MUTWE WAKULILONGESA 42
Pwako ni Shindakenyo Ngwe uli mu Umwenemwene
“Esekenu yuma yeswe. Kakaminyenu ku yize yinapeme.”—1 TESA. 5:21.
MWASO 142 Tunyongenu ha Kutalatala Chetu
CHIKUMA CHILEMU *
1. Yika yakutwala atu anji mba ayambashane?
MUSONO, kuli mayingeleja anji waze akuliamba ngwo, kali akwa-Kristu, nawa ngwo kakuwayila Zambi mu jila yalita. Yino yakutwala atu anji hanga ayambashane! Ayo kakulihula ngwo: “Shina kwatwama uwayilo wamwenemwene umuwika, nyi hanji mayingeleja eswe kakuvwisa Zambi kuwaha?” Mba yika mutwamba hali yetu? Shina tuli lume ni shindakenyo ngwetu, twakulongesa umwenemwene? Kutala tuli ni shindakenyo ngwetu, musono Yela ja Yehova e akuwayila Zambi mu jila yalita? Tushimutwinenu yikuma yimwe yize muyitukwasa kupwa ni shindakenyo yacho.
2. Kulita ni 1 A-Tesalonika 1:5, mumu liaka postolo Paulu apwile ni shindakenyo ngwenyi kali mu umwenemwene?
2 Postolo Paulu kapwile ni shindakenyo ngwenyi, kali mu umwenemwene. (Tanga 1 A-Tesalonika 1:5.) Shindakenyo yacho te kuyishi kukatuka ha chize akwivwa. Paulu te kakulilongesa kanawa Liji lia Zambi. Iye te kakufuliela ngwenyi: “Yisoneko yeswe yili yakuhwima kuli Zambi.” (2 Timo. 3:16) Yika Paulu alilongesele? Mu Yisoneko, Paulu kawanyinemo shindakenyo yize yamukwashile kunyingika ngwo, Yesu kali Mesaya yoze alakenyene. Alioze mangana a uwayilo wa A-Yunda, kalengulwile shindakenyo yacho. Yilembekese jacho, te kakuliamba ngwo kanamanyinako Zambi, alioze malinga yuma yize iye keshi kuzanga. (Titu 1:16) Kulisa ni ayo, Paulu te keshi kusakula yikuma yimwe mu Liji lia Zambi yize mafuliela. Iye te kakuzanga kulongesa ni kukaula “mana eswe a Zambi.”—Yili. 20:27.
3. Shina tunafupu kupwa ni makumbululo a yihula yetu yeswe, mba tupwe ni shindakenyo ngwetu tuli mu umwenemwene? (Tala nawa mushete, “ Yilinga ni Manyonga ja Yehova—‘Yahiana Chize Mutu Mahasa Kwalula.’”)
3 Atu amwe kakunyonga ngwo, uwayilo wamwenemwene watamba kukumbulula yihula yeswe, chipwe yize Mbimbiliya kuyishi kukumbulula. Shina kupwa ni nyonga lia mutapu au chili kusolola mana? Tutalenu chilweza cha Paulu. Iye kakolwezele akwa-Kristu hanga ‘eseke yuma yeswe,’ alioze kaalwezele nawa ngwenyi kuli yuma yize te kanyingikine. (1 Tesa. 5:21) Yasoneka ngwenyi: “Tunanyingika ha chihanda . . . twakumona mu katalilo ngwe chijimbikilo.” (1 Kori. 13:9, 12) Paulu te kanyingikine yuma yeswe, ni yetu kutwanyingikine yuma yeswe. Chipwe chocho, Paulu te kanyingika umwenemwene hakutwala ku upale wa Yehova. Yuma yize te ananyingika, yamukwashile kupwa ni shindakenyo ngwenyi kali mu umwenemwene!
