1. Jehová Diostaca ñucanchicunaca ¿imashinata ricuna capanchi?

JEHOVÁ DIOSCA paita tucui shunguhuan sirvij shuj familiatami charin. Paicunaca Jesús y huaranga huaranga angelcunami can. Jesustami Jehová Diosca ‘tucui imatapash nara rurashpallata’ primero rurarca (Col. 1:15; Sal. 103:20). Jesús cai alpapi cashpaca Jehovata ali sirvijcunaca, Jehová Diostaca paicunapa Taitatashna ricuita ushashcatami yachachirca. Shuj viajecarin Jesusca paipa discipulocunataca, Jehovamanda parlashpaca: ‘Ñuca Taitaca, cangunapajpash Taitami’ can nircami (Juan 20:17). Shinallata ñucanchica Jehová Diostaca candallami sirvisha nishpa bautizarishpaca, Jehovata sirvij shuj jatun familiamanmi pertinici callaripanchi (Mar. 10:29, 30).

2. Caipica ¿imatata yachajupashun?

² Huaquin huauquipanicunapaca Jehová Diosta shuj juyaj Taitatashna ricunaca na facilchu can. Cutin shuj huauquipanicunaca congregacionbi huauquipanicunata juyashcata imashina ricuchinataca talvez na atinanllu. Cunanga Jehová Diosta shuj juyaj Taitatashna ricuchun Jesús imata yachachishcatami yachajupashun. Shinallata ñucanchi huauquipanicunata Jehová Dios tratanshnallata tratangapaj imata rurana cashcatapashmi yachajupashun.

3. ¿Imamandata padrenuestro oracionga Taita Diospaman ashtahuan quimirichun ayudan?

³ Jehová Diosca shuj juyaj Taitami can. Y Jesusca Jehová Diostaca na ñucanchita mandangapalla cashcata, paihuanga imahorapash parlai ushanalla cashcata ricuchunmi munan. Jesusca paipa discipulocunataca padrenuestro oracionda yachachijushpami cai yuyaimandaca ashtahuan intindichirca. Paica: “Ñucanchi Taitalla” nishpami mañana canguichi nircami (Mat. 6:9). Bibliapica Jehová Diosmanda parlashpaca, ‘Tucuita Rurai Ushaj  Taita Dios’, Tucui Ushaita Charij, shinallata ‘causaita causaicaman Jatun Mandaj Dios’ nishpami parlan. Shinapash Jesusca chaicunata nijunapa randica, Jehová Diostaca “ñucanchi Taitalla” nishpami mañana canguichi nircami (Gén. 49:25; Is. 40:28; 1 Tim. 1:17).

4. ¿Imamandata Jehová Dios ñucanchicuna paipaman quimirichun munashcataca yachapanchi?

⁴ Huaquingunapaca, Jehovata shuj juyaj Taitatashna ricunaca shinllimi can. Talvez huahuacuna cashpa shuj llaquilla causaita charishcamandami shina sintirita ushapanchi. Shinapash Jehová Diosca ñucanchicuna imashina sintirijushcata intindishpami, ñucanchiman ashtahuan quimiringapaj munan. Bibliapica, “Taita Diospajman quimirichi. Shina quimirijpica, paipash cangunapajman quimiringami” ninmi (Sant. 4:8). Jehová Diosca ñucanchitaca ninandami juyan. Paishna juyaj Taitataca nimaipi na tarita ushapanchichu.

5. Lucas 10:22​pi ricuchishcashnaca Jesusca ¿imapata ñucanchitaca ayudaita ushan?

⁵ Jehová Diosman ashtahuan quimirichunga Jesusmi ayudaita ushan. Jesusca, Jehová Diostaca alipachami rijsin. Chaimandami Jehová Dios imashina cashcataca Jesusca alipacha ricuchirca. Chaimandami Jesusca, ‘maijanbash ñucata ricushpaca, ñuca Taitatami ricujun’ nirca (Juan 14:9). Jesusca rucu huauquishna caimandami ñucanchicunataca Jehová Diosta respetachun, paita cazuchunbash yachachin. Shinallata Jehovapa ñaupapi ali ricuringapaj imata rurana cashcatapashmi yachachin. Más que todo, Jesús cai alpapi cashpami Jehová Dios ñucanchita ninandapacha juyashcataca ricuchirca (Lucas 10:22​ta liipangui). Jehová Dios ñucanchita juyashcata huaquin ejemplocunapi ricupashunchi.

