1, 2. Ахав ӕма Манасси цӕмӕй хецӕн кодтонцӕ ӕма аци статьяй цӕмӕ ӕркӕсдзиан?

БЕРӔ ӕности размӕ цардӕй дууӕ паддзахи: еу адтӕй Израили дӕс муггагей паддзах, иннӕ ба – Иуди дууӕ муггагей паддзах. Еу рӕстӕги нӕ цардӕнцӕ, фал сӕмӕ еумӕйагӕй ба берӕ цидӕртӕ адтӕй. Дууӕ паддзахи дӕр Йегови нихмӕ цудӕнцӕ, удта адӕни ихӕлд зундбӕл аразтонцӕ. Сӕ дууӕ дӕр мӕнгӕ хуцӕуттӕн кувтонцӕ, удта берӕ тог никкалдтонцӕ. Фал еу цӕмӕйдӕр ба хъӕбӕр хецӕн кодтонцӕ. Сӕ еу ӕ царди кӕронмӕ дӕр лӕгъуз адӕймагӕй байзадӕй. Иннӕ ба ӕ тӕрегъӕдтӕбӕл ӕрфӕсмон кодта ӕма ин Йеговӕ ниххатир кодта. Ӕркӕсӕн, ке кой кӕнӕн, уомӕ.

² Израили паддзах хундтӕй Ахав, Иуди паддзах ба – Манасси. Еци дууӕ нӕлгоймаги цӕмӕй хецӕн кодтонцӕ, уомӕ дзӕбӕхдӕр ку ’ркӕсӕн, уӕд хуӕздӕр балӕдӕрдзиан, ӕцӕгӕй ӕрфӕсмон кӕнун ци ӕй, уой (Гъуд. 17:30; Ром. 3:23). Еци гъуддаг нӕ дзӕбӕх балӕдӕрун гъӕуй, уомӕн ӕма ни алкедӕр фӕндуй, цӕмӕй нин Йеговӕ нӕ тӕрегъӕдтӕ хатир кӕна. Гъӕйдӕ мадта ӕркӕсӕн Ахави ӕма Манассий хабӕрттӕмӕ ӕма си цӕбӕл ахур кӕнӕн, уомӕ дӕр. Уой фӕсте ба ӕркӕсдзиан, Йесо исӕфт фурти туххӕй ци хабар радзурдта, уомӕ.

3. Ахав цӕхуӕн паддзах адтӕй?

³ Ахав адтӕй Израили дӕс муггагемӕн сӕ ӕвдӕймаг паддзах. Ӕ уосӕ Йезавел ба адтӕй Сидони паддзахи кизгӕ. Сидон гъӕздуг горӕт адтӕй, ӕма си Ахав ӕхецӕн цидӕр пайда ке уидта, уой туххӕй ӕрхудта Йезавели. Фал Израили адӕн ба уой туххӕй Йеговӕй раидард ӕнцӕ. Йезавел Ваалӕн кувта  ӕма Ахӕвӕн Израили дӕр еци цъумур дин ӕрфедар кӕнун кодта. Ваалӕн ка кувта, етӕ сӕ ковӕндони ихӕлд миутӕ кодтонцӕ, удта сӕ сувӕллӕнтти дӕр арти басодзиуонцӕ. Цалинмӕ бартӕ Йезавели къохти адтӕнцӕ, уӕдмӕ Йегови пахампартӕй алкӕмӕндӕр тӕссаг адтӕй. Берети си марун дӕр ракодта (1 Пад. 18:13). Ахав дӕр си берӕ рӕвдзӕдӕр н’ адтӕй. Библи куд зӕгъуй, уомӕ гӕсгӕ кодта, «Йегови цӕсти лӕгъуз ци адтӕй, уой ӕма, ӕ разӕй ка адтӕй, уонӕй се ’гасемӕй фуддӕр фӕцӕй» (1 Пад. 16:30). Еци фудгъуддӕгтӕ Йеговӕй римӕхст н’ адтӕнцӕ. Е ӕй зудта, Ахав ӕма Йезавел ци илгъаг гъуддӕгтӕ кодтонцӕ, уой. Фал уӕддӕр уонӕн дӕр ӕма ӕгас израилӕгтӕн дӕр бухстӕй. Пахампар Илийай сӕмӕ рарветидӕ, цӕмӕй сӕ раст зундбӕл исаразтайдӕ, цалинмӕ ма син рӕстӕг адтӕй, уӕдмӕ. Фал Ахав ӕма Йезавел Илийай дзурдтӕ нецӕмӕ дардтонцӕ.

