1. Ncilongwe nzi ncobakonzya kuba ancico bantu basyomeka kuli Jehova?

MUKWASYI wabakombi ba Jehova ubikkilizya Jesu, “imutaanzi kuzyalwa kuzilenge zyoonse,” alimwi abangelo banji kapati. (Kol. 1:15; Int. 103:20) Ciindi Jesu naakali anyika, wakatondezya kuti bantu basyomeka balakonzya kubona Jehova kuti Mbaausyi. Naakali kubandika abasikwiiya bakwe, Jesu wakaamba Jehova kuti “Taata alimwi a Bauso.” (Joh. 20:17) Alimwi ciindi notwalyaaba kuli Jehova akubbapatizyigwa, tuba cibeela camukwasyi wabakwesu abacizyi basiluyando.—Mk. 10:29, 30.

2. Ino ncinzi ncotutiilange-lange mucibalo eeci?

² Bamwi cilabayumina kubona Jehova kuti ngu Taata siluyando. Bamwi ambweni tabazyi mbobakonzya kulutondezya luyando kubakwesu abacizyi. Mucibalo eeci, tulabona Jesu mbwatugwasya kubona Jehova kuti ngu Taateesu siluyando, walo ngotukonzya kuba acilongwe anguwe. Alimwi tulabona mbotukonzya kumwiiya Jehova kujatikizya mbotweelede kubeendelezya bakwesu abacizyi.

3. Mbuti mupailo wacikozyanyo mboutupa kuba acilongwe a Jehova?

³ Jehova ngu Taata siluyando. Jesu uyanda kuti katubona Jehova kuti muzyali siluzyalo alimwi siluyando ngotukonzya kubandika limwi ciindi cili coonse, kutali yooyo uutwaambila buyo cakucita. Eeci cilalibonya kweelana a Jesu ncaakayiisya basikwiiya bakwe kuti kabapailila. Wakatalika mupailo wakwe wacikozyanyo amajwi aakuti: “Taateesu.” (Mt. 6:9) Jesu naakatwaambila kwiita Jehova kuti “Singuzuzyoonse,” “Mulengi,” naa “Mwami walyoonse alyoonse,” mazina woonse ayelela alimwi aamu Magwalo. (Matl. 49:25; Is. 40:28; 1Tim. 1:17) Muciindi  caboobo, Jesu wakabelesya bbala lyaluyando lyakuti “Taata.”

4. Ino tuzyi buti kuti Jehova uyanda kuti tube acilongwe anguwe?

⁴ Sena cilamukatazya kubona Jehova kuti ngu Taata siluyando? Tobamwi cilatukatazya. Ambweni muzeezo wakuba amuzyali siluyando inga watukatazya kumvwisya akaambo kakuti twakakomezyegwa amuzyali silunya. Eelo kaka cilaumbulizya kuzyiba kuti Jehova ulamvwisya kapati mbotulimvwa! Uyanda kuba acilongwe andiswe. Nkakaambo kaako Jwi lyakwe lutukulwaizya kuti: “Amuswene kuli Leza, eelyo awalo ulaswena kulindinywe.” (Jak. 4:8) Jehova ulatuyanda alimwi ulilyaabide kuba Taata iwiinda kubota.

5. Kweelana alugwalo lwa Luka 10:22, mbuti Jesu mbwatugwasya kuba acilongwe ciyumu a Jehova?

⁵ Jesu ulakonzya kutugwasya kuba acilongwe ciyumu kapati a Jehova. Jesu ulimuzyi kabotu-kabotu Jehova alimwi ulabutondezya bube bwakwe cakulondoka, nkakaambo kaako wakaamba kuti: “Kufwumbwa ooyo wandibona wamubona awalo Taata.” (Joh. 14:9) Mbubwenya mbuli mupati wesu, Jesu ulatuyiisya mbotweelede kumulemeka alimwi akumumvwida Taateesu, mbotukonzya kweeleba kumunyemya alimwi ambotukonzya kukkomaninwa anguwe. Pele buumi bwa Jesu bwaanyika butondezya kapati Jehova mbwali siluzyalo alimwi siluyando. (Amubale Luka 10:22.) Atubone zikozyanyo zimwi.

