NÍ KASEMI 42
Mo Ná Nɔ Mi Mami Kaa O Na Anɔkuale ɔ
“Nyɛ ná níhi tsuo a nɔ mi mami; nyɛɛ pɛtɛ nɔ́ nɛ hi he wawɛɛ.”—1 TƐS. 5:21.
LA 142 Ha Waa Pɛtɛ Wa Hɛ Kɛ Nɔ Fɔmi ɔ He Wawɛɛ
NƆ́ NƐ WA MAA KASE *
1. Mɛni he je nɛ nihi fuu a juɛmi gbɛ ɔ?
MWƆNƐ Ɔ, jamihi babauu ngɛ nɛ a tsɛɛ a he ke Kristofohi, nɛ a tsɔɔ kaa a ngɛ Mawu jae ngɛ blɔ nɛ da nɔ. Enɛ ɔ he je nɛ nihi fuu a juɛmi gbɛ ɔ nɛ! A biɔ ke, “Anɛ anɔkuale jami kake pɛ lɛ ngɛ, aloo jamihi tsuo sa Mawu hɛ mi?” Anɛ wɔ nɛ wa ji Yehowa Odasefohi ɔ ngɛ nɔ mi mami kaa wa tsɔɔ nihi anɔkuale ɔ, nɛ blɔ nɛ wa guɔ nɔ kɛ sɔmɔɔ Yehowa a ji blɔ nɛ sa e hɛ mi lo? Anɛ wa ma nyɛ ma ná jamɛ a nɔ mi mami ɔ lo? Nyɛ ha nɛ waa hyɛ.
2. Ngɛ 1 Tɛsalonika Bi 1:5 ɔ nya a, mɛni he je nɛ bɔfo Paulo ná nɔ mi mami kaa e na anɔkuale ɔ?
2 Bɔfo Paulo ná nɔ mi mami nɛ mi wa kaa e na anɔkuale ɔ. (Kane 1 Tɛsalonika Bi 1:5.) Anɔkuale ɔ nɛ e na a ha nɛ e bua jɔ. Se pi bua jɔmi ɔ nɛ e ná a nɛ ha nɛ e ná nɔ mi mami kaa e na anɔkuale ɔ. Mohu ɔ, e kase Mawu Munyu ɔ saminya. E he ye kaa “Ngmami ɔ tsuo je Mawu mumi mi.” (2 Tim. 3:16) Mɛni nɛ e kase ngɛ Ngmami ɔ mi? Paulo na odase nɛ tsɔɔ heii kaa Yesu ji Mesia a nɛ a wo e he si ɔ ngɛ Ngmami ɔ mi, se Yuda jami hɛ mi nyɛɛli ɔmɛ ma a hɛ kɛ fɔ odase nɛ ɔ nɔ. Jamɛ a osatotsɛmɛ nɛ ɔmɛ tsɔɔ kaa a ngɛ nihi Mawu he anɔkuale ɔ tsɔɔe, se a peeɔ níhi nɛ Mawu sume. (Tito 1:16) A hyɛɛ Ngmami ɔ mi nɛ a hlaa níhi nɛ a suɔ nɛ a he ye kɛ níhi nɛ a sume nɛ a he ye. Se Paulo be kaa jamɛ a nyumu ɔmɛ. E pee klaalo kaa e maa tsɔɔ nihi “Mawu ga womi ɔmɛ tsuo,” nɛ́ lɛ nitsɛ hu e kɛ tsu ní.—Níts. 20:27.
3. Anɛ e sa nɛ wa ná hetohi kɛ ha sane bimihi tsuo loko wa ná nɔ mi mami kaa wa na anɔkuale ɔ lo? (Hyɛ daka nɛ ji “ Yehowa Ní Tsumihi Kɛ E Susumihi ‘Hiɛ Babauu Tsɔ Pe Bɔ Nɛ Ma Nyɛ Ma De’” ɔ hulɔ.)
