1. Kasi tili na mwaŵi wakuti tingachema Yehova kuti njani?

MBUMBA ya ŵateŵeti ŵa Yehova yikusazgapo Yesu, uyo ‘ngwakwamba kubabika wa chilengiwa chose,’ kweniso yikusazgapo wumba ukuru wa ŵangelo. (Kol. 1:15; Sal. 103:20) Apo Yesu wakaŵa pa charu chapasi wakawovwira ŵanthu kuti ŵawonenge Yehova kuŵa Dada wawo. Ku ŵasambiri ŵake, Yesu pakuyowoya za Yehova wakati “Adada na Awiskemwe.” (Yoh. 20:17) Para tajipeleka kwa Yehova na kubatizika, tikunjira mu mbumba ya chitemwa ya ŵabali na ŵadumbu.​—Mrk. 10:29, 30.

2. Kasi tisambirenge vichi mu nkhani iyi?

² Ŵanyake chikuŵaŵira chakusuzga kuwona Yehova kuŵa Dada wawo wachitemwa. Apo ŵanyake ŵakumanya yayi umo ŵangalongolera kuti ŵakutemwa ŵabali na ŵadumbu ŵawo. Mu nkhani iyi, tisambirenge umo Yesu wakutovwilira kuti tiwonenge Yehova kuŵa Dada wachitemwa, uyo tingaŵa nayo paubwezi. Tisambirengeso nthowa izo tingayezgera Yehova pa umo tikwenera kuchitira vinthu na ŵabali na ŵadumbu ŵithu.

3. Kasi lurombo lwa chiyelezgero likutovwira wuli kusendelera kwa Yehova?

³ Yehova ni Dada wachitemwa. Yesu wakukhumba kuti tiwonenge Yehova nga umo iyo wakumuwonera. Wakukhumba kuti timuwonenge kuti ni mupapi walusungu na wachitemwa uyo tingayowoyeskana nayo nyengo yiliyose, m’malo mwa kumuwona nga ngwambura lusungu uyo wakukhumba kuti watiphalirenge waka vyakuchita. Tikuwona ivi kwizira pa umo Yesu wakasambizgira ŵasambiri ŵake umo ŵangalombera. Wakamba lurombo lwa chiyelezgero na mazgu ghakuti: “Adada ŵithu.” (Mat. 6:9) Yesu mphanyi wakatiphalira kuti tichemenge Yehova kuti “Wankhongonozose,” “Mlengi,” panji “Themba lamuyirayira,” ndipo mazina agha ngaheni yayi chifukwa Baibolo likugwiliskira ntchito  mazgu ghose agha pakulongosora za Yehova. (Gen. 49:25; Yes. 40:28; 1 Tim. 1:17) Ndipouli, Yesu wakatiphalira kuti tichemenge Yehova kuti “Adada.”

4. Kasi tikumanya wuli kuti Yehova wakukhumba kuti tisendelere kwa iyo?

⁴ Kasi imwe vikumusuzgani kuwona Yehova nga Dada wachitemwa? Taŵanyake vikutisuzga. Para adada ŵithu ŵakutibaba mbalusungu yayi, vingaŵa vyakusuzga kugomezga kuti pangaŵa dada munyake uyo wakutitemwa chomene. Kweni tikupembuzgika kumanya kuti Yehova wakumanya makora umo tikujipulikira. Wakukhumba kuti waŵe nase pafupi. Lekani mazgu ghake ghakutichiska kuti: “Sendelerani kwa Chiuta, ndipo iyo wasendelerenge kwa imwe.” (Yak. 4:8) Yehova wakutitemwa, ndipo wakuyowoya kuti waŵenge Dada muwemi chomene kwa ise.