4. Йеговӕ Ахавӕн цӕхуӕн тӕрхон рахаста, ӕма уомӕ Ахав цӕхуӕн цӕстӕй ракастӕй?

⁴ Фал Йегови фӕразондзийнадӕн кӕрон ӕрцудӕй. Йеговӕ Ахав ӕма Йезавелмӕ Илийай рарвиста, цӕмӕй син фегъосун кодтайдӕ ӕ тӕрхон: сӕ бийнонтӕ исӕфт ӕрцӕудзӕнцӕ. Дессаг ӕй, фал Ахав еци дзурдтӕ ку фегъуста, уӕд ӕхе «ӕрниллӕг кодта» (1 Пад. 21:19–29).

5, 6. Цӕмӕй бӕрӕг ӕй, Ахав ӕцӕгӕй ке не ’рфӕсмон кодта, е?

⁵ Кӕд еци уавӕри Ахав ӕхе «ӕрниллӕг кодта», уӕддӕр идарддӕр ӕхе куд дардта, уомӕй ба бӕрӕг адтӕй, ӕцӕгӕй ке не ’рфӕсмон кодта, е. Ести бакодта, цӕмӕй Израили Ваалӕн мабал кувтайуонцӕ? Неци. Адӕни Йеговӕн ковунмӕ разӕнгард кодта? Нӕ разӕнгард кодта. Ахав ӕцӕгӕй ке не ’рфӕсмон кодта, уомӕн ма ӕндӕр бӕрӕггӕнӕнтӕ дӕр адтӕй.

⁶ Цӕйбӕрцӕдӕр рӕстӕги фӕсте Ахав Иуди паддзах Иосафатӕй ӕнхус ракурдта, цӕмӕй Сирий нихмӕ рацудайдӕ. Иосафат ба Йеговӕбӕл еузӕрдон адтӕй ӕма ’й фӕндадтӕй тугъдмӕ рацӕуни размӕ бал Йегови пахампари хӕццӕ раунаффӕ кӕнун. Еци гъуди Ахави зӕрдӕмӕ нӕ фӕццудӕй, фал ин уӕддӕр загъта: «Ес ма еу адӕймаг, ӕма Йегови уой фӕрци дӕр ес бафӕрсӕн. Фал си ӕз ме ’сӕфст уинун, уомӕн ӕма мин лӕгъузӕй ӕндӕр хуарзӕй неци фӕззӕгъуй». Фал уӕддӕр паддзӕхтӕ пахампар Михеймӕ фӕдздзурдтонцӕ. Ӕма син ӕцӕгӕйдӕр Михей хуарзӕй неци загъта. Ахав ба ӕрфӕсмон кӕнуни бӕсти ӕма Йеговӕй хатир ракоруни бӕсти Михеййи ахӕстдонӕмӕ багӕлдзун кодта (1 Пад. 22:7–9, 23, 27). Фал ибӕл Михеййи дзурдтӕ уӕддӕр исӕнхӕст ӕнцӕ – еци тугъди Ахави рамардтонцӕ (1 Пад. 22:34–38).

7. Ахави ку рамардтонцӕ, уӕд си Йеговӕ ци загъта?

⁷ Ахави ку рамардтонцӕ, уӕд рабӕрӕг ӕй, Йеговӕ имӕ цӕхуӕн цӕстӕй кастӕй, е. Иосафат сӕхемӕ дзӕбӕхӕй ку ӕрӕздахтӕй, уӕд имӕ Йеговӕ пахампар Иуййи барвиста, цӕмӕй ин бауайдзӕф кодтайдӕ, ӕхе Ахави хӕццӕ ке исбаста, уой туххӕй. Пахампар ин загъта: «Фудгӕнгутӕн ӕнхус кӕнун раст ӕй? Йеговӕй е ’сӕфт ка уинуй, уони гъӕуама уарзгӕ кӕнай?» (2 Анз. 19:1, 2). Расагъӕс кӕнӕ, Ахав ӕцӕгӕй ку ӕрфӕсмон кодтайдӕ, уӕд си пахампар уӕхӕн дзурдтӕ загътайдӕ? Бӕрӕг ӕй, кӕд Ахав ӕхе ӕрниллӕг кодта, уӕддӕр ӕцӕгӕй ба не ’рфӕсмон кодта.

