1. Иегова кижилерге кым бооп болур?

ИЕГОВА дыка улуг өг-бүлелиг, ынаар «Ооң бүгү чаяалгазының бажында» эң улуг оглу Иисус база хөй санныг дээрниң төлээлери кирип турар (Кол. 1:15; Ыд. ыр. 102:20). Иеговага шынчы кижилер база Ону Адавыс деп адап болур. Ону Иисустуң өөреникчилеринге чугаалаан сөстери көргүзүп турар: «Мээң база силерниң Адавысче, Мээң база силерниң Бурганывысче өрү көдүрлүп үнерим бо-дур» (Ин. 20:17). Ынчангаш Иеговага чуртталгавысты бараалгадып, сугга суктуруп алгаш, ынакшылдыг акы-угбалардан тургустунган өг-бүлениң кежигүнү апаар бис (Мк. 10:29, 30).

2. Бо статьяга чүнү сайгарар бис?

² Чамдык улуска Иегованы ынакшылдыг Адазы деп хүлээп алыры берге боор. А бир кижи акы-угбаларга ынакшылын илередип шыдавас боор. Бичии төлдүң адазы-биле чоок хамаарылгазы ышкаш, Бурган-биле бис база чоок хамаарылгалыг бооп болур бис деп бо статьяга сайгарар бис. Аңаа шынзыгарынга Иисус биле Иегованың аразында хамаарылга биске дузалаар. Оон аңгыда, акы-угбаларывыска эки хамаарылганы көргүзер дээш, Иегованы канчаар өттүнүп болурувусту билип алыр бис.

3. Иисустуң айтып берген мөргүлү Иеговаже чоокшулаарынга биске канчаар дузалап турар?

³ Иегова каржы даргага дөмей эвес. Ол — бисти кичээнгейлиг дыңнаарынга база дузалаарынга белен ынакшылдыг Адавыс-тыр. Иисустуң Иеговага шак ындыг хамаарылгазы өөреникчилеринге өөредип турган мөргүлүнде «дээрде Адавыс» деп сөстерден көскү (Мф. 6:9). Ыдыктыг Бижилгеде Иегованың «Күчүлүг Бурган», «Дээрги-Чаяакчы», «Мөңге Хаан» дээн ышкаш ат-дужаалдары хөй (Э. д. 49:25; Иса. 45:18; 1 Тим. 1:17). Иисус бо ат-дужаалдың кайы-бирээзин ажыглаңар деп болур турган,  ынчалза-даа ол бисти Иегованы чылыг-чымчаа-биле Адавыс деп адаар кылдыр өөреткен. Ынчап кээрге, Иисус бисти база Бурган-биле чоок хамаарылгалыг болзун деп күзээн.

4. Иегова Ооң-биле чоок хамаарылгалыг болурувусту күзеп турар бе? Тайылбырлаптыңар.

⁴ Иегованы ынакшылдыг Ада кылдыр көөрү силерге берге-дир бе? Чамдык улуска берге, чүге дизе чашкы үелеринде ачазының талазындан каржы хамаарылга көрүп өзүп келген улуска «ынакшыл» биле «Ада» деп сөстер көңгүс дүүшпес болур. Ынчалза-даа Иегова бистиң сагыш-сеткиливисти база чүге ынчаар боданып турарывысты дыка эки билир. Бо бодал шынап-ла кижиниң сеткилин оожургадыр-дыр! Бурган бисти Ооң-биле чоок хамаарылгалыг болурун күзеп турар болгаш, Бодунуң Сөзүнде: «Бурганче чоокшулаңар, Ол база силерже чоокшулап кээр» — деп бижээн (Иак. 4:8). Иегова биске дыка ынак база биске эң эки Ада боорун күзеп турар.

5. Лука 10:22-ден алырга, Иеговаже чоокшулаарынга Иисус биске канчаар дузалап турар?

⁵ Иисус биске Иеговаже чоокшулаарынга дузалап турар. Ол Ону бүрүнү-биле өттүнүп, дыка эки билир болгаш: «Мени көрген кижи Адамны көрген болур» — деп чугаалаан (Ин. 14:9). Акывыс дег, Иисус бисти дээрде Адавысты дыңнап, хүндүлээрин өөредип турар. Оон ыңай Иегованы өөртүр дээш, чүнү канчаарын база Ону хомудатпас дээш, чүнү кылып болбазын ол биске тайылбырлап турар. Иисустуң черге чуртталгазындан Иегованың ынакшылының болгаш буянныг сеткилиниң дугайында хөйнү билип ап болур бис. (Номчуптуңар: Лука 10:22.) Ону ам тодаргай көрүптээлиңер.

6. Иегова Иисустуң мөргүлдерин дыңнап турган деп кайыын билир бис? Чижектен чугаалаңар.

