1. Nuuni Yihoowa woygi xeegana danddayiyoo?

“MERETTIDABAA ubbaappe aadhdhiya baira Na7a” gidida Yesuusinne keehi daro kiitanchchati Yihoowawu goynniya so asaa giddon deˈoosona. (Qol. 1:15; Maz. 103:20) Yesuusi saˈan deˈiyo wode, ammanettida asay Yihoowa bantta Aawadan xeellana danddayiyoogaa qonccissiis. Yesuusi bana kaalliyaageetuura haasayiyo wode, Yihooway ‘ba Aawaanne eta Aawaa’ gidiyoogaa yootiis. (Yoh. 20:17) Qassi nuuni nuna Yihoowawu sheedhdhidi xammaqettiyo wode, siiqiya so asa gidida ishanttunne michonttu yara gidoos.—Mar. 10:29, 30.

2. Nuuni ha huuphe yohuwan ay xannaˈanee?

² Yihoowa siiqiya Aawadan xeellanawu amaridaageeti metootoosona. Harati qassi bantta ishanttanne michchontta siiqanawu metootana danddayoosona. Nuuni Yihoowa siiqiya Aawadan xeellidi akko shiiqanaadan Yesuusi nuna waati maaddiyaakko ha huuphe yohuwan beˈana. Qassi nuuni nu ishanttanne michchontta siiqiyoogan Yihoowa milatana danddayiyo ogetubaa tamaarana.

3. Yesuusi tamaarissido woosay nuuni Yihoowakko shiiqanaadan waati maaddii?

³ Yihooway siiqiya Aawa. Yesuusi nuuni Yihoowa baagaadan xeellanaadan koyees, hegeekka meqettaa iitanne nuuni oottanabaa xalla yootiya ura gidennan, awudenne nu haasayissana danddayiyo kehanne siiqiya aawadan xeellanaadan koyees. Yesuusi bana kaalliyaageeta tamaarissido woosaappe hegaa akeekoos. He woosay hagaadan doommees: “Nu Aawau.” (Maa. 6:9) Yesuusi nuuni Yihoowa “Ubbaa Danddayiya Xoossaa,” “Medhdhidaagaa,” woy “merinaa Kawuwau” giidi xeegana danddayiyoogaa yootiis. Geeshsha Maxaafay Yihoowa  qonccissanawu ha qaalata ubbaa goˈettiyo gishshawu, hagee bala gidenna. (Doo. 49:25; Isi. 40:28; 1 Xim. 1:17) Gidoppe attin, nuuni “Aawau” giidi Yihoowa xeeganaadan Yesuusi yootiis.

4. Yihooway nuuni akko shiiqanaadan koyiyoogaa waati eriyoo?

⁴ Siiqiya Aawadan Yihoowa xeellanawu neeni metootadii? Amaridaageeti metootoos. Nu aaway keha gidana xayikko, nuna siiqiya aaway deˈees giidi qoppiyoogee metana danddayees. Nuuyyo siyettiyaabaa Yihooway loytti eriyoogee keehi minttettiyaaba! I nuukko shiiqanawu koyees. A Qaalay “Xoossaakko shiiqite; ikka inttekko shiiqana” giidi minttettiyoy hegaassa. (Yaaq. 4:8) Yihooway nuna siiqeesinne I ooppenne aadhdhiya Aawa nuussi gidanaagaa yootees.

5. Luqaasa 10:22y yootiyoogaadan, kaseegaappe aaruwan Yihoowakko shiiqanaadan Yesuusi nuna waati maaddii?

⁵ Nuuni kaseegaappe aaruwan Yihoowakko shiiqanaadan Yesuusi nuna maaddana danddayees. Yesuusi Yihoowa loytti ereesinne wottiyoobi baynna hanotan A eeshshaa bessees. Hegaa gaasuwan I hagaadan giis: “Tana be7ida urai Aawaakka be7iis.” (Yoh. 14:9) Nuuni nu Aawaa waati bonchchanaakkonne awu waati azazettanaakko, qassi A azzanttennan an sabettanawunne A ufayssanawu waatana bessiyaakko bayra ishadan Yesuusi nuna tamaarissees. Qassi Yihooway darin kehanne siiqiyaagaa gidiyoogaa nuuni akeekanaadan Yesuusi nuna maaddees. (Luqaasa 10:22 nabbaba.) Ane amarida leemisota beˈoos.

