1. Цӕмӕн ес зӕгъӕн, ӕма адӕни бон дӕр ӕй Хуцауи бийнонтӕй ун?

ЙЕГОВӔН хъӕбӕр устур бийнонтӕ ес. Уонӕмӕ хаунцӕ Йесо,– «Хуцау цидӕриддӕр сфӕлдиста, уонӕй фиццаг»,– удта хъӕбӕр берӕ изӕдтӕ (Кол. 1:15; Пс. 103:20). Мах бон дӕр ӕй Йегови нӕ Фидӕ хонун. Е бӕрӕг ӕй, Йесо ӕ ахуркӕнуйнӕгтӕн ци дзурдтӕ загъта, уомӕй: «Ӕз цӕун мӕ Фидӕмӕ ӕма уӕ Фидӕмӕ» (Иоан. 20:17). Мадта ӕхе Йеговӕн ка иснивонд кӕнуй ӕма донаргъуд ка райсуй, е ӕ устур бийнонтӕмӕ ӕрбайеу уй ӕма ин фӕззиннуй дуйне хуӕртӕ ӕма ӕнсувӕртӕ (Мар. 10:29, 30).

2. Аци статьяй цӕмӕ ӕркӕсдзиан?

² Еуӕй-еуетӕн зин фӕууй Йеговӕмӕ уарзӕгой Фиди цӕстӕй кӕсун. Кӕмӕндӕрти ба ӕнцон нӕ фӕууй, хуӕртӕ ӕма ӕнсувӕрти ке уарзуй, уой ӕвдесун. Аци статьяй фӕрци ’й балӕдӕрдзиан, Йеговӕ нӕ ӕцӕгӕйдӕр ӕ сувӕллӕнттӕбӕл ке нимайуй, уой. Уой туххӕй ӕркӕсдзиан, Йесо ӕма Йеговӕ кӕрӕдзебӕл куд ӕнцӕ, уомӕ. Уомӕй уӕлдай ма базондзиан, нӕ бон куд ӕй нӕ хуӕртӕ ӕма ӕнсувӕртӕмӕ уой цӕстӕй кӕсун.

3. Йесо дӕнцӕгӕн ке ниууагъта, еци кувд нӕ Йеговӕмӕ куд хӕстӕг кӕнуй?

³ Йеговӕ мӕстгун хецауи хузӕн нӕй, фал уарзӕгой Фиди хузӕн. Е алкӕддӕр цӕттӕ фӕууй байгъосунмӕ ӕма банхус кӕнунмӕ. Йесо дӕр имӕ гъе уӕхӕн цӕстӕй кӕсуй, удта ’й фӕндуй, цӕмӕй имӕ мах дӕр уӕхӕн цӕстӕй кӕсӕн. Дӕнцӕгӕн ке ниууагъта, еци кувд дӕр дзурдтӕй «нӕ Фидӕ», зӕгъгӕ, дзӕгъӕли нӕ райдӕдта (Матф. 6:9). Библи ма Йегови ӕндӕрхузи дӕр хонуй, зӕгъӕн, «Алцигъон», «Сфӕлдесӕг», «Ӕности Паддзах» (Райд. 49:25; Ис. 44:2; 1 Тим. 1:17). Фал Йесо ба Йегови исхудта «Фидӕ» ӕма нӕ разӕнгард кодта, цӕмӕй имӕ мах дӕр ковгӕй уотӕ дзорӕн.

4. Йегови фӕндуй, цӕмӕй имӕ бахӕстӕг уӕн? Ба ’й лӕдӕрун кӕнӕ.

 ⁴ Дӕуӕн ба ӕнцон ӕй Йеговӕмӕ уарзӕгой Фиди цӕстӕй кӕсун? Еуӕй-еуетӕн е ӕнцон нӕй, уомӕн ӕма лӕгъуз уавӕрти исгъомбӕл ӕнцӕ, ӕма дзурдтӕ «фидӕ» ӕма «уарзондзийнадӕ» кӕрӕдзей хӕццӕ куд баст ӕнцӕ, уой лӕдӕргӕ дӕр нӕ кӕнунцӕ. Фал нӕ Йеговӕ хуарз лӕдӕруй, ӕма уой ке зонӕн, е нин устур уодӕнцойнӕ хӕссуй! Уой фӕндуй, цӕмӕй имӕ бахӕстӕг уӕн, ӕма уой туххӕй ӕ Дзурди ниффинсун кодта: «Бахӕстӕг уотӕ Хуцаумӕ, ӕма уӕмӕ е дӕр ӕрбахӕстӕг уодзӕй» (Иак. 4:8). Йеговӕ нӕ берӕ уарзуй, ӕма ’й фӕндуй, цӕмӕй нин тӕккӕ хуӕздӕр Фидӕ уа.

