1-2. Aha do perbedaan ni dua raja i, jala aha do na lao tabahas di parsiajaran on?

NAJOLO adong dua raja na mamaretta di Israel. Sada raja ni Juda na dua marga, sada nai raja ni Israel na sappulu marga. Nang pe dang sejaman halak i mamaretta, alai adong do persamaan ni nasida. Dialo nasida do Jahowa, baru disomba halak i muse akka patung. Dibahen nasida do bangso Israel manomba Debata na so sittong. Jala dipamate nasida do akka halak na so marsala. Alai adong do perbedaan ni dua raja i. Na sada, olo bertobat jala diampuni Jahowa do ibana. Na sada nai sappe mate, dang olo bertobat. Ise do dua raja i?

² Na parjolo, i ma si Ahab. Raja ni Israel do ibana. Na paduahon, i ma si Manasse. Raja ni Juda do ibana. Adong do parsiajaran na penting sian dua raja on. (Ul. 17:30; Rom 3:23) Sian pengalaman ni nasida, taboto ma songon dia do halak na botul-botul bertobat i. Porlu do taparsiajari on lao mamboto aha na ikkon taulahon asa diampuni Jahowa dosatta. Saonari taida ma aha na diulahon dua raja i. Jala taparsiajari ma muse ilustrasi ni Jesus asa taboto songon dia do halak na botul-botul bertobat.

3. Raja na songon dia do si Ahab?

³ Si Ahab raja ni Israel na papituhon na mamaretta sappulu marga. Istrina si Izebel, boru ni Raja Sidon. Sidon sada kota na mora di utara. Alana menikah i si Ahab dohot si Izebel, gabe tamba do hamoraon ni Israel. Alai alani pernikahan i, gabe sega do hubungan ni bangso Israel tu Jahowa.  Debata Baal do na disomba si Izebel. Jala dipengaruhi ibana do si Ahab asa manjujui bangso Israel dohot manomba Baal. Ala manomba Baal halak i, godang do dakdanak na dipelehon. Jala adong do akka bawa na mangulahon seks dohot bawa lao manomba debata na so sittong. Dang holan i, godang do panurirang ni Jahowa na dipamate si Izebel. (1 Raj. 18:13) Diboto Jahowa do sude aha na diulahon si Ahab dohot si Izebel. Di jolo ni Jahowa, si Ahab ma raja na ‘unjahat sian sude raja na mamaretta andorang so ibana’. (1 Raj. 16:30) Nang pe songon i, asi do roha ni Jahowa tu nasida. Disuru Ibana ma panurirang Elia lao pasingotton. Alai dang olo si Ahab dohot si Izebel manangihon panurirang i.

4. Hukuman aha do na lao dijalo si Ahab, jala songon dia do reaksina mambege i?

⁴ Ala dang olo si Ahab dohot si Izebel muba, disuru Jahowa ma panurirang Elia paboahon na lao dihukum nama nasida. Didok Jahowa ikkon pamateonna do sude keluarga ni si Ahab. Tikki mambege i, marsak do si Ahab jala “dipatutoru” ibana do dirina.​—1 Raj. 21:19-29.

5-6. Sian dia do taboto na so botul-botul bertobat si Ahab?

⁵ Nang pe dipatutoru si Ahab dirina, alai sian tindakanna patuduhon dang botul-botul ibana bertobat. Misalna dang dihancurhon ibana akka patung Baal. Jala dang disuru ibana bangso Israel asa mulak muse manomba Jahowa. Godang nai dope tindakan ni si Ahab na patuduhon dang botul-botul ibana bertobat.

⁶ Sada tikki, diajak si Ahab ma Raja Jehosapat kerja sama lao mangalo Siria. Alai didok si Jehosapat, sebelum mangalo Siria, jolo disukkun ma jo panurirang ni Jahowa. Di tikki i, adong do panurirang ni Jahowa na margoar si Mikaya. Alai dang lomo roha ni si Ahab tu ibana. Didok si Ahab, “Sogo do rohakku tu ibana. Ai dang hea na denggan dipaboa ibana taringot tu au.” Nang pe songon i, toktong do halak i lao manukkun panurirang Mikaya. Jala memang dung disukkun, dang songon na diharappon si Ahab na dipaboa si Mikaya. Sasittongna, adong hian dope kesempatan ni si Ahab muba jala mangido asi ni roha ni Jahowa. Alai dang i na diulahon ibana. Gariada gabe muruk do ibana jala dipenjarahon ibana si Mikaya. (1 Raj. 22:7-9, 23, 27) Nang pe dipenjarahon ibana si Mikaya, alai dang boi i mangabbati surirang na dipaboa si Mikaya taringot ibana. Jala ujungna, toho do surirang i masa. Mate tarbunu do si Ahab di parporangan.​—1 Raj. 22:34-38.

