1. Ana ŵandu ŵakulupichika akwete upile wakumkolanga Yehofa kuti ŵani?

LIŴASA lya Yehofa lya ŵakutumichila ŵakwe likusapwatikapo Yesu, jwali “jwandanda kupagwa ku yakupanganyikwa yosope,” soni malayika gagali gejinji mnope. (Akolo. 1:15; Sal. 103:20) Yesu pajwaliji pachilambopa, jwalosisye kuti yili yakomboleka kwa ŵandu ŵakulupichika kumkolanga Mlungu kuti Atati ŵawo. Yesu pajwaŵechetaga ni ŵakulijiganya ŵakwe, jwamkolasile Yehofa kuti “Atati ŵangu ni Atati ŵenu.” (Yoh. 20:17) Wosopewe patwagambile kulipeleka kwa Yehofa ni kubatisidwa, ndaŵi jijojo twaŵele m’liŵasa lyakunonyelana lya abale ni alongo.—Maliko 10:29, 30.

2. Ana chitukambilane chichi munganiji?

² Ŵandu ŵane yikusiyasawusya kumwona Yehofa kuti ali Atati ŵachinonyelo. Ŵanesoni ŵangamanyilila yampaka atende pakwalosya chinonyelo abale ni alongo. Munganiji chitulole yaŵatesile Yesu pakutukamuchisya kuti tumwoneje Yehofa kuŵa Atati ŵetu ŵachinonyelo. Chitulijiganyesoni yampaka tutende kuti tumsyasye Yehofa pa mwatukusatendela yindu ni abale ni alongo ŵetu.

3. Ana lipopelo lya chisyasyo likusatukamuchisya chamtuli kuŵa paunasi wambone ni Yehofa?

³ Yehofa ali Atati ŵachinonyelo. Mwamti Yesu akusasaka kuti tumwoneje Yehofa mpela muŵamwonelaga jwalakwejo. Akusasaka kuti tumwoneje Yehofa mpela Atati ŵetu ŵakusatunonyela ŵampaka tuŵechetane nawo ndaŵi jilijose. Jwalakwe ngakusaŵa mpela mundu jwangali chinonyelo jwakusagamba kutamila kwasalila ŵane yakutenda. Umboni wa yeleyi ukusawonechela pa kapopele kaŵajiganyisye Yesu ŵakumkuya ŵakwe. Paŵajiganyaga lipopeloli jwalakwe jwatandite ni maloŵe gakuti, “Atati ŵetu.” (Mat. 6:9) Yesu akakomboleche kutusalila kuti tumkolanjeje Yehofa mena mpela “Jwamachili gosope,” ‘Jwakupanganya,’ kapena “Mwenye jwampaka kalakala.” Mena gelegatu gali gakuŵajilwa soni akusagakolanga m’Baibulo. (Gen. 49:25; Yes. 40:28; 1 Tim. 1:17) Nambo Yesu jwatusalile  kuti tumkolanjeje Yehofa kuti “Atati,” yayikusalosya kuti tukusagopochelana najo mnope.

4. Ana tukusamanyilila chamtuli kuti Yehofa akusasaka kuti tuŵe najo paunasi wambone?

⁴ Ŵandu ŵane akusayiwona kuŵa yakusawusya kumwona Yehofa kuti ali Mtati jwachinonyelo. Naga Atati ŵetu ŵakutuŵeleka ŵatutendelaga ngasa, mpaka yiŵe yakusawusya kulupilila kuti mundu jwine jwakwe mpaka aŵe Mtati jwachinonyelo. Kusala yisyene yili yakulimbikasya kuti Yehofa akusamanyilila mwatukusapikanila soni ligongo lyakwe tukupikana myoyo. Jwalakwe akusasaka kuti tuŵe najo paunasi, mwamti ni ligongo lyakwe Maloŵe gakwe gakusatulimbikasya kuti, ‘Amŵandichile Mlungu nipo jwalakwe tachimŵandichila jemanja.’ (Yak. 4:8) Yehofa akusatunonyela, soni akusasala kuti chachiŵa Atati ŵetu ŵambone kupunda ŵaliwose.