5. Лукай 10:22 куд финст ӕй, уомӕ гӕсгӕ Йесой фӕрци нӕ бон куд ӕй Йеговӕмӕ хӕстӕг кӕнун?

⁵ Йесой фӕрци нӕ бон ӕй Йеговӕмӕ хӕстӕг кӕнун. Йесо ӕй гъе уотӕ дзӕбӕх зонуй ӕма ’й гъе уотӕ ӕнхӕстӕй фӕнзуй, ӕма ма уотӕ дӕр загъта: «Мӕн ка фӕууидта, е фӕууидта Фиди дӕр» (Иоан. 14:9). Йесо нӕ хестӕр ӕнсувӕри хузӕн ахур кӕнуй, нӕ уӕларвон Фидӕмӕ игъосун ӕма ’й нимайун. Удта ма нин лӕдӕрун кӕнуй, ци гъӕуй ӕма ци нӕ гъӕуй кӕнун, цӕмӕй Йегови зӕрдӕ рохс кӕнӕн. Зӕнхӕбӕл цӕргӕй ци хуарз гъуддӕгтӕ кодта, уонӕй ба бӕрӕг ӕй, Йеговӕ цӕхуӕн фӕлмӕнзӕрдӕ Хуцау ӕй, е. (Бакӕсӕ Лукай 10:22.) Гъӕйдӕ еци хабӕрттӕмӕ лӕмбунӕгдӕр ӕркӕсӕн.

6. Йеговӕ Йесой кувдтитӕ ке игъуста, е цӕмӕй бӕрӕг ӕй?

⁶ Йеговӕ ӕ сувӕллӕнттӕмӕ лӕмбунӕг игъосуй. Ӕма ӕ Фуртмӕ дӕр гъе уотӕ игъуста. Йесо зӕнхӕбӕл ку адтӕй, уӕд ӕ Фидӕмӕ арӕх кувта. (Лук. 5:16). Йеговӕ Йесомӕ лӕмбунӕг игъуста, ести ӕхсидзгӕ унаффӕ рахӕссуни размӕ имӕ ку раковидӕ, уӕд, зӕгъӕн, 12 апостоли равзарун ӕй ку гъудӕй, уӕд (Лук. 6:12, 13). Йеговӕ ма имӕ лӕмбунӕг игъуста, ӕ тухститӕ ин ку фӕдздзоридӕ, уӕд дӕр. Ӕ мӕлӕти размӕ еци изӕр дӕр Йесо Йеговӕмӕ хъӕбӕр кувта, цӕмӕй ин хъауритӕ равардтайдӕ, ци фӕлварӕн имӕ ӕнгъӕлмӕ кастӕй, уоми федар фӕллӕуунмӕ. Йеговӕ ӕ хъазар Фуртмӕ уотид игъосгӕ нӕ бакодта, фал ма имӕ изӕди дӕр рарвиста, цӕмӕй ӕй бафедар кодтайдӕ (Лук. 22:41–44).

7. Йеговӕ уин уӕ кувдтитӕ ке игъосуй, е уин уодӕнцойнӕ куд хӕссуй?

 ⁷ Абони дӕр Йеговӕ ӕ лӕггадгӕнгути кувдтитӕ гъе уотӕ игъосуй ӕма сӕбӕл дзуапп дӕр дӕттуй, уой ба ма куд хуӕздӕр уодзӕй, уотӕ ӕма, кӕд хуӕздӕр уодзӕй, уӕд (Пс. 116:1, 2). Уой Индийӕй еу хуӕрӕ ӕхебӕл бавзурста. Ӕ нервитӕй хъӕбӕр тухст адтӕй ӕма Йеговӕй ӕнхус курдта. Еци хуӕрӕ зӕгъуй: «2019 анзи маййи нӕ интернет-телеуинунади ци программӕ рацудӕй, уой цума мӕн туххӕй рауагътонцӕ, уотӕ мӕмӕ кастӕй. Дзурд си цудӕй, тухст сагъӕсти хӕццӕ тох кӕнун нӕ бон куд ӕй, уобӕл. Йеговӕ мин гъе уотемӕй мӕ кувдтитӕбӕл дзуапп равардта».

