1. Vbọzẹ ne emwa nibun ma na rẹn ugamwẹ ne iran khian deba?

UGAMWẸ nibun ni tie egbe iran emwa iyayi vbe ẹdẹnẹrẹ, yayi wẹẹ iran ga Osanobua vbe odẹ nọ khẹke. Ẹi khabe ne emwa nibun ma na rẹn ugamwẹ ne iran khian deba! Iran ghi gha nọ wẹẹ, “Ugamwẹ ẹmwata gele rrọọ ra, ra ugamwẹ hia ẹre Osanobua kpasẹ yi?” Uwẹ gele yayi wẹẹ, Avbe Osẹe Jehova ẹre ọ maa emwa ẹmwata ra, kevbe wẹẹ, iran ọkpa ẹre ọ gele ga Osanobua vbe odẹ nọ khẹke ra? Ma gha gele sẹtin rẹn ẹmwata nọ rre ẹmwẹ na ra? Gia ziro yan emwi eso nọ gha ya ima rẹn ẹmwata nọ rrọọ.

2. Zẹvbe nọ rre ebe 1 Tẹsalonaika 1:​5, vbọ ya e Pọl rẹn wẹẹ, emwi hia ne irẹn yayi, ẹmwata ẹre nọ?

² Ukọ e Pọl wa rẹn wẹẹ, odẹ ẹmwata ẹre irẹn ghaa ye. (Tie 1 Tẹsalonaika 1:5.) Ẹi re te odẹ ẹmwata na wa gha yẹẹ ọre kẹkan, sokpan rhunmwuda ne ọ na gha gbe aro ke otọ tie Ebe Nọhuanrẹn, ẹre ọ zẹ ne ọ na yayi. Te ukọ e Pọl wa yayi wẹẹ, “Osanobua ọre ọ rhie ẹre ye iran ekhọe ighẹ emwa ni gbẹnnẹ avbe Ebe nii hia.” (2 Tim 3:16) De emwi eso ne ọ ruẹ re, zẹvbe ne ọ ya gha tie Ebe Nọhuanrẹn? Ọ keghi miẹn emwi eso nọ sẹ osẹ yọ wẹẹ, e Jesu ọre Mẹzaia na wẹẹ ọ dee. Avbe ọkaolotu ugamwẹ ọghe Ivbi e Ju miẹn osẹ na, sokpan iran keghi tilae rua. Iran kegha kha wẹẹ, iran ẹre ọ maa emwa ẹmwata vbekpa Osanobua, sokpan uyinmwẹ iran keghi rhie ẹre ma wẹẹ, emwa agabagebe ẹre iran khin. (Tai 1:16) E Pọl ghaa tie Ebe Nọhuanrẹn, ẹi hannọ emwi ne ọ gha yayi vbọ, ne ọ sẹ nikẹre rae, vbene avbe ọkaolotu ugamwẹ ghaa ru ẹre. Sokpan, ọ na wa mu egbe ne ọ ya rhie emwi hia ne ọ ruẹ re ye uyinmwẹ, erriọ ẹre ọ vbe ya gha maa emwa ọvbehe re.​—Iwinna 20:27.

3. Ọ khẹke ne ima rẹn ewanniẹn ọghe inọta hia, ma ke rẹn wẹẹ, odẹ ọghe ẹmwata ma ye ra? (Vbe ya ghee ẹkpẹti nọ khare wẹẹ “ Iwinna Ọghe Jehova ‘Bun Ẹsẹsẹmwẹse,’ Ma I Khian ‘Sẹtin Talọ Ehia.’”)