4. Kuchi mutuhasa kupwa ni shindakenyo ngwetu, twawana umwenemwene, nawa yika mutumona hali akwa-Kristu amwenemwene?
4 Twatamba kupwa ni ushindakenyo ukolo ngwetu, twawana umwenemwene. Jila yimwe yakuchilingila yili kutesa chilweza cha kuwayila Zambi chize Yesu ahichikile ni yize Yela ja Yehova akulinga musono. Ha mutwe uno, mutumonaho ngwetu, akwa-Kristu amwenemwene (1) keshi kuwayila tuponya, (2) kakulemesa jina lia Yehova, (3) kakuzanga umwenemwene, nawa (4) kakulizanga chinji umwe ni mukwo.
KUTUSHI KUWAYILA TUPONYA
5. Kuchi Yesu alongesele chize mutuhasa kuwayila Zambi mu jila yalita, nawa kuchi mutuhasa kumwimbulula?
5 Yesu te kakuzanga chinji Zambi. Kashika te akuwayila wika Yehova, chipwe muze apwile mu malilu ni muze apwile hano hashi. (Luka 4:8) Iye kalongesele tumbaji twenyi hanga no awayile wika Yehova. Yesu ni tumbaji twenyi te keshi kuzachisa tuponya mu uwayilo wo. Amu Zambi ali spiritu, kashika kaponya mweswawo mutu malinga kechi kuhasa kulita nenyi! (Iza. 46:5) Mba yika mutwamba hakutwala ku tuponya waze avuluka ngwo, asandu waze atu akuwayila? Shimbi yamuchiali yize yili ha Kumi lia Shimbi, Yehova kambile ngwenyi: “Kanda ukalisongela kaponya, chipwe wa kulifwa ni chuma chimwe cha mwilu, chipwe chuma cha hashi . . . Kanda ukafukama kuli ayo.” (Kutuhu. 20:4, 5) Atu waze akuzanga kuvwisa Zambi kuwaha, kananyingika kanawa maliji wano.
6. Chilweza chika Yela ja Yehova akukaula musono mu uwayilo wo?
6 Atu waze akulilongesa sango jikulu kakwamba ngwo, akwa-Kristu atangu te kakuwayila wika Zambi. Chakutalilaho, umwe mukanda * unambe ngwo, akwa-Kristu atangu “te kakuvwila lwaji” chipwe nyonga lia kuzachisa tuponya mu uwayilo. Musono, Yela ja Yehova kakukaula chilweza cha akwa-Kristu a ku sekulu yitangu. Yetu kutushi kuwayila tuponya twa “asandu” hanji twa angelo. Kutushi kulemba chipwe kuli Yesu. Nawa kutushi kulinga chuma nichimwe chize muchisolola ngwo tunawayila chifuchi chetu. Chipwe ngwe mukulingiwa chuma cheswacho, nihindu hitunakwate chiyulo cha kwononokena maliji a Yesu anambe ngwo: “Ukawayile Mwene Zambi ye.”—Mateu 4:10.
7. Yuma yika yinasolola pundu ngwo, Yela ja Yehova kalisa ni akwa-mayingeleja?
7 Musono, atu anji kakukaula munyima lia mangana a mayingeleja waze akwete lufuma. Mutapu uze akwamwena wakutwala atu hanga aawayile. Atu kakuzala ndi mu mayingeleja jo, kulanda mikanda yo, ni kuhana milambu yinji mumu lia yize mangana jacho akulinga. Atu amwe kakufuliela ha yuma yeswe yize ayo akuhanjika. Nawa chili chikalu kunyingika nyi atu jacho che te mevwa nyi mwene Yesu masoloka mukachi ko! Alioze, tuvumbi amwenemwene a Yehova keshi kukaula atu munyima. Chipwe ngwe twakuvumbika waze apwa tusongo, nihindu twakukaula yize Yesu alongesele ngwenyi: “Yenu eswe nuli mandumbu.” (Mateu 23:8-10) Yetu kutushi kuwayila atu, chipwe ngwe kali mangana a yingeleja hanji manguvulu. Nawa kutushi kukwasa yiyulo yo. Shimbu tuchilinge, twakwehuka yuma ya hano hashi. Yikuma yeswayi, yinasolola pundu ngwo, twalisa ni mayingeleja anji waze akuliamba ngwo kali akwa-Kristu.—Yoa. 18:36.
