1. Eeghe kụ iḍighi kụ ibadị u/legheri bọ egey ekụ iiḅereghị phọ?

ḌIO arodon asimuonịr aruukụ iiḅereghị emuza ni dị oghophora mọ bidị roḍighi ni idị eḅeraạn Enhaạn. Iikia i/lo ibadị u/kạr bọ ulegheri egey ekụ iiḅereghị! Bidị ropuru ghan mọ, “Eḍighi ni edị eniin ekụ iiḅereghị bịn kụ edi ghan obobọ oomo aruukụ iiḅereghị reḍighi ni idị eḅeraạn Enhaạn ḍughụm?” Yira okuphom ni owol k’epẹ ekpom mọ ayira mọ ipẹ yira rotughemhị ghan bọ kụ igey phọ ni, ḅilhẹ mọ eten iiseeny Abugbaanhaạn AZihova phọ kụ iḅeraạn ni aZihova? Edugh ni omhoọgh okuphom owol dị arọl idiphọ ḍughụm? Uguạ omhiịn riphigh.

2. Odaphạn 1 Tesalonikạ 1:5, uḍighi ika kụ aPọl amhoọgh bọ okuphom owol ilọ igey phọ?

² Otelhedom mọ aPọl akuphom ni owol igey phọ. (Bạl 1 Tesalonikạ 1:5.) Okuphom owol phọ odị o/ḍighi oopho olhoghoma. Odị aḍighi oye dị alhọgh inyaạm otuughạ Ekpo Onhụ phọ Enhaạn. Odị amheeraam ni mọ “oomo phọ ipẹ edi bọ siphẹ aḍinyạ iigbia phọ” Enhaạn kụ aphum ghan kụ ogẹ. (2 Tim. 3:16) Odị atuughạ amhiịn eeghe? Siphẹ Igẹ Iigbia phọ, aPọl amhiịn ni riphigh dị eḍeenhaan mọ aZizọs kụ aMesaya phọ oguanhaan bọ. Ariphigh dị abuḍiemhiom aruukụ iiḅereghị aJu phọ ophogh ghan bịn ogunhọm. Abuḍiemhiom iyạl asinem mọ abuẹn phọ ughophora mọ bidị roḍighi ni idị eḅeraạn Enhaạn, kuolọ iiḍighi phọ abidị i/ḅeraạn Enhaạn. (Taitọs 1:16) Dị u/kịgh aani bidị, aPọl oo/soniọn ghan iniin araraạr siphẹ igẹ iigbia phọ kụ amheeraam. Odị aakolhobian ni otughemhị ḅilhẹ r’osighẹ oḍighinhom “oomo arigbiom mọ Enaạn.”—Iiḍighi 20:27.

3. Orue omhoọgh ogey okuphom owol, emoghi ni mọ omhoọgh oomo ophanyanhaạn asipuru ayira ḍughụm? (Poghom igbe phọ “ Iiḍighi Phọ AZihova R’iitughiạn Phọ Odị—‘Ebụgh Ni Iboom.’”)

³ Ibadị ologhoma mọ egey ekụ iiḅereghị ekpẹ ghan ophanyanhaạn oomo odọ kirokirọ asipuru ghalhamọ r’asipuru dị  aBaibul phọ u/ngọ ophagharanhaạn phọ. Aḍiitughiạn phọ aḍiphẹ phọ ekpeanhaạn ni ḍughụm? Omhiịn eḍeenhaan phọ aPọl. Odị aḅenhị oomo abuḅaramạ omheeraam mọ, mọ “iiḅeghiọn ghan oomo araraạr ephogh.” Kuolọ odị aghaạph ni amiteom mọ ibadị araraạr edi ni dị odị u/naghanhạn. (1 Tẹs. 5:21) Odị agẹ mọ, “olegheri iyaạr phọ ayira” egbem ni bịn. Kụ aḅarạm mọ, “iphẹn yira romiịn bọ nyiidiphọ ekịgh mudị yira opogh atamaḍiki kụ romiịn ghan oogho dị arọl bịn tụm.” (1 Kọr. 13:9, 12) APọl o/nhaghanhạn oomo araraạr; kụ yira phọ kẹn ni. Kuolọ odị anhaghanhạn ni ikpanhạ igey dị egbolhomaam rigbiom mọ aZihova. Ipẹ odị alhegheri bọ ingọ nyodị okuphom owol mọ iphẹn odị amheeraam bọ kụ igey phọ ni!

