1. ¿Ximodo zanda guʼyaʼ binni nachaʼhuiʼ Jehová?

NAPA JEHOVÁ ti familia ra nuu ca xpinni ni runi adorar laa. Ládecabe nuu Jesús, laa nga «ni bizáʼ Dios primé lade guiráʼ cosa», ne nuu stale ángel (Col. 1:15; Sal. 103:20). Dxi guyuu Jesús lu Guidxilayú riʼ, bisihuinni zanda guʼyaʼ binni Jehová casi Bixhózecaʼ. Ti biaje dxi caníʼnebe ca discípulo stibe, guniʼbe naca Jehová «Bixhózebe ne Bixhózecaʼ» (Juan 20:17). Ne ora guca dedicarnu Jehová ne guyuunísanu, guyuʼnu ndaaniʼ ti familia ra nuu hermanu ne hermana ni nadxiisaa (Mar. 10:29, 30).

2. ¿Xi zadúʼyanu lu artículo riʼ?

² Raca nagana para caadxi xpinni Dios gúʼyacaʼ Jehová casi Bixhózecaʼ ni nadxii laacaʼ. Zándaca nuu tu raca nagana para laa gusihuinni nadxii ca hermanu. Lu artículo riʼ zadúʼyanu ximodo racané Jesús laanu guidúʼyanu Jehová casi Bixhózenu ni nadxii laanu ne zanda guidxíñanu laa. Laaca zadúʼyanu ximodo zanda gusihuínninu zinándanu ejemplu stiʼ Jehová ra gusihuínninu nadxiinu ca hermanu.

3. ¿Ximodo racané oración de padrenuestro laanu guidxíñanu jma gaxha de Jehová?

³ Jehová nga Bixhózenu ni nadxii laanu, ne racalaʼdxiʼ Jesús guidúʼyanu Jehová cásica ruuyaʼ laabe: casi ti padre ni nadxii xiiñiʼ ne zanda guinínenu laa ora tiica si, ne cadi nácabe casi ti binni naduxhuʼ ni runi mandar si. Bisihuinni Jesús nadxii Jehová laanu ra bisiidibe ca discípulo stibe guni orarcaʼ, ne guniʼbe ca diidxaʼ riʼ: «Bixhózedu» (Mat. 6:9). Ñanda niníʼ Jesús nidxíñanu ra nuu Jehová ne nininu  «ni jma napa poder», «ni bizáʼ guiráʼ ni nuu» o «ni qué ziuu dxi gusaana de gaca Rey», nácacani título biaʼsi peʼ para Jehová ne zeedacani lu Biblia (Gén. 49:25; Is. 40:28; 1 Tim. 1:17). Peru biquiiñeʼ Jesús ti diidxaʼ de cariñu ora guníʼ «Bixhózedu».

4. ¿Ximodo nánnanu racalaʼdxiʼ Jehová guidxíñanu ra nuu?

⁴ Nuu tu laa raca nagana para laa guʼyaʼ Jehová casi Bixhoze ni nadxii laa. Zándaca nuu tu laa rizaaca ni bizéʼtenu riʼ purtiʼ qué nusihuinni bixhoze nadxii laa dxi nahuiiniʼ. Ratadxí ladxidoʼno ora gánnanu riene Jehová ni cayuni sentirnu ne racalaʼdxiʼ chuʼ gaxha de laanu. Nga runi sicaríʼ ná Stiidxaʼ Dios: «Laguidxiña ra nuu Dios ne laa zadxiña laatu» (Sant. 4:8). Nadxii Jehová laanu ne cayabi laanu laa nga Bixhózenu ni jma nadxii laanu.

