1. Hi byihi vuxaka lebyinene lebyi vanhu vo tshembeka va nga vaka na byona na Yehovha?

NDYANGU wa Yehovha wu katsa Yesu loyi a nga “mativula ya ntumbuluko hinkwawo” ni tintsumi ta tsandzavahlayi. (Kol. 1:15; Ps. 103:20) Loko Yesu a ha ri laha misaveni, u vule leswaku vanhu hinkwavo vo tshembeka va fanele va teka Yehovha tanihi Tata wa vona. Loko a vulavula ni vadyondzisiwa vakwe, Yesu u vule leswaku Yehovha i “Tata wa mina loyi a nga Tata wa n’wina.” (Yoh. 20:17) Loko hi tinyiketela eka Yehovha ivi hi khuvuriwa, hi sungula ku va endyangwini wakwe lowu nga ni vamakwerhu lava nga ni rirhandzu.—Mar. 10:29, 30.

2. Hi ta bula hi yini eka nhlokomhaka leyi?

² Van’wana swa va tikela ku teka Yehovha tanihi Tata wa vona loyi a nga ni rirhandzu. Nakambe van’wana swi nga ha va tikela ku kombisa vamakwerhu rirhandzu. Eka nhlokomhaka leyi, hi ta bula hi ndlela leyi Yesu a hi pfuneke hayona leswaku hi teka Yehovha tanihi Tatana loyi a nga ni rirhandzu loyi hi nga tshinelaka eka yena. Hi ta tlhela hi bula hi tindlela leti hi nga n’wi tekelelaka hatona Yehovha loko swi ta eka ndlela leyi hi va khomaka hayona vamakwerhu.

3. Ndlela leyi Yesu a dyondziseke vadyondzisiwa vakwe ku khongela hayona, yi hi pfuna njhani leswaku hi tshinela eka Yehovha?

³ Yehovha i Tatana loyi a nga ni rirhandzu. Yesu u lava hi teka Yehovha hi ndlela leyi a n’wi tekaka hayona ku nga mutswari loyi a nga ni rirhandzu loyi swi olovaka ku vulavula na yena, ku nga ri nghala leyi chavisaka. Leswi hi swi vona hi xikhongelo lexi Yesu a xi dyondziseke vadyondzisiwa vakwe. U sungule xikhongelo  xexo hi marito lama nge: “Tata wa hina.” (Mat. 6:9) Yesu a a ta va a hi byele leswaku hi fanele hi vitana Yehovha hi ku, “Lowa Matimba Hinkwawo,” “Mutumbuluxi” kumbe “Hosi ya hilaha ku nga heriki,” ku nga leswi faneleke naswona swi kumekaka eMatsalweni. (Gen. 49:25; Esa. 40:28; 1 Tim. 1:17) Ku hambana ni sweswo, u hi byele leswaku hi fanele hi vitana Yehovha hi ku: “Tatana.”

4. Hi swi tiva njhani leswaku Yehovha u lava hi tshinela eka yena?

⁴ Xana swa ku tikela ku teka Yehovha tanihi Tatana loyi a nga ni rirhandzu? Van’wana va hina swi nga ha va swi tika. Swi nga ha hi tikela ku teka Yehovha tanihi Tatana loyi a nga ni rirhandzu hikwalaho ka ndlela yo vava leyi hi kurisiweke hayona. Kambe swa chavelela ku tiva leswaku Yehovha wa yi twisisa ndlela leyi hi titwaka hayona! U lava ku tshinela eka hina. Hi yona mhaka Rito rakwe ri hi khutazaka leswi: “Tshinelani eka Xikwembu, kutani xi ta tshinela eka n’wina.” (Yak. 4:8) Yehovha wa hi rhandza naswona u lava ku va Tatana wa hina loyi a nga ni rirhandzu.

