1. Ndi vhufhio vhushaka vhune vhathu vha fhulufhedzeaho vha nga vha naho na Yehova?

MUṰA wa vhagwadameli vha Yehova u katela Yesu ane a vha “tanzhe ḽa zwoṱhe zwo sikwaho” na gogo ḽa vharuṅwa. (Vhakol. 1:15; Ps. 103:20) Musi Yesu e kha ḽifhasi, o thusa vhathu u pfesesa uri vha nga vhidza Yehova Khotsi avho. Musi Yesu a tshi khou amba na vhafunziwa vhawe o amba uri Yehova ndi “Khotsi anga ane a vha Khotsi aṋu.” (Yoh. 20:17) Nahone musi ri tshi ḓiṋekedza kha Yehova na u lovhedzwa, ri vha tshipiḓa tsha muṱa wa vhahashu vha re na lufuno.—Marko 10:29, 30.

2. Ri ḓo amba nga ha mini kha ino thero?

² Vhaṅwe zwi a vha konḓela u dzhia Yehova sa Khotsi a re na lufuno. Vhaṅwe vha nga vha vha sa ḓivhi uri vha nga sumbedza hani vhahavho uri vha a vha funa. Kha ino thero, ri ḓo amba nga ha nḓila ine Yesu a ri thusa ngayo u dzhia Yehova sa Khotsi a re na lufuno na ane ra nga sendela tsini nae. Ri ḓo dovha ra vhona nḓila dzine ra nga edzisa Yehova ngadzo musi ri tshi shumisana na vhahashu.

3. Thabelo ya tsumbo i ri sendedza hani tsini na Yehova?

³ Yehova ndi Khotsi a re na lufuno. Yesu u ṱoḓa ri tshi dzhia Yehova nga nḓila ine ene a mu dzhia ngayo. U ṱoḓa ri tshi mu dzhia sa mubebi a re na lufuno, ane a dzhenea, hu si sa muthu a re na tshiṱuhu ane tshawe ha vha u ri vhudza uri ri ite mini. Zwenezwi zwi vhonala kha zwe Yesu a ri ri zwi ambe musi ri tshi rabela. O thoma thabelo yawe nga maipfi ane a ri: “Khotsi ashu.” (Mat. 6:9) Yesu o vha a tshi nga vha o ri vhudza uri ri vhidze Yehova “Ramaanḓaoṱhe,” “Musiki” kana “Khosi ya  lini na lini.” Zwenezwi zwo vha zwi tshi ḓo vha zwi songo khakhea ngauri Bivhili i ṱalusa Yehova nga enea maipfi. (Gen. 49:25; Yes. 40:28; 1 Tim. 1:17) Fhedzi Yesu o ri ri vhidze Yehova “Khotsi.”

4. Ri zwi ḓivha hani uri Yehova u ṱoḓa ri tshi sendela tsini nae?

⁴ Naa zwi a ni konḓela u dzhia Yehova sa Khotsi a re na lufuno? Vhaṅwe zwi a vha konḓela. Arali ro aluswa nga khotsi a si na vhulenda, zwi nga ri konḓela u humbula uri ri na khotsi ane a ri funa. Fhedzi u ḓivha uri Yehova u ḓivha nḓila ine ra ḓipfa ngayo na uri ndi ngani ri tshi ḓipfa nga u ralo, zwi a ri khuthadza. Yehova u ṱoḓa u vha tsini na riṋe. Ndi ngazwo Ipfi ḽawe ḽi tshi ri ṱuṱuwedza nga uri: “Sendelani tsini na Mudzimu, na ene u ḓo sendela tsini na inwi.” (Yak. 4:8) Yehova u a ri funa nahone u ri vhudza uri u ḓo vha Khotsi a fhiraho vhoṱhe.