8. Йеговӕ куд ӕвдиста, ӕ Фурти ке уарзуй, уой?

⁸ Йеговӕ Йесой куд уарзта, мах дӕр уотӕ уарзуй (Иоан. 5:20). Йесо зӕнхӕбӕл ку лӕггадӕ кодта, уӕд ин Йеговӕ аллирдиги дӕр ӕнхус кодта. Куд ӕй уарзуй, уой дӕр ин фӕззӕгъидӕ, удта ’й ӕстаугӕ дӕр ракӕнидӕ (Матф. 3:16, 17). Цийфӕнди рӕстӕг дӕр Йесойӕн ӕ бон адтӕй ӕ уӕларвон Фидӕй ӕнхус ракорун ӕма гъе уой фӕрци ӕхемӕ еунӕг некӕд кастӕй (Иоан. 8:16).

9. Йеговӕ нӕ берӕ ке уарзуй, уой кӕцӕй зонӕн?

⁹ Махӕй дӕр ӕй алкедӕр лӕдӕруй, Йеговӕ ’й ке уарзуй, уой. Расагъӕс кӕнӕ, Йеговӕ нин цӕйбӕрцӕ хуарздзийнӕдтӕ искодта. Фиццагидӕр нӕ ӕхемӕ ӕрбакодта. Нур ан ӕ бийнонтӕй ӕма нин ес хъӕбӕр берӕ хуӕртӕ ӕма ӕнсувӕртӕ. Етӕ нин нӕ цийнӕбӕл цийнӕ кӕнунцӕ, зин рӕстӕги ба нин нӕ нифс бафедар кӕнунцӕ (Иоан. 6:44). Йеговӕ ма нин ӕууӕндундзийнадӕ федаргӕнӕн хуӕруйнаг дӕр фӕндонӕй дӕттуй. Удта нӕбӕл ӕнӕуой дӕр тухсуй, цӕмӕй нӕ царди ӕнӕмӕнгӕй ци гъӕуй, е нӕмӕ уа (Матф. 6:31, 32). Йегови уарзондзийнадӕбӕл куд фулдӕр фӕссагъӕс кӕнӕн, уотӕ ’й никки фулдӕр фӕууарзӕн.

10. Йеговӕ хуӕртӕ ӕма ӕнсувӕртӕн куд ӕй, уомӕй цӕбӕл ахур кӕнӕн?

¹⁰ Йеговӕ ӕ лӕггадгӕнгути берӕ уарзуй. Фал махӕн ба хатгай ӕнцон нӕ фӕууй нӕ хуӕртӕ ӕма ӕнсувӕрти уарзун ӕма сӕ ке уарзӕн, уой син дзорун. Ӕма е дессаг нӕй, уомӕн ӕма ни алке ӕмхузӕн уавӕрти не ’сгъомбӕл ӕй. Уомӕй уӕлдай ма рӕдуйгӕ дӕр кӕнӕн, ӕма уой туххӕй кӕрӕдзей зӕрдихудти цӕуӕн. Фал уӕддӕр нӕ бон ӕй архайун, цӕмӕй кӕрӕдзей хӕццӕ фӕрнӕй ӕма уарзгӕй цӕрӕн. Уой туххӕй ба гъӕуама нӕ хуӕртӕ ӕма ӕнсувӕртӕмӕ нӕ уӕларвон Фиди цӕстӕй кӕсӕн (Еф. 5:1, 2; 1 Иоан. 4:19). Гъӕйдӕ расагъӕс кӕнӕн, Йеговӕ сӕмӕ цӕхуӕн цӕстӕй кӕсуй ӕма ’й нӕ бон фӕнзун куд ӕй, уобӕл.

11. Йесо Йегови хузӕн тӕрегъӕдгӕнагӕ ке ӕй, уой кӕцӕй зонӕн?

¹¹ Йеговӕ тӕрегъӕдгӕнагӕ Хуцау ӕй (Лук. 1:78). Тӕрегъӕдгӕнагӕ адӕймаг инней рист ку уина, уӕд ибӕл нӕ райевгъуйдзӕй, фал ин банхус кӕндзӕй ӕма ’й бафедар кӕндзӕй. Йеговӕ дӕр адӕнӕн гъе уотӕ ӕй, Йесо ба ’й еци гъуддаги фӕнзуй (Иоан. 5:19). Еу хатт Йесомӕ берӕ адӕн ӕрбацудӕнцӕ, ӕма сӕ ку фӕууидта, уӕд син батӕрегъӕд кодта, «уомӕн ӕма адтӕнцӕ ӕнӕфиййау фусти хузӕн, ӕфхуӕрд ӕма дзӕгъӕл» (Матф. 9:36). Фал син Йесо уотид тӕрегъӕд нӕ кодта. Е ма сӕйгити исдзӕбӕх кӕнидӕ, удта «уӕззау уаргъ ка хаста», уӕхӕн адӕнӕн дӕр, ӕ бон цӕмӕй адтӕй, уомӕй банхус кӕнидӕ (Матф. 11:28–30; 14:14).

