1. ¿Imaynatataj runas Jehová Diosta qhawayta atisunman?

JEHOVAJ familianmanta kajkunaqa payta yupaychanku. Jesuswan angeleswanpis payta yupaychallankutaj. Jesusqa ‘tukuy ima ruwasqa kajmanta ñaupaj kaj’ (Col. 1:15; Sal. 103:20). Jesusqa kay Jallpʼapi kashaspa runasta yanaparqa Jehovata Tatankuta jina qhawanankupaj. Uj kuti Jesús discipulosninwan parlashaspa nerqa Jehovaqa ‘Tatay Tataykichejtaj’ (Juan 20:17). Chantapis Jehovaman kausayninchejta qopuspa, bautizakuspa ima Diospa llajtanpi ashkha hermanosta, hermanasta ima tarinchej. Paykunataj munasqa familianchej jina kanku (Mar. 10:29, 30).

2. ¿Imastá kay yachaqanapi yachakusun?

² Wakin hermanosqa Jehová Diosta, mana munakoj Tatankuta jina qhawayta atillankuchu. Wakintaj cristiano hermanosninkuta mana munakuyta atillankuchu. Kay yachaqanapitaj yachakusun imaynatachus Jesús yanapawasqanchejta, Jehovata munakuyniyoj Tatanchejta jina qhawanapaj, paymantaj qayllaykunapaj. Chantapis yachakullasuntaj imaynatachus Jehová jina hermanosninchejta munakuyta atisqanchejta.

3. ¿Imataj yanapawanchej Jehová Diosman astawan qayllaykunapaj?

³ Jehovaqa kʼacha Tata. Chayrayku Jesusqa munan Tatanchejta jina qhawananchejta, paywantaj ima ratollapis parlarinanchejta. Manataj munanchu sajra tatata jina qhawananchejta. Chaytataj sutʼita rikucherqa discipulosninman mañakuyta yachachishaspa. Payqa mañakuyta qallarishaspa nerqa: “Cielopi kashaj Tatayku”, nispa (Mat. 6:9). Jesusqa, Jehovata “Tukuy Atiyniyoj”, ‘tukuy imata ruwaj’, “Wiñaypaj wiñayninkama Rey”, nispa ninanchejta ninman karqa. Chay imasta  nispaqa mana pantashanmanchu karqa, imajtinchus Bibliapipuni rikhurin (Gén. 49:25; Isa. 40:28; 1 Tim. 1:17). Jinapis Jesusqa nerqa Jehovata ‘Tatáy’ ninanchejta.

4. ¿Imaynamantá yachanchej Jehová payman qayllaykunanchejta munasqanta?

⁴ Ichá wakenqa Jehová Diosta mana munakuyniyoj Tatanchejta jina qhawayta atillanchejchu. Chaytaj kanman wawas kashajtinchej tatanchej sufrichiwasqanchejrayku. Jehovaqa yachan imaynachus kashasqanchejta, imaraykuchus ajina kashasqanchejtapis. Qayllallanchejpipunitaj kayta munan. Chayta yachaytaj mayta sonqochawanchej. Chayrayku Palabranqa niwanchej: “Diosman qayllaykuychej, paytaj qankunaman qayllaykamusonqachej”, nispa (Sant. 4:8). Jehovaqa mayta munakuwanchej, sumaj Tata kasqantataj niwanchej.

5. Lucas 10:22 nisqanman jina, ¿imaraykutaj Jesús yanapawasunman Jehovaman astawan qayllaykunapaj?

⁵ Jesusqa yanapawasunman Jehovaman astawan qayllaykunapaj. Payqa Tatanta allinta rejsin, Tatan jinapunitaj tukuy imata ruwan. Chayrayku pay nerqa: “Noqata rikuwajqa Tataytapis rikullantaj”, nispa (Juan 14:9). Jesusqa kuraj hermanonchej jina Tatanchej Jehovata kasukuyta, respetayta ima yachachiwanchej. Yachachillawanchejtaj imastachus ruwanata kusichinapaj, allinpaj qhawanawanchejpaj ima. Chantapis Jesusqa kay Jallpʼapi kashaspa imastachus ruwasqanwan, sutʼita reparachiwanchej Jehová may kʼacha, munakuyniyojtaj kasqanta (Lucas 10:22 leey). Chaymanta astawan qhepan parrafospi yachakusun.

6. ¿Imaraykutaj nisunman Jesús mañakojtin Jehová uyarisqantapuni?

