1. Ukamba upi omanu vakuekolelo va pondola oku kuata la Yehova?

KEPATA liafendeli va Yehova mua kongela Yesu okuti eye “uveli woviluvo viosi” kuenda olohuluwa viovangelo. (Va Kol. 1:15; Osa. 103:20) Eci Yesu a kala palo posi eye wa kuatisa omanu oku kuata elomboloko liokuti ovo va ponduile oku tukula Yehova okuti Isiavo. Yesu poku sapela lolondonge viaye wa tukula hati Yehova “Isiange okuti Isiene.” (Yoa. 20:17) Eci tu litumbika ku Yehova loku papatisiwa, tu tiamẽla kepata lia vamanji vakuacisola.—Mar. 10:29, 30.

2. Nye tu lilongisa vocipama cilo?

² Vamue va kuete ocitangi coku tenda Yehova nda Isiavo ukuacisola. Vakuavo va kuete ocitangi coku situlula ocisola va kuetele vamanji. Vocipama cilo, tu lilongisa ndomo Yesu a tu kuatisa oku tenda Yehova nda Isietu ukuacisola una okuti tu pondola oku amẽla kokuaye. Tu lilongisavo ndomo tu setukula Yehova konjila ndomo tu tata vamanji.

3. Ohutililo yi tu kuatisa ndati oku amẽla ku Yehova?

³ Yehova Isia umue ukuacisola. Yesu o yongola okuti tu tenda Yehova ndeci eye a tu tenda ndokuti ndonjali yimue ukuacisola haeye wa lianja okuti ka tu u tendi ndomunu umue wa kemãla, pole, ka lianjele. Tu ci limbukila konjila ndomo Yesu a longisa olondonge viaye oku likutilila. Eye wa fetika lolondaka viokuti: “A Isietu.” (Mat. 6:9) Yesu nda wa tu sapuila oco tu tukule Yehova okuti ‘Ukuonene Wosi,’ “Ululiki,” ale “Soma yonahũlũlua.” Oku tukula olondaka evi ka cĩviko,  momo Embimbiliya li tukula olonduko viaco viesumbilo. (Efet. 49:25; Isa. 40:28; 1 Tim. 1:17) Pole, Yesu wa tukula ondaka “Isia.”

4. Tua kũlĩha ndati okuti Yehova o yongola okuti tu amela kokuaye?

⁴ Anga hẽ ca tĩla kokuove oku tenda Yehova nda Isia umue ukuacisola? Vamue pokati ketu ca va tĩlila. Nda isietu wa tu cita ka tu kuetele ocisola, ci tĩla oku tava okuti kuli isia umue o tu sole. Ci lembeleka calua oku kũlĩha okuti Yehova wa kũlĩha ciwa ekalo lietu! Eye o yongola oku kala ocipepi letu. Eli olio esunga lieci Ondaka yaye yi tu sapuila hati: “Ameli ku Suku kuenje eye amela kokuene.” (Tia. 4:8) Yehova o tu sole kuenje eye o tu sapuila hati o kala onjali yimue ya velapo okuti yikuavo ka kuli.

5. Ndomo ca tangiwa ku Luka 10:22, Yesu o tu kuatisa ndati oku amela ku Yehova?

⁵ Yesu o tu kuatisa oku amela ku Yehova. Yesu wa kũlĩha ciwa Yehova kuenda o setekula ciwa ovituwa Viaye, omo liaco wa popia hati: “Wosi o ndi mola, o molavo Isia.” (Yoa. 14:9) Ndeci ci linga vahuvetu, Yesu o tu longisa oku sumbila loku pokola Isietu, ndomo tu yuvula oku U sumuisa kuenda ndomo tu pondola oku taviwa Laye. Vokuenda kuomuenyo wa Yesu palo posi, wa tu kuatisa oku kuata elomboloko liokuti Yehova ukuahenda kuenda ukuacisola. (Tanga Luka 10:22.) Tu kũlĩhĩsi ovindekaise vimue.

