1. Inontsika ma Jehovah, izikoa atsika tsy mivadiky?

AN̈ISANY fianakavian̈any Jehovah i Jesosy Zanany talan̈olo, avio anjely marobe. (Kol. 1:15; Sal. 103:20) Tamy Jesosy tambony tany teto, izy nampianatra fa Jehovah koa Babanolo jiaby tsy mivadiky. Nikoran̈iny Jesosy tamy pianatranany koa fa Jehovah io tsy raha “Babany” fo fa “Babandro” koa. (Jaona 20:17) Avio atsika koa fa nanokanten̈a tamy Jehovah ndreky natao batisa, atsika nanjary an̈isany fianakaviambeny rahalahy ndreky ranabavy be fitiavan̈a.​—Mar. 10:29, 30.

2. Ino raha hidinihintsika ato?

² Sarotro aminolo sasany mihevitry Jehovah ho Baba be fitiavan̈a zen̈y. Sasany ndraiky tsy mahay man̈aboaka fitiavan̈a amy piaramanompo. Kanefa Jehovah io mety hataontsika Baba ankitin̈y, ary izy koa mety hatao naman̈a. Ho hitantsika ato akory han̈ampiany Jesosy atsika hahavita zen̈y. Hidinihintsika ato koa fomba mety hangalantsika tahaka fomba fitondrasany Jehovah iro piaramanompo amintsika aby io.

3. Nan̈ino vavaka modely nampianariny Jesosy in̈y ten̈a man̈ampy atsika han̈aton̈o Jehovah?

³ Jehovah ten̈a Baba be fitiavan̈a. Ravoravo Jesosy izikoa atsika mihevitry Jehovah ho Baba, karaha ataony koa. Jehovah io mira raimandreny be fitiavan̈a, tsara fan̈ahy ndreky mora ikoran̈ana. Izy tsy miran̈a iro manampahifan̈a masiaka sady tia mibekobeko olo in̈y. Hita raha zen̈y tamy vavaka nampianariny Jesosy pianatranany. Karaha ty nanombohany izio: “Anao Babanay.” (Mat. 6:9) Azony Jesosy natao iziô nampirisiky atsika hikaiky Jehovah taminy an̈aran̈a fan̈ajan̈a, karaha ataony: “Farany An̈abo”, “Pamôron̈o”, na “Panjakany mandrakizay.” (Gen. 49:25; Isaia 40:28; 1 Tim. 1:17) Kanefa, Jesosy nan̈iraka atsika hikaiky Jehovah, “Baba.”

4. Akory ahaizantsika fa tiany Jehovah han̈aton̈o izy atsika?

 ⁴ Sarotro aminao ma mihevitry Jehovah ho Baba be fitiavan̈a zen̈y? Izikoa zen̈y, tsaraova fa tsy anao zaraiky karaha zen̈y. Ndraikindraiky, mety ho sarotro aminao hahatsapa zen̈y izikoa babanao niteraka anao tsy nan̈aboaka fitiavan̈a taminao. Kanefa mankahery mahay fa, Jehovah mahita raha an̈atiny fôntsika. Tiany han̈aton̈o izy atsika. Zen̈y mahavy Baiboly mandrisiky atsika karaha ty: ‘Man̈ataon̈a Zan̈ahary anaro, fa izy han̈aton̈o anaro edy.’ (Jak. 4:8) Tiany Jehovah anao, ke ataony raha hahavy anao hahatsapa fa izy Baba farany tsara mety hanan̈anao.

