1. Se a te tauliaga e mafai o maua ne tino fakamaoni i te lotou fesokotakiga mo Ieova?

A TE kaukāiga o tino tapuaki a Ieova e aofia i ei a Iesu, “te uluaki o mea katoa ne faite,” mo te fia miliona o agelu. (Kolose 1:15; Sala. 103:20) I te nofoga a Iesu i te lalolagi, ne fakaasi mai ne ia me e mafai ne tino fakamaoni o ‵kilo atu ki a Ieova e pelā me ko te lotou Tamana. I tena faipatiga ki ana soko, ne fakasino atu a Iesu ki a Ieova e pelā me ko “toku Tamana telā ko te otou Tamana.” (Ioa. 20:17) Kae kafai ko tukugina atu tatou ki a Ieova kae papatiso, ko aofia tatou i te kaukāiga a‵lofa o taina mo tuagane.—Male. 10:29, 30.

2. Ne a mea ka sau‵tala tatou ki ei i te mataupu tenei?

² E faigata ki nisi tino ke ‵kilo atu ki a Ieova e pelā me ko te lotou Tamana alofa. Nisi tino e mafai o se iloa ne latou te auala ke fakaasi atu te alofa ki olotou taina mo tuagane. I te mataupu tenei, ka sau‵tala tatou ki te auala e fesoasoani mai a Iesu ke ‵kilo atu tatou ki a Ieova e pelā me ko te ‵tou Tamana alofa, telā e mafai o fakapili‵pili atu tatou ki ei. Ka tauloto foki tatou ki auala e mafai ei ne tatou o fakaakoako ki a Ieova i ‵tou faifaiga ki taina mo tuagane.

3. E fai pefea ne te ‵talo fakaakoako ke fakapili‵pili malosi atu tatou ki a Ieova?

³ A Ieova se Tamana alofa. E manako a Iesu ke ‵kilo atu tatou ki a Ieova e pelā mo tena kilokiloga ki ei—e fai a ia pelā me se mātua alofa telā e faigofie o olo atu ki a ia, kae e sē se tino pule sē alofa telā e fakatonu mālō mai fua. E lavea atu te mea tenei i mea kolā ne akoako ne Iesu ana soko ke ‵talo ki ei. Ne kamata ne ia te ‵talo fakaakoako ki pati konei: “Te motou Tamana.” (Mata. 6:9) Ne mafai fua o fai mai a Iesu ke ‵talo atu tatou ki a  Ieova “te Atua Malosi Katoatoa,” “te Atua telā ne faite ne ia a mea katoa,” io me ko “te Tupu o te se-gata-mai”—ko tofi katoa i te Tusi Tapu kolā e fakasino atu ki a ia. (Kene. 49:25; Isa. 40:28; 1 Timo. 1:17) Kae ne fai mai a Iesu ke taku ne tatou a Ieova ki te “Tamana.”

4. E iloa pefea ne tatou me e manako a Ieova ke fakapili‵pili atu tatou ki a ia?

⁴ E mata, e faigata ki a koe ke kilo atu ki a Ieova e pelā me se Tamana alofa? E fai penā a nisi tino. E mafai o faigata ke maua ne nisi tino a te kilokiloga e uiga ki se mātua alofa, ona ko te faigata o te auala ne puti aka ei latou. Se mea fakamalosi loto ke iloa atu me e malamalama katoatoa a Ieova i ‵tou lagonaga! E manako a ia ke pili mai ki a tatou. Tenā te pogai e fakamalosi mai tena Muna ki a tatou: “Fakapilipili atu ki te Atua, kae ka fakapilipili mai a ia ki a koutou.” (Iako. 4:8) A Ieova e alofa mai ki a tatou kae manako ke fai mo toe Tamana ‵lei ki a tatou.

