NSUNZO 42
Kakuluvela wi Ohifwanya Ebaribari
“Pimani dhetene; dhapamadha mweddegena.”—1 TES. 5:21.
JIBO 142 Njedhelo Ninnilibiha
DHINASUNZE IYO *
1. Txini enattukulela attu enjene odhugudheya?
MASAKA abano dhihikalawo kapela dhinjene dhinloga wi Akristu vina anomwebedha Mulugu na mukalelo onfuniye. Sabwa ya ejuwene attu enjene anozuzumaga! Afiyedhaga ovivuza dhahi, “Koddi ehikalawo kapela yebaribari, obe makapela otene anomwagalaliha Mulugu?” Ki iyo ninoonamo dhavi? Nihikana nikuluvelo wi dhinsunziyihu sebaribari? Ninokuluvela wi Anamoona a Yehova banimwebedha Mulugu na mukalelo wofanyelela masaka abano? Ninele wona matibelo mang’onovi ananikamihedhe wona dhowakula dha mavuzo aba.
2. Txini emuttukuleli murumiwi Paulo oleba va 1 Tesalónika 1:5, wi iyene kana waganyedha sabwa ya ebaribari?
2 Murumiwi Paulo wankuluvela wi wahifanya ebaribari. Txini yamuttukuleli murumiwi Paulo okuluvela wi wali mwibaribarini? (Kengesa 1 Tesalónika 1:5.) Paulo kaganyedha wi wali mwibaribarini. Iyene wali muttu wafwaseyela osunza Mazu a Mulugu. Vina iyene wankuluvela wi “dhetene dhilebiwe mBibiliani wobuweliha ddi Mulugu.” (2 Tim. 3:16) Txini esunzile Paulo? Munzuni na Mulugu Paulo ohifwanya matibelo ohipambiheya oniha wi Yezu wali Mesiya—mwa mpaddi mwina asogorheli a marelijiau a Ayuda ahipwaza matibelo aba. Sabwa ya okala agwarhagwambi awene anloga wi anosunziha magano a Mulugu oku akosaga dhilobo dhahamuzivela. (Tito 1:16) Mbwenye Paulo wali wottiyana na asogorheli aba a marelijiau Ayuda iyene kasakula dhipaddi gani dha Mazu a Mulugu afwanyeliye ofwara. Iyene wanivilibihedha ovirihamo vina osunziha ‘magano otene a Yehova.’—Mer. 20:27.
3. Jofuneya okana dhowakula dha mavuzo otene ankosiwa wi niziwe akala nili mwibaribarini? (Kang’ana kasha “ Dhubuwelo na Dhotikiniha Dhowumiha Milomo dha Yehova—‘Si Dhinjidhene Kadhinelegeya.’”)
3 Attu ena anubuwela wi relijiau yebaribari enofwanyelela wakula mavuzo otene ankosiwa sabwa ya Bibilia. Mbwenye ejoya enokuluveleya? Katanalela yotagiha ya Paulo. Iyene wahakokomeza Akristu wi “anfwanyela weddana dhapamadha,” masiki dhawene iyene wanziwa wi kanonelamo dhilobo dhotedhene. (1 Tes. 5:21) Paulo ohileba dhahi ‘onona wehu kuwakwanile, dhilobo dhina ninona mwipipini ninga enoniwa dhilobo mukuguni.’ (1 Kor. 13:9, 12) Paulo kawodha ononelamo dhilobo dhotedhene; iyo vina kaninwodha ononelamo dhilobo dhotedhene. Masiki dhawene Paulo wannonelamo efunelo ya Mulugu. Dhilobo dhaziwiye dhanimukuluveliha wi wahimala ofwanya ebaribari!
4. Ninawodhe dhavi olibiha nroromelo nehu nawi nihifwanya ebaribari, vina elobo gani enfwanyelihu oziwa sabwa ya Akristu a ebaribari?
