1. O le ā le faiā e mafai ona maua e tagata faamaoni ma Ieova?

O LE aiga o Ieova e aofia ai Iesu, “le ulumatua o foafoaga uma” ma le lē mafaitaulia o agelu. (Kolo. 1:15; Sala. 103:20) A o iai Iesu i le lalolagi, na ia fesoasoani i tagata faamaoni e iloa e mafai ona latou taʻua Ieova o lo latou Tamā. Ina ua talanoa atu Iesu i ona soo i se tasi aso, na ia faasino atu ai iā Ieova o “loʻu Tamā, ma lo outou Tamā.” (Ioa. 20:17) Pe a tuuina atu i tatou iā Ieova ma papatisoina, ua avea la i tatou ma se vaega o le aiga o Ieova lea e aofia ai foʻi o tatou uso ma tuafāfine alolofa.​—Mare. 10:29, 30.

2. O le ā o le a tatou aʻoaʻoina i lenei suʻesuʻega?

² E lē faigofie i nisi ona manatu iā Ieova o se Tamā alofa, ma atonu e lē iloa e nisi le auala e faaalia ai le alofa i o latou uso ma tuafāfine. O le a talanoaina i lenei suʻesuʻega, le auala o loo fesoasoani mai ai Iesu ina ia tatou manatu iā Ieova o lo tatou Tamā alofa e mafai ona tatou vavalalata i ai. O le a tatou aʻoaʻoina foʻi auala e mafai ona tatou faaaʻoaʻo ai iā Ieova i le auala e feutagaʻi ai ma o tatou uso ma tuafāfine.

3. E faapefea i le tatalo a le Alii ona tatou vavalalata ai iā Ieova?

³ O Ieova o se Tamā alofa. E finagalo Iesu ia tatou vāai iā Ieova e pei ona ia silasila i ai. O Ieova o se Tamā agalelei, alofa, e faigofie ona talanoa i ai ma e lē sauā. E faamaonia lenā manatu i le auala na aʻoaʻo ai e Iesu ona soo e tatalo. Na ia faaaogāina le faaupuga “Lo matou Tamā,” e amata ai le tatalo a le Alii. (Mata. 6:9) Na ono aʻoaʻo i tatou e Iesu e taʻua Ieova o “Lē e ona le malosi uma lava,” ʻLē na foafoaina mea’ po o le “Tupu o le vavau.” E talafeagai ona ave iā Ieova na taʻu uma, ma e mai i le Tusi Paia. (Kene. 49:25; Isa. 40:28; 1 Timo. 1:17) Peitaʻi, na  aʻoaʻo i tatou e Iesu e faaaogā le taʻu faapelepele, le “Tamā.”

4. E faapefea ona tatou iloa e finagalo Ieova ia tatou vavalalata atu iā te ia?

⁴ Pe e faigatā iā te oe ona vaai iā Ieova o se Tamā alofa? E faigatā i nisi o i tatou. Atonu e faigatā ona tatou lagonaina le alofa faatamā, pe afai na tatou ola aʻe i se aiga e leʻi faaalia ai lenā alofa. E matuā faalaeiauina i tatou i le iloa, e malamalama lelei Ieova i o tatou faalogona. E finagalo o ia e vavalalata mai iā i tatou. O le māfuaaga lenā o loo faalaeiauina ai i tatou i lana Afioga: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iako. 4:8) E alofa Ieova iā i tatou ma na ia folafola mai o le a avea o ia ma Tamā e sili ona lelei mo i tatou.