5. Hi ku ya hi Luka 10:22, Yesu a nga hi pfuna njhani leswaku hi tshinela eka Yehovha?

⁵ Yesu a nga hi pfuna leswaku hi tshinela eka Yehovha. Yesu u n’wi tiva kahle Yehovha naswona wa n’wi tekelela, lerova u kale a ku: “Loyi a ndzi voneke u vone na Tatana.” (Yoh. 14:9) Ku fana ni buti wa hina lonkulu, Yesu u hi dyondzisa ku xixima ni ku yingisa Tata wa hina, ku papalata ku N’wi kwatisa ni ndlela leyi hi nga N’wi tsakisaka hayona. Nakambe ndlela leyi Yesu a hanyeke hayona laha misaveni, yi kombisa rirhandzu ni musa wa Yehovha. (Hlaya Luka 10:22.) A hi buleni hi swikombiso swin’wana.

6. Nyika xikombiso xa ndlela leyi Yehovha a yingiseke Yesu hayona.

⁶Yehovha wa va yingisa vana vakwe. Xiya ndlela leyi Yehovha a n’wi yingiseke hayona n’wana wakwe wa mativula. Yehovha u yingise n’wana wakwe wa mativula loko a ha ri laha misaveni. (Luka 5:16) U yingise xikhongelo xakwe xo hlawula vaapostola va 12. (Luka 6:12, 13) Nakambe u tlhele a yingisa xikhongelo xakwe loko a tshikilelekile. Loko Yudasi a nga se n’wi xavisa, u khongele swinene eka Tata wakwe  hikwalaho ka xiyimo xo tika lexi a a ta langutana na xona ku nga ri khale. Yehovha a nga lo hlamula xikhongelo xa Yesu ntsena kambe u tlhele a rhumela ntsumi leswaku yi ta tiyisa n’wana wakwe.—Luka 22:41-44.

7. Hi fanele hi titwa njhani loko hi tiva leswaku Yehovha u yingisa swikhongelo swa hina?

⁷ Ninamuntlha, Yehovha wa swi yingisa swikhongelo swa malandza yakwe naswona wa swi hlamula hi nkarhi lowunene. (Ps. 116:1, 2) Xiya ndlela leyi makwerhu waxisati wa le India a swi voneke hayona sweswo. A a karhatiwa hi ku vilela ngopfu naswona u khongele hi mhaka yoleyo eka Yehovha. U ri: “Vuhaxi bya JW bya May 2019 lebyi vulavulaka hi ndlela yo lwisana ni ku vilela, byi ndzi pfunile swinene. A ku ri nhlamulo ya swikhongelo swa mina.”

8. Yehovha u kombise Yesu rirhandzu hi tindlela tihi?

⁸ Yehovha wa hi rhandza naswona wa khathala hi hina, hilaha a endleke hakona eka Yesu loko a langutane ni ntirho wo tika wa laha misaveni. (Yoh. 5:20) U tiyise ripfumelo ra Yesu, a n’wi khutaza ni ku n’wi nyika leswi a a swi lava leswaku a kota ku hanya. Yehovha u ye emahlweni a kombisa n’wana wakwe rirhandzu, nileswaku a a n’wi amukela. (Mat. 3:16, 17) Leswi Yesu a a titshege hi Tata wakwe loyi a nga ni rirhandzu, a a nga titwi a ri ni xivundza.—Yoh. 8:16.

9. Hi byihi vumbhoni lebyi kombisaka leswaku Yehovha wa hi rhandza?

⁹ Ku fana na Yesu, hinkwerhu ka hina hi vone rirhandzu ra Yehovha hi tindlela to tala. Ehleketa hi mhaka leyi: Yehovha u hi kokele eka yena naswona u hi nyike ndyangu lowu nga ni rirhandzu ni vun’we lowu hi endlaka hi tsaka ni ku hi khutaza loko hi hele matimba. (Yoh. 6:44) Nakambe Yehovha u tlhela a hi nyika hinkwaswo leswi hi swi lavaka leswaku hi tiyisa ripfumelo ra hina. U tlhela a hi pfuna leswaku hi kuma swilo hinkwaswo leswi hi swi lavaka ku hi kota ku hanya. (Mat. 6:31, 32) Loko hi ehleketisisa hi rirhandzu ra Yehovha, ndlela leyi hi n’wi rhandzaka hayona yi ta ya yi kula.

