1. Садақәтмән инсанлар Йәһва Худа билән қандақ мунасивәт орниталайду?

 ЙӘҺВА ХУДАНИҢ аилисидә барлиқ мәвҗудатларниң тунҗиси болған Әйса вә сан-санақсиз пәриштиләр бар (Кол. 1:15; Зәб. 103:20). Һәзрити Әйса йәр йүзидә болғанда, садақәтмән инсанларниң Худани Атам дәп чақиралайдиғанлиғини көрсәткән. Әйса өз шагиртлириға сөз қилғанда, Худани «силәрниңму Атаңлар» дәп тилға алған (Йоһ. 20:17). Биз Йәһваға өзүмизни беғишлап чөмдүрүлүштин өткәндә, меһир-муһәббәткә толған етиқатчиларниң чоң аилисиниң бир әзаси болимиз (Марк 10:29, 30).

2. Бу мақалидә немини муһакимә қилимиз?

² Бәзиләр үчүн Йәһва Худани меһир-муһәббәтлик Атидәк көрүш қийин. Башқилар етиқатчи қериндашларға болған меһир-муһәббитини қандақ ипадиләшни билмәслиги мүмкин. Бу мақалидә Йәһва Худани Ата дәп чақиришимизға вә Униңға йеқинлишишимизға Әйсаниң қандақ ярдәм беридиғанлиғини көрүп чиқимиз. Йәнә асмандики Атимизни үлгә қилип, етиқатчи қериндашлиримизға қандақ муамилә қилишниң йоллирини үгинимиз.

3. Үлгилик дуа бизни Йәһва Худаға қандақ йеқинлаштуриду?

³ Йәһва Худа меһир-муһәббәтлик Ата. Әйса өзигә охшаш бизниңму Худани қопал буйруқваз әмәс, бәлки мулайим, көйүмчан, асан параңлашқили болидиған Атидәк көрүшимизни халиған. Буни Әйсаниң шагиртлириға қандақ дуа қилишни үгәткинидин көрәләймиз. У үлгилик дуани «Атимиз» дегән сөз билән башлиған (Мәт. 6:9). Әйса бизни Йәһва Худани «Һәммигә Қадир», «Яратқучи», «Падишаниң Падишаси» дегәндәк һәрхил нам-унванлар билән аташқа дәвәт қилалатти (Ярит. 49:25; Йәшая 40:28; Тим. 1-х. 1:17). Бирақ Әйса йеқин мунасивәтни көрситидиған «Ата» сөзини ишләткән.

4. Йәһва Худа бизниң Өзигә йеқинлишишимизни халайдиғанлиғини қәйәрдин билимиз?

 ⁴ Бәзилиримиз кичигимиздин ата меһрини көрмәй чоң болғач, биз үчүн Худани меһир-шәпқәтлик атидәк қобул қилиш қийинға чүшиши мүмкин. Йәһва Худа бизниң шундақ һис-туйғулиримизни чүшиниду. Буни билиш биз үчүн чоң бир тәсәлли. У бизгә йеқинлишишни халайду. Шуңа Муқәддәс китап бизни үндәп шундақ дәйду: «Худаға йеқинлишиңлар һәм Уму силәргә йеқинлишиду» (Яқуп 4:8). Йәһва бизни интайин яхши көриду. У биз арзу қилип кәлгән ата меһрини бизгә йәткүзиду.

5. Луқа 10:22-айәткә асасланғанда, Йәһва Худаға йеқинлишишимизға Әйса қандақ ярдәм берәләйду?

⁵ Әйса бизниң Худаға йеқинлишишимизға ярдәм берәләйду. У Йәһва Худани яхши билгәч, һәрбир сөз-һәрикәтлиридә Униң пәзиләтлирини мукәммәл әкс әттүргән. Әйса: «Мени көргән киши Атамниму көргән болиду»,— дегән (Йоһ. 14:9). Әйса у худди акимиздәк, асмандики Атимизни һөрмәтләшни вә бойсунушни, уни хурсән қилмайдиған ишлардин жирақ турушни вә Униң қобул қилишиға еришишни үгитиду. Бирақ, болупму, Әйсаниң йәр йүзидә болғанда, ейтқан гәп-сөзлири вә қилған ишлири Йәһваниң қанчилик меһир-шәпқәтлик вә сөйгү-муһәббәткә толған Ата екәнлигини чүшинишимизгә ярдәм бериду (Луқа 10:22ни оқуң). Төвәндә бәзи мисалларни көрүп бақайли.