3 Ni komɛ susu kaa e sa nɛ nihi nɛ a ngɛ anɔkuale jami mi ɔ a nyɛ nɛ a ha sane bimi fɛɛ sane bimi heto, nɛ sane bimihi nɛ Baiblo ɔ tui he munyu po, e sa nɛ a nyɛ nɛ a ha heto. Anɛ e maa hi peemi jã lo? Mo susu Paulo nɔ hyɛmi nɔ́ ɔ he nɛ o hyɛ. E wo e nyɛmimɛ Kristofo ɔmɛ he wami kaa a “ná níhi tsuo a nɔ mi mami,” se e tsɔɔ kaa pi níhi tsuo nɛ e nu sisi. (1 Tɛs. 5:21) E de ke, “wa ngɛ nile fã kɛ fã,” nɛ e tsa nɔ ke, “wa naa níhi kusuu ngɛ dade ahuhuɛ mi.” (1 Kor. 13:9, 12) Paulo nui nɔ́ fɛɛ nɔ́ sisi, nɛ jã kɛ̃ nɛ wɔ hu wa nui nɔ́ fɛɛ nɔ́ sisi. Se Paulo le sisije tsɔɔmihi nɛ kɔɔ Yehowa he ɔ. E le níhi nɛ ma ha nɛ e ná nɔ mi mami kaa e na anɔkuale ɔ!
4. Kɛ wa maa pee kɛɛ kɛ ná nɔ mi mami wawɛɛ kaa wa na anɔkuale ɔ, nɛ mɛni wa maa kase kɛ kɔ anɔkuale Kristofohi a he?
4 Blɔ kake nɛ wa ma nyɛ maa gu nɔ kɛ ná nɔ mi mami kaa wa na anɔkuale ɔ ji kaa wa maa ngɔ blɔ nɛ Yesu gu nɔ kɛ ja Mawu ɔ kɛ to blɔ nɛ Yehowa Odasefohi guɔ nɔ kɛ jaa Mawu mwɔnɛ ɔ he. Ngɛ ní kasemi nɛ ɔ mi ɔ, wa maa na kaa anɔkuale Kristofohi (1) ja we amagahi, (2) buu Yehowa biɛ ɔ, (3) suɔ anɔkuale ɔ, kɛ (4) suɔ a sibi wawɛɛ.
WA JA WE AMAGAHI
5. Mɛni wa kase ngɛ Yesu he ngɛ blɔ nɛ sa nɛ e sa kaa waa gu nɔ kɛ ja Mawu ɔ he, nɛ mɛni blɔ nɔ waa kɛ níhi nɛ e tsɔɔ ɔ ma tsu ní?
5 Akɛnɛ Yesu suɔ Yehowa wawɛɛ he je ɔ, e sɔmɔ lɛ pɛ benɛ e ngɛ hiɔwe kɛ benɛ e ngɛ zugba a nɔ tsuo. (Luka 4:8) E tsɔɔ e kaseli ɔmɛ kaa a ja Yehowa pɛ. Yesu kɛ amagahi tsu we ní, nɛ e kaseli anɔkualetsɛmɛ ɔmɛ hu kɛ amagahi tsu we ní ngɛ a jami mi. Nɔ ko be nyɛe maa na Mawu, enɛ ɔ he ɔ, nɔ ko be nyɛe maa pee nɔ́ ko nɛ ngɛ kaa Mawu! (Yes. 46:5) Nɛ nihi nɛ ni komɛ buɔ mɛ kaa a ji ni klɔuklɔuhi nɛ a peeɔ a we amagahi nɛ a sɔleɔ kɛ haa mɛ ɔ hu nɛɛ? Ngɛ kita nyɔngma a nɔ́ nɛ ji enyɔ ɔ mi ɔ, Yehowa de ke: “Koo puɛ amaga, loo nɔ́ ko nɛ ngɛ kaa nɔ́ ko nɛ ngɛ hiɔwe, loo nɔ́ ko nɛ ngɛ zugba a nɔ . . . Ko kpla si ha mɛ.” (2 Mose 20:4, 5) Nihi nɛ a suɔ nɛ a sa Mawu hɛ mi ɔ le kaa Mawu sume nɛ wa ja amagahi.