⁶Иегова ажы-төлүн кичээнгейлиг дыңнап турар. Оглунуң мөргүлдерин Ооң канчаар дыңнап турганын көрээлиңер. Иисус черге бараалгап турган үезинде дээрде Адазынга үргүлчү мөргүп чораан, а Ол ону кичээнгейлиг дыңнап турган (Лк. 5:16). Иисус шыңгыы шиитпирлер хүлээрде, чижээ, 12 элчинни шилиирде, Иеговага мөргүүрге, Ол дыңнап турган (Лк. 6:12, 13). Оон ыңай Иисус берге байдалдарга таварышкаш, сагыш човаашкыннары-биле үлежирге, Иегова дыңнап турган.  Ону садыпкан дүнеде Иисус шенелдени төлептиг шыдажып эртер күштү Адазындан дилеп турган. Иегова эргим Оглунуң мөргүлүн дыңнаарындан аңгыда, ону быжыктырар дээш Бодунуң төлээзин чоргузупкан (Лк. 22:41—44).

7. Иегова мөргүлдериңерни кичээнгейлиг дыңнап турар деп бодал сагыш-сеткилиңерге кандыг минниишкиннерни оттурар-дыр?

⁷ Амгы-даа үеде Иегова бараалгакчыларының мөргүлдерин кичээнгейлиг дыңнап, эң-не таарымчалыг үеде, эң-не эки кылдыр харыылап турар (Ыд. ыр. 114:1, 2). Индиядан бир угбавыс ону бодунуң чуртталгазынга көрген. Ол аажок муңгарап, сагыш-сеткили аарып турда, Иеговадан дузаны дилеп, мөргүп турган. Угбавыс мынча деп бижээн: «2019 чылдың май айның JW Broadcasting^® программазын меңээ тырттырып каан ышкаш болган, чүге дээрге аңаа дүвүрелдерни болгаш сагышсыралдарны канчаар ажып эртерин чугаалап турган. Иегова шак ынчаар мээң мөргүлдеримге харыылаан».

8. Иегова Иисуска ынакшылын канчаар илередип турган?

⁸ Иегова, Иисуска ышкаш, биске база ынак (Ин. 5:20). Кажан ол черге чурттап турда, Иегова ол дээш сагыш човап, бүгү талазы-биле хандырып турган. Оон ыңай Ол ынакшылын илередип, Оглун мактап турган (Мф. 3:16, 17). Иисус кандыг-даа үеде Адазынга ынанып болур турган болгаш, кажан-даа бодун чааскаанзыргай кылдыр миннивейн чораан (Ин. 8:16).

9. Иегова силерге ынак деп чүге бүзүрээр силер?

⁹ Бистиң кижи бүрүзү, Иисус дег, Иегованың ынакшылын бодунга көрүп чоруур. Бодап көрүңер даан, Иегова биске кайы хире хөйнү кылып турар-дыр! Ол бисти Бодунче хаара туткан. Ол бистиң өөрүшкүвүстү-даа, муңгаралывысты-даа деңге үлежип чоруур, бисти деткиир сагыш човангыр акы-угбаларны берген (Ин. 6:44). Оон ыңай бүзүреливис кошкай бербезин дээш, Иегова биске элбээ-биле «аъш-чемни» берип турар. Ол бистиң хүн бүрүде хереглелдеривисти база хандырып чоруур (Мф. 6:31, 32). Иегованың ынакшылының дугайында хөй боданган тудум, Аңаа ынакшылывыс улам күштелир.

10. Иегованың акы-угбаларывыска хамаарылгазындан чүнү өөренип ап болур бис?

¹⁰ Иегова бистиң акы-угбаларывыска ынак. А биске оларга чылыг-чымчак хамаарылгалыг бооп, ынак бис деп чугаалаары чамдыкта берге. Ол чүүл кайгамчык эвес, чүге дизе бистиң кижизидилгевис болгаш культуравыс аңгы-аңгы. Оон аңгыда, частырыгларны кылыпкаш, бот-боттарывысты хомудадып, чөгендирип болур бис. Ындыг турбуже, ха-дуңмавыстың аразынга ынакшыл тергиидээн байдалды тургузуп, ону деткип шыдаар бис. Ону кылыр дизе, акы-угбаларывысче дээрде Адавыс ышкаш көөр болзувусса эки (Эф. 5:1, 2; 1 Ин. 4:19). Иегованың үлегеринден чүнү өөренип ап болурувусту көрүптээлиңер.

11. Иисус Иегованы өттүнүп, улуска кээргээчел хамаарылганы канчаар көргүскен?