5. Casi ná Lucas 10:22, ¿ximodo zanda gacané Jesús laanu guidxíñanu jma gaxha de Jehová?

⁵ Zanda gacané Jesús laanu guidxíñanu jma gaxha de Jehová. Runibiáʼ chaahuibe Jehová ne rusihuínnibe ca cualidad stiʼ. Nga runi guniʼbe: «Ni maʼ biiyaʼ naa la? laaca maʼ biiyaʼ Bixhozeʼ» (Juan 14:9). Naca Jesús casi bíʼchinu o bizánanu ni jma huaniisi, purtiʼ rusiidiʼ laanu guni respetarnu ne guzúʼbanu stiidxaʼ Bixhózenu, gúninu ni riuulaʼdxiʼ ne gusiéchenu laa. Ne dxi guyuu Jesús lu Guidxilayú riʼ bisihuinni guizáʼ nachaʼhuiʼ Jehová ne nadxii laanu (biindaʼ Lucas 10:22). Guidúʼyanu caadxi ejemplu ni rusihuinni zacá ni.

6. ¿Xiñee nánnanu bicaadiaga Jehová ca oración ni biʼniʼ Jesús?

⁶ Rucaadiaga Jehová ca xiiñiʼ. Guidúʼyanu ximodo bicaadiágabe Jesús, Xiiñibe. Nánnanu bicaadiágabe Jesús stale biaje ora biʼniʼ orar laabe dxi guyuu lu Guidxilayú riʼ (Luc. 5:16). Nánnanu gucanebe Jesús dxi gunabaʼ laabe gacanebe laa ora gucuaa decisión risaca, casi dxi gulí ca 12 apóstol stiʼ (Luc. 6:12, 13). Laaca bicaadiaga Jehová laabe dxi gudíʼdibe ra nagana. Ante guni traicionar Judas laabe gunábabe Bixhózebe gacané laabe para gudxiilube ca prueba ni chitídibe.  Cadi bicaadiaga si Jehová Xiiñiʼ, sínuque laaca biseendaʼ ti ángel para cuʼ gana laabe (Luc. 22:41-44).

7. ¿Ximodo runi sentirluʼ ora gánnaluʼ rucaadiaga Jehová ca oración stiluʼ?

⁷ Tiempu riʼ, laaca rucaadiaga Jehová laanu ora runi orarnu laa, ne ricábibe laanu órapeʼ caquiiñenu ni ne racanebe laanu (Sal. 116:1, 2). Ti hermana de la India, biiyaʼ ximodo bicabi Jehová ca oración stiʼ. Nabé guyuube xizaa, ngue runi gunábabe Jehová gacané laabe. Sicaríʼ guniʼbe: «Programa stiʼ JW Broadcasting^® ni biree lu beeu mayo de 2019 caníʼ xi zanda gúninu para gudxíʼlunu ca cosa ni riguu xizaa laanu, ngue peʼ nga ni caquiiñeʼ. Zaqué nga biiyaʼ bicabi Jehová oración stinneʼ».

8. ¿Ximodo bisihuinni Jehová nadxii Jesús?

⁸ Cásica gunnaxhii Jehová Jesús dxi guyuu lu Guidxilayú riʼ, zacaca nadxiibe laanu (Juan 5:20). Gucanebe Jesús gaca fe stiʼ naguidxi, guluube gana laa dxi cadiʼdiʼ ra nagana ne bidiibe ni caquiiñeʼ para guibaniné. Ne gúdxibe Jesús nadxiibe laa ne rusiecheʼ laabe (Mat. 3:16, 17). Qué ñuu dxi ñuni sentir Jesús stubi, purtiʼ nanna siempre cayacané Bixhoze ni nuu guibáʼ laa (Juan 8:16).

9. ¿Ximodo nánnanu nadxii Jehová laanu?

⁹ Cásica Jesús, guiranu huayuni sentirnu stale biaje pabiáʼ nadxii Jehová laanu. Guníʼ ique ndiʼ: Maʼ bidii Jehová lugar gaca xhamígunu laa, maʼ bidiibe laanu stale hermanu ne hermana ni nadxii laanu ne ni rusiecheʼ laanu ne ni racané laanu ora careʼnu gana (Juan 6:44). Rudiibe laanu ni caquiiñenu para iguidxi fe stinu. Ne laaca rudiibe laanu ni caquiiñenu para guibaninenu (Mat. 6:31, 32). Ora guiníʼ íquenu pabiáʼ nadxii Jehová laanu, jma rannaxhiinu laa.

