1. Se kar mlu u uumace mba jighjigh vea Yehova la sha nyi?

YESU u a lu “waniunda ken akaa a i gbe a cii” la kpa ngu ken tsombor u mbacivir Yehova, kua ikpela i mbatyomov. (Kol. 1:15; Ps. 103:20) Shighe u Yesu lu shin tar la, yange tese ér uumace mba jighjigh kpa vea fatyô u nengen Yehova ér ngu Ter ve. Zum u Yesu lu lamen a mbahenen nav yô, a kaa ér Yehova ka “Terem man Ter wen.” (Yoh. 20:17) Shi ka sea tsegha ayol a ase sha ci u Yehova a er se batisema yô, se hingir anmgbianev mba nomso man mba kasev ken tsombor u se doo ayol a ase yô.—Mar. 10:29, 30.

2. Ka nyi se lu timen sha mi ken ngeren nee?

² Ka i taver mbagenev u nengen Yehova ér ngu Ter ve, u ve doo un ishima yô. Alaghga mbagenev fa er vea tese anmgbianev vev mba nomso man mba kasev dooshima ga. Se lu timen sha gbenda u Yesu a wase se u nengen Yehova ér ka Ter wase u se doo un ishima, u se fatyô u kporom ikyua a na la ken ngeren ne. Shi se hen er se fatyô u dondon Yehova sha u tesen anmgbianev asev mba nomso man mba kasev dooshima la kpaa.

3. Msen u Ter wase la na se hemba kporom a Yehova nena?

³ Yehova ka Ter u se doo un ishima yô. Yesu soo ér se nengen Yehova er un Yesu kpa un nengen un la—ér ngu ormaren u se fatyô u lamen a na hanma shighe cii, u a taver kwagh shi a we se atindi kpete kpete ga yô. Se nenge a kwagh ne sha gbenda u Yesu yange tese mbahenen nav u eren msen la. Yange hii msen u Ter wase la sha mkaanem man, ér: “Ter wase.” (Mat. 6:9) Yesu yange una soo yô ma kaa ér se yilan Yehova ser “Uageegh,” shin “Orgban,” gayô “Tor u tsôron” kpa ma lu sha  mi, sha ci u Bibilo kpa yila Yehova sha atiatom ne. (Gen. 49:25; Yes. 40:28; 1 Tim. 1:17) Nahan kpa, Yesu kaa ér se yilan Yehova ser “Ter.”

4. Er nan ve se fe ser Yehova soo ér se kporom hen a naa?

⁴ Ka i taver we u nengen Yehova wer ngu Ter u ú doo un ishima yôô? Ka i taver se mbagen. Aluer ter wase yange una tesen se dooshima ga yô, alaghga a taver se u henen ser ter ngu u se doo un ishima yô. Kpa se zua a ishimasurun kpishi er se fe ser Yehova fa er i lu se nahan yô, man ityôkyaa i i ne ve i lu se nahan la kpaa! A soo u lun a vese kôôsôô. Sha nahan yô, Mkaanem nam kaa a vese ér: “Kporom nen hen Aôndo, nahan un kpa una kporom hen a ven.” (Yak. 4:8) Se doo Yehova ishima, nahan a kaa ér una lu Ter wase u hemban doon cii.

5. Luka 10:22 tese ér Yesu una fatyô u wasen se u kporon hen Yehova nena?

⁵ Yesu una fatyô u wasen se u kporom ikyua a Yehova. Yesu fa Yehova tsembelee shi ngu a aeren a Yehova kpa a lu a mi la vough, je yô a kaa ér: “Or u nan nenge a mo yô, nan nenge a Ter kpaa.” (Yoh. 14:9) Yesu ka anmgbian wase u vesen, nahan a tese se u nan Ter wase icivir shi ungwan imo na, man er se vihi Un ishima ga yô, kua kwagh u se er ve Una lumun se la kpaa. Kpa shighe u Yesu lu shin tar la, yange hemba wasen se u nengen er se doo Yehova ishima shi a eren a vese kundu kundu yô. (Ôr Luka 10:22.) De se nenge nen akav agen.

6. Ôr akav a tesen er Yehova yange a kegh ato a Yesu yô.