5. Koa zahan̈a Lioka 10:22, ino aviantsika mivolan̈a fa Jesosy afaka man̈ampy atsika han̈aton̈o Jehovah?

⁵ Jesosy afaka man̈ampy atsika han̈aton̈o Jehovah. Izy baka ten̈a mahay Jehovah. Tsisy nihafa amy toetriny Jehovah toetrinany, ke zen̈y nahavy izy nivolan̈a karaha ty: “Lan̈iany olo nahita zaho nahita Baba koa.” (Jaona 14:9) Jesosy efa miran̈a zokibentsika, ke ampianariny atsika karakory atao man̈aja Jehovah ndreky man̈araka volan̈any Babantsika io. Ambarany atsika koa raha tokony hataontsika baka atsika tsy hampalahelo Jehovah, ndreky hahazo rady baka aminany. Ndray izy man̈ano zen̈y, naboakany Jesosy tamy fomba fiain̈ananany fa tsara fan̈ahy sady be fitiavan̈a ankitin̈y Jehovah. (Vakia Lioka 10:22.) Alô atsika hizaha sasany amy zen̈y.

6. Ino aby ohatra ahitan̈a fa nitandrin̈esany Jehovah vavakany Jesosy?

⁶ Tandrin̈esany Jehovah aby zanany jiaby. Karaha zen̈y nataony tamy Zanany talan̈olo. Tamy Jesosy tambony tany, matetiky izy nivavaka, ary hay be fa nitandren̈y vavakanany fo Jehovah. (Lioka 5:16) Nivavaka Jesosy talohanizy nifidy iro apostolinany 12, fotony fanapahankevitry maventy raha zen̈y. Nitandrin̈esany Jehovah vavakanany. (Lioka 6:12, 13) Nivavaka koa Jesosy izikoa fa nisy raha nampiasaloha izy. Ohatra iziô, talohany Jodasy namadiky izy in̈y, Jesosy nivavaka tamy Babany momba raha handeha hiaretany. Jehovah tsy vitany nitandren̈y vavakany Jesosy fo fa, nan̈iraka anjely lastio izy hankahery Zanany ten̈a tiany io.​—Lioka 22:41-44.

7. Jehovah ten̈a mitandren̈y vavaka. Ino raha tsapanao izikoa fa mieritreritry zen̈y?

 ⁷ Mbala mitandren̈y vavakany panomponany fo koa Jehovah amy zioty. Izy koa fa mamaly vavaka, ataony amy fomba ten̈a tsara sady amy fotoan̈a mety tsarabe. (Sal. 116:1, 2) Zen̈y raha tsapany ranabavy araiky mipetraka an Inde. Nahatsiaro nijaly mare izy fotony niasaloha mare izy. Nikoran̈iny tamy Jehovah raha nampijaly jerinany io. Ho izy: “Navy tamy fotoan̈a nilàko izy tsarabe programo tamy Tele JW May 2019 in̈y, fotony izio nan̈azava raha tokony hatao izikoa fa misy raha mampiasaloha mare. Ten̈a valimbavaka izin̈y.”

8. Akory aby nan̈aboahany Jehovah fa tiany mare Jesosy?

⁸ Tamy Jesosy tambony tany teto, naboakany Jehovah fa Jesosy ten̈a tiany. Nampiany koa izy baka ho vitany tsara asa sarotro nampan̈anôviny izy. (Jaona 5:20) Nampiany ho fatatra finoan̈a fo Jesosy. Namezany toky koa Jesosy izikoa fa niasaloha, baka io nalainy antoko fa nanan̈a raha nilain̈a tamy fiainan̈a fo izy. Nivolan̈iny Jehovah taminany foeky fa izy ten̈a tiany sady nankasitrahiny. (Mat. 3:16, 17) Ke tsy nahatsiaro latsatokan̈a foeky Jesosy, fotony hainy fa Babany tsy mety han̈ary izy. Akory fo atsika? Atsika ma mba tiany Jehovah ndreky karakarainy karaha zen̈y koa?​—Jaona 8:16.