5. E ‵tusa mo te Luka 10:22, e fesoasoani mai pefea a Iesu ke fakapili‵pili atu tatou ki a Ieova?

⁵ E mafai o fesoasoani mai a Iesu ke fakapili‵pili atu tatou ki a Ieova. E iloa ‵lei ne Iesu a Ieova kae e fakaata mai ne ia Ana uiga i se auala ‵lei katoatoa, telā ne fai mai a ia: “So se tino e kilo mai ki a au ko kilo foki ki te Tamana.” (Ioa. 14:9) E pelā me se taina matua, e akoako ne Iesu tatou ke iloa o āva kae faka‵logo ki tena Tamana, ke ‵kalo kea‵tea mai te fakafanoanoa ne tatou a Ia, mo te auala ke maua ne tatou Tena taliaga. Kae e fakaasi mai i te auala ne ola ei a Iesu i te lalolagi nei a te atafai mo te alofa o Ieova. (Faitau te Luka 10:22.) Ke na sau‵tala tatou ki nisi fakaakoakoga.

6. Taku mai ne fakaakoakoga ki auala ne fakalogologo ei a Ieova ki a Iesu.

⁶ E fakalogologo a Ieova ki ana tama‵liki. Mafaufau ki te auala ne fakalogologo ei a ia ki tena Uluaki. E mautinoa eiloa me ne lagona ne Ieova a ‵talo e uke ne fai ne tena Tama i te nofoga i te lalolagi. (Luka 5:16) Ne lagona ne ia a Iesu e ‵talo e uiga ki fakaikuga tāua, e pelā mo te filifiliga o ana apositolo e toko 12. (Luka 6:12, 13) Ne lagona foki ne Ieova te ‵talo a Iesu i te taimi ne mafatia i ei. A koi tuai o fakatogafiti a ia, ne ‵talo malosi atu a Iesu ki tena Tamana e  uiga ki te tofotofoga faigata telā ka fepaki mo ia. Ne seki lagona fua ne Ieova te ‵talo a Iesu kae ne uga atu foki ne ia se agelu ke fakamalosi aka Tena Tama pele.—Luka 22:41-44.

7. Ne a ‵tou lagonaga māfai e iloa ne tatou i a Ieova e fakalogologo ki ‵tou ‵talo?

⁷ I aso nei, e tumau eiloa a Ieova i te fakalogologo ki ‵talo o ana tavini, kae e tali atu ki ei i te taimi tonu mo te ‵toe auala ‵lei. (Sala. 116:1, 2) Mafaufau ki se tuagane i Initia telā ne lavea ne ia a te auala ne tali atu ei a Ieova ki ana ‵talo. Ne logo‵mae a ia i lagonaga mafatia, kae ne ‵talo faeloa a ia ki a Ieova e uiga ki tena fakalavelave. Ne tusi mai a ia: “A te polokalame o te Leo Fakasalalau^® o te JW i a Me 2019 e uiga ki te auala ke fakafesagai atu ki te manavase ko te mea eiloa telā ne manako au ki ei i te taimi tenā. Ko te ‵tali eiloa ki aku ‵talo.”

8. I auala fea ne fakaasi atu ne Ieova te alofa ki a Iesu?

⁸ E alofa kae atafai mai a Ieova, e pelā eiloa mo tena alofa kae atafai ki a Iesu i te taimi o tena galuega faigata i te lalolagi. (Ioa. 5:20) Ne fesoasoani atu a ia ki a Iesu i te feitu faka-te-agaga, feitu tau lagonaga, mo te feitu faka-te-foitino. Kae ne seki taofi aka ne Ieova a te fakaasiatuga me e alofa kae talia foki ne ia tena Tama. (Mata. 3:16, 17) Ona ko te mea ne iloa ne ia te alofa o tena Tamana faka-te-lagi, ne seki mafaufau a Iesu me ne nofo fakaalofa a ia.—Ioa. 8:16.

9. Ne a fakamaoniga e lavea atu me e alofa mai a Ieova ki a tatou?

⁹ E pelā mo Iesu, ne lavea ne tatou katoa a te alofa o Ieova i auala e uke. Mafaufau la: Ne ‵futi mai ne Ieova a tatou ki a ia kae tuku mai se kaukāiga alofa kae fealofani, ke maua i ei ne tatou te fiafia kae fakamalosi aka ei tatou māfai e loto mafatia. (Ioa. 6:44) E tuku mai faeloa ne Ieova a mea‵kai faka-te-agaga e uke ke fakamalosi aka ei tatou. Kae e fesoasoani mai foki a ia i te tausiga o ‵tou manakoga faka-te-foitino i aso takitasi. (Mata. 6:31, 32) Kafai e mafau‵fau tatou ki te alofa o Ieova mō tatou, e fai ei ke gasolo aka faeloa ‵tou a‵lofa ki a ia.