6. Йәһва Худа Әйсаниң дуалириға қулақ салғанлиғини қәйәрдин билимиз? Мисал кәлтүрүң.

⁶ Йәһва Худа өз пәрзәнтлирини диққәт билән тиңшайду. У тунҗа Оғлиниң сөзигә қандақ қулақ салғанлиғини көрүп бақайли. Өз Оғли йәр йүзидә болғанда, қилған дуалириға Йәһва һәрқачан қулақ салған (Луқа 5:16). Әйса 12 әлчисини таллашқа охшаш муһим қарарларни чиқириш алдида дуа қилғанда, Йәһва Худа қулақ салған (Луқа 6:12, 13). Йәнә Оғлиниң ғәм-тәшвишкә чүшкәндә, қилған дуалириға қулақ салған. Йәһуда Әйсаға сатқунлуқ қилип, уни тутуп бериштин авал, у өз Атисиға йүз беридиған ишлар һәққидә ихлас билән дуа қилған. Йәһва Худа униң дуасиға қулақ селипла қалмай, бәлки йәнә сөйүмлүк Оғлиға күч-мәдәт бериши үчүн бир пәриштисини әвәткән (Луқа 22:41—44).

7. Йәһва Худа дуалиримизға қулақ салидиғанлиғини билгәндә, қандақ һис-туйғида болимиз?

 ⁷ Бүгүнки күндә Худа Өз хизмәтчилириниң дуалириға давамлиқ қулақ салиду вә өз вақтида әң яхши йол билән җавап қайтуриду (Зәб. 116:1, 2). Һиндистандики бир қериндашниң мисалини көрүп бақайли. У узун вақит зиядә ғәм-тәшвиш ичидә яшиған вә мошу иш һәққидә Йәһваға ялвуруп дуа қилған. У мундақ язди: «“JW интернет телевизийәси” 2019-жил, 5-айдики программиси ғәм-әндишиләргә қандақ тәқабил туруш һәққидә болуп, у дәл мениң үчүн тәйярланған еди. Мошу йол билән Йәһва дуалиримға җавап бәрди».

8. Әйсаға болған сөйгү-муһәббитини Йәһва Худа қайси усулда ипадилигән?

⁸ Йәһва Худа Әйсаға ғәмхорлуқ қилип, униңға меһир-муһәббәт көрсәткәндәк, бизгиму ғәмхорлуқ қилип, меһир-муһәббәт көрситиду (Йоһ. 5:20). Әйса йәр йүзидә яшиғанда, Йәһва униң роһий, һис-туйғу вә җисманий җәһәттики барлиқ еһтияҗлирини қамдиған. Униңдин башқа, Худа Өз Оғлиға болған сөйгү-муһәббитини вә униңдин хурсән екәнлигини ейтип турған (Мәт. 3:16, 17). Асмандики меһир-шәпқәтлик Атиси дайим униң билән биллә болғач, Әйса һечқачан өзини ялғуз һис қилмиған (Йоһ. 8:16).

9. Йәһва Худаниң бизни яхши көридиғанлиғини қандақ билимиз?

⁹ Әйсаға охшаш бизму Худаниң сөйгү-муһәббитини һис қиливатимиз. У бизни Өзигә җәлип қилди вә һис-туйғу җәһәттики еһтияҗлиримизни қамдаш вә хошал-хорам болушимиз үчүн меһир-муһәббәткә вә инақ-иттипақлиққа толған бир роһий аилини бәрди (Йоһ. 6:44). Униңдин башқа, күчлүк иман-етиқадимизни сақлишимиз үчүн Йәһва Худа роһий озуқларни бәрди. Һәтта У күндилик турмушимизға керәклик маддий еһтияҗлиримизни тәминләп бериватиду (Мәт. 6:31, 32). Яратқучиниң бизгә болған сөйгү-муһәббити һәққидә чоңқур ойланғансири, Униңға болған сөйгү-муһәббитимизму ашиду.