10. Hi nga dyondza yini eka ndlela leyi Yehovha a va khomaka hayona vamakwerhu?

¹⁰ Yehovha wa va rhandza vamakwerhu. Kambe swi nga ha hi tikela ku va kombisa rirhandzu. Mikarhi yin’wana swi tikisa hileswi hi humaka eka mindhavuko ni le tindhawini leti nga faniki. Nakambe hinkwerhu hi endla swihoxo leswi nga khunguvanyisaka van’wana ni ku va heta matimba. Kambe hi fanele hi tirha hi matimba leswaku hi tiyisa vamakwerhu ni ku va kombisa rirhandzu. Njhani? Hi ku tekelela Tata wa hina eka ndlela leyi a va kombaka hayona leswaku wa va rhandza. (Efe. 5:1, 2; 1 Yoh. 4:19) A hi xiyeni leswi hi nga swi dyondzaka eka xikombiso lexinene xa Yehovha.

11. Yesu u wu kombise njhani “ntwelavusiwana” wa Yehovha?

¹¹Yehovha u ni “ntwelavusiwana.” (Luka 1:78) Munhu loyi a nga ni ntwelavusiwana hi loyi a swi xiyaka loko van’wana va ri eku xanisekeni ivi a teka goza ro va pfuna ni ku va chavelela. Ndlela leyi Yesu a va khomeke hayona vanhu a yi kombisa ndlela leyi Yehovha a va rhandzaka hayona. (Yoh. 5:19) Loko siku rin’wana Yesu a vona mintshungu u ‘yi twele vusiwana, hikuva a yi tshikileriwa yi nga khathaleriwi ku fana ni tinyimpfu leti nga riki na murisi.’ (Mat. 9:36) Kambe Yesu a nga lo yi twela vusiwana ntsena, u tlhele a teka goza ro yi pfuna. U hanyise vavabyi ni ku phyuphyisa “lava karhaleke ni lava tikeriwaka.”—Mat. 11:28-30; 14:14.

12. Nyika xikombiso xa ndlela leyi hi nga wu kombisaka hayona ntwelavusiwana.

¹² Loko hi lava ku komba vamakwerhu ntwelavusiwana, hi fanele hi rhanga hi tiva swiphiqo leswi va langutanaka na swona. Hi xikombiso, makwerhu a nga ha va a ri ni swiphiqo swa rihanyo. A nga tshameli ku tiputa vusiwana hi  swona kambe a nga tsaka swinene loko munhu un’wana o n’wi pfuna. Xana a nga va a swi kota ku khathalela ndyangu wakwe? Xana hi nga hoxa xandla hi ku n’wi pfuna hi ku sweka kumbe ku n’wi basisela yindlu? A hi nge makwerhu u lahlekeriwe hi ntirho wakwe. Xana hi nga swi kota ku n’wi pfuna hi mali hi nga kalanga hi n’wi byela leswaku yi huma kwihi ku fikela loko a kuma ntirho wun’wana?

13-14. Hi nga ma kombisa njhani malwandla ku fana na Yehovha?

¹³Yehovha u ni malwandla. (Mat. 5:45) A hi fanelanga hi yimela vamakwerhu va ta kombela mpfuno eka hina kutani ku ri kona hi va twelaka vusiwana. Hi nga tekelela Yehovha hi ku va pfuna va nga se ta eka hina. U hi humesela dyambu masiku hinkwawo hi nga kalanga hi n’wi kombela! Nakambe miseve ya dyambu yi tlhavela vanhu hinkwavo, ku nga ri malandza yakwe ntsena. Xana a wu pfumelelani na swona leswaku leswi Yehovha a hi nyikaka swilo hinkwaswo leswi hi swi lavaka, swi kombisa ku wa hi rhandza? Ha n’wi rhandza swinene Yehovha hikwalaho ka musa ni malwandla yakwe!

