1. Bantu baasha lulamato be kuitanyina Yehowa bu nnanyi?

 MU KIFUKO kia balanguidi ba Yehowa, mui mpa na Yesu, muikale “mwana mbedi a bipangwa byooso,” na bibumbu bia ba mikeyilu. (Kol. 1:15; Mis. 103:20) Pa baadi Yesu pa nsenga baadi muleshe’shi bantu baasha lulamato be kumona Yehowa bu Nshabo. Pa baadi aakula na balongi baye, Yesu baadi ayitanyina Yehowa bu “Yaaya na aye mwikale Nshenu.” (Yo. 20:17) Na p’atuilambula kui Yehowa na kubatshishibua, atutuele mu kifuko kia bakuetu balume na bakashi befulene.​—Mak. 10:29, 30.

2. Nkinyi ki’atukalongo mu uno muisambo?

² Bangi abamonaa bu bibukopo, bua kuitanyina Yehowa bu Nshabo sha kifulo. Bangi namu be kukutua kuuka mushindo wa kulesha bakuabo balume na bakashi kifulo. Mu uno muisambo, atukamono mushindo awitukuasha Yesu bua kumona Yehowa bu Nshetu sha kifulo, muntu atudi balombene kuifubuila naye peepi. Atukalongo dingi mushindo watudi balombene kuambula Yehowa, mu mushindo watukitshina bakuetu balume na bakashi mianda.

3. Mmushindo kinyi awitukuasha luteko lua kileshesho buatudia kuifubuila kui Yehowa?

³ Yehowa ngi Nshetu sha kifulo. Yesu akumina’shi tumone Yehowa bu bi’amumonaa, bu Nshe bana sha kalolo na kifulo mubofule kuifubuila kuadi, kushi kumumona bu muntu a kutshina. Atushinkamisha bino mu mushindo ubaadi Yesu mulongieshe balongi baye bya kuteka. Babangile na bino bishima mu luteko lua kileshesho’shi: “Yaay’eetu.” (Mat. 6:9) Yesu mmuitulungule buatudia kuitanyina Yehowa bu “Sha-bukome booso,” bu “Mupangi,” sunga bu “Mfumu a ikalaika.” Ino miasu yoso ngimulombene, muanda ayilesha biadi muikale. (Kib. 49:25; Yesh. 40:28; 1 Tim. 1:17) Biabia, Yesu etulungula buatudia kuitanyina Yehowa bu “Nshetu” sha kifulo.

4. Mmushindo kinyi watuuku’shi Yehowa akumina’shi tuifubuile peepi naye?

 ⁴ We na lukalakashi lua kumona Yehowa bu Nshetu sha kifulo su? Bangi ba kuatudi be nalo. Tui kuela biabia binangu muanda’shi pangi tui bakule na baledi abetukiengiesha. Abitunyingisha ngofu p’atuuku’shi Yehowa aukaa bi’atupusha! Na akuminaa kuifubuila kuatudi. Ngi buakinyi Eyi diaye aditunyingisha’shi: “Efubwiileyi peepi n’Efile Mukulu n’aye akefubwila kwanudi.” (Shak. 4:8, Kilombeeno Kipya 2014) Yehowa mmuitufule, na amba’shi akekadika Nshetu e buwa atushekele naye dingi kashaa.

5. Muyile Luuka 10:22, mmushindo kinyi ulombene Yesu kuitukuasha bua kuifubuila peepi na Yehowa?

⁵ Yesu e kuitukuasha bua kuifubuila peepi na Yehowa. Yesu auku Yehowa kalolo kakile na aleshaa ngikashi yaye mu mushindo upuidikie, bambile’shi: “Mummone mmumone Yaaya.” (Yo. 14:9) Nka biatudia kunemeka mukuetu taadi mununu, Yesu kuete etulongiesha mushindo wa kunemeka na kukookiela Nshetu sha kifulo, bia kuleka mianda ishayimusankisha na buatudia kukuminyibua naye. Anka nshalelo oso a Yesu pa nsenga, baadi muleshe kalolo mushindo wi kalolo ka Yehowa na bi kifulo kiaye. (Badika Luuka 10:22.) Binobino tubandeyi kutala bingi bileshesho.

6. Tusha bileshesho abilesha mushindo ubaadi Yehowa muteemeshe Yesu.

⁶ Yehowa ateemeshaa bana baye. Tubandeyi kutala mushindo ubaadi Yehowa muteemeshe muan’aye mbedi. Mu binyibinyi, Yesu pa baadi pa nsenga, baadi muele nteko i bungi na Yehowa baadi muiyipushe. (Luk. 5:16) Baadi mupushe Yesu atekie pabitale kuata bitshibilo bi na muulo, bu pa kusangula balongi 12. (Luk. 6:12, 13) Yehowa baadi dingi mupushe Yesu atekie nsaa ibaadi muinyongole. Mpa na kumpala kua kumupana, Yesu batekiele Nshaye ngofu pabitale kitompuanga ki bukopo kibaadi kumpala kuaye. Yehowa ta baadi nka penda mupushe nteko ya Yesu nya, kadi baadi dingi mutume muikeyilu buadia kunyingisha muan’aye a kifulo.​—Luk. 22:41-44.