5. Kuyana na Luka 10:22, kasi Yesu wangatovwira wuli kusendelera kwa Yehova?

⁵ Yesu wangatovwira kuti tisendelere kwa Yehova. Yesu wakumumanya makora Yehova ndipo wakuyezga ndendende mikhaliro yake. Lekani wakayowoya kuti: “Waliyose uyo wawona ine wawona na Adada wuwo.” (Yoh. 14:9) Nga mukuru withu, Yesu wakutisambizga umo tingachindikira na kupulikira Adada ŵithu, umo tingagegera kuchita vinthu ivyo vingaŵakwiyiska, ndiposo ivyo tingachita kuti ŵatitemwe. Kweni chomene Yesu wakutovwira kupulikiska kuti Yehova ngwalusungu chomene kweniso wachitemwa. (Ŵazgani Luka 10:22.) Tiyeni tiwone viyelezgero vinyake.

6. Pelekani chiyelezgero icho chikulongora kuti Yehova wakamupulikanga Yesu apo wakamulombanga.

⁶ Yehova wakuŵategherezga ŵana ŵake. Ghanaghanirani waka umo Yehova wakamutegherezgeranga Mwana wake wakwamba. Yehova wakwenera kuti wakapulika malurombo ghose agho Mwana wake wakalombanga apo wakaŵa pa charu chapasi. (Luka 5:16) Wakapulika apo Yesu wakalombanga kuti wasankhe mwamahara pa vinthu vinyake vyakuzirwa, nga apo wakasankhanga ŵapositole ŵake 12. (Luka 6:12, 13) Yehova wakapulikaso lurombo lwa Yesu apo wakasuzgikanga maghanoghano. Kweniso nyengo yichoko waka pambere Yudasi wandamupeleke, Yesu wakalomba mwakuŵeyelera kwa Adada ŵake chifukwa cha vinthu vyakusuzga ivyo  vikaŵa pafupi kumuchitikira. Yehova wakapulika waka malurombo gha Yesu yayi, kweni wakatumaso mungelo kuti wakhozge Mwana wake wakutemweka.​—Luka 22:41-44.

7. Kasi tikwenera kujipulika wuli pakumanya kuti Yehova wakuzgora malurombo ghithu?

⁷ Mazuŵa ghano napo, Yehova wakulutilira kupulika malurombo ghithu ndipo wakuzgora pa nyengo yakwenelera kweniso munthowa yiwemi. (Sal. 116:1, 2) Mudumbu munyake wa ku India wakajiwonera yekha umo Yehova wakazgolera malurombo ghake. Wakaŵa na masuzgo agho wakasuzgikanga nagho chomene maghanoghano, ndipo wakalomba kwa Yehova kufumira pasi pa mtima. Iyo wakalemba kuti: “Pulogiramu ya JW Broadcasting^® ya Meyi 2019 yakukhwaskana na ivyo tingachita para tikwenjerwa yikaŵa zgoro la malurombo ghane chifukwa ndivyo nkhakhumbikwiranga.”

8. Kasi Yehova wakalongora wuli chitemwa kwa Yesu?

⁸ Yehova wakutitemwa nga umo wakatemweranga Yesu nyengo yose iyo wakaŵira pa charu chapasi. (Yoh. 5:20) Wakawovwira Yesu vigaŵa vyose, mwauzimu na mwakuthupi wuwo, kweniso para wakusuzgika maghanoghano. Ndipo Yehova wakaphalira Mwana wake kuti wakamutemwanga kweniso wakakondwanga nayo. (Mat. 3:16, 17) Yesu nayo wakamanyanga kuti Adada ŵake ŵakuchanya nyengo zose ŵaŵenge nayo na kumovwira, ntheura wakajipulikanga kuti wali yekha yayi.​—Yoh. 8:16.

9. Kasi tikumanya wuli kuti Yehova wakutitemwa?

⁹ Nga ni Yesu, tose tili kuwonapo chitemwa cha Yehova munthowa zakupambanapambana. Ghanaghanirani waka fundo iyi: Yehova wakatiguzira kwa iyo na kutipa ŵabali na ŵadumbu ŵanandi awo ŵakutovwira kuti tiŵenge ŵakukondwa na kutikhozga para tanyekezgeka. (Yoh. 6:44) Yehova wakutipaso chilichose icho tikukhumbikwira kuti chipulikano chithu chilutilire kuŵa chakukhora. Ndiposo wakutovwira kusanga vinthu ivyo tikukhumbikwira pa umoyo. (Mat. 6:31, 32) Para tikughanaghanira za chitemwa icho Yehova wali nacho pa ise, chitemwa chithu pa iyo chikukura.

