1. Sar šaj o verna manuša te dikhen ko Jehova?

KI E Jehovaskiri familija tane vklučime o Isus, ov tano „o prvo bijamo taro sa soj kerdo“, hem o but angelija (Kol. 1:15; Ps. 103:20). Keda sine ki Phuv, o Isus sikavgja e verna manušen kaj šaj te dikhen ko Jehova sar pumaro Dad. Keda kerela sine ple učenikoncar lafi ov bašo Jehova vakergja: „Mo Dad hem tumaro Dad“ (Jovan 20:17). Isto agjaar, keda daja lafi e Jehovaske kaj ka služina leske hem krstinaja amen, ovaja delo tari jekh familija kote so isi phralja hem phenja kola so but mangena pe (Mar. 10:29, 30).

2. So ka dikha ki akaja statija?

² Nesavenge tano pharo te dikhen e Jehova sar Dad kova so mangela len. A javera šaj na džanena sar te sikaven mangipe pumare phralenge hem phenjenge. Ki akaja statija ka dikha sar o Isus pomožinela amenge te dikha ko Jehova sar Dad so mangela amen hem sar šaj te ova lea paše. Isto agjaar, ka dikha sar šaj sar o Jehova te postapina amare phralencar hem phenjencar.

3. Sar e Isuseskiri najpendžardi molitva pomožinela amenge te ova paše e Jehovaja?

³ O Jehova tano Dad pherdo mangipaja. O Isus mangela te dikha ko Jehova sar ov so dikhela — sar jekh ljubezno roditeli pherdo mangipaja kasaja so lokhe šaj te kerel pe lafi, a na sar nekoj so nane ljubezno hem samo zapovedinela. Amen džanaja akava taro lafija e Isuseskere keda sikavgja ple učenikon bašo so te molinen pe. Pli najpendžardi molitva o Isus počmingja la e lafencar: „Amaro Dad“ (Mat. 6:9). Ov šaj sine te vakerel amenge te vikina e Jehova „Semokjno“, „Stvoriteli“, ili „Cari tari večnost“ hem akava nane te ovel sine pogrešno soske i Biblija koristinela akala titule bašo Jehova (1. Moj. 49:25; Isa. 40:28;  1. Tim. 1:17). Namesto adava, o Isus vakergja amenge te vikina le „mo Dad“.

4. Kotar džanaja kaj o Jehova mangela te ova lea paše?

⁴ Dali tuke pharo te dikhe e Jehova sar Dad kova so mangela tut? Nesavenge amendar tano pharo. Soske amaro Dad šaj na sine amencar ljubezno. Ama kobor tano utešno adava so džanaja kaj o Jehova but šukar haljovela soske osetinaja amen agjaar! Ov mangela te ovel amencar paše, adaleske leskoro Lafi pottikninela amen: „Oven paše e Devlea hem ov ka ovel paše tumencar“ (Jak. 4:8). O Jehova mangela amen hem vakerela kaj ka ovel amenge o najšukar Dad so šaj te ovel amen.

5. Sprema Luka 10:22, sar šaj o Isus te pomožinel amenge te ova popaše e Jehovaja?

⁵ O Isus šaj te pomožinel amenge te ova popaše e Jehovaja. Ov džanela e Jehova doborom šukar hem sikavela leskere osobine doborom sovršeno, so vakergja: „Koj dikhlja ma man dikhlja me Dade da“ (Jovan 14:9). Sar pophuro phral, o Isus sikavela amen sar te poštujna hem te šuna amare Dade, sar te na razočarina le hem sar te postapina te šaj te dikhel šukar ki amende. Ama džikote sine ki Phuv, ple životoja o Isus posebno pomožingja amenge te haljova kaj o Jehova tano but ljubezno hem pherdo mangipaja. (Čitin Luka 10:22.) Te dikha nesave primerija.