10. ¿Ximodo zanda gannaxhiinu ca hermanu cásica nadxii Jehová laacaʼ?

¹⁰ Nadxii Jehová ca hermanu stinu. Peru zándaca gaca nagana para laanu gábinu laacabe nadxiinu laacabe. Zándaca pur gadxé gadxé cultura stinu o purtiʼ maʼ gadxé modo biniisinu. Ne cumu guiranu rucheʼnu la? zándaca gúninu o guininu xiixa ni guchiichi xcaadxi. Neca zacá, zanda gacanenu para gannaxhiisaanu jma ca hermanu ne ca hermana stinu, cásica runi Jehová ni (Efes. 5:1, 2; 1 Juan 4:19). Guidúʼyanu xi rusiidiʼ ejemplu stiʼ Jehová laanu.

11. ¿Ximodo bisihuinni Jesús riá Jehová laanu?

¹¹ «Nabé riá» Jehová laanu (Luc. 1:78). Binni ni riá rizaalaʼdxiʼ ora ruuyaʼ cayacaná xcaadxi ne ruyubi modo gacané ne quixhedxí ladxidóʼcabe. Modo biʼniʼ tratar Jesús binni bisihuínnini xi runi sentir Jehová pur laacaʼ (Juan 5:19). Biblia ná, «ora ruuyabe guiráʼ ca binni que, guizáʼ riabe laacaʼ, purtiʼ guizáʼ maʼ gucanacaʼ ne nuucaʼ stúbicaʼ casi dendxuʼ ni qué gapa pastor» (Mat. 9:36). Cadi biá si Jesús binni, sínuque laaca biʼniʼ xiixa pur laacabe. Bisiándabe ca binni ni huará, gucanebe «guiráʼ ni cayuni dxiiñaʼ nadipaʼ ne ca ni nuáʼ stale cosa nanaa» (Mat. 11:28-30; 14:14).

12. ¿Ximodo zanda gusihuínninu rianu ca hermanu?

¹² Pa racaláʼdxinu gacanenu ne guianu ca hermanu stinu la? caquiiñeʼ guidúʼyanu xi guendanagana cadxaagalúcabe. Guzéʼtenu ti ejemplu, zándaca guizáʼ huará ti hermana. Zándaca qué riníʼpebe de guendahuará ni nápabe, peru guizáʼ  ñéchebe pa ñuu tu ñacané laabe. ¿Ñee cayaca nagana para laabe gudiibe ni caquiiñeʼ familia stibe la? ¿Ñee zanda gacanenu laabe gaca guendaró stibe o gusianu ra lídxibe la? O guiníʼ íquenu biaana ti hermanu sin dxiiñaʼ. ¿Ñee zanda gudiʼnu laabe ti ndaa bueltu, sin gudiibe cuenta tu cudii ni laabe, para gacanenu laabe dede ora maʼ bidxélabe dxiiñaʼ la?

13, 14. ¿Ximodo zanda chinándanu ejemplu stiʼ Jehová, Dios ni riuulaʼdxiʼ gudii de ni napa?

¹³ Naca Jehová ti Dios ni riuulaʼdxiʼ gudii de ni napa (Mat. 5:45). Pa racaláʼdxinu guianu ca hermanu stinu, cadi naquiiñeʼ cuézanu gacanenu laacabe dede ora guinábacabe ni laanu. Quixhe íquenu gacanenu laacabe cásica runi Jehová ni. Guiráʼ dxi rudiibe lugar guzaaniʼ Gubidxa laanu sin guinábanu ni laabe, ne cadi ca binni nachaʼhuiʼ si racané xtuxhu ni, sínuque guiráʼ binni. ¿Cadi dxandíʼ rusihuinni Jehová pabiáʼ nadxii laanu ra rudii ni caquiiñenu la? ¡Guizáʼ nachaʼhuiʼ Jehová ne riuulaʼdxiʼ gudii de ni napa, ne pur nga guizáʼ nadxiinu laabe!