³ Emwa eso roro ẹre wẹẹ, ugamwẹ ẹmwata gha sẹtin rhie  ewanniẹn ye inọta nọ rhirhi gha khin, ọ gha khọnrẹn wẹẹ, ewanniẹn ọnrẹn i rre Baibol. Ọni gha sẹtin sunu ra? Emwi ne Pọl tae rhie ewanniẹn ye inọta na. Ọ tama etẹn ni ghaa rrọọ vbe ẹghẹ nii wẹẹ, “wa gha danmwẹ emwi hia ghe,” ọrheyerriọ, ọ na vbe kha wẹẹ, emwi nibun ye rrọọ ne irẹn ma rẹn. (1 Tẹs 5:21) E Pọl khare wẹẹ, “irẹnmwi ne a ya we mwa . . . ukhiọnmwẹ ukhiọnmwẹ ehia khin.” Ọ na vbe kha wẹẹ, te ima ghee emwi “vbirivbiri zẹvbe uwu ughegbe.” (1 Kọr 13:​9, 12) Ẹi re emwi hia ẹre Pọl rẹn otọ ẹre, erriọ ẹre ọ vbe ye ne ima vbe ẹdẹnẹrẹ. E Pọl ma wa rẹn emwi hia vbekpa e Jehova. Sokpan emwi ne ọ rẹnrẹn sẹ nọ gha yae yayi wẹẹ, odẹ ẹmwata ẹre irẹn ye!

4. De emwi ne ima gha ru, nọ gha ya ima yayi wẹẹ, odẹ ọghe ẹmwata ma gele ye? De emwi eso ne ima khian ziro yan vbe ako iruẹmwi na?

⁴ Emwi nọ gha gele ya ima yayi wẹẹ, odẹ ọghe ẹmwata ẹre ima ye, ọre deghẹ ima na ya odẹ ne Jesu ya gha ga Osanobua vbe ọ rre agbọn na, gie vbene Avbe Osẹe Jehova ya ga Osanobua vbe ẹdẹnẹrẹ. Vbe ako iruẹmwi na, ma gha bẹghe ẹre wẹẹ, Ivbiotu e Kristi (1) i ga ẹbọ, (2) iran ya aro nọ ghaan ghee eni e Jehova, (3) ẹmwata ne a maa iran re yẹẹ iran, kevbe wẹẹ (4) ekhọe hia ẹre iran ya hoẹmwẹ egbe.

5. De emwi ne Jesu maa ima re vbekpa odẹ nọ khẹke ne ima ya ga Osanobua? De vbene ima khian ya lele emwi ne ọ maa ima re hẹ?

⁵ Vbe Jesu rre ẹrinmwi, e Jehova ọkpa ẹre ọ ghaa ga, erriọ ẹre ọ vbe ru ẹre vbe ọ sẹ agbọn na, rhunmwuda, ekhọe hia ẹre ọ ya hoẹmwẹ e Jehova. (Luk 4:8) Ọ vbe maa erhuanegbe ẹre wẹẹ, ne iran ghẹ ga ọmwa ọvbehe vbọ gberra e Jehova. Ẹghẹ ọkpa i rrọọ ne Jesu vbe erhuanegbe ẹre ya loo amazẹ ya ga e Jehova. Ugbẹnvbe a miẹn wẹẹ, ọmwa rhọkpa ma he ka bẹghe Osanobua, emwi rhọkpa i rrọọ ne a khian ma, nọ gha khọ Osanobua. (Aiz 46:5)  Sokpan, ọ gha gia na loo amazẹ ọghe emwa ne emwa ọvbehe ghee zẹvbe emwa ni huanrẹn (ra “saints”) vbe ugamwẹ ọghe ima ra? Ma gha vbe sẹtin na erhunmwu gie iran ra? Vbe uhi ne Jehova gbe ne Ivbi Izrẹl, ọ keghi tama iran wẹẹ: ‘Ghẹ ka ukhurhẹ ne egbe ruẹ ra ama emwi ne a yi ni rre ẹrinmwi ra ne ọ rre uwu amẹ . . . Ghẹ ya uhunmwu rhanmwẹ otọ ne iran.’ (Ẹks 20:​4, 5) Emwa ni ghaa hoo ne iran ya ẹko rhiẹnrhiẹn e Jehova, wa rẹn emwi na ya uhi na kha.