⁶ Jehovaqa wawasnin mañakojtinku uyarinpuni. Qhawarina ima kutispichus Wawan Jesusta uyarisqanta. Jesusqa kay Jallpʼapi kausakushaspa ashkha kutispi, tukuy imapajtaj mañakorqa, Jehovataj uyarerqapuni (Luc. 5:16). Payqa 12 apostolesninta ajllananpaj Tatanmanta yanapata mañakorqa (Luc. 6:12, 13). Jehovaqa Jesusta sapa mañakojtin uyarerqapuni. Chayrayku Jesusqa sinchʼi llakisqa kashaspa Tatanmanta yanapata mañakorqa. Niraj Judas wasanchashajtinpis maytapuni  rogakorqa llakiykunata aguantananpaj. Jehovaqa munasqa Wawanta uyarerqapuni, uj angeltataj kacharqa kallpachananpaj (Luc. 22:41-44).

7. ¿Imayná sientekunchej Jehová mañakusqanchejta uyariwajtinchej?

⁷ Kay tiempopipis Jehovaqa mañakusqanchejta uyarillawanchejtaj. Maychus tiemponpi necesitasqanchejman jinapunitaj yanapawanchej (Sal. 116:1, 2). India suyumanta uj hermana sutʼita repararqa mañakojtin Jehová uyarisqantapuni. Payqa may phutisqa kashaspa, manaña anchata phutikunanpaj Jehovamanta yanapata mañakorqa. Pay nin: “Mayo de 2019 watamanta JW Broadcasting^® nisqapi may phutisqa kashaspa imastachus ruwanamanta parlasharqa. Chaytaj noqapaj jinapuni karqa. Chay videota qhawaspataj repararqani Jehovaqa mañakojtiy uyariwasqantapuni”, nispa.

8. ¿Imaynasmantataj Jehová rikucherqa Jesusta munakusqanta?

⁸ Jehovaqa imaynatachus Jesusta Jallpʼapi kashajtin munakorqa, ajinallatataj munakuwanchej (Juan 5:20). Jehovaqa Jesusta yanaparqa sinchʼita sayananpaj, llakiykunata aguantananpaj, tukuy ima necesitasqantataj qorqa. Chantapis nerqa munakusqanta, allinpaj qhawasqanta ima (Mat. 3:16, 17). Jesusqa ni jaykʼaj yuyarqachu sapallan kashasqanta. Imajtinchus yacharqa munakuyniyoj Tatan Jehová payta yanapanantapuni (Juan 8:16).

9. ¿Imaynatá yachanchej Jehová munakuwasqanchejta?

⁹ Noqanchejtapis Jehovaqa Jesusta jina mayta munakullawanchejtaj. Jehovaqa llajtanman pusamuwarqanchej, chaypitaj ashkha hermanosta, hermanasta ima qowanchej. Paykunaqa mayta munakuwanchej, kusisqa kanapaj yanapawanchej, llakisqa kashajtinchejpis sonqochawanchej (Juan 6:44). Sinchʼi sayasqallapuni kanapajtaj ashkha yachachiykunata mikhunata jina qowanchej. Sapa diataj imatachus necesitasqanchejta qowanchej (Mat. 6:31, 32). Jehová mayta munakuwasqanchejpi piensarispaqa, astawan payta munakunchej.

10. ¿Imatá yachakunchej Jehová hermanosninchejta munakusqanmanta?

¹⁰ Jehovaqa hermanosninchejta munakun. Jinapis ichá noqanchejqa mana paykunata munakuyta atillasunmanchu, nitaj “munakuyki niytapis”. Imajtinchus waj jina culturasniyoj kanchej chayri waj jinamanta uywasqas kanchej. Tukuytaj imapipis pantanchejpuni, chaytaj hermanosninchejta phiñachinman chayri sonqonta nanachinman. Chaywanpis tukuy kallpachakusunman Jehová jina hermanosninchejta munakunapaj (Efe. 5:1, 2; 1 Juan 4:19). Imaynatachus pay jina ruwanata qhepan parrafospi qhawarisun.

11. ¿Imaynatataj Jesús, Jehová jina khuyakoj kasqanta rikucherqa?

¹¹ Jehovaqa jatun khuyakuyniyoj (Luc. 1:78). Khuyakoj runaqa wajkunata sufrishajta rikuspa, imaynallamantapis yanapananpaj, sonqochananpaj ima kallpachakun. Jesusqa runasta khuyakuspa, Tatan jina kasqanta rikucherqa (Juan 5:19). Bibliaqa Jesusmanta parlaspa nin: “Ashkha runasta rikuspataj paykunata khuyakorqa, imaraykuchus mitharasqas, tʼaqa tʼaqallataj kasharqanku, mana michejniyoj ovejas jina”, nispa (Mat. 9:36). Jesusqa runasta khuyakusqanrayku paykunata yanaparqa, onqosqasta sanoyacherqa, saykʼusqasta yanaparqa, llasa qʼepiyojkunatapis samaricherqa (Mat. 11:28-30; 14:14).