4 Ninofwanyelela olibiha nroromelo nehu na wi nihifwanya ebaribari. Mukalelo mmodha wokosa ejuwene ku oladdaniha magano attiyile Yezu na esile dhineddana Anamoona a Yehova masaka abano. Mwari mwa nsunzo ntti, ninele wona wi Akristu ebaribari (1) kanebedha dhingamuttu, (2) anoriha nzina na Yehova, (3) anokwela ebaribari, vina (4) anokwelana venjene muttu na mukwaye.
IYO KANINEBEDHA DHINGAMUTTU
5. Txini esunzihile Yezu sabwa ya omwebedha Mulugu nanda ninawodhe dhavi omutagiha?
5 Yezu onomukwela venjene Mulugu, sabwa ya ejuwene iyene onimwebedha Yehova bahi masiki mudhidhi waliye wirimu vina mudhidhi valiye velaboni ya vati. (Lk. 4:8) Yezu wahasunziha anamafwara aye okosa yakakene. Yezu na anamafwara aye ororomeleya kalabihedha dhingamuttu muwebedhani mwawa. Vowila Mulugu Muya nladdaniho tti nladdaniho ninkosa muttu kaninladdanihiwa nne vang’ono na mukalelo oli Yehova! (Iza. 46:5) Ki attu abale ansasanya maladdaniho anlobelelani akuwelaga wi akoddeli? Nlamulo nanawili na Malamulo kumi Yehova ohiloga dhahi: “Kuvisasanyedhe nladdaniho thi nladdaniho na dhilobo dhinoniwe odhulu, peno vati, peno mmanjeni, peno vati va mathaka . . . kuwebedhe.” (Obud. 20:4, 5) Mwa abale anfuna omwagalaliha Mulugu mazu aba kahiyo opipiriheya anononeleyamo deretu.
6. Magano gani a webedha anfara Anamoona a Yehova masaka abano?
6 Anamaloga mapadduwo ahinonelamo wi Akristu oroma amwebedha Mulugu bahi. Motagiha nivuru ninkuweliwa Mapadduwo a Kapela y’Okristu ninloga wi, Akristu oroma “annidda vaddiddi” dhubuwelo dhawi muwebedhani mwawa anfwanyela olabihedhaga maladdaniho, aba mazu aburutxiwe mu Tradução Nossa. Masaka abano, Anamoona a Yehova anfara magano akakene eddana anamafwara oroma. Iyo kaninebedha maladdaniho a “akoddeli” ne a anju vina kaninimulobelela Yezu. Kaninkosa elobo-elobovi enoniha wi ninowebedha bamdera na Elabo yehu. Kintanala elobo-elobovi enapadduwe, iyo nihigana wiwelela mazu a Yezu anloga dhahi: ‘Omwebedhe Yehova Mulugu wawo.’—Mt. 4:10.
7. Ottiyana gani oliwo wa Anamoona a Yehova na makapela mena?
7 Attu enjene masaka abano anoziveliwa wafwara asogorheli amakapela abuwene antikiniwa venjene vina alitxi ovuwa. Masaka mena sabwa ya attu enjene watikinaga asogorheli aba watikina wawa alobwana aba onolupa maddile afiyedhaga wawebedha. Attu anodhala mmakapelani mwawa agulaga manivuru awa vina akosaga mivaho dhinddimuwa wi akamihedhena mittupo dhinjene dhinkosa asogorheli aba amakapela. Attu ena anorumeela mazu-mazuvi anloga awene. Mukalelo onattittimihani asogorheli a makapela enorutxa ononelamo akala agahimuttittimiha Yezu na mukalelo wakakene mudhidhi waliye velaboni ya vati! Mwa mpaddi mwina, alabeli a ebaribari animwebedha Yehova ottiya wafwara attu. Ebaribari wi iyo ninowariha abale ansogorhela nikuru na Mulugu, mbwenye kanindduwala mazu ononeleyamo alogile Yezu: ‘Nyuwo motene muli abali.’ (Mt. 23:8-10) Iyo kaninawebedha attu, kintanala akala asogorheli amakapela obe asogorheli a politika. Vina kaninkamihedha masasanyedho awa. Ottiya ejo ninodhowavi nikalaga wolapelana na awene vina nihikosaga mpaddi wa elabo. Mwa dhipaddi esi dhotene ninowoniha kakamwe wi iyo nili ottiyana na makuru mena anloga wi nili Akristu.—Jo. 18:36.
