1. Ka uagu añahein lubéi saragu gürigia yuriguaañu haña?

ARIÑAWAGÚATI anuhein lan saragu milu dúsenu relihión to ariñaguboun kristiánu tan ani ariñaga hagía háhuduraguña lan lun Bungiu kei le aubei labusenra. Ligía yuriguañu haña lubéi gürigia ani aba hálügüdagun houngua: “Anuhein san aban relihión to inarünitu, o ánhati Bungiu tun sun relihión?”. Agia wagía? Chouru wamuti san buidu, wagía lan gefentiña luagu Heowá arufudaha wamani inarüni ani ligaburi lan wáhuduragun lun Bungiu uguñe weyu ligía lan unbei lánhara? Le san linarün gayara lan wachoururuni? Ariha waméi le arufudubalin ítara liña lan.

2. Ka uagu chouru lubalin apostolu Pábulu inarüni lan le lafiñerubei? (1 Tesalónikana 1:5).

² Chouru lumuti meha apostolu Pábulu buidu buidu inarüni lan le lafiñerubei (aliiha huméi 1 Tesalónikana 1:5). Ichouruni ligía, mama aban katei ítaraguarügüti. Lachoururunbalin ladüga laturiahanu Lererun Bungiu buidu buidu. Afiñeti meha luagu “sun le bürüwañubei tidan Lererun Bungiu, ani Bungiu guánarügü “íchugubalin haritaguarügü wügüriña lun habürüdüni” (2 Tim. 3:16). Lau laliihanu Pábulu dariti ichouruni le siñati lasigenerúniwa Hesusu lan Mesíasibei le füramasewabei. Gama lumoun, himei hamagili meha huríu ha alidihabarun relihión hachubaraguni ichouruni le. Ariñagatiña biangua tigibu hagía layusuruñanu lan Bungiu, gama lumoun arufuda lumuti le hadügübei mítaran lan (Titu 1:16). Ánheinti Pábulu manuwadahanti kaba lan fánreinti tidan Lererun Bungiu lunbei lafiñerun luagu o kaba lan lunbei mafiñeruniwa lan luagu. Aranseñu liña meha lun larufudahan luma lun ladügüni “sun laransehan Bungiu” (Adü. 20:27).

3. Lun wachoururuni anihein lan inarüni wama, mégeitiwa san wasubudiruni óunabagülei lun sun álügüdahani le wadügübei? (Ariha waméi rekuáduru “ Wéiriti lisaminan ani gíbeti le adüga laalibei Heowá siñá wamuti abahüda”).

 ³ Añahein ariñagutiña lunti lan yebe tóunabuni relihión inarünitu sun álügüdahani, íbini le móunabunbei tau Bíbülia. Buiti funa san lagurabúniwa lira? Ariha waméi lani Pábulu hénpulu. Inarüni ariñaga lan houn kristiánugu “Hóuchagua huméi sun arufudahani” ani subudi lumuti giñe anihein lan saragu katei le úati gunfuranda lani (1 Tesa. 5:21). Ariñagati: “Ladüga masubudintiwa sunsuinagubei” “ani le warihibei guentó; warihini kamá hamuga burí katei le burúati larihín tidan aban isubusei” (1 Ko. 13:9, 12). Mama meha sun katei subudi lumuti Pábulu, ítara waña giñe. Gama lumoun gunfuranda lumuti meha ka lan lisuunibei Heowá, gíbeti meha lisubudin ligía chouru lubalin anihein lan inarüni luma.

4. Ida luba wederebudagüdüni ichouruni le wawagubei luagu darí wamá lan inarüni, ani kaba wariha lidan aturiahani le?

⁴ Ida luba wederebudagüdüni ichouruni le wawagubei luagu darí wamá lan inarüni? Aban igaburi lun wadügüni lau wagoubaguagüdüni ligaburi láhudurawagun lun Bungiu le meha larufudahabei Hesusu lumoun ligaburi háhuduragun gefentiña luagu Heowá uguñe weyu. Lidan aturiahani le warihibei 1) maha hamá kristiánugu inarünitiña lun áhuduraguni houn guáriua, 2) inebeti lan liri Heowá houn, 3) hínsiñeti lan inarüni houn luma 4) sandí hamá aban lanarime ínsiñeni hámagua.