10. Ne a mea e mafai o tauloto ne tatou mai faifaiga a Ieova ki ‵tou taina mo tuagane?

¹⁰ E alofa a Ieova ki ‵tou taina mo tuagane. Kāti e se faigofie faeloa ke lagona ne tatou kae fakaasi atu te alofa tenā ki ‵tou kāiga faka-te-agaga. E fai eiloa penā ona ko te kese‵kese o tuu mo olaga ne ‵tupu aka ei tatou. E fai ne tatou katoa a mea ‵se kolā e mafai o fai ei ke kaitāua kae se fia‵fia a nisi tino. Kae koi mafai eiloa o fakamalosi aka ne tatou a te alofa i ‵tou kāiga faka-te-agaga. I te auala fea? Mai te fakaakoako ki te ‵tou Tamana i te fakaasi atu o te alofa ki ‵tou taina mo tuagane. (Efe. 5:1, 2; 1 Ioa. 4:19) Ke na onoono ki mea e mafai o tauloto ne tatou mai te fakaakoakoga a Ieova.

11. Ne fakaasi atu pefea ne Iesu a te “alofa atafai” o Ieova?

¹¹ E fakaasi mai ne Ieova a te “alofa atafai.” (Luka 1:78) A te tino alofa atafai e fanoanoa māfai e lavea ne ia a nisi tino e logo‵mae; e ‵sala atu a ia ki auala ke fesoasoani kae tuku atu a fakamafanafanaga. Mai i ana faifaiga ki tino, ne fakaasi atu ne Iesu te atafai o Ieova ki a latou. (Ioa. 5:19) I te taimi e tasi ne lavea ne Iesu se vaitino, “ne alofa malosi a ia ki a latou me ko pa‵ka kae tuku tiaki latou e pelā me ne mamoe e seai se lotou tino tausi.” (Mata. 9:36) Ne uke atu a mea ne fai ne Iesu i lō te fakaasi atu fua o lagonaga atafai ki a latou. Ne faka‵lei ne ia a tino ma‵saki kae tuku atu a te malosi fou ki a latou kolā ko “fi‵ta kae ‵mafa [olotou] amoga.”—Mata. 11:28-30; 14:14.

12. Taku mai se fakaakoakoga ki te auala e mafai o fakaasi atu ne tatou te alofa atafai.

¹² A koi tuai o fakaasi atu ne tatou te alofa atafai ki ‵tou taina mo tuagane, e ‵tau o iloa ne  tatou olotou fakalavelave. E pelā me se tuagane telā e masaki malosi. E seki fameo aka eiloa a ia e uiga ki ei, kae ka fiafia eiloa a ia māfai e fesoasoani atu se tino. E tausi atu pefea a ia ki manakoga faka-te-foitino o tena kāiga? E mata, ka manako a ia ki se fesoasoani i te faiga o kuka io me ko te ‵teuga o te fale? Kāti ko seai se galuega a se taina. E mata, e mafai o tuku lēmū atu ne tatou se tamā meaalofa tupe, ke fesoasoani atu ke oko ki te taimi ko maua ei sena galuega fou?

13-14. E mafai pefea o kaima‵lie tatou pelā mo Ieova?

¹³ A Ieova e kaimalie. (Mata. 5:45) E ‵tau o fakaasi atu mua ne tatou a te alofa atafai kae e se ‵tau o faka‵tali ke fakamolemole mai a taina mo tuagane mō se fesoasoani. E pelā mo Ieova, e mafai o ga‵sue muamua tatou o fakaasi atu te alofa atafai. E fai ne ia ke ‵kasa te la e aunoa mo te fakamolemole atu o tatou ki ei! E maua ne tino katoa a mea aoga mai te la, kae e se ko tino loto fakafetai fua. E mata, e ‵lago koe ki te manatu me i te tausiga atafai a Ieova, e fakaasi mai ei tena alofa ki a tatou? E a‵lofa malosi tatou ki a Ieova ona ko tena atafai mo te kaimalie!