6. Vaker primerija bašo adava sar o Jehova šungja e Isuse.

⁶ O Jehova šunela ple čhaven. Te dikha sar o Jehova šunela sine ple prvo bijame Čhave džikote ov sine ki Phuv (Luka 5:16). Ov šungja e Isuse džikote molinela pe sine bašo važna odluke, sar na primer keda biringja e 12 apostolen (Luka 6:12, 13). O Jehova isto agjaar šungja leskere molitve keda sine but sekirimo. Kratko angleder te ovel izdajmo, o Isus molingja pe ple Dadeske bašo bukja kola so valjani sine te doživinel len. O Jehova na samo so šungja e Isuseskere molitve, nego isto agjaar bičhalgja jekhe angele te ohrabrinel le (Luka 22:41-44).

7. Sar osetinea tut adaleske so džanea kaj o Jehova šunela ple slugengere molitve?

 ⁷ Avdive da o Jehova šunela ple slugengere molitve, hem ov odgovorinela ki lende ko pravo vreme hem ko najšukar način so šaj (Ps. 116:1, 2). Jekh phen tari Indija lično dikhlja sar o Jehova odgovorinela ko lakere molitve. Oj borinela pe sine phare emocionalna problemencar hem but molinela pe sine baši adaja buti. Oj vakerela: „E masekoskiri emisija taro Maj 2019 berš ko JW Broadcasting® kerela sine lafi bašo adava, so šaj te kera keda siem but sekirime. Baš adava valjani sine mange. Agjaar o Jehova odgovoringja ko mle molitve“.

8. Ko save načinija o Jehova sikavgja mangipe e Isuseske?

⁸ O Jehova mangela amen hem grižinela pe amenge, isto sar so manglja hem grižingja pe ple Čhaveske džikote sine akate tele ki Phuv (Jovan 5:20). Ov grižingja pe leske ko duhovno, emocionalno hem fizičko pogled. Hem o Jehova anglo javera jasno sikavgja kaj mangela ple Čhave hem kaj tano lestar zadovolno (Mat. 3:16, 17). O Isus džanlja kaj leskoro manglo nebesno Dad sekogaš ka poddržinel le hem adaleske nikogaš na osetingja pe korkori (Jovan 8:16).

9. Kotar džanaja kaj o Jehova mangea amen?

⁹ Slično sar o Isus, sarine amen osetingjem e Jehovaskoro mangipe ko but načinija. Razmislin samo: O Jehova privlečingja amen ki peste hem dengja amen duhovno familija koja so kerela amen bahtale hem ohrabrinela amen keda siem sekirime (Jovan 6:44). Ov isto agjaar sekogaš dela amen duhovno hrana koja so kerela amen zorale. Čak pomožinela amenge te grižina amen bašo amare materijalna potrebe (Mat. 6:31, 32). Keda razmislinaja kobor o Jehova mangela amen, amaro mangipe sprema leste bajrola.

10. Isto sar o Jehova, sar valjani amen da te postapina amare duhovno familijaja?

¹⁰ O Jehova mangela amare phralen hem phenjen. Ama amenge šaj nane sekogaš lokho te manga len hem te sikava lenge adava. Akava šaj te ovel pharo soske avaja taro različna kulture hem barilem ko različna okolnostija. Osven adava, sarine amen keraja greške kolencar so šaj te nervirina e javeren hem te razočarina len. Sepak, sarine šaj te trudina amen te bajrara o mangipe ki amari duhovno familija. Sar? Agjaar so ka sikava mangipe amare phralenge hem phenjenge isto sar amaro Dad (Ef. 5:1, 2; 1. Jov. 4:19). Te dikha so šaj te sikljova taro leskoro primer.