8. Ахави хабарӕй цӕбӕл ахур кӕнӕн?

⁸ Ахави хабарӕй цӕбӕл ахур кӕнӕн? Ахав ку фегъуста, ӕ бийнонтӕ исӕфт ке ӕрцӕудзӕнцӕ, уой, уӕд ӕхе ӕрниллӕг кодта. Ӕма е раст адтӕй. Фал уой фӕсте ӕхе куд дардта, уомӕй ба рабӕрӕг ӕй, ӕцӕгӕй ке не ’рфӕсмон кодта. Мадта адӕймаг ӕцӕгӕй ке ӕрфӕсмон кодта, е айдагъ ӕ дзурдтӕй бӕрӕг гъӕуама ма уа. Гъӕйдӕ нур ба ӕркӕсӕн ӕндӕр хабармӕ ӕма ’й фӕууинӕн, ӕцӕгӕй ӕрфӕсмон кӕнун ци ӕй, уой.

9. Манасси цӕхуӕн паддзах адтӕй?

⁹ Еу дууӕ сӕдӕ анзей фӕсте ба Иуди паддзах иссӕй Манасси. Ахави фудгъуддӕгтӕ уой рази нецибал адтӕнцӕ. Библи зӕгъуй: «Манасси Йегови цӕсти берӕ лӕгъуздзийнадӕ кодта ӕма ’й уотемӕй ӕгадӕ кодта» (2 Анз. 33:1–9). Мӕнгӕ хуцӕуттӕн дуйне нивондхӕссӕнтӕ искодта ӕма ма Йегови ковӕндони дӕр гумери ӕрӕвардта. Е, ӕвӕдзи, адтӕй ихӕлд гъуддӕгти хӕццӕ баст ка адтӕй, уӕхӕн гумери. Манасси ма «кӕлӕнтӕ кодта, нисӕнттӕ ихалдта, хинттӕ кодта», удта хъӕбӕр берӕ «ӕнӕфуд тог никкалдта». Еци фудадӕймаг ма ӕ фуртти дӕр мӕнгӕ хуцӕуттӕн нивонди ӕрхаста, ӕма сӕ «арти басугъта» (2 Пад. 21:6, 7, 10, 11, 16).

10. Йеговӕ Манассий куд бафхуардта ӕма Манасси уомӕ цӕхуӕн цӕстӕй ракастӕй?

¹⁰ Йеговӕ ӕ пахампарти Манассимӕ еу ӕма дууӕ хатти нӕ барвиста. Фал сӕмӕ е дӕр Ахави хузӕн нӕ байгъосидӕ. Фӕстагмӕ Йеговӕ «сӕ нихмӕ ракодта Ассирий паддзахи ӕфсади хестӕрти, ӕма етӕ Манассий къӕдзӕхти астӕу ӕрахӕстонцӕ, ӕрхи хъадаматӕ ибӕл бакодтонцӕ ӕма ’й Вавилонмӕ фӕккодтонцӕ». Гъема Манасси ахӕстдони бадгӕй ӕ цардбӕл ӕрсагъӕс кодта. Ӕма «ӕ фидтӕлти Хуцауи рази ӕхе хъӕбӕр ӕрниллӕг кодта». Уомӕй уӕлдай ма Манасси Йеговӕмӕ кувта ӕма ин «лигъстӕ кӕнун райдӕдта». Ковгӕ ба имӕ, ӕвӕдзи, еу ӕма дууӕ хатти нӕ кодта. Гъема еци фудадӕймаг ӕййевун райдӕдта. Манасси Йегови ӕ Хуцаубӕл банимадта ӕма имӕ хӕстӕг кӕнун райдӕдта (2 Анз. 33:10–13).