¹⁴ Vamakwerhu vo tala va tekelela Yehovha hikuva va kombisa malwandla. Hi xikombiso, hi 2013 xidzedze xa Haiyan xi onhe tindhawu to tala ta le Philippine. Vamakwerhu vo tala va lahlekeriwe hi tinhundzu ni makaya ya vona. Kambe vamakwerhu emisaveni hinkwayo va teke goza kutani va va pfuna hi xihatla. Va nyikele hi mali ni ku katseka eka ntirho wo aka. Sweswo swi endle leswaku swi koteka ku aka ni ku lunghisa makaya ya 750 hi tin’weti ti nga ri tingani! Hi nkarhi lowa ntungu wa COVID-19, vamakwerhu va tirhe hi matimba leswaku va seketela vamakwavo. Loko hi nga bi mariri loko swi ta emhakeni yo seketela vamakwerhu, hi kombisa leswaku ha va rhandza.

15-16. Hi ku ya hi Luka 6:36, hi yihi ndlela ya nkoka leyi hi nga tekelelaka Tata wa hina wa le matilweni hayona?

¹⁵Yehovha u ni tintswalo naswona wa rivalela. (Hlaya Luka 6:36.) Siku ni siku hi vona tintswalo ta Tata wa hina wa le matilweni. (Ps. 103:10-14) Hambileswi mikarhi yin’wana vadyondzisiwa va Yesu a va pfa va endla swihoxo kambe a a va rivalela ni ku va komba tintswalo. U kale a nyikela ni hi vutomi byakwe leswaku  hi ta rivaleriwa swidyoho swa hina. (1 Yoh. 2:1, 2) Xana a wu swi lavi ku va munghana wa Yehovha na Yesu hileswi va nga ni musa va tlhela va rivalela?

¹⁶ Hi tiyisa rirhandzu leri hi nga na rona eka vamakwerhu hi ku va ‘rivalela hi ku tshunxeka.’ (Efe. 4:32) Mikarhi yin’wana swi nga ha hi tikela ku rivalela van’wana kambe hi fanele hi tikarhata swinene. Makwerhu un’wana waxisati u boxa ndlela leyi nhlokomhaka ya Xihondzo xo Rindza leyi nge “Rivalelanani Hi ku Ntshunxeka,” yi n’wi pfuneke hayona leswaku a kota ku endla tano. * U ri: “Ku hlaya nhlokomhaka leyi swi ndzi pfunile leswaku ndzi sungula ku vona swilo hi tihlo rin’wana. Yi hlamusela leswaku ku rivalela van’wana a swi vuli swona leswaku u pfumelelana nileswi va swi endleke kumbe a swi ku twisanga ku vava. Kambe ku va rivalela swi ta ku pfuna leswaku u nga vi na xikhomela naswona u tshama u ri ni ku rhula.” Loko hi rivalela vamakwerhu, hi kombisa leswaku ha va rhandza naswona hi tekelela Tata wa hina Yehovha.

17. Hilaha Matewu 5:16 yi vulaka hakona, hi nga n’wi vangamisa njhani Tata wa hina wa le matilweni?

¹⁷ Swa tsakisa ku va endyangwini wa vamakwerhu emisaveni hinkwayo lava nga ni rirhandzu. Hi lava leswaku vanhu vo tala va ta va ta gandzela na hina. Hikwalaho, hi fanele hi tivonela leswaku hi nga endli nchumu ni wun’we lowu nga ta thyakisa ndhuma ya vanhu va Yehovha kumbe ku onha vito ra Tata wa hina la nge matilweni. Mikarhi hinkwayo hi ringeta ku tikhoma hi ndlela leyi nga ta endla leswaku vanhu va tsakela mahungu lamanene.—Hlaya Matewu 5:16.

