1-2. Kal ki éra diferénsa entri kes dôs rei i ki perguntas nu sta ben responde?

NU STA ben pâpia di dôs rei ki vive na ténpu antigu. Un di es ta governaba kel reinu di 10 tribu di Israel i kel otu ta governaba na kel reinu di dôs tribu di Judá. Nbóra es vive na ténpu diferenti, es faze txeu kuza igual. Es tudu dôs rabela kóntra Jeová i es poi se povu ta peka. Tanbê es tudu dôs adora deus falsu i es mata algen. Má tinha un diferénsa entra kes dôs ómi li. Un di es kontinua ta faze kes kuza mariadu ti fin di se vida. Má kel otu rapende i Jeová purdua-l pa kes pekadu gravi ki el faze. Es éra kenha?

² Kel rei di Israel éra Akabi i kel rei di Judá éra Manasés. Kel diferénsa ki tinha entri kes dôs ómi li ta inxina-nu txeu kuza sobri un asuntu inportanti, ki é rapendimentu. (Atos 17:30; Rom. 3:23) Kuzê ki é rapendimentu i modi ki nu pode mostra ma dja nu rapende? Nu krê sabe kel-li pamodi nu krê pa Jeová purdua-nu óras ki nu peka. Pa nu atxa respósta di kes dôs pergunta li, nu sta ben studa vida di kes dôs rei i odja kuzê ki nu pode prende ku ses izénplu. Dipôs, nu ta ben odja kuzê ki Jizus inxina sobri rapende di verdadi.

3. Akabi éra ki tipu di rei?

³ Akabi éra kel sétimu rei di kel reinu di 10 tribu di Israel. El kaza ku Jizabel, ki éra fidju-fémia di rei di Sídon, un nason riku ki ta fikaba pa ladu nórti di Israel. Pamodi kel kazamentu li, Israel tevi más xansi di ganha dinheru. Má tanbê kel-li poi nason di Israel ta peka mutu  más inda kóntra Jeová. Jizabel ta adoraba Baal i el insentiva Akabi pa poi povu ta sigi kel relijion nojéntu. Kes algen ki ta adoraba Baal ta fazeba prostituison i ti es ta fazeba sakrifisius di mininu. Duránti kes ténpu ki Jizabel éra rainha, tudu profétas di Jeová staba na prigu. El manda mata txeu di es. (1 Reis 18:13) Akabi ‘éra más piór di ki tudu kes ki reina antis di el.’ (1 Reis 16:30) Jeová staba ta odja tudu kel ki Akabi ku Jizabel staba ta faze. Má pamodi se mizerikórdia, Jeová manda proféta Elias pa djuda Se povu muda di atitudi i sirbi-l. Má Akabi ku Jizabel nega obi.

4. Modi ki Akabi ta sérba kastigadu i modi ki el reaji?

⁴ Má paxénxa di Jeová txiga fin. El manda proféta Elias pa bai fla Akabi ku Jizabel modi ki es ta ben sérba kastigadu. Ses família interu ta ben sérba distruídu. Kuza ki Elias fla Akabi pô-l ta xinti kasábi! Pur isu, kel ómi ki éra orgulhozu, ‘rabaxa se kabésa’. — 1 Reis 21:19-29.

5-6. Kuzê ki ta mostra ma Akabi ka rapende di verdadi?

⁵ Nbóra Akabi rabaxa se kabésa na kel situason li, más tardi el ben mostra na se konportamentu ma el ka rapende di verdadi. Akabi ka faze nada pa kaba ku adorason di Baal na se reinu. El ka insentiva povu pa adora Jeová. I tanbê ten otus kuza ki Akabi faze ki ta mostra ma el ka rapende.

⁶ Más tardi, Akabi konvida Jeozafá, rei di Judá, pa djunta ku el pa bai géra kóntra gentis di Síria. Jeozafá konsedja-l pa es bai pâpia primeru ku un proféta di Jeová. Má Akabi ka krê fazeba kel-la. El fla: ‘Ten más un otu ómi ki pode djuda-nu pâpia ku Jeová, má N ta odia-l, pamodi nunka el ka ta profetiza kuza dretu sobri mi, sô kuzas mariadu.’ Má simé, es bai pâpia ku proféta Mikaías. Sima Akabi dja flaba, proféta Mikaías da-l un mau notísia! Envês di rapende i buska perdon di Jeová, Akabi manda prende proféta Mikaías. (1 Reis 22:7-9, 23, 27) Nbóra Akabi manda prende proféta Mikaías, el ka konsigi inpidi kel profesia di kunpri. Na kel géra ki ben kontise, Akabi matadu. — 1 Reis 22:34-38.