5. Ka hénpulu líchugubei Hesusu luáguti láhudurawagun lun Bungiu, ani ida luba wafalaruni?

⁵ Kei hínsiñe lubéi Heowá lun Hesusu saragu, lúnrügüñein láhuduragua, dandu dan le meha sielu lubéi luma dan le ya lubéi Ubouagu (Luk. 4:8). Ani arufudaha lumuti houn lani disipulugu lun hadügüni ligiaméme. Ni Hesusu ni  lánigu disipulu mayusutiña meha guáriua lidan háhuduragun lun Bungiu. Aban sífiri Bungiu, ligíati, úati ni kata le ladüga wügüri lun wayusuruni lun wayarafadun lun luéirigun Bungiu le móunbabei (Isa. 46:5). Kaba wariñaga luagu hadügǘn guáriua ha únbaña hagúahan sandu? Lunti san warisarun houn? Le libiama lídangiñe Diisi Gumadi, ariñagati Heowá ñein: “Madügabá guáriua ni liyawa ni kata le yágütati sielu, ni le ubouaguti, ni le baranahati lábugiñe múa. Mabuluchaguabá hagibugiñe, máhuduraguaba giñe houn” (Afu. 20:4, 5). Houn ha busenbaña háhuduragun lun Bungiu, inarüniti dimurei le.

6. Ka hénpulu hafalarunbei gefentiña luagu Heowá uguñe weyu?

⁶ Subudi hamuti meha ha abürühabaña luagu binadu sügǘ, kristiánugu lan ha lídanbaña furumiñeti sígulu lúnrügüñein meha Bungiu háhuduragua. Ariñagatu aban líburu hawagu furumiñetiña kristiánugu “halouchuña hamuga” láurügü lasaminarúniwa hafidirun guáriua lidan fulasu le ñein lubéi háhuduragua lun Bungiu (History of the Christian Church). Uguñe weyu falá hamutiña gefentiña luagu Heowá kristiánugu ha meha lídanbaña furumiñeti sígulu. Mafuríeiduntiwa houn guáriua ha sandu o ánheligu, nírügü lun Hesusu. Míchutiwa giñe uéiriguni lun burí sínbolu lani ageiraü kei burí labusurawagún lun fanidira o amu burí katei líbeina lira. Meberesenga kaba lan asusereda aranseñu waña lun gaganbadi wamá lun dimurei le lariñagubei Hesusu: “Lúnrügüba Babureme Bungiu báhuduragua” (Mat. 4:10).

7. Ida liña larihín furangu amu wamá wagía gefentiña luagu Heowá tuéi amu burí relihión?

⁷ Uguñe weyu, añahein saragu gürigia asigira alidihatiña relihión hátima subudiwabaña, darí burí lun hanügüniña kamá búngiugu. Buin haña burí tidan haligilisin, agañeiha hamutu haliburun, ani rútiña saragu seinsu lun híderaguniña. Añahein hádangiñe afiñe hamuti sun le hariñagubei houn. Ni anhein achülaagua Hesusu masandiragunbaña hamuga saragu ugundani ítara! Ánheinti wagía lubúeingu Heowá ha inarünitiña mafalaruntiwa ni aban wügüri. Íbini inebe hamá ha alidihabaliwa woun, adundehani buiti le wafalarubei le ñein lubéi lariñaga Hesusu: “sun huguya aban habu” íbirigu sun huguya (Mat. 23:8-10). Manügün wamutiña ni alidihatiña relihión o polítiku búngiugume. Ani mídehantiwa lidan le hadügübei, mídintiwa luéigiñe lóubadina ni aban hádangiñe, díseñu waña luéi ubóu le. Lidan katei le amu wagía luéi saragu sétanu le ariñagubei luouguoun kristiánugu lan (Huan 18:36).

8. Ida liña wasubudiruni busén lan Heowá lun wíchugun uéiriguni lun liri luma lun wasubudiragüdüni houn sun gürigia?

⁸ Luagu aban dan aba lafurieidun Hesusu, lariñaga: “Núguchi, rualá uéiriguni lun biri” (Huan 12:28). Heowá guánarügü óunabubalin Hesusu lau aban umalali héreti siélugiñe lau füramasei líchuguba lan uéiriguni lun liri (Huan 12:28). Lidan sun lani Hesusu ministeriu, ruti uéiriguni lun liri Lúguchi (Huan 17:26). Furanguti, panta hamá meha kristiánugu inarünitiña lau hayusuruni liri Bungiu luma luagu hasubudiragüdüni houn amu.

9. Ida liña harufuduni kristiánugu ha lídanbaña furumiñeti sígulu inebe lan liri Bungiu houn?

⁹ Lidan furumiñeti sígulu, murusun dan lárigiñe lagumeserun damuriguaü kristiánu, aba “fulesei lániña Bungiu ha mámabaña huríu, lau lanúadirun hádangiñe lun lánigume” (Adü. 15:14). Pántati meha hasandiragun kristiánugu hagía houngua lau hayusuruni liri Bungiu luma luagu hasubudiragüdüni houn amu. Yusu hamuti meha liri Bungiu lidan hani ministeriu luma lidan habürühanu líburu to tídanboun Bíbülia. * Ítara liña harufuduni lumutuniña lan Bungiu hagía ha anügübalin liri (Adü. 2:14, 21).

