1. Waigu rengbe ani ka yamba Yekova?

GA YEKOVA aborokporo nga aguyo nairisoko nakoda Yesu, nga guko du ni “bambata vungu fu agu ahe dũ i afu,” gbiati badungu amaraika. (Koro. 1:15; Tam. 103:20) Ho Yesu adu ni auru kpotosende, ko aima undo aboro i rugutiyo na gupai nga, i ima rengba ka yamba Yekova nga Bayo. Ho Yesu aafura ni fu abawiriki, ko aya tipa Yekova ‘Buba nga Baroni.’ (Yo. 20:17) Na ho ani akpara gaani raka ni fu Yekova ki zi bapatiza, ani nada ni papara agu aborokporo nga awirina du na nyemuse.—Mk. 10:29, 30.

2. Gini apai ani nika sakapai tipaha rogo gi kekeapai re?

² Si ima kpakara fu kura aboro i bi Yekova ni gu Barani nga boro nyemuse. Si ima rengba ka kpakara fu kura aboro tipa i ini wai ka yugo nyemuse fu awirinayo. Rogo gi kekeapai re, ani nika sakapai tipa wai Yesu aundo rani ani naabi Yekova nga Barani nga boro nyemuse na ni gu boro rengbe ani arengba ka mbeda na ni. Ani nika bi agu agene a rengbe ani ka wirika Yekova ngbaha nibipa wai ani amangapai na awirinarani.

3. Waigu kpia kparakpee ambedisa rani gbe na Yekova?

³ Yekova nga gu Barani nga boro nyemuse. Yesu naida gupai nga ani naabi Yekova wa gu ko abi ko—kaa biko wa gu vungugude nga wene sino boro, duhe taata ka fura na ni ti ai regbo, angianga kaa biko wa gu boro nga gbegberẽ sino boro nape kina gupai furani sa si aida ani mangihe ya. Ani nabi gipai re ni yuguyuguhe ti gupai Yesu ayugupai fu gako abawiriki i naamanga kparakpee tipaha. Ko atona kpia kparakpee na gu fugo nga: “Barani.” (Mt. 6:9) Yesu aima rengba ka gumba gupai furani nga ani naayamba Yekova nga gu “Mbori du na Tandu apai dunduko,” “Bakusiahe,” watadu “nyenye Bakindo,”—ka si adunga ni gbegberẽpai te mbiko Ziazia Kekeapai ima mangasunge na agu afugo re dunduko  tipa ka fura tipa Yekova. (Bam. P. 49:25; Yes. 40:28, NW; 1 Tim. 1:17) Ono tie, Yesu agumba gupai furani nga ani naayamba Yekova nga “Barani.”

4. Waigu ani aino gupai nga Yekova naida ani mbedi na ko?

⁴ Ya mo si kpakara akpakara foro mo naabi Yekova ni gu Bamo nga boro nyemuse? Si ima kpakara fu agu akura rani. Ka singia abarani aangianga wene sino aboro te, si ima rengba kadu ni kpakarakpakaraha furani ani berẽ gupai nga, ani ima rengba kadu na gu bavungu rani rengbe ka kpinyemu rani. Ono tie, si nipa wasa furani nga Yekova ima ino gaani bipai nzunzu na ndu gupai du ani ti ni na gu bipai re! Ko naida kadu mbembedi na ani. Si du nga ndu gupai Fugoko azungodi rani ti ni nga: “Oni mbédi na Mbori, ko ki mbedi na oni.” (Yak. 4:8) Yekova ima kpinyemu rani, na ko nagumba gupai nga ko nika ngia bawene Barani kisusi.

