1-2. Ki diferans i annan ant Aab ek Manase e ki kestyon nou pou reponn?

ANNOU vwar sa ki ti arive avek de lerwa ki ti viv dan letan pase. Enn ti diriz lo sa dis tribi Izrael e lot ti diriz lo sa de tribi Zida. Menm si zot pa ti viv dan menm letan, zot ti fer en kantite keksoz parey. Tou le de lerwa ti rebel kont Zeova e zot ti fer Son pep fer pese. Zot tou le de zot ti ador bann fo bondye e zot ti komet mert. Me i ti annan en diferans ant sa de zonm. Enn ti kontinyen fer bann move keksoz ziska son lanmor me lot ti repantir e i ti ganny pardonnen pour bann move keksoz ki i ti’n fer. Lekel sa de lerwa?

² Sa enn ki ti lerwa Izrael ti apel Aab e lerwa Zida ti apel Manase. Bann diferans ki annan ant sa de zonm i kapab ansenny nou konsernan repantir, ki en size vreman enportan. (Akt 17:30; Rom. 3:23) Me ki savedir repantir e ki mannyer nou montre ki nou’n repantir? Nou bezwen konn sa parski nou anvi ki Zeova i pardonn nou ler nou fer pese. Pour ganny larepons sa bann kestyon, nou pou vwar ki i ti arive dan lavi sa de lerwa e nou pou vwar sa ki nou kapab aprann avek sa ki zot ti fer. Apre nou pou vwar sa ki Zezi ti ansennyen konsernan repantir.

3. Ki kalite lerwa Aab ti ete?

³ Aab ti setyenm lerwa sa dis tribi Izrael. I ti marye avek Zezabel fiy lerwa Sidon. Sidon ti en nasyon dan nor Izrael ki ti vreman ris. Vi ki Aab ti’n marye avek Zezabel, i ti annan plis loportinite pour Izrael fer larzan me sa maryaz ti fer nasyon Izrael fer plis pese kont Zeova. Zezabel ti ador Baal e i ti ankouraz Aab pour promot sa larelizyon  degoutan, ki ti enkli prostitisyon kot tanp ek sakrifis bann zanfan. Ler Zezabel ti larenn, tou profet Zeova ti an danze. I ti fer touy en kantite parmi zot. (1 Rwa. 18:13) Aab “ti fer pli pir dan lizye Zeova ki tou bann lerwa ki ti avan li.” (1 Rwa. 16:30, NWT) Zeova pa ti inyor sa ki Aab ek Zezabel ti pe fer. I ti konn tre byen tou sa ki zot ti fer. Me Zeova ti pran pitye pour son pep. Alor, i ti anvoy profet Eliya pour ed zot sanze e servi li avan i tro tar. Me Aab ek Zezabel ti refize ekoute.

4. Ki mannyer Zeova ti pou pini Aab e ki mannyer Aab ti reazir?

⁴ Finalman, Zeova ti deside pour azir. Zeova ti anvoy profet Eliya pour dir Aab ek Zezabel ki mannyer i ti pou pini zot. Zot fanmir antye ti pou ganny touye. Sa ki Eliya ti dir ti fer Aab vreman tris. San ekspekte, sa zonm arogan ti “abes son lekor.”​—1 Rwa. 21:19-29, NWT.

5-6. Kwa ki montre ki Aab pa ti repantir senserman?

⁵ Menm si Aab ti’n abes son lekor, sa ki i ti fer apre i montre ki i pa ti’n repantir senserman. I pa ti esey retir ladorasyon Baal dan son pei e i pa ti ankouraz lezot pour ador Zeova. I annan lezot keksoz ankor ki Aab ti fer ki montre ki i pa ti’n repantir senserman.

⁶ Pli tar, Aab ti demann Lerwa Zeosafat ki ti lerwa Zida pour zwenn avek li pour lager kont bann Siriyen. Lerwa Zeosafat ti en bon lerwa. I ti annan konfyans dan Zeova e i ti sizere ki zot demann en profet Zeova ki zot devret fer avan zot al lager. Aab pa ti anvi fer sa, i ti dir: “I annan en zonm ki nou kapab fer li rod gidans Zeova, me mon ay li akoz i pa zanmen profetiz bann bon keksoz lo mwan, i dir zis bann move keksoz.” Kantmenm sa, zot ti al kot profet Mikaya. Aab ti annan rezon! Profet Mikaya ti predir bann move keksoz lo li. Aab pa ti repantir e demann Zeova pour pardonn li, o kontrer i ti fer met sa profet dan prizon. (1 Rwa. 22:7-9, 23, 27, NWT) Menm si Aab ti met Mikaya dan prizon, Aab pa ti kapab anpes sa profesi ganny akonplir. Pli tar, Aab ti ganny touye dan sa lager.​—1 Rwa. 22:34-38.