10. Йәһва Худаниң қериндашлиримизға көрсәткән меһир-муһәббитидин биз немиләрни үгинәләймиз?

¹⁰ Йәһва Худа қериндашлиримизни сөйиду. Бирақ биз үчүн уларниң бизгә көрсәткән меһир-муһәббитини һис қилиш вә өзүмизниң уларға болған сөйгү-муһәббитини ипадиләш асанға чүшмәслиги мүмкин. Сәвәви биз охшимайдиған мәдәнийәт вә арқа көрүнүшигә егә. Биз һәммимиз хаталиқларни өткүзимиз, башқиларни териктүримиз яки үмүтсизләндүримиз. Амма роһий аилимизгә сөйгү-муһәббитимизни ипадиләш үчүн давамлиқ тиришчанлиқ көрситиләймиз. Шундақ қилиш үчүн һәрдайим асмандики Атимизни үлгә қилип, қериндашлиримизға меһир-муһәббәт көрситәйли (Әфәс. 5:1, 2; Йоһ. 1-х. 4:19). Һазир Атимиз Йәһвани қандақ үлгә қилалайдиғанлиғимизни көрүп бақайли.

11. Әйса Мәсиһ Худаниң рәһим-шәпқитини қандақ көрсәткән?

¹¹ Йәһва рәһим-шәпқәтлик Ата (Луқа 1:78). Меһир-шәпқәтлик инсан башқиларниң азап-оқубәт чекиватқанлиғини көргәндә, уларға һисдашлиқ билдүриду. Уларға ярдәм вә тәсәлли беришниң йоллирини издәйду. Әйса адәмләргә һисдашлиқ қилип, Йәһваниң уларға көңүл бөлидиғанлиғини көрсәткән (Йоһ. 5:19). Әйса бир топ адәмләрни көргәндә, қандақ һис-туйғида болғанлиғи һәққидә Муқәддәс китапта мундақ йезилған: «Көплигән адәмләрни көрүп, уларға ичи ағриди, чүнки улар падичисиз қалған қойлардәк қийнилип һәм тарилип кәткән еди» (Мәт. 9:36). Әйса уларға һисдашлиқ көрситипла қалмай, ярдәм бериш үчүн һәрикәт қилған. У ағриқларни сақайтип, җапакәшләр вә еғир жүкни үстигә алғанларға арамлиқ бериш үчүн ярдәм қолини сунған (Мәт. 11:28—30; 14:14).

12. Меһир-шәпқәтимизни башқиларға қандақ көрситәләймиз? Мисал кәлтүрүң.

¹² Биз қериндашлиримизға меһир-шәпқәт көрситиштин бурун, улар қандақ қийинчилиқларға  дуч келиватқанлиғи һәққидә ойлинишимиз керәк. Бир аял қериндишимизниң саламәтлиги начар дәйли. У һечқачан өз қийинчилиқлирини башқиларға ейтмайду. Бирақ униңға ярдәм қолумизни сунсақ, у хошал болуши мүмкин. Шуңа өзүмиздин шундақ сорап көрсәк болиду: «Өз аилисиниң маддий еһтияҗини қамдашқа күчи йетәмду? Тамақ тәйярлиши вә өй ишлириға ярдәм берип, азғина болсиму, жүкини йениклитәләймәнму?» Бир бурадәр иш-хизмитидин айрилип қалди дәйли. Йеңи бир хизмәтни тапқичә, униңға ейтмай азғина пулни соға сүпитидә берәләймизму?

13, 14. Йәһва Худани үлгә қилип сехийлиғимизни қандақ көрситәләймиз?

