1. Dahme kitail kak ekerki Siohwa?

SISES me “mesenih en kepikipik kan koaros,” oh tohnleng ngedehrie, wia kisehn peneinei me kin kaudokiong Siohwa. (Kol. 1:15; Mel. 103:20) Ni ahnsou me Sises ketiket nin sampah, e ketin kadehdehda me aramas lelepek kan kak ekerki Siohwa Samarail. Ni eh mahmahsaniong sapwellime tohnpadahk ko, Sises mahsaniheki Siohwa “Semei oh Samamwail.” (Sohn 20:17) Oh ni atail kin inoukihong Siohwa atail mour oh papidaisla, kitail kin wiahla kisehn peneinei limpoak en Kristian kan.​—Mark 10:29, 30.

2. Dahme kitail pahn koasoiapene nan iren onop wet?

² Ekei kin apwalki wiahki Siohwa nin duwen Sahm limpoak men. A ekei ele sehse ia duwen arail pahn kasalehiong riarail Kristian kan limpoak. Nan iren onop wet, kitail pahn tehkpene ia duwen Sises eh kin ketin sewese kitail en wiahki Siohwa Samatail limpoak men me kitail kak karanihala. Kitail pahn pil sukuhlki ahl akan me kitail kak kahlemengih Siohwa ong atail wiewia ong riatail Kristian kan.

3. Ia duwen kapakap en Samato eh kakerenihkitailla rehn Siohwa?

³ Siohwa ketin wia Sahm limpoak men. Sises kupwurki kitail en kilengwohng Siohwa duwehte me e kin ketin wia, nin duwen pahpa limpoak men me kitail kak koasoiong ahnsou koaros, a kaidehn emen me sohte kin kadek oh kin ndaiong kitailte dahme kitail pahn wia. Met sansalda sang dahme Sises ketin padahkihong sapwellime tohnpadahk ko en kapakapki. E tepikihda kapakapo ni eh mahsanih: “Samat.” (Mad. 6:9) Sises kakete ketin padahkihong kitail en ekerki Siohwa “Wasa Lapalap,” Sounkapikpik, de “Nanmwarki poatopoat”​—lengileng pwukat me konehng oh mi nan Paipel. (Sen. 49:25; Ais. 40:28; 1 Tim. 1:17)  Ahpw, Sises ketin padahkihong kitail en ekerki Siohwa “Samat.”

4. Ia duwen atail ese me Siohwa ketin kupwurki kitail en karanihala ih?

⁴ Ke kin apwalki wiahki Siohwa Sahm limpoak men? Ekei kitail kin. Ma pein atail pahpa sohte kin kadek, ele e sohte pahn mengei ong pein kitail en medewehla Sahm men me poakohng kitail. Ia uwen kansenamwahu en wehwehki me Siohwa uhdahn ketin wehwehki atail pepehm kan! E kin ketin kupwurki karanihkitailla. Ihme kahrehda sapwellime Mahsen kangoangehkin kitail: “Kumwail karanihala Koht, oh e pahn ketin karanihala kumwail.” (Seims 4:8) Siohwa kin ketin poakohng kitail, oh e ketin mahsanih me e pahn ketin wia Samatail me keieu mwahu.

5. Nin duwen me Luk 10:22 mahsanih, ia duwen Sises eh kak ketin sewese kitail en karanihala Siohwa?

⁵ Sises kak ketin sewese kitail en karanihala Siohwa. E uhdahn mwahngih duwen Siohwa oh kin kahlemengih Sapwellime irair kaselel kan ni unsek me kahrehda e mahsanih: “Mehmen me kilangieier pil kilangehr Sahmo.” (Sohn 14:9) Duwehte riatail pwutak laud men, Sises ketin padahkihong kitail ia duwen atail pahn wauneki oh peikiong Samatailo, ia duwen atail en dehr kansensuwedihada Ih, oh ia duwen atail pahn ale Sapwellime kupwuramwahu. Ahpw ni mehlel, Sises kin sewese kitail en wehwehki me Siohwa kin ketin kadek kalahngan oh limpoak. (Wadek Luk 10:22.) Kitail pahn koasoiapene ekei karasepe kan.