6. Jehová Diosca Jesuspa mañaicunata uyashcataca ¿imashinata ricuchirca?

⁶ Jehová Diosca paipa sirvijcunapa oraciongunataca siempremi ali ali uyan. Jesús cai alpapi cashpaca Jehová Diostaca tauca viajecunatami mañarca. Y Jehová Diosca siempremi Jesustaca uyarca (Luc. 5:16). Por ejemplo, Jesusca paipa 12 apostolcunata nara agllashpallatami Jehová Diostaca ayudahuai nishpa mañarca (Luc. 6:12, 13). Shinallata Jesusca, Judas paita nara traicionajpillatami Jehová Diostaca, cai llaquicunata aguantangapaj ayudahuangui nishpa ninanda mañarca. Jehová Diosca Jesusta  uyashcataca shuj angelta cachashpami ricuchirca (Luc. 22:41-44).

7. Quiquinba mañaicunata Jehová Dios uyajta yachashpaca ¿imashata sintiripangui?

⁷ Cunan punllacunapipashmi Jehová Diosca ñucanchi mañaicunataca uyan. Ñucanchi minishtijuj horaspipachami ñucanchi mañaicunata uyashcatapash ricuchin (Sal. 116:1, 2). India llactamanda shuj paniguca paipa causaipipachami chaitaca ricurca. Paica ansiedad unguihuanmi luchajurca. Chaimi Jehová Diostaca ayudahuai nishpa mañarca. Paniguca ninmi: “Mayo de 2019 huatapi JW Broadcastingbi^® llujshishca programami ñucataca ama yapata preocuparijuchun, ansiedad unguihuan cajpipash imata ruranata yachachun ayudahuarca. Ñuca minishtijuj horaspipachami cai programaca llujshirca. Chaimi Jehová Dios ñuca mañaita uyashcataca cuenta japiparcani” nin.

8. Jehová Dios Jesusta juyashcataca ¿imacunapillata ricuchirca?

⁸ Jehová Diosca Jesús cai alpapi cajpi, paita juyashcashnallatami ñucanchitapash juyan (Juan 5:20). Jehová Diosca Jesustaca tucuipimi ayudarca. Shinallata Jesusta juyashcata, paimanda orgulloso cashcatapash siempremi ricuchirca (Mat. 3:16, 17). Jesusca Jehová Dios paita siempre ayudajushcata seguro caimandami nunca na sololla sintirirca (Juan 8:16).

9. Jehová Dios ñucanchita juyashcataca ¿imashata yachapanchi?

⁹ Jesushnallatami ñucanchicunapash Jehová Dios ñucanchita juyashcataca tauca viajecunata ricupashcanchi. Por ejemplo, Jehová Diosca ñucanchitaca paipa organizacionmanmi apamushca. Caipica ñucanchita shuj juyaj familiatami charipanchi. Paicunaca ñucanchicuna llaquilla cajpi cushichishpa, animashpami ayudan (Juan 6:44). Jehová Diosca ñucanchicuna paipi tucui shunguhuan crishpa catichunbashmi ashtaca ayudacunata cushca. Shinallata cada punllapa lo necesarioguta cushpapashmi Jehová Diosca ayudajushca (Mat. 6:31, 32). Jehová Dios ñucanchita ninanda juyashcata yachashpaca, ñucanchicunapashmi paitaca ashtahuan juyapanchi.

10. Jehová Diosca ñucanchi huauquipanicunataca ¿imashinata tratan? Chaimandaca ¿imatata yachajupanchi?

¹⁰ Jehová Diosca ñucanchi huauquipanicunataca ninandami juyan. Shinapash huaquinbica ñucanchipaca huauquipanicunata juyanaca shinllimi caita ushan. Tucuicunallata shuj shuj costumbrecunata, diferente causaitapash charishcamandami shina pasan. Chaimi tucuicunallata imapipash pandarishpa shujcunataca nali sintichi ushapanchi. Shina cashpapash tucuicunallatami Jehová Dios imashina ñucanchi huauquipanicunata juyanshnallata juyangapaj esforzarina capanchi. Shinami Jehovapa organizacionbica shuj familiashna tucuicunallata juyarishpa causaita ushashun (Efes. 5:1, 2; 1 Juan 4:19). Jehová Diosmanda imata yachajui ushashcata ricupashunchi.

11. Jesusca ¿imashinata Jehová Dioshnallata llaquij, juyaj cashcataca ricuchirca?

¹¹ Jehová Diosca ‘ninanda llaquij’ juyaj Diosmi can (Luc. 1:78). Ali shunguta charij o llaquij gentecunaca shujcuna sufrinajujta ricushpaca, uchallami imashinapash ayudanata, cushichinata mascan. Jesusca, Jehová Dios tratanshnallatami shuj gentecunatapash tratan carca (Juan 5:19). Bibliapica, “gentecunataca, michij illaj, jichushca llamacunashna causanajujta ricushpami Jesusca, paicunata ninanda llaquirca” ninmi (Mat. 9:36). Jesusca gentecuna sufrinajujta ricushpaca, na llaquirishpalla quidarcachu. Ashtahuangarin huañujujcunata jambishpa, imatapash rurashpa shaijushcashna, aparishcashna causajcunatapashmi ayudarca (Mat. 11:28-30; 14:14).

