1. Ngsebeched el omekedong er a Jehovah el ngerang?

A TELUNGALEK er a Jehovah a uldimukl er ngii a Jesus el ngike el “okiu uchei e ngarbab er a ikel rokui el mle duubech” me a dirrek el rebetok el ildois el anghel. (Kol. 1:15; Psa. 103:20) A Jesus er a lengar tia el chutem e ngulechotii el mora rechad el kmo ngsebechir el omes er a Jehovah el Demerir. Ngmilsaod er a Jehovah el mora redisaiplo er ngii el kmo ng “Demak el ngikel Demmiu.” (Jn. 20:17, BT) Me sel detibir a rengud el mora Jehovah e demetecholb, e kede mo chedal a chimo el telungalek lobengterir a rudam me a rudos er kid.​—Mk. 10:29, 30.

2. Ngera kede mo mesaod er tia el suobel?

² A rebebil a meringel er tir omes er a Jehovah el betik a rengul el Chedam. A rekuk bebil a locha metitur lolecholt a bltikerreng el mora rudam me a rudos er tir. Ngar tia el suobel e kede mo mesaod er a rolel e a Jesus a ngosukid el mo omes er a Jehovah el betik a rengul el Chedam el sebeched el mo kmeed er ngii. Kede dirrek el mo mesuub a rolel e ngsebeched el oukerebai er a Jehovah el ngar er a omerelled el mora rudam me a rudos er kid.

3. Ngmekera nglunguuch el lulsisecheklid a Jesus e olekeed er kid er a Jehovah?

³ A Jehovah a betik a rengul el Chedam. A Jesus a soal a bo domes er a Jehovah el uai ngii. Ngsoal a domes er a Jehovah el betik a rengul Chedam el beot er kid a mo er ngii, el diak lemekngit a omerellel e di longedereder a doruul. Ngsebeched el mesa tiang er a rolel a Jesus a ullisechakl er a redisaiplo er ngii el meluluuch. Ngulemuchel el meluluuch el kmo: “Demmam.” (Mt. 6:9) Ngmle sebechel a Jesus el dmu er kid el mo omekedong er a Jehovah el “Dios el Olab a Bek el Klisiich,” “Ulemeob,” me a lechub e ng “King el diak a uchelel ma ulebengelel.” (Gen. 49:25; Isa. 40:28,  NW; 1 Ti. 1:17) Aika diak el cheleuid el tekoi e dirrek el oltirakl a bades. Me nguaisei engdi Jesus a dilu er kid el mo omekedong er a Jehovah el ‘Chedam.’

4. Kede mekera medengei el kmo a Jehovah a soal a bo dekeed er ngii?

⁴ Ngmeringel er kau omes er a Jehovah el betik a rengul el Chedam? A rebebil a meringel er tir. Nglocha meringel er tir le demerir a dimlak el uaisei a blekerdelel. Ngdi ngkmal mechelaod a rengud le Jehovah a ungil medengei a ngar er a rengud me sel uchul me kede mo omdasu el uaisei. E soal mo kmeed er kid. Sei a uchul me a Tekingel a mengelechel er kid el kmo: “Molekeed er kemiu er a Dios, me bo lekeed er kemiu.” (Jak. 4:8) A Jehovah kmal betik a rengul er kid e kmal soal mo kot lungil Chedam el kired.

5. A doltirakl er a Lukas 10:22, e ngmekera Jesus e ngosukid el mo kmeed er a Jehovah?

⁵ A Jesus a dirrek el sebechel ngosukid el mo kmeed er a Jehovah. Ngkmal ungil medengelii a Jehovah e cherrungel el okesiul me a uchul e ngdilu el kmo: “Ngikel mla mesekak a mla mesa Chedam.” (Jn. 14:9) A Jesus a di ua le obekud me a lechub e ngklou el ochedad el lolisechakl er kid el mo meduch el mengull e olengesenges er a Demad, mengeroid er kid er aike el tekoi el mo tomellii a rengul, e dirrek el mo nguu a kengei er ngii. Me nguaisei engdi klengar er a Jesus er tia el chutem a tokubets lochotii el kmo a Jehovah kmal ungil a blekerdelel e kmal betik a rengul er kid. (Monguiu er a Lukas 10:22.) Ka me dosaod a bebil lolechotel.