10. Ka achoururagüdübalin gefentiña lan luagu Heowá hagía lan lubúeingubaña lun hanügüni liri?

 ¹⁰ Gefentiña san luagu Heowá lumutuniñabaña Heowá lun hanügüni liri? Ariha waméi le achoururagüdübalin. Uguñe weyu, adüga hamaali saragu alidihatiña relihión sun hayaraati lun haramuduni liri Bungiu. Gidá hamaali tídangiñe Bíbülia to burí hásügüragüdüboun, anihein burí dan máhaaña lun layusurun lidan burí kultu o lemesi le hadügübei. * Gama lumoun, siñati lasigenerúniwa gefentiñarügüñanu lan luagu Heowá asubudiragüdei liri Heowá, íchiga inebesei lun ani inebe ligía houn kei lubeibei. Úatu ni aban relihión asubudiragüdünti liri Bungiu houn saragu gürigia kei wadügüni. Áfaaguatiwa saragu lun lagunfulirun iri le wawagun: gefentiña luagu Heowá (Isa. 43:10-12). Adügaadiwa tóugiñe 240 míñunu Bíbülia Traducción del Nuevo Mundo, to afidirubalin liri Heowá lidan fulasu le ñéingiñe lubéi hagidarei amu ásügüragüdütiña Bíbülia. Ani adügatiwa agumeiraguagüdüni tídangiñetu Bíbülia lidan lóugiñe 1.000 iñeñein to ayusurubalin liri Heowá.

11. Ida liña harufuduni kristiánugu ha meha lánina furumiñeti sígulu hínsiñe lan inarüni houn?

¹¹ Hínsiñeti meha inarüni lun Hesusu, mini lan le, inarüni luagu Bungiu luma luagu le labusenrubei Bungiu ladügün. Wínwanti úaragua luma inarüni ani aba lasubudiragüdüni houn amu (Huan 18:37). Ani sanditiña giñe ha afalarubalin Hesusu aban óunwenbu ínsiñeni luagu inarüni (Huan 4:23, 24). Wati apostolu Féduru  lun óundaruni hani kristiánugu “üma le inarünibei” (2 Fe. 2:2). Hínsiñeti meha inarüni houn kristiánugu ha lánina furumiñeti sígulu, ligía meha hamahadunbei lun saminaü le tani amu burí relihión, maha hagía lun échuni luma saminaü le hámagiñeti gürigia le mídinbei luma inarüni (Kol. 2:8). Ítarameme, áfaaguatiña kristiánugu inarünitiña ha lídanbaña wadaani lun hasigirun “úaragua luma inarüni” (3 Huan 3, 4). Ida? Lau hachoururuni sun lan le hafiñerubei luma ligaburi habagaridun úara lan tuma Lererun Bungiu.

12. Ka hadügübei íbirigu ha anügübalin ubaraü tidan lóundarun Heowá, dan le híchugun fe mégeiwa lan ladügün somu asansiruni, ani ka uagu hadügei?

¹² Mariñaguntiña gefentiña luagu Heowá subudi tan Bíbülia houn buidu buidu. Anihein dan charatiña lidan ligaburi hafuranguagüdüni fiu arufudahani o lidan hatouhani katei lidan damuriguaü. Gama lumoun, moun lumuti wáhüchürün luagu lira, lugundun furanguti tidan Lererun Bungiu eibu lanme lásügürün dan éibume gunfuranda hamani lumutuniña Bungiu inarüni (Kol. 1:9, 10). Lafuranguagüdübei Heowá inarüni murusun murusun, ligíati lunti aranseñu wamá wagurabahan lau gurasu lun ladurangun lilanpun inarüni éibume lásügürün dan (Ari. 4:18). Dan le híchugun íbirigu ha anügübalin ubaraü tidan lóundarun Heowá fe luagu megei hamá haranseragun fiu ariñahani lidan ligaburi gunfurandawa lan katei o lidan hadügün somu katei adüga hamuti. Saragu ligilisi to ariñaguboun tuouguoun kristiánu tan adügatiña asansiruni lun hagundaraguagüdüniña tílana hani relihión o lun lagundaarun ubóu tau. Ánhañati gefentiña luagu Heowá adügatiña asansiruni lun hayarafadun lun Bungiu luma lun háhuduragun lun kei le aubei larufudaha Hesusu houn (Sant. 4:4). Dan le wadügün aban asansiruni, mama ladüga busén wamá wáyeihan aban iseri saminaü ni wáyeihan saminaü le areiniruti, wadügünbalin ladüga gunfuranda wamani buidu buidu le tariñagubei Bíbülia. Hínsiñeti inarüni woun (1 Tesa. 2:3, 4).