11. Sar o Isus sikavgja e Jehovaskoro sočuvstvo?

¹¹ O Jehova sikavela sočuvstvo (Luka 1:78). E sočuvstvitelno manušeske nane sa jekh keda dikhela kaj o javera cidena muke. Ov dikhela sar te pomožinel lenge hem te utešinel len. O način sar o Isus postapinela sine e manušencar, sikavgja e Jehovaskoro sočuvstvo sprema lende (Jovan 5:19). Keda ki jekh prilika dikhlja baro mnoštvo, „e Isuseske pelo žal baši lende, soske sine mučime hem otfrlime sar bakhre bizo pastiri“ (Mat. 9:36). Na samo so e Isuse sine le sočuvstvo sprema lende, nego ov kergja da nešto te šaj te pomožinel lenge. Ov sasljargja e nasvalen hem pomožingja okolenge so sine „umorna hem so sine len pharipe“ (Mat. 11:28-30; 14:14).

12. vaker primer sar šaj te sikava sočuvstvo amare phralenge hem phenjenge?

¹² Te šaj te sikava sočuvstvo amare phralenge hem phenjenge, prvo mora te razmislina taro so nakhena. Na primer, jekh phen šaj tani seriozno nasvali. Oj šaj nikogaš  na žalinela pe bašo adava, ama ka ovel lake but milo ako nekoj pomožinela lake. Šaj te puča amen: Dali šaj te grižinel pe ple familijake? Šaj li te pomožina lake agjaar so ka kera lake hajbaske, ili ka čistina lake okolu o kher? Ili, šaj nesavo phral ačhilo bizi buti. Šaj li te pomožina leske, agjaar so ka da le hari pare džikote arakhela javer but, bizo te vakera leske kaj tane amendar?

13-14. Sar šaj te ova darežliva sar o Jehova?

¹³ O Jehova tano darežlivo (Mat. 5:45). Amen valjani te sikava sočuvstvo amare phralenge hem phenjenge angleder te roden amendar pomoš. Isto sar o Jehova, amen da šaj te kera o prvo čekori. Ov mukhela te ikljol o kham sekova dive bizo te roda lestar adava hem sekas isi korist taro kham, a na samo okola soj blagodarna. Adalea so dela amen o bukja so valjanena amenge, o Jehova sikavela kaj mangela amen. Amen but mangaja e Jehova soske tano ljubezno hem darežlivo.

¹⁴ Amare phralja hem phenja džana palo e Jehovaskoro primer agjaar so kerena o prvo čekori hem darežliva tane e javerencar. Na primer, ko 2013 berš, o baro tajfuni Hajan, kergja bari šteta ko Filipini. But phralja hem phenja našavgje ple khera hem sa so sine len. Ama lengiri duhovno familija taro celo sveto, sigate pomožingja lenge. But džene dengje pare, ili pomožingje te popravinen pe ili te keren pe 750 khera hem adava samo nekobor masekonge. But svedokija pomožingje pumare phralenge hem phenjenge ki pandemija KOVID-19. Keda siem spremna odma te pomožina amare duhovno familijake tegani sikavaja kaj mangaja len.

15-16. Sprema Luka 6:36, kova tano jekh važno način sar šaj te dža palo primer amare nebesno Dadeskoro?

¹⁵ O Jehova tano milostivo hem prostinela. (Čitin Luka 6:36.) Amaro nebesno Dad sekova dive prostinela amenge (Ps. 103:10-14). O Isus isto agjaar sikavgja milost hem prostingja ple učenikonge, iako sine nesovršena. Čak sine spremno te del plo životo sar žrtva te šaj amare grevija te oven prostime (1. Jov. 2:1, 2). Na  privlečinela tut li ko Jehova hem ko Isus adava soj tane milostiva hem prostinena?

¹⁶ O mangipe so isi amen maškar amende ovela posilno keda spremno prostinaja (Ef. 4:32). Džangjola pe kaj ponekogaš šaj te ovel amenge pharo te prostina e javerenge, adaleske mora but te trudina amen. I statija „Spremno prostinen jekh jekheske“, so arakhljola ki Stražarsko kula, pomožingja jekhe phenjake te kerel adava. * Oj vakerela: „Akaja statija pomožingja mange te haljovav sar adava so ka prostinav e javerenge ka pomožinel mange. Athe objasninela kaj adava so prostinea e javerenge, na značinela kaj prifatinea lengiri pogrešno postapka ili kaj na povredingje tut. Ama keda prostinea lenge, tu na sian više lenge holjamo hem isi tut andruno mir“. Keda spremno prostinaja amare phralenge hem phenjenge sikavaja kaj mangaja len hem kaj džaja palo primer amare Dadeskoro, e Jehovaskoro.