5. Mwakamulana ni Luka 10:22, ana Yesu mpaka atukamuchisye chamtuli kuti tuŵe paunasi wambone ni Yehofa?

⁵ Yesu mpaka atukamuchisye kuti tuŵe paunasi wambone ni Yehofa. Jwalakwe akusammanyilila chenene Yehofa, soni jwalosisye ndamo syambone syakwete Yehofajo. Mwamti jwatite, “Mundu jwambweni une ŵawenisoni Atati.” (Yoh. 14:9) Pakuŵa Yesu akusamanyilila yejinji, jwalakwe akusatujiganya yampaka tutende kuti tumchimbichisyeje Mlungu soni kumpikanila. Akusatujiganyasoni yampaka tutende kuti tuŵambaleje kumtumbilikasya Mlungujo soni kuti asangalaleje ni yatukusatendaga. Nambo mwaŵatendelaga yindu Yesu ali pachilambo chapasi, yikusatukamuchisya kumanyilila kuti Yehofa ali jwachinonyelo. (Aŵalanje Luka 10:22.) Kwende tukambilane yisyasyo yine panganiji.

6. Ana ni yisyasyo yapi yayikulosya yaŵatesile Yehofa pakumpikanila Yesu?

⁶ Yehofa akusiŵapikanila ŵanache ŵakwe. Agambe ganisya yaŵatesile Yehofa pakumpikanila Yesu. Jwalakwe ŵapikanile mapopelo gejinji ga Yesu paŵaliji pachilambo chapasi. (Luk. 5:16) Jwalakwe ŵampikanile Yesu paŵapopelaga kuti amkamuchisye pandaŵi jiŵatendaga yindu yakusosekwa, mpela paŵasagulaga ŵandumetume ŵakwe 12. (Luk. 6:12, 13) Yesu pajwalagasikaga nganisyo, Yehofa ŵapikanile lipopelo lyakwe. Yudasi ali asigele panandi kumpeleka, Yesu jwapopesile kwa Atati ŵakwe pakwamba ya yindu yaŵajembecheyaga kusimana nayo. Ngaŵa kuti Yehofa  ŵagambile kupikana lipopelo lya Yesuli, nambo jwatumisye lilayika kuti likamlimbikasye.—Luk. 22:41-44.

7. Ana tukusapikana wuli mumtima patuyimanyi kuti Yehofa akusapikanila mapopelo getu?

⁷ Masiku aganosoni, Yehofa akusapikanilaga mapopelo ga ŵakutumichila ŵakwe. Mwamti jwalakwe akusajanga mapopeloga pandaŵi jakwe soni m’litala lyakuŵajilwa. (Sal. 116:1, 2) Mlongo jwine jwa ku India jwayiweni yaŵatite Yehofa pakwanga mapopelo gakwe. Mlongoju jwalagasikaga mnope nganisyo, mwamti ŵamŵendile Yehofa kuti amkamuchisye kumalana ni chakusawusyachi. Jwalakwe jwalembile kuti, “Pologalamu ja JW Broadcasting^® ja Meyi 2019, jajasalaga yampaka tutende kuti tumalane ni kulagasika nganisyo, jaliji ja pandaŵi jakwe. Mwamti kopoka kwa pologalamuji kwaliji kwanga kwa mapopelo gangu.”

8. Ana Yehofa ŵalosisye m’matala gapi kuti akusamnonyela Yesu?

⁸ Yehofa akusatusamalila soni kutunonyela mpela muŵatendele ni Yesu pandawi jaŵatendaga utumiki wakwe pachilambo chapasi. (Yoh. 5:20) Jwalakwe ŵamkamuchisyaga Yesu kuti aŵe jwakulimba mwausimu. Kupwatika pelepa ŵamlimbikasyaga pandaŵi jatengwiche soni ŵampaga yakusosechela yakwe yosope yakuchilu. Ŵamsalilagasoni Mwanache jwakwejo kuti akusamnonyela soni akusasangalala mnope ni yakusatendaga. (Mat. 3:16, 17) Ligongo lyakuti Yesu jwayiwonaga yiŵatendaga Atati ŵakwe pakulosya kuti akusamnonyela, jwalakwe nganalipikanaga kuti ali jika.—Yoh. 8:16.

