1. Bantu basyomeka bamwiita biyeni Jehova?

MPULI yabakombi baJehova iswaanizya Jesu, “imutaanzi kuzyalwa kuzilenge zyoonse” abangelo biingi loko. (Kol. 1:15; Int. 103:20) Jesu naakali aanyika, wakatondeezya kuti bantu basyomeka balakonzya kwiita Jehova kuti Taata. Naakali kwaambuula aabasikwiiya bakwe, Jesu wakaamba Jehova kuti ‘nguTaata alimwi a Bauso.’ (Joh. 20:17) Chiindi nitulipeda kuli Jehova akubbabbatizigwa, nga twaba mumpuli yabakwesu abachizi bali aaluyando.—Mk. 10:29, 30.

2. Tulalanga-langaanzi muchiiyo eechi?

² Bamwi kulabayumina kubona Jehova mbuli Taata wabo uuli aaluyando. Kulakonzeka kuti bamwi tabazi pe kuti nga balatondeezya biyeni kuti balabayanda bakombinyina. Muchiiyo eechi, tulabona Jesu mbaakatugwasya kuti tubone Jehova mbuli Taateesu uli aaluyando akuti kujana twaswena biyeni aafwiifwi aJehova. Alubo tulayiya mbutukonzya kutobelezya Jehova kwiinda munzila njitubajataayo bakombima.

3. Nkamboonzi nitukonzya kwaamba kuti Nkombyo yaMwaami ituswenzya aafwiifwi aJehova?

³ Jehova nguTaata uuli aaluyando. Jesu uyanda kuti tubone Jehova mbuli mbachita. Uyanda kuti tubone Jehova mbuli muzyali uuli aaluyando alubo waangunukide kutali kumubona mbuli muntu uutakwe ndaba aabantu alubo uuyanda kuti tuchite nzyayanda luzutu. Eezi tulazibona munzila Jesu njakayiisyaayo basikwiiya bakwe zintu nzibakeelede kukombela. MuNkombyo yaMwaami, Jesu wakasaanguna kwaamba majwi aakuti “Taateesu.” (Mt. 6:9) Jesu wakali kukonzya kutubuzya kuti twiite Jehova kuti “Singuzuzyoonse,” “Mulengi” naakuti “Mwami walyoonse alyoonse” nkaambo mazina woonse aaya  aakulemeka alajanika muBbayibbele. (Matl. 49:25; Is. 40:28; 1 Tim. 1:17) Pesi Jesu wakatubuzya kuti twiite Jehova kuti “Taata.”

4. Tuzizi biyeni kuti Jehova uyanda kuti tuswene aafwiifwi anguwe?

⁴ Kulakuyumina na kubona Jehova mbuli Taata uuli aaluyando? Bamwi kulabayumina nkaambo bamwi bakakomenena mumpuli iitakwe luyando. Zilawumbulizya kuziba kuti Jehova ulizi mbutulimvwa alubo uyanda kuti tuswene aafwiifwi anguwe. Nzizyo zipa kuti Jwi lyakwe litusungwaazye kuti: “Amuswene kuli Leza, eelyo awalo ulaswena kulindinywe.” (Jak. 4:8) Jehova ulatuyanda alubo nguTaateesu wiinda boonse.

5. Kweendelana alugwalo lwa Luka 10:22, Jesu utugwasya biyeni kuti tuswene aafwiifwi aJehova?

⁵ Jesu ulakonzya kutugwasya kuti tuswene aafwiifwi aJehova. Jesu umuzi kabotu Jehova alubo utondeezya buntu bwaWisi munzila iimaninide zyakuti wakaamba kuti: “Kufwumbwa ooyo wandibona wamubona awalo Taata.” (Joh. 14:9) Mbuli mukulana mbagwasya banike bakwe kuti balemeke bazyali, Jesu anguwe utuyiisya mbutukonzya kulemeka Taateesu akumuswiilila, mbutukonzya kuchita zintu zimubotezya azintu zipa kuti tutambulike kulinguwe. Jesu wakatondeezya kuti Jehova uli aaluzyalo akuti uli aaluyando ikapati chiindi nakali aanyika. (Bala Luka 10:22.) Lino atulange-lange zikozyano zitobela zitondeezya kuti Jehova uli aaluzyalo akuti uli aaluyando.