7. Kuzê ki Jeová fla sobri Akabi dipôs ki el móre?

⁷ Dipôs ki Akabi móre, Jeová fla kuzê ki el ta pensaba di el. Jeozafá éra un bon rei. Má kantu ki el volta pa kaza dipôs di kel géra, Jeová manda proféta Jeú pa fla-l ma el aji mariadu pamodi el djunta ku Akabi. Proféta Jeú fla-l: ‘É kes mau ki nho debe djuda, i é kes ki ta ôdia Jeová ki nho debe ama?’ (2 Cró. 19:1, 2) Pensa na kel-li: si Akabi rapendeba di verdadi, proféta Jeú ka ta flaba ma el éra un ómi mau i ma el ta odiaba Jeová. Kel-li ta mostra klaru ma nbóra Akabi mostra algun tristéza, nunka el ka rapende di verdadi.

8. Kuzê ki izénplu di Akabi ta inxina-nu sobri rapende?

⁸ Kuzê ki nu ta prende ku izénplu di Akabi? Kantu Elias fla Akabi ma se família ta ben sérba kastigadu, na komésu el rabaxa se kabésa. Kel-li é un kuza dretu ki el faze. Má kes kuza ki el faze dipôs ta mostra klaru ma el ka rapende di verdadi. Nton, nu ta prende ma rapende é más di ki sô pidi diskulpa di kel kuza mariadu ki nu faze. Gósi nu ben odja otu izénplu ki ta djuda-nu ntende kuzê ki é rapende di verdadi.

9. Manasés éra ki tipu di rei?

⁹ Uns 200 anu dipôs, Manasés bira rei di Judá. Talvês se pekadus éra mutu más piór di ki kes di Akabi! Bíblia ta fla ma Manasés ‘faze un monti kuza ki pa Jeová éra mariadu, pa ofende-l.’ (2 Cró. 33:1-9) El faze txeu altar pa kes deus falsu. I más piór inda, el poi un imaji déntu di ténplu sagradu di Jeová! Talvês es ta uzaba kel imaji li na adorason di séksu. El faze majia, dibinhason ku fitisaria. Tanbê Manasés ‘tra txeu sangi di algen inosenti’. El mata un monti algen i ti mésmu ‘el kema se própi fidjus na lumi’, pa sirbi di sakrifisiu pa kes deus falsu. — 2 Reis 21:6, 7, 10, 11, 16.

10. Modi ki Jeová disiplina Manasés i modi ki Manasés reaji?

¹⁰ Sima Akabi, Manasés nega obi ku kes avizu di Jeová. Nton, ‘Jeová poi kes xéfi di trópas di rei di Asíria ta ataka [Judá]. Es kasa Manasés ku ganxu, es prende-l ku dôs korenti di kóbri i es leba-l pa Babilónia.’ Kantu Manasés staba prézu na Babilónia, talvês el pensa na tudu kuza ki el faze. ‘El rabaxa txeu dianti di kel Deus di se gentis grandi.’ Tanbê el faze otus kuza. ‘El pidi ajuda di Jeová, se Deus’. Aliás, Bíblia ta fla ma ‘Manasés ta fazeba orason pa El’. Kel ómi mau kumesa ta muda. El pasa ta odja Jeová sima ‘se Deus’ i el kontinua ta ora pa el. — 2 Cró. 33:10-13.

11. Sima sta na 2 Crónicas 33:15, 16, modi ki Manasés mostra ma el rapende di verdadi?

¹¹ Ku ténpu Jeová responde orason di Manasés. El odja ma se korason dja mudaba pamodi kuzê ki el fla na orason. Pur isu, Jeová purdua-l i el dexa-l bira rei otu bês. Manasés pruveta kel oportunidadi pa mostra ma el rapende di verdadi. El faze kel ki Akabi nunka ka faze. El muda se konportamentu, el luta kóntra adorason falsu i el insentiva povu pa adora Jeová. (Lé 2 Crónicas 33:15, 16.) Manasés meste tinha koraji ku fé pa el fazeba kes kuza li. Pa txeu anu el foi un mau izénplu pa se família, pa kes algen na palásiu i pa tudu povu. Má na kes últimu anu di se vida, Manasés tenta koriji alguns kuza mariadu ki el faze. Talvês el foi un bon izénplu pa se nétu Juzias, ki dipôs bira un bon rei. — 2 Reis 22:1, 2.