9. Ana tukusamanyilila chamtuli kuti Yehofa akusatunonyela?

⁹ Mpela muyaŵelele ni Yesu, wosopewe tuyiweni kupitila m’matala gejinji kuti Yehofa akusatunonyela. Agambe ganisya, Yehofa ŵatukundile kuti tuŵe najo paunasi wambone. Jwatupele abale ni alongo ŵakusatunonyela soni kutukamuchisya kuti tuŵeje ŵakusangalala. Nambosoni akusatulimbikasya patusimene ni yakusawusya. (Yoh. 6:44) Yehofa akusatupasoni yindu yiliyose yatukusasosekwa kuti tukole chikulupi chakulimba. Kupwatika pelepa, akusatupasoni yindu yosope yatukusasochela paumi wetu. (Mat. 6:31, 32) Patukuganichisya yakusatenda Yehofa pakutunonyela, ni patukusatandasoni kumnonyela mnope jwalakwe.

10. Ana mpaka tulijiganye chichi mwakusatendela yindu Yehofa ni abale ni alongo ŵetu?

¹⁰ Yehofa akusiŵanonyela abale ni alongo ŵetu. Nambo ndaŵi sine mpaka tuyiwoneje kuŵa yakusawusya kwanonyela abale ni alongo ŵetuŵa. Mpaka yiŵe myoyo, ligongo lyakulekangana ndamo soni kumalo kwatwakulile. Kupwatika pelepa, ndaŵi sine wosopewe tukusatenda yindu yampaka yakuŵasye ŵane. Atamose yili myoyo, mpaka tukombolepe kwalimbikasya jemanjaji. Mpaka tukombole kutenda yeleyi mwakusyasya yakusatenda Atati ŵetu pakwanonyela achalongo achimjetuŵa. (Aef. 5:1, 2; 1 Yoh. 4:19) Kwende tulole yampaka tulijiganye pa yakusatenda Yehofa.

11. Ana Yesu jwalosisye chamtuli “umbone mtima wa Yehofa”?

¹¹ Yehofa akusalosya “umbone mtima.” (Luk. 1:78) Mundu jwambone mtima akusadandawulaga naga ŵaweni ŵane ali mkulaga, mwamti akusasosa matala gakuti ŵakamuchisye soni kwalimbikasya. Muŵatendelaga yindu Yesu ni ŵandu, yalosyaga yakusati Yehofa pakwaganichisya jemanjajo. (Yoh. 5:19) Pandaŵi jine Yesu ali ŵaweni ŵandu ŵajinji, jwalakwe “ŵatendele chanasa ligongo jemanjajo ŵaliji ŵakudandawula nipo ŵaliji ŵakusoŵa chikamuchisyo mpela ngondolo syangali mkuchinga.” (Mat. 9:36) Yesu nganagamba kulipikana mumtima kuti akusiŵanonyela ŵanduwo, nambo jwatesile yine pakusaka kwakamuchisya. Jwalakwe jwaposisye ŵakulwala soni kwakamuchisya ŵandu ŵaŵaliji “ŵakupela ni ŵakusityopelwa.”—Mat. 11:28-30; 14:14.

12. Asale chisyasyo chakulosya yampaka tutende kuti tulosye umbone mtima.

¹² Naga tukuganichisya yakusawusya yakusimana nayo abale ni alongo ŵetu tuchikombola kwalosya umbone mtima. Mwachisyasyo, mpaka yisimanikwe  kuti mlongo jwine akulaga ni ulwele wine wakwe. Komboleka jwalakwejo nganaŵa akombwele kusala yakusawusya yakwe, nambo mpaka ayamichile mnope mundu jwine ali amkamuchisye. Mpaka tusosekwe kuganichisya yindu ayi, Ana mlongojo akukombola kupata yakusosekwa ya paliŵasa lyakwe? Ana mpaka tukombole kumkamuchisya mwakumtelechela chakulya kapena kumlinganyila nyumba jakwe? Mpaka yisimanikwesoni kuti m’bale gammalile masengo. Mwine mpaka tumkamuchisye m’balejo mwakumpa kambiya kuti kamkamuchisye mpaka ali apatile masengo gane. Soni mpaka tutende chenene ngalilosya kuti m’wejo ni ŵatumkamuchisye.

13-14. Ana mpaka tutende uli kuti tuŵe ŵakoloŵa magasa mpela Yehofa?