12. Хуӕртӕ ӕма ӕнсувӕртӕн тӕрегъӕд ке кӕнӕн, е цӕмӕй бӕрӕг уодзӕй?

¹² Цӕмӕй хуӕртӕ ӕма ӕнсувӕртӕн тӕрегъӕд кӕнун зонӕн, уой туххӕй гъӕуама расагъӕс кӕнӕн, цӕхуӕн зиндзийнӕдтӕбӕл ӕмбӕлунцӕ, уобӕл. Зӕгъӕн, хуӕрӕ  цӕхуӕндӕр нези хӕццӕ тох кӕнуй. Кӕд дзоргӕ неци фӕккӕнуй, уӕддӕр ӕнхусӕй ба «нӕъ» нӕ загътайдӕ. Расагъӕс кӕнӕ, хӕдзари гъуддӕгтӕ кӕнунмӕ имӕ фӕккӕсун нӕ гъӕуй? Зӕгъӕн, бафснайунмӕ кенӕ хуӕруйнаг искӕнунмӕ. Кенӕ ба, зӕгъӕн, ӕнсувӕр ӕнӕ кустӕй райзадӕй. Еу минкъий ин ӕхца ку февӕрай, уӕд ин е дӕр хъӕбӕр устур ӕнхус уодзӕй, цалинмӕ нӕуӕг куст агора, уӕдмӕ.

13, 14. Нӕ бон куд ӕй Йегови рӕдаудзийнадӕ фӕнзун?

¹³ Йеговӕ рӕдау Хуцау ӕй (Матф. 5:45). Хуӕртӕ ӕма ӕнсувӕртӕ ни ӕнхус кӕд ракордзӕнцӕ, уомӕ ӕнгъӕлмӕ кӕсун нӕ гъӕуй. Йегови хузӕн мах дӕр гъӕуама не ’нхуси къох фиццаг бадарӕн. Расагъӕс кӕнӕ, адӕни Йеговӕн лигъстӕ кӕнун нӕ фӕгъгъӕуй, цӕмӕй нӕбӕл исон хор искӕса. Еци хор ба алкӕбӕлдӕр искӕсуй, арфӕ ин ка кӕнуй, айдагъ уонӕбӕл нӕ, фал. Йеговӕ нӕбӕл куд тухсуй, уомӕй бӕрӕг ӕй, уарзгӕ нӕ ке кӕнуй, е. Ӕма ’й мах дӕр берӕ уарзӕн, уӕхӕн хӕларзӕрдӕ ӕма рӕдау ке ӕй, уой туххӕй.

¹⁴ Нӕ хуӕртӕ ӕма ӕнсувӕртӕй беретӕ хъӕбӕр рӕдау ӕнцӕ, ӕма ӕнгъӕлмӕ нӕ фӕккӕсунцӕ, ӕнхус си кӕд ракордзӕнцӕ, уомӕ. Зӕгъӕн, 2013 анзи Филиппинти тухдунгӕ «Хайян» ку рацудӕй, уӕд хъӕбӕр берӕ хуӕртӕ ӕма ӕнсувӕртӕ ӕнӕ нецӕмӕй байзадӕнцӕ. Фал нӕ организаци уайтагъд е ’нхуси къох бадардта. Хъӕбӕр беретӕ нисайнӕгтӕ лӕвардтонцӕ, удта ка ниппурхӕ ’й еци хӕдзӕрттӕ искӕнунмӕ дӕр хъӕбӕр беретӕ ӕрбацудӕнцӕ. Гъема еунӕг анзмӕ 750 хӕдзари рарӕвдзӕ кодтонцӕ! Йегови Ӕвдесӕнтӕ кӕрӕдземӕн банхус кӕнунмӕ куд цурд фӕуунцӕ, е ма рабӕрӕг ӕй COVID-19 пандемиййи рӕстӕги дӕр. Нӕ хуӕртӕ ӕма ӕнсувӕртӕй еске тухст уавӕри ку бахауй, уӕд имӕ уайтагъд ӕнхуси къох бадарӕн. Ӕма гъе уомӕй бавдесӕн, куд сӕ уарзӕн, уой.