6. Mosaod a bebil rolel e a Jehovah ulerrenges er a Jesus.

⁶ A Jehovah orrenges er a rengelekel. Molatk er a rolel a Jehovah a ulerrenges er a Ketengel. A Jehovah a ulerrenges a betok el nglunguchel a Ngelekel er a lengar tia el chutem. (Lk. 5:16) Ngulerrenges er a Jesus el mesaod a meklou a ultutelel el omelilt el kirel meruul el ua sera lolilt er a re 12 el apostol er ngii. (Lk. 6:12, 13) Ngdirrek el ulerrenges er a Jesus er a loluluuch el kirel oberaod el tekoi el mlara rengul. Uchei er a lebo lemukerrekeriil a Jesus e ngkmal di milluluuch el mora Demal el kirel omelsemai el bo lechebangel. A Jehovah dimlak di lorrenges er a Jesus, e ngdirrek el ulderchii a anghel el mo melisiich er ngika el betik er a rengul Ngelekel.​—Lk. 22:41-44.

7. Ngmo ngua uldesuem sel modengei el kmo a Jehovah orrenges a nglunguchir a rechedal?

 ⁷ A Jehovah a melemolem lorrenges a nglunguchir a remesiungel er chelecha el taem e onger a nglunguchir er sel ungil blsechel el ngar sel kot lungil el rolel. (Psa. 116:1, 2) Molatk er a experience er a ta el odos er a India. Ngika mla er ngii a ringelel a uldesuel e mle blak a rengul el meluluuch el mora Jehovah el kirel. Ngmelluches el kmo: “A broadcast er a May 2019 el milsaod aike el sebeched el meruul sel sal di mo suebek a rengud e bekikl a kmal kuluusbech er ngii. Tia mle nger er a nglunguchek.”

8. Ngoeak a ngera el rolel e a Jehovah ulechotii a bltkil a rengul el mora Jesus?

⁸ A Jehovah a betik a rengul er kid e omekerreu er kid el di ua lulemekerreu e lochotii a bltkil a rengul el mora Jesus er a lengar tia el chutem. (Jn. 5:20) Ngmilsa Jesus aike el rokui el lousbech er a tekoi er a klereng, aike el lousbech er a uldesuel me a rengul, me a dirrek aike el lousbech er a klechad. A Jehovah uluuchais er a Ngelekel el kmo ngbetik a rengul er ngii e kmal lodeuir a rengul. (Mt. 3:16, 17) A Jesus a mle medengei el kmo a Demal a blechoel lobengkel e olengeseu er ngii me ngdimlak a ta el bo lolechesuar el kmo ngdi ngii el tang.​—Jn. 8:16.

9. Kede mekera medengei el kmo a Jehovah a betik a rengul er kid?

⁹ Kid el rokui a di ua Jesus el mla chormii a bltkil a rengul a Jehovah. Ka di molatk er tiang: A Jehovah ulemekrael er kid el mo er ngii e mla meskid a telungalek er kid er a klereng el ngii a meskid a deurreng e melisiich er kid sel bo dechebangel a ringel. (Jn. 6:44) A Jehovah dirrek el blechoel el omeskid okelel a reng. Ngmo lmuut er aike el dousbech er a tekoi er a klechad me ngolengeseu er kid el kirel. (Mt. 6:31, 32) Sel doltak er a bltkil a rengul a Jehovah el mei er kid e a bltkil a rengud el mo er ngii a mukeroul.

10. Ngera sebeched el suubii er a omerellel a Jehovah el mora rudam me a rudos er kid?

¹⁰ A Jehovah kmal betik a rengul er a rudam me a rudos er kid. Me nguaisei engdi nglocha mo meringel er kid a mo betik a rengud er tir e olecholt a bltikerreng el mo er tir. Kede rokui el di kakerous a siukang er kid me a ulekuruled. Kede dirrek el mo meruul a cheleuid el ngii a sebechel ongasech a rengrir a rebebil me a lechub e ngrulleterir el mo mekngit a rengrir. Me nguaisei engdi ngsebeched el rokui el mo melisiich er a bltikerreng er a chelsel a telungalek er kid er a klereng. Ngmekera doruul er tiang? Ngoeak sel doukerebai er a rolel a Demad olecholt a bltikerreng el mo er tir. (Efe. 5:1, 2; 1 Jn. 4:19) Ka me dosaod aike el sebeched el suub er a Jehovah.

11. Ngmilekera Jesus e ochotii a blekerdelel a Jehovah el “bekokuii e kmal chubechub”?

¹¹ A Jehovah a “bekokuii e kmal chubechub.” (Lk. 1:78) A chad el bekokuii e chubechub a mo mekngit a rengul sel lomes er a rechad el chuarm. Ngmo osiik a rolel e olengeseu e mengelaod er tir. A omerellel a Jesus el mora rechad a ulechotii a bltkil a rengul a Jehovah el mo er tir. (Jn. 5:19) A Jesus er a lesa seked er a rechad e “ng kmal mlo mekngit a rengul er tir, ele ng mle suebek a rengrir e metacherbesrir, el ua sib el diak a mengkerengel.” (Mt. 9:36) Me a Jesus a dimlak di lebetik a rengul er a rechad e ngdirrek lulsiik a rolel e olengeseu er tir. Ngulemekungil er a resmecher e ullengeseu er a re “chorma er oberaod el chelungel.”​—Mt. 11:28-30; 14:14.

