1. Сар шај о верна мануша те дикхен ко Јехова?

КИ Е Јеховаскири фамилија тане вклучиме о Исус, ов тано „о прво бијамо таро са сој кердо“, хем о бут ангелија (Кол. 1:15; Пс. 103:20). Кеда сине ки Пхув, о Исус сикавѓа е верна манушен кај шај те дикхен ко Јехова сар пумаро Дад. Кеда керела сине пле учениконцар лафи ов башо Јехова вакерѓа: „Мо Дад хем тумаро Дад“ (Јован 20:17). Исто аѓаар, кеда даја лафи е Јеховаске кај ка служина леске хем крстинаја амен, оваја дело тари јекх фамилија коте со иси пхраља хем пхења кола со бут мангена пе (Мар. 10:29, 30).

2. Со ка дикха ки акаја статија?

² Несавенге тано пхаро те дикхен е Јехова сар Дад кова со мангела лен. А јавера шај на џанена сар те сикавен мангипе пумаре пхраленге хем пхењенге. Ки акаја статија ка дикха сар о Исус поможинела аменге те дикха ко Јехова сар Дад со мангела амен хем сар шај те ова леа паше. Исто аѓаар, ка дикха сар шај сар о Јехова те постапина амаре пхраленцар хем пхењенцар.

3. Сар е Исусескири најпенџарди молитва поможинела аменге те ова паше е Јеховаја?

³ О Јехова тано Дад пхердо мангипаја. О Исус мангела те дикха ко Јехова сар ов со дикхела — сар јекх љубезно родители пхердо мангипаја касаја со локхе шај те керел пе лафи, а на сар некој со нане љубезно хем само заповединела. Амен џанаја акава таро лафија е Исусескере кеда сикавѓа пле ученикон башо со те молинен пе. Пли најпенџарди молитва о Исус почминѓа ла е лафенцар: „Амаро Дад“ (Мат. 6:9). Ов шај сине те вакерел аменге те викина е Јехова „Семоќно“, „Створители“, или „Цари тари вечност“ хем акава нане те овел сине погрешно соске и Библија користинела акала титуле башо Јехова (1. Мој. 49:25; Иса. 40:28;  1. Тим. 1:17). Наместо адава, о Исус вакерѓа аменге те викина ле „мо Дад“.

4. Котар џанаја кај о Јехова мангела те ова леа паше?

⁴ Дали туке пхаро те дикхе е Јехова сар Дад кова со мангела тут? Несавенге амендар тано пхаро. Соске амаро Дад шај на сине аменцар љубезно. Ама кобор тано утешно адава со џанаја кај о Јехова бут шукар хаљовела соске осетинаја амен аѓаар! Ов мангела те овел аменцар паше, адалеске лескоро Лафи поттикнинела амен: „Овен паше е Девлеа хем ов ка овел паше туменцар“ (Јак. 4:8). О Јехова мангела амен хем вакерела кај ка овел аменге о најшукар Дад со шај те овел амен.

5. Спрема Лука 10:22, сар шај о Исус те поможинел аменге те ова попаше е Јеховаја?

⁵ О Исус шај те поможинел аменге те ова попаше е Јеховаја. Ов џанела е Јехова добором шукар хем сикавела лескере особине добором совршено, со вакерѓа: „Кој дикхља ма ман дикхља ме Даде да“ (Јован 14:9). Сар попхуро пхрал, о Исус сикавела амен сар те поштујна хем те шуна амаре Даде, сар те на разочарина ле хем сар те постапина те шај те дикхел шукар ки аменде. Ама џикоте сине ки Пхув, пле животоја о Исус посебно поможинѓа аменге те хаљова кај о Јехова тано бут љубезно хем пхердо мангипаја. (Читин Лука 10:22.) Те дикха несаве примерија.

6. Вакер примерија башо адава сар о Јехова шунѓа е Исусе.