12. ¿Imaynasmantá khuyakoj kasqanchejta rikuchisunman?

¹² Hermanosninchej ima llakiykunasniyojchus kashasqankupi piensarisun chayqa, paykunata khuyakuyta atillasun. Ichá uj hermananchej  sinchʼi onqosqa kashanman, onqoyninmantataj ni jaykʼaj parlanmanchu. Jinapis yanaparejtinchejqa mayta kusikunman. Hermanaqa ichá familianman necesitasqanku imasta mana qoyta atishanchu. Ichá yanaparisunman mikhunata waykʼuripuspa chayri wasinta llimphuchapuspa. Chayri uj hermano mana trabajoyoj qhepakunman. Jina kajtin ichá qolqesituwan yanaparisunman mana willaspalla pichus qoshasqanta. Chaytaj yanapanman waj trabajota tarikunankama.

13, 14. ¿Imaynatataj Jehová jina kʼacha kasqanchejta rikuchisunman?

¹³ Jehovaqa ancha kʼacha (Mat. 5:45). Khuyakuyniyoj runa kayta munanchej chayqa, ama suyanachu hermanosninchejraj yanapata mañakunawanchejta. Noqanchejqa Jehová jina paykunata yanaparisunman. Payqa mana mañakushajtillanchej tukuypaj sapa pʼunchay intita llojsichinpuwanchej. Manataj agradecekuyta yachaj runasllapajchu. Jehovaqa tukuy ima necesitasqanchejta qowanchej. Ajinamanta mayta munakuwasqanchejta rikuchiwanchej. Payqa munakuyniyoj, may kʼachataj. Chayrayku paytaqa mayta munakunchej.

¹⁴ Ashkha hermanosninchejqa Jehová Tatanchej jina wajkunamanta khuyakunku. Kay 2013 watapi sinchʼi wayra kasqanrayku, mama qochamanta yaku wasaykamuspa Filipinaspa ashkha llajtitasninta chinkarparicherqa. Ashkha hermanos mana wasisniyoj qhepakorqanku, tukuy imankutataj pierderqanku. Jinapis mundontinmanta hermanosqa chay rato yanaparqanku. Wakenqa qolqesitunkuwan yanapakorqanku. Wakin hermanostaj chay lugarman rispa, hermanosta yanaparqanku. Niraj watapitaj 750 wasista jina allincharqanku chayri watejmanta ruwarqanku. Kay jatun onqoy COVID-19 nisqa kashajtinpis, testigosqa mayta kallpachakorqanku hermanosninkuta yanapanankupaj. Hermanosninchejta usqhayllata yanapaspaqa, paykunata munakusqanchejta rikuchinchej.

15, 16. Lucas 6:36 nisqanman jina, ¿imatá ruwananchej tiyan Tatanchej Jehová jina kanapaj?

¹⁵ Jehovaqa khuyakuwanchej, perdonawanchejtaj (Lucas 6:36 leey). Tatanchej Jehovaqa sapa día khuyakuwanchej (Sal. 103:10-14). Jesuspis discipulosninta pantaj runas kajtinkupis khuyakorqa, perdonarqataj. Payqa  kausayninta qorqa juchasninchejmanta perdonasqa kananchejpaj (1 Juan 2:1, 2). Jehovawan, Jesuswan khuyakuwasqanchejrayku, perdonawasqanchejraykutaj paykunaman astawan qayllaykunchej.

¹⁶ Tukuy sonqo perdonaspaqa hermanosninchejta astawan munakunchej (Efe. 4:32). Wakin kutisqa ichá mana perdonayta atillasunmanchu. Jinapis kallpachakunanchej tiyan perdonanapaj. Uj hermanataqa Torremanta Qhawaj revistapi “Purajmanta perdonanakuychej” nisqa yachaqana mayta yanaparqa. * Pay nin: “Kay yachaqanata estudiaspa sutʼita repararqani wajkunata perdonayqa allinniypaj kasqanta. Chay yachaqanapi sutʼincharqa wajkunata perdonayqa mana niyta munanchu juchanta allillanpaj qhaway chayri wajkunata ñakʼarichisqanta pisiyachiy. Chantá, ¿imataj perdonay niyta munan? Tukuy phiñakuyninchejta sonqonchejmanta wijchʼuy niyta munan, sonqo tiyasqa kanallapajpuni”, nispa. Hermanosninchejta tukuy sonqo perdonaspaqa, paykunata munakusqanchejta rikuchinchej, Tatanchej Jehová jinataj ruwasqanchejta rikuchinchej.