6. Menlau kihda karasepe kan duwen Siohwa eh kin ketin karonge Sises?

⁶ Siohwa kin ketin karonge sapwellime seri kan. Medewehla mwomwen Siohwa eh ketin karonge sapwellime Meseniho. Siohwa uhdahn ketin karonge kapakap tohto me sapwellime Ohlo wia erein eh mi sampah. (Luk 5:16) E ketin karonge ahn Sises kapakap duwen pilipil kesempwal ko, me duwehte ni ahnsou me Sises pilada nah wahnpoaron 12 ko. (Luk 6:12, 13) Siohwa pil ketin karonge ahn Sises kapakap ni ahnsou me e uhdahn pwunodada kowahlap. Mwohnte Sudas eh pangala ih, Sises patohwan kapakapkiong Semeo duwen kasongosong laud me pahn kereniong wiahiong ih. Siohwa sohte  ketin karongehte ahn Sises kapakapo ahpw E pil ketin kadarala tohnleng men en kakehlaka Sapwellime Ohl kompoakeo.​—Luk 22:41-44.

7. Ia omw pepehm ni omw ese me Siohwa kin ketin karonge atail kapakap kan?

⁷ Rahnwet, Siohwa pil kin ketin karonge atail kapakap kan, oh kin ketin sapengala ni ahnsou me konehng oh ni ahl me keieu mwahu. (Mel. 116:1, 2) Sister men nan India kilang ia duwen Siohwa eh ketin sapengala eh kapakap kan. E kin lokolongki pwunod laud oh kin kapakapkiong Siohwa duwen met. E ntingihedi: “JW Broadcasting^® en May 2019 me koasoia duwen dahme kitail kak wia ni atail pwunod iei me I uhdahn anahne. Met sapengala ei kapakap kan.”

8. Soangen ahl dah kan me Siohwa ketin kasalehiong Sises limpoak?

⁸ Siohwa kin ketin kasalehiong kitail sapwellime limpoak ni ahlohte me e ketin kasalehiong Sises sapwellime limpoak erein eh momour nin sampah. (Sohn 5:20) E ketin sewese Sises pwe eh pwoson en kehkehlailte, ketin kangoange ih ni eh kin pwunod, oh ketin tehk mwahu me Sises ahneki soahng kan me e anahne pwehn mour. Oh Siohwa sohte ketin pweiek en kasalehiong sapwellime Ohlo me e ketin poakohng oh kupwurki ih. (Mad. 3:16, 17) Sises ese me Seme limpoako pahn ketin ieiang ih ahnsou koaros oh pahn ketin sewese ih, kahrehda e sohte pehm me e kelekelehpw.​—Sohn 8:16.

9. Ia duwen atail ese me Siohwa ketin poakohng kitail?

⁹ Duwehte Sises, kitail koaros pehmehr sapwellimen Siohwa limpoak ni ahl tohto. Medewehla: Siohwa ketin mweidohng kitail en wiahla kompoakepah oh e ketikihong kitail riatail Kristian limpoak tohto me kin kahrehiong kitail en peren oh pwehn kangoange kitail ni atail kin pwunod. (Sohn 6:44) Siohwa pil kin ketikihong kitail mehkoaros me kitail anahne pwe atail pwoson en kak kehkehlailte. Oh e pil kin ketin sewese kitail en apwalihala atail anahn kan en ehuehu rahn. (Mad. 6:31, 32) Ni atail kin medemedewe duwen sapwellimen Siohwa limpoak ong kitail, atail poakohng ih kin laudla.

10. Dahme kitail kak sukuhlkihsang sapwellimen Siohwa wiewia ong riatail Kristian kan?

¹⁰ Siohwa kin ketin poakohng riatail Kristian kan. Ahpw e sohte kin mengei ahnsou koaros en poakohng irail oh kasalehiong irail me kitail poakohng irail. Ekei pak e kin apwal pwehki atail tiahk kan wekpeseng de mwomwen atail tikida wekpeseng. Kitail koaros kin wiahda sapwung kan me kakete kalingeringerihda de kansensuwedihala meteikan. Ahpw, kitail koaros kak nantihong en kakehlaka atail limpoak en Kristian. Ia duwen? Ni atail kin kahlemengih Samatailo oh kasalehiong riatail Kristian kan limpoak. (Ep. 5:1, 2; 1 Sohn 4:19) Kitail kilang dahme kitail kak sukuhlkihsang sapwellimen Siohwa mehn kahlemeng.

