1. ¿Imanirtaj ‘Taytalä’ nir gayacunchi Jehová Diosta?

JEHOVAPÄGA cieluchopis Pachachopis familian caycanmi. Jesusga “caycarannami Tayta Dios manaraj imata camaptinpis”. Maychicaj angelcunapis caycanmi Jehovapa familian rurincho (Col. 1:15; Sal. 103:20). Cay Pachacho Jesús cashpanga yachachicurganmi Taytanchitano Jehová Diosta ricänapaj. Taytan Jehovapaj parlarmi juc cuticho Jesús cayno nergan gatejnincunata: “Noqapa Taytäqa qamkunapapis Taytaykimi” (Juan 20:17). Aumi, Dioslapäna cawanapaj aunicur bautizacurmi Taytanchi Jehovapa familian rurinchona caycanchi (Mar. 10:29, 30).

2. ¿Imapitataj canan yachacurishun?

² Waquincunapäga sasa canman Jehová Diosta cuyacoj Taytantano ricänanpaj. Waquincunana hermanuncunata cuyaylatapis yachanmanchu. Cananmi yachacurishun imanomi Jesús yanapaycalämanchi cuyacoj Taytanchitano Jehovata ricänapaj y paylaman guelicunapaj. Nircurpis yachacushun imacuna rurartaj Jehovanola cristiano masinchicunata cuyashwan.

3. Jehovaman masraj guelicunapaj, ¿imatataj padrenuestro nishgan oraciuncho Jesús nergan?

³ Jehovaga cuyacoj Taytalanchimi caycan; ¿imanomi wamra cushi cushila cuyacoj taytanwan parlapäcun?, chaynolami Dioswan parlapacushwan; payga manami manchacunapaj juc mandacoj runanochu naupanchicho ichiraycan. Chaymi Diosta imano mañacunapaj parlar “jana patsacho kaykaq Papä” nir gatejnincuna mañacärinanpaj Jesús  yachachicurgan (Mat. 6:9). Jesusga yachachicunman cargan chay oraciuncho ‘Lapanta puedej’, ‘Camacoj’, ‘Imaycamapis cawacoj’ nir Jehovata gayacunapaj (Gén. 49:25; Is. 40:28; 1 Tim. 1:17). Pero “Papä” nirmi oraciunninta galaycurgan.

4. ¿Imanirtaj Jehová munan payman guelicunanchita?

⁴ ¿Öraga sasachu ticracurin Jehová Diosta cuyacoj Taytanchitano ricänapaj? Ichanga “aumi” pipis ninman wamra cashgan wichan alapa nacashganraycur. Chayno captenga ama gongashunchu, Jehovaga musyanmi ima laquesacunapa pasashganchita, shogaycalämanchimi. Chaymi Palabranchopis cayno nin: “Diosman guelicurga paypis noganchimanmi guelicamunga” (Sant. 4:8, TNM). Jehovaga amatarmi cuyaycalämanchi, paynoga manami pipis canchu.

5. Lucas 10:22 texto wilacushganno, ¿imanirtaj nishwan Jehovaman guelicunapaj Jesús alapa yanapämashganchita?

⁵ Jesusga yanapämashwanmi Jehovawan masraj reguinacunapaj. Payga shumajmi Taytanta reguin y paynola imatapis ruran. Chaymi cayno nergan: “Noqata reqimaq kaqqa Taytätapis reqinmi” (Juan 14:9). Mayor hermanunchinomi Jesusga Taytalanchi Jehovata respetanapaj, casucunapaj y naupalancho ali caycänapaj yachachimanchi. Cay Pachacho Jesús imacunata rurashganta ricarmi cuentata gocunchi Jehová amatar cuyacoj cashganta (leiriy Lucas 10:22). Mä chaypita canan parlarcushun.

6. ¿Jesús mañacamushgantaga Jehová wiyarganchuraj?