6. Mɛni jami he nɔ hyɛmi nɔ́ nɛ Yehowa Odasefohi nyɛɛɔ se mwɔnɛ ɔ?
6 Nihi nɛ a kase yi nɔ sane he ní ɔ tsɔɔ kaa ngɛ bɔfo ɔmɛ a be ɔ mi ɔ, Kristofo ɔmɛ ja Mawu pɛ. Kaa nɔ hyɛmi nɔ́ ɔ, yi nɔ sane womi ko tsɔɔ kaa Kristofohi nɛ a hi si ngɛ kaseli ɔmɛ a be ɔ mi ɔ “be suɔe” nɛ a kɛ amagahi nɛ tsu ní ngɛ a jami mi. Mwɔnɛ ɔ, Yehowa Odasefohi nyɛɛɔ Kristofohi nɛ a hi si ngɛ kaseli ɔmɛ a be ɔ mi ɔ a nɔ hyɛmi nɔ́ ɔ se. Wa sɔɛle kɛ ha ni klɔuklɔuhi a we amagahi, loo bɔfohi. Wa sɔɛle kɛ ha Yesu po. Wa nga we aflangaa a loo wa pee we nɔ́ ko nɛ tsɔɔ kaa wa ngɛ ma nɔ yeli ɔmɛ sɔmɔe loo wa ngɛ mɛ jae. Ke a ngɛ wa nɔ nyɛe kaa mɛni po, wa pee klaalo kaa waa kɛ Yesu munyu nɛ nyɛɛ se nɛ ɔ ma tsu ní: “Yehowa o Mawu ɔ ji nɔ nɛ e sa kaa o ja.”—Mat. 4:10.
7. Mɛni slɔɔto lɛ ngɛ Yehowa Odasefohi kɛ jami kpahi a kpɛti?
7 Mwɔnɛ ɔ, nihi fuu suɔ nɛ a bu osɔfohi nɛ a he biɛ ɔ tue. A suɔ osɔfo nɛ ɔmɛ wawɛɛ, nɛ a jaa mɛ po. Nihi fuu yaa a sɔlemi ɔmɛ, a heɔ a womi ɔmɛ, nɛ a ngɔɔ sika fuu kɛ fĩɔ a se. Ni komɛ heɔ nɔ́ fɛɛ nɔ́ nɛ osɔfo ɔmɛ deɔ ɔ yeɔ. Nihi nɛ a yaa sɔlemi nɛ ɔmɛ ɔ, ke a na a we osɔfo ɔmɛ ɔ a bua jɔɔ wawɛɛ kaa nɔ́ nɛ a na Yesu po! Se nihi nɛ a sɔmɔɔ Mawu ngɛ blɔ nɛ da nɔ ɔ be osɔfohi. E ngɛ mi kaa wa buɔ nihi nɛ a ngɛ hɛ mi nyɛɛe ɔ mohu lɛɛ, se wa kplɛɛɔ Yesu tsɔɔmi ɔmɛ a nɔ. Yesu de ke: “Nyɛ tsuo ɔ, nyɛmimɛ ji nyɛ.” (Mat. 23:8-10) Wa ja we adesahi, osɔfohi jio, ma nɔ yeli jio. Nɛ wa fĩ we a ní peepee ɔmɛ loo níhi nɛ a kɛ ma a hɛ mi ɔ se. Waa kɛ wa he wui ma kudɔmi sanehi a mi nɛ waa kɛ je ɔ bɔɛ. Enɛ ɔ he ɔ, ngɛ nɔ́ fɛɛ nɔ́ mi ɔ, wa je ekpa ngɛ jamihi tsuo nɛ a tsɛɛ a he ke Kristofohi ɔ a he.—Yoh. 18:36.