7. Ki Zeova ti dir lo Aab apre ki Aab ti’n mor?

⁷ Apre lanmor Aab, Zeova ti dir ki i panse lo sa zonm. Ler Zeosafat ti retourn kot li sen e sof, Zeova ti anvoy profet Zeou pour dir li ki i pa ti’n devret ed Aab. Profet Zeova ti dir: “Eski ou devre port sekour en move dimoun? Eski ou devre kontan en dimoun ki deteste [Zeova]?” (2 Kron. 19:1, 2) Reflesir lo sa: Si Aab ti’n repantir senserman, sa profet pa ti pou dir ki i ti en move dimoun ki deteste Zeova. I kler ki menm si Aab ti’n regret en pti gin, i pa ti zanmen repantir senserman.

8. Ki nou kapab aprann konsernan repantir avek sa ki ti arive avek Aab?

⁸ Ki nou kapab aprann avek sa ki ti arive avek Aab? Ler Eliya ti dir Aab ki son fanmir ti pou ganny pini, o konmansman Aab ti abes son lekor. Sa ti en bon keksoz. Me pli tar, son bann aksyon ti montre ki i pa ti’n repantir senserman. Sa i montre ki ler nou repantir, nou pa devret zis dir ki nou regrete pour sa ki nou’n fer. Aprezan, annou vwar avek legzanp Manase ki i vedir repantir senserman.

9. Ki kalite lerwa Manase ti ete?

⁹ Apepre de syek pli tar, Manase ti vin lerwa Zida. I kapab ki i ti fer bann keksoz  pli pir ki Aab! Labib i dir: “I ti fer en kantite keksoz mal devan Zeova e i ti ofans li.” (2 Kron. 33:1-9, NWT) I ti konstri bann lotel pour bann fo bondye e i ti menm met en stati lo en poto sakre dan tanp Zeova. I tre probab ki sa poto sakre ti reprezant en bondye ki annan pour fer avek sèks. Manase ti fer mazik, predir lavenir e fer grigri. I ti osi “fer koule bokou disan inosan.” I ti touy en kantite dimoun e menm “bril son bann garson dan dife” konman sakrifis pour bann fo bondye.​—2 Rwa. 21:6, 7, 10, 11, 16.

10. Ki mannyer Zeova ti disiplin Manase e ki mannyer Manase ti reazir?

¹⁰ Parey Aab, Manase ti refize ekout konsey ki Zeova ti donn li atraver son bann profet. Finalman, “[Zeova] ti anvoy bann komandan ek larme lerwa Asiriyen kont [Zida]. Zot ti pran Manase prizonnyen, kros li avek lanmson, anmar li avek lasenn an bronz e anmenn li Babilonn.” I paret ki ler i ti dan prizon Babilonn, Manase ti reflesir seryezman lo sa ki i ti’n fer. I ti “kontinyen abes son lekor devan Bondye son bann zanset.” Me i ti fer plis ki sa. “I ti sipliy Zeova son Bondye.” Anfet, Manase ti “kontinyen priy Bondye.” Sa move zonm ti pe sanze. I ti konmans vwar Zeova konman “son Bondye” e i ti kontinyen priy Zeova.​—2 Kron. 33:10-13, NWT.

11. Dapre 2 Kronik 33:15, 16, ki mannyer Manase ti montre ki i ti’n repantir senserman?

¹¹ Pli tar, Zeova ti reponn lapriyer Manase. Atraver lapriyer ki Manase ti fer, Zeova ti vwar ki Manase ti’n vreman sanze. Alor Zeova ti ekout Manase ler i ti demann li pardon e i ti permet li pour vin lerwa ankor. Manase ti fer son mye pour montre ki i ti’n repantir senserman. I ti fer sa ki Aab pa’n zanmen fer. I ti sanz son fason fer. I ti opoz fo ladorasyon e ankouraz bann dimoun pour ador Zeova. (Lir 2 Kronik 33:15, 16.) Manase ti bezwen annan kouraz ek lafwa pour li fer sa parski avan ki i ti repantir, i ti en move legzanp pour son fanmir, bann prens e pour son pep pour plizyer lannen. Ler Manase ti pli vye, i ti esey rezourd serten problenm ki i ti’n fer. I tre probab ki i ti en bon lenfliyans lo son pti zanfan Zosyas, ki pli tar ti vin en bon lerwa.​—2 Rwa. 22:1, 2.