9. Akory ahaizantsika fa ten̈a tiany Jehovah atsika?

⁹ Karaha Jesosy, samby efa nan̈aboahany Jehovah fitiavan̈a aby atsika jiaby. Diniha baka: Atsika nambelany hanjary kamaradiny, baka io namezany fianakavian̈a be fitiavan̈a sady miray sain̈y, amy zen̈y atsika ho ravoravo fo ndreky hahazo fampahirezan̈a ilaintsika. (Jaona 6:44) Amezany hanin̈y arapan̈ahy koa atsika amy zen̈y ho fatatra finoan̈antsika. Ampiany koa atsika hahazo raha ilaintsika amy fiain̈ana andavanandra. (Mat. 6:31, 32) Ke atsika koa fa mandiniky fitiavany Jehovah atsika aby zen̈y, mahaimitombo fo fitiavantsika izy.

10. Ino raha ianarantsika baka amy fomba itondrasany Jehovah iro rahalahy ndreky ranabavintsika aby io?

¹⁰ Tiany Jehovah iro piaramanompo amintsika aby io. Fa ny raha misy, tsy mora amintsika ndraikindraiky mankatia iro na man̈aboaka fitiavan̈a amindro. An̈isany antony mahavy zen̈y iziô, tsy mitovy kolontsain̈intsika ndreky fomba nitarimian̈a atsika. Man̈ano diso koa atsika, ke mety hampahinihiny na hampameloko iro raha zen̈y. Ndray iô raha jiaby zen̈y, mila miezaka fo atsika hampisy fitiavan̈a amintsika samby atsika. Mila alaintsika tahaka fomba an̈aboahany Jehovah fitiavan̈a amindro rahalahy ndreky ranabavintsika aby io. (Efes. 5:1, 2; 1 Jaona 4:19) Atsika iziô hizaha ino raha ianarantsika baka amy raha nataony Jehovah.

11. Akory ahitan̈a fa Jesosy ten̈a ‘mitepô olo’, karaha Jehovah fo?

¹¹ Jehovah ten̈a ‘mitepô olo.’ (Lioka 1:78) Dikany mahay mahinakinaka olo zen̈y malahelo mahita olo mijaly, baka io mitady fomba han̈ampian̈a ndreky hankahirezan̈a izy. Hita amy fomba nitondrasany Jesosy olo, fa ten̈a tia olo izy, karaha Jehovah fo. (Jaona 5:19) Tandraraiky, Jesosy koa fa nahita vahoaka marobe, ‘nahinakinaka izy, fotony iro olo aby io nampijalian̈a ndreky naparitaka mira ondrikondriky tsisy piambin̈y.’ (Mat. 9:36) Jesosy tsy vitany tia iro fo fa, nitady fomba koa izy nan̈ampian̈a iro. Izy nampahivan̈a olo marary sady namelombelon̈o olo “mavesatra entan̈a.”​—Mat. 11:28-30; 14:14.

12. Akory mety han̈aboahanao fa anao mitepô olo?

¹² Ho sarotro amintsika hitepô piaramanompo amintsika, izikoa tsy haintsika raha sarotro iaretandro. Ohatra iziô misy ranabavy araiky marary mare. Izy mety tsy hitretre momba aretin̈inany. Kanefa, hay be fa ho ravoravo izy izikoa mba misy olo man̈ampy izy. Iritrireta ty: Mbala mahavita mikarakara raha ilainy fianakavian̈anany ma izy? Tsao mba mila tahitahian̈a  izy mandoky hanin̈indro na manasa lambandro? Akory ndraiky izikoa nafaka asa rahalahy araiky? Tsao mba afaka man̈amia vola hely anao han̈ampian̈a izy parpahitany asa hafa? Tsy voatery volan̈inao aminany aby fa baka aminao vola io.

13-14. Akory an̈aboahantsika fa atsika koa mba tsy matity, karaha Jehovah?

¹³ Jehovah tsy matity. (Mat. 5:45) Atsika tsy tokony hiambin̈y iro piaramanompo amintsika aby io hangataka vonjy, zay atsika vo hitepô iro. Karaha Jehovah, atsika mety man̈ano raha voanalohany. Jehovah iziô mandatsaka mahalen̈y aminolo jiaby, ndray atsika tsy mangataka izio. Mahazo hatsaran̈a baka amizio aby olo jiaby, firaka aminolo tsy mankasitraka izy. Amezany Jehovah atsika koa raha ilaintsika. Hita baka amy zen̈y fa tiany Jehovah marin̈y atsika. Tiantsika mare Jehovah, fotony izy tsara fan̈ahy sady tsy matity!