12. Ñucanchi huauquipanicunata juyashcata, llaquishcataca ¿imashinata ricuchita ushapanchi?

¹² Ñucanchi huauquipanicunata juyashcata,  llaquishcataca ¿imashinata ricuchita ushapanchi? Chaipaca paicuna ima problemacunata, llaquicunata charishcapimi pensarina capanchi. Por ejemplo, shuj paniguca talvez paipa saludhuanmi nali canga. Nunca na quejarishpapash, ¿paipa familiata cuidanahuan, huasipi ruraicunahuanbash pactajunllu? Chai paniguta paipa huasiman rishpa huasiguta limpiashpa o micunaguta yanushpa ayudajpica ¿imashinashi sintirinman? O shuj huauquigu trabajo illaj quidashcanman. Chaipica ñucanchicunaca paita ciertopacha ayudangapaj munashpaca, trabajoguta taringacamanga asha culquigu cushpapashmi ayudaita ushapanchi.

13, 14. ¿Imata rurashpata Jehová Dioshna na mitsa cashcataca ricuchi ushapanchi?

¹³ Jehová Diosca imatapash na mitsashpa caraj Diosmi can (Mat. 5:45). Ñucanchicunaca huauquipanicunata juyashcata, llaquishcata ricuchingapaca paicunara ñucanchipa ayudata mañachunga na shuyanachu capanchi. Chaipa randica ñucanchirami imagupi ayudanataca ricuna capanchi. Jehová Diosca ñucanchicuna na mañajpillatami indigutaca cada punlla caramun. Paica agradicijpi o na agradicijpipashmi inditaca tucuicunaman caramujun. Jehová Diosca ñucanchicuna ima minishtishcaguta cushpami ñucanchita juyashcataca ricuchishca. Jehová Dios shina cashcamandami ñucanchipash paitaca ninanda juyapanchi.

¹⁴ Ashtaca huauquipanicunami Jehovapa ejemplota catishpa, shujcunamanga imagutapash carashpa ayudanajushca. Por ejemplo, 2013​pi Filipinas llactapi ima pasashcata ricupashunchi. Chaipica marpi manllanaita acapana jatarishpa tamiashpami llacta enterota ninanda llaquichirca. Chaimi huauquipanigucunapash huasi illaj quidashpa, tucuita perdirca. Shinapash mundo enteromanda huauquipanicunami, chai llactamanda huauquipanigucunataca ayudarca. Ashtaca huauquipanicuna contribución culquiguhuan, trabajohuanbash ayudashcamandami casi shuj huatapilla casi 750 huauquipanicunapa huasicunata cutin shayachi usharca. Shinallata COVID-19 corona ungui tiashca horasmandami huauquipanicunaca shuj huauquipanigucunata ayudangapaca ninanda esforzarinajushca. Shina llaquij tiempocunapi ñucanchi huauquipanicunata ayudashpami, paicunata ninanda juyashcata ricuchipanchi.

15, 16. Lucas 6:36​pi ricushcashnaca, Jehová Diospa ejemplota catingapaca ¿imatata rurana capanchi?

 ¹⁵ Jehová Diosca ninanda llaquishpa juyaj, perdonaj Diosmi can (Lucas 6:36​ta liipangui). Jehová Diosca cada punllami ñucanchita llaquishpa juyaj cashcata ricuchin (Sal. 103:10-14). Jesuspashmi llaquij cashcataca ricuchirca. Por ejemplo, paipa discipulocunaca juchayucuna caimanda cutin cutin pandarijpipash, Jesusca paicunataca perdonarcallami. Ashtahuangarin, ñucanchi perdonai tucuchunmi Jesusca ñucanchimanda huañurca (1 Juan 2:1, 2). Jehová Diospash, Jesuspash llaquij, perdonajcuna cashcamandami ñucanchicunaca paicunapaman ashtahuan quimirita ushapanchi.

¹⁶ Juyaimanda perdonarishpaca congregación ucupica gulpicunami ali caita ushapashun (Efes. 4:32). Ciertomi huaquinbica perdonanaca ashata shinlli ricurin. Pero perdonangapami esforzarina capanchi. Shuj paniguca La Atalaya revistapi, “Perdónense liberalmente unos a otros”  * nishcata yachajunami, “ñucataca ninanda ayudahuarca” ninmi. Paica, “shujcunata perdonanaca paicuna nalita shinashcata alitashna ricunaca na canllu. Ashtahuangarin perdonanaca ñucanchillata ama risintirishpa quidangapaj, ñucanchillata ali sintiringapami ninanda ayudan” ninmi. Shinaca ñucanchicuna ñucanchi huauquipanicunata juyaimanda perdonashpaca, ñucanchi Taita Jehová Diospa ejemplotami catinajupashun.