7. Tui kuipusha naminyi p’atuuku’shi Yehowa ateemeshaa nteko yetu?

⁷ Lelo uno, Yehowa ki’atungunuka na kuteemesha nteko ya bafubi baye, na ebaluula pa nsaa ilombane na mu mushindo wi buwa. (Mis. 116:1, 2) Tutaleyi mukuetu mukashi a mu  Inde, biadi mumone mushindo umualuule Yehowa ku nteko yaye. Baadi na mianda i baadi ayimuinyongosha ngofu na aye nkuteka Yehowa pabitale uno muanda. Mmufunde’shi: “Mu programe a televizio a JW a Mueshi wa Katano 2019, baadi esambila mushindo wa kunyingila tuinyongoshi. Bibaadi nka bu muanda wande. Na bino bibaadi lualuulo ku nteko yande.”

8. Mu mishindo kinyi mubaadi Yehowa muleshe Yesu kifulo?

⁸ Yehowa mmuitule na etupasukilaa, nka bu bibaadi mufule Yesu na kumupasukila pa baapetele nkalakashi pano pa nsenga pa baadi mumutume. (Yo. 5:20) Baadi mupe Yesu bukuashi bua mishindo yoso bubaadi nabo lukalo, bua mu kikudi, bua mu binangu, na bua ku mbidi. Na Yehowa, tabaadi muituutuushe bua kulungula muan’aye’shi ne mukufule na ne mukukumine nya. (Mat. 3:16, 17) Muanda efuku dioso Yesu baadi mukulupile nka kui Nshaye e muiyilu sha kifulo, na ta baadi epusha bu ebupenka nya.​—Yo. 8:16.

9. Nkishinkamisho kinyi kiatudi nakio akilesha’shi Yehowa mmuitufule?

⁹ Nka bu Yesu, atue boso tui bamone bikitshino bi bungi bia kifulo kia Yehowa. Banda kunangushena: Yehowa akumina’shi tuikadikie ba kuuku baye, na mmuitupe bakuetu be bungi balume na bakashi be na kifulo, abetuikasha na muloo na abetunyingisha patudi mu tuinyongoshi. (Yo. 6:44) Dingi Yehowa kuete etupa kioso kiatudi nakio lukalo, bua kulama lukumino luetu lunyingie. Na dingi, kuete kuitukuasha pa kuitupasukila, bua kuitupa bintu bia kumbidi biatudi nabio lukalo efuku dioso. (Mat. 6:31, 32) Nsaa y’atunangushena bitufule Yehowa, kifulo kietu kuadi akinyisha kutama.

10. Nkinyi kiatudi balombene kulongiela ku mushindo ukuete Yehowa kukitshina bakuetu balume na bakashi mianda?

¹⁰ Yehowa mmufule bakuetu balume na bakashi. Anka, nta mbibofule bua kufula bakuetu be mu kifuko kia mu kikudi nsaa yoso nya. Muanda, tui batuukile mu bipikua bilekenelekene, na tui bakudile mu ma mbalo elekene. Na atue boso atukitaa bilubilo, na tui balombene kukokosha na kuinyongosha bangi. Dingi, tui balombene kukuatshishena bua kunyingisha kifulo kia mu kifuko kietu kia mu kikudi. Tui kuibikita mushindo kinyi? Pa kuambula Nshetu mu kulesha kua bakuetu balume na bakashi kifulo. (Ef. 5:1, 2; 1 Yo. 4:19) Tubandeyi kutala kiatudi balombene kulongiela ku kileshesho kia Yehowa.

11. Mmushindo kinyi ubaadi Yesu muleshe abipushaa Yehowa “lusa”?

¹¹ Yehowa aleshaa “lusa.” (Luk. 1:78) Muntu sha lusa, etuulaa pa mbalo ya bantu nsaa y’auku’shi bakuete kukienga; na akitaa muaye moso bua kuibakuasha na kuibanyingisha. Mushindo ubaadi Yesu mukitshine bantu mianda, nguleshe abituulaa Yehowa pa mbalo ya bangi na kuibapasukila. (Yo. 5:19) Nsaa ibamuene kibumbu kia bantu, Yesu “nkupusha lusa, mwanda babaadi bakookye, na bafwambukye bu mikooko ishii na mulami.” (Mat. 9:36) Bibaadi bipushe Yesu, bibaadi bikile mpa na kifulo. Na aye nkukita mpa na kingi kintu bua kuibakuasha, baadi mupashe baasha mikumbo na boso “babaadi bafwambukye na bushito.”​—Mat. 11:28-30; 14:14.