IYO NINORIHA NZINA NA YEHOVA
Akristu ebaribari anoziveliwa ologa na attu ena mwaha wa nzina na Yehova (Kang’ana ddima 8-10) *
8. Iyo ninziwa dhavi wi Yehova onofuna wi nzina naye nittittimihiwe vina attu ena aziwe?
8 Mudhidhi dhahi Yezu wahilobela: “Babani thithimihani nzina nenyu.” Mwinyene Yehova oromana wirimu wahakula nlobelo ntti na nzu noliba alogaga wi agahittittimiha nzina naye. (Jo. 12:28) Mwari mwa mabasa aye velaboni ya vati, Yezu wahittittimiha nzina na Babe. (Jo. 17:26) Sabwa ya ejuwene jojedheleya wi Akristu ebaribari anowagalala sabwa ya okuweliwa na nzina na Mulugu vina waziwiha attu ena.
9. Akristu oroma onihile dhavi wi anriha nzina na Mulugu?
9 Nsaka zana noroma mumalile witiwa mulogo wa Okristu mwari mwa malogo otene a mwilaboni, Yehova ‘wahivisakulela nlogo ninttukula nzina naye.’ (Mer. 15:14) Akristu a nsaka nttile annagalala sabwa ya okuweliwa na nzina na Mulugu vina annakamihedha attu ena oziwa nzina ntti. Awene anlabihedha venjene nzina na Mulugu mudhidhi walaleyani vina mudhidhi walebani manivuru a Bibilia. * Awene anoniha wi ali nikuru navawoka naziwiha nzina na Mulugu.—Mer. 2:14, 21.
10. Txini enoniha wi Anamoona a Yehova tti nlogo ninttukula nzina na Yehova?
10 Koddi Anamoona a Yehova nlogo ninttukula nzina na Yehova? Ndowe none dhinoniha ejuwene. Masaka abano, asogorheli enjene amakapela, anokosa muli mwetemwene wi aavitele attu nzina ntti na Mulugu. Awene ahifiyedha ofudha nzina ntti mmaBibiliani atapulelani, mudhidhi mwina anfiyedha okooddiha wi nzina ntti na Mulugu kaninfwanyela olabihedhiwa mmittuponi dha mmakapela. * Nona kavali waganyedha wi Anamoona a Yehova bawene bahi anvaha ttima vina anriha nzina ntti na Mulugu. Kaniwo nikuru nina ninvuwiha nzina na Mulugu opitta Anamoona a Yehova nona ninokosa muli mwetemwene wi nirihe nzina ntti na Yehova ninkuweliwihuna. (Iza. 43:10-12) Iyo nihipida makopia 240 milhões abuwene anila agataganyihiwa abudduwa Tradução Do Novo Mundo Da Bíblia Sagrada odduwene onlabihedha nzina na Yehova mumburoni mufudhiwani na anamatapulela ena a Bibilia. Ottiya ejo iyo ninopida vina ninopaka mapublikasau andela mBibiliani anttukula nzina na Yehova abuwene ampakiwa na dhilogelo okwaranya 1.000!
