1-2. Nemene la eisapengöi Ahaba me Manase, nge nemene la lue hnying nyine tro sa ce wang?

 EASA troa ce wang la tulu ne la lue joxu ekö, ene Ahaba joxu ne Isaraela me Manase joxu ne Iudra. Isa ijine musi nyidroti kö, ngo ceitui nyidroti hi. Tha hnei nyidroti kö hna drei Iehova. Hnei nyidroti hna adrone la ëje i Nyidrë, me thili koi idrola me ihumuth. Ame pe, hetre isapengöi nyidro. Hnei Ahaba joxu hna tha idrei uti hë la nyidrëti a mec. Ngo ame Manase joxu, hnei nyidrëti hna ietrane la itre ngazo i nyidrë, nge hnei Iehova hna kepe nyidrëti hmaca.

² Tro sa xomi ini qa ngöne la tulu i Ahaba joxu me Manase joxu, göne la aqane troa nyipi ietra. (Itre hu. 17:30; Rom. 3:23) Nemene la aliene la troa nyipi ietra, nge tro sa amamane tune kaa? Nyipiewekë la lue hnying celë ke, easa ajane tro Iehova a nue la itre ngazo së. Tro sa pane xomi ini qa ngöne la tulu ne la lue joxu. Thupene lai, tro sa ce wang la hna qaja hnei Iesu, göne la aqane troa nyipi ietra.

3. Nemene la pengöi Ahaba joxu?

³ Ame Ahaba, nyidrëti la hnaasevene joxu ne Isaraela. Hnei nyidrëti hna xomi Iezebela, nekön la joxu ne Sidona, ketre traon ka trenamo nge ka tha nanyi kö qa Isaraela. Celë hi matre, kolo fe a trenamo hnene la nöje Isaraela. Ngo hnene fe la faipoipo cili, matre hna ananyine la nöj qaathei Iehova. Ame Iezebela ke, ka thili eahlo koi Baala. Hnei eahlo hna upi Ahaba joxu troa qaja kowe la nöj troa thili kowe la haze cili. Ame ngöne la hmi Baala, kola huujëne la itre nekönatr me nue la itre föe troa kuca  la itre huliwa ka sis. Ketre, alanyimu la itre perofeta i Iehova hnei Iezebela hna humuth. (1 Ite jo. 18:13) Ngo ame Ahaba, tru catre kö la itre ‘ngazo nyidrë xajawa i Iehova hune la itre xaa joxu.’ (1 Ite jo. 16:30) Öhne hi Iehova la ngazo i Ahaba me Iezebela. Ngo hnei Iehova hna utipi nyidro, matre hnei Nyidrëti hna upi Eli perofeta troa thuemacane la nöj troa saze e ijine petre kö. Ngazo pe, tha hnei nyidroti kö hna drengethenge Iehova.

4. Nemene la pune koi Ahaba, nge nemene la aqane ujë i nyidrë?

⁴ Öhne hi Iehova laka, Ahaba palahi a tha idrei. E cili, hnei Nyidrëti hna upi Eli troa qaja koi Ahaba me Iezebela la aqane tro Nyidrëti a ameköti nyidro. Öni Iehova ka hape, troa humuth asë la fami nyidro. Eloine pe, hnei Ahaba hna idrengethenge me “aconyi angeice kö qëmeke i Iehova.”—1 Ite jo. 21:19-29.

5-6. Nemene la ka amamane laka, tha nyipici kö la aqane ietra i Ahaba?

⁵ Nyipici laka, hnei Ahaba hna hetre hni ne ipië. Ngo kola mama e thupen laka, tha hnei nyidrëti kö hna nyipi ietra. Eje hi, tha hnei Ahaba kö hna apatrene la hmi Baala qa ngöne la nöj me acile hmaca la hmi Iehova.

⁶ Ame la ketre ijin, hnei Ahaba joxu hna sipo Iehosafata joxu ne Iudra troa ce xöle me nyidrë matre lepe la angetre Suria. Ngo öni Iehosafata ka hape, loi e troa pane wang la ketre perofeta i Iehova. Ngo tha aja i Ahaba kö, matre öni nyidrë: “Casi pe hi la at, ene Mikaia nekö i Imela, mate tro sha hnyingë Iehova jëne nyën, ngo methinge nyën, ke tha tro kö nyën’ a perofetane la loi göi ni, ngo ngazo pe.” Ngo hnei nyidroti hna tro koi Mikaia perofeta. E cili, hnei Mikaia hna qaja ka hape, tro ha traqa la itre ewekë ka ngazo koi Ahaba. Ame pe, tha hnei Ahaba kö hna ietra me thele Iehova. Hnei nyidrëti pe hna akalabusi Mikaia perofeta. (1 Ite jo. 22:7-9, 23, 27) Ngo hna eatre lo hna perofetan ke, hna humuthi Ahaba joxu ngöne la hna isi.—1 Ite jo. 22:34-38.