12. Mmushindo kinyi watudi balombene kulesha bakuetu balume na bakashi lusa?

¹² Kumpala kua kulesha bakuetu balume na bakashi lusa, abitungu tubande kuiwuka luinyi lukalakashi luabadi nalo. Bu kileshesho, mukuetu mukashi e kuikala na mukumbo wi bukopo. Pangi, t’ediladilaa pabikitale wanka, kadi e kuikala na muloo su muntu amukuasha. Mmushindo kinyi w’apasukilaa kifuko kiaye ku nkalo ya ku mbidi? E kuata buabua bukuashi bupeela na muulo, bu kumuteekielanga bidibua, sunga kumukombelanga mu nshibo? Mukuetu  mulume, e kushimisha mudimo waye. Tui kumukuasha na ndambo ya makuta, kushi kumulungula’shi nnatue babaamupa, na kutungunuka na kumukuasha mpa na p’akapetela ungi mudimo su?

13-14. Mmushindo kinyi watudi balombene kulesha kalolo bu Yehowa?

¹³ Yehowa e na kalolo. (Mat. 5:45) T’abitungu’shi tutengiele nka n’apetutekiela bakuetu balume na bakashi bukuashi, bua’shi tuibaleshe lusa nya. Nka bu Yehowa, tui balombene kukita kintu kampanda kumpala kua’shi betutekie. Atundushaa nguba kuifuku n’efuku kushi muntu kumuteka! Na etaata dia nguba adikuashaa muntu oso kushi nka baaba abamutumbula. Ta tui balombene kukumina’shi Yehowa kuete kuitupuila nkalo yetu na kuitulesha kifulo kiaye kikata su? Tui bafule Yehowa ngofu kumuanda, e na kifulo na kalolo!

¹⁴ Bu biabakuete kuambula Nshabo e muiyilu, bakuetu balume na bakashi be bungi bakuete kuata mpàngo ya kukitshina bakuabo kalolo. Bu kileshesho, mu 2013, kipapi kikata ki’abetanyinaa bu Typhoon Haiyan, kibaadi kitshinkishe nsenga kialuisha bintu bi bungi mu Phillipine. Bakuetu be bungi balume na bakashi mbashimishe mashibo aabo na bintu biabo bibaabadi nabio. Anka, bakuabo ba mu kifuko kia mu kikudi kia mu nsenga ishima, babaadi bebakuatshishene. Be bungi babaadi batushe makuta sunga kutusha bukome buabo bua kukuatshishena mudimo wa kuibaka. Bino, bibaadi bikuashe bua’shi bebalumbuluile mashibo sunga kuibebakila dingi mashibo akile pa 750 ku kipua kimune! Mu kino kipungo kia COVID-19, ba Temue ba Yehowa mbekitshishe muabo moso, bua kukuatshishena bakuabo balume na bakashi. Nsaa y’atukitshi bukidibukidi bua kukuatshishena kifuko kietu kia mu kikudi, atuibalesha’shi tui bebafule.

15-16. Muyile Luka 6:36, mmushindo kinyi wi na muulo watudi balombene kuambula Nshetu e muiyilu?

¹⁵ Yehowa nsha-lusa na e na kapunganyi ku bilubilo bietu. (Badika Luka 6:36.) Tukuete kumona Nshetu e muiyilu bi’etufuilaa lusa kuifuku n’efuku. (Mis. 103:10-14) Balongi ba Yesu babaadi bantu bashi bapuidikie; kadi, baadi ebafuila lusa na kupunganya bilubilo biabo. Baadi mpa na mukumine kutusha muwa waye, bua kulekielua miluisho yetu. (1 Yo. 2:1, 2)  Tuepusha namu’shi we peepi na Yehowa na Yesu muanda’shi, bakuete kuitufuila lusa na kulekieela bilubilo bietu su?

¹⁶ Atunyingisha kifulo kia mu kifuko kia mu kikudi, nsaa “y’atuilekieshena bito ku muntu na muntu.” (Ef. 4:32) Biabia, kufuila bangi lusa kui kuituelela bukopo ingi nsaa, anka abitungu tuikitshishe muetu moso pabitale uno muanda. Ungi mukuetu mukashi baadi mupushe’shi, muisambo wa mu Kitenta kya Mulami ubaadi awisambila pabitale “Kuilekieshena bito ku muntu na muntu” ngumukuashe pabitale uno muanda. * Mmufunde’shi: “Kulonga kua uno muisambo nkushintule binangu biande, kuampa mmueneno e buwa pabitale uno muanda. Apatuula’shi kufuila bangi lusa, t’akulesha’shi nkukumina kiakia ki bubi kibaabakitshi sunga kuikibepula nya. Anka kufuila bangi lusa, akulesha kupela kulama ngo ya yaya mianda i bubi, na kulama butaale bobe.” P’atufuila bakuetu balume na bakashi lusa, atulesha’shi tui bebafule, na’shi tukuete kuambula Nshetu Yehowa.