6. Vbọ gha de ọghe ugamwẹ, de igiemwi ne Avbe Osẹe Jehova lele vbe ẹdẹnẹrẹ?

⁶ Avbe ọtokha khare wẹẹ, Osanobua ọkpa ẹre Ivbiotu e Kristi ni ghaa rrọọ vbe ẹghẹ ọghe avbe ukọ ghaa ga. Vbe igiemwi, ebe na tie ẹre History of the Christian Church khare wẹẹ, te amazẹ na loo vbe ugamwẹ, wa gha “sọnnọ” Ivbiotu e Kristi ni ghaa rrọọ vbe ẹghẹ nii. Ukpowẹ ne Ivbiotu e Kristi vbe ẹghẹ nii rhie ye otọ, ẹre Avbe Osẹe Jehova vbe lele vbe ẹdẹnẹrẹ. Ma i na erhunmwu gie amazẹ ọghe emwa ne emwa ọvbehe ghee zẹvbe emwa ni huanrẹn, ma i na erhunmwu gie avbe odibosa, ma i vbe na erhunmwu gie Jesu. Ma i tuẹ afiala, ma i vbe rhie ugamwẹ nọ khẹke Osanobua ne avbe arriọba. E Jesu wẹẹ: “Osanobua ruẹ ọkpa wẹ gha gaa.” Ma mu egbe ne ima ya rhie owẹ lele emwi ne Jesu tae na, eke nọ gha de gbe, wẹẹ ẹre de gbe.​—Mat 4:10.

7. De emwi nọ ya Avbe Osẹe Jehova lughaẹn ne ugamwẹ nikẹre?

⁷ Vbe ẹdẹnẹrẹ, ọkaolotu ugamwẹ ne emwa họn okhekhe ẹre, ẹre emwa wa hoo ne iran gha kpee lele. Emwa gha ghi zẹ kpee lele iran, ọ ghi do yevbe na miẹn wẹẹ, te iran ghi ga iran. Te emwa wa bii la esọsi iran, iran ghi gha dẹlẹ ebe ọghe iran, erriọ iran vbe ya zẹ igho nọkhua ya ye ugamwẹ ọghe iran ike. Emwi ke emwi ne avbe ọkaolotu ugamwẹ na tae, ẹre eso ya ru emwi. Vbene iran gha ya kpee lele Jesu vbe iran gha miẹn ọnrẹn, erriọ iran vbe ru lele avbe ọkaolotu ugamwẹ na! Sokpan nọ ne emwa ni ga e Jehova, iran i mwẹ ọkaolotu ugamwẹ. Agharhemiẹn wẹẹ, ima rhie ọghọ ne emwa ni mu asanikaro vbe ugamwẹ ọghe ima, ima ma mianmian ẹmwẹ ne Jesu tae, ne ọ na wẹẹ: “Etẹn ọkpa wa hia khin.” (Mat 23:​8-10) Ma i ga ọmwa rhọkpa, ọre ọkaolotu ugamwẹ nọ, ra ọmwa ne ọ rre ukpo ọdakha. Ma i vbe ye iran ike. Nọghayayerriọ, ma keghi rre idiaghe. Ọna ẹre ọ ya ima lughaẹn ne emwa ni tie egbe iran emwa iyayi.​—Jọn 18:36.

8. De vbene ima ya rẹn hẹ wẹẹ, e Jehova hoo na rhie uyi ye eni ẹnrẹn, kevbe na vbe yae wewe?

⁸ Ọ mwẹ asẹ ọkpa ne Jesu ya gha na erhunmwu, ọ na wẹẹ: “Evbavba, rhie uyi ne eni ruẹn!” E Jehova keghi ya urhu nọ lae gie Jesu rẹn wẹẹ, irẹn gha gele rhie uyi ye eni ẹnrẹn. (Jọn 12:28) Vbe ẹghẹ ne Jesu na gha rre agbọn na, te ọ wa gha ru emwi nọ gha rhie uyi ye eni Osanobua. (Jọn 17:26) Rhunmwuda ọni, ọ gha gia na kha wẹẹ, ukpamuyọmọ nọ, ne Ivbiotu e Kristi na loo eni Osanobua, kevbe ne iran yae wewe.

9. De vbene Ivbiotu e Kristi ni ghaa rrọọ vbe ẹghẹ ọghe avbe ukọ, ya rhie ẹre ma wẹẹ, iran ya aro nọ ghaan ghee eni Osanobua?