7. Nemene la aqane qeje Ahaba hnei Iehova?

⁷ Thupene la meci Ahaba, hnei Iehova hna qaja la mekuna i Nyidrë göne la joxu cili. Ame lo Iehosafata a bëeke qa hna isi, hnei Iehova hna upi Iehu perofeta matre troa haji angeic ke hnei angeic hna ce xöle me Ahaba. Öni Iehu: “Loi koi nyipëti troa xatuane la ate ka ngazo, me hnime la itete methinë Iehova?” (2 A. l. ite jo. 19:1, 2) Eje hi, maine hnei Ahaba ju hna nyipi ietra, tha tro kö Iehu a qaja ka hape, ketre atr ka ngazo angeic nge ka methinë Iehova. Nyipici, hnei Ahaba hna ietra, ngo tha hnei angeice kö hna nyipi ietra.

8. Nemene la ini hne së hna xom qa ngöne la tulu i Ahaba, göne la aqane troa ietra?

⁸ Nemene la ini hne së hna xom qa ngöne la tulu i Ahaba? Ame lo Elia a qaja ka hape, troa humuthe la hnepe lapa i Ahaba ke, hnei hna kapa me hetre hni ne ipië. Ngo kola mama e thupen laka, tha hnei angeice kö hna nyipi ietra. Eje hi, ame la troa nyipi ietra ke, tha ene hmekuje kö la troa qaja, ngo hetre nyine tro fe sa kuca. Tro pena sa ce wang la tulu ka amamane la aqane troa nyipi ietra.

9. Nemene la pengöi Manase joxu?

⁹ Itre macatre thupen, hna acili Manase troa joxu ne Iudra. Tru catre kö la itre  ngazo i Manase joxu hui Ahaba! Öni Tusi Hmitrötr: “Atraqate la ngazo hnei nyidëti hna kuca xajawa i Iehova mate aelëhni anganyidë.” (2 A. l. ite jo. 33:1-9) Eje hi, hnei Manase hna xup e hnine la uma ne hmi Iehova, la itre ita ne huuj thatraqane la itre haze, tune la hnasaatr ne la haze ne mana me hatr! Ketre, hnei Manase hna wange la itre “perofeta thoi,” me kuci iöni, me “anenine la madra ka pë ethan.” Hnei nyidrëti fe hna “upe la nekö i nyidëti trahmanyi troa tro nyipine la eë” matre huujëne kowe la itre haze.—2 Ite jo. 21:6, 7, 10, 11, 16.

10. Tune kaa la aqane haji Manase hnei Iehova, nge nemene la aqane ujë i Manase?

¹⁰ Tui Ahaba joxu, tha hnei Manase kö hna canga kapa la itre eamo hnei Iehova hna hamëne jëne la itre perofeta. Celë hi matre, “hnei Iehova hna upe la joxu ne Asuria troa lepe la nöje Iudra. E cili, hnei angatre hna “xomi Manase fë la ite ge, me othi nyidëti hnei fini fao, me tro sai nyidëti Babulona eë.” Eje hi, hnei Manase hna mekune hmaca la itre ngazo i nyidrë, me “nyipi aconyi nyidë xajawa i Akötesie ne la ite keme i nyidë.” Hnei Manase joxu “hna thele Iehova Akötesi nyidë” me ‘catre thith.’ Kola saze trootro hnei Manase me goeë Iehova ceitu me “Akötesi nyidë.”—2 A. l. ite jo. 33:10-13.

11. Thenge la 2 Aqane lapa ite joxu 33:15, 16, tune kaa la aqane amamane Manase laka, ka nyipi ietra nyidrë?

¹¹ Öhne hi Iehova la aqane saze i Manase joxu, matre hnei Iehova hna sa la itre thithi angeic me acili angeic hmaca troa joxu. E cili, hnei Manase hna amamane ngöne la itre huliwa i angeic laka, ka nyipi ietra angeic. Tha hnei Manase kö hna tui Ahaba joxu. Hnei angeice pe hna saze. Hnei angeice hna thele troa apatrene la hmi ka thoi me acile hmaca la nyipi hmi. (E jë la 2 Aqane lapa ite joxu 33:15, 16.) Ketre, itre macatre ne ajojezine Manase la itre sinee i angeic, me itre joxu, memine la nöj. Celë hi matre, nyipiewekë tro angeic a catr me lapaun. Qëmekene tro Manase a mec, hnei angeic hna kuca la loi. Hnei angeice hna amamai tulu koi Iosea, api angeic, nge ketre joxu ka lolo e thupen.—2 Ite jo. 22:1, 2.