6. Amupe zikozyanyo izitondezya kuti Jehova wakamuswiilila Jesu.

⁶ Jehova ulabaswiilila bana bakwe. Amubone Jehova mbwaakamuswiilila Mwanaakwe mutaanzi kuzyalwa. Cakutadooneka, Jehova wakaiswiilila mipailo minji njaakapaila Mwanaakwe ciindi naakali anyika. (Lk. 5:16) Wakamuswiilila Jesu kapaila kujatikizya kusala kuyandika kapati, mbuli ciindi naakali kusala baapostolo bakwe ibali 12. (Lk. 6:12, 13) Alimwi Jehova wakamuswiilila Jesu kapaila ciindi naakali mumapenzi. Katanaabwa, Jesu wakapaila kuli Bausyi kujatikizya zintu izyakali aafwaafwi kumucitikila. Jehova tanaakauswiilila buyo mupailo wa Jesu, pele alimwi  wakatuma mungelo kuzoomuyumya-yumya Mwanaakwe uuyandwa.—Lk. 22:41-44.

7. Mbuti mbotweelede kulimvwa kuzyiba kuti Jehova ulayiingula mipailo yesu?

⁷ Mazuba aano, Jehova wazumanana kuswiilila mipailo yababelesi bakwe, kuyiingula aciindi ceelede alimwi munzila ziinda kubota. (Int. 116:1, 2) Mucizyi ku India wakabona Jehova mbwaakaingula mipailo yakwe. Wakali kuciswa bulwazi bwakulibilika kapati, alimwi wakali kupaila kuli Jehova lyoonse kujatikizya penzi eeli. Wakalemba kuti: “Pulogilamu ya JW Broadcasting^® yamu May 2019 iijatikizya mbotukonzya kulwana penzi lyakulibilika, yakasika aciindi ceelede. Bwakali bwiinguzi bwamipailo yangu.”

8. Muunzila nzi Jehova mwaakatondezya luyando kuli Jesu?

⁸ Jehova ulatuyanda akutulanganya, mbubwenya mbwaakali kumuyanda Jesu akumulanganya mubuumi bwakwe boonse bwaanyika. (Joh. 5:20) Wakamugwasya Jesu kuyumya lusyomo lwakwe, wakamukulwaizya naakatyompedwe alimwi akumulanganya kumubili. Alimwi Jehova wakamwaambila Mwanaakwe kuti wakali kumuyanda akumukkomanina. (Mt. 3:16, 17) Akaambo kakuti lyoonse wakali kubasyoma Bausyi bakujulu basiluyando, Jesu kunyina naakali kulimvwa kuba alikke.—Joh. 8:16.

9. Ino tuzyi buti kuti Jehova ulatuyanda?

⁹ Mbubwenya mbuli Jesu, toonse twakazibona kale zitondezyo zyaluyando lwa Jehova. Amuyeeye buyo kaambo aaka: Jehova wakatupa coolwe cakuba balongwe bakwe alimwi wakatupa bakwesu abacizyi ibatupa kukkomana alimwi ibatuyumya ciindi notutyompedwe. (Joh. 6:44) Kuyungizya waawo, Jehova ulatupa zyoonse nzyotuyandika kutegwa tuzumanane kuyumya lusyomo lwesu. Mane buya ulatugwasya kujana zintu nzyotuyandika kumubili. (Mt. 6:31, 32) Ciindi notuyeeya luyando ndwajisi Jehova kulindiswe, luyando lwesu kulinguwe lulakomena.

10. Ncinzi ncotukonzya kwiiya kuli Jehova kweelana ambwabeendelezya bakwesu abacizyi?

¹⁰ Jehova ulabayanda bakwesu alimwi abacizyi. Pele talili lyoonse nocili cuuba-uba kubayanda alimwi akubatondezya kuti tulabayanda. Eeci cili boobo akaambo kakuti tuzwa muzilengwa ziindene-indene alimwi twakakomezyegwa mubukkale bwiindene-indene. Kuyungizyigwa waawo, toonse tulalubizya calo cikonzya kubanyemya akubatyompya bamwi. Nokuba boobo, tulazumanana kuuyanda mukwasyi wesu wakumuuya. Munzila nzi? Kwiinda mukwiiya Taateesu mukutondezya luyando kubakwesu abacizyi. (Ef. 5:1, 2; 1Joh. 4:19) Atubone ncotukonzya kwiiya kucikozyanyo ca Jehova.

11. Mbuti Jesu mbwaakatondezya kuti Jehova uli ‘amoyo waluzyalo’?

¹¹ Jehova ulatondezya ‘moyo waluzyalo.’ (Lk. 1:78) Muntu ulaaluzyalo ulabikkila maano ciindi nabona bantu bapengede; ulajana nzila yakubagwasya alimwi akubaumbulizya. Kweelana ambwaakali kubeendelezya bantu, Jesu wakatondezya mbwababikkila maano Jehova bantu. (Joh. 5:19) Aciindi cimwi, naakabona nkamu yabantu, Jesu “wakabeetelela nkaambo bakali kupenzyegwa alimwi bakalimwaikide mbuli mbelele zitakwe mweembezi.” (Mt. 9:36) Jesu tanaakalimvwa buyo kuti ulabayanda bantu aaba, pele wakacita cintu cimwi kutegwa abagwasye. Wakaponya baciswa alimwi akukatalusya baabo ‘ibakakatede akulemenwa.’—Mt. 11:28-30; 14:14.