11. 2 Анзфинстити 33:15, 16 финст дзурдтӕ куд ӕвдесунцӕ, Манасси ӕцӕгӕйдӕр ке ӕрфӕсмон кодта, уой?

¹¹ Йеговӕ Манассий кувдтитӕбӕл дзуапп равардта, уомӕн ӕма бӕрӕг адтӕй, ӕндӕр адӕймаг ке иссӕй. Гъема ’й нӕуӕгӕй ӕ паддзахбадӕнбӕл ӕрбадун кодта. Манасси идарддӕр куд цардӕй, уомӕй бӕрӕг адтӕй, ӕцӕгӕйдӕр ке ӕрфӕсмон кодта. Е Ахави хузӕн н’ адтӕй ӕма ке ӕрфӕсмон кодта, уой айдагъ дзурдтӕй нӕ, фал ма гъуддӕгтӕй дӕр бавдиста. Иуди мӕнгӕ дин исӕскъунунбӕл архайун райдӕдта, удта адӕни дӕр разӕнгард кодта ӕрмӕстдӕр Йеговӕн ковун. (Бакӕсӕ 2 Анзфинститӕ 33:15, 16.) Уой туххӕй ӕй, ӕвӕдзи, устур нифсхастдзийнадӕ гъудӕй, уомӕн ӕма уой размӕ ӕ бийнонти, удта ӕ дӕлбарӕ ка адтӕй, еци адӕни астӕу дӕр бустӕги ӕндӕр ӕгъдӕуттӕ ӕрфедар кодта. Кӕми ӕрзӕронд ӕй, уоми ба ма уавӕр раййевунбӕл архайун райдӕдта. Ӕ фуртифурт Иосий дӕр, ӕвӕдзи, раст зундбӕл е исаразта, уомӕн ӕма фӕстӕдӕр Иоси хъӕбӕр дзӕбӕх паддзах иссӕй (2 Пад. 22:1, 2).

12. Манассий хабарӕй цӕбӕл ахур кӕнӕн?

¹² Манассий хабарӕй цӕбӕл ахур кӕнӕн? Ахави хузӕн е дӕр ӕхе ӕрниллӕг кодта, фал айдагъ уобӕл не ’рлӕудтӕй. Йеговӕн лигъстӕ кодта, цӕмӕй ин ниххатир кодтайдӕ. Манасси ӕхе раййивта ӕма ци зӕран ӕрхаста, уой исраст кӕнунбӕл байархайдта. Уомӕй  уӕлдай ма Йеговӕн ӕгас зӕрдӕй лӕггадӕ кӕнун райдӕдта, удта иннети дӕр уомӕ разӕнгард кодта. Манассий хабар, устур тӕрегъӕдтӕ ка искодта, уонӕн хъӕбӕр устур нифс ӕй, уомӕн ӕма еци хабарӕй бӕрӕг ӕй, Йеговӕ хӕларзӕрдӕ ӕма хатиргӕнагӕ ке ӕй (Пс. 86:5). Адӕймаг зӕрдӕй ку ӕрфӕсмон кӕна, уӕд ин Йеговӕ ӕнӕмӕнгӕй ниххатир кӕндзӕй.

13. Уотид ӕрфӕсмон кӕнун фагӕ ’й? Ӕрхӕссӕ цӕветтон.

¹³ Манасси ӕ тӕрегъӕдтӕбӕл уотид фӕсмон не ’ркодта. Дӕ цӕститӕбӕл рауайун кӕнӕ, цума къере ӕлхӕнунмӕ бацудтӕ. Фал дин тукангӕс ба къерей бӕсти инсади къос ӕрбалӕвардта. Ба ’й ӕлхӕндзӕнӕ? Ӕвӕдзи, нӕ. Ма дин уотӕ ку зӕгъа, къере дӕр инсадӕй конд ӕй, зӕгъгӕ, уӕдта? Уӕддӕр нӕ, уомӕн ӕма ’й лӕдӕрис, кӕд къере искӕнунмӕ инсад гъӕуй, уӕддӕр инсад къере нӕма ’й. Гъе уотӕ Йеговӕ дӕр фенгъӕлмӕ кӕсуй, тӕрегъӕд ка искодта, е ӕ гъуддӕгтӕбӕл ке ӕрфӕсмон кӕндзӕй. Фал айдагъ е фагӕ нӕй. Мадта ма «инсадӕй» уӕлдай, гъома ӕрфӕсмон кӕнунӕй уӕлдай ма никкидӕр ци гъӕуй, уой ба базондзиан, Йесо исӕфт фурти туххӕй ци хабар радзурдта, уомӕй.