17. Sprema Matej 5:16, sar šaj te sikava čest amare nebesno Dadeske?

¹⁷ Isi amen bari čest so šaj te ova delo tari jekh familija soj ko celo sveto, kote so sarine mangena pe. Mangaja so poviše džene zaedno amencar te obožavinen amare Devle. Adaleske, valjani te pazina ma te kera nešto so ka čhivel e javeren te mislinen lošno amare Dadeske e Jehovaske, ili leskere narodoske. Sekogaš trudinaja amen te postapina šukar, te šaj o manuša te mangen te služinen e Jehovaske. (Čitin Matej 5:16.)

18. So ka pomožinel amenge te propovedina bizi dar?

¹⁸ Adaleske so šunaja amare nebesno Dade, ponekogaš nesave šaj te kritikujnen amen, ili čak te progoninen amen. So ako daraja te kera e javerencar lafi bašo amaro veruvanje? Šaj te ova sigurna kaj o Jehova hem leskoro Čhavo ka pomožinen amenge. O Isus vakergja ple učenikonge kaj na valjani te sekirinen pe bašo adava sar ka keren lafi ili so ka phenen. Soske na? O Isus objasningja:  „Soske ko adava momenti ka džanen so te vakeren, soske na kerena korkori lafi, nego o duho tumare Dadeskoro kerela lafi preku tumende“ (Mat. 10:19, 20).

19. Vaker primer bašo nekoj kova so hrabro propovedingja.

¹⁹ Razmislin bašo e Roberteskoro primer. Angleder nesavo vreme, samo so počmingja te proučinel i Biblija hem na džanela sine but, valjani sine te džal ko sudo ki Južno Afrika hem te objasninel soske nane te džal ki vojska. Ov hrabro objasningja e sudijaske kaj mangela te ačhovel neutralno soske mangela ple phralen. Ov ceningja plo than ki amari duhovno familija. O sudija pučlja le: „Koj tane tle phralja“. O Robert na očekujngja te pučel le akava pučibe. Ama ov odma setingja pe ko e diveskoro stiho taro Matej 12:50: „Sekoj so kerela i volja mle Dadeskiri, ov mange mlo phral hem phen hem daj“. Iako o Robert samo so počmingja te proučinel i Biblija, e Devleskoro duho pomožingja leske te odgovorinel ko poviše pučiba so na očekujngja len. Sigurno o Jehova but dičingja pe lea! O Jehova dičinela pe amencar da keda rodaja lestar pomoš te del amen hrabrost te propovedina ko phare situacie.

20. So valjani te ova odlučna e kera? (Jovan 17:11, 15)

²⁰ But siem blagodarna so siem delo tari jekh asavki duhovno familija kote so isi mangipe. Isi amen o najšukar Dad so šaj te ovel amen hem but phralja hem phenja. Sekogaš valjani te cenina akala bukja. O Satana hem leskere sledbenikija so mrzinena amen, mangena te sumnina amen ko adava dali amaro nebesno Dad mangela amen hem probinena te ruminen amaro jekhipe. Ama, o Isus molingja amare Dade te arakhel amen te šaj amari familija te ačhol ko jekhipe. (Čitin Jovan 17:11, 15.) O Jehova odgovorinela ki adaja molitva. Isto sar o Isus, nikogaš ma te sumnina amen kaj amaro nebesno Dad mangela amen hem poddržinela amen! Adaleske, te ova odlučna ponadari da te ova popaše amare duhovno familijaja.