1. ¿Pitaq llapallanchikpa kuyakuq taytanchik?

PIWI churin Jesuspas chaynataq mana yupay atina angelkunapas Jehova Diostam huk sunqulla yupaychanku (Col. 1:15; Sal. 103:20). Kay allpapi Jesus kachkaspanmi riqsichirqa Diosqa allin sunqu runakunapapas taytan kasqanta. Huk kutipim qatiqninkunawan rimaspan nirqa: ‘Taytay hinaspa qamkunapapas taytaykichik’, nispa (Juan 20:17). Chaymantapas, Jehova Diosta servinanchikpaq bautizakuruptinchikqa iñiqmasinchikkunam wawqi-paninchik hinaspa turi-ñañanchikkuna kanku (Mar. 10:29, 30).

2. ¿Imamantam kay yachachikuypi yachasun?

² Wakin iñiqmasinchikkunapaqqa imayna uywasqa kasqankuraykum Jehova Diosqa mana kuyakuq taytanku hinachu, wakinkupaqñataqmi sasa kanman wawqi-paninkuta hina iñiqmasinkuta kuyayqa. Chaymi kay yachachikuypi yachasun Jehova Diosman asuykunapaq Jesus imayna yanapawasqanchikmanta. Paymi yachachirqa Diosqa kuyakuq hinaspa asuykunapaq taytanchik kasqanta. Yachasuntaqmi Jehova Diosta qatipakuspa iñiqmasinchikkunata imayna kuyanamantapas.

3. ¿Ima nispa mañakunanchikpaqtaq Jesus yachachirqa? ¿Imanasqataq chayqa allinpuni?

³ Jehova Diosqa ancha kuyakuq taytanchikmi, manam imatapas ruwananchikpaq kamachiwaqllanchikchu. Chaymi Jesuspas munan ñuqanchikpaqpas imay horapas asuykuna kuyakuq taytanchik kananta. Jesusqa mañakunankupaq qatiqninkunata yachachispanpas “taytayku” nispam qallarirqa  (Mat. 6:9). Mañakunankupaq yachachispanqa Jesusqa ninmanmi karqa ‘tukuy atiyniyuq’, ‘unanchaq’ utaq ‘wiña-wiñaypaq kamachiq’ nispanpas. Chaynata ninanmantaqa “taytayku” nispa mañakunanchikpaqmi yachachirqa, chaynapi Jehova Diosman astawan asuykunanchikpaq (Gen. 49:25; Is. 40:28; 1 Tim. 1:17).

4. ¿Ima ruwananchiktam Jehova Dios munan?

⁴ Wakinninchikqa yaqapaschá warmallaraq kaspanchik sasachakuypi karqanchik, utaqchá tayta-mamanchik mana allintachu uywawarqanchik. Chayraykupaschá wakinninchikqa Jehova Diosta mana kuyakuq taytata hina qawachwan. Chaywanpas, allinta riqsiwasqanchikraykum mana piñakunchu, chayta yachaspanchikmi anchata kusikunchik. Bibliapas kaynatam niwanchik: “Diosman asuykuptikichikqa paypas asuykusunkichikmi”, nispa (Sant. 4:8). Jehova Diosqa anchatam kuyawanchik. Niwanchiktaqmi pimantapas aswan kuyakuq taytanchik kasqanta.

5. Lucas 10:22 nisqanman hinaqa, ¿imanasqam nichwan Jesusqa taytanman asuykunapaq astawan yanapawasqanchikta?

⁵ Jesuspas yanapawanchikmi Jehova Diosman astawan asuykunanchikpaq. Payqa taytanta allinta riqsisqanraykum imapipas qatipakun, chaymi nirqa: “Ñuqata rikuwaqniyqa taytaytapas rikurunñam”, nispa (Juan 14:9). Jesusqa sullkankunaman hinam yachachiwanchik taytan kuyayta, kasukuyta hinaspa kusichiyta. Kay allpa pachapi kachkaspan imayna kasqanwanmi astawanraq yachanchik taytanqa kuyakuq kasqanta (qaway Lucas 10:22).

6. ¿Imaynatam yachanchik Jehova Diosqa churin mañakuptin uyarisqanta?