10. Kasi tingasambirako vichi kwa Yehova pa umo wakuchitira vinthu na ŵabali na ŵadumbu?

¹⁰ Yehova wakuŵatemwa ŵabali na ŵadumbu ŵithu. Kweni ni nyengo zose yayi apo ntchipusu kwa ise kuŵalongora chitemwa. Nakuti nyengo zinyake chikuŵa chakusuzga chifukwa chakuti tikupambana mitheto panji umo takulira. Tose tikubudiska ndipo tingachita vinthu ivyo vingakhuŵazga ŵanji. Kweni tikwenera kuyezgayezga kukhozga chitemwa icho tili nacho pa ŵabali na ŵadumbu ŵithu. Kasi tingachita wuli nthena? Tikwenera kuyezga Adada ŵithu mwakulongora chitemwa ku ŵabali na ŵadumbu. (Efe. 5:1, 2; 1 Yoh. 4:19) Tiyeni tiwone ivyo tingasambirako kwa Yehova.

11. Kasi Yesu wakalongora wuli ‘lusungu’ lwa Yehova?

¹¹ Yehova wakulongora ‘lusungu.’ (Luka 1:78) Munthu walusungu vikumuŵinya para wakuwona ŵanthu ŵanyake ŵakusuzgika, ndipo wakusanga nthowa izo wangaŵawovwilira na kuŵapembuzga. Umo Yesu wakachitiranga vinthu na ŵanthu, wakalongora chitemwa icho Yehova wali nacho pa iwo. (Yoh. 5:19) Ulendo unyake wakati wawona mizinda, Yesu “wakayilengera chitima, chifukwa ŵakaŵa ŵakufyopoka na kujowoleka nga ni mberere zambura muliska.” (Mat. 9:36) Yesu wakachitanga vinandi padera pa kujipulika waka kuti wakuŵatemwa ŵanthu, kweni wakachitangapo kanthu kuti waŵawovwire. Wakachizganga ŵalwari na kovwira ‘ŵakuphyoka na ŵakunyekezgeka.’​—Mat. 11:28-30; 14:14.

12. Kasi tingalongora wuli lusungu ku ŵabali na ŵadumbu ŵithu?

¹² Para tikughanaghanira masuzgo agho ŵabali na ŵadumbu ŵithu ŵakukumana nagho, tiŵalongorenge lusungu. Mwachiyelezgero, mudumbu  wangaŵa kuti wali na ulwari ukuru. Wakuyowoyapo yayi vya suzgo lake, kweni ntchakuwonekerathu kuti wangakondwa chomene para munyake wangamovwira. Kasi wakukwaniska kusanga vinthu ivyo mbumba yake yikukhumbikwira? Kasi tingamovwira mwakumuphikirako chakurya panji kumovwira kutozga munyumba? Kweniso tiyelezgere kuti mubali ntchito yamumalira. Tingamupako kandalama kachoko waka, panji kwamburaso kumuphalira kuti yafuma kwa ise, kuti timovwire m’paka apo wazamusangira ntchito yinyake.

13-14. Kasi tingamuyezga wuli Yehova pa nkhani ya kupa?

¹³ Yehova ngwakupa. (Mat. 5:45) Tikwenera kuchita kulindilira dankha yayi kuti ŵabali na ŵadumbu ŵithu ŵachite kutipempha kuti tiŵawovwire. Nga Yehova, tingaŵachitira waka vinthu pambere ŵandatipemphe. Iyo wakutifumiskira dazi zuŵa lililose kwambura kumupempha. Ndipo dazi likovwira waliyose, ŵanthu ŵakuwonga na ŵambura kuwonga wuwo. Pakutipa ivyo tikukhumbikwira, Yehova wakulongora kuti wakutitemwa nadi. Tikumutemwa chomene Yehova chifukwa chakuti ngwalusungu kweniso wakupa.