17. Muyile Mateo 5:16, mmushindo kinyi watudi balombene kutumbisha Nshetu e muiyilu?

¹⁷ Nyi nkinemo kikata, kia kuikala mu kifuko kia mu nsenga ishima kifulene. Atukuminaa’shi su kui mushindo, bantu be bungi besangie kuatudi mu kulanguila Efile Mukulu etu. Na uno muanda mu binangu, tulekieyi kukita kintu kioso ki bubi kilombene kuluisha nkumo ya muilo wa Yehowa, n’eshina dia Nshetu e muiyilu. Abitungu tuikitshishe atue banabene bua kuikala na muikelo, aukaka bantu ku mukandu wibuwa.​—Badika Mateo 5:16.

18. Nkinyi kilombene kuitukuasha buatudia kukita mudimo wa bulungudi n’eshimba dinyingie?

¹⁸ Ingi nsaa, bangi be kuituipula sunga kuitukiengiesha muanda wa’shi atukookielaa Nshetu e muiyilu. Tui kukita naminyi su tui na moo wa kulungula bangi pabitale lukumino luetu? Tui balombene kukulupila mui Yehowa na mui Muan’aye buabadia kuitukuasha. Yesu baadi mushinkamiishe balongi baye’shi ta nui balombene kupangayika pabitale kia kuakula sunga kianudia kuisamba. Buakinyi? “Pa yaya nsâ  yanudya kwakula, Efile Mukulu akenupa bya kwakula.” Yesu baadi mupatuule’shi: “Mwanda byabya bishima by’anukakula t’abikekala byenu, ooo. Nyi nkikudi ky’Efile Mukulu, Nshenu, akikâkwila mwanudi.”​—Mat. 10:19, 20, EEM.

19. Tusha kileshesho kia ungi muntu baadi mulungule mukandu wibuwa n’eshimba dinyingie.

¹⁹ Tutaleyi kileshesho kia mukuetu Robert a mu Afrique du Sud. Angi mafuku pa baadi kialongo Bible, ki na kiukilo kipeela kia Bible, baayile mu Camp ka basalayi akalungula mukata a basalayi’shi ami ntshi bia kutuela busalayi. Baadi munyingi’eshimba ebapatuluila muamua mu Camp’shi nankumina kushala kushi kutuelakana mu mianda ya politike, muanda ne mufule bakuetu bena Kidishitu. Baadi mufule mbalo yaye mu kifuko kietu kia mu kikudi! “Bakuenu mba nnanyi?” Ndukonko lubaabamuipuishe nka paapa lualua. Robert baadi mupue kuiwuka bi binangu biaye bua lualua lukonko. Anka paapa verse a kifundue kia kuifuku, nkumufikila mu binangu. Kibaadi kia Mateo 12:50 amba’shi: “Ooso akitshi abikyebe Nshaami e mwiyilu, nnaaye mukwetu mulume, na mukwetu mukashi, nnaaye nyinaami.” Sunga Robert baadi ki mulongi mupia a Bible, Yehowa baadi mu mukuashe na kikudi kiaye bua kualuula ku lualua lukonko na ingi nkonko i bungi. Yehowa baadi na fiedi bua Robert! Na dingi, Yehowa e na nfiedi buetu nsaa y’atukulupila muadi, buadia kuitupa eshimba dinyingie dia kulungula mukandu wibuwa nsaa ya nkalakashi.

20. Abitungu tuikale na kitshibilo kia kukita kinyi? (Yowano 17:11, 15)

²⁰ Tutungunukieyi na kusankila muabi watudi nawo, wa kuikala mu kifuko kia mu kikudi kifulene. Tui na Nshetu e buwa bukile atushekele naye dingi kashaa, na bakuetu balume na bakashi be bungi betufule. Abitungu efuku dioso, tuikale na lutumbu bua uno muanda. Satana na bantu baye betushikue, abakiebe’shi tuikale na mpaka bua kifulo kia Nshietu e muiyilu, na kukimba bia kuluisha buumune buetu. Biabia, Yesu baadi muitutekiele kui Nshetu e muiyilu, buadia kuitulama, na’shi atue namu tulame buumune bua kifuko kietu. (Badika Yowano 17:11, 15.) Yehowa, aluulaa ku luno luteko. Nka bu Yesu, ta tui balombene kuikala na mpaka, bua kifulo na bukuashi bua Nshetu e muiyilu nya. Tuikaleyi na kitshibilo kia kutungunuka na kuifubuila peepi na kifuko kietu kia mu kikudi.