¹⁴ I te fakaakoako atu ki te lotou Tamana i te lagi, e tokouke a ‵tou taina mo tuagane e ga‵sue muamua o fakaasi atu te uiga kaimalie. E pelā mo te taimi ne poko ei a te Super Typhoon Haiyan i te 2013, telā ne lasi ‵ki tena fakamaseiga i Filipaina. E tokouke a taina mo tuagane ne ‵galo olotou fale mo kope. Kae ne ‵kau fakatasi olotou kāiga faka-te-agaga i te lalolagi kātoa o fesoasoani atu ki a latou. Ne fesoasoani atu a tino e tokouke i mea tau tupe io me ‵kau ki te galuega fakatūtū lasi, telā e aofia i ei a te ‵toe faitega mo te faka‵fouga o fale kolā toeitiiti kae kātoa te 750 i nāi masina fua! I te taimi o te famai ko te COVID-19, ne ga‵lue malosi a Molimau o fesoasoani ki olotou taina mo tuagane. Kafai e fesoasoani fakavave atu tatou ki ‵tou kāiga faka-te-agaga, e fakaasi atu ei me e a‵lofa tatou ki a latou.

15-16. E ‵tusa mo te Luka 6:36, se a te auala tāua e mafai o fakaakoako tatou ki te ‵tou Tamana faka-te-lagi?

¹⁵ A Ieova e alofa fakamagalo. (Faitau te Luka 6:36.) E lagona eiloa ne tatou i aso katoa a te alofa fakamagalo o te ‵tou Tamana faka-te-lagi. (Sala. 103:10-14) A soko o Iesu e se ‵lei katoatoa; kae ne fakaasi atu ne ia te alofa  fakamagalo ki a latou. Ne loto fiafia foki a ia o tuku atu tena ola e pelā me se taulaga ko te mea ke mafai o fakamagalo ‵tou agasala. (1 Ioa. 2:1, 2) E mata, e se fia fakapilipili atu koe ki a Ieova mo Iesu ona ko te lā a‵lofa fakamagalo?

¹⁶ E fakamalosi aka ne tatou a te fusi o te alofa i te ‵tou kāiga faka-te-agaga māfai e “fakatau fakamagalo” tatou. (Efe. 4:32) E tonu, a te fakamagalo o nisi tino e mafai o faigata i nisi taimi, tela la, e ‵tau o taumafai malosi tatou ki ei. Ne mafaufau se tuagane e tokotasi me i te mataupu i te Faleleoleo Maluga ko te “Ke Fakatau Fakamagalo te Suā Tino ki te Suā Tino” * ne fesoasoani atu ki tou fafine ke fai ne ia te mea tenā. Ne tusi mai a ia: “A te sukesuke ki te mataupu tenei ne fesoasoani mai ke lavea ne au te aoga ke fakamagalo a nisi tino. E fakamatala mai i ei me i te loto fiafia o fakamagalo a nisi tino, e se fakauiga i ei me ko talia ne koe olotou uiga sē ‵lei io me fakafeoloolo aka ei a fakamaseiga ne fai ne latou. Kae e fakauiga a te fakamagalo ki te fakapuli o mea ‵se kae fakatumau ou lagonaga filemu.” Kafai e loto fia‵fia tatou o fakamagalo ‵tou taina mo tuagane, e fakaasi atu i ei me e a‵lofa tatou ki a latou kae ko fakaakoako tatou ki te ‵tou Tamana, ko Ieova.

17. E ‵tusa mo te Mataio 5:16, e fakaaloalo atu pefea tatou ki te ‵tou Tamana faka-te-lagi?

¹⁷ Se tauliaga sili ke aofia tatou i se kaukāiga i te lalolagi kātoa. E ma‵nako tatou ke ‵kau mai a tino e tokouke ke tapuaki fakatasi tatou ki te ‵tou Atua. E ‵tusa mo te mea tenā, e ‵tau o fakaeteete tatou ke mo a ma fai so se mea telā e fakaata atu ei i se auala sē ‵lei a tino o Ieova io me ko te ‵tou Tamana faka-te-lagi. E ‵tau mo tatou o taumafai faeloa ke ‵lei ‵tou amioga ko te mea ke tosina mai a tino ki te tala ‵lei.—Faitau te Mataio 5:16.