15, 16. Лукай 6:36 куд финст ӕй, уомӕ гӕсгӕ нӕ бон куд ӕй нӕ уӕларвон Фиди фӕнзун?

¹⁵ Йеговӕ фӕлмӕнзӕрдӕ ӕма хатиргӕнагӕ ӕй. (Бакӕсӕ Лукай 6:36.) Ӕма уой алли бон дӕр уинӕн (Пс. 103:10–14). Йесо дӕр ӕ ахуркӕнуйнӕгтӕн гъе уотӕ адтӕй, кӕд рӕдуйгӕ кодтонцӕ, уӕддӕр. Ӕ цард дӕр ма равардта, цӕмӕй сӕ тӕрегъӕдтӕ хатиргонд ӕрцудайуонцӕ (1 Иоан. 2:1, 2). Йеговӕ ӕма Йесой хӕццӕ лимӕн кӕнун нӕ бон ке ӕй, е нин хъӕбӕр устур цийнӕ хӕссуй!

 ¹⁶ Цӕмӕй кӕрӕдземӕ никки ӕнгомдӕр исуӕн, уой туххӕй гъӕуама кӕрӕдземӕн зӕрдӕй хатир кӕнун зонӕн (Еф. 4:32). Е алкӕд ӕнцон нӕ фӕууй. Еу хуӕрӕн банхус кодта статья «Кӕрӕдземӕн зӕрдӕй хатир кӕнтӕ» *. Хуӕрӕ зӕгъуй: «Еци статьяй фӕрци, хатир кӕнун цӕмӕн гъӕуй, уой никки хуӕздӕр балӕдӕрдтӕн. Уӕхӕн загъд си адтӕй: „Адӕймагӕн ку ниххатир кӕнай, уӕд е уобӕл дзорӕг нӕ уодзӕй, ӕма ӕхе куд даруй кенӕ иннетӕн ци зиан ӕрхаста, уомӕ цийфӕнди цӕстӕй кӕсис, фал имӕ маст нӕбал дардзӕнӕ ӕма дӕ зӕрди ци фарнӕ ес, уой багъӕуай кӕндзӕнӕ“». Хуӕртӕ ӕма ӕнсувӕртӕн ку хатир кӕнӕн ӕма сӕмӕ нӕ зӕрди маст ку нӕ дарӕн, уӕд ӕй бавдесдзиан, ке сӕ уарзӕн ӕма нӕ уӕларвон Фидӕ Йегови ке фӕнзӕн, уой.

17. Матфеййи 5:16 куд финст ӕй, уомӕ гӕсгӕ нӕ бон куд ӕй нӕ уӕларвон Фиди кадгин кӕнун?

¹⁷ Ӕгас зӕнхӕбӕл дӕр нин ци хуӕртӕ ӕма ӕнсувӕртӕ ес, уони хӕццӕ еумӕ Йеговӕн лӕггадӕ кӕнун хъӕбӕр устур кадӕ ӕй. Ӕма нӕ фӕндуй, цӕмӕй еци цийнӕ никки фулдӕр адӕн бавзаронцӕ. Уомӕ гӕсгӕ гъӕуама нӕхемӕ лӕмбунӕг кӕсӕн, цӕмӕй нӕ гъуддӕгтӕй нӕ уӕларвон Фиди ӕма ӕ адӕни ном ма фегадӕ кӕнӕн. Мах фӕндуй алли гъуддаги дӕр нӕхе уотӕ дарун, цӕмӕй махмӕ кӕсгӕй иннети дӕр бафӕндӕуа Йеговӕн лӕггадӕ кӕнун. (Бакӕсӕ Матфеййи 5:16.)

18. Ци нин банхус кӕндзӕй нифсгунӕй игъосун кӕнун?