5. U ya nga Luka 10:22, Yesu a nga ri thusa hani u sendela tsini na Yehova?

⁵ Yesu a nga ri thusa uri ri sendele tsini na Yehova. Yesu u ḓivha Yehova a mu fhedza nahone u edzisa zwine a vha zwone nga ho fhelelaho. Ndi ngazwo o ri: “A vhonaho nṋe o vhona Khotsi.” (Yoh. 14:9) Yesu u fana na mukomana kana khaladzi ashu muhulwane ngauri u ri gudisa nḓila ya u ṱhonifha na u thetshelesa Khotsi ashu, nḓila ine ra nga iledza ngayo u mu pfisa vhuṱungu na nḓila ine ra nga mu takadza ngayo. Fhedzi vhutshilo ha Yesu ha musi e kha ḽifhasi, ndi hone vhune ha dzumbulula uri Yehova u na vhuthu nahone u a ri funa. (Vhalani Luka 10:22.) Kha ri ambe nga ha dziṅwe tsumbo.

6. Ṋeani tsumbo dza nḓila ye Yehova a thetshelesa ngayo thabelo dza Yesu.

⁶ Yehova u thetshelesa vhana vhawe. Humbulani nga ha nḓila ye Yehova a thetshelesa ngayo Yesu. Zwi tou pfala uri Yehova o thetshelesa thabelo nnzhi dza Murwa wawe musi e kha ḽifhasi. (Luka 5:16) Yehova o thetshelesa Yesu musi a tshi rabela a sa athu u ita phetho dza ndeme dzi ngaho musi a tshi ṱoḓa u khetha vhaapostola vhawe vha 12. (Luka 6:12, 13) Yehova o dovha a thetshelesa Yesu  musi a tshi rabela o tsikeledzea vhukuma. Musi Yudasi a sa athu u mu fheṱa, Yesu o rabela a vhudza Khotsi awe nga ha zwe zwa vha zwi tshi ḓo itea khae hu si kale. Yehova o thetshelesa yeneyo thabelo, a dovha a rumela na muruṅwa uri a khwaṱhise Murwa wawe ane a mu funa.—Luka 22:41-44.

7. U ḓivha uri Yehova u thetshelesa thabelo dzashu zwi ita uri ni ḓipfe hani?

⁷ Na ṋamusi Yehova u thetshelesa thabelo dzashu nahone a dzi fhindula nga tshifhinga tsho teaho na nga nḓila ya khwine. (Ps. 116:1, 2) Muṅwe wahashu wa tshifumakadzini wa ngei India o vhona nḓila ye Yehova a fhindula ngayo thabelo dzawe. O vha a tshi dzula e na mbilaelo nahone a rabela nga hazwo zwi tshi bva mbiluni. U ri: “Khasho ya JW ya May 2019 yo amba nga ha zwine ra nga zwi ita musi ri tshi vhilaela nahone yo nthusa vhukuma. Yo vha phindulo ya thabelo dzanga.”

8. Yehova o sumbedza hani uri u funa Yesu?

⁸ Yehova u ri sumbedza uri u a ri funa samusi o sumbedza Yesu uri u a mu funa vhutshiloni hawe hoṱhe ha kha ḽifhasi. (Yoh. 5:20) O thusa Yesu uri a dzule e na lutendo lwo khwaṱhaho, a mu ṱuṱuwedza musi o tsikeledzea na u ita uri a vhe na zwine a zwi shaya. Yehova o vha a tshi vhudza Murwa wawe uri u a mu funa na uri u a mu takalela. (Mat. 3:16, 17) Yesu o vha a sa ḓipfi e eṱhe ngauri o vha a tshi zwi ḓivha uri Khotsi awe wa ṱaḓulu ane a mu funa u ḓo dzula e nae na u mu thusa.—Yoh. 8:16.