12. Mbuti mbotukonzya kutondezya luzyalo kubakwesu abacizyi?

¹² Katutanatondezya luzyalo kubakwesu alimwi abacizyi, tweelede kuzyiba mapenzi ngobajisi.  Mucikozyanyo, mucizyi inga kajisi penzi lyakuciswa-ciswa. Kunyina natongooka kujatikizya penzi eelyo, pele inga wakkomana kapati kuti muntu umwi wamugwasya cacigaminina. Sena ulacikonzya kujanina mukwasyi wakwe zintu nzyouyandika kumubili? Sena inga wayanda kugwasyigwa kujika cakulya naa kusalazya muŋanda? Ambweni mukwesu wakalesyegwa mulimo. Tulakonzya kumupa mali naaceya, ambweni akutamwaambila buya kuti azwa kulindiswe kutegwa aligwasye kusikila akajane mulimo.

13-14. Mbuti mbotukonzya kuba baabi mbuli Jehova?

¹³ Jehova mwaabi. (Mt. 5:45) Tatweelede kulindila kuti mane bakwesu bakatulombe buya nkokuya tubagwasye. Mbubwenya mbuli Jehova, tulakonzya kubagwasya nokuba kuti tiibatulomba. Ulapasuzya zuba lyakwe kulindiswe abuzuba kakunyina kumulomba. Alimwi boonse balagwasyigwa azuba ikutali buyo baabo ibalumba. Kwiinda mukutupa zintu nzyotuyandika, Jehova ulatondezya kuti ulatuyanda. Eelo kaka tulamuyanda kapati Jehova nkaambo ngusiluzyalo alimwi mwaabi!

¹⁴ Kwiinda mukwiiya Taateesu wakujulu, bunji bwabakwesu abacizyi balatondezya bwaabi. Mucikozyanyo, mu 2013, mvwula mpati yaguwo litegwa Super Typhoon Haiyan ku Philippines yakanyonyoona kapati. Bakwesu abacizyi banji bakanyonyookelwa maanda alimwi azintu. Pele bakwesu abacizyi munyika yoonse bakabagwasya cakufwambaana. Banji bakasanga mali naa kugwasyilizya mukubambulula naa kuyaka, calo cakapa kuti kubambulululwe naa kuyakwe maanda aatandila ku 750 kautanakkwana mwaka! Lyabulwazi bwa COVID-19, Bakamboni bakabeleka canguzu kugwasyilizya bakwesu abacizyi. Ciindi notubweza ntaamu cakufwambaana kugwasyilizya bakwesu abacizyi, tutondezya kuti tulabayanda.

15-16. Kweelana alugwalo lwa Luka 6:36, ninzila nzi iiyandika kapati motukonzya kumwiiya Taateesu wakujulu?

¹⁵ Jehova ngusiluse alimwi ulalekelela. (Amubale Luka 6:36.) Abuzuba Taateesu wakujulu ulatulekelela. (Int. 103:10-14) Basikutobela Jesu tiibakalondokede; nokuba boobo, wakabatondezya luse alimwi akubalekelela. Mane buya wakalyaaba kwaaba buumi bwakwe  kutegwa zibi zyesu zilekelelwe. (1Joh. 2:1, 2) Sena tatukkomane kuba acilongwe a Jehova a Jesu akaambo kakuti mbaasiluse alimwi balalekelela?

¹⁶ Tulaciyumya caanzyo cesu caluyando mumukwasyi wesu wakumuuya ciindi ‘notulekelelana camoyo woonse.’ (Ef. 4:32) Pele zimwi ziindi kulekelela bamwi kulakonzya kukatazya, aboobo tweelede kubeleka canguzu. Mucizyi umwi wakalimvwa kuti cibalo camu Ngazi Yamulindizi cakuti “Kamulekelelana Camoyo Woonse” cakamugwasya kucita boobo. * Wakalemba kuti: “Cibalo eeci cakandigwasya kumvwisya kulekelela bamwi mbokukonzya kundigwasya. Cakaamba kuti kuyandisya kulekelela bamwi tacaambi kuti mweelede kukukkomanina kutalilemeka kabotu kwabo naa kucesya bubi buboola akaambo kakutalilemeka ooko. Pele kulekelela caamba kutabikkilila akaambo kakulubizya kulikoonse alimwi akuzumanana aluumuno lwanu.” Ciindi notubalekelela camoyo woonse bakwesu abacizyi, tutondezya kuti tulabayanda alimwi twiiya Taateesu wakujulu, Jehova.