¹⁴ Maro rahalahy ndreky ranabavy mifen̈y mangala tahaka Jehovah. Iro mazoto man̈ampy olo fa tsy miambin̈y angatahan̈a. Ohatra iziô, nisy sikilaony mahery nandalo ta Philippines taminy 2013. Nandrobadraha mare izio. Maro tran̈o ndreky fanan̈anany piaramanompo robaka. Piaramanompo baka antany hafa koa fa naharen̈y raha navoa iro zen̈y, direkty iro nan̈ampy. Maro tamindro io nan̈amia vola nan̈amboaran̈a raha robaka. Efa tsy ela ho 750 tran̈ony piaramanompo namboarin̈y na nimpody naôrin̈y ndraiky. Tan̈atiny fiparitahany valan̈aretin̈y COVID-19 koa, maro Vavolombelon̈o Jehovah niasa mare nan̈ampy piaramanompo amindro. Aboakantsika fa ten̈a tia piaramanompo koa atsika, izikoa atsika tsy mijijy tamban̈a man̈ampy iro.

15-16. Koa zahan̈a Lioka 6:36, ino raha mila ataontsika izikoa atsika tihangala tahaka toetriny Jehovah?

¹⁵ Jehovah mamindra fô sady man̈ambela hadisovan̈a. (Vakia Lioka 6:36.) Isanandra Jehovah mamindra fô amintsika. (Sal. 103:10-14) Pan̈aradia Jesosy aby io tsy lavorary, fa Jesosy namindra fô tamindro ndreky nan̈ambela hadisovan̈andro. Nahafoe ain̈inany lastio izy baka ho voafafa fahotan̈antsika. (1 Jaona 2:1, 2) Nohony fahaizantsika toetriny Jehovah ndreky Jesosy aby zen̈y mahavy atsika tihinaman̈a amindro.

¹⁶ Hitombo fifankatiavan̈a misy amintsika, izikoa atsika mifamela heloko amy fô. (Efes. 4:32)  Mety tsy ho mora man̈ano zen̈y ndraikindraiky, ke mila miezaka atsika. Nahavita zen̈y ranabavy araiky, izy koa fa baka nianatra lahatsoratra “Aoka Isika Hifamela Heloka Tanteraka”, * tamy Ny Tilikambo Fiambenana. Ho izy: “Lahatsoratra io nan̈ampy zaho hahita fa ten̈a mahatsara zaho man̈ambela hadisovan̈a. Hitako tao koa fa, tsy midika anten̈a man̈ambela hadisovan̈anolo araiky, ke tianten̈a na ankamoranten̈a raha ratsy nataony. Dikany man̈ambela hadisovan̈a zen̈y, tsy mitana heloko ampô ndreky mifen̈y ho kalma fo.” Mangala tahaka toetriny Jehovah Babantsika atsika sady ten̈a tia piaramanompo, izikoa von̈ono han̈ambela hadisovan̈andro rahalahy ndreky ranabavintsika aby io.

17. Koa Matio 5:16 dinihin̈y, akory an̈amezantsika voninahitry Babantsika andan̈itry an̈y?

¹⁷ Ravoravo atsika fotony an̈isany fianakaviambe erantany, sady mifankatia. Tiantsika hahaiho maro fo olo hiaraka amintsika manompo Jehovah. Zen̈y mahavy atsika mitandrin̈y fo tsao man̈ano raha mangala baraka Jehovah na mandrobaka lazany panomponany. Mifen̈y koa atsika ho tsara fitondranten̈a, amy zen̈y ho maro olo voantsory hianatra raha momba Jehovah ndreky hanompo izy.​—Vakia Matio 5:16.