⁶ Yehova keghen ato a mbayev nav. Hen ase sha gbenda u Yehova yange keghen ato a Waniunda na la. Mbamsen mba Yesu lu shin tar ve er acin imôngo la kpa, Yehova yange ungwa ve je ka u henen a hen ga. (Luka 5:16) Yange ungwa msen u Yesu cii ve tsua kwagh u vesen, u er shighe u tsua mbaapostoli mba 12 la nahan. (Luka 6:12, 13) Shighe u ishima za Yesu iyol tsung la kpa Yehova ungwa msen na. Cii man i nenge Yesu mker yô, yange er msen hen Ter na a ishima i môm, gadia gba u una tagher a imeen i taver tsung. Yehova yange ungwa msen u Yesu er la, shi tindi ortyom ér a za taver Wan na u môm môm la ishima.—Luka 22:41-44.

7. Er u fe wer Yehova ongo mbamsen asev nahan, ka u ken ishima nena?

 ⁷ Nyian kpa, Yehova ongo mbamsen asev, shi ngu a er kwagh u se sen un la sha shighe vough man sha gbenda u hemban doon cii. (Ps. 116:1, 2) Nenge ase er anmgbian u kwase ugen ken tar u India yange nenge er Yehova ungwa msen na yô. Yange lu nôngon a angev mbu ishimanyian, nahan a sôn Yehova kpoghuloo sha ikyaa ne. A kaa ér: “Porogeram u sha Ityôgh ki Televishen ki Mbashiada mba Yehova u Mei 2019 sha kwagh u gbenda u se fatyô u wan ishima a ishimanyian la yange doom je ikighir lu ga. Lu msen wam je Yehova ungwa la.”

8. Ka sha igbenda i nyi nahan Yehova yange tese Yesu dooshima?

⁸ Se doo Yehova ishima shi we se ikyo kpaa, vough er Yesu yange doo un ishima shi wa un ikyo shighe u lu shin tar la nahan. (Yoh. 5:20) Yange wase Yesu seer taver jighjigh u nan na, shi taver un ishima shighe u lu yan ican la, shi na Yesu akaa a gba u una lu a mi ve una lu uma la cii. Shi Yehova yange pase Wan na ér a doo un ishima shi Un lumun un kpaa. (Mat. 3:16, 17) Yesu yange fa ér Ter na u sha, u un doo Un ishima la una lu a na hanma shighe cii, nahan shighe môm kpa nenge ér un ngu tswen ga.—Yoh. 8:16.

9. Ka nyi i tese ér se doo Yehova ishima?

⁹ Se cii Yehova tese se dooshima sha igbenda kpishi, er Yesu nahan. Hen ase sha kwagh ne: Yehova lumun ér se lu azende a na shi a na se anmgbianev mba nomso man mba kasev kpishi mba se doo ve ishima, ve ne se msaanyol shi ve taver se ishima shighe u se lu ken ican yô. (Yoh. 6:44) Yehova shi ka a na se hanma kwagh u una na jighjigh u nan wase una seer taver yô. Shi ka a wase se u zuan a akaa a na se lu uma la kpaa. (Mat. 6:31, 32) Ka sea hen er se doo Yehova ishima la yô, un kpa a seer doon se ishima.

10. Se hen nyi sha gbenda u anmgbianev asev ve doo Yehova ishima laa?

¹⁰ Anmgbianev asev doo Yehova ishima. Kpa ka hanma shighe cii se soon ve shi se tesen ve ser ve doo se ishima ga. Ashighe agen ka i taver se u tesen ve dooshima, sha ci u se due sha ajiir kposo kposo, shi i yese se ken mbamlu kposo kposo kpaa. Shi se cii ka se tsume, nahan se er akaa a na ishima a vihi mbagenev yô. Kpa se cii se nôngo sha afatyô wase, se tese anmgbianev asev dooshima. Se er kwagh ne nena? Se er kwagh ne sha u dondon ikyav i Ter wase, nahan tesen anmgbianev asev dooshima. (Ef. 5:1, 2; 1 Yoh. 4:19) De se nenge kwagh u se fatyô u henen ken ikyav i Yehova a ver la.

11. Yesu yange lu a “mhôônom ma zungwen” er Yehova nahan nena?

¹¹ Yehova tesen “mhôônom ma zungwen.” (Luka 1:78) Shighe u or u zungwen mhôônom nan nenge mbagenev ve lu yan ican yô, ishima ka i vihi nan; nahan nan ker u wasen shi surun ve ishima. Gbenda u Yesu yange eren kwagh a ior la tese ér ior doo un ishima vough er Yehova nahan. (Yoh. 5:19) Sha shighe ugen la, Yesu nenge a ikpelaior nahan “kunya kôr un a ve, sha ci u i nzughul a ve i kende, er iyôngo i i lu a or u kuran i ga nahan.” (Mat. 9:36) Yesu yange er kwagh u tesen ér ve doo un ishima, a er kwagh u wasen ve. Yange bee mba ve lu uange la iangev shi er kwagh u wasen mba ve “lu yan ican shi [ve] tôô ikyav mbi yuhwan la.”—Mat. 11:28-30; 14:14.

