1. Woo kjenn wie Jehova nanen?

TO Jehova siene Famielje jehieren Jesus, dän Jehova daut ieeschte muak, un uk väle aundre Enjel (Psa. 103:20; Kol. 1:15). Aus Jesus oppe Ieed wia, säd hee to de Menschen, daut dee Jehova aus äaren Voda talen kunnen. Un to siene Jinja säd hee, daut Jehova sien Voda un äa Voda wia (Joh. 20:17). Un wan wie ons Jehova hanjäwen un deepen loten, dan woa wie Poat von eene leeftolje Famielje von Breeda un Sestren (Mar. 10:29-30).

2. Waut woa wie en disen Artikjel seenen?

² Fa eenje es daut schwoa, sikj Jehova aus eenen leeftoljen Voda väatostalen. Aundre weeten nich, woo see äare Breeda un Sestren Leew wiesen kjennen. En disen Artikjel woa wie seenen, woo Jesus ons halpt, Jehova aus eenen leeftoljen Voda to seenen, dän wie noda komen kjennen. Wie woaren uk lieren, woo wie onse Breeda un Sestren soo behaundlen kjennen, aus Jehova daut deit.

3. Woo halpt ons daut Jebäd, waut Jesus siene Jinja lieed, Jehova noda to komen?

³ Jehova es een leeftolja Voda. Jesus well, daut wie Jehova soo seenen, aus hee am sitt: aus eenen leeftoljen Voda to dän wie aulentiet vetalen kjennen un nich aus eenen, waut to ons kort es un ons bloos sajcht, waut wie doonen sellen. Dit es aun daut Jebäd to seenen, waut Jesus siene Jinja lieed. Dit Jebäd funk hee met de Wieed aun: “Ons Voda” (Mat. 6:9). Jesus wudd ons haben kunt sajen, daut wie Jehova “dän Aulmajchtjen”, “dän Schepfa” ooda “dän eewjen Kjennich” nanen sullen. Un aul daut wudd no de Schreft no  gaunz rajcht sennen (1. Mo. 49:25; Jes. 40:28; 1. Tim. 1:17). Oba enne Städ daut säd Jesus, daut wie Jehova sullen “Voda” nanen.

4. Woo weet wie, daut Jehova well, daut wie am noda komen?

⁴ Es daut fa die schwoa, Jehova aus eenen leeftoljen Voda to seenen? Fa eenje es daut. Daut es veleicht doawäajen soo, wiels dee selfst nich eenen leeftoljen Voda hauden. Es daut nich een Troost fa ons to weeten, daut Jehova krakjt weet, woo wie ons feelen un wuarom? Hee well ons noda komen. Doawäajen sajcht daut en sien Wuat: “Nodat junt no Gott, dan woat hee uk dicht no junt komen” (Jak. 4:8). Jehova leeft ons un hee sajcht ons, daut hee fa ons de basta Voda sennen well.

5. Woo halpt Jesus ons no Lukas 10:22 no Jehova noda to komen?

⁵ Jesus kaun ons halpen Jehova noda to komen. Jesus kjand am soo goot un deed siene Ieejenschoften soo goot no, daut hee säd: “Wäa mie jeseenen haft, haft uk dän Voda jeseenen” (Joh. 14:9). Soo aus de elra Brooda en eene Famielje lieet Jesus ons, woo wie dän Voda achten un jehorchen kjennen un woo wie am schaftich un tofräd moaken kjennen enne Städ truarich. Un besonda wees Jesus ons, woo leeftolich Jehova es (läs Lukas 10:22). Well wie nu mol äwa eenje Biespels vetalen.

6. Woo horcht Jehova no Jesus siene Jebäda? Jeff Biespels.

⁶ Jehova horcht no siene Kjinja. See wie mol, woo Jehova no sienen ieeschtjebuarnen Sän horcht. Dee bäd secha foaken, aus dee oppe Ieed wia (Luk. 5:16). Jehova horcht no siene Jebäda, wan dee waut wichtjet entscheiden wull, biejlikj aus dee siene 12 Apostel utwälen wull (Luk. 6:12-13). Jehova horcht uk no Jesus sien Jebäd, aus dee sea besorcht wia. Jroz ea Judas Jesus veroden deed, bäd Jesus iernstlich to sienen Voda äwa de schwoare Sachen, waut hee boolt beläwen wudd. Un Jehova horcht nich bloos no sienen Sän sien Jebäd, oba hee schekjt uk eenen Enjel toom am stoakjen (Luk. 22:41-44).