18. Ino raha han̈ampy atsika hasaky hitory?

¹⁸ Mety hisy olo hankaratsy atsika na han̈enjiky atsika foeky, fotony atsika man̈araka volan̈any Jehovah Babantsika. Mety hampavozo atsika raha zen̈y. Ino raha mety ataonao baka ho vitanao fo hiaro finoan̈anao? Matokisa fa Jehovah ndreky Jesosy Zanany han̈ampy anao. Jesosy efa nan̈amia toky pianatranany fa iro tsy tokony hiasaloha oe ino raha hivolan̈indro na akory fomba hivolan̈andro izio. Fotony nan̈ino? Karaha ty ho izy: “Amy leranizen̈y, hamezan̈a anaro zay raha tokony hivolan̈inaro. Sady izio tsy raha anaro fo hivolan̈a, fa fan̈ahiny Babanaro hampivolan̈a anaro.”​—Mat. 10:19, 20.

19. Akory nahitan̈a fa nasaky nitory i Robert?

¹⁹ Diniha baka raha nandalo tamy Rahalahy Robert. Ten̈a ravoravo izy fotony an̈isany fianakavian̈any  Jehovah. Nisy fotoan̈a izy tsy maintsy nan̈azava tamy tribinaly araiky tan Afriky Atsimo tan̈y, nan̈ino izy tsy man̈eky han̈ano maramila. Kanefa izy tamy zen̈y mbala vo nianatra Baiboly fo. Tsy navozo foeky izy nan̈azava tamindro tamy fitsaran̈a io fa tiany iro rahalahiny aby io, ke zen̈y mahavy izy tsy han̈ano maramila. Tio fo pitsara io nan̈ontany izy karaha ty: “Azovy ma rahalahinao?” Tsy nampoiziny Robert foeky fan̈ontanian̈a io, fa direkty azony onon̈o Matio 12:50. Karaha ty koran̈iny andininy io: “Na azovy na azovy man̈ano sitrapôny Babako andan̈itry an̈y, izy rahalahiko ndreky anabaviko, baka io reniko.” Ndray mbala vo tsy ela nianarany Robert Baiboly, fan̈ahy masin̈iny Jehovah nan̈ampy izy hamaly fan̈ontanian̈a io ndreky fan̈ontanian̈a maro hafa tsy niritriretiny foeky. Hay be namparavoravo Jehovah raha nataony Robert! Ho ravoravo amintsika koa Jehovah izikoa atsika mitavandra izy, han̈ampy atsika hanan̈a korazy hiarovan̈a finoan̈antsika, intsaka eky an̈atiny raha sarotro.

20. Tokony ho tapakevitry han̈ino atsika? (Jaona 17:11, 15)

²⁰ Irarian̈a atsika ho ravoravo fo fotony atsika an̈isany fianakaviambeny pirahalahy ten̈a mifankatia. Jehovah zaraiky fo Baba ten̈a tsara mety anan̈antsika. Manan̈a rahalahy ndreky ranabavy ten̈a tia atsika koa atsika. Tsy mila avôsotrontsika foeky tombontsoa be anan̈antsika zen̈y. Satana ndreky donia ty miezaka mare man̈ano raha hahavy atsika hieritreritry fa Jehovah tsy tia atsika. Ataony koa raha hampisaratsaraka atsika. Nahakiry izy, Jesosy efa nivavaka baka Jehovah hiaro atsika ndreky han̈ampy atsika hiray sain̈y fo. (Vakia Jaona 17:11, 15.) Ten̈a namaly vavakanany zen̈y Jehovah. Karaha Jesosy, irarian̈a atsika tsy hisalasala foeky fa Babantsika andan̈itry an̈y ten̈a tia atsika ndreky man̈ampy atsika. Irarian̈a koa atsika ho tapakevitry fo han̈ano raha hahavy atsika ho tia Jehovah mare ndreky ho tia piaramanompo.