1. Singambita ngekutsini Jehova?

UMNDENI wetikhonti taJehova ufaka ekhatsi Jesu, ‘lolitibulo layo yonkhe indalo,’ netingilosi letinyenti. (Khol. 1:15; Hla. 103:20) Ngesikhatsi Jesu alamhlabeni, washo kutsi bantfu labetsembekile bangatsatsa Jehova njengaBabe wabo. Akhuluma nebafundzi bakhe, Jesu watsi Jehova ‘nguBabe wami longuBabe wenu.’ (Joh. 20:17) Nasitinikela kuJehova futsi sibhajatiswa, siba yincenye yebazalwane nabodzadze labanelutsandvo.—Mak. 10:29, 30.

2. Sitawucoca ngani kulesihloko?

² Labanye bakutfola kumatima kutsatsa Jehova njengaBabe lonelutsandvo. Labanye bangahle bangati kutsi bangalukhombisa njani lutsandvo kubazalwane babo nabodzadze. Kulesihloko, sitawucoca ngekutsi Jesu usisita njani sitsatse Jehova njengaBabe lonelutsandvo, futsi lesingasondzelana naye. Sitawuphindze sicoce ngetindlela lesingamlingisa ngato Jehova endleleni lesiphatsa ngayo bazalwane betfu nabodzadze.

3. Umthantazo losibonelo usisondzeta njani kuJehova?

³ Jehova unguBabe lonelutsandvo. Jesu ufuna sitsatse Jehova ngendlela yena lamtsatsa ngayo, simtsatse njengemtali lonemusa, lonelutsandvo futsi lesingakhuluma naye nganobe ngusiphi sikhatsi, hhayi umuntfu lote umusa futsi lositjela kuphela loko lokufanele sikwente. Loku kubonakala kuloko Jesu lafundzisa balandzeli bakhe kutsi bakuthantazele. Wacala lomthantazo losibonelo ngemavi latsi: “Babe wetfu.” (Mat. 6:9) Jesu bekangambita Jehova ngekutsi “nguSomandla,” ‘nguMdali’ nobe ‘yiNkhosi yaphakadze,’ njengobe tonkhe kuticu takhe futsi tiseBhayibhelini. (Gen. 49:25; Isa. 40:28; 1 Thim.  1:17) Kunaloko, Jesu wasitjela kutsi sibite Jehova ngekutsi ‘nguBabe.’

4. Sati njani kutsi Jehova ufuna sisondzelane naye?

⁴ Ukutfola kumatima yini kutsatsa Jehova njengaBabe lonelutsandvo? Labanye betfu bakutfola kumatima. Kungenteka sikutfola kumatima kucabanga ngemtali lonelutsandvo ngenca yendlela lebuhlungu lesakhula ngayo. Kusidvudvuta kakhulu kwati kutsi Jehova uyayicondza indlela lesitiva ngayo! Ufuna kusondzelana natsi. Kungako liVi lakhe lisikhutsata litsi: “Sondzelani kuNkulunkulu, naye utawusondzela kini.” (Jak. 4:8) Jehova uyasitsandza futsi utsi utawuba nguBabe loncono kakhulu lesingaba naye.

5. Ngekusho kwaLukha 10:22, Jesu angasisita njani kutsi sisondzelane naJehova?

⁵ Jesu angasisita kutsi sisondzelane naJehova. Umati kahle Jehova futsi ubuveta kahle buntfu bakhe. Kungako atsi: “Loyo longibonile mine umbonile naBabe.” (Joh. 14:9) Njengabhuti lomdzala, Jesu usifundzisa indlela lesingamhlonipha ngayo Babe wetfu nalesingamlalela ngayo. Uphindze asifundzise ngaloko lesingakwenta kuze singamvisi buhlungu, nalesingakwenta kuze asemukele. Kodvwa kuphila kwaJesu kwalamhlabeni kuveta kakhulu kutsi Jehova unemusa futsi unelutsandvo. (Fundza Lukha 10:22.) Ase sicoce nganati tibonelo.