WA NGƐ BU KƐ HA YEHOWA BIƐ Ɔ
Anɔkuale Kristofohi suɔ kaa a de ni kpahi Yehowa he ní (Hyɛ kuku 8-10) *
8. Kɛ wa pee kɛɛ kɛ le kaa Yehowa suɔ nɛ nɔ fɛɛ nɔ nɛ le e biɛ ɔ nɛ a wo e biɛ ɔ hɛ mi nyami ngɛ je ɔ mi tsuo?
8 Be ko ɔ, Yesu sɔle ke: “Tsaatsɛ, wo o biɛ ɔ hɛ mi nyami.” Yehowa nitsɛ ha jamɛ a sɔlemi ɔ heto kɛ gbi nɛ nya wa kɛ je hiɔwe, nɛ e wo si kaa e maa wo e biɛ ɔ hɛ mi nyami. (Yoh. 12:28) Ngɛ Yesu fiɛɛmi ní tsumi ɔ mi tsuo ɔ, e wo e Tsɛ ɔ biɛ ɔ hɛ mi nyami. (Yoh. 17:26) Lɔ ɔ he ɔ, anɔkuale Kristofohi le kaa e ji he blɔ ngua nɛ a ná kaa a kɛ Mawu biɛ ɔ ma tsu ní nɛ a ha nɛ nihi nɛ a le.
9. Mɛni nɛ Kristofohi nɛ a hi si ngɛ kaseli ɔmɛ a be ɔ mi ɔ pee kɛ tsɔɔ kaa a buu Mawu biɛ ɔ?
9 Benɛ a to Kristofohi asafo ɔ sisi ngɛ kaseli ɔmɛ a be ɔ mi ɔ se bɔɔ pɛ nɛ Yehowa “ngɔ e juɛmi kɛ ya je ma amɛ a nɔ, konɛ e ngɔ ni komɛ kɛ je a kpɛti kɛ ha e biɛ ɔ.” (Níts. 15:14) Kristofo nɛ ɔmɛ bua jɔ kaa a kɛ Mawu biɛ ɔ ma tsu ní, nɛ́ a ha nɛ ni kpahi nɛ a le. Bɔfo ɔmɛ kɛ kaseli ɔmɛ kɛ Mawu biɛ ɔ tsu ní ngɛ fiɛɛmi mi kɛ be nɛ a ngɛ Baiblo womi ɔmɛ ngmae ɔ. * Kɛ gu blɔ nɛ ɔ nɔ ɔ, a tsɔɔ kaa mɛ pɛ ji nihi nɛ a ha nɛ nihi le Mawu biɛ ɔ.—Níts. 2:14, 21.
10. Mɛni odase lɛ tsɔɔ kaa Yehowa Odasefohi nɛ a kɛ Yehowa biɛ ɔ tsuɔ ní?
10 Anɛ Yehowa Odasefohi ji nihi nɛ a kɛ Yehowa biɛ ɔ tsuɔ ní lo? Mo susu odasehi nɛ nyɛɛ se ɔ he nɛ o hyɛ. Mwɔnɛ ɔ, jami hɛ mi nyɛɛli fuu peeɔ nɔ́ fɛɛ nɔ́ nɛ a ma nyɛ konɛ nihi ko le kaa Mawu ngɛ biɛ nitsɛnitsɛ. A je Mawu biɛ ɔ ngɛ a Baiblo sisi tsɔɔmihi a mi, nɛ ngɛ jami ɔ ekomɛ a blɔ fa mi ɔ, a ha we nɛ nihi kɛ Mawu biɛ ɔ nɛ tsu ní. * Anɛ nɔ ko ma nyɛ maa je he atsinyɛ kaa Yehowa Odasefohi pɛ ji nihi nɛ a ngɛ bu nɛ sa kɛ ha Mawu biɛ ɔ lo? Wa ha nɛ nihi le Mawu biɛ ɔ wawɛɛ pe jami kpahi tsuo! Kɛ gu blɔ nɛ ɔ nɔ ɔ, wa ngɛ wa biɛ nɛ ji Yehowa Odasefohi ɔ nya ní tsue. (Yes. 43:10-12) Wa pee New World Translation of the Holy Scriptures ɔ ayɔ 240 kɛ se. Baiblo nɛ ɔ kɛ Yehowa biɛ tsu ní ngɛ hehi nɛ a je biɛ ɔ ngɛ Baiblo kpa amɛ a mi ɔ. Nɛ wa pee Baiblo kasemi níhi nɛ a kɛ Yehowa biɛ ɔ tsu ní ngɛ mi ngɛ gbihi 1,000 kɛ se mi!