⁹ Vbe ẹghẹ ne a na da mu iko ọghe Ivbiotu e Kristi gbọọ, e Jehova keghi kie ẹkpotọ ne emwa ni rre agbẹnvbo ughughan, ne iran do gha re emwa ni ya eni ẹnrẹn wan egbe. (Iwinna 15:14) Te Ivbiotu e Kristi ni ghaa rrọọ vbe ẹghẹ nii wa gha ya eni Osanobua hio, erriọ ẹre iran vbe ya gha ya eni nii wewe. Iran wa gha loo eni ọghe Osanobua vbe iran kporhu, erriọ ẹre iran vbe loo ẹre vbe ebe ughughan ne iran gbẹn gie etẹn. * Te iran wa gele rhie ẹre ma wẹẹ, emwa ni ya eni Osanobua wan egbe ẹre iran khin.​—Iwinna 2:​14, 21.

10. De osẹ nọ rhie ẹre ma wẹẹ, Avbe Osẹe Jehova ọkpa, ẹre ọ ya eni Osanobua wan egbe?

 ¹⁰ Emwa ni ya eni Osanobua wan egbe ẹre Avbe Osẹe Jehova khin ra? Gia ghee ẹre ghee. Vbe ẹdẹnẹrẹ, avbe ọkaolotu ugamwẹ nibun, keghi hia vbe odẹ ke odẹ, ne iran ya emwa gha roro ẹre wẹẹ, Osanobua i mwẹ eni. Ọni ẹre ọ si ẹre, ne iran na rhie eni Osanobua hin e Baibol nibun ne iran zedu ẹre rre. Eso kue vbe khama emwa ni rre ugamwẹ iran, ne iran ghẹ ghi loo eni nii vbe esọsi iran. * Vbe nai na gbe awawẹ, Avbe Osẹe Jehova ọkpa ẹre ọ rhie uyi nọ khẹke ye eni Osanobua. Te a wa rẹn ima ye emwa ni ya eni Osanobua wewe vbe otagbọn hia! Ọni ẹre ọ si ẹre ne ima na ru emwi, nọ gha ya emwa rẹn wẹẹ, ọsosẹ ọghe Jehova ẹre ima gele khin! (Aiz 43:​10-12) E New World Translation of the Holy Scriptures ne ima he print ladian, gberra ẹbo 240; vbe Baibol na, u gha wa miẹn eni e Osanobua ighẹ Jehova vbe eke nọ khẹke nọ gha ye. Urhuẹvbo na he zedu ebe ima ghee, kẹ kevbe avbe vidio, ihuan kevbe avbe ikueta na ya ehọ viọ, ne a na loo eni Osanobua, gberra 1,000!

11. De vbene Ivbiotu e Kristi ni ghaa rrọọ vbe ẹghẹ nẹdẹ, ya rhie ẹre ma wẹẹ, ẹmwata ni rre Ẹmwẹ Ọghe Osanobua yẹẹ iran?

¹¹ Te ẹmwata ne Jesu ruẹ re vbekpa Osanobua kevbe emwi hia ne Osanobua wẹẹ irẹn gha ru, wa gha yẹẹ ọre. Odẹ ne Jesu ya gha ru emwi, rhie ẹre ma wẹẹ, ọ ya nene ẹmwata yi, ọ na vbe gha maa emwa ọvbehe re. (Jọn 18:37) Te ẹmwata na wa vbe gha yẹẹ erhuanegbe  Jesu. (Jọn 4:​23, 24) Uko ighẹ Pita ghi guan kaan ugamwẹ ọghe Ivbiotu e Kristi, ọ na tie ẹre “Odẹ ẹmwata.” (2 Pit 2:2) Rhunmwuda ne ẹmwata na, na gha yẹẹ Ivbiotu e Kristi vbe ẹghẹ nii, iran ma danmwehọ imamwaemwi ohoghe ne avbe ọkaolotu ugamwẹ ghaa maa emwa re, iran ma gha lele erhavbavbotọ ni ma gua Ebe Nọhuanrẹn ro, iran ma vbe gha ya ẹwaẹn obọ iran ru emwi. (Kọl 2:8) Vbe ẹdẹnẹrẹ, Ivbiotu e Kristi wa vbe hia ne iran gha “lele ẹmwẹ ẹmwata.” Odẹ ne iran ya ru ọna, ọre ne iran na hia, ne iran gha ya ẹmwẹ Osanobua ru emwi.​—3 Jọn 3, 4.