12. Mosaod er a rolel e ngsebeched lochotii a blekokuii me a klechubechub.

¹² Sel bo dolatk a mondai el lechelebangel a rudam me a rudos er kid e ngmo sebeched lochotii a blekokuii me a klechubechub el mo er tir. El ua tiang, nglocha ngar ngii odos el ngar  ngii a oberaod el rektel. Ngika kmal diak losaod er a secherel me nguaisei engdi nglocha kmal mo dmeu a rengul a lsekum e kede ngosuir. Ngsebechel lomsa telungalek er ngii aike lousbech? Ngsebeched el ngosuir loeak sel doruul a kall me a lechub e kede mengetmokl er a blil? A odam a locha dirk urridii a urerel. Ngsebeched el msa udoud el sebechel lolengeseu er ngii el dimerekmo lebetik er a urerel, engdi ngdiak douchais er ngii el kmo ngmla er kid?

13-14. Kede mekera mo bekururau el ua Jehovah?

¹³ A Jehovah a bekururau. (Mt. 5:45) Me ngdiak el kired el mengiil el mo er sel lolengit a ngeso a rudam me a rudos e bo dolecholt er a klechubechub el mo er tir. Kede ua Jehovah el meruul a tekoi el kirir er a uchei er a lolekoi. Ngika olengasech er a sils er a bek sils el kired me ngdiak a belkul dolengit er ngii el mo meruul er tiang. A rokui a ngmai a klungiolir er a sils, ngdiak di el tirke el olecholt a omereng el saul el kirel. A Jehovah sel lomeskid aike el dousbech e ngochotii a bltkil a rengul el mei er kid. Ngkmal betik a rengud er ngii e le ngkmal bekururau e ungil omerellel!

¹⁴ A rebetok el odam me a odos a oukerebai er a Jehovah e osiik a rolel e ngsebechir lochotii a blekeruraurreng el mora rebebil. El ua tiang, sera 2013 e a Super Typhoon Haiyan a mle uchul a klou el tellemall el mora beluu er a Huriping. A rebetok er a rudam me a rudos a miltemall a blirir e urriid a kloklir. Me nguaisei engdi rudam me a rudos er tir er a beluulechad el rokir a di mle mereched el mo olengeseu er tir. A rebetok a millenget a udoud me a lechub e te ullengeseu er a ureor el omekedechor a bekord el 750 el blai er a chelsel a di kekedeb el taem! Te dirrek el kmal mle meringel loureor el olengeseu er a rudam me a rudos er tir er a temel a COVID-19 pandemic. Sel demereched el mo olengeseu er a telungalek er kid er a klereng e kede ochotii el mo er tir el kmo ngbetik a rengud er tir.

15-16. A doltirakl er a Lukas 6:36, e ngera ta er a klou a ultutelel rolel e ngsebeched loukerebai er a Demad el ngar er a eanged?

¹⁵ A Jehovah chubechub e ousubes. (Monguiu er a Lukas 6:36.) Ngbek el sils el lolecholt a klausubes el mei er kid. (Psa. 103:10-14) A rultirakl er a Jesus a dimlak lemecherrungel engdi Jesus ulechotii a klechubechub el mo er tir e  uluusubes er tir. Ngdirrek el kilengei el tongetengii a klengar er ngii el kired me bo lsebechel musubes a kngtid. (1 Jn. 2:1, 2) A klausubes me a klechubechub el lochotii a Jehovah me a Jesus el mei er kid a rullid el mo soad el lmuut el mo kmeed er tir.

¹⁶ Kede smisichii a bltikerreng er a chelsel a telungalek er kid er a klereng sel ‘dekausubes.’ (Efe. 4:32) Nguaisei el locha mo meringel er kid el ousubes a lebebil er a taem me ngkired el oureor el kirel. A ta el odos a melekoi el kmo a ngilsuir el mo meruul er tiang a suobel er A Ongkerongel el dai er ngii a “Bo Mkausubes er a Delongeliu.” * Ngmelluches el kmo: “Omesubek er tia el Ongkerongel a ngilsukak el mo mtebengii el kmo ngngosukak sel kkengei el ousubes er a rebebil. Ngsilodii el kmo sel dekengei lousubes e ngdiak el belkul a kmo kede kongei er a mekngit el dilubech me a lechub e kede mengkekerei er a berredel. Ngbai belkul a kmo kede kongei el mo diak dongemekl a ngesechel a rengud me lsebechel melemolem el budech a uldesued.” Sel dekengei el ousubes er a rudam me a rudos er kid, e kede ochotii el kmo ngbetik a rengud er tir. Kede dirrek el oukerebai er a Demad el Jehovah.