⁶ О Јехова шунела пле чхавен. Те дикха сар о Јехова шунела сине пле прво бијаме Чхаве џикоте ов сине ки Пхув (Лука 5:16). Ов шунѓа е Исусе џикоте молинела пе сине башо важна одлуке, сар на пример кеда биринѓа е 12 апостолен (Лука 6:12, 13). О Јехова исто аѓаар шунѓа лескере молитве кеда сине бут секиримо. Кратко англедер те овел издајмо, о Исус молинѓа пе пле Дадеске башо буќа кола со ваљани сине те доживинел лен. О Јехова на само со шунѓа е Исусескере молитве, него исто аѓаар бичхалѓа јекхе ангеле те охрабринел ле (Лука 22:41-44).

7. Сар осетинеа тут адалеске со џанеа кај о Јехова шунела пле слугенгере молитве?

 ⁷ Авдиве да о Јехова шунела пле слугенгере молитве, хем ов одговоринела ки ленде ко право време хем ко најшукар начин со шај (Пс. 116:1, 2). Јекх пхен тари Индија лично дикхља сар о Јехова одговоринела ко лакере молитве. Ој боринела пе сине пхаре емоционална проблеменцар хем бут молинела пе сине баши адаја бути. Ој вакерела: „Е масекоскири емисија таро Мај 2019 берш ко JW Broadcasting® керела сине лафи башо адава, со шај те кера кеда сием бут секириме. Баш адава ваљани сине манге. Аѓаар о Јехова одговоринѓа ко мле молитве“.

8. Ко саве начинија о Јехова сикавѓа мангипе е Исусеске?

⁸ О Јехова мангела амен хем грижинела пе аменге, исто сар со мангља хем грижинѓа пе пле Чхавеске џикоте сине акате теле ки Пхув (Јован 5:20). Ов грижинѓа пе леске ко духовно, емоционално хем физичко поглед. Хем о Јехова англо јавера јасно сикавѓа кај мангела пле Чхаве хем кај тано лестар задоволно (Мат. 3:16, 17). О Исус џанља кај лескоро мангло небесно Дад секогаш ка поддржинел ле хем адалеске никогаш на осетинѓа пе коркори (Јован 8:16).

9. Котар џанаја кај о Јехова мангеа амен?

⁹ Слично сар о Исус, сарине амен осетинѓем е Јеховаскоро мангипе ко бут начинија. Размислин само: О Јехова привлечинѓа амен ки песте хем денѓа амен духовно фамилија која со керела амен бахтале хем охрабринела амен кеда сием секириме (Јован 6:44). Ов исто аѓаар секогаш дела амен духовно храна која со керела амен зорале. Чак поможинела аменге те грижина амен башо амаре материјална потребе (Мат. 6:31, 32). Кеда размислинаја кобор о Јехова мангела амен, амаро мангипе спрема лесте бајрола.

10. Исто сар о Јехова, сар ваљани амен да те постапина амаре духовно фамилијаја?

¹⁰ О Јехова мангела амаре пхрален хем пхењен. Ама аменге шај нане секогаш локхо те манга лен хем те сикава ленге адава. Акава шај те овел пхаро соске аваја таро различна културе хем барилем ко различна околностија. Освен адава, сарине амен кераја грешке коленцар со шај те нервирина е јаверен хем те разочарина лен. Сепак, сарине шај те трудина амен те бајрара о мангипе ки амари духовно фамилија. Сар? Аѓаар со ка сикава мангипе амаре пхраленге хем пхењенге исто сар амаро Дад (Еф. 5:1, 2; 1. Јов. 4:19). Те дикха со шај те сикљова таро лескоро пример.

11. Сар о Исус сикавѓа е Јеховаскоро сочувство?