6. Yihooway Yesuusa woosaa waati siyidaakko qonccissa.

⁶ Yihooway ba naati yootiyoobaa siyees. Yihooway ba bayra Naˈay yootiyo wode siyido hanotaa qoppa. Yihooway ba Naˈay saˈan deˈiyo wode woossido daro woosaa tumuppe siyiis. (Luq. 5:16) Yesuusi ba kiittido 12ta dooriyoogaa mala gitabaa kuuyanawu woossido woosaa Yihooway siyiis. (Luq. 6:12, 13) Yesuusi unˈˈettidi woossido woosaakka Yihooway siyiis. Yihuday A aattidi immanaappe kase, Yesuusi matan ba bolli gakkanabaa xeelliyaagan ba Aawaa  woossiis. Yihooway Yesuusa woosaa siyiyoogaa xalla gidennan, ba siiqiyo Naˈaa minttettanawu kiitanchchaakka kiittiis.—Luq. 22:41-44.

7. Yihooway nu woosaa zaariyoogaa eriyoogan nuussi aybi siyettana bessii?

⁷ Ha wodiyan, Yihooway nu woosaakka siyees, qassi hegaa koshshiya wodiyaaninne keehi loˈˈo ogiyan zaarees. (Maz. 116:1, 2) Hindde biittan deˈiya issi michchiyaa Yihooway I woosaa waati zaaridaakko akeekaasu. A keehi unˈˈettiyo gishshawu he allaalliyaa xeelliyaagan Yihoowa wozanappe woossaasu. A hagaadan gaasu: “Nuuni unˈˈettiyo wode oottana bessiyaabaa xeelliyaagan Uddufune 2019 JW Brodkastingiyaa^® prograamiyan tawu koshshiyaabay kiyiis. Hegee ta woosaa zaaro.”

8. Yihooway Yesuusa siiqiyoogaa ayba ogetun bessidee?

⁸ Yihooway Yesuusi saˈan deˈiyo wode ubban A siiqidoogaadan, nunakka siiqees. (Yoh. 5:20) I Yesuusawu ayyaanaaban, qofaaninne asatettan koshshiya ubbabaa kunttiis. Qassi Yihooway ba Naˈaa siiqiyoogaanne A nashshiyoogaa yootiis. (Maa. 3:16, 17) Yesuusi saluwan deˈiya siiqiya ba Aaway muletoo banaara deˈiyoogaanne bana maaddiyoogaa eriyo gishshawu, I barkka attidabadan mule qoppi erenna.—Yoh. 8:16.

9. Yihooway nuna siiqiyoogaa waati eriyoo?

⁹ Yesuusaagaadan nuuni ubbay Yihoowa siiquwaa daro ogiyan beˈida. Ane hagaa qoppa: Yihooway nuuni A dabbo gidanaadan oottiis; qassi nuuni ufayttanaadan oottiyaanne unˈˈettiyo wode nuna minttettiya siiqiya daro ishanttanne michchontta I nuussi immiis. (Yoh. 6:44) Qassi Yihooway nuuni ammanuwan minnidi deˈanaadan koshshiya ubbabaa nuussi immees. Ubba qassi nuussi deˈuwawu koshshiyaabaa demmanaadan I nuna maaddees. (Maa. 6:31, 32) Yihooway nuna siiqiyo siiquwaa wotti dentti qoppiyo wode, nuuni A kaseppe aaruwan siiqoos.

10. Yihooway nu ishanttanne michchontta siiqidoogaappe nu ay tamaariyoo?

¹⁰ Yihooway nu ishanttanne michchontta siiqees. SHin nuuni eta siiqiyoogeenne eta siiqiyoogaa bessiyoogee issi issitoo metana danddayees. Nu wogay woy nu diccido hanotay dumma gidiyo gishshawu yaatiyoogee issi issitoo metees. Qassi nuuni ubbay harata hanqqetissiyaabaanne azzanttiyaabaa oottana danddayoos. SHin ayyaanaaban nu so asa gididaageeta kaseegaappe aaruwan siiqanawu nuuni ubbay baaxetana danddayoos. Waatidi? Nu Aawaa leemisuwaa kaalliyoogan nu ishanttanne michchontta siiqiyoogaa bessoos. (Efi. 5:1, 2; 1 Yoh. 4:19) Yihooway oottidobaappe ay tamaarana danddayiyaakko ane beˈoos.

11. Yesuusi Yihoowaagaadan ‘qarettiyoogaa’ waati bessidee?

¹¹ Yihoowa “qaretai daro.” (Luq. 1:78) Qarettiya uri hara asi waayettiyoogaa beˈiyo wode azzanees; qassi I maaddanawunne minttettanawu koyees. Yesuusi asaa siiqiyoogan Yihoowa leemisuwaa kaalliis. (Yoh. 5:19) Yesuusi daro asaa beˈidi, “heemmiya asi bainna dorssadan asai hirggiyo gishshaunne asaa maaddiyaabi bainna gishshau, asaayyo qarettiis.” (Maa. 9:36) Yesuusi eta siiqiyoogaappe aadhdhiyaaba oottiis; I eta maaddiyaabaa oottiis. I hargganchchata pattiis; qassi ‘daafuranchchatanne deexuwaa tookkidaageeta’ maaddiis.—Maa. 11:28-30; 14:14.