5. E tusa ai o le Luka 10:22, e faapefea ona fesoasoani Iesu iā i tatou ina ia vavalalata atu iā Ieova?

⁵ E mafai e Iesu ona fesoasoani iā i tatou e vavalalata iā Ieova. E silafia lelei e Iesu Ieova, ma e na te faaataina atoatoa mai ona uiga. O le māfuaaga lenā na ia fetalai ai: “O lē ua vaai mai iā te aʻu, ua vaai foʻi o ia i le Tamā.” (Ioa. 14:9) E pei Iesu o se uso po o se tuagane matua iā i tatou. Ua ia aʻoaʻoina i tatou i le auala e faaaloalo ma usiusitaʻi ai i lo tatou Tamā, le auala e ʻalofia ai le faia o se mea e faatigā ai i Lona finagalo, ma le auala e maua ai Lona finagalo malie. Ae o le auala na ola ai Iesu a o iai i le lalolagi, na matuā faaalia ai e agalelei ma alofa Ieova. (Faitau le Luka 10:22.) Seʻi o tatou iloiloina nisi o faataʻitaʻiga.

6. Aumai ni faaaʻoaʻoga o le faafofogaina e Ieova o tatalo a Iesu.

⁶ E faafofoga mai Ieova i lana fanau. Seʻi mātau le auala na faafofoga ai Ieova i lona Atalii ulumatua. Na faafofogaina e Ieova tatalo uma a lona Atalii a o i ai i le lalolagi. (Luka 5:16) Na faafofogaina e Ieova le tatalo a Iesu e faatatau i le faia o filifiliga tāua, e pei o le filifilia o ona aposetolo e 12. (Luka 6:12, 13) Na faafofoga foʻi Ieova a o tatalo atu Iesu ina ua mafatia. A o leʻi faalataina Iesu, na tatalo faatauanau atu o ia i lona Tamā e faatatau i le tofotofoga faigatā o le a ia fesagaʻia. E lē na o le faafofoga o Ieova i tatalo a Iesu, ae na ia  auina mai foʻi se agelu e faamalosiau i Lona Atalii pele.​—Luka 22:41-44.

7. O ā faalogona e tatau ona iā i tatou i le iloaina e faafofoga mai Ieova i a tatou tatalo?

⁷ I aso nei, e faafofogaina pea e Ieova tatalo a ana auauna, ma e na te taliina na tatalo i le taimi talafeagai ma i le auala e sili ona lelei. (Sala. 116:1, 2) Seʻi mātau le auala na tofo ai se tuafafine mai Initia, i le tali a Ieova i ana tatalo. Na matuā mafatia le tuafafine i faalogona popole, ma na ia tatalo faatauanau mo le fesoasoani a Ieova. Na tusi mai o ia: “Na fetaui lelei iā te aʻu le Polokalame o le TV i le Initaneti o Me 2019, lea na talanoaina ai le auala e fesagaʻia ai popolega. O le tali lenā o aʻu tatalo.”

8. O ā auala na faaalia ai e Ieova le alofa mo Iesu?

⁸ E alofa ma manatu mamafa Ieova iā i tatou, e pei ona ia alofa ma manatu mamafa iā Iesu a o feagai ma luʻi i le faataunuuina o ona tofiga i le lalolagi. (Ioa. 5:20) Na ia tausia manaʻoga uma o Iesu i le itu faaleagaga, tau faalogona ma le faaletino. E leʻi faatalatū Ieova e faaali atu lona alofa ma lona finagalo malie i lona Alo. (Mata. 3:16, 17) Talu ai na silafia lelei e Iesu e faatasi atu pea iā te ia lona Tamā alofa i le lagi, o le māfuaaga lenā e na te leʻi lagona ai le tuua toʻatasi.​—Ioa. 8:16.

9. O ā faamaoniga e tatou te iloa ai e alofa Ieova iā i tatou?

⁹ E tele auala ua tatou tofo ai i le alofa o Ieova e pei o Iesu. Seʻi manatu i le mea lenei: Ua tosina atu i tatou e Ieova iā te ia, ma ua ia aumaia foʻi iā i tatou se aiga faaleagaga e alolofa ma autasi, ina ia tatou maua ai le fiafia ma fesoasoani i o tatou manaʻoga tau faalogona. (Ioa. 6:44) Ua saunia foʻi e Ieova le anoanoaʻi o meaʻai faaleagaga e faamalosia ai lo tatou faatuatua. Ua fesoasoani foʻi o ia e tausia o tatou manaʻoga faaletino. (Mata. 6:31, 32) A o tatou mafaufau loloto i le alofa o Ieova mo i tatou, o le a faamalosia ai foʻi lo tatou alofa mo ia.