6. Amba zikozyano zitondeezya kuti Jehova wakali kumuswiilila Jesu chiindi naakali kukomba.

⁶ Jehova ulabaswiilila bana bakwe. Atubone mbaakazichita kuMwanaakwe mutaanzi. Jehova wakali kuziswiilila nkombyo zyaMwanaakwe chiindi naakali aanyika. (Lk. 5:16) Jehova wakamumvwa Jesu kakomba kulinguwe chiindi naakali kuyanda kusala kuchita zintu zipati mbuli mpaakali kuyanda kusala baapostolo bakwe bali 12. (Lk. 6:12, 13) Alubo Jehova wakamumvwa Jesu kakomba chiindi naakakataazikene. Muchikozyano, Jesu katanawuzigwa, wakakomba kuli Wisi atala asunko ndyakali kuzooswaana. Jehova wakayiswiilila nkombyo eeyo alubo wakatuma mungelo  kuti akasimye Mwanaakwe ngwayandisya.—Lk. 22:41-44.

7. Kuziba kuti Jehova ulaziswiilila nkombyo zyesu kupa kuti tumvwe biyeni?

⁷ Mazubaano, Jehova ulaziswiilila nkombyo zyabakombi bakwe alubo ulazisandula aachiindi cheelede alubo aachiindi chilikabotu. (Int. 116:1, 2) Atubone chikozyano chamuchizi uukkala kuIndia wakabona Jehova mbaakasandula nkombyo zyakwe. Muchizi ooyu wakali aapenzi lyakukataazikana. Wakakomba kuli Jehova kamubuzya zyoonse atala apenzi eelyo. Muchizi ooyu wakaamba kuti: “JW Broadcasting^® yamuMay 2019 yakali kwaambuula atala ambutukonzya kuzunda penzi lyakukataazikana yakasika aachiindi cheelede. Ndakabona kuti Jehova wakazisandula nkombyo zyangu.”

8. Jehova wakatondeezya biyeni kuti ulamuyanda Jesu?

⁸ Jehova ulatuyanda alubo ulaandaba andiswe mbuli mbaakachita kuli Jesu chiindi naakali aanyika. (Joh. 5:20) Wakagwasya Jesu muzintu zyabukombi, wakamusungwaazya chiindi naakakataazikene alubo wakamugwasya kuti ajane zintu ziyandikana zyakumubili. Alubo Jehova wakabuzya Mwanaakwe kuti ulamuyanda akuti nzyachita zilamubotezya. (Mt. 3:16, 17) Akaambo kakuti Jesu wakalizi kuti Wisi wakujulu ulaanguwe chiindi choonse akuti wakali kumugwasya, taakwe naakayeeya kuti ulaalikke pe.—Joh. 8:16.

9. Niinzi zitondeezya kuti Jehova ulatuyanda?

⁹ Mbuli Jesu, toonse tulikubona zintu zyiingi Jehova nzyatuchitila zitondeezya kuti ulatuyanda. Muchikozyano, Jehova wakatukweelela kulinguwe alubo wakatupa bakombima bali aaluyando, bajisini, batugwasya kuti tubotelwe alubo batuumbulizya chiindi nitukataazikene. (Joh. 6:44) Alubo Jehova ulikutupa chakulya chamubukombi chiingi chitugwasya kuti tukkale katuli aalusyomo lusimide. Alubo ulatugwasya kuti tujane ziyandikana zyakumubili buzuba abuzuba. (Mt. 6:31, 32) Kuti twayeeyesesya atala aJehova mbatuyanda, ziyoopa kuti tumuyande loko.

10. Kuziba kuti Jehova ulabayanda bakwesu abachizi kutuyiisyaanzi?

¹⁰ Jehova ulabayanda bakwesu abachizi. Pesi kulakonzya kutuyumina kuti tubayande bakombima nkambo twakakomezegwa munzila zisiyene alubo tuli aaziyanza zisiyene. Alubo toonse tulalubizya zyakuti tulakonzya kuchita zintu zinyemya bamwi. Nikuba boobo, tulakonzya kutondeezya kuti tulabayanda bakombima kwiinda mukutobelezya chikozyano chaTaateesu nkaambo ulabayanda bakwesu abachizi. (Ef. 5:1, 2;1 Joh. 4:19) Lino atubone nzitwiiya kuzwa kuchikozyano chaJehova.

11. Jesu wakatondeezya biyeni kuti uli ‘aamoyo waluzyalo’ mbuli Wisi?

¹¹ Jehova uli ‘aamoyo waluzyalo’ naakuti walweetelelo. (Lk. 1:78) Muntu uuli aalweetelelo ulakataazikana chiindi nabona bantu kabali kufwaba alubo uyanduula nzila zyakubagwasya akubawumbulizya. Jesu wakatobelezya chikozyano chaJehova chakweetelela bamwi kwiinda munzila njaakali kubajataayo bantu. (Joh. 5:19) Aali chimwi chiindi Jesu naakabona nkamu yabantu, “wakabeetelela nkaambo bakali kupenzyegwa alimwi bakalimwaikide mbuli mbelele zitakwe mweembezi.” (Mt. 9:36) Jesu taakamanina akubeetelela luzutu pesi wakachita chimwi chintu kuti abagwasye. Wakaponia bachiswa alubo wakagwasya bantu ‘bakakatede akulemenwa.’—Mt. 11:28-30; 14:14.