7. Woo es daut fa ons, to weeten, daut Jehova no onse Jebäda horcht?

 ⁷ Vondoag dän Dach hieet Jehova uk de Jebäda von siene Deena un hee beauntwuat dee to de rajchte Tiet un opp de baste Wajch (Psa. 116:1-2). See wie nu mol daut Biespel von eene Sesta en Indien, waut krakjt daut beläft haft. See must emma met groote Angst foadich woaren un see bäd iernstlich to Jehova, daut hee ar halpen sull. See schrift: “Daut Moonatsprogram von JW Broadcasting^® von Mei 2019 haundeld sikj doavon, woo eena met groote Angst foadich woaren kunn, un daut wia krakjt daut, waut mie fäld. Daut wia de Auntwuat opp miene Jebäda.”

8. Woo wees Jehova Jesus, daut hee am leewd?

⁸ Jehova leeft un sorcht fa ons, krakjt soo aus hee daut bie sienen Sän deed, aus dee oppe Ieed wia (Joh. 5:20). Hee sorjd fa sienen Sän em jeisteljen un em tieteljen un spruak am Moot too, wan dee besorcht wia. Un Jehova säd to sienen Sän, daut hee am sea leewd un met am tofräd wia (Mat. 3:16-17). Jesus wist, daut sien leeftolja Voda am emma biestonen wudd, un doawäajen feeld hee sikj kjeenmol auleen (Joh. 8:16).

9. Woo kjenn wie seenen, daut Jehova ons leeft?

⁹ Soo aus Jesus hab wie aula aul foaken beläft, daut Jehova ons leeft. Hee haft ons biejlikj no sikj jetrocken un haft ons väl leeftolje Breeda un Sestren jejäft, waut ons schaftich moaken un treesten, wan wie mol truarich sent (Joh. 6:44). Jehova jeft ons uk äwajenuach jeisteljet Äten, daut wie kjennen eenen stoakjen Gloowen haben. Un hee sorcht uk doafäa, daut wie jenuach toom läwen haben (Mat. 6:31-32). Wan wie doaräwa nodenkjen, woo Jehova ons siene Leew wiest, dan woat onse Leew fa am uk stoakja.

10. Woo es Jehova to onse Breeda un Sestren, un woo kjenn wie am nodoonen?

¹⁰ Jehova leeft onse Breeda un Sestren. Oba fa ons es daut nich emma leicht, fa dee Leew to haben un dee daut uk to wiesen. Foaken es daut, wäajen wie von veschiedne Kulturen komen ooda aundasch oppjewossen sent. Un wie aula moaken uk Fäla un daut kaun dee doll moaken ooda enteischen. Oba wie aula kjennen ons Poat doonen, daut de Leew tweschen ons jrata woat. Woo? Wan wie onse Breeda un Sestren soo leewen, aus ons himlischa Voda daut deit (Efs. 5:1-2; 1. Joh. 4:19). Well wie nu mol seenen, waut wie von Jehova doaräwa lieren kjennen.

11. Woo wees Jesus, daut hee uk soon “leeftoljet Metleet” haud aus Jehova?

¹¹ Jehova wiest “leeftoljet Metleet” (Luk. 1:78). Soona, waut Metleet haft, es besorcht, wan hee sitt, daut aundre Menschen lieden motten, un hee deit waut, om dee to halpen un to treesten. Jesus wia krakjt soo om de Menschen bekjemmat aus Jehova (Joh. 5:19). Aus hee opp eene Sauz eene Häad Menschen sach, “jaumad am daut äwa an, wiels see wieren vejoacht un helploos, soo aus Schop onen Hoad” (Mat. 9:36). Jesus feeld nich bloos Leew fa de Menschen, oba hee deed uk waut toom dee halpen. Hee heeld biejlikj de Kranke un holp dee, waut “unja schwoare Lausten . . . [jinjen] un bedrekjt un meed” wieren (Mat. 11:28-30; 14:14).