WA SUƆ ANƆKUALE Ɔ
11. Mɛni nɛ Kristofohi nɛ a hi si ngɛ kaseli ɔmɛ a be ɔ mi ɔ pee kɛ tsɔɔ kaa a suɔ anɔkuale ɔ?
11 Yesu suɔ anɔkuale nɛ kɔɔ Mawu kɛ e yi mi tomihi a he ɔ. Bɔ nɛ Yesu ba e je mi ha a tsɔɔ kaa e le anɔkuale ɔ, nɛ e ha nɛ ni kpahi hu le. (Yoh. 18:37) Yesu se nyɛɛli anɔkualetsɛmɛ hu suɔ anɔkuale ɔ wawɛɛ. (Yoh. 4:23, 24) Ngɛ anɔkuale mi ɔ, bɔfo Petro tsɛ Kristofohi a hemi kɛ yemi ɔ kaa “anɔkuale blɔ ɔ.” (2 Pet. 2:2) Akɛnɛ Kristofohi nɛ a hi si ngɛ kaseli ɔmɛ a be ɔ mi ɔ suɔ anɔkuale ɔ he je ɔ, a kua tsɔɔmihi, kusumihi kɛ adesahi a susumihi nɛ kɛ anɔkuale ɔ kpa we gbi ɔ. (Kol. 2:8) Mwɔnɛ ɔ hu ɔ, anɔkuale Kristofohi bɔɔ mɔde nɛ a ‘nyɛɛɔ ngɛ anɔkuale ɔ nya’ kɛ gu a hemi kɛ yemi kɛ a ní peepee nɛ a kɛ daa Mawu Munyu ɔ nɔ ɔ nɔ.—3 Yoh. 3, 4.
12. Ke nihi nɛ a ngɛ hɛ mi nyɛɛe ɔ na kaa e he hia nɛ a pee tsakemi ngɛ bɔ nɛ a nu Baiblo tsɔɔmi ko sisi ha a he ɔ, mɛni a peeɔ, nɛ mɛni he je nɛ a peeɔ jã?
12 Mwɔnɛ ɔ, Mawu we bi de we ke a nu nɔ́ fɛɛ nɔ́ nɛ ngɛ Baiblo ɔ mi ɔ sisi saminya. Bɔ nɛ a tsɔɔ Baiblo tsɔɔmi komɛ a sisi ha, kɛ bɔ nɛ a to ní komɛ a he blɔ nya ha ngɛ asafo ɔ mi be komɛ ɔ dɛ. E sɛ nɛ enɛ ɔ nɛ pee wɔ nyakpɛ. Baiblo tsɔɔ heii kaa ke be ngɛ mi puee ɔ anɔkuale nile ɔ yaa hɛ mi. (Kol. 1:9, 10) Yehowa jeɔ anɔkuale ɔ kpo bɔɔbɔɔbɔɔ, nɛ e sa nɛ waa pee klaalo kaa wa maa to wa tsui si konɛ waa nu anɔkuale ɔ sisi bɔɔbɔɔbɔɔ. (Abɛ 4:18) Ke nihi nɛ a ngɛ hɛ mi nyɛɛe ɔ na kaa e biɔ nɛ a pee tsakemi ngɛ bɔ nɛ wa nu Baiblo tsɔɔmi ko sisi ha a he ɔ, a kɛ oya yemi peeɔ jã. Mwɔnɛ ɔ, jamihi fuu tsakeɔ a tsɔɔmi ɔmɛ akɛnɛ a suɔ nɛ a sa a jami mi bi ɔmɛ loo je ɔ hɛ mi ɔ he je. Se Yehowa Odasefohi lɛɛ a peeɔ tsakemihi akɛnɛ a suɔ nɛ a hɛ kɛ su Mawu he nɛ a sɔmɔ lɛ kaa bɔ nɛ Yesu sɔmɔ lɛ ɔ he je. (Yak. 4:4) Ke wa pee tsakemi ko ɔ, tsa pi je ɔ susumi nɛ tsake ɔ he je, se mohu ɔ, akɛnɛ wa ba nu Baiblo ɔ sisi saminya a he je. Wa suɔ anɔkuale ɔ!—1 Tɛs. 2:3, 4.