¹¹ О Јехова сикавела сочувство (Лука 1:78). Е сочувствително манушеске нане са јекх кеда дикхела кај о јавера цидена муке. Ов дикхела сар те поможинел ленге хем те утешинел лен. О начин сар о Исус постапинела сине е манушенцар, сикавѓа е Јеховаскоро сочувство спрема ленде (Јован 5:19). Кеда ки јекх прилика дикхља баро мноштво, „е Исусеске пело жал баши ленде, соске сине мучиме хем отфрлиме сар бакхре бизо пастири“ (Мат. 9:36). На само со е Исусе сине ле сочувство спрема ленде, него ов керѓа да нешто те шај те поможинел ленге. Ов сасљарѓа е насвален хем поможинѓа околенге со сине „уморна хем со сине лен пхарипе“ (Мат. 11:28-30; 14:14).

12. вакер пример сар шај те сикава сочувство амаре пхраленге хем пхењенге?

¹² Те шај те сикава сочувство амаре пхраленге хем пхењенге, прво мора те размислина таро со накхена. На пример, јекх пхен шај тани сериозно насвали. Ој шај никогаш  на жалинела пе башо адава, ама ка овел лаке бут мило ако некој поможинела лаке. Шај те пуча амен: Дали шај те грижинел пе пле фамилијаке? Шај ли те поможина лаке аѓаар со ка кера лаке хајбаске, или ка чистина лаке околу о кхер? Или, шај несаво пхрал ачхило бизи бути. Шај ли те поможина леске, аѓаар со ка да ле хари паре џикоте аракхела јавер бут, бизо те вакера леске кај тане амендар?

13-14. Сар шај те ова дарежлива сар о Јехова?

¹³ О Јехова тано дарежливо (Мат. 5:45). Амен ваљани те сикава сочувство амаре пхраленге хем пхењенге англедер те роден амендар помош. Исто сар о Јехова, амен да шај те кера о прво чекори. Ов мукхела те икљол о кхам секова диве бизо те рода лестар адава хем секас иси корист таро кхам, а на само окола сој благодарна. Адалеа со дела амен о буќа со ваљанена аменге, о Јехова сикавела кај мангела амен. Амен бут мангаја е Јехова соске тано љубезно хем дарежливо.

¹⁴ Амаре пхраља хем пхења џана пало е Јеховаскоро пример аѓаар со керена о прво чекори хем дарежлива тане е јаверенцар. На пример, ко 2013 берш, о баро тајфуни Хајан, керѓа бари штета ко Филипини. Бут пхраља хем пхења нашавѓе пле кхера хем са со сине лен. Ама ленгири духовно фамилија таро цело свето, сигате поможинѓа ленге. Бут џене денѓе паре, или поможинѓе те поправинен пе или те керен пе 750 кхера хем адава само некобор масеконге. Бут сведокија поможинѓе пумаре пхраленге хем пхењенге ки пандемија КОВИД-19. Кеда сием спремна одма те поможина амаре духовно фамилијаке тегани сикаваја кај мангаја лен.

15-16. Спрема Лука 6:36, кова тано јекх важно начин сар шај те џа пало пример амаре небесно Дадескоро?

¹⁵ О Јехова тано милостиво хем простинела. (Читин Лука 6:36.) Амаро небесно Дад секова диве простинела аменге (Пс. 103:10-14). О Исус исто аѓаар сикавѓа милост хем простинѓа пле учениконге, иако сине несовршена. Чак сине спремно те дел пло живото сар жртва те шај амаре гревија те овен простиме (1. Јов. 2:1, 2). На  привлечинела тут ли ко Јехова хем ко Исус адава сој тане милостива хем простинена?

¹⁶ О мангипе со иси амен машкар аменде овела посилно кеда спремно простинаја (Еф. 4:32). Џанѓола пе кај понекогаш шај те овел аменге пхаро те простина е јаверенге, адалеске мора бут те трудина амен. И статија „Спремно простинен јекх јекхеске“, со аракхљола ки Стражарско кула, поможинѓа јекхе пхењаке те керел адава. * Ој вакерела: „Акаја статија поможинѓа манге те хаљовав сар адава со ка простинав е јаверенге ка поможинел манге. Атхе објаснинела кај адава со простинеа е јаверенге, на значинела кај прифатинеа ленгири погрешно постапка или кај на поврединѓе тут. Ама кеда простинеа ленге, ту на сиан више ленге хољамо хем иси тут андруно мир“. Кеда спремно простинаја амаре пхраленге хем пхењенге сикаваја кај мангаја лен хем кај џаја пало пример амаре Дадескоро, е Јеховаскоро.