6. Tukula ovindekaise vimue vi lekisa ndomo Yehova a yevelela Yesu eci a kala oku likutilila.

⁶ Yehova wa yevelela omõlaye. Kũlĩhĩsa ndomo Yehova a yevelela Omõlaye uveli. Yehova wa yevelela olohutililo vialua via lingiwa Lomõlaye osimbu a kala palo posi. (Luka 5:16) Eye wa yevelela Yesu oku likutilila catiamẽla koku nõla onjila yimue ya kuata esilivilo lialua okuti, yoku nõla 12 kovapostolo vaye. (Luka 6:12, 13) Yehova wa yevelelavo olohutililo via Yesu eci a kala lesakalalo. Osimbu Yesu ka pakuiwile, wa lipilika oku likutilila ku Isiaye catiamẽla koseteko ya tĩla a laikele oku pita layo. Yehova ka yevelile lika olohutililo via Yesu, pole, wa tumavo ungelo umue oco a pamise Omõlaye o soliwe.—Luka 22:41-44.

7. Tu liyeva ndati oku kũlĩha okuti Yehova o yevelela olohutililo vietu?

 ⁷ Koloneke vilo, Yehova amamako oku yevelela olohutililo viafendeli vaye kuenje eye o vi tambulula votembo ya sokiyiwa kuenda lonjila ya sunguluka. (Osa. 116:1, 2) Kũlĩhĩsa ndomo manji umue ko India a limbuka ndomo Yehova a tambulula olohutililo viaye. Eye wa kala oku liyaka lasakalalo alua kuenje lutima wosi wa likutilila ku Yehova catiamẽla kasakalalo aco. Eye wa soneha hati: “Ocipama co JW Broadcasting^® cosãi ya Kupemba 2019 ca lombolola eci tu sukila oku linga nda tu kasi lasakalo kuenje eci oco nda sukilile. Eyi ya kala etambululo liohutililo yange.”

8. Lonjila yipi Yehova a lekisa ocisola ku Yesu?

⁸ Yehova o tu sole kuenda o tu tata, ndeci a solele Yesu kuenje wo tata toke vokuenda kuovitangi a liyaka lavio palo posi. (Yoa. 5:20) Yehova wa kuatisa Yesu konepa yespiritu, kovisimĩlo kuenda ketimba. Kuenje Yehova wa sapuila Omõlaye okuti u sole kuenda wo sanjukila. (Mat. 3:16, 17) Yesu wa kũlĩhĩle okuti Isiaye ukuacisola olonjanja viosi wa laikele oku kala laye kuenda oku u kuatisa kuenje lalimue eteke nda a liyeva okuti o kasi ulika.—Yoa. 8:16.

9. Tua ci kũlĩha ndati okuti Yehova o tu sole?

⁹ Ndeci Yesu, vosi yetu tua siata oku limbuka ocisola ca Yehova volonjila vialua. Kũlĩhĩsa ño handi: Yehova wa tu kokela kokuaye, wa tu ĩha vamanji valua vakuacisola haivo va likuete omunga okuti va tu sanjuisa kuenda va tu kuatisa eci tu kasi lasakalalo. (Yoa. 6:44) Yehova o tu ĩhavo ovina viosi tu sukila oco tu amameko oku pamisa ekolelo lietu. Handi vali, o tu kuatisavo oku sanga ovina tu sukila ketimba. (Mat. 6:31, 32) Eci tu sokolola kocisola Yehova a tu kuetele, ocisola cetu kokuaye ci li vokiya.

10. Nye tu lilongisila konjila ndomo Yehova a tata vamanji?

¹⁰ Yehova o sole vamanjetu. Pole, pamue ka ci leluka kokuetu oku lekisa ocisola kokuavo. Pamue ci tĩla oku ci linga, omo okuti apata etu a litepa, ale tua kulila vakalo alitepa. Kuenda vosi tu linga ovina vi pondola oku sumuisa vakuetu. Ndaño ndoco, tu sukila oku likolisilako oku lekisa ocisola ku vamanji. Ndamupi? Tu ci linga poku setukula Isietu. (Va Efe. 5:1, 2; 1 Yoa. 4:19) Tu kũlĩhĩsi eci tu lilongisila kongangu ya Yehova.