¹¹Иегова «кээргээчел» (Лк. 1:78). Кээргээчел кижи кандыг-бир кижиниң бергедеп турарын көргеш, анаа-ла тогбайн эрте бербес. Ол ону аргалап, аңаа албан дузалаар. Иегова кижилерге шак ындыг хамаарылгалыг. А Иисус Ону бүрүнү-биле өттүнүп турган (Ин. 5:19). Чижээ, Иисус чыылган мөөң чонну көргеш, оларны кээргей берген, чүге дээрге «олар, кадарчызы чок хойлар дег, канчаар-даа харык чок база могап-турупкан болганнар» (Мф. 9:36). Ынчалза-даа Иисус оларны чүгле кээргеп турбаан, ол аарыг улусту экиртип, могап-турупкан улуска дузалаарын кызып чораан (Мф. 11:28—30; 14:14).

12. Акы-угбаларга кээргээчел хамаарылганы канчаар көргүзүп болур бис?

¹² Акы-угбаларга кээргээчел хамаарылганы көргүзер дизивиссе, оларның бергелериниң  дугайында билип алыр болзувусса эки. Чижээ, бир угбавыстың кадыы багай дижик. Ол ооң дугайында улуска чугаалавас-даа болза, дузаны манап турар чадавас. Ооң бажың-балгадын аштап-арыглап алыр харыы бар бе? Азы аъш-чем белеткеп бээр дузаны хереглеп турар бе? Чок болза, бир акывыс ажылын чидирип алган дижик. Аңаа акшаны (кымдан деп чүвени чугаалавайн) бээр болза, база дыка эки дуза боор, чүге дизе ол ажылды дилеп турар үезинде бодунуң хереглелдерин хандырып шыдаар.

13, 14. Иегованың беримчелиин канчаар өттүнүп болур бис?

¹³Иегова беримчелиг (Мф. 5:45). Акы-угбаларывыстың бистен дузаны дилээрин манаан ажыы чок. Ооң орнунга Иегованы өттүнүп, бирги базымны кылып болур бис. Солун чүүл, кым-даа Иеговадан даң бажында хүннүң үнүп кээрин дилевейн турар. Ынчалза-даа Ол ону өөрүп четтиргенин илеретпес-даа улуска берип турар. Ол биске дыка ынак болгаш, хереглелдеривистиң дугайында сагыш човап чоруур. Иегова беримчелиг, буянныг сеткилдиг боорга, Аңаа аажок ынак бис.

¹⁴ Дээрде Адавысты өттүнүп, дыка хөй акы-угбаларывыс дуза дилевээнивисте-ле дузалажып турар. Чижээ, 2013 чылда Филиппиныга «Хайян» деп кедергей күштүг шуурган болган. Ынчан эвээш эвес акы-угбаларывыс бажың-балгадын, эт-хөреңгизин чидирген. Ынчалза-даа бүдүн делегейде ха-дуңмавыс ол-ла дораан дузазын кадар дээш чедип келген. Дыка хөй улус акша-төгерикти өргүп азы бажың-балгадын катап тургузар ажылдарга идепкейлиг киржип турган. Оон бир-даа чыл четпейн, эки турачылар 750 хире бажыңнарны септеп, катап туткан! Иегованың Херечилериниң бот-боттарынга дузалажырынга белени COVID-19 деп хамчык аарыг үезинде база дыка тода көзүлген. Бир эвес ха-дуңмавыстың кайы-бирээзи хай-халапка таваржы берген болза, дораан-на дузавысты кадар бис. Ынчалдыр акы-угбаларывыска ынакшылды көргүзүп турар бис.

15, 16. Лука 6:36-дан алырга, дээрде Адавысты чүге өттүнер болзувусса эки?

¹⁵Иегова энерелдиг болгаш өршээринге белен. (Номчуптуңар: Лука 6:36.) Бис ону хүн бүрүде көрүп турар бис (Ыд. ыр. 102:10—14). Иисус өөреникчилериниң четпес талаларын көрүп тургаш-даа, оларга энерелдиг турган.  Оон артык, шупту изекчилериниң бачыттарын өршээр дээш, ол бодунуң амы-тынын өргүлге берген (1 Ин. 2:1, 2). Иегова, Иисус-биле чоок хамаарылгавыс дээш өөрүп чоруур бис!

¹⁶ Ха-дуңмавыстың аразында ынакшылды быжыктырар дизе, бот-боттарывысты сеткиливистен өршээр болзувусса эки (Эф. 4:32). Чамдыкта кижини өршээри берге, ол ала чайгаар болдунмас. Бир угбавыска «Великодушно прощайте друг друга» * деп статья дузалаан. «Ол статья мени өршээчел чорукче көрүжүмнү өскертип, ооң эки талаларын билип алырынга дузалаан. Ында мынча дээн: „Өршээри дээрге улустуң шын эвес кылдыныгларын деткип азы өскелерге чедирген хоразынче караавысты шийип турар бис дивээни ол. Өршээри дээрге хомудалдан адырлып, сеткилинге амыр-тайбыңны кадагалап алыры-дыр“» — деп, ол үлешкен. Кады бүзүрээн акы-угбаларга хомудаарының орнунга, оларны өршээр болзувусса, дээрде Адавыс Иегованы өттүнүп, оларга ынакшылывысты көргүзер бис.