¹³ Yehofa ali jwakoloŵa magasa. (Mat. 5:45) Tukajembecheyaga kuti abale ni alongo atuŵende kuti twakamuchisye m’wejo mkanituŵe kutendapo kandu. Mpela mwakusatendela Yehofa, m’wejisoni mpaka twakamuchisye jemanjajo mkanaŵe kutuŵenda. Paja Yehofa akusaŵalisya lyuŵa lisiku lililyose m’wejo atamose tuli nganitumŵenda. Sonitu lyuŵa likusamkamuchisya jwalijose, ngaŵa ŵandu ŵali ŵakuyamichilape. Myoyo, Yehofa akusalosya kuti akusatunonyela mnope mwakutupa yindu yatukusasosechela. Kusala yisyene tukusosekwa tumnonyeleje mnope Yehofa ligongo lyakututendela yindu mwachanasa soni mwakoloŵa magasa.

¹⁴ Abale ni alongo ŵajinji, akusiŵasyasya Atati ŵawo ŵakwinani mwakuŵa ŵakoloŵa magasa. Mwachisyasyo, mu 2013 ku Philippines kwaputile chimbungo chamachili. Pandaŵiji nyumba soni katundu jwa abale ni alongo ŵajinji yajonasiche. Nambo abale ni alongo pachilambo chosope ŵakamuchisye jemanjaji. Ŵane ŵakamuchisye pakupeleka mbiya syawo, pele ŵane ŵalipeleche pamasengo gakutaŵa. Yeleyi yakamuchisye kuti mkanichimale chaka, nyumba sya abale ni alongo syakwana 750 silinganyidwe kapena kutaŵidwasoni. Mundaŵi ja mlili wa kolonafayilasi, ŵa Mboni sya Yehofa ŵajinji ŵatesile yampaka akombole pakwakamuchisya abale ni alongo ŵawo. Patukwakamuchisya mwachitema Aklistu achimjetu, ni patukusalosya kuti tukusanonyela mnope.

15-16. Mwakamulana ni Luka 6:36, ana mpaka tutende chichi pakusyasya mwakusatendela yindu Atati ŵetu ŵakwinani?

¹⁵ Yehofa ali jwachanasa soni akusakululuka naga ŵane amlemwechesye. (Aŵalanje Luka 6:36.) Lisiku lililyose tukusachiwona chanasa chakusalosya Atati ŵetu ŵakwinani. (Sal. 103:10-14)  Ŵakumkuya ŵa Yesu ŵaliji ŵangali umlama, nambope jwalakwe ŵatendele chanasa soni kwakululuchila. Jwalakwe jwayikene pakupeleka mbopesi umi wakwe kuti atukululuchile yakulemwa yetu. (1 Yoh. 2:1, 2) Ana wawojo ngakusalipikana kuti ali paunasi wambone ni Yehofa soni Yesu, ligongo lyakuti jemanjaji ali ŵachanasa soni akusatukululuchila?

¹⁶ Tukusakombola kwanonyela mnope abale ni alongo naga ‘tukukululuchilana jwine ni mjakwe.’ (Aef. 4:32) Atamose kuti ndaŵi sine yikusaŵa yakusawusya kuti twakululuchile ŵane, nambope tukusosekwa kulingalinga kutenda yeleyo. Sanja ja Mlonda jine jajakwete mtwe wakuti “Tukululuchilaneje ni Mtima Wosope,” jamkamuchisye mlongo jwine. * Jwalakwe jwalembile kuti, “Ngani jeleji jangamuchisye kumanyilila kuti kwakululuchila ŵane kuli kwakamuchisya. Nganiji jasasile kuti naga tukwakululuchila ŵane, yangalosya kuti yatesile jemanjajo yikutusangalasya kapena nganiyitupweteka mnope. Nambo kwakululuchila ŵane kukusalosya kuti mundu ngakutumbilasoni ni nganijo, yayikusamkamuchisya kuti akole mtendele wa mumtima.” Patukwakululuchila abale ni alongo ŵetu ni mtima wosope, tukusalosya kuti tukusanonyela mnope jemanjaji soni tukusaŵa tuli mkwasyasya Atati ŵetu Yehofa.

17. Mwakamulana ni Mateyu 5:16, ana mpaka twachimbichisye chamtuli Atati ŵetu ŵakwinani?

¹⁷ Uli upile wekulungwa kusimanikwa m’liŵasa lyakunonyelana lya pachilambo chosope. Tukusasaka kuti ŵandu ŵajinji ayiche kuti tutumichileje nawo yimpepe Yehofa. Myoyo tukusosekwa kuŵambala kutenda chilichose champaka chatendekasye ŵane kuganichisya kuti Yehofa soni ŵakutumichila ŵakwe ali ŵakusakala. Mmalomwakwe, tutendeje yindu yampaka yatendekasye ŵandu kusaka kulijiganya soni kumtumichila Yehofa.—Aŵalanje Mateyu 5:16.