5. Ringbisihe kuti Ruka 10:22, waigu Yesu narengbe ka undo rani ani mbedi gbe na Yekova?

⁵ Yesu ima rengba ka undo rani ani mbedi gbe na Yekova. Yesu ima ino Yekova wenengai na ko nawirika Gako asino ngba rengberengbe gene, si du nga ndu gupai ko aya ti ni wẽ: “Gu ni bi re ni bi Buba.” (Yo. 14:9) Yesu nayugopai furani tipa wai ka yugo irisa fu Barani na kini gisangbako, wai ka ne ba gberãrago ti Ko, na wai ka sa gupai nga Ko idi na ani. Ono ga Yesu raka auru kpotosende ane aima yugopa wai du Yekova nga boro wenesino na ni boro nyemuse. (Oni gedi Ruka 10:22.) Ani bingo bete akpiapai.

6. Oni funga akpiapai nayugopa wai Yekova adegetuko fu Yesu.

⁶ Yekova nadegatuko adega fu awiriko. Oni bingo wai Yekova adegetuko fu bambata Wiriko. Ni rengo, Yekova aima degatuko kuti gu badungu akparakpee Wiriko amangihe ho ko adu ni auru kpotosende. (Rk. 5:16) Ko aima degatuko fu Yesu ho ko aamanga kparakpee ni tipa nyanyakipa adiaberã, wa tigu regbo ko aaida ka sia amokedi 12. (Rk. 6:12, 13) Yekova aima degatuko a kuti ga Yesu kparakpee ho ko adu ni na bakere bakabangirise. Na mbata fu Yuda bagi Yesu, Yesu aima manga kparakpee fu Bako tipa agu apai naandu ka manga ko ngbutuko. Anga gupai Yekova amangihe sa nga ka degatuko kuti ga Yesu kparakpee te, ono ko aima keda maraika a ko ngarasi Wiriko ko akpinyemu ko gbe.—Rk. 22:41-44.

7. Pa ino ani gupai nga Yekova nakaragapai akaraga kuti gaani akparakpee nasa rani ani du wai?

 ⁷ Areme, Yekova nadegatuko adega kuti gaani akparakpee na ko nakaragapai kuti ni ti wene regbo na ngba gu gene ngba kisusi. (Tam. 116:1, 2) Wirina India yo abi wai Yekova akaragapai kuti gari akparakpee. Ri aambu be gu kaza nga ga bakere bakabangirise, na ri amangi kparakpee fu Yekova tipa gipai re. Ri akepai ki ya: “Gu mbakadapai nga ga JW Terevizioni naakuru rogo Merekoko 2019 nga gu naadu tipa wai ka mangapai kuti bakere bakabangirise angia kina boro gupai nzunzu mi aaidaha. Si angia karagapai kuti gimi akparakpee.”

8. Yekova ayugu nyemuse fu Yesu ngba gini agene?

⁸ Yekova ima kpinyemu rani na ko nangera angerafuo rani kina wai ko akpinyemu Yesu na kini ngerefuo ko ti regbo gako raka auru kpotosende. (Yo. 5:20) Ko aundo Yesu ko banda gako idapase ni nyanyakihe, ki ngarasi ko ho ko adu ni na gberãrago, na ki sa gupai nga Yesu du na agu ahe dunduko ko aaidaha tipa raka. Na Yekova ape gupai fu Wiriko nga ko ima kpinyemu ko na ko ima ida na gako pai. (Mt. 3:16, 17) Yesu aima ino gupai nga, gu Bako du ngbangbaturũ yo nga boro nyemuse nika du na ko ti aregbo dũ na ko nikaa undo ko aundo, sidu, Yesu aabingo tiko nga ko nisako te.—Yo. 8:16.

9. Waigu ani aino gupai nga Yekova nakpinyemu rani akpi?

⁹ Wakina Yesu, ani dunduko naima bi ga Yekova nyemuse ngba dungu agene. Oni berẽnga kurii gipai re: Yekova agbe rani koyo du ko ni, na ki fu agu aborokporo furani nga ga toro yo du na nyemuse na kidu ni kodikodi yo tipa i naasa ngbarago tirani na kini ngarasi rani ho du ani ni na gberãrago. (Yo. 6:44) Na Yekova nafu agu ariahe furani dunduko nga ga toro ani aidaha tipa ka banda gaani idapase si du ni nyanyakihe. Na zavura ko naundo rani ani gbia agu ahe ani aidaha tipa kaa raka. (Mt. 6:31, 32) Ho ani aberã ni kurii ga Yekova nyemuse tipa rani, gaani nyemuse tipa ko nasona gbe.