⁶ Churincuna mañacämushgantaga Jehová wiyanmi. ¿Manacu Jesús cutin cutin mañacushgantaga Taytan wiyargan? Aumi (Luc. 5:16). Juc cuticho mañacamurgan 12 apostolnincunata acrananpaj (Luc. 6:12, 13). Pasaypa laquishga caycashgan horapis mañacurganmi. Judas traicionananpäna caycaptinpis Papäninta ruwacurgan lapan pruebacunacho yanapänanpaj. Chay  lapancunachomi churin Jesusta Jehová wiyargan y mana chaylachu Papäninga juc angeltapis mandarganmi calpata goycunanpaj (Luc. 22:41-44).

7. ¿Imanotaj gam ricacunqui mañacushgayquinola Jehová yanapäshuptiquega?

⁷ Canan wichanpis Taytalanchi Jehovaga mañacushganchita wiyarmi yanapaycalämanchi (Sal. 116:1, 2). India naciunpita juc panipita parlarcushun. Payshi alapa laquicuycarla cawacoj, chaynash Jehovata ruwacurgan yanapänanpaj. Cayno wilacun: “2019 wata mayo quillapita JW Broadcasting^® programachomi parlamurgan yarpachacuycarla laquesacunapa pasar imata ruranapaj. Chay programaga nogapänomi cargan. Jehovaga wiyaycalämarganmi mañacuynëta”.

8. ¿Imanotaj Jehovaga churin Jesusta ricächergan alapa cuyashganta?

⁸ ¿Imanomi Jehová churin Jesusta alapa yanapaycurgan cay Pachacho caycaptin? Chaynolami jucninchi jucninchitapis yanapaycalämäshun ima ayca problemacunapa pasarpis (Juan 5:20). Jesustaga imaycachopis yanaparganmi cuyacoj Taytan cashpan ‘gamtaga cuyayculämi y chasquiyculämi’ nergan (Mat. 3:16, 17). Jesusga manami japalan ricacurganchu, musyarganmi imay horapis paywan Papänin caycashganta (Juan 8:16).

9. ¿Imanirtaj nishwan Jehovaga alapa cuyamashganchita?

⁹ Noganchipis ‘gamga cuyashgä churilämi canqui’ Jehová chayno nimashganchitanomi wiyashcanchi. Chaytaga ninchi familian rurincho canapaj acraycalämashganchipitami, cananga aylupurano waquin sirvejnincunawan yanapänacur cushi cushila cawacunchi (Juan 6:44). Jehovaga imaycatami goycalämanchi ali yaracoj canapaj; micunapäpis, upunapäpis manami pishichimanchichu (Mat. 6:31, 32). Chayno Diosninchi cuyaycalämaptinchega, ¡imanirtaj Payta mana cuyashwanchu ari!

10. ¿Imatataj yachacunchi sirvejnincunata Jehová imano cuyashganpita?

¹⁰ Jehovaga alapami cuyayculan hermanunchicunata. Ichanga waquinninchicunapäga sasano canman cuyanacunapäga. Chayga canman maycho yurishganchiraycur o imano ashmashga cashganchiraycurmi. Öraga juchasapa carmi imalapitapis rabiachinacuycanchi. Imano captinpis Jehová cuyamashganchino cuyanapaj calpachacushwanmi cristiano masinchicunawan mana raquicaypa caycänapaj (Efes. 5:1, 2; 1 Juan 4:19). Maslata yachacushun Jehová imano cuyacoj cashganpita.

11. ¿Imatataj Jesús rurargan cuyacoj Taytannola cashpan?