4. Ika kụ idị yira kotue okparamhị okuphom owol phọ ayira mọ yira momhiịn igey phọ, ḅilhẹ yira kooḅeghiọn eeghe idị egbolhomaam bugey aKristẹn?

⁴ Ooḅeghiọn ophogh eten phọ epẹ aZizọs aphighi bọ igey iiseeny, ḅilhẹ r’ipẹ Abugbaanhaạn AZihova roḍighi bọ ḍio arodon ketue ni ekparamhị okuphom owol phọ yira omhoọgh bọ ilọ igey phọ. Siẹn emhuoghaạph phọ ephẹn phọ, yira komiịn ni mọ abugey aKristẹn (1) okel ikaaghinheẹn arumhụgh, (2) olọgh eegu ḍien phọ aZihova, (3) opomhoghiạn igey phọ, oḅilhẹ (4) omoọgh ephomhoghiạn igbo abidị.

5. Yira otuughạ eeghe ḍighaạgh aZizọs ilọ egey eten ooḅereghị ghan Enhaạn, kụ ika kụ idị yira kotue odaphạn aani?

⁵ AZizọs aaḅereghị ghan ogina aZihova bịn epẹ k’akẹ phọ ḅilhẹ kẹn r’isiẹn ade phọ, loor ephomhoghiạn phọ odị esi Enhaạn. (Luk 4:8) Odị atughemhị butelhedom mọ odị oḍighi aani igina phọ. AZizọs r’abutelhedom mọ odị u/ḍighinhom ikaaghinheẹn araraạr siphẹ iiḅereghị phọ abidị. Enhaạn eḍighi bọ Uwaloor, iyaạr i/lo dị oye kakạ kụ kotue otomaạm eghuan phọ aZihova! (Isa. 46:5) Kuolọ kokaạph aani ika ilọ  okaaghị awe dị ooḅereghị ghan Enhaạn kụ ooseeny ghan? Siphẹ omhunhenhiom iyạl Aḍioph Iilhogh phọ, aZihova aḅẹm mọ: “Ka/kaanhaạn loor anạ iyaạr torobọ ilọ erọl m’epẹ k’akẹ m’isiẹn ade phọ . . . Ka/kpuḍian angọ iyaạr lọ okạ.” (Ex. 20:4, 5) Itọ phọ ipẹ phọ eegholhaan ni esi abuphẹ omhoọgh bọ ḍiḅeraạn ooḅereghị Enhaạn.

6. Eeghe odọ eten iiseeny kụ edị Abugbaanhaạn AZihova rodaphạn ghan ḍio arodon?

⁶ Abuọ igbogh ituughạ phọ oḅẹm ni mọ abutelhedom mọ aZizọs igeedi phọ uuḅereghị ghan Enhaạn bịn. Esi omaạm, aḍinyạ phọ History of the Christian Church eḅẹm mọ abuḅẹl aKristẹn phọ “u/meera r’omheera” oḍighinhom ikaaghinheẹn araraạr siphẹ aruutu iiseeny phọ. Ḍio arodon, Abugbaanhaạn AZihova rodạph ghan eḍeenhaan eten iiseeny abuḅẹl aKristẹn phọ. Yira roo/ḅereghị ghan “we dị ooḅereghị ghan Enhaạn” dị okạ obobọ ruukpaạny; yira roo/ḅereghị ghan kẹn Zizọs. Yira roo/ḅereghị ghan kẹn silagbạ obobọ ikaaghinheẹn araraạr dị emherenyạn reelhe. Etigheri ipẹ awe ukpaariọm bọ iyira, yira osopha ni odaphạn ikpo onhụ phọ aZizọs eḅẹm bọ mọ: “Nạ kakpuḍian ghan angọ eghuan [aZihova]” bịn.—Mat. 4:10.