⁶ Diosqa uyarinmi churinkunapa mañakusqantaqa. Jesus kay pachapi kachkaspan mañakusqantaqa uyariykurqam taytanqa, hinaspapas mañakusqanman hinam yanapaykurqa. Chaywanmi yachanchik Jehova Diosqa lliw churinkunapa mañakusqan uyarisqanta (Luc. 5:16). 12 apostolninkunata  akllananpaq Jesus mañakuptinpas yanaparqam (Luc. 6:12, 13). Chaymantapas, Jesusqa wañukunanpaq hichpallaña kachkaptinmi taytanta mañakurqa yanapaykunanpaq, hinaptinmi payqa angelninta kachamurqa kallpanchaykunanpaq (Luc. 22:41-44).

7. ¿Imaynataq qam tarikunki Jehova Dios uyarisusqaykita yachaspayki?

⁷ Kunanpas Jehova Diosqa mañakusqanchiktaqa uyarinmi, hinaspapas necesitasqanchik tiempopim yanapawanchik (Sal. 116:1, 2). India nacionniyuq huk iñiqmasinchikmi llakisqa hinaspa llumpay hukmanyasqa tarikuspan Jehova Diosta mañakurqa yanapaykunanpaq. Paymi willakun: “2019 watapi mayo killapaq lluqsimuq videopim yachachirqa llakisqa utaq llumpay hukmanyasqa mana kanapaq imakuna ruwanamanta, chaymi anchata yanapawarqa. Chaywanmi mana iskayrayarqanichu mañakusqayta Dios uyariwasqanta”, nispa.

8. ¿Imatam Jehova Dios ruwarqa churin Jesusta kuyasqanrayku?

⁸ Jehova Diosqa churinta anchata kuyasqanraykum kay allpa pachapi kachkaptin yanaparqa. Chaynam ñuqanchiktapas yanapawanchik (Juan 5:20). Arí, Diosqa Jesustaqa yanaparqam allin iñiyniyuq kananpaq chaynataq sasachakuykunawan mana hukmanyarunanpaq, hinaspapas manam usuchirqachu imamantapas. Kuyasqanraykutaqmi nimurqa: “Paymi churiy, paytam kuyani hinaspapas chaskinim”, nispa (Mat. 3:16, 17). Jesusqa manam haykapipas iskayrayarqachu taytan paywan kuska kasqanmantaqa (Juan 8:16).

9. ¿Imaynatam yachanchik Jehova Dios kuyawasqanchikta?

⁹ Jehova Diosqa Jesusta hina anchata kuyawasqanchikraykum tukuy imapi yanapawanchik. Pay pusamuwaptinchikmi kuyakuq iñiqmasinchikkunapas ayllunchik hina kanku. Paykunam yanapawanchik kusisqa hinaspa huk sunqulla kananchikpaq (Juan 6:44). Diosqa tukuytataqmi quwanchik iñiyninchikpi allin kananchikpaqpas. Payqa manataqmi imamantapas usuchiwanchikchu (Mat. 6:31, 32). Dios kuyawasqanchikpi yuyaymanaspanchikmi astawan ñuqanchikpas payta kuyanchik.

10. ¿Imaynatam Jehova Diosta qatipakuchwan?

¹⁰ Jehova Diosqa anchatam kuyan iñiqmasinchikkunataqa. Chaywanpas, wakiqninchikpaqqa yaqapaschá sasa kanman iñiqmasinchikkunawan kuyakuq kayqa. Manam llapallanchikchu chay llaqtayuqlla kanchik utaq chaynalla uywasqa kanchik. Llapallanchiktaqmi imapas pantasqanchikwan hukkunata llakirachichwan utaq piñarachichwan. Chayna kaptinpas, llapallanchikmi kallpanchakuchwan Jehova Dios hina iñiqmasinchikkunata sunqumanta kuyanapaq (Efes. 5:1, 2; 1 Juan 4:19). Diosta imayna qatipakunamantayá yachaykusun.

11. ¿Imaynatam Jesusqa Jehova Diospa llakipayakuq hinaspa kuyakuq kasqanta qatipakurqa?