17. A doltirakl er a Mateus 5:16, e ngmekera dekebkellii a Demad el ngar er a eanged?

¹⁷ Kede mera el oba omereng el saul le kede chedal a chimo el telungalek el lobengterir a rudam me a rudos er kid el meliuekl er a beluulechad el rokir el kmal kaubltikerreng. Ngkmal soad a rokui el chad a bo el sebechir el me teloi er kid el mengull er a Dios er kid. Me ngkmal diak el soad el mo meruul a ngii di el tekoi el mo uchul e ngmo mekngit a uldesuir a rechad el kirel a Jehovah me a rechedal. Ngsoad a blekerdeled a bo lochau a rengrir a rechad el mora ungil chais.​—Monguiu er a Mateus 5:16.

18. Ngera sebechel ngosukid el mo omerk loba blekeu?

¹⁸ Nglocha mo er ngii a taem el rebebil a mo melekoi a mekngit el kired me a lechub e te mo oldechelakl er kid le kede olengesenges er a Demad el ngar er a eanged. Ngera sebeched el meruul er ngii a lsekum e kede mo medakt el mesaod er a klaumerang er kid? Ngsebechel mo ulterekokl a rengud el kmo a Jehovah me a Ngelekel  a mo ngosukid. A Jesus a ulelterekokl a rengrir a redisaiplo er ngii me lak bo lebekikl el kmo ngera te mo melekoi. E ngera uchul? Ngdilu el kmo: “Sel bo le belsechel, e ng ekor kemiu a ikel bo molekoi. A tekoi el bo molekoi a diak le tekingiu; a Reng er a Demmiu a mo melekoi el okiu kemiu.”​—Mt. 10:19, 20.

19. Mosaod er a kerebai er a chad el uleba blekeu el ousioning.

¹⁹ Molatk er a kerebil a Robert er a South Africa. Sera lomuchel el mesuub a Biblia el ledirk kekerei a klemedengei er ngii el kirel, e ngmlora kort el mo mesaod el mora chad er a kerrekeriil er a uchul me ngdiak lsebechel mo teloi er a mekemad. Ngmle bekeu louchais er a kort el kmo ngdiak lekengei el mo omekbitang e le ngbetik a rengul er a rudam er ngii el Kristiano. Ngika kmal milengreos er a basio er ngii er a telungalek er kid er a klereng! Me a chad er a kerrekeriil a di mle mereched loker er ngii el kmo: “Te rua techang a rudam er kau?” A Robert a dimlak le expect er tia el ker engdi dilebedebekii a bades er seikid el sils. Tia mle Mateus 12:50: “Ngikel meruul a soal a Demak el ngar a eanged a tar ngak e delak.” Me alta ngdirk mle beches el mesuub a Biblia engdi a chedaol reng er a Jehovah ngilsuir el mo onger er tia el ker me a lmuut el bebil er a ker. A Jehovah locha kmal mle dmeu a rengul er a Robert! Ngdirrek el kmal dmeu a rengul er kid sel bo dultuil er ngii e bo doba blekeu el ousioning er a chelsel a meringel el blekeradel.

20. Ngera kired el rullii er a rengud el mo meruul er ngii? (Johanes 17:11, 15)

²⁰ Mada dolemolem el mengreos er a ileakl el techall el dobang el chedal a telungalek er kid er a klereng. Kede oba ngike el kot lungil el Chedam me a rebetok el odam me a odos el kmal betik a rengrir er kid. Ngkmal diak el soad el mo meterekakl aika el tekoi. A Satan me a rultirakl er ngii a melasem el meruul er kid el mo oumededenger er a bltkil a rengul a Jehovah e melemall er a kltarreng er a delongeled. Me nguaisei engdi a Jesus a milluluuch el kired lolengit er a Demad me longkar er kid me a telungalek er kid lolemolem el ngar er a kltarreng. (Monguiu er a Johanes 17:11, 15.) A Jehovah onger er tia el nglunguuch. Me bo deua Jesus el dimlak a ta el loumededenger er a bltkil a rengul me a ulengesuil a Demad el ngar er a eanged. Derellii er a rengud el mo melemolem lolekeed er kid er a telungalek er kid er a klereng.