14. Исӕфт фурт ке ӕрфӕсмон кодта, е бал фиццагидӕр цӕмӕй рабӕрӕг ӕй?

¹⁴ Лукай 15:11–32 финст ӕй исӕфт фурти хабар. Еци биццеуи нӕбал фӕндадтӕй, ӕ фидӕ ’й куд ахур кодта, уотӕ цӕрун ӕма хӕдзарӕй рандӕ ’й идард бӕстӕмӕ. Уоми ба аллихузи тӕрегъӕдгун гъуддӕгти бафтудӕй. Зин уавӕри ку бахаудтӕй, удта ӕ цардбӕл ӕрсагъӕс кодта, ӕма ’й балӕдӕрдтӕй, ӕ фиди хӕдзари ин куд хуарз адтӕй, уой. Йесой дзурдтӕмӕ гӕсгӕ еци биццеуӕн ӕ зунд ӕхемӕ ӕрцудӕй ӕма исфӕндӕ кодта хӕдзарӕмӕ раздӕхун ӕма ӕ фидӕй хатир ракорун. Цӕмӕти ӕрхаудтӕй, уой ке балӕдӕрдтӕй е хуарз адтӕй. Фал айдагъ е фагӕ н’ адтӕй, никкидӕр ма ’й цидӕр бакӕнун гъудӕй.

15. Исӕфт фурт куд бавдиста, ӕцӕгӕй ке ӕрфӕсмон кодта, уой?

¹⁵ Еци биццеу ке ӕрфӕсмон кодта, е ма ӕ гъуддӕгтӕй дӕр рабӕрӕг ӕй. Фӕстӕмӕ ӕ хӕдзарӕмӕ хъӕбӕр даргъ надбӕл фӕццудӕй. Ӕма ӕ фиди ку фӕууидта, уӕд загъта: «Ӕз устур тӕрегъӕд ракодтон Хуцауи рази дӕр ӕма дӕу рази дӕр. Дӕ фурт мӕ хонай, уой аккаг нӕбал дӕн» (Лук. 15:21). Ӕ дзурдтӕй бӕрӕг ӕй, ке ’й бафӕндадтӕй нӕуӕгӕй Йеговӕмӕ ӕрбахӕстӕг ун. Удта ӕ фиди зӕрдӕ куд фӕрресун кодта, уой дӕр балӕдӕрдтӕй. Ӕма имӕ цӕмӕй ӕ фидӕ нӕуӕгӕй дзӕбӕх цӕстӕй кӕсун райдӕдтайдӕ, уой туххӕй имӕ ихуӕрст косӕгӕй косунбӕл дӕр арази адтӕй (Лук. 15:19). Аци хабар зӕрдӕбӕл ке ӕмбӕлуй, уомӕй уӕлдай ма хестӕр нӕлгоймӕгтӕн дӕр ӕнхус кӕнуй, тӕрегъӕд ка искодта, еци адӕймаг ӕцӕгӕй фӕсмон кӕнуй, ӕви нӕ, уой исбӕрӕг кӕнун сӕ ку фӕгъгъӕуй, уӕд.

16. Хестӕр нӕлгоймӕгтӕн алкӕд ӕнцон цӕмӕннӕ фӕууй балӕдӕрун, адӕймаг ӕцӕгӕй ӕрфӕсмон кодта ӕви нӕ, уой?