10. Ginipai rengbe ani ka wirikaha ti gu gene Yekova amangapai na awirinarani ngbaha?

¹⁰ Yekova ima kpinyemu awirinarani. Ono si ni taataha furani ka kpinyemu awirinarani na kini yuguhe fuyo nga ani ima kpinyemu yo te. Ti kura aregbo, gipai re ni kpakarakpakaraha mbiko gaani sino mangaapai ni bakiakia watadu agu apai du tipa rani ni bakiakia. Na ani dunduko namanga aingahe amanga nga gu naima rengba ka imisa ngbadu kura aboro watadu ka sayo ka i dunga na ngbarago ya. Wa vura duhe wo, ani ima rengba ka manga nyanyaki asadatise tipa ka nyakasa gu nyemuse nga ga gaani aborokporo nga ga toro yo. Ngba gini gene? Ni wirika ani Barani rogo yugo nyemuse fu awirinarani. (Ef. 5:1, 2; 1 Yo. 4:19) Ani bingo agu apai rengbe ani ka wirikaha ti ga Yekova kpiapai.

11. Waigu Yesu ayugu ga Yekova “weneringise”?

¹¹ Yekova nayugo “weneringise.” (Rk. 1:78) Boro weneringise watadu boro wesewese nyemuse nadu na gberãrago ho ni abi kura aboro ni i nirungo; ni nangera tipa agu agene rengbe ni ka undo ngbaha na ki fu wasa. Yesu ayugu ga Yekova nyemuse tipa aboro rogo gu gene yo ko aamangapai na aboro ngbaha. (Yo. 5:19) Ho Yesu abi rimbasa aboro ni ti kura regbo sa, “nungayo ki mangi ko, bambiko i arungo, ki nigbandaka, wa kina agu akandoro adu nga na babandara ti ra ya.” (Mt. 9:36) Kuba gupai nga Yesu du na kina nunga yo sa tiko, ko aima mangapai tipa ka undo yo. Ko ahusi aguyo nadu na akaza na ki undo aguyo ‘naambu dunduko, ki du na rõrõi tindiro.’—Mt. 11:28-30; 14:14.

12. Waigu rengbe ani ka yugo weneringise fu awirinarani?

¹² Mbata fu ani yugu weneringise watadu wesewese nyemuse fu awirinarani, si naida ani ini agu akpakarapai mbata i agbiatiyo na ni. Ni kpiapai, wirina nga dee ima rengba kadu na kere kpakarapai nga ga kaza kpotose. Ri afuranga  tipa gari kpakarapai te, ono ri ima rengba kadu na bakere ngbarago ka boro undo ri. Ya mo ri na rengba ka gbia agu ahe du gari aborokporo na zingoho? Ya mo mo rengbe ka undo ri nimanga mo riahe furi watadu ni giriso mo rago furi kpuri yo? Wirina ima rengba ka zanga gako sunge. Ani ima rengba ka fu wiri marã fu ko ni gamahe tipa si undo ko daho ko nika gbia sunge ni na ka ani agumbanga gupai fu ko nga ani du fu ru ya.

13-14. Waigu rengbe ani kadu ni aboro gamahe wakina Yekova?

¹³ Yekova nga boro gamahe. (Mt. 5:45) Si aidanga ani sungu asungo daho awirinarani nika sanahe asana ni mbata tipa undo ani kini ru ka yugo weneringise watadu wesewese nyemuse fuyo te. Wakina Yekova, ani ima rengba ka manga apai fuyo mbata fu i sanahe asana tipaha. Ko nasa uru si naaki kurirani na aˈuru dunduko zanga ani sanahe asana tipaha! Na aboro dunduko nagbia undo ti faa uru, angianga kina agu aboro sa du na tambuahe ya. Ni fu Yekova agu ahe furani du ani na zingoho, si nayugo gupai ayugo nga ko ima kpinyemu rani. Ani ima kpinyemu Yekova ni bakerehe gbe mbiko ko nga wenesino boro na ni boro gamahe!