10. O le ā e tatou te aʻoaʻoina mai i le auala e feutagaʻi ai Ieova ma o tatou uso ma tuafāfine?

¹⁰ E alofa Ieova i o tatou uso ma tuafāfine. Ae e ono lē faigofie i taimi uma ona tatou lagonaina ma faaalia le alofa mo lo tatou aiga faaleagaga. O le mea moni e eseese uma a tatou aganuu ma siʻomaga na tatou ola aʻe ai. E tatou te faia uma foʻi mea sesē e ono lē fiafia ma feita ai isi. E ui i lea, e mafai ona tatou saosaolaumea i le faaalia o le alofa i lo tatou aiga faaleagaga. E faapefea? E ala i le faaaʻoaʻo i lo tatou Tamā i le faaalia o le alofa i o tatou uso ma tuafāfine. (Efe. 5:1, 2; 1 Ioa. 4:19) Seʻi o tatou iloiloina mea e tatou te aʻoaʻoina mai i le faaaʻoaʻoga a Ieova.

11. Na faapefea ona faaalia mai e Iesu le alofa faapelepele o Ieova?

¹¹ E faaalia e Ieova le “alofa faapelepele.” (Luka 1:78) O le tagata e alofa faapelepele, e lē fiafia pe a vaai atu o mafatia tagata. Ae e na te saʻili auala e fesoasoani ma faamāfanafana ai i na tagata lotomafatia. O le auala na feutagaʻi ai Iesu ma tagata, na faaalia ai le alofa faapelepele o Ieova iā i latou. (Ioa. 5:19) I se tasi aso ina ua silasila atu Iesu i se motu o tagata e toʻatele, “ona mutimutivale ai lea o lona alofa iā i latou, auā ua pei i latou o mamoe ua faamanuʻalia ma agaleagaina, ua leai so latou leoleo mamoe.” (Mata. 9:36) E lē na o le alofa na lagona e Iesu, ae na ia faamālōlōina maʻi ma faafouina i latou na “tigāina ma mafatia i avega.”​—Mata. 11:28-30; 14:14.

12. Aumai se faaaʻoaʻoga o ni auala e tatou te faaalia ai le alofa mutimutivale i o tatou uso ma tuafāfine.

¹² E manaʻomia ona tatou mafaufau i luʻi o loo fesagaʻia e o tatou uso ma tuafāfine, ina ia mafai ai ona tatou faaalia le alofa faapelepele  iā i latou. O se faataʻitaʻiga, atonu o loo aafia se tuafafine i se maʻi tugā. E lē taitai talanoa e faatatau i lona maʻi, ae atonu e na te talisapaia se tasi e fesoasoani atu iā te ia. O faapefea ona ia tausia manaʻoga faaletino o lona aiga? Pe e mafai ona tatou fesoasoani i ai, e saunia ni meaʻai ma tapena lona fale? Atonu ua leai se galuega a se uso. E mafai ona ave i ai se tupe e fesoasoani iā te ia seʻia maua se isi ana galuega, ae ave i ai i se auala e na te lē iloa ai e avatu iā te oe.

13-14. E faapefea ona tatou faaalia le limafoaʻi e pei o Ieova?

¹³ E aaofoaʻi Ieova. (Mata. 5:45) E lē tatau ona tatou faatali seʻiloga e talosaga mai o tatou uso ma tuafāfine mo se fesoasoani, ona faatoʻā faaali lea i ai o le alofa faapelepele. Ia tatou faaaʻoaʻo iā Ieova, e ala i le tausolomua ona faaalia o le alofa faapelepele. E faasusulu mai e Ieova le lā i aso taʻitasi e aunoa ma lo tatou talosaga i ai. O le māfanafana o le lā e faatumauina ai le ola o tagata uma, ae lē na o tagata lotofaafetai. Ioe, ua faaalia e Ieova lona alofa iā i tatou i le saunia o mea e tatou te manaʻomia. E tatou te matuā alolofa iā Ieova ona o lona agalelei ma lona aaofoaʻi.