11. Yesu wa setukula ndati ‘ohenda’ ya Yehova?

¹¹ Yehova o lekisa ‘ohenda.’ (Luka 1:78) Omunu ukuahenda o sakalala eci a limbuka okuti omanu va kasi oku tala ohali; eye o sanda onjila yoku eca ekuatiso kuenda elembeleko. Onjila ndomo Yesu a tata omanu, wa setukula ohenda Yehova a va kuatela. (Yoa. 5:19) Onjanja yimue eci Yesu a mola owiñi, “wa va kuatela ohenda, momo va kala oku talisiwa ohali loku sakalaisua ndolomeme ka vi kuete ungombo.” (Mat. 9:36) Yesu ka lekisile lika ohenda, pole, wa linga cimue oco a va kuatise. Eye wa sakula ava va vela kuenda wa kuatisa vana va ‘kava haivo va kuetele ovilemo.’—Mat. 11:28-30; 14:14.

12. Lombolola ndomo tu pondola oku lekisa ohenda.

¹² Nda tua konomuisa ovitangi vamanjetu va kasi oku liyaka lavio, ci ka leluka kokuetu oku lekisa ohenda kokuavo. Ndeci, manji umue ukãi pamue o kasi locitangi cuhayele. Eye lalimue eteke a vanguile catiamẽla kocitangi caye, pole, citava okuti eye o sanjuka nda umue u kuatisa. Eye o kasi oku kuatisa ndati epata liaye kovina va sukila ketimba? Tu pondola hẽ oku u kuatisa poku u telekela okulia, ale oku u kuatisa oku yelisa onjo? Manji  umue ulume citava okuti wa pumba upange woku sanda eteku. Anga hẽ tu pondola oku wĩha ombanjaile yimue yolombongo okuti ka tu popi okuti etu tua yeca, toke eci eye a sanga upange ukuavo?

13-14. Tu kala ndati vakuacali ndeci Yehova?

¹³ Yehova ukuacali. (Mat. 5:45) Ka tu ka lekisi lika ohenda yetu eci vamanji va tu pinga ekuatiso. Ndeci Yehova, etu tu sukila oku lieca olumue poku va kuatisa. Eye o tu tundasaila ekumbi okuti, ka ci sukila oku u pinga! Kuenje vosi tu kuatisiwa lekumbi liaco, ndaño vana ka va siatele oku eca olopandu. Ku tava hẽ okuti Yehova poku tu ĩha ovina tu sukila, o lekisa okuti o tu sole? Etu tu sole calua Yehova omo liohenda yaye kuenda ocali!

¹⁴ Vamanji valua omo lioku setukula Isiavo wokilu, va siata oku lekisa ocali ku vakuavo. Ndeci, kunyamo 2013, Ocilunga cimue ci tukuiwa hati, Haiyan ca nyõla ovina vialua ko Filipina. Vamanji valua va pumba olonjo viavo kuenda ovikuata. Pole, vamanji koluali luosi lonjanga yalua va eca ekuatiso kokuavo. Valua va eca olombanjaile, ale ovina vi sukiliwa koku tunga, okuti ca ecelela oku semulula loku tunga eci ci pitahãla 750 kolonjo vokuenda kunyamo! Vokuenda kuefengi lio COVID-19, Olombangi Via Yehova via likolisilako calua oco vi kuatise vamanji. Eci tu yayulako oku kuatisa vamanji, tu lekisa okuti tu va sole.

15-16. Ndomo ca tangiwa ku Luka 6:36, nye tu sukila oku linga oco tu setukule Isietu wokilu?

¹⁵ Yehova ukuahenda kuenda ukuakuecela. (Tanga Luka 6:36.) Eteke leteke Isietu wokuli o tu ecela. (Osa. 103:10-14) Olondonge via Yesu ka via li puile kuenje eye wa enda oku lekisa kokuavo ohenda kuenda oku va ecela. Eye wa nõlelepo oku eca omuenyo waye ndocilumba oco akandu etu a eceliwe. (1 Yoa. 2:1, 2) Ku simi hẽ okuti ukamba wetu la Yehova kuenda Yesu u pama omo liohenda yavo kuenda ongecelo?

¹⁶ Ocisola tu kuetele vamanji ci pamisiwa vali calua eci tu liecela lutima wosi.’ (Va Efe. 4:32) Ocili okuti, oku ecela vakuetu pamue ci tĩla calua, pole, tu sukila oku likolisilako. Manji umue ukãi wa kuatele ocitangi caco, poku tanga ocipama Cutala Wondavululi losapi hati,  “Lieceli Pokati,” co kuatisa oku linga apongoloko. * Eye wa soneha ndoco: “Ocipama eci ca ñuatisa oku limbuka ndomo oku ecela vakuetu ci ñuatisa. Ocipama caco ci lombolola okuti oku ecela vakuetu ka ci lomboloka okuti eci ovo va linga hacĩviko, ale ka ca ku sumuisile. Pole, oku ecela ku lomboloka oku yuvula ocikumbiti loku amamako lombembua.” Eci tu ecela lutima wosi vamanjetu, tu lekisa okuti tu va sole kuenda tu setukula Isietu Yehova.