12. Nu ishanttussinne michchonttussi qarettiyoogaa waati bessana danddayiyoo?

¹² Nu ishanttunne michchonttu metuwaa nuuni qoppikko, etawu qarettoos. Leemisuwawu, keehi sahettiya issi michchiyaa deˈana danddayawusu. A ba metuwaabaa mule haasayana xayikkonne, issi uri O maaddikko A keehi ufayttana danddayawusu. A ba soo asawu asatettaaban koshshiyaabaa kunttiyoogee  O metennan waayi aggana. Nuuni iyyo qumaa kattiyoogan woy I keettaa geeshshiyoogan O maaddana danddayiyoo? Issi ishay oosuwaappe yedetettana danddayees. I oosuwaa demmana gakkanaashin maaddanawu, geella nuuni immiyoogaa yootennan, guutta miishshaa imotadan ayyo immana danddayoos.

13-14. Nuuni Yihoowaagaadan kehiyaageeta waani gidana danddayiyoo?

¹³ Yihooway keha. (Maa. 5:45) Nuuni nu ishanttussinne michchonttussi qarettiyoogaa bessanawu eti maaduwaa oychchana gakanaashin naagana koshshenna. Yihoowaagaadan, nuna eti oychchanaappe kase issibaa etawu oottana danddayoos. Nuuni oychchennan I galla galla nuuyyo awaa awaxxissees! Qassi galatiya asatu xalla gidennan, asa ubbay awaappe goˈettees. Yihooway nuussi koshshiyaabaa immiyoogan, I nuna siiqiyoogaa bessees. Yihooway darin kehanne immiyaagaa gidiyo gishshawu nuuni A keehi siiqoos!

¹⁴ Ishanttinne michchontti Yihoowa milatiyoogan haratussi kehatettan immoosona. Leemisuwawu, Supper Tayfuun Hiyan giyo gotee Pilippinssen 2013n wolqqaama qohuwaa gattiis. Daro ishanttussinne michchonttussi keettaynne aqoy xayiis. Gidoppe attin, etassi ayyaanaaban so asa gidida kumetta alamiyan deˈiyaageeti sohuwaara eta maaddidosona. Daroti miishshaa immidosona woy keettaa zaarettidi giigissiyoogan maaddidosona woy issi laytta gidenna wodiyan 750 keettaa wotti yeggidi keexxidosona! Ubbasaa gakkiya korona harggiyaa wodiyan, Yihoowa Markkati bantta ishanttanne michchontta maaddanawu minnidi oottidosona. Nuuni ayyaanaaban so asa gididaageeta eesuwan maaddiyo wode, eta siiqiyoogaa bessoos.

15-16. Saluwan deˈiya nu Aawaa milatanawu nuuni waatana koshshiyoogaa Luqaasa 6:36y yootii?

¹⁵ Yihooway maariyaagaanne atto giyaagaa. (Luqaasa 6:36 nabbaba.) Saluwan deˈiya nu Aaway ubba galla nuna maarees. (Maz. 103:10-14) Yesuusa kaalliyaageeti nagaranchcha gidikkonne, I etassi maariyoogaanne atto giyoogaa bessiis. Ubba qassi nu nagaray atto geetettana mala I ba shemppuwaa aattidi immanawu eeno giis. (1 Yoh. 2:1, 2)  Yihoowaynne Yesuusi atto giyoogeenne maariyoogee nuuni kaseegaappe aaruwan etakko shiiqanaadan oottees.

¹⁶ Nuuni issoy issuwawu atto giyo wode nu siiqoy minnees. (Efi. 4:32) Haratussi atto giyoogee issi issitoo keehi deexxana danddayiyoogee qoncce; hegaa gishshawu nuuni atto gaanawu baaxetana koshshees. Issi michchiyaa Wochchiyo Keelan kiyida “Issoy Issuwau Atto Giite” giya huuphe yohoy atto gaanaadan bana maaddidoogaa yootaasu. * A hagaadan gaasu: “Ha huuphe yohoy taani haratussi atto giyoogee tana waati maaddiyaakko akeekanaadan oottiis. Haratuyyo atto gaasa giyoogee, eti mooridobaa neeni nashshaasa woykko hegaa gaasuwan gakkidabaa xaasayada xeellaasa giyoogaa gidennaagaa he huuphe yohoy qonccissees. SHin, atto giyoogee hegaa mala mooruwaa gishshawu lancciyaa uluwan oyqqennan aggidi, saro deˈiyoogaa giyoogaa.” Nuuni nu ishanttanne michchontta atto giyo wode, eta siiqiyoogaa bessoosinne nu Aawaa Yihoowa milatoos.