7. Oghẹn ogbaranhaạn dị aagholhaan ni kụ odi igbo Abugbaanhaạn AZihova r’abunhọn aruukụ iiḅereghị?

⁷ Ḍio arodon, ibadị rodạph ghan buḍiemhiom aruukụ iiḅereghị dị oolheghaan. Olhọgh oophugh odạph awe dị orọl idiphọ eḍighi ni okạ iyaạr ooḅereghị. Awe ropạgh ghan siphẹ aruukụ iiḅereghị phọ abidị, koghooghi rinyạ dị bidị ogẹ, koḅilhẹ ongooghị iboom ikpoki obakiọm arookpomhoghan dị abuḍiemhiom mọ obakị. Abuniin awe romeeraam ghan torobọ iyaạr dị abuḍiemhiom mọ oghaạph. Bidị omoọgh ḍiḅeraạn omhiịn ghan awe phọ abuẹn phọ idiphọ bidị mumoọgh bọ ḍiḅeraạn omhiịn aZizọs! Dị egbạgh r’ipẹ phọ, abuseenyom aZihova u/moọgh uw-emhụ. Ghalhamọ r’iduọn rolọgh ghan bọ ni eegu buẹn ophạm bọ iiḍighi siẹn ookpomhoghan phọ, yira rodạph ghan iphẹn aZizọs atughemhị bọ mọ: “Aḍita anyina abumor.” (Mat. 23:8-10) Yira ro/ngọ ghan iiseeny we mughumọ abuḍiemhiom asiosị obobọ abuọ itooghị. Kụ yira ro/bakị ghan rookpomhoghan. Kparipẹ ghụn, yira odi sạm ḅilhẹ ogbatanhaạn aḅirinhi phọ ophọn phọ. R’iphẹn phọ momaaghị bọ siẹn phọ, yira omeerạ bịn ogbatanhaạn esi aruukụ iiḅereghị dị oghophora mọ bunọ aKristẹn.—Jọn 18:36.

8. Yira ulhegheri ika mọ aZihova rawạ ni mọ oghuenhi ḍien phọ odị kụ oḅilhẹ oḍighi idị awe kolegheri?

⁸ AZizọs aaḅereghị iduọn eniin amem mọ: “Odẹ, kueni ni ḍien phọ anạ.” AZihova aphagharanhaạn iiḅereghị phọ ipẹ phọ reboom eḍọgh dị eḅạ idiphọ oomhaạny epẹ k’akẹ, kụ aguanhaan m’onọ kaḅilhẹ ni akuenhi ḍien phọ odị. (Jọn 12:28) Siẹn oomo arukumuan phọ odị siẹn ade phọ, aZizọs aghuenhi ghan ḍien Odẹ phọ odị. (Jọn 17:26) Esi iduọn phọ, abugey aKristẹn omiịn mọ eḍighi eboom eepoogh ḅilhẹ ekạr ekpeanhaạn oḍighinhom aḍien phọ Enhaạn kụ oḅilhẹ oḍighi idị abunhọn kolegheri aani.