TWAKULEMESA JINA LIA YEHOVA
Akwa-Kristu amwenemwene kakuwahilila chinji ha kuhanjika ni akwo hakutwala kuli Yehova (Tala maparagrafu 8-10) *
8. Kuchi tunanyingika ngwetu, Yehova kanazange hanga jina lienyi alichichimieke ni kulinyingikisa kuli atu?
8 Tangwa limwe Yesu yalemba ngwenyi: “Tata, chichimieka jina lie.” Hachino, Yehova mwene yakumbulula kulemba chacho ni liji linene kukatuka mu malilu, ni kulakenya ngwenyi machichimieka jina lienyi. (Yoa. 12:28) Mu mulimo wenyi wa kwambujola, Yesu kanakachichimieka jina lia Tato. (Yoa. 17:26) Kashika, twatamba kushimbwila ngwetu, akwa-Kristu amwenemwene azachise jina lia Zambi ni kulinyingikisa kuli akwo.
9. Kuchi akwa-Kristu ku sekulu yitangu asolwele ngwo te kakuchichimieka jina lia Zambi?
9 Ha amwe mashimbu ku sekulu yitangu, muze chikungulwila cha akwa-Kristu chaputukile, Yehova yatala “kuli akwa mavungu mukuchiza hakachi ko umwe munyachi ha jina lienyi.” (Yili. 15:14) Akwa-Kristu jacho, kapwile ni kuwahilila ha kuzachisa jina lia Zambi ni kukwasa akwo hanga alinyingike. Ayo te kakuzachisa chinji jina lia Zambi ha kwambujola ni muze te akusoneka mikanda ya Mbimbiliya. * Yino yiyisolola ngwo, ayo wika e te akulweza atu jina lia Zambi.—Yili. 2:14, 21.
10. Yika nawa yinasolola ngwo Yela ja Yehova kali atu waze akumbata jina lia Zambi?
10 Shina Yela ja Yehova kali atu waze akumbata jina lia Zambi? Tutalenu yikuma yimwe yize yinatwehe shindakenyo yacho. Musono, mangana anji a mayingeleja kakusa tachi jinji hanga asweke jina lia Zambi. Ayo hanachiza jina lia Zambi mu Mbimbiliya jize akulumbununa. Nawa kakukanjisa kuzachisa jina lia Zambi ha yiwanyino ya mayingeleja jo. * Yino yinasolola pundu ngwo, Yela ja Yehova e wika akuvumbika ni kulemesa jina lia Zambi. Yela ja Yehova wika e akunyingikisa jina lia Zambi kuli atu, akwa-mayingeleja keshi kuchilinga! Mutuhasa kwamba ngwetu, twakusa tachi hanga tulemese jina lino atuhele, Yela ja Yehova. (Iza. 43:10-12) Yetu hitwatuhwisa Mbimbiliya, Tradução do Novo Mundo mu unji wa tununu 240 a tununu, yize yakuzachisa jina lia Yehova ha yihela yize alichijile kuli akwa-kulumbununa Mbimbiliya akwo. Chikwo nawa, twakutuhwisa mikanda yize yakulumbununa Mbimbiliya mu malimi kuhiana 1.000!
TWAKUZANGA UMWENEMWENE
11. Kuchi akwa-Kristu atangu asolwele ngwo kakuzanga umwenemwene?
11 Yesu te kakuzanga umwenemwene, hanji ngwetu, umwenemwene hakutwala kuli Zambi ni upale wenyi. Yesu katwamine kulita ni umwenemwene wacho ni kuunyingikisa kuli akwo. (Yoa. 18:37) Tumbaji amwenemwene a Yesu, no te kakuzanga chinji umwenemwene. (Yoa. 4:23, 24) Kashika postolo Petulu avulukile ufulielo wa akwa-Kristu ngwo, “jila ya umwenemwene.” (2 Petu. 2:2) Mumu lia kuzanga chinji umwenemwene, akwa-Kristu atangu yalituna ndako, mianda ni manyonga ja atu waze te akulimika ni umwenemwene. (Kolo. 2:8) Yino ye yakulingiwa nawa kuli akwa-Kristu amwenemwene musono. Ni ayo kakusa tachi hanga anunge ni kwenda “mu umwenemwene,” nawa kakuchilinga ha kufuliela ni kutwama kulita ni Liji lia Yehova.—3 Yoa. 3, 4.