 ¹⁶ Тӕрегъӕд ка искодта, еци адӕймаг ӕцӕгӕй ӕрфӕсмон кодта ӕви нӕ, уой балӕдӕрун ӕнцон нӕй. Хестӕр нӕлгоймӕгтӕ зӕрдитӕ нӕ уинунцӕ. Фал ци уинунцӕ, уомӕ гӕсгӕ ба сӕ балӕдӕрун фӕгъгъӕуй, адӕймаг ци тӕрегъӕд искодта, уомӕй е ’сӕфт уинуй ӕви нӕ. Фал еуӕй-еухатт ба адӕймаг ӕ тӕрегъӕдгун гъуддӕгтӕ гъе уойбӕрцӕбӕл ӕнӕфсӕрмӕй кодта, ӕма хестӕр нӕлгоймӕгтӕн хъӕбӕр зин фӕууй исбӕрӕг кӕнун, адӕймаг ӕцӕгӕй фӕсмон кӕнуй ӕви нӕ, цийфӕнди син ма дзора, уӕддӕр.

17. а) Адӕймаг ӕнкъард ку уа, уӕддӕр е алкӕд уобӕл дзорӕг цӕмӕннӕ фӕууй, ӕма ӕцӕгӕй ӕрфӕсмон кодта? Ӕрхӕссӕ цӕветтон. б) 2 Коринфӕгтӕмӕ 7:11 куд финст ӕй, уомӕ гӕсгӕ ӕцӕгӕй ка ӕрфӕсмон кодта, еци адӕймаг куд гъӕуама архайа?

¹⁷ Зӕгъӕн, ӕнсувӕр берӕ ӕнзти дӕргъи хӕтуй. Ӕма ӕнхус ракоруни бӕсти идарддӕр дӕр ӕ уоси, е ’мбӕлтти ӕма хестӕр нӕлгоймӕгти сайуй. Еу афони ӕ тӕрегъӕдтӕ рагъӕр ӕнцӕ ӕма барадон комитети хӕццӕ фембалдӕй. Ӕнсувӕр ӕ тӕрегъӕдтӕбӕл басастӕй ӕма фиццаг бакастӕй фӕсмон дӕр кӕнуй. Фал ке ӕрӕнкъард ӕй, е нецӕбӕл ма дзорӕг ӕй, уомӕн ӕма еунӕг хатт нӕ фӕррӕдудӕй, фал берӕ ӕнзти дӕргъи ӕнӕгъдау цард фӕккодта. Удта хестӕр нӕлгоймӕгтӕмӕ дӕр ӕхе зӕрдтӕй нӕ бацудӕй. Хестӕр нӕлгоймӕгтӕ ’й гъӕуама фӕууинонцӕ, еци ӕнсувӕр ци тӕрегъӕдгун гъуддӕгтӕ кодта, уонӕй е ’сӕфт уинун ке райдӕдта, удта ӕ зундахаст ӕма ӕ гъуддӕгтӕ дӕр ке раййивта. (Бакӕсӕ 2 Коринфӕгтӕмӕ 7:11.) Фал уӕхӕн ӕййивддзийнӕдтӕ еунӕг бонмӕ не ’рцӕунцӕ. Еци ӕнсувӕри, ӕвӕдзи, багъӕудзӕй ӕмбурдӕй рацох кӕнун. Уой фӕсте ба ӕ гъуддӕгтӕй ку бавдеса, ӕцӕгӕй ке ӕрфӕсмон кодта, уой, гъе уӕд ӕ бон уодзӕй фӕстӕмӕ раздӕхун (1 Кор. 5:11–13; 6:9, 10).

18. Ӕмбурдӕй ке рацох кодтонцӕ, е ӕцӕгӕйдӕр ке ӕрфӕсмон кодта, е цӕхуӕн гъуддӕгтӕй бӕрӕг уодзӕй ӕма ин уой фӕрци ци бантӕсдзӕй?

¹⁸ Адӕймаг ӕцӕгӕй ке ӕрфӕсмон кодта, е цӕмӕй бӕрӕг уодзӕй? Гъӕуама ӕмбурдтӕмӕ цӕуа, Библи ӕртаса ӕма Йеговӕмӕ кова. Уой туххӕй ин хестӕр нӕлгоймӕгтӕ дӕр зӕгъдзӕнцӕ. Уомӕй уӕлдай ма гъӕуама ӕхе еуварс дара, тӕрегъӕдмӕ ’й ка ӕркӕндзӕй, уӕхӕн уавӕртӕй. Ӕ бон ци ӕй, уой ку кӕна, цӕмӕй Йегови хӕццӕ нӕуӕгӕй бафедауа, уӕд ин Йеговӕ ниххатир кӕндзӕй ӕма нӕуӕгӕй Ӕвдесӕн исуодзӕй. Адӕймаг ӕцӕгӕй ке ӕрфӕсмон кодта, уой алкӕд еу еци хузи не ’сбӕрӕг кӕндзӕнӕ. Уомӕ гӕсгӕ хестӕр нӕлгоймӕгтӕ алли адӕймагӕн дӕр ӕ уавӕртӕмӕ хъӕбӕр лӕмбунӕг фӕккӕсунцӕ, ӕма ӕмбурдмӕ раздӕхун ке фӕндуй, уомӕй ӕгӕр берӕ цидӕртӕ нӕ фӕййагорунцӕ.