12. Kuzê ki izénplu di Manasés ta inxina-nu sobri rapende di verdadi?

¹² Kuzê ki nu ta prende ku izénplu di Manasés? El rabaxa dianti di Deus i el faze otus kuza pa mostra ma el rapende di verdadi. El pidi Jeová pa ten mizerikórdia di el i el muda se konportamentu. El sforsa txeu pa koriji kes kuza mariadu ki el faze. El faze se midjór pa el adora  Jeová i el djuda otus algen faze mésmu kuza. Izénplu di Manasés ta da speransa ti pa kes algen ki faze kes pekadu más gravi. Stória di Manasés ta prova ma Jeová ‘é bon i [el] sta sénpri prontu pa púrdua’. (Sal. 86:5) Jeová ta púrdua kes ki rapende di verdadi.

13. Ki ilustrason ta djuda-nu ntende un kuza inportanti sobri rapende?

¹³ Manasés faze más di ki sô xinti tristi pamodi kes pekadu ki el faze. Kel-li ta inxina-nu un lison inportanti sobri rapendimentu. Pensa na kel ilustrason li: imajina ma bu bai kunpra un bolu. Má envês di es da-u bolu, es ta da-u un ovu. Bu ta fikaba kontenti? I si es fla-u ma kel ovu é inportanti pa faze bolu? Tanbê bu ka ta fikaba kontenti! Di mésmu manera, Jeová ta pidi pa un algen ki peka rapende. Si kel algen xinti tristi pamodi pekadu ki el faze, kel-li é bon. Kel sentimentu li é inportanti pa un algen rapende. Má sô kel-li ka ta txiga. Nu ben odja kuzê ki nu ta prende ku un stória ki Jizus konta i ki ta toka nos korason.

14. Na kel stória di Jizus, modi ki kel fidju ki staba perdedu mostra kes primeru sinal di rapendimentu?

¹⁴ Na Lucas 15:11-32, Jizus konta un stória di un fidju ki rabela. Kel stória li ta nkoraja-nu txeu. Na es stória, kel fidju ta rabela kóntra se pai, el ta sai di kaza i el ta ‘viaja pa un país lonji.’ La, kel fidju pasa ta leba un vida mariadu. Kantu se vida bira txeu difísil, el kumesa ta pensa na kes disizon mariadu ki el toma. El da kónta ma se vida éra mutu más midjór kantu el staba na kaza di se pai. Sima Jizus fla, kel fidju ‘ben na el’. Nton el disidi volta pa kaza i pidi se pai pa purdua-l. Foi inportanti pa kel fidju odja ma el faze txeu kuza mariadu. Má sô kel-la ta txigaba? Nau. El tinha ki fazeba otus kuza!

15. Modi ki kel fidju na kel stória ki Jizus konta, mostra ma el rapende di verdadi?

¹⁵ Kel fidju ki staba perdedu mostra ma el rapende di tudu kuza ki el faze. El viaja txeu pa el volta pa kaza. Nton kantu el nkontra ku se pai, el fla: ‘Papá, N peka kóntra séu i kóntra bo. N ka merese más pa N txomadu di bu fidju.’ (Lucas 15:21) Kuza ki kel fidju fla mostra ma el krê sérba amigu di Jeová otu bês. Tanbê el rekonhese ma kuza ki el faze poi se pai ta fika tristi. El staba dispostu na faze di tudu pa el tinha perdon di se pai, sikrê el tinha ki trabadjaba sima se npregadu! (Lucas 15:19) Kel stória li ka sô ta toka nos korason, má tanbê el ta inxina prinsípius inportanti pa ansions. Óras ki un irmon faze un pekadu gravi, ansions  meste djobe dretu si kel algen rapende di verdadi.

16. Pamodi ki pode ser difísil pa ansions sabe si un algen rapende di verdadi?

¹⁶ Pode ser difísil pa ansions diskubri si un algen ki faze un pekadu gravi rapende di verdadi. Pamodi? Pamodi ansions ka ta konsigi lé korason. Nton, es meste odja algun kuza na kel irmon ki ta mostra ma el prende ôdia kel pekadu ki el faze. Na alguns situason, un algen pode peka di manera diskaradu i óras ki ansions ta pâpia ku el, es pode ka fika ku sertéza si el rapende di verdadi.