9. Ika kụ idị aKristẹn oḅẹl okuron asiạ phọ oḍeenhaan mọ bidị olọgh ni eegu ḍien phọ Enhaạn?

⁹ R’ophighi ookpomhoghan aKristẹn phọ siphẹ oḅẹl okuron asiạ phọ, aZihova aaghiraan ni asoman reelhe phọ osaḅạr awe “ogbo abidị oghaaphaạn aḍien phọ odị.” (Iiḍighi 15:14) Abuḅẹl aKristẹn phọ abuẹn phọ umhiịn mọ eḍighi eboom eepoogh oḍighinhom aḍien phọ Enhaạn ḅilhẹ r’oḍighi idị awe kolegheri aani. Bidị ukạr ghan kụ oḍighinhom ḍien phọ Enhaạn mem dị bidị rogbạ ikpo onhụ phọ ḅilhẹ r’isiphẹ arinyạ phọ bidị ogeeghị bọ. * R’iphẹn phọ bidị oḍighi bọ, bidị uḍeenhaan mọ bidị  kụ awe dị oḍighi idị awe kolegheri ḍien phọ Enhaạn.—Iiḍighi 2:14, 21.

10. Eeghe ephigh kụ iḍeenhaan mọ Abugbaanhaạn AZihova kụ awe dị rogananami ḍien phọ aZihova?

¹⁰ Abugbaanhaạn AZihova roḍighinhom ghan ni ḍien phọ aZihova ḍughụm? Ooḅeghiọn ophogh. Ḍio arodon ibadị abuḍiemhiom aruukụ iiḅereghị moḍighi oomo ilọ bidị kotue aaghị aḍikaraghị aḍien phọ Enhaạn. Bidị mogbuurogh osigheọgh siphẹ asiBaibul phọ bidị ogbạ bọ otenheghi. Kụ ibadị amem bidị ro/meera ghan moghol siphẹ asiosị phọ abidị. * Oye katue ni aparanhaạn mọ Abugbaanhaạn AZihova bịn kụ awe dị olhọgh eegu oḅilhẹ oghenhi ḍien phọ Enhaạn ḍughụm? Yira roḍighi ghan ni idị aḍikaraghị aḍien phọ Enhaạn keelheghaan siẹn oomo aḅirinhi phọ eten dị abunhọn aruukụ iiḅereghị ro/ḍighi ghan! Idị egbolhomaam iphẹn phọ, yira roḍighi ni oomo ipẹ yira kotue bọ orọl idị eḅọph r’aḍien phọ ayira, Abugbaanhaạn AZihova. (Isa. 43:10-12) Yira momiteom New World Translation of the Holy Scriptures onhụ abạl dị emhạn 240 erubal, kụ apamhanhạm ḍien phọ aZihova riisi dị inhọn asiBaibul megbuurogh esigheọgh. Kụ yira romiteom ghan rinyạ dị egbạ Baibul phọ ḅilhẹ elhọgh repophe ghan ḍien phọ aZihova esi arunhụ aḍiaḅạ dị repel li 1,000!

11. Ika kụ idị aKristẹn oḅẹl okuron asiạ phọ oḍeenhaan mọ bidị opomhoghiạn ni igey phọ?

¹¹ AZizọs aphomhoghiạn igey phọ, igey phọ ilọ Enhaạn r’ogbi phọ Odị. AZizọs arọl r’idị emhoọgh muḅọph r’igey phọ, kụ aḍighi idị  abunhọn awe olhegheri aani igey phọ. (Jọn 18:37) Abugey abudaphạm mọ aZizọs opomhoghiạn aani kẹn igey phọ. (Jọn 4:23, 24) Okạr oghaạph, otelhedom mọ aPita aghol bugey aKristẹn mọ “eten igey phọ.” (2 Pit. 2:2) Loor ephomhoghiạn igey phọ, aKristẹn oḅẹl okuron asiạ phọ ughel li itughemhị aruukụ iiḅereghị, iḍighinhom araraạr awe abidị, ḅilhẹ kẹn r’iitughiạn dị egbạgh r’igey phọ. (Kọl. 2:8) Ḍio arodon, abugey aKristẹn rokparaghạ ghan ni oomo ipẹ bidị kotue bọ otuụgh orọl “dọl igey phọ” esi okpasị omheeraam mọ abidị r’eten aghuḍum mọ abidị siphẹ Ekpo Onhụ phọ aZihova.—3 Jọn 3, 4.