12. Nemene la ini hne së hna xom qa ngöne la tulu i Manase?

¹² Nemene la ini hne së hna xom qa ngöne la tulu i Manase? Hnei Manase hna hetre hni ne ipië me thithi koi Iehova matre troa nue la itre ngazo i angeic. Hnei angeice fe hna saze me catre kuca la loi. Ketre, hnei Manase hna atrunyi Iehova me upe la itre xan troa hane nyitipu angeic. Jëne la tulu i Manase,  ijije hi tro la itre atr ka kuca la itre ewekë ka ngazo ekö a mejiune laka, troa hane nue la itre ngazo i angatr. Eje hi, Iehova Akötresieti hmekuje hi la “ka loi . . . me ate sheng.” (Sal. 86:5) Haawe, maine tro sa nyipi ietra, tro hë Iehova a nue la itre ngazo së.

13. Qaja jë la ketre ceitun ka amamane laka, hetre ketre ewekë nyine tro sa kuca ngöne la easa ietra.

¹³ Hnei Manase hna kuca la ketre ewekë ngöne lo angeic a ietra. Pane mekune jë laka, epuni a tro kowe la hnë salemë gato. Ngo ame la epuni a traqa, kolo pena a hamë wakuja koi epun. Hapeu tro kö epuni lai a madrin? Waea! Ngo tune kaa e kola qaja koi epun ka hape, ka nyipiewekë la wakuja matre troa kuci gato? Tro fe epuni lai a wesitr! Celë fe hi lai hnei Iehova hna ajane kowe la itre ka tria. Ka loi e tro angatr a ietra. Ngo hetre ketre ewekë palakö nyine tro angatr a kuca. Nemen? Tro sa ce wang la ceitune hna hamën hnei Iesu.

14. Ame ngöne la ceitune i Iesu, nemene la ka amamane laka, hnene la nekötrahmanyi ka paatr hna ietra?

¹⁴ Ame ngöne Luka 15:11-32, hnei Iesu hna qaja la ceitune la nekötrahmanyi ka paatr. Tha hnei angeice kö hna drengethenge la keme i angeic. Hnei angeic hna tro kowe la ketre nöj “gaa nany,” me kuca la itre huliwa ka sis. Ame hë la kola traqa la itre jol, hnei angeic hna pane waipengöi angeic. E cili, angeic a trotrohnine laka, lolo kö la mele i angeic ekö. Öni Iesu: ‘Öhne hë angeic la aqane menu i angeic.’ Hnei angeic hna mekun troa bëeke hmaca koi hnalapa me qeje menu kowe la keme i angeic. Ngo nyipiewekë tro angeic a pane atrehmekune laka, ngazo lo itre aqane axecië mekune i angeic. Ketre, loi e tro fe angeic a saze la aqane ujë i angeic!

15. Tune kaa la aqane ietra ne la nekötrahmanyi ka paatr?

¹⁵ Hnene la nekötrahmanyi hna ietra. Nyipici laka, nanyi catre la gojenyi matre troa bëeke kowe la hnalapa. Ngo ame la angeic a traqa, öni angeic koi kem: “Kaka, ase hë ni menu qëmekene la hnengödrai, me qëmeke i nyipë. Nge tha ijijinge hmaca kö troa ketre nekö i nyipë.” (Luka 15:21) Kola mama ngöne la aqane ithanata i angeic laka, aja i angeic troa acatrene la aqane imelekeu i angeic me Iehova. Ketre, atre hi angeic laka, hnei angeic hna akötrëne la keme i angeic. Celë hi matre, hnei angeic hna nue trengecatr matre troa amadrinë nyidrë me sipone troa nyi hlu! (Luka 15:19)  Nyipiewekë la itre ini hna hamën ngöne la ceitune i Iesu. Itre ej a xatuane la itre qatre thup troa atrepengöne hnyawa la itre Keresiano ka ietra.

16. Pine nemene matre jol kowe la itre qatre thup troa atre laka, ka nyipici la aqane ietra ne la ketre trejin?

¹⁶ Tha ka hmaloi kö kowe la itre qatre thup troa atre laka, ka nyipici la aqane ietra ne la ketre trejin. Pine nemen? Pine laka, tha öhne kö la itre qatre thup la aliene hni ne la atr. Celë hi matre, loi e tro la itre qatre thup a goeëne hnyawa la aqane ujë ne lai trejin. E cili, tro hë angatr a öhne laka, hnei angeic hna nuetrije la ngazo i angeic. Ngo ame itre xaa ijin, ngazo catre palaha la ngazo hnei angeic hna kuca , matre kola luelu hnene la itre qatre thup.