17. Ndomo ca tangiwa ku Mateo 5:16, tu eca ndati esivayo ku Isietu wokilu?

¹⁷ Tu kuete esumũlũho linene lioku panga onepa kepata lia vamanji va sangiwa koluali luosi okuti va li sole pokati. Etu tu yongola okuti, omanu valua va likongela kokuetu koku fendela Suku yetu. Kuenje ka tu yongola oku linga lacimue ci pondola oku kokela omanu oku kuatele ovisimĩlo ka via sungulukile viatiamẽla ku Yehova, ale kafendeli vaye. Etu tu yongola oku lekisa ovituwa vina okuti, vi vetiya omanu oku lilongisa catiamẽla ku Yehova loku u vumba.—Tanga Mateo 5:16.

18. Nye ci tu kuatisa oku kunda lutõi?

¹⁸ Olonjanja vimue pamue tu popiwa lãvi ale tu lambalaliwa, omo lioku pokola Isietu wokilu. Nye tu sukila oku linga nda tu kuete usumba woku sapuila vakuetu catiamẽla kekolelo lietu? Tu koleli okuti Yehova kumue Lomõlaye, va tu kuatisa. Yesu wa sapuila olondonge viaye oco ka vi ka sakalale ndomo va popia ale ceci va popia. Momo lie? Yesu wa popia hati: “Momo kowola yaco eci vu ka popia cu wĩhiwi; omo heneko lika vu popia, pole, espiritu sandu lia Isiene olio li ka vu kuatisi oku popia.”—Mat. 10:19, 20.

19. Tukula ulandu wa umue wa lekisa utõi poku kunda.

¹⁹ Kũlĩhĩsa ulandu wa manji Robert. Eci a fetika ndopo oku lilongisa Embimbiliya, eye wa endele kombonge loku lomboluila konganji esunga lieci ka pangela onepa kusualali ko Afrika do Sul. Eye lutõi wa lombolola okuti ka yongola oku litenga vopulitika omo liocisola a kuetele vamanjaye Akristão. Eye wa sanjukilile  ocitumãlo caye vocisoko ca Yehova! Onganji yo pulisa hati: “Velie vamanjove?” Manji Robert ka lavokaile epulilo eli, pole, lonjanga yalua wa sokolola kocisonehua ceteke liaco. Ocisonehua caco ca kala Mateo 12:50 hati: “Wosi o linga ocipango ca Isiange o kasi kilu, eye manjange ulume, la manjange ukãi kuenda ina yange.” Ndaño okuti manji Robert otembo yaco ndopo a fetika oku lilongisa Embimbiliya, espiritu lia Yehova lio kuatisa oku tambulula epulilo liaco kuenda apulilo akuavo ka lavokaile. Citava okuti Yehova wa sanjukilile calua manji Robert! Yehova o sanjukavo eci tu kolela kokuaye poku eca uvangi lutõi vekalo limue ka lia lelukile.

20. Nye tu nõlapo oku linga? (Yoano 17:11, 15)

²⁰ Tu amamiko oku sanjukila esumũlũho lioku tiamẽla kepata limue lia vamanji vakuacisola. Etu tu kuete Isia umue wa velapo kuenda vamanji valua va tu sole. Olonjanja viosi tu sukila oku eca olopandu omo liovina evi. Satana loloñame viaye va seteka oku tu kokela atatahãi kocisola Isietu wokilu a tu kuetele kuenda oku nyõla omunga yi kasi pokati ketu. Yesu wa likutililavo oku pinga ku Isietu oco a tu lave okuti epata lietu li amamako oku likuata omunga. (Tanga Yoano 17:11, 15.) Yehova o kasi oku tambulula ohutililo yaco. Ndeci Yesu, ka tu ka tatãli ocisola Isietu wokilu a tu kuetele kuenda ekuatiso a tu ĩha. Omo liaco, tu nõlipo oku amamako oku pamisa ukamba wetu la vamanji.