¹⁴ Ŵabali na ŵadumbu ŵithu ŵakuyezga Yehova, ndipo nawo ŵakupeleka ku ŵanji. Mwachiyelezgero, mu 2013, chimphepo chikuru (Super Typhoon Haiyan) chikananga vinthu vinandi chomene ku Philippines. Ŵabali na ŵadumbu ŵanandi ŵakaluza nyumba zawo na katundu wawo. Kweni mbumba yawo yauzimu pa charu chose yikachitapo kanthu mwaluŵiro kuti yiŵawovwire. Ŵanandi ŵakapeleka ndalama panji kovwira kunozga panji kuzengaso nyumba pafupifupi 750 pambere chaka chindamare. Mu nyengo ya muliri wa COVID-19, Ŵakaboni ŵakuŵikapo mtima kovwira ŵabali na ŵadumbu ŵawo. Para tikuchitapo kanthu mwaluŵiro kuti tovwire ŵabali ŵithu ŵauzimu, tikulongora kuti tikuŵatemwa.

15-16. Kasi lemba la Luka 6:36 likuti tikwenera kuchita vichi kuti tiyezge Adada ŵithu ŵakuchanya?

¹⁵ Yehova ngwalusungu kweniso wakugowokera. (Ŵazgani Luka 6:36.) Zuŵa lililose wakutilongora lusungu na kutigowokera. (Sal. 103:10-14) Yesu, ŵalondezgi ŵake ŵakaŵa ŵambura kufikapo, kweni wakaŵalongoranga lusungu na kuŵagowokera. Mwakuti wakapeleka umoyo wake kuti zakwananga zithu zigowokereke. (1 Yoh. 2:1, 2) Lusungu na kugowoka ivyo  Yehova na Yesu ŵakutilongora vikutovwira kuti tiŵatemwenge chomene.

¹⁶ Chitemwa icho tili nacho pa yumoza na munyake chikukhora chomene para tikugowokerana na “mtima wose.” (Efe. 4:32) Mbunenesko kuti nyengo zinyake kugowokera ŵanji kungaŵa kwakusuzga, kweni tikwenera kuŵikapo mtima kuti ndimo tichitirenge. Mudumbu munyake wakuti nkhani ya mu Gongwe la Mulinda yakuti “Gowokeranani na Mtima Wose” ndiyo yikamovwira kuti wachitenge nthena. * Iyo wakalemba kuti: “Nkhani iyi yikanovwira kumanya umo kugowokera ŵanji kukunovwiliraso ine panekha. Yikalongosora kuti para mwagowokera ŵanji chikung’anamura kuti mwazomerezga nkharo yawo yiheni yayi, nesi kuŵa nga ni para ivyo ŵakachita vikamuŵinyani yayi. M’malo mwake, kugowokera chikung’anamura kuwuskamo ukali wose uwo tanguŵa nawo chifukwa cha vinthu viheni ivyo ŵanji ŵatichitira na kulutilira kuŵa ŵamtende.” Para tikugowokera ŵabali na ŵadumbu ŵithu na mtima wose, tikulongora kuti tikuŵatemwa ndipo tikuyezga Adada ŵithu, A Yehova.

17. Kuyana na Mateyu 5:16, kasi tingapeleka wuli uchindami kwa Adada ŵithu ŵakuchanya?

¹⁷ Ni mwaŵi wapadera chomene kuti tili mu mbumba ya ŵabali na ŵadumbu pa charu chose chapasi awo ŵakutemwana yumoza na munyake. Nakuti usange ntchamachitiko tikukhumba kuti ŵanthu ŵanandi ŵize tisopenge nawo Chiuta withu. Na fundo iyi mu maghanoghano, tikwenera yayi kuchita vinthu ivyo vingapangiska ŵanthu kuti ŵaghanaghanenge viheni kulazga kwa Yehova panji Ŵakaboni ŵake. Nyengo zose tikwenera kuyezgayezga kuŵa na nkharo yiwemi mwakuti ŵanthu ŵakhumbenge kusambira vya Yehova na kumuteŵetera.​—Ŵazgani Mateyu 5:16.