¹⁴ Stale de ca hermanu ne hermana stinu rinándacaʼ ejemplu stiʼ Jehová ora riguixhe íquecaʼ gacanecaʼ xcaadxi hermanu ne rudiicaʼ de ni nápacaʼ. Guidúʼyanu ni bizaaca lu iza 2013, dxi bininá supertifón ni láʼ Haiyan guidxi Filipinas. Stale hermanu biníticaʼ lídxicaʼ ne guiráʼ ni nápacaʼ, peru nagueendaca gucané ca hermanu ne ca hermana ni nuu guidubi Guidxilayú laacabe. Pur ca donación ne dxiiñaʼ ni bíʼnicaʼ gunda guca chaahuiʼ ne gurí biaʼ 750 yoo menu de ti iza. Lu pandemia stiʼ COVID-19, biʼniʼ ca testigu stiʼ Jehová stipa gudiicaʼ ni caquiiñeʼ ca hermanu sticaʼ. Ora nagueenda gacanenu ca hermanu stinu, zusihuínninu nadxiinu laacaʼ.

15, 16. Casi ná Lucas 6:36, ¿xi naquiiñeʼ gúninu pa racaláʼdxinu chinándanu ejemplu stiʼ Bixhózenu, Jehová?

¹⁵ Riá Jehová binni ne runi perdonar (biindaʼ Lucas 6:36). Guiráʼ dxi, rusihuinni Bixhózenu ni nuu guibáʼ riá laanu (Sal. 103:10-14). Zaqueca biʼniʼ Jesús né ca discípulo stiʼ, neca binni ruchee laacaʼ biabe ne biʼniʼ perdonarbe laacaʼ.  Dede bidiibe xquendanabánibe para ganda gaca perdonar ca pecadu stinu (1 Juan 2:1, 2). ¿Cadi dxandíʼ pur riá ne runi perdonar Jehová ne Jesús laanu rucaani laanu guidxíñanu jma gaxha de laacabe la?

¹⁶ Jma rannaxhiinu ca hermanu ne ca hermana stinu ora runi perdonarnu laacaʼ (Efes. 4:32). Nuu biaje zaca nagana para laanu guni perdonarnu, peru naquiiñeʼ gúninu stipa gúninu ni. Ti hermana guníʼ gucané ti artículo ni biree lu Torre stiʼ ni rapa laa ni láʼ «Lagutiidilaʼdxiʼ donda stiʼ stobi casi runi Jiobá». * Sicaríʼ bizeetebe: «Gucané artículo riʼ naa guieneʼ zabeenduáʼ ni galán pa guneʼ perdonar xcaadxi. Ora runi perdonarnu tuuxa qué riníʼdini jneza ni bíʼnibe, o qué ñuninabe lii. Peru ora runi perdonarluʼ maʼ qué ridxiichineluʼ binni ca ne maʼ zuni sentirluʼ galán». Ora runi perdonarnu ca hermanu stinu, rusihuínninu nadxiinu laacaʼ ne zinándanu ejemplu stiʼ Bixhózenu, Jehová.

17. Casi ná Mateo 5:16, ¿ximodo zanda gusisácanu Bixhózenu ni nuu guibáʼ?

¹⁷ Nuunu nayecheʼ purtiʼ nuunu lade stale hermanu ne hermana ni nadxiisaa ni nuu lu guidubi Guidxilayú. Ne racaláʼdxinu gacanenu stale binni guni adorarnecaʼ laanu Jehová. Nga runi qué racaláʼdxinu gúninu xiixa ni gucaa binni guiníʼ mal de Bixhózenu ni nuu guibáʼ o de ca Testigu. Siempre rúninu stipa gúninu ni riuulaʼdxiʼ Dios ti chuulaʼdxiʼ binni gucaadiaga ca noticia galán (biindaʼ Mateo 5:16).