IYO NINOKWELA EBARIBARI
11. Akristu oroma onihile dhavi wi ankwela ebaribari?
11 Yezu wankwela ebaribari, kuloga wankwela ebaribari sabwa ya Mulugu, vina dhofuna Dhaye. Yezu ohikalawo mowiwanana na ebaribari eji vina owaziwiha attu ena. (Jo. 18:37) Anamafwara atxibarene a Yezu ankosa yakakene ankwela venjene ebaribari. (Jo. 4:23, 24) Jijuwene yamuttukuleli murumiwi Pedro ologa wi merelo Akristu abale yali “dila yebaribari.” (2 Ped. 2:2) Okwela wana Akristu oroma sabwa ya ebaribari wali onddimuwa vaddiddi afiyedhaga okodda dhubuwelo dha makapela, dheddelo na dhubuwelo dha muttu-muttu esuwene dhahewanana na ebaribari. (Kol. 2:8) Akristu ebaribari ankosa yakakene masaka abano awene anovilibihedha odhowavi ‘eddaga mwibaribarini’ ankosa ejuwene onihaga wi esile dhinrumelani na mukalelo oneddihani egumi yawa dhinowiwanana na Mazu a Yehova.—3 Jo. 3, 4.
12. Egakala yofuneya okosiwa matxinjo sabwa ya ononeleyamo wehu txini enkosa abali abale ansogorhela nikuru nanda sabwaya jani?
12 Anamoona a Yehova kanloga wi ahikana eziwelo yoligana obe yawakwana sabwaya ya ebaribari. Masaka mena, awene anovonya aganonihedhagamo malebo a Bibilia obe agavaha malago anwodha weddiha milogo. Ejo kinnittikiniha. Bibilia onowoniha kakamwe wi eziwelo yoligana endowa biganoneliwamo movira wa mudhidhi. (Kol. 1:9, 10) Yehova onnonelihedhamo ebaribari vang’ono-vang’ono enfwanyelihu okosa ojedhela wi wareya wa ebaribari odhowegevi bugonuwa. (Gano 4:18) Abali ansogorhela nikuru na Mulugu agoona wi enofuneya okosa matxinjo sabwa ya ononeleyamo wehu awene anokosa ejuwene momaguva. Ejo enkosani enottiyana na esile dhinkosa marelijiau mena ottambi. Masaka mena asogorheli a marelijiau ottambi anokosa matxinjo wi azivelihe aroromeli awa obe akale attu ovuwa. Mwa mpaddi mwina nikuru na Yehova ninkosa matxinjo wi nakamihedhe abali akale ofiyedheya na Mulugu vina ofwara magano oligana abuwene attiyile Yezu. (Tia. 4:4) Iyo kaninkosa matxinjo aba sabwa ya ofwara dhopadduwa dha masaka abano obe esile dhinziveliwa attu ninkosa matxinjo aba sabwa ya ononeliwamo wapama wa Bibilia. Iyo ninokwela venjene ebaribari!—1 Tes. 2:3, 4.
IYO NINOKWELANA VENJENE MUTTU NAMUKWAYE
13. Mukalelo gani wamakamaka onlagiha Akristu a txibarene nanda Anamoona a Yehova anoniha dhavi mukalelo obu?
13 Akristu oroma ahikana mikalelo dhinjene dhapama mwa mikalelo esi wamakamakaya okwela. Yezu ohiloga dhahi: “Mugakwelanaga—athu etene anoziwa wi muli anamasunza aga.” (Jo. 13:34, 35) Masaka abano, Anamoona a Yehova ozugunuwa elabo yotene anowoona okwela oku wa Akristu atxibarene. Iyo nili nikuru nottiyana na makapela mena nili ninga anamudhi awiwanana. Masiki nikalaga a dhilabo vina malogo ottiyana iyo nili nlogo ninkwelana. Ninolagiha okwela obu watxibarene nigakala mmatugumanoni, matugumano a ttattamwa vina a murudda. Midhidhi esi dhinowooniha wi txibarene webedha wehu onomwagalaliha Yehova.