¹¹ Jehova Diosqa llakipayakuq hinaspa kuyapayakuq Diosmi (Luc. 1:78). Llakipayakuq runaqa hukkuna ñakarisqanta utaq llakisqa kasqanta qawaspanmi imaynatapas yanapaykuyta munan. Jesuspas taytanta qatipakuspanmi llakipayakuq karqa (Juan 5:19). Bibliapas ninmi: “Runakunata qawaykuspanmi llakipayarikurqa wischusqa hinaspa mana michiqniyuq chiqisqa ovejakuna hina kasqankumanta”, nispa (Mat. 9:36). Jesusqa llakipayakuq kasqanraykutaqmi unquqkunata sanoyaykachirqa. Hukmanyasqakunata hinaspa  llasaq qipiyuqkuna hina tarikuqkunatapas yanapaykurqam (Mat. 11:28-30; 14:14).

12. ¿Imaynatam hukkunata yanapachwan llakipayakuq kaspaqa?

¹² Llakipayakuq kaspaqa iñiqmasinchikkunata imayna yanapanapim yuyaymanananchik. Ichapas mayqan iñiqmasinchikpas unquchkan, yaqapaschá chayrayku mana atinchu ayllunta imapipas yanapayta. ¿Manachu anchata agradecekunman yanukuypi, wasi pichaypi utaq imapipas yanapaykuptinchikqa? Utaqchá mayqin iñiqmasinchikpas mana llamkayniyuq kachkan, ¿yaqachu llamkayta tarinankama yanapachwan qullqichawanpas utaq imawanpas?

13, 14. ¿Imapiraqtaq Jehova Diosta qatipakuchwan?

¹³ Jehova Diosqa qukuykuqllañam (Mat. 5:45). Chaymi payqa mana mañakuchkaptillanchik llapallanchikpaq intita qispichimun chaynataq parachimun. Tukuy chaykuna quwasqanchikwanmi yachanchik Jehova Diosqa anchata kuyawasqanchikta. Ñuqanchikpas llakipayakuq kaspaqa manam iñiqmasinchikkuna imapipas yanapananchikpaq niwananchiktaraqchu suyananchik, Jehova Diosta qatipakuspam kikinchikmanta yanapachwan.

¹⁴ Achka iñiqmasinchikkunam Diosta qatipakuspanku sasachakuypi tarikuq iñiqmasinchikkunapaq imatapas ruwanku. 2013 watapim Filipinas nacionta llumpa-llumpay wayrantin para chayarurqa, hinaptinmi achka iñiqmasinchikkuna mana wasiyuq hinaspa mana imayuq qiparurqaku. Ichaqa enteron allpa pachapi iñiqmasinchikkunam kikinkupas utaq imankuwanpas chaylla yanaparqaku. Chaynapim yaqa watallapi 750 wasikunata allicharurqaku. Coronavirus unquy qallaykuptinpas llapallanchikmi yanapanakurqanchik. Iñiqmasinchikkunata anchata kuyasqanchikraykum ima sasachakuypiña tarikuptinkupas chaylla yanapanchik.

15, 16. Lucas 6:36 nisqanman hinaqa, ¿imatam ruwananchik Jehova Diosta qatipakuspaqa?

¹⁵ Jehova Diosqa llakipayakuq kaspanmi huchanchiktapas pampachawanchik (qaway Lucas 6:36). Arí, sapa punchaw  pantasqanchiktapas payqa pampachawanchikmi (Sal. 103:10-14). Chaynam Jesuspas qatiqninkuna pantaptinkupas llakipayaspan pampachaykurqa. Huchanchikmanta pampachasqa kananchikpaqtaqmi Jesusqa wañukurqa. Jehova Diosmanwan Jesusmanqa astawan asuykunchik llakipayakuq hinaspa pampachakuq kasqankuta yachaspanchikmi (1 Juan 2:1, 2).

¹⁶ Pampachakuq kaspanchikqa iñiqmasinchikkunawanmi astawanraq huk sunqulla kasun (Efes. 4:32). Wakinpi sasa kaptinpas pampachakuykuq kanapaqmi kallpanchakunanchik. Huk iñiqmasinchiktam Llaqta Cuidaq qillqapi “Pampachanakuqyá kasun” niq yachachikuy anchata yanaparqa. * Paymi nin: “Pitapas pampachayqa manam mana allin ruwasqanta allinpaq hapiychu, aswanqa chay mana allin ruwasqanwan mana piñakuruq utaq hawkalla kaymi”, nispa. Iñiqmasinchikkunata kuyaspaqa hinaspa Jehova Diosta qatipakuspaqa pampachakuykuqmi kasun.