19. Ӕцӕгӕй ӕрфӕсмон кӕнун ци нисан кӕнуй? (Йезекил 33:14–16).

¹⁹ Мадта ӕцӕгӕй ӕрфӕсмон кӕнун, уотид  хатир ракорун нӕй. Тӕрегъӕд ка искодта, еци адӕймаг гъӕуама ӕ зундахаст раййева, удта гъӕуама ӕ тӕрегъӕдгун гъуддӕгтӕ ниууадза ӕма, Йеговӕ куд зӕгъуй, уотӕ цӕра. (Бакӕсӕ Йезекил 33:14–16.) Еци адӕймаг Йегови хуарзӕнхӕй фенӕхай ӕй, ӕма фиццагидӕр гъӕуама уобӕл тухса.

20, 21. Уӕззау тӕрегъӕд ка искодта, уӕхӕн адӕймагӕн нӕ бон куд ӕй банхус кӕнун?

²⁰ Йесо зӕнхӕбӕл ку адтӕй, уӕд тӕрегъӕдгунти ӕрфӕсмон кӕнунмӕ разӕнгард кодта (Лук. 5:32). Ӕма мах дӕр гъӕуама уобӕл архайӕн. Зӕгъӕн, базудтай, дӕ хуарз ӕмбал устур тӕрегъӕд ке искодта. Куд бакӕндзӕнӕ?

²¹ Де ’мбали тӕрегъӕд ку баримӕхсай, уӕд ин фуддӕр ци ракӕнай, ӕнхус ба ин нӕ бакӕндзӕнӕ. Удта ӕнойдӕр еци тӕрегъӕд баримӕхсун уайгӕ дӕр нӕ ракӕндзӕй, уомӕн ӕма Йеговӕ алцидӕр уинуй (Ӕмб. 5:21, 22; 28:13). Фал дӕ кӕд де ’мбалӕн банхус кӕнун фӕндуй, уӕд ӕй баразӕнгард кӕнӕ, цӕмӕй хестӕр нӕлгоймӕгтӕй ӕнхус ракора. Уомӕн ӕма Йеговӕ уонӕн баихӕс кодта ӕ адӕнӕн ӕнхус кӕнун. Фал ӕй ку нӕ бафӕндӕуа хестӕр нӕлгоймӕгтӕн ӕ тӕрегъӕд радзорун, уӕдта дӕхецӕн дзоргӕ уодзӕй. Уотемӕй бавдесдзӕнӕ, ӕцӕг ӕмбал ке дӕ, уомӕн ӕма ин уотемӕй банхус кӕндзӕнӕ, цӕмӕй Йеговӕй еугур идард ма рауа!

22. Иннӕ статьяй ци базондзиан?

²² Фал, зӕгъӕн, адӕймаг берӕ рӕстӕг уӕззау тӕрегъӕдтӕ кодта ӕма ’й хестӕр нӕлгоймӕгтӕ ӕмбурдӕй рацох кодтонцӕ. Цума е уобӕл дзорӕг ӕй, ӕма ин ӕгӕр карз тӕрхон рахастонцӕ? Уой балӕдӕрунмӕ нин банхус кӕндзӕй иннӕ статья. Уоми ӕркӕсдзиан, тӕрегъӕд ка искодта, уонӕмӕ Йеговӕ фӕлмӕнзӕрдӕ ке фӕууй ӕма сӕ ку бафхуӕруй, уӕд е ба ӕ уарзондзийнадӕбӕл дзорӕг ке фӕууй.