6. Niketa tibonelo letikhombisa kutsi Jehova bekamlalela Jesu.

⁶ Jehova uyabalalela bantfwana bakhe. Cabanga ngendlela Jehova layilalela ngayo iNdvodzana yakhe yekucala. Bekayiva imithantazo yayo ngesikhatsi ilapha emhlabeni. (Luk. 5:16) Wamuva Jesu ngesikhatsi athantaza kuze ente tincumo letibalulekile, njengalesikhatsi akhetsa baphostoli bakhe labangu-12. (Luk. 6:12, 13) Wamuva nangalesikhatsi athantaza akhatsateke kakhulu. Ngaphambi kwekutsi Judasi amtsengise, wathantaza kuBabe wakhe mayelana naletintfo lebetitawenteka kuye ngekushesha. Jehova akagcinanga nje ngekuyiva imithantazo yakhe, kodvwa waphindze watfumela nengilosi kutsi  icinise leNdvodzana yakhe layitsandzako.—Luk. 22:41-44.

7. Utiva njani ngekwati kutsi Jehova uyayilalela imithantazo yebantfu bakhe?

⁷ Lamuhla, Jehova usachubeka nekulalela imithantazo yetikhonti takhe, futsi uyiphendvula ngesikhatsi lesikahle nangendlela lekahle. (Hla. 116:1, 2) Lomunye dzadze wase-India wayibona indlela Jehova layiphendvula ngayo imithantazo yakhe. Bekahlale acindzeteleke kakhulu, ngako wathantaza kuJehova ngalendzaba. Wabhala watsi: “Wangisita kakhulu uMsakato we-JW waMay 2019, lebewukhuluma ngekutsi singabhekana njani nekucindzeteleka. Waba yimphendvulo yemithantazo yami.”

8. Ngutiphi tindlela Jehova lakhombisa ngato kutsi uyamtsandza Jesu?

⁸ Jehova uyasitsandza futsi uyasinakekela, njengobe nje bekamtsandza naJesu futsi amnakekela ngesikhatsi alapha emhlabeni. (Joh. 5:20) Wasita Jesu kutsi ahlale anekukholwa lokucinile, wamkhutsata nakacindzetelekile, waciniseka nekutsi unetintfo latidzingako kuze aphile. Jehova wayitjela iNdvodzana yakhe kutsi uyayitsandza nekutsi uyajabula ngayo. (Mat. 3:16, 17) Ngenca yekutsi Jesu bekati kutsi Babe wakhe lomtsandzako losezulwini utawuhlale anaye futsi amsite, akazange ative ayedvwa.—Joh. 8:16.

9. Sati njani kutsi Jehova uyasitsandza?

⁹ NjengaJesu, sonkhe siyibonile indlela Jehova lasitsandza ngayo. Cabanga ngaloku: Jehova usivumele kutsi sibe bangani bakhe, wasinika bazalwane nabodzadze labanyenti labasitsandzako, labasenta sijabule futsi labasikhutsatako nasicindzetelekile. (Joh. 6:44) Jehova uphindze asinikete konkhe lesikudzingako kuze sichubeke sicinisa kukholwa kwetfu. Uphindze asisite sitfole tintfo lesitidzingako kuze siphile. (Mat. 6:31, 32) Simtsandza kakhulu Jehova nasicabanga ngendlela lasitsandza ngayo.

10. Yini lesingayifundza endleleni Jehova labaphatsa ngayo bazalwane betfu nabodzadze?

¹⁰ Jehova uyabatsandza bazalwane betfu nabodzadze. Kodvwa akuhlali kumelula kukhombisa bazalwane betfu nabodzadze kutsi siyabatsandza. Loku kungenca yekutsi sinemasiko langafani futsi sikhule ngetindlela letingafani. Sonkhe siyawenta emaphutsa langabaphatsa kabi labanye futsi abente bangajabuli. Nanobe kunjalo, sonkhe singetama kukhulisa lizinga lesibatsandza ngalo bazalwane betfu nabodzadze. Kanjani? Ngekutsi silingise Babe wetfu endleleni lesibatsandza ngayo bazalwane betfu nabodzadze. (Ef. 5:1, 2; 1 Joh. 4:19) Asesibone kutsi yini lesingayifundza esibonelweni saJehova.