18. Kasi ntchivichi chingatovwira kuti tipharazgenge mwachikanga?

¹⁸ Nyengo zinyake, ŵanthu ŵanyake ŵangatinena panji kutitambuzga chifukwa chakuti tikupulikira Adada ŵithu ŵakuchanya. Kasi tingachita wuli para tikopa kuphalirako ŵanji ivyo tikugomezga? Tikwenera kugomezga kuti Yehova na Mwana wake ŵatovwirenge. Yesu wakaphalira ŵasambiri ŵake kuti ŵakeneranga kufipa  mtima yayi kuti ŵamuyowoya wuli panji ŵamuyowoyachi. Chifukwa wuli? Iyo wakati: “Icho mwamuyowoya chamupika kwa imwe mu ora lenelilo. Pakuti awo ŵazamuyowoya ndimwe chara, kweni ni mzimu wa Ŵawiskemwe ndiwo uzamuyowoya kwizira mwa imwe.”—Mat. 10:19, 20.

19. Pelekani chiyelezgero cha munthu uyo wakapharazga mwachikanga.

¹⁹ Wonani ivyo vikachitikira Robert. Kumanyuma apo wakaŵa kuti wamba waka kusambira Baibolo ndipo wakamanyanga vinandi yayi, wakeneranga kuluta ku khoti na kukalongosolera mweruzgi wa khoti chifukwa icho wakukanira kunjira usilikari ku South Africa. Wakaŵa na chikanga ndipo wakalongosolera khoti kuti wakakhumbanga yayi kunjira usilikari chifukwa chakuti wakutemwa ŵabali ŵake Ŵachikhristu. Iyo wakawonganga chomene mwaŵi uwo wakaŵa nawo wakuŵa mu mbumba yauzimu. Mwamabuchi mweruzgi wakamufumba kuti, “Ŵabali ŵako ni mba?” Wakakhazganga yayi fumbo ili, kweni nyengo yeneyiyo wakakumbukira lemba la zuŵa lira. Likaŵa lemba la Mateyu 10:19, 20 ilo likuti: “Waliyose uyo wakuchita khumbo la Adada awo ŵali kuchanya, uyu ndiyo ni munung’una wane, mudumbu wane, na mama wane.” Nangauli Robert wakaŵa kuti wamba waka kusambira Baibolo, kweni mzimu wa Yehova ukamovwira kuzgora fumbo lira na ghanyake ghanandi agho wakakhazganga yayi. Yehova wakwenera kuti wakakondwa chomene na Robert. Ndipo Yehova wakukondwaso para nase tikugomezga iyo kuti tipharazge mwachikanga pa nyengo zakusuzga.

20. Kasi tikwenera kuŵikapo mtima kuchita vichi? (Yohane 17:11, 15)

²⁰ Mphanyi talutilira kuwonga mwaŵi uwo tili nawo wakuti nase tili mu mbumba ya chitemwa. Tili na Dada muwemi chomene kweniso ŵabali na ŵadumbu awo ŵakutitemwa. Tikwenera kuwutora mwamaseŵera yayi mwaŵi uwu. Satana na ŵanthu ŵake ŵaheni ŵakuyezga kutigongoweska kuti tikayikirenge chitemwa cha Adada ŵithu ŵakuchanya kweniso kutimbanizga umoza withu pakati pithu. Ndipouli, Yesu wakatilombera, kupempha Adada ŵithu kuti ŵativikilire mwakuti mbumba yithu yose yilutilire kuŵa yakukolerana. (Ŵazgani Yohane 17:11, 15.) Yehova wakuzgora lurombo ulu. Nga ni Yesu, tingakayikanga yayi kuti Adada ŵithu ŵakuchanya ŵakutitemwa ndipo ŵatovwirenge. Tiyeni tiŵikepo mtima kulutilira kuŵa paubwezi wakukhora na mbumba yithu yauzimu.