¹⁴ E toʻatele uso ma tuafāfine o loo faaaʻoaʻo iā Ieova i le tausolomua ona faaalia o le limafoaʻi i isi. O se faaaʻoaʻoga, i le 2013 na taia ai Filipaina i le afā malosi o Haiyan ma na faaleagaina ai fale ma le tele o meatotino a o tatou uso ma tuafāfine. Ae na vave ona fesoasoani atu lo latou aiga faaleagaga i le lalolagi aoao. Na foaʻi e le toʻatele tupe, a o isi na fesoasoani e toe fausia le toetoe 750 fale i le itiiti ifo i le tausaga. I le taimi o le pepesi o le faamaʻi o le KOVITI-19, na galulue mamafa Molimau e fesoasoani i o latou uso ma tuafāfine. O lea, pe a vave ona tatou fesoasoani atu i lo tatou aiga faaleagaga, ua faailoa atu ai e tatou te alolofa iā i latou.

15-16. I le Luka 6:36, o le ā e tatau ona tatou faia e faaaʻoaʻo ai i lo tatou Tamā i le lagi?

¹⁵ E alofa mutimutivale Ieova ma lotofaamagalo. (Faitau le Luka 6:36.) O aso uma e tatou te tofo ai i le alofa mutimutivale o lo tatou Tamā i le lagi. (Sala. 103:10-14) E ui e lē lelei atoatoa soo o Iesu, ae na ia faaalia le alofa  mutimutivale ma le lotofaamagalo iā i latou. Na lotomalie foʻi Iesu e faataulaga lona ola, ina ia faamagalo ai a tatou agasala. (1 Ioa. 2:1, 2) Pe e te lē lagona ai la le vavalalata iā Ieova ma Iesu, ona o lo la alofa mutimutivale ma le lotofaamagalo?

¹⁶ Pe a tatou “fefaamagaloaʻi ma le lotoatoa,” o le a faamalosia ai le fusi o le alofa i lo tatou aiga faaleagaga. (Efe. 4:32) Ioe, e iai taimi e faigatā ai ona tatou faamagalo atu, o lea e manaʻomia ai ona tatou galulue mamafa ina ia faaalia le lotofaamagalo. Na fesoasoani i se tuafafine le mataupu “Ia Lotomalie e Faamagalo Atu,” mai i se Olomatamata e na te faia ai faapea. * Na tusi o ia: “O le suʻesuʻeina o lenei mataupu, na ou maua ai le vaaiga saʻo e faatatau i le lotofaamagalo. O loo taʻua ai o le lotomalie e faamagalo atu, e lē uiga ai faapea e tatou te ioe i mea sesē na faia e se tasi, pe faafoliga atu foʻi e leʻi iai se aafiaga i isi o le mea na tupu. Ae e uiga atu i le lē tatau ona tigā pea lou loto ona o na mea sesē ma ia faatoʻafilemu pea ou faalogona.” Pe a tatou faamagalo atoatoa i o tatou uso ma tuafāfine, ua faailoa atu ai lo tatou alolofa iā i latou ma o loo tatou faaaʻoaʻo i lo tatou Tamā o Ieova.

17. E tusa ai ma le Mataio 5:16, e faapefea ona tatou faamamaluina lo tatou Tamā i le lagi?

¹⁷ O se matuā faaeaga le avea o i tatou ma vaega o se aiga alolofa i le lalolagi aoao. E tatou te mananaʻo e tapuaʻi faatasi i le Atua ma le toʻatele o tagata. E lē tatau la ona tatou faia se mea e taʻuvalea ai Ieova ma ona tagata. O lea la, e tatou te taumafai e faaalia uiga e tosina mai ai tagata i le tala lelei.​—Faitau le Mataio 5:16.