¹⁴ Badungu awirinarani nawirika Yekova na kini gamuhe fu kura aboro. Ni kpiapai, rogo 2013, bakere bavugumo amangi nga gu i ayambaha nga Super Typhoon Haiyan nga gu nagbarasi ahe ni bakerehe Philippines yo. Badungu awirina aima zanga gayo akporo gbiati gayo ahe. Ono gu gayo aborokporo nga ga toroyo du rogo zegino dunduko aima undo yo niipo. Badungu yo afu marã ni gamahe watadu ka fu tiyo ka undo na dua vovo abambu na ka mbakada agu nagberẽ bangehe aima mbeda kuti 750 mbata fu garã sa digi! Ti regbo gu ririkaza nga Korona, aDezire Yekova amangisunge nyanyaki tipa ka undo awirinayo. Ho ani aundo gu gaani aborokporo ni nga ga toro yo niipo, ani nayugo gupai fuyo nga ani ima kpinyemu yo.

15-16. Ringbisihe kuti Ruka 6:36, gini nyanyakipa gene rengbe ani ka wirika gu Barani du ngbangbaturũ yo ngbaha?

¹⁵ Yekova nga boro inapai na ni gu boro nambupai. (Oni gedi Ruka 6:36.) Yekova nayugo inapai furani na aˈuru dunduko. (Tam. 103:10-14) Apefuo Yesu angia aboro zangarengba; ono wa si avura du wo, ko aima yugo inapai gbiati mbupai fuyo. Ko aima du na nyemu ka fu gako raka ni motumo tumorii tipa i mbupai furani ti gaani aingapai. (1 Yo. 2:1, 2) Gu mbupai na  inapai aYekova na Yesu ayugoho furani nambedisa rani gbe koyo du yo ni.

¹⁶ Ani nanyakasa gu nyemuse du dagba gaani aborokporo nga ga toro yo “nivú” ani akuarani. (Ef. 4:32) Ni rengo, si ima rengba kadu ni kpakarakpakaraha furani ti kura aregbo ani vu akuarani, sidu, si naida ani mangi nyanyaki asadatise amanga. Kura wirina sa abi gupai nga, gu kekeapai naakuru rogo Ngbaõbambu Sinziri yo nga, “Oni Mbupai fu Akuaroni na Ngbaduroni yo Dunduko” aima undo ri ri mangi ariapai. * Ri akepai ki ya: “Gi kekeapai re aima undo re mi rugutire na pa wai pa mbu mi pai fu kura aboro aundo re. Si asaki gupai nga, ho mo ambupai ni fu aboro, si ayugongo gupai nga mo naberã gupai nga gu gbegberẽpai i amangi ro na ni aruaru watadu si aagberãnga tiro te te. Ono ho mo ambupai ni fuyo, mo adunga berewe na zinga na yo te na mo nika gbia zereda.” Ho ani ambupai ni fu awirinarani na kpotorani yo dunduko, ani nayugo gupai nga ani ima kpinyemu yo na ki yugu gupai a nga ani nawirika Barani nga Yekova.

17. Ringbisihe kuti Matayo 5:16, waigu rengbe ani ka ye na taarimo fu gu Barani du ngbangbaturũ yo?

¹⁷ Ani na bakere tambuahe nga ani na awirinarani rogo zegino dunduko nga aguyo du na nyemuse dagbayo. Ani naida badungu aboro koditiyo na ani rogo irisombori yo. Sidu, si aidanga ani mangi ai gupai rengbe ka sa aboro i berẽ gbegberẽ tipa Yekova watadu gako aboro te. Ti aregbo dunduko, ani naˈasada kaa mangapai ni wenehe gbe tipa gupai nga aboro idi ka wirikapai tipa Yekova na kini irisiko.—Oni gedi Matayo 5:16.