17. Матфей 5:16-дан алырга, дээрде Адавысты канчаар алдаржыдып болур бис?

¹⁷ Делегей чергелиг ха-дуңмавыстың кезии болуп, кады Бурганга мөгеери дээрге дыка улуг алдар-хүндү-дүр! Өске улус база бистиң-биле ол өөрүшкүнү үлежирин күзээр бис. Ынчангаш дээрде Адавыстың болгаш Ооң чонунуң адын баксыратпас дээш, кичээнгейлиг болур бис. Улус бисти көргеш, Иеговага бараалгаксай бээр кылдыр, бүгү талазы-биле шын алдынарын кызып чоруур бис. (Номчуптуңар: Матфей 5:16.)

18. Эрес-дидим суртаалдаарынга биске чүү дузалаар?

¹⁸ Бис дээрде Адавыска дыңнангыр боорувуска, чамдык улус бисти кыжырып, безин истеп сүрүп турар. Ындыг үелерде суртаалдаары белен эвес бооп болур. Эрес-дидим болурунга биске чүү дузалаар? Иегова биле Ооң Оглу бисти кезээде деткииринге белен. Иисус өөреникчилерин мынча деп бүзүреткен: «Олар силерни эккээрге, чүнү база канчаар чугаалаарыл деп сагыш човаваңар. Чүнү чугаалаарыңар силерге ол шакта илерей бээр.  Чүге дээрге силер эвес, а Адаңарның Сүлдези силерни дамчыштыр чугаалай бээр» (Мф 10:19, 20).

19. Бурганның сүлдези биске суртаалдаарынга канчаар дузалап турар? Чижектен чугаалаңар.

¹⁹ Мурнуу Африкада Роберт-биле мындыг таварылга болган. Ол каш чыл бурунгаар Библияны чаа-ла өөренип эгелээн үезинде эвээш билиглерлиг турган. Ол шериг албанын эрттирбес дээрге, ону судче берипкен. Судка ол кады бүзүрээн ха-дуңмазынга ынак болгаш, ок-чепсек тутпазын дидими-биле чугаалаан. Шынап-ла, Роберт Иегованың өг-бүлезиниң кежигүнү болур алдар-хүндүнү үнелеп чораан! Хенертен судья: «А сээң ха-дуңмаң кымыл?» — деп оон айтырган. Роберт ол айтырыгга белеткенмээн, ынчалза-даа ооң угаанынга ол хүннүң шүлүү кирип келген: «Дээрде Ачамның күзел-соруун күүседип чоруур кижи бүрүзү Мээң ха-дуңмам база авам боор болгай» (Мф. 12:50). Солун чүүл, Бурганның сүлдезиниң ачызында Роберт Библияны көңгүс чоокта чаа өөренип эгелээн-даа болза, судьяның нарын айтырыгларынга харыылап шыдаан. Чугаажок, Иегова Робертке аажок чоргаарланган! Бис база белен эвес байдалдарда Ооң дугайында өскелерге чугаалаар дээш дидим чорукту мөргүп дилээривиске, Иегова биске чоргаарланыр.

20. Чүү чүвеже хөөнненир болзувусса эки? (Иоанн 17:11, 15).

²⁰ Иегованың ынакшылдыг өг-бүлезиниң кежигүнү болуру — дыка улуг аас-кежик-тир! Бисте эң-не эки дээн Ада база бердинген хөй акы-угбаларывыс бар. Ол черле ындыг боор ужурлуг деп бодавас болзувусса эки. Эрлик болгаш ооң талалакчылары бистиң демниг чоруувусту үрээр дээш база Иегованың ынакшылынга чигзиниглер оттурар дээш, бар шаа-биле кызып турар. Иисус ону дыка эки билир болгаш, өг-бүлевис чаңгыс аай эп-найыралдыг болзун дээш, бисти кадагалаарын Адазындан дилеп турган. (Номчуптуңар: Иоанн 17:11, 15.) Иегова ол мөргүлге харыылап турар. Иисус ышкаш, дээрде Адавыстың ынакшылынга болгаш деткимчезинге кажан-даа чигзинмээлиңер. Чыышта акы-угбалар-биле кажангызындан-даа артык чоок эдержирин кызаалыңар!