12. Tese ikyav er se fatyô u zungwen ma anmgbian mhôônom yô.

¹² Aluer se fa mbamtaver mba anmgbianev  asev mba nomso man mba kasev ve lu tagher a mi yô, se hemba tesen ve mhôônom ma zungwen. U tesen ikyav yô, alaghga anmgbian u kwase nana lu yan ican a angev mbu vesen. Kpa nan ôron ior kwagh sha mi ga, nahan cii kpa, aluer or na nan iwasen yô, a doo nan kpishi. Nan ngu nengen sha tsombor u nan nena? Se fatyô u yôron sha ci u nan shin esen nan iyou kpa? Shin adooga anmgbian u nomso nana kera lu a tom ga. Se fatyô u nan nan iyua i akuma akuma sha inyar a u pasen nan ser ka se se lu nan nan ki ga, sha er kia wase nan zan zan nana kar zuan a tom ugen kpa?

13-14. Se er nan ve se wa nagh er Yehova nahana?

¹³ Yehova wa nagh. (Mat. 5:45) Gba u se kegh zan zan anmgbian u nomso shin u kwase nana pine iwasen ve se tese nan dooshima ga. Kpa se fatyô u karen a ishima yase nan ve iwasen, er Yehova nahan. Hanma iyange yô, ka a er iyange na i ta sha a vese a u se pinen un shio! Iyange ngi a iwasen hen hanma or, ka mba ve lu a ishughun la tseegh ga. U lumun wer, ka er se doo Yehova ishima ve a ne se akaa a kwagh a gbe se a mi la ga he? Yehova doo se ishima kpishi, sha ci u zungu se mhôônom shi a wa nagh!

¹⁴ Anmgbianev asev kpishi wa nagh er Yehova nahan, ka ve na mbagenev akaa mgbeghaa je. U tesen ikyav yô, ken inyom i 2013 la, Ijeverahumbe igen i i yer ér Haiyan yô, vihi akaa kpishi ken tar u Philippines. Akaa a anmgbianev kpishi saa ishe, kua uya vev. Kpa anmgbianev vev sha tar cii na ve iwasen shi sue ve a atimbir shio. Mba kpishiv na inyaregh shin wase u sôron shin hiden maan ayou a he, je nôngo u kuman ayou 750 cii ve kuma inyom i môm ye! Sha shighe u bouange u KORONA la, Mbashiada er tom kpoghuloo sha u wasen anmgbianev vev. Ka sea ngôôr u wasen anmgbianev asev mba nomso man mba kasev ga yô, se tese ve ser ve doo se ishima.

15-16. Ka nyi i ôr ken Luka 6:36 ér se er ve, se lu dondon ikyav i Ter wasa?

¹⁵ Yehova zungu mhôônom shi den kwaghbo. (Ôr Luka 6:36.) Ter wase u sha la zungu se mhôônom hanma iyange. (Ps. 103:10-14) Mbahenen mba Yesu yange ve lu a mbamyen vev; nahan kpa zungwen ve mhôônom  shi deen ve kwaghbo. Je yô yange lumun u nan nagh sha uma na sha er a de se a asorabo yô. (1 Yoh. 2:1, 2) Yehova man Yesu mba zungu mhôônom shi mba den kwaghbo, nahan kwagh ve hemba doon we ga zee?

¹⁶ Ka sea ‘deen mbagenev kwaghbo sha mimi’ yô, dooshima wase la a hemba taver cii. (Ef. 4:32) Nahan kpa, ashighe agen ka i taver u den mbagenev kwaghbo, nahan gba u se hen u den mbagenev kwaghbo. Anmgbian u kwase ugen nenge ér, ngeren u ken Iyoukura u a lu a itinekwagh ér “Deen Nen Ayol a En Kwaghbo” la yange wase un u eren kwagh ne *. A kaa ér: “Ngeren ne wasem u kaven er aluer m de mbagenev kwaghbo ve me zua a mtsera yô. Ngeren la kaa ér ka sea kegh iyol u den mbagenev kwaghbo je kpa, tese ér se lumun a ieren i bo la shin i za se iyol ga ze. Kpa ka sea de mbagenev kwaghbo ve yô, ishima i kera vihi se a ve ga, nahan se za hemen u lun a bemshima.” Ka sea de anmgbianev asev kwaghbo sha mimi yô, se tese ser ve doo se ishima shi se lu dondon ikyav i Ter wase Yehova.