12. Kujana twatondeezya biyeni kuti tulabeetelela bakwesu abachizi?

¹² Kuti tukonzye kubeetelela bakwesu abachizi, tweelede kuziba buyumu-yumu mbubali kuswaananaabo. Muchikozyano, umwi muchizi ulakonzya kwaamba kuti ukkala kachiswa-chiswa.  Nikuba kuti tavuzyi kwaamba atala akuchiswa kwakwe, pesi ulakonzya kubotelwa kuti twamugwasya. Libuzye kuti, ‘Muchizi ooyu ulikukonzya na kugwasya mpuli yakwe kuti ijane ziyandikana zyakumubili? Tayandi na kugwasigwa aamilimu iili mbuli kujika akukkilina aang’anda?’ Amwi kuli mukwesu nguzi wakamaninwa aamulimu. Ulakonzya na kumweetelela kwiinda mukumupa kamali kutamubuzizye kuti kazwa kulaani naakuti kumugwasya aazimwi zintu kusikila wazoojana uumwi mulimu?

13-14. Kujana twatondeezya biyeni kuti tulapa mbuli Jehova?

¹³ Jehova ulapa. (Mt. 5:45) Kuti katuli bantu bali aalweetelelo, tatukoolindila kuti bakombima batukumbile lugwasyo pe pesi tuyootobelezya chikozyano chaJehova kwiinda mukubagwasya kabatatukumbide pe. Buzuba abuzuba, Jehova utugwisizya zuba lyakwe katutamukumbide pe. Alubo lilatumunikila toonse kuswaanizya abaabo batalumbi pe. Nisimpe kuti kutupa zintu nzituyanda nkwachita Jehova kutondeezya kuti ulatuyanda. Eezi zipa kuti andiswe tumuyande loko Jehova.

¹⁴ Bakwesu abachizi biingi batobelezya chikozyano chaJehova chakupa kwiinda mukugwasya bamwi. Muchikozyano, mu2013 kuPhilippines kwakaba guwo pati lili aamvula lyakanyonyoona zintu. Bakwesu abachizi biingi bakasweekelwa aazintu alubo maanda aabo akadilika. Bakombinyina bamunyika yoonse bakachijana-chijana kuti babagwasye. Biingi bakapa mali alubo bamwi bakagwasilizya mumulimu wakuyaka. Bakayaka akubambulula maanda asika ku750 munyaka kutanakkwana. Nikwakaba Corona, Bakamboni biingi bakabeleka changuzu kuti bagwasye bakombinyina. Kuti twafwambaana kugwasya bakombima banga bachitikilwa aapenzi ngatuli kutondeezya kuti tulabayanda.

15-16. Lugwalo lwa Luka 6:36 lutusungwaazya kuti tuchiteenzi?

¹⁵ Jehova uli aaluse alubo ulalekelela. (Bala Luka 6:36.) Buzuba abuzuba Taateesu ututondeezya luse alubo ulatulekelela. (Int. 103:10-14) Batobeli baJesu bakali kulubizya pesi wakali kubatondeezya luse alubo wakali kubalekelela. Alubo Jesu wakalipeda kupa buumi  bwakwe kuchitila kuti tulekelelwe zibi zyesu. (1 Joh. 2:1, 2) Kubona kuti Jehova aJesu batutondeezya luse akuti balatulekelela tazipi kuti tuswene aafwiifwi ambabo na?

¹⁶ Kuti twalekelelana “camoyo woonse” abakombima zilapa kuti tuyandane loko. (Ef. 4:32) Chimwi chiindi kulekelela bamwi kulakonzya kutuyumina, nkinkaako tweelede kubeleka changuzu. Chiiyo chiti, “Kamulekelelana Camoyo Woonse” chijanika muNgazi Yamulindizi chakagwasya umwi muchizi kuti alekelele bamwi amoyo woonse. * Muchizi ooyu wakaamba kuti: “Chiiyo eechi chakandigwasya kubona kuti kulekelela bamwi kulagwasya. Alubo chakaamba kuti kulekelela bamwi tazyaambi kuti nzibachita zilakubotezya naakuti tazikuchisi pe. Pesi kulekelela bamwi kukugwasya kuti utakkali kubanyemenede pe alubo kukugwasya kuti ube aaluumuno abamwi.” Kuti twalekelela bakombima amoyo woonse nga tulikutondeezya kuti tulabayanda akuti nga tulikutobelezya chikozyano chaTaateesu, Jehova.