18. ¿Xi zacané laanu guni predicarnu né stale valor?

¹⁸ Nuu biaje zuni binni menu laanu o dede zazanándacaʼ laanu purtiʼ ruzúʼbanu stiidxaʼ Bixhózenu ni nuu guibáʼ. ¿Xi zanda gúninu pa ridxíbinu guinínenu binni de ni runi crenu yaʼ? Cadi guiaandaʼ laanu zacané Jehová ne Jesús laanu. Gudxi Jesús ca discípulo stiʼ cadi chuʼcaʼ xizaa xi guiniʼcaʼ o ximodo guiniʼcaʼ. Sicaríʼ gúdxibe laacaʼ: «Zánnatu xi guiniʼtu  ora peʼ maʼ caquiiñetu ni. Purtiʼ cadi laasitu nga chiguiniʼtu, sínuque espíritu stiʼ Bixhózetu nga guiníʼ pur laatu» (Mat. 10:19, 20).

19. ¿Ximodo gunda biʼniʼ predicar ti estudiante né stale valor?

¹⁹ Guidúʼyanu ni bizaaca ti hermanu láʼ Robert. Cadi xadxí de cayuni estudiarbe Biblia ne huaxieʼruʼ nánnabe, peru gupa xidé guyebe nezalú tribunal militar ni nuu Sudáfrica. Né stale valor bisiénebe pur nadxiibe ca hermanu stibe qué ziuube lu ejércitu. Rusisácabe lugar ni nápabe lade ca hermanu ne hermana ni zeeda gaca familia stibe. Málasi gunabadiidxaʼ tobi de ca juez que laabe: «¿Tuu nga ca hermanu stiluʼ?». Cadi cabeza Robert ninabadiidxabe ngue laa, peru bietenaláʼdxibe textu ni biaba dxi que. Laa ni nga Mateo 12:50: «Guiráʼ tu guni ni ná Bixhozeʼ ni nuu guibáʼ nga bicheʼ, bizanaʼ ne jñaaʼ». Neca huaxiéʼ tiempu napa Robert de cayuni estudiar Biblia, peru gucané espíritu stiʼ Jehová laabe guicábibe pregunta que ne xcaadxi pregunta bíʼnicabe laabe. ¡Guizáʼ bisiéchebe ladxidóʼ Jehová! Ne laaca guizáʼ zusiéchenu Jehová pa gápanu confianza laa ne guni predicarnu né valor ora cadídinu ra nagana.

20. ¿Xi cadi naquiiñeʼ gusaananu de gúninu? (Juan 17:11, 15).

²⁰ Cadi naquiiñeʼ gusaana de chuʼnu nayecheʼ purtiʼ nuunu ndaaniʼ ti familia ra nuu stale hermanu ne hermana ni nadxiisaa. Gástiruʼ stobi casi Bixhózenu, Jehová, ne nápanu stale hermanu ne hermana ni nadxii laanu. Siempre naquiiñeʼ gudiʼnu xquixe peʼ pur nga. Racalaʼdxiʼ Binidxabaʼ ne ca xpinni guiníʼ íquenu cadi nadxii Bixhózenu ni nuu guibáʼ laanu, ne racaláʼdxicabe guixélenu de ca hermanu. Biʼniʼ orar Jesús pur laanu ne gunábabe Jehová gapa laanu ti zacá cadi gusaana de chuʼnu tobi si né ca hermanu stinu (biindaʼ Juan 17:11, 15). Ne cacabi Jehová oración ca. Chinándanu ejemplu stiʼ Jesús ne qué chuʼ dxi guiníʼ íquenu cadi nadxii Jehová laanu ne qué zacané laanu. Nga runi, cadi guixélenu de ca hermanu stinu.