¹³ Йәһва Худа сехий Ата (Мәт. 5:45). Қериндашлиримиз биздин ярдәм соришини күтүп олтармай, Худани үлгә қилип, тәшәббусқарлиқ билән уларға меһри-шәпқәт көрситишимиз керәк. Биз һечқачан һәр күни қуяшниң көтирилиши үчүн дуа қилмаймиз. Шундақтиму Йәһва һәммә җанлиқларниң һаят кәчүрүши, һәтта Униңға миннәтдар болмиғанлар үчүнму сехийлиқ билән қуяш нурини чачқузиду. Еһтияҗлиримизни қамдаш арқилиқ бизгә болған сөйгү-муһәббитини көрситип келиватиду. Шундақ меһрибан вә сехий Худайимизни бәк яхши көримиз.

¹⁴ Нурғун қериндашлиримиз Йәһва Худани үлгә қилип, тәшәббусқарлиқ билән сехийлиқ көрситиватиду. Мәсилән, 2013-жили дәһшәтлик қара боран Хаян Филипинға зор вәйранчилиқларни елип кәлди. Нурғун қериндашлиримиз өй-маканлиридин вә мал-мүлүклиридин айрилди. Амма дунияниң җай-җайлиридики роһий аилә әзалиримиз уларға тезликтә ярдәм қолини сунди. Көплигән қериндашлар уларға ихтисадий ярдәм бәрди яки қурулуш ишлириға қатнашти. Нәтиҗидә, улар бир жилниң ичидә 750тин көпирәк өйләрни ремонт қилди яки қайта ясап чиқти. Таҗсиман вирус мәзгилидә, биз қериндашлиримизға ярдәм бериш үчүн көп күч чиқардуқ. Роһий аилимиздики қериндашлиримизға дәрһал ярдәм қолумизни сунсақ, уларни яхши көридиғанлиғимизни көрситимиз.

15, 16. Луқа 6:36-айәткә асасланғанда, асмандики Атимизни үлгә қилиш үчүн немә қилишимиз керәк?

¹⁵ Йәһва рәһимдил вә кәчүрүмчан Ата (Луқа 6:36ни оқуң). Һәр күни биз асмандики Атимизниң рәһимдиллиғини һис қиливатимиз (Зәб. 103:10—14). Әгәшкүчилири  намукәммәл болсиму, Әйса уларға рәһимдил вә кәчүрүмчан болған. У өз һаятини һәтта бизниң гуналиримиз үчүн қурбанлиққа бәргән (Йоһ. 1-х. 2:1, 2). Йәһва Худа вә Әйсаниң рәһимдиллиғи вә кәчүрүмчанлиғи бизни уларға йеқинлаштуриду.

¹⁶ Биз кәчүрүмчан болсақ, роһий аилимизниң муһәббәт риштисини күчәйтимиз (Әфәс. 4:32). Бәзидә башқиларни кәчүрүш асан әмәс, шундақтиму кәчүрүшкә тиришишимиз керәк. Бир қериндишимизниң кәчүрүмчан болушни үгинишигә «Күзитиш мунаридики» «Бир-бириңларға кәчүрүмчан болуңлар» b дегән бир мақалә ярдәм бәргән. У шундақ дәйду: «Бу мақалини оқуп, башқиларни кәчүрүш маңа қандақ ярдәм беридиғанлиғини чүшәндим. Шуни чүшинип йәттимки, кәчүрүмчан болуш башқилар өткүзгән хаталиқларни ақлаш яки йәткүзгән зиянға пәрва қилмаслиқни билдүрмәйду. Әксичә кәчүрүмчан болуш шундақ хаталиқларни унтуп адавәт сақлимай, көңлүмизни тинч-хатирҗәм сақлашни билдүриду». Қериндашлиримизни кәчүрсәк, уларға болған сөйгү-муһәббитимизни көрситип, асмандики Атимиз Йәһвани үлгә қилған болимиз.

17. Мәтта 5:16-аяткә асасланғанда, асмандики Атимизға шан-шәрәп кәлтүрүш үчүн немә қилалаймиз?