17. Спрема Матеј 5:16, сар шај те сикава чест амаре небесно Дадеске?

¹⁷ Иси амен бари чест со шај те ова дело тари јекх фамилија сој ко цело свето, коте со сарине мангена пе. Мангаја со повише џене заедно аменцар те обожавинен амаре Девле. Адалеске, ваљани те пазина ма те кера нешто со ка чхивел е јаверен те мислинен лошно амаре Дадеске е Јеховаске, или лескере народоске. Секогаш трудинаја амен те постапина шукар, те шај о мануша те манген те служинен е Јеховаске. (Читин Матеј 5:16.)

18. Со ка поможинел аменге те проповедина бизи дар?

¹⁸ Адалеске со шунаја амаре небесно Даде, понекогаш несаве шај те критикујнен амен, или чак те прогонинен амен. Со ако дараја те кера е јаверенцар лафи башо амаро верување? Шај те ова сигурна кај о Јехова хем лескоро Чхаво ка поможинен аменге. О Исус вакерѓа пле учениконге кај на ваљани те секиринен пе башо адава сар ка керен лафи или со ка пхенен. Соске на? О Исус објаснинѓа:  „Соске ко адава моменти ка џанен со те вакерен, соске на керена коркори лафи, него о духо тумаре Дадескоро керела лафи преку туменде“ (Мат. 10:19, 20).

19. Вакер пример башо некој кова со храбро проповединѓа.

¹⁹ Размислин башо е Робертескоро пример. Англедер несаво време, само со почминѓа те проучинел и Библија хем на џанела сине бут, ваљани сине те џал ко судо ки Јужно Африка хем те објаснинел соске нане те џал ки војска. Ов храбро објаснинѓа е судијаске кај мангела те ачховел неутрално соске мангела пле пхрален. Ов ценинѓа пло тхан ки амари духовно фамилија. О судија пучља ле: „Кој тане тле пхраља“. О Роберт на очекујнѓа те пучел ле акава пучибе. Ама ов одма сетинѓа пе ко е дивескоро стихо таро Матеј 12:50: „Секој со керела и волја мле Дадескири, ов манге мло пхрал хем пхен хем дај“. Иако о Роберт само со почминѓа те проучинел и Библија, е Девлескоро духо поможинѓа леске те одговоринел ко повише пучиба со на очекујнѓа лен. Сигурно о Јехова бут дичинѓа пе леа! О Јехова дичинела пе аменцар да кеда родаја лестар помош те дел амен храброст те проповедина ко пхаре ситуацие.

20. Со ваљани те ова одлучна е кера? (Јован 17:11, 15)

²⁰ Бут сием благодарна со сием дело тари јекх асавки духовно фамилија коте со иси мангипе. Иси амен о најшукар Дад со шај те овел амен хем бут пхраља хем пхења. Секогаш ваљани те ценина акала буќа. О Сатана хем лескере следбеникија со мрзинена амен, мангена те сумнина амен ко адава дали амаро небесно Дад мангела амен хем пробинена те руминен амаро јекхипе. Ама, о Исус молинѓа амаре Даде те аракхел амен те шај амари фамилија те ачхол ко јекхипе. (Читин Јован 17:11, 15.) О Јехова одговоринела ки адаја молитва. Исто сар о Исус, никогаш ма те сумнина амен кај амаро небесно Дад мангела амен хем поддржинела амен! Адалеске, те ова одлучна понадари да те ова попаше амаре духовно фамилијаја.