12. Jeff een Biespel, woo wie aundre Metleet wiesen kjennen.

¹² Wan wie aun onse Breeda un Sestren äare Trubbels denkjen, dan woa wie dee kjennen Metleet wiesen. Veleicht es doa eene Sesta, waut Trubbel met de Jesuntheit haft. See bekloacht sikj kjeenmol,  oba see wudd daut veleicht doawäajen sea schazen, wan ar wäa holp. Kaun see biejlikj fa äare Famielje sorjen? Wudd wie ar halpen kjennen met eene Moltiet ooda ar halpen Sinowent to hoolen? Ooda doa es veleicht een Brooda, waut siene Oabeit veloaren haft. Wudd wie am kjennen met waut Jelt halpen, veleicht onen am weeten to loten von wäm daut es, bat hee eene fresche Oabeit haft?

13-14. Woo kjenn wie uk soo friejäwrich sennen aus Jehova?

¹³ Jehova es friejäwrich (Mat. 5:45). Wie sellen nich doano luaren, daut onse Breeda un Sestren ons no Help froagen, ea wie dee Metleet wiesen. Soo aus Jehova well wie waut fa dee doonen. Hee lat biejlikj de Sonn jieda Dach oppgonen, onen daut wie am doano froagen. Un de Sonneschien kjemt aulem togood, mau rajcht dee, waut am nich mol dankboa doafäa sent. Wurscht du nich uk sajen, daut Jehova ons siene Leew wiest, doaderch daut hee fa ons sorcht? Wie leewen Jehova sea, wäajen hee soo leeftolich un friejäwrich es!

¹⁴ Onse Breeda un Sestren doonen Jehova no un sent wellich reed, waut fa aundre to doonen. Aune 2013 recht de Storm Haiyan biejlikj grooten Schoden aun opp de Filippinen. Een schoof Breeda veluaren äare Hiesa un äa Hab un Goot. Oba de Gloowesbreeda oppe gaunze Welt wieren bosich reed, dee to unjastetten. Väle holpen dee met Jelt ut ooda holpen met, de Hiesa foadich to moaken ooda fresch to buen. En weinja aus een Joa worden meist 750 Hiesa foadich jemoakt! Uk en de Tiet von de COVID-19-Krankheit hab wie onse Breeda sea jeholpen. Wan wie bosich reed sent onse Breeda to halpen, dan wies wie, daut wie dee leewen.

15-16. Woo kjenn wie no Lukas 6:36 no onsen himlischen Voda nodoonen?

¹⁵ Jehova es metliedent un reed toom vejäwen (läs Lukas 6:36). Wie beläwen daut jieda Dach, woo metliedent ons himlischa Voda es (Psa. 103:10-14). Jesus wia metliedent un reed toom vejäwen, wan siene Jinja uk onvolkomen wieren. Hee wia mau rajcht reed sien Läwen aus Opfa to jäwen,  daut ons kjennen de Sinden vejäft woaren (1. Joh. 2:1-2). Feelst du die Jehova un Jesus nich no aun, wiels dee soo metliedent sent un reed toom vejäwen?

¹⁶ Onse Leew unjarenaunda woat jrata, wan wie aundre wellich vejäwen (Efs. 4:32). Secha es daut eenjemol sea schwoa un doawäajen mott wie uk wieda doaraun schaufen. Eene Sesta studieed dän Artikjel em Wachtturm “Vergebt einander bereitwillig” un daut holp ar sea. * See schrift: “Dis Artikjel holp mie to vestonen, en waut vonne Stekjen mie daut togood kjeem, wan ekj aundre vejeef. Dee säd, daut vejäwen nich bedied, daut daut rajcht wia, waut de aundra jedonen haud, ooda daut daut goanich soo schlemm wia. Oba vejäwen bediet, daut eena äwa dän aundren nich mea doll es un ennalich wada Fräd haft.” Wan wie wellich reed sent onse Breeda un Sestren to vejäwen, dan wies wie dee Leew un wie doonen doaderch onsen himlischen Voda Jehova no.