9. Ri zwi ḓivha hani uri Yehova u a ri funa?

⁹ U fana na Yesu, roṱhe ro no vhona nḓila nnzhi dzi sumbedzaho uri Yehova u a ri funa. Humbulani hezwi: Yehova o ri tendela ri tshi vha khonani yawe, a ri ṋea vhahashu vhanzhi vhane vha ita uri ri takale na u ri ṱuṱuwedza musi ro tsikeledzea. (Yoh. 6:44) Yehova u dovha a ri ṋea zwoṱhe zwine ra zwi ṱoḓa uri ri dzule ri na lutendo lwo khwaṱhaho. U dovha a ri thusa uri ri wane ṱhoḓea dzoṱhe dza vhutshilo. (Mat. 6:31, 32) Musi ri tshi humbula nḓila ine Yehova a ri funa ngayo, zwi ita uri ri mu fune nga ho engedzeaho.

10. Ri guda mini kha nḓila ine Yehova a fara ngayo vhahashu?

¹⁰ Yehova u funa vhahashu. Fhedzi riṋe a zwi ri lelutsheli u vha funa na u zwi sumbedza nga nyito. Nga zwiṅwe zwifhinga zwi vha zwi tshi khou itiswa ngauri mvelele dzashu a dzi fani na uri ro aluselwa kha vhuimo vhu sa fani. Nahone roṱhe ri ita vhukhakhi vhune ha sinyusa vhaṅwe. Fhedzi roṱhe ri nga lingedza nga nungo dzoṱhe uri ri funane nga ho engedzeaho. Ri nga zwi ita hani? Nga u edzisa nḓila ine Khotsi ashu a funa ngayo vhahashu. (Vhaef. 5:1, 2; 1 Yoh. 4:19) Kha ri vhone zwine ra nga zwi guda kha tsumbo ya Yehova.

11. Yesu o sumbedza hani uri Yehova u a “pfela vhuṱungu”?

¹¹ Yehova u a “pfela vhuṱungu.” (Luka 1:78) Muthu ane a pfela vhuṱungu u a ṱungufhala musi a tshi vhona vhaṅwe vha tshi khou tambula nahone u ṱoḓa nḓila dzine a nga vha thusa na u vha khuthadza ngadzo. Nḓila ye Yesu a fara ngayo vhathu yo vha i tshi khou sumbedza nḓila ine Yehova a pfela ngayo vhathu vhuṱungu. (Yoh. 5:19) Nga tshiṅwe tshifhinga musi Yesu a tshi vhona gogo ḽa vhathu o “ḽi pfela vhuṱungu, ngauri ḽo vha ḽo vhaisala na u kulea nungo sa nngu dzi si na mulisa.” (Mat. 9:36) Yesu ho ngo sokou vha funa fhedzi, o dzhia vhukando uri a vha thuse. O fhodza vha lwalaho na u homolosa vho ‘netaho na vho lemelwaho.’—Mat. 11:28-30; 14:14.

12. Ri nga sumbedza hani uri ri pfela vhahashu vhuṱungu?

 ¹² Arali ra humbula nga ha thaidzo dzine vhahashu vha vha nadzo, ndi hone ri tshi ḓo kona u vha pfela vhuṱungu. Sa tsumbo, hu nga vha hu na wahashu wa tshifumakadzini ane a khou lwala vhukuma. Ha ambi uri u na thaidzo, fhedzi khamusi a nga zwi takalela arali muṅwe a nga mu thusa. Naa u a kona u ṋea muṱa wawe zwine wa zwi shaya? Naa ri nga mu thusa nga u mu bikela kana nga u mu kunakisela nnḓu? Kana wahashu wa tshinnani a nga vha o fhelelwa nga mushumo. Ri nga mu ṋea tsheledenyana, khamusi ri songo mu vhudza uri i bva kha riṋe, ine ya nga mu thusa u swikela a tshi wana muṅwe mushumo.

13-14. Ri nga vha hani na mafunda u fana na Yehova?