17. Mateo 5:16 nisqaman jina, ¿imaynatataj Tatanchej Jehovata jatunpaj qhawachisunman?

¹⁷ Mayta kusikunchej mundontinmanta tukuy hermanos mayta munanakusqanchejmanta. Maytataj munanchej noqanchejwan khuska may chhika runas Diosta yupaychanankuta. Chayrayku tukuy atisqanchejta kallpachakunchej Jehovaj sutinta mana chʼichichanapaj chayri llajtanta mana pisipaj qhawachinapaj. Maytataj kallpachakunchej allinta kausakunanchejpaj. Ajinamanta waj runaspis Diosmanta yachakuyta munanankupaj (Mateo 5:16 leey).

18. ¿Imataj yanapawasun mana manchachikuspa predicanapaj?

¹⁸ Wakin runasqa chejnikuwasun chayri qhatiykachawasun Tatanchej Jehovata kasukusqanchejrayku. Runaswan Diosmanta parlariyta manchachikojtinchejqa, Jehovawan Jesuswan yanapawasun. Chayta amapuni qonqanachu. Jesusqa discipulosninman nerqa ama  llakikunankuta imaynatachus parlanankumanta chayri imatachus ninankumanta. Payqa paykunaman ajinata sutʼincharqa: “Chay ratopacha Dios yuyaychasonqachej imatachus parlanaykichejta. Mana qankunallachu parlankichej, manachayqa Tataykichej atiyninwan yanapasonqachej parlanaykichejpaj”, nispa (Mat. 10:19, 20).

19. ¿Imaynatataj uj hermano mana manchachikuspa Bibliamanta sutʼincharqa?

¹⁹ Hermano Robertmanta parlarina. Payqa Bibliata estudiayta qallarisqantawan Sudafricamanta cortepi presentakamunan karqa sutʼinchananpaj imaraykuchus mana cuartelman rinanta. Chay kutipi, payqa pisillataraj Bibliamanta yachakorqa. Payqa mana manchachikuspa sutʼincharqa cristiano hermanosninta munakusqanrayku mana cuartelman rinanta. Ajinamanta payqa Diospa llajtanpi kayta allinpaj qhawarqa. Jinallapi juez taporqa: “¿Pitaj hermanosniyki kankuri?”, nispa. Hermano Robertqa mana yuyallarqapischu chayta tapunankuta. Payqa jinallapi yuyarikorqa chay diapaj ajllasqa textota. Chay diapaj ajllasqa textoqa Mateo 12:50 karqa. Chaypi nin: “Pichus cielopi kashaj Tataypa munayninta ruwajqa, chaymin hermanoy, hermanay, mamaytaj”, nispa. Robert manaraj unaytachu Bibliamanta yachakushajtinpis, Diospa atiynenqa payta yanaparqa chay tapuyman, waj tapuykunamanpis kutichinanpaj. Jehovaqa maytachá kusikorqa Robert chayta ruwasqanmanta. Noqanchejpis llakiykunapi kashaspa mana manchachikuspa predicanapaj paypi atienekusun chayqa, kusichillasuntaj.

20. ¿Imatataj ruwanallanchejpuni tiyan? (Juan 17:11, 15).

²⁰ Diospa llajtanpi kʼacha familiayoj kasqanchejmanta kusikunallapuni. Tatanchejqa may kʼachapuni, hermanosninchej, hermanasninchejpis mayta munakuwanchej. Ajina familiayoj kasqanchejmanta maytapuni kusikunchej. Satanaswan payta qhatejkunawanqa, Tatanchej Jehová mana munakuwasqanchejta yuyachiyta munawanchej, hermanosninchejmantataj karunchayta munawanchej. Jesusqa noqanchejpaj orapuwarqanchej, Jehovamantataj mañapuwarqanchej hermanosninchejwan ujchasqa kanapaj yanapanawanchejta (Juan 17:11, 15 leey). Jehovataj Jesuspa mañakusqanman jina ruwashan. Jesús jina, Tatanchej Jehová munakuwasqanchejpi, yanapanawanchejpi ima atienekuna. Hermanosninchejwan ujchasqallapuni kausakunapajtaj kallpachakuna.