18. Se a te mea e mafai o fesoasoani mai ke talai atu tatou e aunoa mo te ma‵taku?

¹⁸ I nisi taimi, kāti ko fakatauemu io me fakasaua mai a nisi tino ona ko tatou e faka‵logo ki te ‵tou Tamana faka-te-lagi. E a māfai e ‵mā tatou ke fai‵pati atu ki nisi tino e uiga ki ‵tou talitonuga? E tali‵tonu tatou me ka fesoasoani mai  a Ieova mo tena Tama ki a tatou. Ne fakatalitonu atu a Iesu ki ana soko me e se ‵tau mo latou o manava‵se ki te auala e fai‵pati atu ei latou io me ki olotou pati e fai. Kaia? “Me ka tuku atu eiloa ki a koutou a pati kolā ka fai ne koutou i te itula tenā,” ne fai mai a Iesu, “me i tino kolā ka fai‵pati e se ko koutou fua, kae ko te agaga o te otou Tamana telā e faipati atu e auala i a koutou.”—Mata. 10:19, 20.

19. Taku mai se tala o se tino telā ne talai atu mo te loto toa.

¹⁹ Mafaufau ki te tala o Robert. I se taimi e tasi, a koi fai ei tena akoga faka-te-Tusi Tapu kae seki lasi tena iloa, ne tu a ia i mua o te fono i Afelika ki Saute ke fakamatala atu a te pogai e se kau ei a ia ki te kautau. Ne fakamatala atu ne ia mo te loto toa ki te fono me e manako a ia ke tumau i te sē kau ki se feitu ona ko tena alofa ki ana taina Kelisiano. Ne fakatāua malosi ne ia tena tulaga i ‵tou kāiga faka-te-agaga! Ne fesili fakapoi atu a te famasino, “Ko oi ou taina?” Ne seki fakamoemoe a Robert ki te fesili tenā, kae ne masaua fakavave ne ia a te tusi siki o te aso tenā. Ko te Mataio 12:50: “So se tino e fai ne ia te loto o toku Tamana telā i te lagi, ko ia tenā ko toku taina mo toku tuagane mo toku mātua.” E tiga eiloa ne fatoa sukesuke a Robert ki te Tusi Tapu, ne fesoasoani atu a te agaga o Ieova ke tali aka ne ia a te fesili tenā mo nisi fesili kolā ne ‵sili fakapoi mai. E mautinoa eiloa me ne fakamatamata a Ieova i a Robert! Kae e fakamatamata foki a Ieova i a tatou māfai e fakalago‵lago ki a ia ke talai atu mo te loto malosi i tulaga faiga‵ta.

20. Se a te mea e ‵tau o fakaiku aka ne tatou ke fai? (Ioa. 17:11, 15)

²⁰ Ke na fakatāua faeloa ne tatou a te fakamanuiaga me e aofia tatou i se kāiga a‵lofa faka-te-agaga. E maua ne tatou te ‵toe Tamana ‵lei e penā foki mo taina mo tuagane kolā e a‵lofa mai ki a tatou. E se ‵tau o manatu mā‵ma tatou ki mea konei. E taumafai eiloa a Satani mo ana tino ma‵sei o fai tatou ke fakalotolotolua ki te alofa o te ‵tou Tamana faka-te-lagi kae taumafai foki o fakamakosu a te ‵tou fealofani. Kae ne ‵talo eiloa a Iesu mō tatou, o fakamolemole ki tena Tamana ke tausi mai tatou ko te mea ke tumau te ‵tou kāiga i te fealofani. (Faitau te Ioane 17:11, 15.) Ko tali eiloa ne Ieova a te ‵talo tenā. E pelā mo Iesu, ke mo a eiloa ma fakalotolotolua tatou ki te alofa mo te fesoasoani o te ‵tou Tamana faka-te-lagi. Ke na fakaiku aka ne tatou ke fakapili‵pili atu faeloa ki te ‵tou kāiga faka-te-agaga.