13. Ka igaburi súdinitimabei hawagubei kristiánugu inarünitiña, ani ida liña harufuduni gefentiña luagu Heowá lidan wadaani?

¹³ Subudiwatiña kristiánugu ha lánina furumiñeti sígulu luagu saragu igaburi, ani létima súdinitimabei ínsiñeni. Ariñagati Hesusu: “Anhaün hínsiñegua húmagua, hasubudirubei sun gürigia luagu nani humá disipulugu” (Huan 13:34, 35). Lidan wadaani, gúndaatiña gefentiña luagu Heowá lidan sun ubóu lau ínsiñeni luma luagu úarani le hádanbei. Amu wagía hawéi amu relihión, ítara haña wíbirigu woun keisi waduheñu, meberesenga kátañanu lan, ka lan harasanbei o ka lan hageirabei. Ani ariha wamuti ínsiñeni le, lidan wadamuridagun luma lidan burí adamurini. Adügati le lúntima wachoururuni wagíarügüñadiwa lan áhuduragua lun Heowá kei le aubei labusenra.

14. Según Kolosana 3:12-14, ka igaburi súdinitimabei lun warufudun ínsiñeni le wéiritimabei wámagua?

¹⁴ Ariñagatu Bíbülia: “Lóugiñe sun katei, ñeinlá saragu ínsiñeni hidan houn híbirigu” (1 Fe. 4:8). Aban igaburi lun larufudun ínsiñeni le, lau ferudunagua wamá wámagua luma wawandaagun wámagua ladüga charatiwa. Áluahatiwa giñe chansi lun gíchigadi wamá luma lun weresibiruniña íbirigu wábiñe, íbini ha másiñati óusera hamaadiwa lan wuriba (aliiha huméi Kolosana 3:12-14). Chóuruti, ínsiñeni lan le ligía lan achoururagüdübalin buidu wagía lan kristiánugubaña ha inarünitiña.

15. Ka ida amu igaburi wáfalarei ligaburi ladügün katei lidan damuriguaü kristiánu le lánina furumiñeti sígulu?

¹⁵ Anihein amu fánreinti lidan wáhuduragun le ñein lubéi wáyeihei le ladügübei damuriguaü kristiánu le lídanbei furumiñeti sígulu. Kéiburi lafanreinhóun dasi tidan wóundarun —añahein  óunigirutiña sirkuitu, wéiyaaña lidan afiñeni, hama ídehatiña lidan damuriguaü— áyeiha hamuti hénpulu luáguti ida liña lan meha hadügüni apostolu lidan furumiñeti sígulu (Fili. 1:1; Titu 1:5). Ligiaméme giñe ariñawagúbei luagu le wasaminarubei luagu agamariduni, maríei, inebesei le wasandirubei luagu hitaü, luma luagu wóunigiruni damuriguaü hawéi ha adügübaña figóu wéiriti ani masakürihantiña (Adü. 15:28, 29; 1 Ko. 5:11-13; 6:9, 10; Ebü. 13:4).

16. Ka larufudahabei Éfesuna 4:4-6 woun?

¹⁶ Ariñagati Hesusu hariñaguba lan saragu gürigia lani lan disipulugu hagía, gama lumoun mama súngubei lun lánigu hamá (Mat. 7:21-23). Ariñagatu giñe Lererun Bungiu, lidan lanme lagumuhóun dan, hafamuruba lan saragu “kamá gúnfulitiña luma Bungiu” (2 Tim. 3:1, 5). Afuranguagüda tumuti Bíbülia luagu anihein lan “aban afiñeni” le aubei lagundaara Bungiu (aliiha huméi Éfesuna 4:4-6).

17. Kátaña uguñe weyu afalarubalin lani Hesusu hénpulu ani ñüdün hagía lau le tarufudahabei relihión inarünitu?

¹⁷ Ligíati, katoun san relihión inarüniboun uguñe weyu? Akutiha wamaali le achoururagüdübalin woun katoun lan ani ariha wamaali giñe lidan hénpulu le lígirubei Hesusu ani falá hamuti kristiánugu ha lánina furumiñeti sígulu. Furanguti óunabagülei: gefentiña lan luagu Heowá. Chóuruti aban lan óunwenbu chansi hádangiñe wamá lumutuniña Bungiu luma wasubudiruni inarüni luagu Heowá luma luagu le labusenrubei ladügün. Sigí wamá árügüda luagu inarüni lau ichouruni.