7. Halak na songon dia do si Ahab di pandangan ni Jahowa?

⁷ Dung mate si Ahab di parporangan i, mulak ma si Jehosapat tu jabuna. Dung i disuru Jahowa ma panurirang pasingotton ibana, ala mardongan i ibana tu si Ahab. Didok Jahowa, “Denggan do di roham mangurupi halak na jahat jala makkaholongi halak na marsogo ni roha tu Jahowa?” (2 Kron. 19:1, 2) Sian hata ni panurirang i, gabe taboto ma songon dia pandangan ni Jahowa tu si Ahab. Memang menyesal do si Ahab di mulana. Alai seandaina botul-botul ibana bertobat, dang mungkin didok Jahowa ibana halak na jahat.

8. Aha na boi taparsiajari sian pengalaman ni si Ahab?

⁸ Aha na boi taparsiajari sian pengalaman ni Raja Ahab? Dung dibege ibana hukuman ni Jahowa na dipaboa si Elia tu ibana, dipatutoru si Ahab do dirina. Memang denggan do i. Alai akka tindakanna patuduhon, dang botul-botul ibana bertobat. Jadi sian on marsiajar ma hita, molo halak na bertobat i dang cukkup holan merasa menyesal. Alai porlu do dibuktihon ibana i sian tindakanna. Saonari taida ma jo contoh ni halak na botul-botul bertobat.

9. Raja na songon dia do si Manasse?

⁹ Dua ratus taon dukkon i, mamaretta ma Raja Manasse gabe raja ni Juda. Unjahat do ibana sian Raja Ahab! Didok di Bibel, “Massai godang do hajahaton na dibahen si Manasse di jolo ni Jahowa na mambahen haccit rohana.” (2 Kron. 33:1-9) Dibahen si Manasse do akka langgatan tu akka debata na so sittong. Jala dipajongjong ibana do tiang sisombaon di jolo ni bagas joro ni Jahowa. Dung i mardatu do ibana jala porsea tu akka peramal. “Massai godang do jolma na so marsala dipamate.” Dang holan i, “ditutung ibana do anakna” lao dikorbanhon tu debata na so sittong.​—2 Raj. 21:6, 7, 10, 11, 16.

10. Songon dia do dibahen Jahowa mendisiplin si Manasse, jala songon dia do reaksi ni si Manasse?

¹⁰ Songon si Ahab, si Manasse pe mulana dang olo manangihon akka panurirang ni Jahowa. Ujungna, “Dipasombu Jahowa ma pamimpin ni akka tentara ni raja ni Asiria manaluhon nasida. Ditakkup ma si Manasse mamakke hait-hait, diikkat ma tanganna mamakke dua ratte na sian tombaga, jala diboan ma ibana tu Babel.” Saleleng na dipenjarahon i ibana disi, mulai ma dipikkiri si Manasse sude hajahatonna i. Jadi “sai dipatutoru ibana ma dirina di jolo ni Debata ni akka ompuna”. Dung i “mangelek-elek ma ibana tu Jahowa Debatana” jala “sai martangiang do si Manasse” mangido asi ni roha ni Debata. Ujungna muba ma ibana jala Jahowa ma na dibahen ibana gabe “Debatana”.​—2 Kron. 33:10-13.

11. Sesuai tu 2 Kronika 33:15, 16, sian dia do taboto na botul-botul bertobat si Manasse?

¹¹ Dialusi Jahowa do tangiang ni si Manasse. Boi do diida Jahowa sian tangiangna i, na botul-botul ibana nungnga muba. Alani i, disesa Jahowa ma sude hasalaan ni si Manasse jala diloas ma ibana muse gabe raja. Dipatudu si Manasse do sian tindakanna na botul-botul ibana bertobat. Dang songon si Ahab ibana, olo do ibana muba. Dihancurhon ibana ma sude patung tu debata na so sittong jala dijujui ibana do muse bangso Israel asa mulak manomba Jahowa. (Jaha 2 Kronika 33:15, 16.) Pasti ikkon barani jala togu do haporseaon ni si Manasse asa boi diulahon ibana i. Alana nungnga martaon-taon ibana gabe contoh na so denggan tu keluargana, tu akka pejabatna, dohot tu akka rakyatna. Hape dung matua ibana, naeng dipadenggan si Manasse ma sude masalah na hea dibahen ibana. Nang pe hera na so adong be guna ni i, alai adong do hasil na denggan. Ditiru pahoppuna si Josia do teladanna na denggan i. Diulahon si Josia do na sittong di jolo ni Jahowa tikki gabe raja ibana.​—2 Raj. 22:1, 2.