17. Mateu 5:16 tese ér se er nan ve se na Ter wase u Sha la iciviri?

¹⁷ Doo se kpishi er se lu a anmgbianev mba nomso man mba kasev sha tar cii, mba ve doo ayol a ve yô. Se soo ser ior kpishi ma ve kohol se ken mcivir u Aôndo wase ne. Sha nahan yô, mayange se er nen kwagh u una vihi iti i Yehova kua ior nav ga. Ka se nôngo u eren kwagh u vough sha er ior vea nenge nahan vea soo u henen kwagh u Yehova shi civir un yô.—Ôr Mateu 5:16.

18. Ka nyi ia wase se ve se pase kwagh a mciem shio?

¹⁸ Ashighe agen ior vea laha se, shin vea tôv se a ican sha ci u se mba ungwan imo i Ter wase u sha la. Aluer cier se iyol shighe u se lu lamen a mbagenev sha akaa a se ne jighjigh a mi la yô se er nyi? Se mba a vangertiôr ser Yehova man Wan na vea fatyô u wasen se. Yesu yange kaa a mbahenen nav ér, ishima i de nyian ve sha kwagh u vea ôr man er vea ôr kwagh shon kpaa ga. Sha ci u nyi? Yesu kaa ér: “Hen shighe la je, a na ne kwagh u ne ôr yô.  Sha ci u ka ne ne lamen ga, kpa ka sha iwasen i jijingi u Ter wen u a lu sha la ne lamen ye.”—Mat. 10:19, 20.

19. Tese ikyav i or u yange nan pase kwagh a mciem shio yô.

¹⁹ Hen ase sha ikyav i Robert ne. Shighe u lu henen a hen Bibilo la, lu a mfe u Bibilo kpuaa tseegh, man gba u una za ken atejir shin tar u South Africa una za pase jôôji ityôkyaa i na ve lu u una nyôr shoja ga yô. Yange pase koti wang ér, un soo u nyôron shoja ga sha ci u anmgbianev nav mba ken Kristu doo un ishima. Ian i a lu a mi ken tsombor wase la gba un kwagh! Jôôji la maa pine un gagher ér, “Ka unô ve lu anmgbianev ou we?” Robert yange hen ér a pine un mpin la ga, kpa fese je a umbur ivur i sha iyange la. Ivur la lu Mateu 12:50. I̱ kaa ér: “Hanma or u nan eren ishima i Terem u a lu sha la cii yô, nan ngu anmgbian wam u nomso man anmgbian wam u kwase man ngôm.” Shin er Robert lu orhenen Bibilo u he nahan kpa, jijingi u Yehova wase un u nan mlumun sha mpin la, kua mbampin mbagen mba ver ishima ér a pine un ga la cii. Yange a doo Yehova a Robert je ka u henen a hen ga! Se kpa zum u se tagher a mbamtaver, kpa se suur sha Yehova ser a wase se se na mlumun a mciem shio yô, ka i doo un a vese kpishi.

20. Ka nyi i doo u se kange ishima u erene? (Yohane 17:11, 15)

²⁰ Yô, se za nen hemen u tesen ser, doo se kpishi u lun ken tsombor u u doo ayol a ve ne. Se mba a Ter u hemban cii, shi se mba a anmgbianev mba nomso man kasev mba se doo ve ishima tsung yô. Nahan gba kpee u hanma shighe yô, se tesen ser doo se er se lu ken tsombor ne yô. Satan man mbaaferev ka ve nôngo ér se hen ser se doo Ter wase u sha la ishima ga, shi ka ve nôngo ér vea vihi mzough wase la kpaa. Kpa Yesu yange er msen sha ci wase, sôn Ter wase ér a kura se sha er tsombor ne jimin cii ua lu gungur môm her yô. (Ôr Yohane 17:11, 15.) Yehova ngu kuran se er Yesu sôn nahan. Mayange je se hen ser se doo Ter wase u sha la ishima ga, shi wasen se ga ze, er Yesu kpa er nahan. Se kange nen ishima u seer kporom ikyua a anmgbianev asev mba nomso man mba kasev.