¹³ Yehova u na mafunda. (Mat. 5:45) A ro ngo tea u thusa vhahashu nge vha tou ri humbela uri ri vha thuse. Ri nga vha itela zwiṅwe zwithu vha songo ri humbela, u fana na Yehova. Ḓuvha ḽiṅwe na ḽiṅwe, Yehova u ri ṱavhisela ḓuvha ri songo ḽi humbela. Ḓuvha ḽi vhuyedza muṅwe na muṅwe, na vha sa zwi dzhieli nṱha. Yehova u ri sumbedza uri u a ri funa nga u ri ṋea zwine ra zwi shaya. Ri a mu funa ngauri u na mafunda na vhuthu.

¹⁴ Vhahashu vha edzisa Yehova nga u vha na mafunda. Sa tsumbo, nga 2013, ḓumbu ḽihulu ḽine ḽa pfi Haiyan ḽo tshinyadza vhukuma ngei Philippines. Vhunzhi ha vhahashu vho xelelwa nga mahaya na thundu. Fhedzi vhahavho ḽifhasini ḽoṱhe vho ṱavhanya vha vha thusa. Vhahashu vhanzhi vho ṋeela nga tshelede kana u thusa nga u lugisa kana u vusa nnḓu dzi ṱoḓaho u vha 750 hu sa athu u fhela ṅwaha! Tshifhingani tsha dziedzi ḽa COVID-19, Ṱhanzi dzo shuma nga maanḓa uri vha tikedze vhahavho. Musi ri tshi ṱavhanya ra thusa vhahashu, ri vha ri tshi khou sumbedza uri ri a vha funa.

15-16. U ya nga Luka 6:36, ri nga edzisa hani Khotsi ashu wa ṱaḓulu?

¹⁵ Yehova u a khathutshela na u hangwela. (Vhalani Luka 6:36.) Khotsi ashu wa ṱaḓulu u ri khathutshela ḓuvha ḽiṅwe na ḽiṅwe. (Ps. 103:10-14) Vhatevheli vha Yesu vho vha vhe na tshivhi, fhedzi Yesu o vha khathutshela  na u vha hangwela. O vha o ḓiimisela na u ri fela uri ri kone u hangwelwa zwivhi. (1 Yoh. 2:1, 2) U khathutshela ha Yehova na Yesu na u ri hangwela zwi ita uri ri sendele tsini navho.

¹⁶ U “hangwelan[a] zwi tshi bva mbiluni” zwi ḓo ita uri ri funane nga ho engedzeaho. (Vhaef. 4:32) Ndi ngoho uri u hangwela vhaṅwe zwi a konḓa nga zwiṅwe zwifhinga, ndi ngazwo ri tshi tea u shumela khazwo. Muṅwe wahashu wa tshifumakadzini o thuswa nga thero ya Tshiingamo i re na tshiṱoho “Ni Hangwelane Zwi Tshi Bva Mbiluni.” * O ri: “Heyi thero yo nthusa u pfesesa uri u hangwela vhaṅwe zwi nthusa hani. Yo zwi sumbedza uri musi u tshi hangwela vhaṅwe, zwi vha zwi sa khou amba uri u vhona u nga zwe vha ita a zwo ngo khakhea kana uri a zwo ngo u vhaisa. Fhedzi musi wo vha hangwela, u vha u songo tsha vhofha gwikhwi nahone u vha na mulalo.” Musi ri tshi hangwela vhahashu zwi tshi bva mbiluni, ri vha ri tshi khou sumbedza uri ri a vha funa na uri ri edzisa Khotsi ashu Yehova.

17. U ya nga Mateo 5:16, ri nga hulisa hani Khotsi ashu wa ṱaḓulu?

¹⁷ Ri a zwi livhuwa vhukuma u vha tshipiḓa tsha vharathu na vhakomana vha ḽifhasi ḽoṱhe vhane vha funana. Ri ṱoḓa uri vhathu vhanzhi nga hune zwa nga konadzea ngaho vha ḓe vha shumele Mudzimu na riṋe. Ri songo ita tshithu tshine tsha nga ḓodza matope dzina ḽa Yehova na vhathu vhawe. Ri dzula ri tshi ḓifara nga nḓila yavhuḓi uri vhane vha ri vhona vha ṱoḓe u guda nga ha Yehova na u mu shumela.—Vhalani Mateo 5:16.