WA SUƆ WA SIBI WAWƐƐ
13. Mɛni ji su nɛ pe kulaa nɛ anɔkuale Kristofohi jeɔ kpo, nɛ kɛ Yehowa Odasefohi peeɔ kɛɛ kɛ jeɔ su nɛ ɔ kpo mwɔnɛ ɔ?
13 Kristofohi nɛ a hi si ngɛ kaseli ɔmɛ a be ɔ mi ɔ ngɛ su kpakpahi fuu, se su nɛ nihi kɛ le mɛ wawɛɛ ji suɔmi. Yesu de ke: “Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa nyɛ ji ye kaseli.” (Yoh. 13:34, 35) Mwɔnɛ ɔ, suɔmi kɛ kake peemi ngɛ Yehowa Odasefohi nɛ a ngɛ je kɛ wɛ ɔ a kpɛti. E ngɛ mi kaa wa je ma slɔɔtohi kɛ wɛtso munomunohi a mi mohu lɛɛ, se wa ngɛ kaa weku, enɛ ɔ ha nɛ wa je ekpa ngɛ jami kpa amɛ a he. Wa naa odase nɛ tsɔɔ kaa wa ngɛ suɔmi nitsɛnitsɛ ɔ ngɛ asafo mi kpehi, kpɔ mi kpehi kɛ kpokpa nɔ kpehi nɛ wa yaa a sisi. Odase nɛ ɔ woɔ wa hemi kɛ yemi ɔ mi he wami, nɛ e haa nɛ wa naa kaa blɔ nɔ nɛ wa guɔ kɛ jaa Yehowa a ji blɔ nɛ e kplɛɛ nɔ.
14. Ngɛ Kolose Bi 3:12-14 ɔ nya a, mɛni ji blɔ nɛ hi nɛ wa ma nyɛ maa gu nɔ kɛ tsɔɔ kaa wa suɔ wa sibi wawɛɛ?
14 Ngmami ɔ woɔ wɔ he wami kaa waa ‘suɔ wa sibi wawɛɛ nitsɛ.’ (1 Pet. 4:8) Blɔ kake nɛ wa guɔ nɔ kɛ peeɔ jã ji kaa waa kɛ wa sibi a tɔmihi keɔ mɛ, nɛ wa daa wa sibi a gbɔjɔmihi a nya. Jehanɛ hu ɔ, wa hlaa blɔhi a nɔ nɛ wa maa gu kɛ ke wa nyɛmimɛ nɛ waa kɛ mɛ ngɛ asafo ɔ mi ɔ ní faa, nɛ waa pee mɛ nubwɔ ke nɔ ko pee wɔ nɔdɔ nɔ́ ko po. (Kane Kolose Bi 3:12-14.) Ke wa jeɔ suɔmi nɛ ɔ kpo ɔ, lɔ ɔ tsɔɔ kaa wa ji anɔkuale Kristofohi.
“HEMI KƐ YEMI KAKE”
15. Ngɛ mɛni blɔhi a nɔ nɛ wa nyɛɛɔ Kristofohi nɛ a hi si ngɛ kaseli ɔmɛ a be ɔ mi ɔ a nɔ hyɛmi nɔ́ ɔ se?
15 Wa nyɛɔ blɔ nɛ Kristofohi nɛ a hi si ngɛ kaseli ɔmɛ a be ɔ mi ɔ gu nɔ kɛ ja Mawu ɔ se mwɔnɛ ɔ. Mwɔnɛ ɔ, a to asafo ɔ he blɔ nya kaa bɔ nɛ a pee ngɛ kaseli ɔmɛ a be ɔ mi ɔ. Kaa nɔ hyɛmi nɔ́ ɔ, wa ngɛ kpɔ mi nɔ hyɛli, asafo mi nikɔtɔmahi kɛ asafo mi sɔmɔli kaa bɔ nɛ e ji ngɛ jamɛ a be ɔ mi ɔ. (Filip. 1:1; Tito 1:5) Kaa bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ pee ɔ, wɔ hu wa buɔ Yehowa mlaa nɛ kɔɔ bɔmi nami kɛ gba si himi he ɔ, wa buɔ muɔ kaa e ngɛ klɔuklɔu, nɛ wa poɔ asafo ɔ he piɛ kɛ jeɔ nihi nɛ a sume kaa a kɛ Mawu mlaahi ma tsu ní a he.—Níts. 15:28, 29; 1 Kor. 5:11-13; 6:9, 10; Heb. 13:4.