18. Ginipai rengbe ka undo rani ani mangi dezirepai zanga gunde?

¹⁸ Ti kura aregbo, kura aboro ima rengba kaa bisirapa rani watadu zavura kini rungosi rani mbiko gupai nga ani nagiasangba gu Barani du ngbangbaturũ yo. Ginipai rengbe ani ka mangaha ka si du nga ani nagunde agunde ka fura fu aboro tipa gaani aida? Ani ima rengba kadu na gu kido nga aYekova na Wiriko nika undo rani aundo. Yesu agumba gupai fu gako abawiriki nga si aidanga i bakibangiriyo tipa wai i nika fura na  gupai i nika pehe te. Tipagine si aaidanga i bakibangiriyo ti ni ya? Yesu aya, “Bambiko i afú agu apai fu roni oni ka gumba ni gu rago re. Mbiko si adú nga wa oni nikagumba ha te, ono ga Baroni Ziazia Toro nikagumba ha ku rogo roni yo.”—Mt. 10:19, 20.

19. Oni funga kpiapai nga ga gu boro natungusipai na wingbaduse.

¹⁹ Oni bingo gu kpiapai nga ga gu wirina nga Robert. Bete aregbo kusayo, ho ko adu ni ni vovo bawiriki Ziazia Kekeapai ka ko adunga na bakere inohe tipa Ziazia Kekeapai ya, si aaida ko ndu ku rogo gu bambu gumba-ngbanga du South Africa yo tipa ka saka ndu gupai fu abasapungbanga ko aidanga ka rimo sunge abanzengere ti ni ya. Ko adu na wingbaduse na ki gumba gupai fu bambu gumba-ngbanga nga, ko naida ka nye zanga rimiso tiko ku rogo birĩ-zogarago mbiko gako nyemuse tipa agu awirinako nga aKristano. Ko aabi gako bangiriba dagba gaani aborokporo nga ga toro yo na nyanyakipaha! Nibasa, basapungbanga asanahe ki ya, “Ada nga awirinamo?” Robert aainongo gupai nga i nika sanako na gu sanahe re te, ono ko atingidipa gu veresi niipo nangia ga gu uru re. Si angia Matayo 12:50 nga gu naya: “Gu ni ka manga sangba Buba du ngbangbaturũ yo, ni nga wirinami, ni nga dawire, na nina.” Wa si avura du vurũ nga Robert angia vovo bawiriki Ziazia Kekeapai, ga Yekova toro aima undoko ko karagapai kuti gu sanahe re gbiati kura dungu asanahe. Yekova aima du na ngbarago na Robert! Na Yekova na ngbarago a na ani ho ani akido ni kutiko tipa wingbaduse ka manga dezirepai ti kpakarakpakara aregbo.

20. Ginipai si aida ani diberã kaa mangaha? (Yoane 17:11, 15)

²⁰ Ani naandunga andu kindi kumbatayo kaa bi gu maku du berani na nyanyakipaha nga ga du dagba agu aborokporo yo nga ga toro yo nga aguyo du na nyemuse dagbayo. Ani na gu Barani naima ngba gbe gbiati badungu awirinarani nakpinyemu rani. Si naida ani du na tambuahe tipa agi apai re ti aregbo dunduko. Satana gbiati gbegberẽ apefuoko naˈasada ka sarani ani du na kapa tipa gu nyemuse nga ga gu Barani du ngbangbaturũ yo na kini asadi ka gbarasapa gu kodatise du dagbarani. Ono tie, Yesu aima kpara kuba rani ki sana Bako ko kakuti rani tipa gupai nga ani nye nikodi kodi rani. (Oni gedi Yoane 17:11, 15.) Yekova nakaragapai akaraga kuti gu kparakpee re. Wakina Yesu, ka ani ya dunga na kapa tipa gu nyemuse gbiati undo nga ga gu Barani du ngbangbaturũ yo ya. Ani dinga berã adia kaa ndu kindi kumbatayo kaa mbeda gbe na gu gaani aborokporo nga ga toro yo.