17. Kweendelana alugwalo lwa Matayo 5:16, niinzi nzitweelede kuchita kuti Taateesu wakujulu alemekwe?

¹⁷ Nchilongezyo chipati kuba mumpuli yabakombi baJehova bamunyika yoonse bali aaluyando. Tuyanda kuti bantu biingi baze mumbunga yaJehova, nkinkaako tatweelede kuchita zintu zipa kuti bantu babe aamaboneno atali kabotu atala abakombi baJehova naakuti atala aTaateesu wakujulu. Pesi tweelede kulijata munzila iitape kuti bantu biingi bayande kwiiya atala aJehova akumukomba.—Bala Matayo 5:16.

18. Niinzi chikonzya kutugwasya kuti tukambawuke katutayoowi?

¹⁸ Bamwi balakonzya kutufubaazya naakuti kutupenzya akaambo kakuti tuswiilila Taateesu wakujulu. Niinzi nzukonzya kuchita kuti kuyoowa kubuzya bamwi atala azintu nzusyoma? Weelede kusyoma kuti Jehova aMwanaakwe balakugwasya. Jesu wakabuzya basikwiiya bakwe kuti batakataazikani atala akuti niinzi nzibayoowambuula kuti baba muchiimo chiyumu. Nkamboonzi nibakateelede kukataazikana? Nkaambo Jesu wakaamba kuti:  “Nzyomweelede kwaamba muyoopegwa aciindi eeco nkaambo tamuli ndinywe nomwaambaula, pele muuya wa Uso nguwaambaula kwiinda mulindinywe.”—Mt. 10:19, 20.

19. Amba chikozyano chawumwi wakatondeezya chibindi kwiinda mukukambawuka munkuta.

¹⁹ Atubone chikozyano chaRobert. Robert naakasaanguna-saanguna kwiiya Bbayibbele takwe zintu zyiingi pe nzyakazi atala aBbayibbele pesi wakaka kunjila mulimu wachisooja. Wakazootolwa kunkuta kuSouth Africa kuti akapandulule kuti nkamboonzi naakakaka kunjila mulimu wachisooja. Robert wakatondeezya chibindi kwiinda mukubuzya bamunkuta kuti taakali kuzoonjila pe mulimu wachisooja akaambo kakuti ulabayanda bakwesu bachiKristu. Wakakubona kakuyandikana kuba mumpuli yabakombi baJehova. Sikubeteka wakamubuzya kuti: “Mbaani bakwesu bako?” Robert taakali kuyeeyela pe kuti nga ulabuzigwa mubuzyo ooyu pesi wakafwambaana kuyeeya lugwalo lwabuzuba oobo lwa Matayo 12:50. Lugwalo oolu lwaamba kuti: “Kufwumbwa uucita kuyanda kwa Taata uuli kujulu, ooyo ngomukwesu, ngomucizyi wangu alimwi mbabaama.” Nikuba kuti Robert wakachili kusaanguna-saanguna kwiiya Bbayibbele pesi muuya uusalala wakamugwasya kuti asandule mubuzyo ooyo ayimwi njaakatali kuyeeyela. Zilaantanganana kuti Jehova wakabotelwa anzyaakachita Robert. Alubo Jehova ulabotelwa chiindi nitusyoma mulinguwe kuti atugwasye kuti tube aachibindi chakukambawuka chiindi nituli muzyiimo ziyumu.

20. Tweelede kukanza kuchitaanzi? (Johane 17:11, 15)

²⁰ Toonse atutondeezye kuti tulachilumba chilongezyo chakuba mumpuli yabakwesu abachizi bali aaluyando. Tuli aaTaata wiinda boonse alubo tuli aabakwesu abachizi biingi batuyanda. Nkinkaako, tweelede kuchilumba chilongezyo eechi nchitulaacho. Saatani abatobeli bakwe balikweezya kupa kuti tubonaanga Taateesu wakujulu tatuyandi pe alubo balikweezya kupa kuti tutajatani pe. Pesi Jesu wakatukombela kuli Wisi kuti atukwabilile kuchitila kuti tukkale katujisini. (Bala Johane 17:11, 15.) Jehova ulookwiisandula nkombyo eeyo. Mbuli Jesu, tatweelede kubonaanga Taateesu wakujulu taatuyandi pe akuti tayandi pe kutugwasya. Pesi toonse atukanze kubeleka changuzu kuti tuswene aafwiifwi abakombima alubo tubayande.