18. I yini lexi nga hi pfunaka leswaku hi chumayela handle ko chava?

¹⁸ Mikarhi yin’wana, van’wana va nga ha hi kaneta kumbe va hi xanisa hileswi hi yingisaka Tata wa hina la nge matilweni. Hi nga endla yini loko hi chava ku byela van’wana hi leswi hi swi pfumelaka? Hi fanele hi tshemba leswaku Yehovha ni N’wana wakwe va ta hi pfuna. Yesu u byele vadyondzisiwa vakwe leswaku a va fanelanga va vilela hi leswi va nga ta swi vula. Hikwalahokayini?  U te: “Leswi mi nga ta swi vula, mi ta nyikiwa swona hi nkarhi wolowo; hikuva a hi n’wina mi nga ta vulavula, kambe i moya wa Tata wa n’wina lowu nga ta vulavula ha n’wina.”—Mat. 10:19, 20.

19. Vula xikombiso xa un’wana loyi a chumayeleke handle ko chava.

¹⁹ Xiya xikombiso xa Robert. Loko a ha ku sungula ku va xichudeni xa Bibele naswona a nga tivi swo tala hi Bibele, u ye ekhoto ya vusocha ya le Afrika Dzonga. U hlamusele muchuchisi leswaku a a nga lavi ku katseka enyimpini hikwalaho ka leswi a rhandzaka Vakreste kulobye. Wa tsaka swinene hileswi a nga endyangwini wa vamakwerhu emisaveni hinkwayo. Muchuchisi u vutise a ku: “I vamani vamakwenu va wena?” Robert a a nga xi langutelanga xivutiso xexo kambe hi ku hatlisa u tsundzuke ndzimana ya siku rero. A ku ri Matewu 12:50, leyi nge: “Loyi a endlaka ku rhandza ka Tata wa mina la nge tilweni, hi yena a nga makwerhu waxinuna ni waxisati ni manana eka mina.” Hambileswi Robert a ha ku sungula ku dyondza Bibele kambe moya wa Yehovha wu n’wi pfunile leswaku a kota ku hlamula xivutiso xexo ni swin’wana leswi a a nga swi langutelanga. Swi le rivaleni leswaku Yehovha u tibumile hi Robert! Hilaha ku fanaka, Yehovha wa tibuma hi hina loko hi ya emahlweni hi chumayela hambiloko swiyimo swi tika.

20. Hi fanele hi tiyimisela ku endla yini? (Yohane 17:11, 15)

²⁰ Onge hi nga tiyimisela ku ya emahlweni hi tlangela nkateko lowu hi nga na wona wo va endyangwini wa vamakwerhu lava nga ni rirhandzu. Hi ni Tatana lonene ngopfu swin’we ni vamakwerhu lava hi rhandzaka. Sweswo a hi fanelanga hi swi tekela ehansi. Sathana ni valandzeri vakwe va ringeta ku hi endla hi kanakana leswaku Tata wa hina la nge matilweni wa hi rhandza swinene naswona va ringeta hi matimba ku kavanyeta vun’we lebyi hi nga na byona. Yesu u khongele eka Tata wakwe a kombela leswaku a hi sirhelela ku hi ta kota ku ya emahlweni hi va ni vun’we. (Hlaya Yohane 17:11, 15.) Yehovha wa xi hlamula xikhongelo xexo. Ku fana na Yesu, onge na hina hi nga ka hi nga kanakani rirhandzu ni nseketelo lowu Tata wa hina la nge matilweni a hi nyikaka wona. A hi tiyimiseleni ku ya emahlweni hi wu rhandza swinene ndyangu wa vamakwerhu emisaveni hinkwayo.