17. (a) Ki izénplu ta mostra ma sô fla ma nu sta tristi pamodi un pekadu, ka ta txiga pa prova ma dja nu rapende di verdadi? (b) Sima sta na 2 Coríntios 7:11, kuzê ki ta speradu di kes algen ki rapende di verdadi?

¹⁷ Pensa na kel izénplu li. Un irmon ta faze adultériu txeu bês i duránti txeu anu. Envês di el pidi ajuda, el ta sukundi kel pekadu di se mudjer, di se amigus i di ansions. Má un dia, ansions ta da kónta di kuzê ki el faze. Dipôs, óras ki ansions ta fla-l ma es tene próva ma el sta ta faze adultériu, kel irmon ta seta se éru i ta parse ma el fika txeu tristi. Má sô kel-li ta txiga? Ansions meste odja más di ki sô tristéza. Kel irmon ka faze kel pekadu sô un bês i pamodi un frakéza. Má el faze kel pekadu gravi txeu bês i pa txeu anu. Tanbê é ka kel irmon ki konta se pekadu di livri vontadi; é otus algen ki diskubri. Pur isu, ansions meste odja próva na se manera di pensa, di aji i na kuzas ki el ta xinti, ma dja el muda. (Lé 2 Coríntios 7:11.) Talvês ta leba txeu ténpu pa kel algen faze kes mudansa ki el meste, ki ta prova ma el rapende di verdadi. I talvês el pode ser dizasosiadu di kongregason duránti algun ténpu. — 1 Cor. 5:11-13; 6:9, 10.

18. Modi ki un algen dizasosiadu ta mostra ma dja el rapende di verdadi i kal ki ta ser rezultadu?

¹⁸ Un algen dizasosiadu meste faze alguns kuza pa mostra ma dja el rapende di verdadi. El debe sisti tudu runion i sigi kes konsedju ki ansions da-l di faze orason i studa Bíblia sénpri. El meste faze di tudu pa el ivita kes situason ki pode pô-l ta peka otu bês. Si un algen faze txeu sforsu pa rekupera se amizadi ku Jeová, el pode ten sertéza ma Jeová ta purdua-l i ma el ta readimitidu na kongregason. Óras ki ansions ta tenta diskubri si un algen ki peka dja rapende di verdadi, es debe lenbra ma kada situason é diferenti. Pur isu, es ta julga kada situason ku txeu kuidadu.

19. Modi ki un algen ta mostra ma dja el rapende di verdadi? (Ezequiel 33:14-16)

¹⁹ Sima dja nu odja, rapende di verdadi  é más di ki sô fla ma nu sta tristi pamodi un pekadu ki nu faze. Pa un algen mostra ma dja el rapende di verdadi, el meste muda se pensamentus i se sentimentus. I tanbê, el debe faze kuzas ki ta mostra ma el sta rapendidu, sima para di faze kes kuza mariadu i torna vive di akordu ku leis di Jeová. (Lé Ezequiel 33:14-16.) Kuza más inportanti ki un algen ki peka debe faze é rekupera se amizadi ku Jeová.

20-21. Modi ki nu pode djuda un algen ki faze un pekadu gravi?

²⁰ Jizus papiaba di un asuntu inportanti di se trabadju di pregason kantu el fla: ‘N ka ben txoma kes justu pa rapende, má kes pekador.’ (Lucas 5:32) Kel-li tanbê debe ser nos dizeju. Imajina ma bu grandi amigu faze un pekadu gravi. Kuzê ki bu debe faze?

²¹ Si bu tenta sukundi pekadu di bu amigu, bu ta prujudika-l más inda. Tanbê kel-li ka ta da sértu pamodi Jeová sta ta odja tudu. (Pro. 5:21, 22; 28:13) Si bu krê djuda bu amigu, fla-l pa el pâpia ku ansions. Si el nega faze kel-li, bu debe fla ansions kuzê ki kontise. Asi bu ta mostra ma bu krê djuda bu amigu pamodi se amizadi ku Jeová sta na prigu!

22. Kuzê ki nu sta ben odja na kel otu studu?

²² Alvês un algen ta faze un pekadu gravi txeu bês i duránti txeu ténpu i ansions ta disidi ma el debe dizasosiadu. Má kel-li krê fla ma ansions ka tevi mizerikórdia di kel algen? Na kel otu studu, nu ta ben odja más dretu modi ki Jeová ta disiplina ku mizerikórdia kes algen ki peka i modi ki nu pode imita-l.