11. Ia duwen Sises eh ketin kasalehda sapwellimen Siohwa kupwurkalahngan?

¹¹ Siohwa kin ketin kasalehda “kupwurkalahngan.” (Luk 1:78) Aramas kadek men kin nsensuwedla ni eh kin kilang meteikan ar kin lokolok: e kin rapahki ahl akan me e kak sewese oh kansenamwahwihirailla. Sises kin ketin kahlemengih sapwellimen Siohwa limpoak ong aramas akan sang ni sapwellime wiewia kan ong irail. (Sohn 5:19) Ni ehu ahnsowo me Sises ketin mahsanihada pokon ehu, “e ketin poakeirailla pwehki irail wiakaula oh sohte epwelparail rasehng sihpw kan me sohte sileparail.” (Mad. 9:36) Sises ketin wia laudsang en poakeirailahte, e ketin wia mehkot pwehn sewese irail. E ketin kamwahwihala me soumwahu oh ketin sewese irail kan me “pwangadahr oh toutoulahr.”​—Mad. 11:28-30; 14:14.

12. Menlau kihda karasepe kan duwen atail kak kasalehda kadek?

 ¹² Mwohn atail kak kasalehiong riatail Kristian kan kadek, kitail anahne medewe mahs kahpwal dah kan me re kin lelohng. Karasepe, ele sister men kin ahneki kahpwal en roson laud ehu. E sohte kin koasoia duwen eh kahpwalo, ahpw e uhdahn pahn perenki ma emen sewese ih. Ia duwe, e kak apwalih anahn en eh peneinei kan? Kitail kak sewese kukihada kisin mwenge de kamwakele imweo? De brother men kakete sohla eh doadoahk. Kitail kak kisekisehki ih kisin mwohni, mwein ni atail sohte padahkihong me e kohsang rehtail, pwehn kak sewese ih lao e diarada ehu doadoahk.

13-14. Ia duwen atail kak kasalehda kadek sapan duwehte Siohwa?

¹³ Siohwa me ketin kadek sapan. (Mad. 5:45) Kitail sohte anahne awih lao riatail Kristian kan peki atail sawas pwe kitail en kasalehda kadek. Duwehte Siohwa, kitail kak wia mehkot mwohn ar peki. E kin ketin wiahiong ketipino en dakada rahn koaros oh kitail sohte kin anahne peki! Oh koaros kin paiekihda ketipino, a kaidehn irail kante me kin kalahnganki. Sang ni Siohwa eh kin ketikihong kitail soahng kan me kitail anahne, e kin ketin kasalehiong kitail me e poakohng kitail. Kitail uhdahn kin poakohng Siohwa pwehki eh ketin kadek sapan!

¹⁴ Riatail Kristian tohto kin kahlemengih Siohwa oh kin kadek ong meteikan. Karasepe, nan pahr 2013, melimel laud me adaneki Haiyan kahrehda ohla laud nan Philippines. Riatail Kristian tohto sohla imwarail oh ar kepwe. Ahpw riarail Kristian kan nan sampah pwon mwadangete sewese irail. Me tohto iang sawas kihda mwohni de iang sewese onehda sapahl ihmw kan, met imwikihla ar onehda sapahl ihmw me kereniong meh 750 me mwotomwotsang sounpar ehu! Erein soumwahu lusulus en COVID-19, Sounkadehde kan doadoahk laud pwe ren sewese riarail Kristian kan. Ni atail kin mwadang sewese riatail Kristian kan, kitail kin kasalehiong irail me kitail poakohng irail.

15-16. Nin duwen me Luk 6:36 mahsanih, ia ahl kesempwal me kitail kak kahlemengih Samatailo nanleng?

¹⁵ Siohwa kin ketin kadek kalahngan oh mahk. (Wadek Luk 6:36.) Rahn koaros Samatailo nanleng kin ketin mahkohng emenemen kitail. (Mel. 103:10-14) Sapwellimen Sises  tohnpadahk kan sohte unsek; ahpw e kin ketin kasalehiong irail kadek kalahngan oh mahk. E pil ketin kupwurki meirongkihla sapwellime mour pwe kitail en kak ale mahkpen dipatail kan. (1 Sohn 2:1, 2) Komw sou kin karanihala Siohwa oh Sises pwehki sapwellimara kadek kalahngan oh mahk?

¹⁶ Kitail kin kakehlaka atail limpoak en Kristian ni atail kin “mahkpene ni mehlel.” (Ep. 4:32) Mehlel, en mahkohng meteikan kak apwal ekei pak, ahpw kitail anahne nantihong wia met. Emen sister pehm me iren onop en Kahn Iroir me oaralape “En Mahkpene Nanpwungatail” sewese ih en wia met. * E ntingihedi: “Iren onop wet sewese ie en wehwehki me en mahkohng meteikan kin sewese ie. Iren onopo kawehwehda me ni omw kin mahkohng meteikan, met sohte kin wehwehki me ke medewe me sapwung me re wiao pwung, de me met sohte kin kansensuwedihiukala. Ahpw ni omw kin mahkohng irail, ke sohla kin lingeringer pahrail oh met ke kakehr ahneki popohl.” Ni atail kin uhdahn mahkohng riatail Kristian kan, kitail kin kasalehda me kitail poakohng irail oh me kitail kin kahlemengih Samatailo Siohwa.