12. Ki nou kapab aprann konsernan repantir avek legzanp Manase?

¹² Ki nou kapab aprann avek legzanp Manase? I ti abes son lekor me i ti fer plis ki sa. I ti priye e sipliy Zeova pour pardonn li. I ti sanz son latitid. I ti travay dir pour rezourd tou bann problenm ki i ti’n fer e i ti fer son mye pour ador Zeova e pour ed lezot pour zot osi fer parey. Legzanp Manase i ed bann ki’n fer  bann keksoz vreman mal. Son leksperyans i montre ki Zeova i “bon e pare pour pardonnen.” (Ps. 86:5, NWT) Zeova pou pardonn tou bann ki repantir senserman.

13. Donn en legzanp ki ed nou konpran en keksoz enportan konsernan repantir.

¹³ Manase pa ti zis regrete pour bann pese ki i ti’n fer. Sa i ansenny nou en keksoz enportan konsernan repantir senserman. Annou vwar en legzanp: Meton ou al laboutik e ou demann sa boutikye en gato. Me olye donn ou en gato, i donn ou en dizef. Eski ou pou kontan? Non! Eski ou pou satisfe si sa boutikye i eksplik ou ki sa dizef i en zengredyen enportan pour fer sa gato? Non! Pareyman, Zeova i ekspekte ki en dimoun ki’n fer pese i repantir senserman. Si sa dimoun i regret son pese ki i’n fer, sa i en bon keksoz parski sa i en “zengredyen” enportan ki pou ed li repantir. Me i pa ase. Kwa ankor ki i bezwen fer? Nou aprann en kantite avek en legzanp ki Zezi ti donnen.

14. Ki mannyer sa garson dan legzanp Zezi ti montre ki i ti’n konmans repantir?

¹⁴ Dan Lik 15:11-32, Zezi ti donn en legzanp ankourazan. I ti dir ki en garson ti rebel kont son papa, kit lakour e al “dan en pei byen lwen.” Laba, sa garson ti viv en lavi dezordonnen. Me ler keksoz ti vin difisil, i ti konmans mazin lo bann move desizyon ki i ti’n pran. Zezi ti dir ki sa garson ‘ti realize ki i ti’n fer.’ I ti realize ki i ti pli byen ler i ti dan lakour son papa. I ti deside pour retourn kot lakour e demann son papa pour pardonn li. I ti enportan pour sa garson realize ki i ti’n fer en kantite move desizyon me sa pa ti ase. I ti bezwen sanz son konportman.

15. Ki mannyer sa garson dan legzanp Zezi ti montre ki i ti’n repantir senserman?

¹⁵ Sa garson dan legzanp Zezi ti montre ki i ti’n repantir senserman pour sa ki i ti’n fer. I ti retourn kot lakour son papa. Ler i ti ariv kot son papa, i ti dir li: “Mon’n fer pese kont Bondye e kont ou. Mon nepli merite ganny apele ou garson.” (Lik 15:21) Sa garson ti konfes sa ki i ti’n fer e sa i montre ki i ti anvi reganny son lanmitye avek Zeova. I ti osi rekonnet ki sa ki i’n fer ti’n bles son papa. I ti pare pour fer zefor pour li reganny en bon relasyon avek son papa. Pour li reisi fer sa, i ti pare pour ganny trete parey enn bann travayer son papa. (Lik 15:19) Sa legzanp pa zis ankourazan. Sa legzanp i kapab ed bann ansyen ler zot pe rode si en dimoun ki’n fer en pese grav in repantir senserman.

16. Akoz i kapab difisil pour bann ansyen konnen si en dimoun in repantir senserman?

 ¹⁶ I pa fasil pour bann ansyen konnen si en dimoun ki’n fer en pese grav in repantir senserman. Akoz non? Bann ansyen pa kapab lir dan leker, alor zot esey rod levidans ki sa frer oubyen ser in vreman aprann pour ay sa ki i’n fer. Dan serten ka, i kapab ki sa ki sa dimoun in fer i sitan move ki bann ansyen ki zwenn avek li pa konvenki ki sa dimoun in repantir senserman.

17. (a) Ki legzanp ki montre ki menm si en dimoun i dir ki i regrete pour son fot, sa pa vedir ki i’n repantir senserman? (b) Dapre 2 Korentyen 7:11, ki en dimoun i devret fer pour montre ki i’n repantir senserman?