12. Abuẹn oḍiemhiom bọ ookpomhoghan phọ roḍighi ghan ika mem dị bidị omhiịn mọ onhaghạn aḍughụm mọ ayira anighẹ ooḅenhion, kụ uḍighi ika kụ bidị rooḅenhion ghan bọ?

¹² Arebenhẹ phọ Enhaạn ḍio arodon ro/kophora ghan mọ bidị olegheri omạn oomo igey phọ ilọ Enhaạn. Eeni amem bidị ropiọm ghan ni eten phọ epẹ bidị rogbạ ghan bọ Baibul phọ ḅilhẹ r’ilọ ooḅakị ookpomhoghan phọ. Ipẹ phọ ki/ḍighi iikia esi ayira. Igẹ Iigbia phọ emạ ni emiteom mọ ogey olhegheri iyaạr phọ reganana ghan enụm enụm. (Kọl. 1:9, 10) AZihova ragananami ghan igey phọ enụm enụm. Esi iduọn phọ, ewạ ni mọ yira omhoọgh ghan okparạm okoriom mem dị aḍiḅaạl igey phọ kesoor emadạn. (Prov. 4:18) Mem dị abuẹn oḍiemhiom bọ ookpomhoghan phọ omhiịn mọ onhaghạn aḍughụm ayira ilọ iniin igey phọ enighẹ ooḅenhion, bidị ro/pạm ghan koḅulhemhi omhạn ooḅenhion araraạr. Mem dị abunhọn aruukụ iiḅereghị rokparaghạ ghan onmeeghi araraạr oḍighi idị keḅeraạn aḅirinhi phọ, ookpomhoghan phọ aZihova rooḅenhion ghan raraạr obọ elhoghonhaạn ḍighaạgh oomo ookpomhoghan phọ oḍuraan otuman Enhaạn ḅilhẹ r’odaphạn eten iiseeny phọ aZizọs aphighi bọ. (Jems. 4:4) Ooḅenhion phọ rooḅenhion ghan bọ radaphạn ghan igey aBaibul dị meegholhaan, ki/nyuughiom aḅirinhi phọ obobọ oḍighi idị keḅeraạn bidị. Yira opomhoghiạn igey phọ agey!—1 Tẹs. 2:3, 4.

13. Eghẹn kụ ekpanhạ eegharạ dị aKristẹn oḅẹl okuron asiạ phọ oḍeenhaan, kụ ika kụ idị eganana aani esi Abugbaanhaạn AZihova ḍio arodon?

¹³ Esi oomo imạ araagharạ phọ olhegheriom bọ Kristẹn oḅẹl okuron asiạ phọ, ephomhoghiạn kụ edị okạr olhegheriom bidị. AZizọs aḅẹm mọ: “Oniin aphomoghiạn ghan nyoniin—kụ oomo awe oIegheriom mọ nyina kụ abumatuạn phọ amị ni.” (Jọn 13:34, 35) Ḍio arodon, Abugbaanhaạn AZihova rokelhọm ni muḅọph siẹn oomo aḅirinhi phọ. Dị ogbatanhaạn r’abueriphọ aruukụ iiḅereghị phọ, amuḅọph phọ ayira akpạr ri etigheri reelhe, iḍighinhom araraạr ḅilhẹ kẹn r’asidọl kirokirọ. Yira romiịn ghan ni reḍeenhaan egey ephomhoghiạn siphẹ otu ituughạ phọ ayira, rookpomhoghan eghir, ḅilhẹ r’arookpomhoghan eephugh. Kụ ephigh phọ ephẹn phọ ekparamhị okuphom owol phọ ayira, mọ eten iiseeny phọ ayira kụ ikạr eḅeraạn aZihova.