17. Maatiyoosa 5:16y yootiyoogaadan, saluwan deˈiya nu Aawaa waati bonchchana danddayiyoo?

¹⁷ Kumetta alamiyan deˈiya siiqiya so asaa yara gidiyoogee gita maata. Danddayettida keenan daro asay nu Xoossawu nunaara goynnanaadan koyoos. Hegaa gishshawu, asay Yihoowabaa woy A asaabaa iitabaa qoppanaadan oottiya aybanne nuuni mule oottana koshshenna. Asay Yihoowabaa tamaaranawunne awu haggaazanawu koyanaadan nuuni ubbatoo loˈˈo eeshshaa bessanawu baaxetoos.—Maatiyoosa 5:16 nabbaba.

18. Xalatettan sabbakanaadan nuna maaddiyay aybee?

¹⁸ Nuuni saluwan deˈiya nu Aawawu azazettiyo gishshawu amarida asay nuna issi issitoo borana woy yedettanakka danddayees. Nuuni nu ammaniyoobaa haratuyyo yootanawu yayyikko waatana danddayiyoo? Yihoowaynne A Naˈay nuna maaddanaagaa ammanettana danddayoos. Yesuusi ba erissiyo ashkkarati woygi haasayanaakko woy ay haasayanaakko giidi hirggana koshshennaagaa yootiis. Aybissi?  Yesuusi hagaadan giis: “Intte haasayanabaa he saatiyan Xoossai intteyyo immiyo gishshau, . . . inttenan de7idi haasayiyai intte Aawaa Geeshsha Ayyaanaa gidiyoogaappe attin, haasayiyaageeti inttena gidekketa.”—Maa. 10:19, 20.

19. Xalatettan markkattida issi uraabaa yoota.

¹⁹ Robertta giyo ishaa hanotaa qoppa. I Geeshsha Maxaafaa xannaˈiyoogaa doommmosaappe amarida wodee aadhdhikkone Geeshsha Maxaafaa eray awu daro gidenna, shin I wotaaddaraa gidennay aybissakko Tohossa Afirkkaa pirdda keetti biiddi daannawu qonccissana koshshiis. I Kiristtaane ishantta siiqiyo gishshawu polotikaaban oossinne exatennan deˈanawu koyidoogaa pirdda keettawu xalatettan qonccissiis. I Yihoowa so asaa yara gidiyoogaa nashshiis! I qoppennan daannay, “Ne ishantti oonee?” giidi A oychchiis. Robertti he oyshaa oyshettana giidi qoppana xayikkonne, I he gallassaa xiqisiyaa sohuwaara hassayiis. Xiqisee Maatiyoosa 12:50: “Saluwan de7iya ta Aawai koyiyoobaa oottiya ubbai, ta isha ta michchonne ta aayo.” Robertti Geeshsha Maxaafaa xannaˈiyoogaa mati doommikkonne, he oyshaanne I qoppibeenna hara daro oyshata zaaranaadan Yihoowa ayyaanay A maaddiis. Yihooway Roberttan keehi ufayttidoogee qoncce! Qassi metiya hanotatun xalatettan markkattanawu nuuni Yihoowan ammanettiyo wode I nunankka keehi ufayttees.

20. Nuuni waatanawu murttana koshshii? (Yohaannisa 17:11, 15)

²⁰ Keehi siiqiya so asaa yara gidiyoogan nuuni keehi ufayttoos. Ooppenne aadhdhiya Aawaynne nuna siiqiya daro ishanttinne michchontti nuussi deˈoosona. Hegawu ubbatoo nuuni A galatana koshshees. Seexaanaynne A kaalliya iitati saluwan deˈiya nu Aaway nuna siiqiyoogaa nuuni siranaadaaninne nu issippetettaa xayssanaadan oottanawu maloosona. Gidikkonne, nu soo asay issippetettan deˈana mala nu Aaway nuna naaganaadan nu gishshaa Yesuusi woossiis. (Yohaannisa 17:11, 15 nabbaba.) Yihooway he woosaa zaarees. Yesuusaagaadan, saluwan deˈiya nu Aaway nuna siiqiyoogaanne nuna maaddanaagaa nuuni mule sirennaageeta gidoos. Ayyaanaaban nu so asa gididaageetukko awudeegaappenne aaruwan shiiqanawu murttidaageeta gidoos.