17. Nin duwen me Madiu 5:16 mahsanih, ia duwen atail kak kawauwih Samatailo nanleng?

¹⁷ Kitail uhdahn kalahnganki eh mie atail peneinei en Kristian kan nan sampah pwon me kin poakpene. Kitail men aramas tohto en iang kitail kaudokiong atail Kohto. Eri, kitail en dehr wia mehkot me kakete kahrehiong aramas akan ren medewehki soahng suwed kan duwen Siohwa de sapwellime aramas akan. Kitail en ahnsou koaros kasalehda tiahk mwahu pwe aramas akan en men sukuhlki duwen Siohwa oh papah ih.​—Wadek Madiu 5:16.

18. Dahme kak sewese kitail en kalohk ni eimah?

¹⁸ Ekei pak, ele ekei aramas pahn kin kepitkin kitail de pil kaloke kitail pwehki atail kin peikiong Samatailo nanleng. Dahme kitail kak wia ma kitail salohda ni atail kin koasoiaiong meteikan dahme kitail kamehlele? Kitail kak kamehlele me Siohwa oh sapwellime Ohlo pahn ketin sewese kitail. Sises ketin kamehlelehiong  sapwellime tohnpadahk ko me re sohte anahne pwunodki ia duwen arail pahn koasoi de dahme re pahn nda. Dahme kahrehda? Sises ketin kawehwehda: “Dahme kumwail pahn koasoia pahn kohieng kumwail ni awao; pwe kaidehn kumwailte me pahn koasoi, ahpw manaman en Samamwail me pahn kalokaiahkin kumwail.”​—Mad. 10:19, 20.

19. Menlau kihda ehu karasaras duwen emen me kalohk ni eimah.

¹⁹ Medewehla mehn kahlemeng en Robert. Nan ehu ahnsowo me e wia tohnsukuhl en Paipel kapw men oh saikinte wehwehki mwahu duwen Paipel, e anahne kohla nan mwoalen kopwung oh kawehwehiong sounkopwung men dahme kahrehda e sohte pahn iang sounpei. Ni eimah e kawehwehiong tohn mwoalen kopwungo me e men kolokolete eh soupoupali pwehki eh limpoak ong rie Kristian kan. E kalahnganki eh wia kisehn sapwellimen Siohwa peneinei! Ni ahnsowohte sounkopwungo ahpw idek: “Ihs riomw kan?” Robert sohte kasik me e pahn idek peideko, ahpw, e tamanda iren Paipel ong iren rahn en rahno. Me iei Madiu 12:50: “Pwe mehmen me kin wia kupwuren Semei me ketiket nanleng, iei ih me riei pwutak, riei serepein oh inei.” Mendahki Robert wia tohnsukuhl en Paipel kapw men, sapwellimen Siohwa manaman sewese ih en sapengala peideko oh peidek teikan me e pil sohte kasik. Ele Siohwa uhdahn kupwurperenkihda Robert! Oh Siohwa pil kin ketin kupwurperenkihda ni atail kin likih ih oh kalohk ni eimah nan irair apwal kan.

20. Dahme kitail en koasoanehdi teng en wia? (Sohn 17:11, 15)

²⁰ Kitail uhdahn kalahnganki atail wia kisehn sapwellimen Siohwa peneinei limpoak. Mie Samatail me keieu mwahu oh riatail tohto me kin poakohng kitail. Kitail en ahnsou koaros kalahnganki mepwukat. Sehdan oh irail kan me kin idawehn ih kin song en kahrehiong kitail en peikasalki Samatail limpoako oh kin song en kauwehla atail kin miniminpene. Ahpw, Sises ketin kapakapkin kitail, e patohwan peki rehn Samatailo en ketin apwahpwalih kitail pwe atail peneinei en Kristian en kin miniminpene. (Wadek Sohn 17:11, 15.) Siohwa kin ketin sapeng kapakapo. Duwehte Sises, kitail en dehr peikasalki me Samatailo ketin poakohng kitail oh pahn ketin sewese kitail. Kitail en koasoanehdi teng kitail en pousehlahte karanihala riatail Kristian kan.