12. Aha do na taparsiajari sian contoh ni si Manasse?

¹² Aha do na taparsiajari sian pengalaman ni si Manasse? Dung disadari si Manasse  hasalaanna, dipatutoru ibana do dirina. Alai dang holan i na diulahon ibana. Martangiang do muse ibana mangido asi ni roha ni Jahowa, jala dipauba ibana do pangalahona. Berupaya do ibana padenggatton akka masalah na hea dibahen ibana. Dung i, berupaya do ibana mangalehon na undenggan lao manomba Jahowa. Diurupi ibana do rakyatna asa mulak muse manomba Jahowa. Sian contoh ni si Manasse on marsiajar ma hita, boi dope muba halak na mangulahon dosa na balga. Boi ma muse taida “na burju do [Jahowa] jala rade manalpuhon hasalaan”. (Ps. 86:5) Olo do Jahowa manalpuhon hasalaan ni halak na botul-botul bertobat.

13. Aha do na dipangido Jahowa sian halak na mangulahon dosa serius? Paboa ma ilustrasina.

¹³ Sian contoh ni si Manasse on, marsiajar ma hita songon dia do halak na botul-botul bertobat i. Si Manasse dang holan merasa menyesal. Alai dibuktihon ibana do i tong sian tindakanna. Coba ma jo tapikkiri ilustrasi on. Bayakkon ma hamu lao tu toko kue. Dipesan hamu ma kue. Alai ro ma partoko i, dilehon ma tu hamu tolor. Pasti bingung do hamu. Jadi didok partoko i ma, tolor do bahan utama ni kue i makana dilehon i tu hamu. Alai pasti dang olo hamu manjalo i. Ala na dipangido hamu kue do. Songon i ma tong Jahowa. Molo adong halak na mangulahon dosa na serius, dang cukkup di Ibana molo pardosa i holan merasa menyesal. Adong dope na ikkon diulahon ibana lao mambuktihon naung bertobat ibana. Aha ma i? Taparsiajari ma i di ilustrasi ni Jesus.

14. Aha do na disadari anak na mago na di ilustrasi ni Jesus i?

¹⁴ Saonari taida ma ilustrasi ni Jesus taringot anak na mago na disurat di Lukas 15:11-32. Di ilustrasi ni Jesus i adong ma sahalak bawa na mangalo tu bapakna. Ditinggalhon ma jabu ni bapakna jala lao “tu luat na dao”. Disi marsonang-sonang ma ibana jala dang hasea pangalahona. Dung i gabe susa ma ngoluna. Songon na didok Jesus, gabe ‘sadar’ ma ibana nungnga dibahen ibana na sala. Disadari ibana do muse undenggan do ngoluna tikki di jabu ni bapakna. Jadi diputusson ibana ma asa mulak muse tu jabu ni bapakna jala minta maaf. Tikki na menyesal i bawa i, memang denggan do i. Alai dang cukkup holan i. Ikkon dipatudu ibana do tong sian tindakanna naung muba ibana.

15. Aha do na patuduhon nungnga botul-botul bertobat sahalak bawa na di ilustrasi ni Jesus i?

¹⁵ Dipatudu bawa na di ilustrasi ni Jesus i do na botul-botul ibana bertobat sian tindakanna. Olo do ibana mulak tu jabu ni bapakna nang pe ikkon dao pardalananna. Dung pajuppang ibana dohot bapakna, didok ibana do, “Bapa, nungnga mardosa au tu Debata dohot tu ho. Dang tama be au dohonon  anakmu.” (Luk. 15:21) Sian hata ni bawa i boi do taida na lomo rohana padenggatton hubunganna tu Jahowa. Diakkui ibana do nungnga sala ibana, jala nungnga dibahen ibana haccit roha ni bapakna. Alani i rela do ibana gabe parkarejo ni bapakna i asal ma olo muse bapakna i manjalo ibana. (Luk. 15:19) Sian ilustrasi ni Jesus on boi do akka sintua marsiajar, carana mamboto sasahalak nungnga botul-botul bertobat manang na dang.

16. Boasa dang mura di akka sintua lao mamboto nungnga bertobat sasahalak manang na dang?

¹⁶ Dang sai mura akka sintua manottuhon nungnga muba halak na mangulahon dosa serius manang na dang. Boasa songon i? Ala dang boi nasida manjaha roha. Jadi ikkon dilului halak i do bukti na patuduhon nungnga muba ibana sian pangalahona i manang na dang. Di piga-piga kasus adong do halak na tung massai parah hasalaanna. Jadi di situasi sisongon i maol do ra akka sintua manottuhon nungnga bertobat ibana manang na dang.