18. Ri nga thuswa nga mini u huwelela ri sa ofhi?

¹⁸ Nga zwiṅwe zwifhinga, vhaṅwe vha nga ri sasaladza kana u ri tovhola ngauri ri ita zwine Khotsi ashu wa ṱaḓulu a ri laya. Ri nga ita mini arali ri tshi khou ofha u vhudza vhaṅwe nga ha zwine ra zwi tenda? Ri nga vha na vhungoho ha uri Yehova na Murwa wawe vha ḓo ri thusa. Yesu o vhudza vhafunziwa vhawe uri vha songo vhilaela nga ha zwine vha ḓo zwi amba. Ndi ngani? O ṱalutshedza a ri: “Zwine  na ḓo zwi amba ni ḓo zwi vhudzwa nga tshenetsho tshifhinga; ngauri a si inwi ni ambaho, fhedzi ndi muya wa Khotsi aṋu u ambaho kha inwi.”—Mat. 10:19, 20.

19. Ṋeani tsumbo ya muṅwe we a huwelela a sa ofhi.

¹⁹ Kha ri ambe nga ha tsumbo ya Robert wa Afurika Tshipembe. Musi a tshi kha ḓi tou vha mugudiswa muswa nahone a sa athu u tou vha na nḓivho nnzhi ya Bivhili, o tea u ya khothe na u ṱalutshedza muhaṱuli uri ndi ngani a sa ḓo ya nndwani. O ṱalutshedza khothe nga tshivhindi uri ha ṱoḓi u dzhia sia ngauri u funa vhahawe vha Vhakriste. O vha a tshi dzhiela nṱha u vha muṱani wa Yehova. Muhaṱuli a mu vhudzisa a ri: “Vhahaṋu ndi vhonnyi?” Robert o vha a songo lavhelela u vhudziswa yeneyo mbudziso, fhedzi o mbo ḓi humbula ndimana ya ḽeneḽo ḓuvha. Yo vha i Mateo 12:50 ine ya ri: “Ngauri ane a ita zwine Khotsi anga a zwi funa, ndi ene murathu wanga, khaladzi anga na mme anga.” Naho Robert o vha a tshi kha ḓi tou gudiswa Bivhili, muya wa Yehova wo mu thusa uri a fhindule yeneyo mbudziso na dziṅwe dze a vha a songo dzi lavhelela. Yehova o ḓirwa khana nga Robert! Yehova u dovha a ḓirwa khana nga riṋe musi ri tshi ḓitika ngae ri tshi ṱanziela ri sa ofhi kha zwiimo zwi konḓaho.

20. Ri tea u ḓiimisela u ita mini? (Yohane 17:11, 15)

²⁰ Ri dzhiela nṱha u vha tshipiḓa tsha muṱa une wa funana. Ri na Khotsi a fhiraho vhoṱhe na vhahashu vhane vha ri funa. Ri tea u dzula ri tshi zwi dzhiela nṱha. Saṱhane na vhatevheli vhawe vhavhi vha lingedza u ita uri ri timatime uri Khotsi ashu wa ṱaḓulu u a ri funa na u lingedza u thithisa vhuthihi vhune ra vha naho. Fhedzi Yesu o ri rabelela a humbela Khotsi ashu uri a ri tsireledze uri muṱa washu u dzule u na vhuthihi. (Vhalani Yohane 17:11, 15.) Yehova u khou fhindula yeneyo thabelo. Na riṋe u fana na Yesu, ri songo timatima uri Khotsi ashu wa ṱaḓulu u a ri funa na u ri tikedza. Kha ri ḓiimisele u dzula ri tshi sendela tsini-tsini na vhahashu.