12. De emwi ne Ẹbu Nọ Su ru vbe iran gha bẹghe ẹre wẹẹ, ọ khẹke na ru afiwerriẹ eso? Vbọzẹ ne iran na ru egbe afiwerriẹ vberriọ?

¹² Emwa ọghe Osanobua ni rrọọ vbe ẹdẹnẹrẹ i kha wẹẹ, iran rẹn emwi hia ni rre Baibol. Ugbẹnso, ma sẹtin bae ku, odẹ ne ima ya rhan otọ ako ọghe Evbagbẹn Nọhuanrẹn eso, ra vbene ima ya ru emwi eso vbe uwu iko. Ọ ma khẹke nọ kpa ima odin hiehie, rhunmwuda, egbe emwi vberriọ sẹtin sunu. Ebe Nọhuanrẹn gi ima rẹn wẹẹ, ẹi re uhukpa ma khian ya sẹtin rẹn otọ ẹmwata ni rre Ẹmwẹ Ọghe Osanobua, sokpan kherhe kherhe ẹre nọ. (Kọl 1:​9, 10) Ọkade ọkade ẹre Jehova ya vẹẹ ọre rua ighẹ ẹmwata nọ rre Ẹmwẹ Ọghẹe, rhunmwuda ọni, te ima gha zin egbe. (Itan 4:18) Ẹbu Nọ Su gha bẹghe ẹre wẹẹ, ọ khẹke na ru afiwerriẹ ye odẹ eso ne ima ya ru emwi, ra odẹ ne ima ya rẹn otọ ako Evbagbẹn Nọhuanrẹn eso, iran ghi wa ru ẹre vbobọvbobọ. Vbe ẹdẹnẹrẹ, ugamwẹ nibun gha khian ru afiwerriẹ ye odẹ ne iran ya ru emwi vbe ugamwẹ ọghe iran, iran ghi ru ẹre vbe odẹ nọ gha yẹẹ emwa ni rre esọsi iran, kevbe nọ gha ya emwa gha họn okhekhe iran. Nọ ne Ivbiotu e Kristi ọghe ata, afiwerriẹ ne iran ru, keghi re nọ gha ya iran sikẹ Osanobua sayọ, kevbe nọ gha gua ẹre ro ighẹ odẹ ne Jesu ya gha ga Osanobua. (Jems 4:4) Ẹi re rhunmwuda emwa nagbọn ẹre ima na ru afiwerriẹ ne ima rhirhi ru, sokpan rhunmwuda ne ima na rẹn otọ Evbagbẹn Nọhuanrẹn sayọ. Vbene ẹmwata, ẹmwata ne ima ruẹ wa yẹẹ ima!​—1 Tẹs 2:​3, 4. 

13. De akpa nọ ghi ru ekpataki sẹ ne Ivbiotu e Kristi mwẹ? De vbene Avbe Osẹe Jehova ya rhie akpa na ma hẹ?

¹³ Te a wa rẹn Ivbiotu e Kristi ni ghaa rrọọ vbe ẹghẹ nẹdẹ, ye emwa ni mwẹ akpa esiesi nibun, sokpan akpa na wa mobọ rẹn iran ginna ọre ahoẹmwọmwa. E Jesu khare wẹẹ: “Adeghẹ uwa hoẹmwẹ egbe, ọre emwa hia gha na rẹn wẹẹ erhuanegbe mwẹ ọre uwa khin.” (Jọn 13:​34, 35) Vbe ẹdẹnẹrẹ, te Avbe Osẹe Jehova wa vbe hoẹmwẹ egbe, erriọ ẹre iran vbe ya mwẹ akugbe. Te ima wa lughaẹn ne ugamwẹ nikẹre, rhunmwuda, te ima ru emwi kugbe zẹvbe ẹgbẹe ọkpa, agharhemiẹn wẹẹ otọ ẹvbo ughughan ma ke rre. Ma wa rhie ahoẹmwọmwa na ma, vbe ima ghaa rre iko, asikoko nekherhe, kevbe asikoko nọkhua. Ọna ẹre ọ ya ima gele rẹn wẹẹ, ugamwẹ ne Jehova kpasẹ yi, ẹre ima ye.