17. (a) Bahen ma contoh na patuduhon dang cukkup sasahalak holan merasa menyesal lao mambuktihon nungnga bertobat ibana. (b) Sesuai tu 2 Korint 7:11, aha do na patuduhon sasahalak nungnga botul-botul bertobat?

¹⁷ Taparrohahon ma contoh on. Adong ma sahalak donganta bawa na martaon-taon selingkuh. Ditabunihon ibana ma hasalaanna i sian istrina, akka donganna, dohot sian akka sintua. Alai ujungna adong ma na mamboto i jala dilapor tu sintua. Dilului akka sintua ma buktina jala dipatudu ma i tu donganta bawa i. Diakkui ibana ma dosana i jala menyesal ma ibana. Alai nungnga cukkup be i lao mambuktihon naung bertobat ibana? Daong. Porlu do dipastihon akka sintua memang nungnga tutu ibana muba. Ikkon dipertimbakkon akka sintua do nungnga martaon-taon ibana manabunihon dosana i. Jala dang ibana sandiri na mangakkui hasalaanna i, na dilaporhon do ibana tu sintua. Alani i porlu do manat akka sintua, asa boi diboto nasida nungnga muba ibana manang na dang. Ikkon dipastihon do muse nungnga diuba ibana be cara marpikkirna, jala nungnga sogo rohana tu tindakanna na sala i manang na dang. (Jaha 2 Korint 7:11.) Porlu do godang tikki lao mamastihon i sude. Jadi, kemungkinan dipecat do halak na mangulahon dosa na serius i.​—1 Kor. 5:11-13; 6:9, 10.

18. Songon dia do halak na dipecat patuduhon naung bertobat ibana, jala aha ma hasilna molo diulahon ibana i?

¹⁸ Molo botul-botul do nungnga bertobat halak na dipecat, pasti berupaya do ibana asa taratur ro marpungu, mangihutton saran ni sintua lao manjaha Bibel, jala martangiang secara pribadi. Ikkon dihindari ibana do muse akka situasi na mambahen ibana tergoda mangulahon hasalaan na sarupa. Molo berupaya do ibana padenggatton hubunganna tu  Jahowa, boi ma pos rohana salpuhonon ni Jahowa do hasalaanna i. Jala pasti urupan ni akka sintua do ibana asa mulak muse tu organisasi. Alai tikki menangani sada kasus akka sintua, porlu do manat nasida alana tiap kasus beda do. Jala ikkon masuk akkal do nasida tikki mangadili.

19. Aha dope na ikkon diulahon halak na dipecat molo naeng bertobat ibana? (Hesekiel 33:14-16)

¹⁹ Nungnga taboto be molo halak na botul-botul bertobat i dang holan merasa menyesal. Alai ikkon berupaya do ibana padenggatton cara marpikkirna dohot pangalahona. Ikkon ditinggalhon ibana do dosana i jala diulahon ibana lomo ni roha ni Jahowa. (Jaha Hesekiel 33:14-16.) Na paling penting, ikkon berupaya do ibana padenggatton hubunganna tu Jahowa.

20-21. Aha do na ikkon taulahon lao mangurupi halak na mangulahon dosa serius?

²⁰ Tujuan ni Jesus marbarita na uli termasuk do ‘manjou pardosa asa muba nasida’. (Luk. 5:32) Alani i ikkon tatiru do Jesus. Alai boha do molo adong dongan akrabta na mangulahon dosa serius? Aha do na porlu taulahon?

²¹ Tikki adong donganta na mangulahon dosa serius, unang ma tatutup-tutupi i. Dang adong guna ni i, ala diida Jahowa do sudena i. (Poda 5:21, 22; 28:13) Tapaingot ma donganta i asa melapor tu sintua. Molo dang olo ibana, hita ma na melapor. Molo taulahon i, berarti na mangurupi donganta i do hita disi asa unang sega hubunganna tu Jahowa.

22. Aha do na lao tabahas di parsiajaran berikutna?

²² Olo do ra adong halak na mangulahon dosa serius. Jadi diputusson akka sintua ma asa dipecat ibana. Alai molo dibahen halak i songon i, na so dipatudu halak i do asi ni roha? Dang songon i. Di parsiajaran na mangihut, taida ma songon dia Jahowa patuduhon asi ni rohana tu halak na mangulahon dosa serius jala songon dia hita maniru Jahowa.