14. Odaphạn Kolosị 3:12-14, eghẹn eniin ekpanhạ eten kụ edị yira kotue oḍeenhaan ephomhoghiạn?

¹⁴ Igẹ Iigbia phọ ekpaariọm mọ “oniin aphamanạm ni ophomoghiạn oniin.” (1 Pit. 4:8) Eniin eten dị yira kotue oḍeenhaan ephomhoghiạn phọ ephẹn phọ, pọ osạr ghan owilhenhaạn oniin atum nyoniin kụ oḅilhẹ ophogh ghan ogunhọm e/munughan abunhọn. Yira oḅilhẹ kẹn ni rowạ ghan roopoogh onmo inmo r’olhọgh ghan otu buẹn odi bọ siẹn ookpomhoghan phọ, ghalhamọ r’budị upiomạn ni iyira. (Bạl Kolosị 3:12-14.) Odọ ephomhoghiạn phọ ephẹn phọ, kụ elhegh abugey aKristẹn.

15. Ighẹn inhọn odọ areten kụ edị yira rodaphạn ghan eten iiseeny aKristẹn oḅẹl okuron asiạ phọ?

¹⁵ Inhọn areten edi ni dị yira rodạph ghan  eten iiseeny aKristẹn oḅẹl okuron asiạ phọ. Esi omaạm, eten phọ epẹ romạ ghan bọ bupoghom eghir, ikumor awe, r’abuẹn rologhonhaạn ghan bọ ḍighaạgh ikumor awe phọ—eeghironhaan ipẹ abutelhedom mọ oḍighi ghan bọ siphẹ oḅẹl okuron asiạ phọ. (Fil. 1:1; Taitọs 1:5) Ipẹ yira osighẹ bọ pinien r’orolạn esi r’iḅaạl, ḅilhẹ r’aḍiḅeraạn phọ yira omhoọgh bọ oghoph ookpomhoghan phọ esi abuḍighinhom ikarạph dị u/meera ukiton, edaphạn aani ipẹ aKristẹn oḅẹl okuron asiạ phọ oḍighi ghan bọ.—Iiḍighi 15:28, 29; 1 Kọr. 5:11-13; 6:9, 10; Hib. 13:4.

16. Yira otuughạ eeghe esi ikpo onhụ phọ edi bọ Efesọs 4:4-6?

¹⁶ AZizọs aḅẹm ni mọ ibadị kokophora ni mọ abunọ abumatuạn onọ, kuolọ mọ k/oomo abidị kụ abugey. (Mat. 7:21-23) Igẹ Iigbia phọ kẹn epụr rurụ mọ siḍio eekunha phọ, ibadị “kopu ni oḍeenaan mọ abunọ omeeraam Enaạn.” (2 Tim. 3:1, 5) Kuolọ aBaibul phọ akaạph ni aagholhomhi mọ, “oniin omeeraam” kụ edị Enhaạn resighẹ ghan.—Bạl Efesọs 4:4-6.

17. Abuọ anhiạn ḍio arodon kụ rodạph ghan Zizọs koḅilhẹ ooḅereghị r’oniin omheeraam?

¹⁷ Abuọ anhiạn kụ umhoọgh oniin omheeraam ḍio arodon? Yira mooḅeghiọn omiịn reḍeenhaan phọ. Yira mokiririom ni opogh eten iiseeny phọ aZizọs aphighi bọ ḅilhẹ r’ipẹ aKristẹn oḅẹl okuron asiạ phọ odaphạn bọ. Ophagharanhaạn phọ pọ—Abugbaanhaạn AZihova. P’eeghe idị eḍighi iyaạr eghuan oḍighi aani oniin onyọ Ogbaanhaạn AZihova ḅilhẹ r’olhegheri igey phọ ilọ aZihova r’arigbiom mọ odị! Olhom ogheelhom igey phọ iphẹn phọ r’okuphom owol dị akpạr.