14. Zẹvbe nọ rre ebe Kọlose 3:​12-14, de odẹ ne ima khian ya rhie ẹre ma wẹẹ, ma ya ekhọe hia hoẹmwẹ egbe?

¹⁴ E Baibol wẹẹ ne ima “gha ya ẹko ata hoẹmwẹ egbe.” (1 Pit 4:8) Odẹ ọkpa ne ima khian ya rhie ẹre ma wẹẹ, ma mwẹ ahoẹmwọmwa vbenian, ọre ne ima gha ya ekhọe hia yabọ egbe. Ma ghi gha hia ne ima gha zẹ emwi obọ ne emwa hia, ya sẹ egbe emwa ni ru emwi nọ sọnnọ ima, ma ghi vbe hia ne ima gha mu ọghọ ye iran egbe. (Tie Kọlose 3:​12-14.) Ma ghaa rhie egbe ahoẹmwọmwa na ma, te ima rhie ẹre ma wẹẹ, ma ẹre ọ gele re Ivbiotu e Kristi ọghe ata.

15. De odẹ ọvbehe ne ima ya lele igiemwi ne Ivbiotu e Kristi ni ghaa rrọọ vbe ẹghẹ ọghe avbe ukọ rhie ye otọ?

¹⁵ Odẹ ọvbehe nibun ye rrọọ ne ima ya lele  igiemwi ne Ivbiotu e Kristi ni ghaa rrọọ vbe ẹghẹ nii rhie ye otọ. Vbe igiemwi, iran ghaa mwẹ etẹn ni mu otuẹ yo iko ughughan, ediọn kevbe eguọmwadia iwinna; erriọ ẹre ọ vbe ye vbe ẹdẹnẹrẹ. (Fil 1:1; Tai 1:5) Ma keghi lele uhi ọghe Osanobua nọ dekaan emwi ọdọ vbe amwẹ, orọnmwẹ kevbe esagiẹn; ma vbe kan ọmwa orukhọ nọ ma fi werriẹ fua vbe uwu iko, zẹvbe ne etẹn ni ghaa rrọọ vbe ẹghẹ nẹdẹ vbe gha ru ẹre.​—Iwinna 15:​28, 29; 1 Kọr 5:​11-13; 6:​9, 10; Hib 13:4.

16. De emwi ne ima miẹn ruẹ vbe emwi nọ rre ebe Ẹfisọs 4:​4-6?

¹⁶ E Jesu khare wẹẹ, emwa nibun gha tie egbe iran erhuanegbe irẹn, sokpan emwa agabagebe ẹre iran khin. (Mat 7:​21-23) E Baibol vbe tae ye otọ wẹẹ, vbe ẹghẹ okiekie ẹdẹ, te emwa nibun khian gha ru vbene a miẹn wẹẹ, Osanobua ẹre iran ga. (2 Tim 3:​1, 5) Ọrheyerriọ, e Baibol tama ima wẹẹ, “iyayi ọkpa” ẹre Osanobua kpasẹ yi.​—Tie Ẹfisọs 4:​4-6.

17. De emwa ni lele ukpowẹ ọghe Jesu vbe ẹdẹnẹrẹ, ni vbe ga Osanobua vbe odẹ nọ khẹke?

¹⁷ De emwa ni ga Osanobua vbe odẹ nọ khẹke vbe ẹdẹnẹrẹ? Ma ziro yan emwi nibun nẹ, nọ ya ima rẹn ẹmwata nọ rrọọ. Ma guan kaan igiemwi ne Jesu rhie ye otọ, vbe nọ dekaan odẹ nọ khẹke na ya gha ga Osanobua, kevbe odẹ ne Ivbiotu e Kristi ni ghaa rrọọ vbe ẹghẹ nii ya gae. Vbe nai na gbe awawẹ, Avbe Osẹe Jehova ọkpa ẹre ọ ga e Jehova vbe odẹ nọ khẹke vbe ẹdẹnẹrẹ. Ukpamuyọmọ nọkhua ẹre nọ, ne ima na re ọsosẹ ọghe Jehova kevbe ne ima na rẹn ẹmwata vbekpa ẹre kevbe emwamwa ọghẹe! Nọnaghiyerriọ, gi ima mudia gbain vbe odẹ ọghe ẹmwata ne ima ye na.