¹⁷ Дунияниң җай-җайлиридики қериндашлардин тәшкил тапқан меһир-муһәббәткә толған чоң аилиниң әзаси болуш, биз үчүн әҗайип шан-шәрәптур. Әлвәттә биз техиму нурғун кишиләрниң бизгә қошулуп, Худаға ибадәт қилишини халаймиз. Шуни әстә тутқан һалда, биз Йәһваниң хәлқи яки асмандики Атимизниң намиға дағ кәлтүридиған һәрқандақ ишларни қилиштин өзүмизни җирақ тутушимиз керәк. Биз яхши иш-һәрикәтлиримиз арқилиқ кишиләрни хуш хәвәргә җәлип қилишни халаймиз (Мәтта 5:16ни оқуң).

18. Қорқмай гувалиқ беришимизгә нәмә ярдәм бериду?

¹⁸ Худаға бойсунуп яшисақ, бәзидә башқиларниң тәнқитлишигә, һәтта зиянкәшлигигә дуч келишимиз мүмкин. Башқиларға иман-етиқадимиз һәққидә сөз қилиштин қорқсақ, нәмә қилсақ болиду? Йәһва Худа вә Оғлиниң бизгә  ярдәм беридиғанлиғиға ишәнсәк болиду. Әйса өз шагиртлириға немә дейиш, қандақ сөзләш һәққидә ғәм қилмаслиқни ейтқан. Немә үчүн? Әйса чүшәндүрүп мундақ дегән: «Шу вақитта немә дәйдиғиниңлар силәргә несип қилиниду. Чүнки бир силәр җавап бәрмәйсиләр, бәлки Атаңларниң роһи силәр арқилиқ сөзләйду» (Мәт. 10:19, 20).

19. Җасарәт билән гувалиқ бәргән бириниң мисалини ейтип бериң.

¹⁹ Робертниң мисалини көрүп бақайли. Униң Муқәддәс китапни үгәнгинигә техи узун болмиғач, Муқәддәс китап һәққидики билими чәклик еди. У җәнубий Африкадики бир һәрбий сотқа тартилғанда, сот алдида өзиниң етиқатчи қериндашлирини сөйгәнлиги үчүн бетәрәпликни сақлап қилишни халайдиғанлиғини җасарәт билән чүшәндүргән. У өзиниң роһий аилисидики орнини қәдирлигән еди! Сотчи туюқсиз униңдин: «Кимләр сениң қериндашлириң?»— дәп сориған. Роберт үчүн күтилмигән бир соал еди, бирақ у дәрһал шу күндики күндилик айәтни есигә алған. У Мәтта 12:50-айәт еди: «Ким асмандики Атамниң ирадисини орунлиса, шу маңа һәм иним һәм сиңлим, һәм анам». Һәтта Муқәддәс китапни үгәнгинигә техи узун болмиған болсиму, Робертниң күтилмигән бу удул соалға вә башқа бирқанчә соалларға җавап беришигә Йәһва Худа Өз роһи арқилиқ ярдәм бәргән. Йәһваниң Роберттин бәкму пәхирләнгәнлиги ениқ! Шуниңдәк бизму асмандики Атимизға тайинип, һәр түрлүк қийин вәзийәтләрдә җасарәт билән вәз ейтсақ, У биздинму пәхирлиниду.

20. Биз чоқум немә қилишни қәтъий қарар қилишимиз керәк? (Йоһан 17:11, 15)

²⁰ Биз меһир-муһәббәткә толған роһий аилигә тәвә. Бу бәрикәтни давамлиқ қәдирләйли. Бизниң арзу қилғандәк Атимиз вә яхши көридиған қериндашлиримиз бар. Биз һәрқачан буниң үчүн миннәтдар болушимиз керәк. Шәйтан вә униң рәзил әгәшкүчилири бизни Йәһваниң сөйгү-муһәббитидин гуманландурушқа вә аримиздики бирликни бузушқа тиришиду. Бирақ Әйса биз үчүн дуа қилип, Атимиздин бизни қоғдашни сориған. Йәһва Худа бу дуаға җавап бериватиду. Шуңа һазир роһий аилимизниң бирлиги бузулмай сақлиниватиду (Йоһан 17:11, 15ни оқуң). Бизму Әйсаға охшаш асмандики Атимизниң сөйгү-муһәббити вә қоллап-қувәтлишидин һәргизму гуман қилмайли. Қәтъий қарарға келип, давамлиқ роһий аилимизгә йеқинлишайли.