ekyahandiikirwe ky’eizooba eryo. Kikaba kiihirwe omuri Matayo 12:50: ‘Ahabw’okuba omuntu weena, orikukora ebi Tata ow’omu iguru arikukunda, niwe murumuna wangye [ow’eishe-emwe], niwe munyaanyazi, kandi niwe maawe.’ Robert n’obu araabe nibwo yaabaire atandikire kwega Baibuli, omwoyo gurikwera gukamuhwera kugarukamu ekibuuzo ekyo n’ebindi ebi baamubuurize. Robert aine kuba yaashemeize Yehova! Kandi naitwe Yehova naatwesiimisa twamwesiga kutuha obumanzi twaba nitubuurira omu mbeera zigumire.

20. Tushemereire kumariirira kukora ki? (Yohaana 17:11, 15)

²⁰ Ka tugumizemu nitutwara omugisha gwaitu ogw’okuba omu ka yaitu y’eby’omwoyo nk’ogw’omuhendo. Twine Tataitwe orikukirayo oburungi n’ab’eishe-emwe na banyaanyazi-itwe abeesigwa. Titurikwenda kuzaanazaanisa ebintu ebi. Sitaane n’abashagiki be ababi nibateeraho kutureetera kubangaanisa rukundo ei Tataitwe ow’omu iguru atwiniire n’okuteganisa obumwe bwaitu. Kwonka Yesu akatushabira ngu Tataitwe aturinde kugira ngu eka yaitu egume eine obumwe. (Shoma Yohaana 17:11, 15.) Yehova ariyo naagarukamu okushaba okwo. Nka Yesu, titurikwenda kubangaanisa rukundo ya Tataitwe ow’omu iguru n’obushagiki bwe. Ka tumariirire kugumizamu nitwirira haihi n’eka yaitu ey’eby’omwoyo.