¹¹ Jehovaga cuyamashpanchimi “ali nawilanwan” ricaycalämanchi (Luc. 1:78). Noganchipis chayno carga pï nacaycajcunatapis shacyächirmi yanapayculäshun. Runacunata Jesús alapa cuyapashganga quiquin Jehová cuyapashgannomi cargan (Juan 5:19). Bibliami cayno wilacun: “Runacuna shuntacasha carcaycajta ricashpan Jesusga cuyapaj. Uyshëruynaj, ogracasha llaquisha uyshacunano caycajta ricarmi Jesusga cuyaparan” (Mat. 9:36). Jesusga manami shimilapitachu cuyacoj cargan. Gueshyaycajcunataga jampircojmi, arojcunataga yanaparcojmi y laquishga caycajcunataga shacyächejmi (Mat. 11:28-30; 14:14).

12. ¿Imacunata rurartaj hermanunchicunata cuyashganchita ricächishwan?

 ¹² Hermanunchicunata laquipar rasunpa cuyarga, imacunapa pasaycashgancunamanmi yarpachacushwan. Ichanga mayganlapis gueshyaycanman, upalala caycanman pero yanapariptinchega agradecicongami. Wasincho imalawanpis yanapänapaj caycanmanmi, micuyta apapänapaj o pichapacunalapäpis. Maygan hermanulanchipis trabajunta ograshga carga alichi canman guellayninchiwan yanaparcuptinchi, trabajunta yapay tarishgancama.

13, 14. ¿Imanotaj Diosninchi Jehovanola yanapacoj cashwan?

¹³ Jehovaga yanapacoj Diosninchimi caycan (Mat. 5:45). Hermanunchicunata laquipänapäga manami shuyaraycäshunrächu yanapänapaj nimänanchita. Diosninchi rurashgannomi quiquilanchipita yanapaycushwan. Inti yargamunanpaj y waran waran shanaycalämänanchipäga manami mañacuycanchichu, quiquin Jehovami lapanta goycalämanchi. Aumi, ima aycata gomashganchichomi ricacämun amatar cuyamashganchita. Noganchipis payta cuyayculäshun ari.

¹⁴ Achca hermanunchicunami Taytanchi Jehovanola alapa yanapacamun. 2013 watachomi Filipinas naciuncho tamyantintawan viento alapa pücamurgan. Waquin hermanucunapa wasincunaga juchucäcurganmi y imaycancunatapis ograpäcurganmi. Jinan horami may chaypita cuyacoj hermanucuna guellayninwan yanapacamurgan, y waquincunaga jinan sitiumanraj aywapäcurgan. Wata manaraj ushaptinpis 750 wasicunatano sharcachipäcurgan. Cay COVID-19 gueshya wichanpis alapami yanapanacushcanchi, cristiano masinchicunata jucla yanapacunapaj calpachacushganchichomi ricacämunga rasunpa cuyacoj cashganchi.

15, 16. Lucas 6:36 texto wilacushganno, ¿imatataj rurashwan cuyacoj Jehová Diosnola canapaj?

¹⁵ Jehovaga cuyapämashpanchimi perdunaycalämanchi (leiriy Lucas 6:36). Waran waranmi perdunninta chasquiycanchi  (Sal. 103:10-14). Chaynolami unay discipuluncuna cutin cutin pantaptinpis Jesusga laquiparmi perdunaycurgan. Mana chaylachu, Jesusga wanurganrämi perdunashga cananchipaj (1 Juan 2:1, 2). Jehovawan Jesús laquipämashpanchi perdunamashganchita ricarga masraj paycunaman guelicunchi.

¹⁶ Mana jagayanacuypa perdunanacurga cuyacoj cashganchiga masraj miraycunga y masraj hermanunchicunawan cuyanacushun (Efes. 4:32). Musyanchimi perdunanacunapaj sasano cashganta pero calpachacunanchimi. La Atalaya revistanchicho yargamurgan “Perdónense liberalmente unos a otros” * nishgan tema, chayga alapash yanapargan juc paninchita. Paymi cayno nin: “Yachacushgaga yanapämargan jucnopana yarpar galaycunäpaj. Chaycho wilacamurgan pitapis perdunarga manash niycanchichu mana ali rurashgancuna ali cashganta. Perdunacoj carshi mana jagayanacuypaj jauca jaucala cawacunchi”. Chauras cutin cutin hermanunchicunawan perdunanacurga Taytalanchi Jehovano cuyacoj cashganchi ricacanga.