18. Ana chichi champaka chitukamuchisye kuti tulalichileje mwakulimba mtima?

¹⁸ Ndaŵi sine ŵandu ŵane mpaka atusisyeje soni kutulagasya ligongo lyakuti tukusapikanilaga Atati ŵetu ŵakwinani. Ana mpaka tutende uli naga tukutenda woga kwasalila ŵandu ŵane yindu yatukusakulupililaga? Tuŵeje ŵakusimichisya kuti Yehofa soni Mwanache jwakwe chachitukamuchisya. Yesu ŵasalile ŵakulijiganya ŵakwe kuti akadandawulaga  kuti ‘chakaŵechete chichi soni chakaŵechete chamtuli?’ Ligongo chichi jemanjaji nganasosekwaga kudandawula? Yesu jwasalile kuti, ‘Pakuti timchipegwa ndaŵi jijojo maloŵe gakuti mŵechete. Pakuti ŵitachiŵechetaga, ngasimŵa jemanja, nambo msimu wa Atati ŵenu ŵakwinani ni wauchiŵechetaga mwenumwe.’—Mat. 10:19, 20.

19. Asale chisyasyo cha mundu jwine juŵakombwele kulalichila mwakulimba mtima.

¹⁹ Aganichisye yayamtendechele Robert. Ali agambile kutanda kwene kulijiganya Baibulo soni ali ngakumanyilila yejinji, ŵamŵilasile ku koti ja ku South Africa kuti akasale pameso pa jwakulamula ligongo lyakwe akukana kwinjila nawo usilikali. Mwakulimba mtima jwalakwe jwasasile kukotiko kuti ngakwinjila nawo usilikali ligongo lyakwanonyela achalongo achimjakwe. Jwalakwe jwalosisye kuyamichila ligongo lyakuŵa m’liŵasa lya Yehofa. Ali kukoti kula, mwangajembecheya jwakulamula magambo jwamwusisye kuti, “Ana achalongo achimjenuŵa ali ŵani?” Robert nganajembecheyaga kuti chamwusye chiwusyo chelechi. Nambo mwawupile jwakumbuchile lilemba lyesiku lya palisikulyo. Lilembali lyaliji lya Mateyu 12:50, lyalikusati, “Pakuti mundu jwalijose jwakutenda lisosa lya Atati ŵangu ŵakwinani, jwelejo ni mlongo mjangu, mlumbugwangu, ni mama ŵangu.” Atamose kuti Robert jwaliji ali agambile kutanda kwene kulijiganya Baibulo, nambope msimu wa Yehofa wamkamuchisye kuti akombole kwanga chiwusyochi soni yine yanganayijembecheyaga. Yehofa jwasangalele mnope ni yeleyi. Akusasangalalasoni patukumdalila mnope kuti atukamuchisye kuŵa ŵakulimba mtima kuti tukombole kulalichila pandaŵi jakusawusya.

20. Ana tukusosekwa kuŵa ŵakusimichisya kutenda chichi? (Yohane 17:11, 15)

²⁰ Tukusosekwa kupitilisya kuyamichila upile watukwete wakuŵa m’liŵasa lyakunonyelana lya pachilambo chosope. Tukwete Atati ŵambone ŵanganituŵa twapatile kwine kulikose soni abale ni alongo ŵakusatunonyela mnope. Ndaŵi syosope tukusosekwa tuyamichileje upile welewu. Satana ni yiŵanda yakwe akusatenda yakuti tukayichileje chinonyelo cha Atati ŵetu ŵakwinani, soni akusasaka kusokonasya mkamulano watukwete. Yesu ŵapopesile mmalo mwa m’weji, kwaŵenda Atati ŵetu kuti atuloleleje ni chakulinga chakuti tupitilisye kuŵa ŵakamulana. (Aŵalanje Yohane 17:11, 15.) Yehofa akusajanga lipopelo lya Yesuli. Mpela muyaŵelele ni Yesu, ngatukusosekwa kayichila kuti Atati ŵetu ŵakwinani akusatunonyela soni kutukamuchisya. Myoyo, kwende tuŵe ŵakusimichisya kutenda yakomboleka kuti tuŵepe paunasi wambone ni Aklistu achimjetu.