11. Jesu wakhombisa njani kutsi ‘unemusa’ njengaJehova?

¹¹ Jehova ‘unemusa.’ (Luk. 1:78) Umuntfu lonemusa uva buhlungu nakabona labanye bahlupheka; ufuna tindlela tekubasita futsi abadvudvute. Indlela Jesu labaphatsa ngayo bantfu, beyikhombisa kutsi Jehova uyabakhatsalela. (Joh. 5:19) Ngesikhatsi Jesu abona sicumbi sebantfu, “wabahawukela, ngobe bebaphetfwe kabi futsi bahlakatekile njengetimvu letite umelusi.” (Mat. 9:36) Jesu akazange agcine ngekubavela labantfu. Welapha labagulako futsi wasita labo ‘labadziniwe nalabasindvwako.’—Mat. 11:28-30; 14:14.

12. Shano sibonelo sendlela lesingakhombisa ngayo umusa.

¹² Nangabe sicabanga ngetinkinga bazalwane betfu nabodzadze labanato, sitawukhona kubakhombisa umusa. Nasi sibonelo, kungenteka kunadzadze logula kakhulu. Akakhulumi ngako, kodvwa mhlawumbe angajabula  nakungaba nalotsitse longamsita. Uyakhona yini kunakekela umndeni wakhe? Singakhona yini kumsita ngekumphekela kudla nobe ngekumhlantela indlu? Nobe, asesitsi kunemzalwane lophelelwe ngumsebenti. Singamupha imadlana, mhlawumbe singamtjeli kutsi ibuya kitsi, lengamsita aze atfole lomunye umsebenti.

13-14. Singakhombisa njani kutsi siyephana njengaJehova?

¹³ Jehova uyephana. (Mat. 5:45) Kufanele singagadzi kutsi bazalwane betfu bacele lusito ngaphambi kwekutsi sibakhombise umusa. NjengaJehova, singabasita ngisho bangakasiceli. Wenta kutsi lilanga liphume onkhe malanga nanobe singakaliceli. Lisita bonkhe bantfu, ngisho nalabo labangabongi. Jehova ukhombisa kutsi uyasitsandza ngekutsi asiphe tintfo lesitidzingako. Simtsandza kakhulu Jehova ngobe unemusa futsi uyephana!

¹⁴ Bazalwane betfu nabodzadze, balingisa Jehova ngekutsi baphe labanye. Nasi sibonelo, nga-2013, siphepho lesinemandla lokutsiwa nguHaiyan senta umonakalo lomkhulu ePhilippines. Bazalwane nabodzadze labanyenti balahlekelwa ngemakhaya abo netintfo tabo. Kodvwa bazalwane nabodzadze emhlabeni wonkhe babasita ngekushesha. Labanyenti banikela ngemali yabo, kantsi labanye basita ekwakheni kabusha emakhaya langaba ngu-750 kungakapheli nemnyaka! Ngesikhatsi se-COVID-19, boFakazi basebente kamatima kuze basite bazalwane babo nabodzadze. Sikhombisa kutsi siyabatsandza bazalwane nabodzadze nangabe sishesha kubasita.

15-16. Ngekusho kwaLukha 6:36, nguyiphi indlela lebaluleke kakhulu lesingamlingisa ngayo Babe wetfu wasezulwini?

¹⁵ Jehova unesihawu futsi uyatsetselela. (Fundza Lukha 6:36.) Sibona onkhe malanga kutsi Babe wetfu wasezulwini unesihawu. (Hla. 103:10-14) Balandzeli baJesu bebawenta emaphutsa, kodvwa wabakhombisa sihawu futsi wabatsetselela. Jesu bekakulungele ngisho nekunikela ngekuphila kwakhe kuze sitsetselelwe tono tetfu. (1 Joh. 2:1, 2) Kutsetselela kanye nekuba nesihawu kwaJehova naJesu, kusenta sisondzelane nabo.

¹⁶ Sisondzelana kakhulu nebazalwane nabodzadze nangabe ‘sitsetselela ngekukhululeka.’ (Ef. 4:32) Kuliciniso kutsi kutsetselela  labanye kungahle kube matima ngaletinye tikhatsi, kodvwa kufanele sichubeke sikwetama. Lomunye dzadze utsi wasitwa Sicongosekulindza lebesinesihloko lesitsi “Tsetselelanani Ngekukhululeka.” * Wabhala watsi: “Lesihloko singisite ngacondza kutsi kutsetselela labanye kungisita njani mine. Sachaza kutsi nawutsetselela labanye, akusho kutsi loku lokubi labakwentile bekukahle, nobe akukakuvisi buhlungu. Kodvwa nawubacolela ubese awusabatfukutseleli futsi uba nekuthula.” Nangabe sibatsetselela ngekukhululeka bazalwane betfu nabodzadze, sikhombisa kutsi siyabatsandza futsi silingisa Babe wetfu Jehova.