18. O le ā e fesoasoani iā i tatou e molimau atu ai ma le lototele?

¹⁸ E iai taimi e faitioina pe sauāina ai i tatou e nisi ona o lo tatou usiusitaʻi i lo tatou Tamā i le lagi. O le ā e tatou te faia pe a tatou fefefe e taʻu atu i isi o tatou talitonuga? E tatou te mautinoa e fesoasoani mai Ieova ma lona Alo iā i tatou. Na faamautinoa atu e Iesu i ona soo, e aua le popole i le auala e tali atu ai. Aiseā? Na fetalai Iesu: “Po o ā foʻi upu tou te tautatala  atu ai; auā o le a tuuina atu i lenā lava taimi upu tou te tautatala atu ai. Auā e lē na o outou o tautatala atu, a o le agaga o lo outou Tamā lea ua mafai ona outou tautatala atu ai.”​—Mata. 10:19, 20.

19. Ia aumai se faaaʻoaʻoga o se tasi na molimau atu ma le lototele.

¹⁹ Seʻi mātau le faaaʻoaʻoga a le uso o Robert. I ni tausaga ua mavae ina ua faatoʻā amata lana suʻesuʻega faale-Tusi Paia, ma e itiiti foʻi lona iloa o le Tusi Paia, na tū ai o ia i luma o le faamasinoga a le vaegāʻau i Aferika i Saute e faamatala le māfuaaga e lē auai ai i vaegāʻau. Na ia faamatala atu ma le lototele i le faamasinoga lona solitū i faiga faavaegāʻau, ona o lona alofa i ona uso Kerisiano. E matuā tāua iā te ia lona tulaga i lo tatou aiga faaleagaga. Na faafuaseʻi ona fesili atu le faamasino: “O ai ou uso?” E leʻi faatalitalia e Robert lenā fesili. Ae na vave lana ona oso aʻe i lona mafaufau le mau o lenā aso i le Mataio 12:50: “O lē e faia le finagalo o loʻu Tamā o i le lagi, o ia lenā o loʻu uso, o loʻu tuafafine, ma o loʻu tinā.” E ui o Robert o se tagata aʻoga fou o le Tusi Paia, ae na fesoasoani le agaga o Ieova iā te ia e taliina lenā fesili ma isi fesili e na te leʻi faatalitalia. E mautinoa na matuā fiafia le finagalo o Ieova iā Robert. E mautinoa foʻi le matuā faafiafiaina o le finagalo o Ieova, pe a tatou faalagolago iā te ia mo le malosi e molimau atu ai i tulaga faigatā.

20. O le ā e tatau ona tatou maumauaʻi e fai? (Ioane 17:11, 15)

²⁰ Seʻi faaauau pea ona faatāua lo tatou faaeaga o le avea ma vaega o se aiga alolofa faaleagaga. Ua tatou maua se Tamā e sili ona lelei ma se ʻauuso e alolofa iā i tatou. E tatau ona tatou matuā talisapaia lenā faaeaga. O loo taumafai malosi Satani ma ana ʻau e faatupu iā i tatou le masalosalo i le alofa o lo tatou Tamā i le lagi ma saveʻu ai le autasi o loo tatou olioli ai. O lea, na talosaga ai Iesu i lona Tamā e leoleo iā i tatou ina ia autasi ai pea lo tatou aiga. (Faitau le Ioane 17:11, 15.) O loo tali e Ieova lenā tatalo. Ia tatou faaaʻoaʻo iā Iesu, ia aua lava neʻi o tatou masalosalo i le alofa ma le lagolagosua a lo tatou Tamā i le lagi. Seʻi faaauau pea ona tatou maumauaʻi e matuā vavalalata atu i lo tatou aiga faaleagaga.