17. Woo kjenn wie no Matäus 5:16 no onsen himlischen Voda ieren?

¹⁷ Wie sent sea dankboa doafäa, daut wie kjennen to eene leeftolje Famielje von Breeda un Sestren jehieren, waut oppe gaunze Welt es. Un wie wellen, daut soo väl Menschen aus mäajlich met ons toop Gott deenen. Doawäajen well wie kjeenmol waut doonen, wuaderch doa kunn Schaund opp Jehova un sien Volkj komen. Wie proowen ons emma soo to vehoolen, daut de Menschen wellen no de goode Norecht horchen (läs Matäus 5:16).

18. Waut kaun ons halpen, daut wie met Moot Zeichnis jäwen?

¹⁸ Eenjemol kaun daut sennen, daut aundre äwa ons grunzen ooda ons mau rajcht vefoljen, wäajen wie no onsen himlischen Voda horchen. Waut kjenn wie doonen, wan wie Angst haben, met aundre äwa onsen Gloowen to räden? Wie kjennen ons secha sennen, daut Jehova un Jesus ons halpen woaren. Jesus vesechad siene Jinja,  daut see nich doaräwa duaren brukten, waut see räden ooda woo see daut sajen sullen. Wuarom nich? Jesus säd: “Waut jie räden sellen, woat junt jrod dan jejäft woaren. Wiels daut sent nich jie, dee doa räden, oba jun Voda sien Jeist, dee derch junt rät” (Mat. 10:19-20).

19. Woo jeef Robert äwanäment Zeichnis?

¹⁹ Denkj wie mol aun daut Biespel von Robert, waut en Sied-Afrika wont. Aus hee noch nich lang de Bibel studieet haud un noch mau weinich von de Bibel wist, must hee verem Jerecht utlajen, wuarom hee nich wull Soldot woaren. Hee wia äwanäment un läd doa ut, daut hee nich wull Soldot woaren, wäajen hee siene Gloowesbreeda leewd. Hee schazt daut, daut hee kunn to Jehova siene Famielje jehieren. Met eemol haustich fruach de Rechta am: “Wäa sent diene Breeda?” Robert haud nich met dise Froag jeräakjent, oba hee docht fuaz aun dän Varsch fa dän Dach, waut hee jeläst haud. Daut wia Matäus 12:50. Doa sajcht daut: “Wäa doa deit waut mien Voda em Himmel velangt to doonen, es mien Brooda, miene Sesta un miene Mutta.” Wan Robert uk noch nich lang de Bibel studieet haud, holp Jehova am derch sienen Jeist, dise un uk aundre Froagen, wua hee nich met jeräakjent haud, rajcht to beauntwuaten. Jehova mott sennen sea brow jewast met Robert! Jehova es uk brow met ons, wan wie ons opp am veloten un en schwoare Loagen äwanäment Zeichnis jäwen.

20. To waut well wie ons gaunz eenich sennen? (Johanes 17:11, 15).

²⁰ Wie sent sea dankboa, daut wie to soo eene leeftolje Famielje jehieren kjennen. Wie haben dän basten Voda, waut wie ons wenschen kjennen, un uk väl Breeda un Sestren, waut ons leewen. Well wie daut nienich fa selfstvestentlich nämen! De Soton un siene Helpa wellen ons enbillen, daut ons himlischa Voda ons nich leeft, un dee wellen onse Eenichkjeit tweimoaken. Oba Jesus bäd fa ons to sienen Voda, daut hee äwa ons woaken sull, soo daut wie dise Eenichkjeit nich velieren sullen (läs Johanes 17:11, 15). Jehova horcht no dit Jebäd. Well wie soo aus Jesus nienich doaraun twiewlen, daut ons himlischa Voda ons leeft un halpen woat. Well wie ons aulsoo gaunz eenich sennen, onse jeistelje Famielje noch dolla to leewen!