17. Ngekusho kwaMatewu 5:16 yini lesingayenta kuze sidvumise Babe wetfu wasezulwini?

¹⁷ Sibonga kakhulu ngekutsi sinemndeni webazalwane nabodzadze labasemhlabeni wonkhe futsi labatsandzanako. Sifuna kutsi bantfu labanyenti bakhonte Nkulunkulu wetfu kanye natsi. Sinaloko engcondvweni, asifuni kwenta intfo letawenta bantfu labanyenti bacabange lokubi ngebantfu baJehova nobe ngaBabe wetfu wasezulwini. Setama kutiphatsa ngendela letawenta kutsi bantfu batitsandze tindzaba letimnandzi.—Fundza Matewu 5:16.

18. Yini lengasisita kutsi sishumayele ngesibindzi?

¹⁸ Ngaletinye tikhatsi, kungenteka labanye basibukele phansi nobe basiphatse kabi ngobe silalela Babe wetfu wasezulwini. Nasicocela labanye ngaloko lesikukholelwako, yini lesingayenta nangabe sesaba? Singaciniseka kutsi Jehova kanye neNdvodzana yakhe batasisita. Jesu watjela bafundzi bakhe kutsi bangakhatsateki ngekutsi batawukhuluma kanjani nobe batsini. Kungani? Watsi: “Loko leniyawukusho niyawunikwa kona ngaleso sikhatsi, ngobe akusini leniyawukhuluma, kodvwa ngumoya waBabe wenu lotanisita kutsi nikhulume.”—Mat. 10:19, 20.

19. Niketa sibonelo salotsite lowashumayela ngesibindzi.

¹⁹ Cabanga ngesibonelo saRobert. Esikhatsini  lesendlulile, nakasandza kucala kudadisha liBhayibheli, ete nelwati lolunyenti ngalo, kwadzingeka aye enkantolo eSouth Africa futsi wachazela lijaji kutsi kungani angeke abe lisotja. Ngesibindzi, wachazela inkantolo kutsi bekangafuni kungenela tepolitiki ngobe bekabatsandza banakabo labangemaKhristu. Bekabonga ngekutsi ulilunga lemndeni waNkulunkulu! Lelijaji lambuta latsi: “Bobani labanakenu?” Robert bekangakawulindzeli lombuto, kodvwa ngekushesha wakhumbula umbhalo welusuku wangalelo langa. BekunguMatewu 12:50 lotsi: “Nobe ngubani lowenta intsandvo yaBabe losezulwini nguye longumnaketfu, dzadzewetfu kanye namake.” Nanobe Robert bekasandza kucala kudadisha liBhayibheli, umoya longcwele waJehova wamsita kuze akwati kuphendvula lombuto kanye naleminye lebekangakayilindzeli. Jehova wajabula ngaRobert! Jehova uyajabula nangatsi nangabe setsembela kuye kuze sibe nesibindzi sekushumayela ngisho sibhekene nesimo lesimatima.

20. Yini lokufanele sitimisele kuyenta? (Johane 17:11, 15)

²⁰ Shengatsi singachubeka sisitsatsa njengalesibalulekile sibusiso sekuba lilunga lemndeni waNkulunkulu lonelutsandvo. SinaBabe loncono kakhulu kanye nebazalwane nabodzadze labasitsandzako. Kufanele singakutsatseli phasi loku. Sathane nebalandzeli bakhe lababi betama kusenta singabate kutsi Babe wetfu wasezulwini uyasitsandza futsi betama kucedza bunye lesinabo. Nanobe kunjalo, Jesu wasithantazela, wacela Babe wetfu kutsi asivikele kuze sihlale simunye. (Fundza Johane 17:11, 15.) Jehova uyawuphendvula lomthantazo. NjengaJesu, shengatsi singahlala siciniseka kutsi Babe wetfu wasezulwini uyasitsandza futsi utasisita. Shengatsi singatimisela kuchubeka sisondzelana nebazalwane betfu nabodzadze.