17. Mateo 5:16​pi nishcashnaca ñucanchicuna ali portarijpica ¿imata pasanga?

¹⁷ Mundo enteropi ninanda juyarij familiapi cashcamandaca ninandami cushijupanchi. Chaimandami ashtaca gentecunapash Jehová Diosta ñucanchihuan adorachun munapanchi. Chaimi Jehovapa shutita, Jehovapa organizaciondapash nalipi ama quidachingapaj siempre esforzaripanchi. Shinallata Taita Diospa ali villaigucunata gentecuna uyashpa, Jehovamanda yachajuna munaita charichunmi siempre ali portaringapaj esforzaripanchi (Mateo 5:16​ta liipangui).

18. Na manllashpa ñucanchi crishcacunamanda parlachunga ¿imata ayudanga?

¹⁸ Ñucanchicuna Jehová Diosta cazunajushcamandaca, huaquingunaca ñucanchitaca nalicachishpami  ricunga o catiriashpa llaquichitapashmi llaquichinga. Shinapash ñucanchi crishcacunata shujcunaman na manllashpa villachichunga ¿imata ayudanga? Jehová Diospash, Jesuspash ñucanchita ayudanata yarinami ñucanchitaca ayudanga. Jesusca imata ninata na atinajushpaca: “Canguna rimajui horaspica, imata rimachumbash Dios cujpimi rimanguichi. Chaipica, na cangunapaj munai rimanguichichu. Ashtahuangarin, cangunapaj Taitapaj espíritu cangunapaj shungupi yarichijpimi rimanguichi” nircami (Mat. 10:19, 20).

19. Huauqui Robert Bibliamanda chairalla yachajujujpica paitaca ¿imata pasarca?

¹⁹ Cunanga Robert shuti huauquipa causaimanda ricupashunchi. Cai huauquigu Bibliamanda yachajui callarijpica, paitaca Sudáfrica llactapi shuj tribunal militarman presentarichunmi cayarca. Chaimi paica huauquipanicunata juyaimanda, “ñucaca cuartelmanga na rishachu” nirca. Paica Jehová Diospa organizacionbi canata ninanda valoraimandami, “ñucaca cuartelmanga na rishachu” nishca carca. Shinapimi shuj juezca: “¿Pita canba huauquicunayari?” nishpa huauqui Roberttaca tapurca. Shina tapujpimi huauquiguca chai punllapa textota yuyarirca. Chai textoca Mateo 12:50​mi carca. Chaipica: ‘Jahua pachapi tiajuj ñuca Taita munashcata tucuilla rurajcunallami, ñuca huauqui, ñuca pani, ñuca mama can’ nijurcami. Huauquigu Bibliamanda ashatalla yachajushca cajpipash, Jehová Diospa espíritu santomi juezpa tapuita y shuj tapuicunatapash ali contestachun ayudarca. Jehová Diosca chai huauquigu na manllashpa, ali contestajta ricushpaca ninandami cushijushcanga. Ñucanchicuna llaquicunata charishpapash na manllashpa predicajpica, ñucanchicunamandapashmi Jehová Diosca ninanda cushijunga.

20. ¿Imatata rurashpa catina capanchi? (Juan 17:11, 15).

²⁰ Ñucanchica ñucanchita ninandapacha juyaj Taitata, shinallata ñucanchita ninanda juyaj huauquipanicunatami charipanchi. Chaimandami Jehovapa organizacionbi cashcamanda ninanda agradicishpa, alita rurashpa catina capanchi. Diablopash, cai mundopi gentecunapash Jehová Dios na juyaj Dios cashcata pensachun, shinallata ñucanchi huauquipanicunamanda separarichunmi imacunatapash ruranajun. Chaimandami ñucanchicunaca ninanda cuidarina capanchi. Jesusca Jehová Diostaca canda sirvijcuna shujllashna candalla sirvichun cuidapangui, ricuriapangui nishpami mañarca (Juan 17:11, 15​ta liipangui). Jehová Diosca, Jesuspa oracionda uyashcamandami ñucanchitaca ninanda cuidajun. Shinaca Jesuspa ejemplota catipashunchi. Shinallata Jehová Dios ñucanchita ninanda juyajta, ayudajujtaca seguromi cana capanchi. Ñucanchi huauquipanicunahuanbash ali llevaringapaj esforzaripashunchi.