¹⁸ Фал нӕ уӕларвон Фидӕмӕ ке игъосӕн, уой туххӕй ба нӕбӕл еуӕй-еухатт адӕн ходгӕ фӕккӕнунцӕ кенӕ ба ма нӕ нихмӕ цӕун дӕр райдайунцӕ. Уӕхӕн уавӕри игъосун кӕнуни гъуддаги архайун ӕнцон нӕ фӕууй. Фал нин ци банхус кӕндзӕй? Йеговӕ ӕма Йесо се ’нхуси къох бадарунмӕ алкӕддӕр цӕттӕ ке фӕуунцӕ, уой гъӕуама ма иронх кӕнӕн. Йесо ӕ ахуркӕнуйнӕгтӕн загъта: «Ци дзордзиайтӕ ӕма куд дзордзиайтӕ, уобӕл ма тухсетӕ – еци сахат ӕй зондзиайтӕ, ци дзорун уӕ гъӕуй, уой, уомӕн ӕма айдагъ сумах нӕ дзордзиайтӕ, фал сугъдӕг хъаурӕ дзордзӕй уӕ бӕсти» (Матф. 10:19, 20).

19. Хуцауи сугъдӕг хъаурӕ нин куд банхус кӕндзӕй нифсгунӕй игъосун кӕнун? Ӕрхӕссӕ цӕветтон.

 ¹⁹ Ӕркӕсӕн, Хонсар Африки ка цӕруй, еу уӕхӕн ӕнсувӕр Роберти хабармӕ. Библи ахур кӕнун ку райдӕдта, уӕд ӕй тӕрхондони ӕрлӕуун багъудӕй, уомӕн ӕма ӕфсадмӕ рандӕ ун нӕ бакумдта. Роберт тӕрхонгӕнгутӕн федарӕй загъта, ӕ къохмӕ тохӕндзаума ке нӕ райсдзӕй, уомӕн ӕма, дан, ме ’нсувӕрти берӕ уарзун. Роберт гъе уӕхӕн устур аргъ кодта Йегови бийнонтӕй ке адтӕй, уомӕн! Фал ӕй уӕдта тӕрхонгӕнӕг ӕвваст рафарста: «Ӕма ка ’нцӕ де ’нсувӕртӕ ба?» Роберт еци фарстамӕ цӕттӕ н’ адтӕй, фал уӕддӕр ӕ зӕрди еу стих ӕрбафтудӕй ӕма загъта: «Мӕ уӕларвон Фиди фӕндон ка ӕнхӕст кӕнуй, е ӕй мӕнӕн ме ’нсувӕр дӕр, мӕ хуӕрӕ дӕр ӕма мӕ мадӕ дӕр» (Матф. 12:50). Кӕд Роберт Библи уотӕ дзӕбӕх нӕма зудта, уӕддӕр ин Йеговӕ банхус кодта, тӕрхонгӕнӕг ин ци фарстатӕ лӕвардта, уонӕбӕл дзуапп раттун. Расагъӕс кӕнӕ, Йеговӕ Робертӕй куд сӕрустур адтӕй! Мах дӕр си хъауритӕ ку фӕккорӕн, цӕмӕй зин уавӕрти нӕ бон уа Йегови туххӕй дзорун, уӕд махӕй дӕр гъе уотӕ сӕрустур фӕууй.

20. Нӕ федар фӕндӕ ци гъӕуама уа? (Иоанни 17:11, 15).

²⁰ Йегови бийнонтӕй ке ан, уомӕн аргъ дӕр нӕййес! Махӕн ес тӕккӕ хуӕздӕр Фидӕ ӕма хъӕбӕр берӕ еузӕрдон хуӕртӕ ӕма ӕнсувӕртӕ, ӕма уомӕн аргъ кӕнун гъӕуй. Сайтан ӕма ӕ фарс ка лӕууй, етӕ алкӕддӕр архайдзӕнцӕ, цӕмӕй Йегови уарзтбӕл фӕггурусхӕ уӕн, ӕма нӕ астӕу ци еудзийнадӕ ес, уой фехалӕн. Йесо дӕр ӕ Фидӕн уой туххӕй лигъстӕ кодта, цӕмӕй нӕ еци бӕллӕхӕй багъӕуай кодтайдӕ. (Бакӕсӕ Иоанни 17:11, 15.) Ӕма Йеговӕ Йесой кувдбӕл дзуапп ке дӕттуй, уой абони дӕр уинӕн. Йесо некӕд гурусхӕ кодта, ӕ Фидӕ ’й ке уарзуй ӕма ин алкӕддӕр ке ӕнхус кӕндзӕй, уобӕл. Гъӕйдӕ мадта мах дӕр уобӕл макӕд гурусхӕ кӕнӕн ӕма Йеговӕбӕл, удта нӕ хуӕртӕ ӕма ӕнсувӕртӕбӕл нӕхе бӕттӕн!