17. Mateo 5:16 nisqanman hinaqa, ¿imatam ruwananchik runakuna Diosmanta yachanankupaq?

¹⁷ Enteron pachapi iñiqmasinchikkunawanmi wawqi-panintin hinaspa turi-ñañantin hina anchata kuyanakunchik. Chaymi munanchik hukkunapas taytanchik Jehova Diosta riqsispanku servinankuta. Chayraykutaqmi sapa punchaw kallpanchakunchik ruwasqanchikwan hinaspa rimasqanchikwan runamasinchikkuna Diosmanta yachay munaq kanankupaq (qaway Mateo 5:16). Manamá munanchikchu Diostawan iñiqmasinchikkunata pinqayman churaytaqa.

18. ¿Imatam yuyarinanchik Diosmanta mana manchakuspa willakunapaq?

¹⁸ Jehova Diosta kasukusqanchikraykum wakin runakunaqa chiqniwasun utaq ñakarichiwasun. Chaymi wakinpiqa manchakuchwan Diosmanta willakuyta. Chayna kaptinqa yuyarinanchikmi taytanchik Jehova Dioswan churin yanapaykuwananchikta. Jesusmi  qatiqninkunata nirqa: “Amayá llakikuychikchu imaynata utaq imamanta rimanaykichikmantapas, chaypunillam yachachisqa kankichik imam rimanaykichikpaqqa. Manam kikillaykichikmantachu rimankichikqa, aswanqa hanaq pacha taytaykichikpa atiyninwanmi”, nispa (Mat. 10:19, 20).

19. ¿Imaynatam mana manchakuspan rimarirqa chayllaraq bibliamanta yachaq?

¹⁹ Sudafrica lawmanta Robert sutiyuq iñiqmasinchiktam bibliamanta chayllaraq yachayta qallaykuptin autoridadkuna nirqaku militar kananpaq. Paymi ichaqa mana manchakuspan nirqa wawqi-paninkunata kuyasqanrayku militar kay mana munasqanta. Qunqaymantam juez tapuykurqa: “¿Pikunataq wawqi-panikikunaqa?”, nispa. Hinaptinmi Robertqa yuyarirurqa chay punchawpaq bibliapa nisqanta, chay punchawpim ñawincharqa Mateo 12:50 nisqanta. Chaypim nin: “Pipas hanaq pachapi taytaypa munasqanta ruwaqmi wawqiyqa, paniyqa hinaspa mamayqa”, nispa. Chayllaraq bibliamanta yachaptinpas iñiqmasinchik Roberttaqa Jehova Diosmi atiyninwan yanaparqa qunqaymanta tapuptinkupas rimarinanpaq. ¡Maynatachá Jehova Diosqa kusikurqa chay ruwasqanmantaqa! Ñuqanchikmantapas anchatam kusikunqa ima sasachakuyña kaptinpas mana manchakuspa willakunapaq paypi hapipakuptinchikqa.

20. ¿Imatam hinalla ruwananchik? (Rimarimuytaq Juan 17:11, 15 nisqanmantapas).

²⁰ Iñiqmasinchikkunawan huk sunqulla Diosta yupaychasqanchikmantayá hinalla agradecekusun. Taytanchik Jehova Dioswan llapallan iñiqmasinchikkunam anchata kuyawanchik. Manamá chaytaqa haykapipas qunqananchikchu. Satanasqa munan Dios kuyawasqanchikmanta iskayrayananchiktam. Tukuytataqmi ruwan iñiqmasinchikkunawan mana huk sunqulla kananchikpaqpas. Jesusmi ichaqa llapallanchik huk sunqulla kananchikpaq taytanta mañakurqa (qaway Juan 17:11, 15). Jesuspa mañakusqanman hinam Diosqa yanapawachkanchik. Chaynaqa, Jesusta qatipakuspayá iñiqmasinchikkunawan huk sunqulla kasun, hinaspapas amayá iskayrayasunchu taytanchik Jehova Dios kuyawasqanchikmantawan yanapawasqanchikmantaqa.