12. Muze kwakufupiwa kwalumuna umwe ulumbunwiso, yika akulinga mandumbu waze akusongwela, nawa mumu liaka?
12 Yela ja Yehova keshi kwamba ngwo, kananyingika umwenemwene weswe uze uli mu Mbimbiliya. Ha mashimbu amwe, ayo mahasa kuhengesa ha kulumbununa chimwe chisoneko hanji ha kuhana umwe usongwelo wa chize yuma yatamba kwenda mu chikungulwila. Kutwatambile kukomoka ha kwivwa chino. Mbimbiliya yinasolola zwalala ngwo, atu mahasa kwokesa yinyingi ya umwenemwene wa mu Mbimbiliya ha kupalika cha mashimbu. (Kolo. 1:9, 10) Yehova kakusolola umwenemwene hakehe-hakehe, nawa twatamba kushimbwila hanga pangu linunge ni kutemuka. (Yishi. 4:18) Muze mandumbu waze akusongwela akunyingika ngwo, kunafupiwa kwalumuna umwe ulumbunwiso, ayo kakuchilinga kawashi-washi. Alioze, chino chinalise ni yize akwa-uwayilo wa mahuza akulinga. Kanji-kanji ayo kakwalumuna yimwe hanga evwise atu jo kuwaha, hanji hanga aanyingike chinji hano hashi. Alioze, ululikiso wa Yehova wakwalumuna yuma yize muyitukwasa kukundama kuli Yehova, ni kukaula chilweza cha kumuwayila chize Yesu ahichikile. (Tia. 4:4) Kutushi kwalumuna ulumbunwiso mumu lia yuma yaha hanji kwita cha atu, alioze twakuchilinga mumu ulumbunwiso wacho hiwatulumbunuka kanawa kulita ni yize Mbimbiliya yinambe. Yetu twakuzanga chinji umwenemwene!—1 Tesa. 2:3, 4.
TWAKULIZANGA CHINJI UMWE NI MUKWO
13. Chitanga chika chilemu chinji chize akwa-Kristu ku sekulu yitangu asolwele, nawa kuchi akuchisolola kuli Yela ja Yehova musono?
13 Akwa-Kristu ku sekulu yitangu, te kakwete yitanga yinji yipema, alioze chitanga chilemu chinji chize apwile ni kusolola, chili zango. Yesu kambile ngwenyi: “Ku chino eswe makanyingika yenu nuli tumbaji twami, nyi munupwa ni zango umwe kuli mukwo ni mukwo.” (Yoa. 13:34, 35) Musono, Yela ja Yehova hashi heswe kakusolola zango liacho mukachi ko ni kulinunga. Yetu twalisa ni akwa-mayingeleja, tuli usoko walinunga. Chipwe ngwe tuli a ku yifuchi ni minyachi yalisa, nihindu chino kuchishi kutuhandununa. Twakumona zango lino liamwenemwene ha kukunguluka cha chikungulwila, cha mbonge ni cha mambonge. Yino yeswe yakutukwasa tupwe ni shindakenyo ngwetu, uwayilo wetu we Yehova akutayiza.
14. Kulita ni A-Kolosu 3:12-14, jila yilemu yika yize twatamba kusolwela akwetu zango?
14 Mbimbiliya yinambe ngwo: ‘Pwenu nikulizanga umwe ni mukwo ni mbunge yeswe.’ (1 Petu. 4:8) Jila yimwe ya kusolwelamo zango liacho, yili kukonekena akwetu ni kulengulula tupalia two. Chikwo nawa, mutuhasa kufupa uhashi wa kupwa yihanyi ni kuzumbula mandumbu jetu eswe, chipwe waze atulemekene ku mbunge. (Tanga A-Kolosu 3:12-14.) Muze twakuzanga akwetu ni mbunge yeswe, twakusolola ngwetu, tuli akwa-Kristu amwenemwene.