16. Mɛni wa kaseɔ ngɛ Efeso Bi 4:4-6 mi?
16 Yesu tsɔɔ kaa nihi fuu ma de ke a ji e kaseli, se ngɛ anɔkuale mi ɔ, pi mɛ tsuo ji e kaseli niinɛ. (Mat. 7:21-23) Ngmami ɔ tsɔɔ hu kaa ngɛ nyagbe ligbi ɔmɛ a mi ɔ, a maa ‘na nihi fuu kaa Mawu jali’ kɛkɛ. (2 Tim. 3:1, 5) Se Baiblo ɔ de heii kaa “hemi kɛ yemi kake” nɛ Mawu kplɛɛ nɔ.—Kane Efeso Bi 4:4-6.
17. Mɛnɔmɛ nɛ a ngɛ Yesu nɔ hyɛmi nɔ́ ɔ se nyɛɛ nɛ a hɛɛ hemi kɛ yemi kake mwɔnɛ ɔ?
17 Mɛnɔmɛ nɛ a ngɛ hemi kɛ yemi kake mwɔnɛ ɔ? Wa sɛ hlami susu odase ɔmɛ a he. Wa ba na blɔ nɔ nɛ Yesu tsɔɔ kaa a gu kɛ ja Mawu, kɛ blɔ nɔ nɛ Kristofohi nɛ a hi si ngɛ kaseli ɔmɛ a be ɔ mi ɔ gu kɛ ja Mawu. Heto ɔ ji Yehowa Odasefohi. E ji he blɔ nɛ wa ná kaa wa ji Yehowa we bi, nɛ wa le anɔkuale nɛ kɔɔ Yehowa kɛ e yi mi tomihi a he! Nyɛ ha nɛ waa ya nɔ nɛ wa ná nɔ mi mami nɛ mi wa ngɛ anɔkuale ɔ mi, nɛ waa pɛtɛ he kpɛii.
LA 3 Yehowa Woɔ Wɔ He Wami, E Haa Wɔ Hɛ Nɔ Kami
^ kk. 5 Yesu pee bɔ nɛ e sa nɛ a ja Mawu ha ngɛ anɔkuale mi ɔ he nɔ hyɛmi nɔ́, nɛ e kaseli ɔmɛ nyɛɛ e nɔ hyɛmi nɔ́ ɔ se. Ngɛ ní kasemi nɛ ɔ mi ɔ, wa ma susu Yesu nɔ hyɛmi nɔ́ ɔ kɛ bɔ nɛ e kaseli ɔmɛ nyɛɛ se ha a he. Jehanɛ hu ɔ, wa maa na odase nɛ tsɔɔ kaa Yehowa Odasefohi ngɛ jamɛ a nɔ hyɛmi nɔ́ ɔ se nyɛɛe mwɔnɛ ɔ.
^ kk. 9 Hyɛ daka nɛ ji “Did the First Christians Use God’s Name?” nɛ je kpo ngɛ July 1, 2010 Blɛfo gbi Hwɔɔmi Mɔ ɔ ba fa 6 mi ɔ.
^ kk. 10 Kaa nɔ hyɛmi nɔ́ ɔ, ngɛ jeha 2008 ɔ mi ɔ, Pope Benedict XVI tsɔɔ kaa a kɛ Mawu biɛ ɔ “ko tsu ní” ngɛ Katoliki jami ɔ mi, a lahi a mi, loo ngɛ a sɔlemi mi.
^ kk. 63 FONI Ɔ MI TSƆƆMI: Yehowa asafo ɔ pee New World Translation ɔ ngɛ gbihi 200 kɛ se mi. Enɛ ɔ he ɔ, nihi ma nyɛ maa kane Baiblo nɛ Mawu biɛ ɔ ngɛ mi ɔ ngɛ mɛ nitsɛmɛ a je gbi mi.