17. ¿Imanotaj Taytanchi Jehovata respetachiycäshun Mateo 5:16 texto nishganno?

¹⁷ May chaycho caycarpis aylupuranomi hermanunchicunawan caycanchi, chayga cushicuypämi. Calpachacunanchimi waquin runacunapis shacäramunanpaj paycunawan junto Jehovata aduranapaj. Yarpaylapis yarpashwanchu lutancunata rurar Jehovapa jutinta mana cajpa churanapaj. Runacunaga shacäramunga alicunata rurashganchita ricar y Diospa ali wilacuyninta shumaj wilaparmi (leiriy Mateo 5:16).

18. ¿Imataj yanapämäshun valurcharcur Diospita yachachicunapaj?

¹⁸ Öraga waquincuna Taytalanchi Jehovata casucushganchilapitami alapa chiquimanchi. ¿Imatataj rurashwan Diospita yachachicuyta  manchacurga? Ama gongashunchu Jehovawan Jesusga yanapaycalämäshunmi. Jesusga gatejnincunatami nirgan mana laquicärinanpaj imapita o imano parlananpaj carcaycaptin. Cayno nergan: “Tayta Diosmi tantiyatsishunkipaq imata parlanaykipaqpis. Manami kikikikuna yarpashqaykitatsu parlapäkunkipaq, sinöqa Taytaykipa Espïritun tantiyatsishuptikimi nipäkunkipaq” (Mat. 10:19, 20).

19. Mana manchacushpan, ¿imatataj rurargan Robert jutiyoj wauguilanchi Bibliata estudiaycashgan wichan?

¹⁹ Robert wauguinchipita parlarcushun. Bibliata chaylaraj estudiaycaptinshi Sudáfrica naciuncho cuartelman gayachishga cargan. Hermanuncunata cuyashpanshi valurcharcur nergan chay tropacunaman mana yaycunanpaj. Robert wauguilanchiga cristiano masincunata cuyajmi. Chaycho caycaptin ilajpitash juc juez cayno tapurgan: “¿Pïcunataj hermanuyquicuna carcaycan?” nir. Wauguilanchiga imaniylatapis manash atiparganchu, pero chaycho yarparcurgan chay junaj ima textuta yachacushganta. Chay texto cargan Mateo 12:50, cayno nin: “Pipis jana patsacho kaykaq Taytä munashqanno kawaq kaqmi wawqï, panï y mamä kaykan”. Robert wauguinchi chaylaraj Bibliata estudiaycaptinpis Jehovapa espiritunwanga shumajmi autoridäcunapa naupancho parlamurgan. ¡Mayraj chaypita Taytalanchi Jehová cushicun! Noganchipis Diosninchita cushichinapäga mana manchacuypämi paypita yachachicunanchi.

20. ¿Imata ruraycarlataj caycashwan? (Juan 17:11, 15).

²⁰ Waran waran ‘graciaslä’ niycäshun Jehovapa familian rurincho caycashganchipita. Cuyacoj Taytanchinoga manami pipis canchu, wauguinchicunapis paninchicunapis cuyaycalämanchimi. Diablo ichanga cuyacoj Taytanchipita jucnopa yarpänanchita munan, hermanunchicunapitapis raquicänanchita munan. Jesusga jucninchi jucninchipämi ruwacurgan Taytan Jehová cuidaycalämänanchipaj chaynopa juc shongula cawacunapaj (leiriy Juan 17:11, 15). Y chaynomi caycan Jehovaga yanapaycämanchimi. Jesús cawacushgannola cawacushun y Diosninchi alapa cuyamashganchi cajman yaracushun. Chauras mana raquicaypa aylupurano hermanunchicunawan cawacuycäshun.