“UFULIELO UMUWIKA”
15. Majila akwo aka waze twakukawilamo chilweza chize akwa-Kristu ku sekulu yitangu ahichikile?
15 Kuli yuma yikwo yize yakusolola ngwo, twakukaula mutapu wa kuwayila Zambi uze akwa-Kristu ku sekulu yitangu ahichikile. Chakutalilaho, ululikiso wetu uli ni tulayi a mbonge, makulwana a mu chikungulwila ni tuvumbi. Yiteli yino yeswe yapwile ku sekulu yitangu. (Fwili. 1:1; Titu 1:5) Chikwo nawa, nyonga lietu hakutwala ku kulisumbakenya, umbachiso, kuzachisa manyinga ni chize akufunga chikungulwila nyi umwe mutu malinga shili chakuhona kulikonyeka, yeswe yakukatuka ha chilweza chize akwa-Kristu ku sekulu yitangu ahichikile.—Yili. 15:28, 29; 1 Kori. 5:11-13; 6:9, 10; Hepre. 13:4.
16. Yika twalilongesa ha yize A-Efwesu 4:4-6 unambe?
16 Yesu kambile ngwenyi, atu anji te mamba ngwo kali tumbaji twenyi, alioze yamba nawa ngwenyi, hi eswe ko te mapwa tumbaji amwenemwene. (Mateu 7:21-23) Mbimbiliya yaliangile nawa kututoweza ngwo, ku matangwa a kusula atu anji te mapwa ni “uwayilo wa kumeso.” (2 Timo. 3:1, 5) Alioze, Mbimbiliya yakusolola nawa zwalala ngwo, kuli “ufulielo umuwika” uze Zambi akutayiza.—Tanga A-Efwesu 4:4-6.
17. Aya anakaula Yesu musono, nawa ali mu uwayilo wamwenemwene?
17 Aya waze ali mu uwayilo wamwenemwene musono? Hitwashimutwina yuma yize yasolola atu waze ali mu uwayilo wamwenemwene. Twamona chilweza cha kuwayila Zambi mu jila yalita chize Yesu alongesele, nawa chize akwa-Kristu ku sekulu yitangu akawile. Kashika mutuhasa kwamba ngwetu, atu jacho kali Yela ja Yehova. Kwamba pundu, chili chiwape chinene kupwa umwe wa kuli tuvumbi twa Yehova, ni kunyingika umwenemwene hakutwala kuli Iye ni upale wenyi! Kashika hita umwe wa kuli yetu, katamba kusa tachi hanga anunge mu umwenemwene.
MWASO 3 Tachi Jetu, Ufulielo Wetu, Ujikijilo Wetu
^ kax. 5 Ha mutwe uno, mutumonaho chilweza cha uwayilo wamwenemwene chize Yesu ahichikile ni chize tumbaji twenyi atangu akawile chilweza chacho. Mutushimutwinaho nawa yimwe yize yinasolola ngwo, musono Yela ja Yehova kanakaula chilweza chacho cha uwayilo wamwenemwene.
^ kax. 6 História da Igreja Cristã.
^ kax. 9 Tala mushete, “Shina Akwa-Kristu ku Sekulu Yitangu Kazachishile Jina lia Zambi?” ha Kaposhi wa Kutalila wa Julho 2010, lifwo 6.
^ kax. 10 Chakutalilaho, ha mwaka 2008, Papa Bento XVI yahana shimbi hanga atu “ahone kuzachisa chipwe kuvuluka jina lia Zambi” ha yiwanyino, yilemba ni mu miaso ya Católica.
^ kax. 64 ULUMBUNWISO WA CHIZULIE: Ululikiso wa Yehova hiwatuhwisa Mbimbiliya, Tradução do Novo Mundo mu malimi kuhiana 200. Hachino, atu mahasa kutanga Mbimbiliya yize yili ni jina lia Zambi mu limi lio.