17. Kweelana alugwalo lwa Matayo 5:16, mbuti mbotukonzya kumulemeka Taateesu wakujulu?

¹⁷ Ncoolwe cipati kuba mumukwasyi waluyando wanyika yoonse. Tuyanda kuti bantu banji kapati batusangane mukukomba Leza wesu. Aboobo tatweelede kucita cintu cili coonse icikonzya kupa bantu kuyeeya zintu zibyaabi kujatikizya bantu ba Jehova naa Taateesu wakujulu. Alimwi tulasoleka kulilemeka munzila iikonzya kukwelelezya bantu kumakani mabotu.—Amubale Matayo 5:16.

18. Ncinzi cikonzya kutugwasya kukambauka cakutayoowa?

¹⁸ Zimwi ziindi, bamwi balakonzya kutufwubaazya naa kutupenzya buya akaambo kakuti tumvwida Taateesu wakujulu. Mbuti kuti katuyoowa ciindi notubandika abantu kujatikizya nzyotusyoma? Tweelede kuba alusyomo lwakuti Jehova alimwi a Mwanaakwe banootugwasya. Jesu wakaambila basikwiiya bakwe  kuti tiibakeelede kulibilika kujatikizya nzyobakeelede kwaamba. Nkaambo nzi? Jesu wakaamba kuti: “Nkaambo nzyomweelede kwaamba muyoopegwa aciindi eeco, nkaambo tamuli ndinywe nomwaambaula, pele muuya wa Uso nguwaambaula kwiinda mulindinywe.”—Mt. 10:19, 20.

19. Amupe cikozyanyo camukwesu iwakapa bumboni cabusicamba.

¹⁹ Amubone cikozyanyo caba Robert. Kaindi kabacili basikwiiya Bbaibbele bapya alimwi kabajisi luzyibo lwamu Bbaibbele lusyoonto buyo, bakatolwa kunkuta yabasikalumamba ku South Africa. Cabusicamba, bakapandulula kunkuta kuti tiibakali kuyanda kuba sikalumamba akaambo kakuti balabayanda bakwesu Banakristo. Bakali kulumba akaambo kabusena mbobajisi mumukwasyi wesu wakumuuya. Cakufwambaana mubetesi wakabuzya kuti, “Ino bakwesu aabo mbaani?” Ba Robert kunyina nobakali kuuyeeyela mubuzyo ooyu, pele cakufwambaana lugwalo lwabuzuba oobo lwakaboola mumizeezo. Ndugwalo lwa Matayo 12:50 ilwaamba kuti: “Kufwumbwa uucita kuyanda kwa Taata uuli kujulu, ooyo ngomukwesu, ngomucizyi wangu alimwi mbabaama.” Nokuba kuti ba Robert bakali basikwiiya Bbaibbele bapya, muuya wa Jehova wakabagwasya kwiingula mubuzyo ooyo alimwi aimbi minji iyatakali kuyeeyelwa. Cakutadooneka, Jehova wakabakkomanina ba Robert! Andiswe ulatukkomanina ciindi notumusyoma kutegwa tupe bumboni cabusicamba mubukkale bukatazya.

20. Makanze nzi ngotweelede kuba angawo? (Johane 17:11, 15)

²⁰ Atuzumanane kucibikkila maano cilongezyo ncotujisi icakuzulilwa mumukwasyi wakumuuya waluyando. Tulijisi Taateesu iwiinda kubota alimwi abakwesu abacizyi banji balyaabide. Aboobo tatweelede kucuubya-ubya coolwe eeci. Saatani abantu bakwe babyaabi basola kutupa kudooneka luyando lwa Taateesu wakujulu alimwi akusola kunyonganya lukamantano ndotujisi. Nokuba boobo, Jesu wakatupailila, kulomba Taateesu kutukwabilila kutegwa mukwasyi wesu uzumanane kukamantana. (Amubale Johane 17:11, 15.) Jehova wazumanana kwiingula mupailo ooyo. Mbubwenya mbuli Jesu, tutasoli kudooneka luyando alimwi alugwasyo lwa Taateesu wakujulu siluyando. Atube amakanze aakuzumanana kuyumya cilongwe cesu amukwasyi wesu wakumuuya.