17. (a) Qaja jë la ketre ceitun ka amamane la aliene la troa nyipi ietra. (b) Thenge la 2 Korinito 7:11, nemene la nyine troa kuca hnene la atr ka nyipi ietra?

¹⁷ Hanawang la ketre ceitun. Nyimu macatre ne nyixetë hnene la ketre trejin, nge tha hnei angeice kö hna thele ixatua. Hnei angeic hna juetrëne la ngazo i angeic kowe la föe i angeic, me itre sinee i angeic, me itre qatre thup. Ame hë la itre qatre thup a atre la ngazo i angeic, angeice ha ietra. Ngo hapeu, tro kö la itre qatre thup a hmaca e cili? Waea pine laka, itre macatre ne angeic a kuca la itre huliwa ka sis. Ketre, tha hnei angeice kö hna sipu qaja amamane la ngazo i angeic kowe la itre qatre thup, ngo ketre trejine pe. Celë hi matre, loi e troa mama hnyawa kowe la itre qatre thup laka, saze hë la itre mekun me aqane ujë i angeic. (E jë la 2 Korinito 7:11.) Maine jë, tha tro kö angeic a canga saze. E cili, troa upetröneë angeic matre amamane laka, ka nyipici la aqane ietra i angeic.—1 Kor. 5:11-13; 6:9, 10.

18. Nemene la nyine troa kuca hnene la atr hna upetröneë me ka ietra, nge nemene la thangane lai?

¹⁸ Ame la trejin hna upetröneë nge ka ietra ke, angeic a catre sine la itre icasikeu me trongëne la itre eamo hna hamën hnene la itre qatre thup, tune la troa inine la Tusi Hmitrötr me catre thith. Ketre, angeic a thupëne matre tha tro hmaca kö akei kowe la ngazo. Maine tro angeic a acatrene la aqane imelekeu i angeic me Iehova, tro hë Nyidrëti a nue la ngazo i angeic, nge tro hë la itre qatre thup a kepe angeic hmaca e hnine la ekalesia. Atre hi la itre qatre thup laka, isapengö së kö. Celë hi matre, nyipiewekë tro angatr a pane ithel me  amekötine la trejin cememine la thiina ka menyik.

19. Thenge la Ezekiela 33:14-16, nemene la aleine la hna hape, ietra?

¹⁹ Ame la atr ka ietra ke, tha angeice hmekuje kö a qaja la ngazo i angeic, ngo angeice fe a saze la itre mekun me aqane ujë i angeic. Eje hi, angeic a nuetrije la ngazo hna kuca me trongëne la itre trepene meköti Iehova. (E jë la Ezekiela 33:14-16.) Ngo ame la ka sisitria catre kowe la atr ka ietra ke, troa acatrene hmaca la aqane imelekeu i angeic me Iehova.

20-21. Tune kaa la aqane troa xatuane la ketre atr troa ietra?

²⁰ Hnei Iesu hna qaja la enyipiewekëne la huliwa ne cainöj. Öni nyidrë: “Eni a hëne . . . la itre ka ngazo matre troa ietra.” (Luka 5:32) Celë fe hi hne së hna ajan. Ngo tune kaa e kola tria hnene la ketre sinee së?

²¹ Maine tro sa juetrëne la ngazo i angeic, tro ha hetre ethane koi angeic. Pine nemen? Pine laka, pëkö ewekë ka sihngödri koi Iehova. (Ite edomë 5:21, 22; 28:13) Ketre, loi e tro epuni a amexeje koi angeic ka hape, aja ne la itre qatre thup troa xatua angeic. Ngo maine tha aja i angeice kö troa wang la itre qatre thup, loi e tro epuni a thuemacanyi angatr. Celë hi aqane tro epuni a xatuane la sinee i epun troa ietra me bëeke hmaca koi Iehova!

22. Nemene la hne së hna troa ce wang ngöne la ketre tane mekun?

²² Maine itre macatre ne kuca la ngazo hnene la ketre trejin, ijije hi tro la itre qatre thup a upetröneë angeic. Ngo hapeu, kolo kö lai a hape, pëkö hni ne utipin ne la itre qatre thup? Ame ngöne la ketre tane mekun, tro sa ce wang la aqane amekötine Iehova la itre ka tria cememine la utipin, me aqane tro sa nyitipu Nyidrë.