14. Ninga mulebeliwe va Kolosi 3:12-14, mukalelo mmodha wamakamaka wolagihana okwelana muttu na mukwaye buvi?
14 Bibilia onloga dhahi, “makamaka mweddegena okwelana.” (1 Ped. 4:8) Ninwodha olagiha okwela oku nigakala anamalevelela vina nigavilelaga dhovonya dha attu ena. Iyo ninotamela mukalelo owalagiha okwela abali a mmulogoni nitamelaga marhe okala anamakela aleddo vina attu ovaha masiki na abaleya aninyimulile. (Kengesa Kolosi 3:12-14.) Iyo nigalagiha okwela watxibarene muttu na mukwaye ninowoniha wi nili Akristu atxibarene.
“NROROMELO NIMODHA”
15. Namukalelo gani mwina onfwara iyo magano eddilena Akristu a vyaka zana mundduni?
15 Dhihikalawo dhilobo dhina dhintonyihedha wi ninofara magano a webedha eddilena Akristu a vyaka zana mundduni. Motagiha, nikuru nehu nihikana anameddelela milogo—anddimuwa a mulogo vina adhari okamihedha—dhotedhene eso dhinowiwanana na esile dhapadduwa vyaka zana mundduni. (Fil. 1:1; Tito 1:5) Ottiya ejo monelo wehu mwaha wa ogonihana, matelo, olabihedha nikami vina mukalelo wa obarela mulogo wa muttu onttega ahitxinuwa dhinowiwanana na magano eddilena na Akristu a vyaka zana mundduni.—Mer. 15:28, 29; 1 Kor. 5:11-13; 6:9, 10; Aheb. 13:4.
16. Txini ensunzavo iyo na mazu anfwanyeya va Éfeso 4:4-6?
16 Yezu wahiloga wi enji agahiloga wi anamafwara aye mbwenye wahiloga wi kali otene agakalile anamafwara aye ebaribari. (Mt. 7:21-23) Bibilia wahiloga n’ottaga wi masaka omariha agahikalawo attu ‘agoneyegena ekalelo ya omuriha Mulugu.’ (2 Tim. 3:1, 5) Bibilia ohoniha kakamwe wi nihikalawo “nroromelo ninodha” nttiwene ninrumela Mulugu.—Kengesa Éfeso 4:4-6.
17. Nikuru gani masaka abano nininfara Yezu vina ninimwebedha Mulugu na mukalelo wofanyelela?
17 Masaka abano nikuru gani ninimwebedha Mulugu na mukalelo wofanyelela? Nimala wona matibeloya. Iyo nisekeserha magano a webedha asunzihile Yezu vina eddilena Akristu a vyaka zana dhoroma. Yowakulaya kinaganyedheya—ba Anamoona a Yehova. Gari enddimuwa vaddiddi okosa mpaddi wa nlogo ntti na Yehova vina oziwa ebaribari mwaha wa iyene vina dhifunelo dhaye! Muttu-muttu wa iyo onofwanyelela ogana ottidda ebaribari na nikuluvelo notene.
JIBO 3 Yehova Ddinnivaha, Njedhelo vina Guru
^ par. 5 Mwari mwa nsunzo ntti, ninele wona magano attiyile Yezu abuwene eddana anamafwara aye ewanana na webedha watxibarene. Vina ninele osekeserha matibelo anoniha wi Anamoona a Yehova anofwara magano abo a webedha wa txibarene masaka abano.
^ par. 9 Koona kasha “Akristu Oroma Anlabihedha nzina na Yehova?” mu A Sentinela woroma wa Julyu wa yaka ya 2010 nikuku 6.
^ par. 10 Motagiha, yaka ya 2008, Papa Bento XVI wahikokomeza wi nzina na Mulugu kaninfwanyela “olabihedhiwa nne vina ologiwaga” mmittuponi, mmalobeloni obe jibo dha Akatolika.
^ par. 63 FOTO YA NIKUKU: Nlogo na Yehova nihimutapulela Bibilia Tradução do Novo Mundo na dhilogelo dhowakwana 200 dhahene attu anowodha omwengesa Bibilia mumfwanyeya nzina na Mulugu na elogelo yawa.