¹⁷ Annou vwar en legzanp. En frer i komet adilter plizyer fwa pour plizyer lannen. Olye rod led, i kasyet sa ki i pe fer pour ki son madanm, son bann zanmi ek bann ansyen pa konnen ki i pe fer. Finalman, bann ansyen i dekouver ki i’n fer. Ler bann ansyen i dir li ki zot annan levidans ki montre ki i’n komet adilter, i admet sa ki i’n fer e i paret ki i menm regrete pour sa ki i’n fer. Me eski sa i montre ki i’n repantir? Non. Bann ansyen pou definitivman bezwen vwar plis ki sa. Sa zonm pa’n komet adilter zis enn fwa akoz en move desizyon. O kontrer i’n fer sa plizyer fwa pour plizyer lannen. Sa zonm pa’n konfes son pese volonterman, o kontrer en dimoun in konnen e i’n raport li avek bann ansyen. Alor bann ansyen pou bezwen vwar levidans ki son fason panse, son santiman ek son konportman in vreman sanze. (Lir 2 Korentyen 7:11.) I kapab pran en kantite letan pour sa zonm fer bann sanzman ki montre ki i’n repantir senserman. Alor, i tre probab ki i pou ganny ekskli dan kongregasyon pour en serten letan.​—1 Kor. 5:11-13; 6:9, 10.

18. Ki mannyer en dimoun ki’n ganny ekskli dan kongregasyon i kapab montre ki i’n repantir senserman e ki pou arive?

¹⁸ Pour en dimoun ki’n ganny ekskli montre ki i’n repantir senserman, i pou bezwen asiste renyon regilyerman, swiv konsey bann ansyen pour priye e pour etidye Labib regilyerman. I pou osi fer bokou zefor pour evit bann keksoz ki kapab fer li fer pese ankor. Si i fer bokou zefor pour revin zanmi Zeova, i kapab asire ki Zeova pou pardonn li e ki bann ansyen pou ed li form parti kongregasyon ankor. Byensir, ler bann ansyen pe esey rode si en dimoun in repantir senserman, zot konnen ki sak ka i diferan. Alor zot egzamin byen sak ka e zot evite ziz dan en fason ki dir.

19. Ki savedir repantir senserman? (Ezekyel 33:14-16)

 ¹⁹ Parey nou’n aprann, i pa ase pour en dimoun ki’n fer en pese grav, dir ki i regrete apre ki i’n fer sa pese. I bezwen sanz son fason panse, son santiman e fer bann keksoz ki montre ki i’n repantir senserman. I devret aret fer bann move keksoz e obei bann standar Zeova ankor. (Lir Ezekyel 33:14-16.) Sa keksoz pli enportan pour en dimoun ki’n fer en pese, i pour revin zanmi avek Zeova ankor.

20-21. Ki mannyer nou kapab ed en dimoun ki’n komet en pese grav?

²⁰ Zezi in donn en rezon enportan akoz i’n vin lo later. I ti dir: “Mon’n vin pour ki bann ki annan en move lavi i repantir.” (Lik 5:32) Nou osi nou devret anvi ki en dimoun ki’n fer en pese grav i repantir. Alor, ki nou devret fer si nou konnen ki enn nou zanmi pros in fer en pese grav?

²¹ Si nou kasyet pese ki nou zanmi in fer, sa pou fer li plis ditor. Nou pa pou kapab kasyet son pese parski Zeova pe gete. (Prov. 5:21, 22; 28:13, NWT) Ou kapab ed ou zanmi par dir li ki bann ansyen i anvi ed li. Si ou zanmi i refize pour konfes sa ki i’n fer avek bann ansyen, ou devret al dir bann ansyen. Sa pou montre ki ou vreman anvi ed li. Sa i enportan parski si i pa ganny led avek bann ansyen pour li repantir, i kapab perdi son lanmitye avek Zeova.

22. Ki nou pou diskite dan sa lartik ki swiv?

²² Si en dimoun in fer en pese vreman grav e pour en kantite letan e bann ansyen i deside ki i devret ganny ekskli dan kongregasyon, eski sa i vedir ki bann ansyen pa’n demontre konpasyon anver sa dimoun? Dan sa lartik ki swiv, nou pou vwar ki mannyer Zeova i demontre konpasyon dan lafason ki i disiplin en dimoun ki’n fer en pese grav e ki mannyer nou kapab swiv son legzanp.