1. Mi tampi cu zeicah an lung aa tuai?

TUCHAN ah Khrihfa kan si i Pathian lung a lawmhtermi lam in kan biak tiah aa timi biaknak tampi an um. Cucaah mi tampi cu an lung aa tuai i “a hmaanmi biaknak pakhat a um maw asiloah biaknak vialte nih Pathian lung a lawmhter maw” tiah biahalnak an tuah. Kannih tah kan cawnpiakmi hna cu biatak a si i tuchan i Jehovah Tehte Hna nih an biak ning lam cu Jehovah lung a lawmhtermi lam a si ti kha kan zum taktak maw? Cu bantuk zumhnak ngeih cu a si kho taktak maw? Mah langhtertu thil kha i ruah hna u sih.

2. Lamkaltu Paul nih 1 Thesalon 1:5 ningin zeicah biatak kha a zumh?

² Lamkaltu Paul cu biatak cungah a fekmi zumhnak a ngei. (1 Thesalon 1:5 rel.) Mah a zumhnak cu a intuarnak cungah hram aa bunh lo. Mah canah Paul nih Baibal kha ṭha tein a hlathlai. Cun “Cathiang hi a dihlak in Pathian thawchuah hnawhmi a si” ti kha a zumh. (2 Tim. 3:16) Zei kong hna dah a hlathlai? Paul nih Baibal ah Jesuh cu biakammi Messiah a si ti a langhtertu thil le Judah biaknaklei hruaitu hna nih zei rel lo awkah an i thim ti a langhtertu thil hna kha a hmuh. Annih nih mi pawl kha Pathian kong biatak kan cawnpiak hna tiah an ti ko nain Pathian huatmi thil kha an tuah. (Titas 1:16) Paul cu anmah bantuk a si lo. Pual nih Baibal in zumh a duhmi kong le zumh a duh lomi kong kha biakhiahnak a tuah lo. Cawnpiak awk le “Pathian nih aa tinhmi” ningin zulh awkah timhcia a si.—Lam. 20:27.

3. A fekmi zumhnak ngeih awkah biahalnak dihlak kha leh khawh dih a hau maw? (“ ‘Chim Cawk Lomi’—Jehovah Rian Le Ruahnak” timi rinli kulh ah zoh.)

 ³ Mi cheukhat nih a hmaanmi biaknak nih cun Baibal ah a phi a um lomi biahalnak a si hmanhah zei bantuk biahalnak paoh kha an leh khawh dih awk a si tiah an ruah. Mah cu a si kho maw? Paul kong hi ruathmanh. Zumtukhat pawl kha “zeizong vialte kha hneksak dih” awkah tha a pek ko hna nain a theihthiam lomi thil tampi a um ti zong kha a cohlan. (1 Thes. 5:21) “Kan ngeihmi hngalhnak” cu “thlalang fiang lo chung i kan mui maw chialchualpi in kan hmuhmi bantuk khi a si” tiah a ti chap. (1 Kor. 13:9, 12) Paul nih thil vialte kha a hngalthiam dih lo i kannih zong kan hngalthiam dih ve lo. Asinain Paul nih a hrampi Jehovah kong biatak kha cu a hngalhthiam. A zumhmi cu biatak a si ti zong kha a hngalh.

4. Biatak kan ngei ti kan zumhnak kha zeitindah kan fehter khawh, a hmaanmi Khrihfa hna kong he aa tlaiin zeidah kan i ruah hna lai?

⁴ Biatak kan ngei ti kan zumhnak fehter khawh ning lam pakhat cu Jesuh chiahtami biaknak lam le tuchan ah Jehovah Tehte Hna nih an tuahmi kong tahchunh kha a si. Hi capar ah a hmaanmi Khrihfa hna nih (1) siasal an bia lo, (2) Jehovah min an upat, (3) biatak an duh i (4) pakhat le pakhat lungtak tein an i daw timi kong kan i ruah hna lai.

5. Pathian biak awkah aa tlakmi lam kong he aa tlaiin Jesuh sinin zeidah kan cawn khawh, a cawnpiaknak kha zeitindah kan zulh khawh?

⁵ Jesuh nih Jehovah kha a dawt tuk caah vancung a um lio ah siseh, vawleicung a um lioah siseh Jehovah lawng kha a rak biak. (Luka 4:8) A zultu pawl zong kha Jehovah lawng biak awkah a cawnpiak hna. Jesuh le zumhfekmi a zultu pawl nih biaknak ah milem kha zeitikhmanh ah an hmang bal lo.  Pathian cu hmuh khawh a si lo caah ahohmanh nih amah mui he i loin thil an ser kho lo. (Isa. 46:5) Asinain mithiang tiah an ruahmi hna mui loin an sermi milem le an sin i thlacamnak kong he aa tlaiin tah zeitin? Nawlbia Pahra i a pahnihnak nawlbia ah Jehovah nih hitin a ti: “Vancung i a ummi thil si hna seh, vawlei i a ummi thil si hna seh, ti chung i a ummi thil si hna seh, vawlei tang i a ummi thil si hna seh cu hna mui he aa loin siasal zeihmanh nan i ser lai lo . . . an hmaiah nan kun lai lo.” (Ex. 20:4, 5) Mah bia in Pathian lunglawmhter a duhmi hna nih Pathian nih biaknak caah milem hman a duh lo ti kha an hngalhthiam.

6. Tuchan Jehovah Tehte Hna nih zei bantuk biaknak lam dah an zulh?

⁶ Tuanbialei a hlathlaitu hna nih hmasa Khrihfa hna nih Pathian lawng kha an biak tiah an ti. Tahchunhnak ah, History of the Christian Church timi cauk nih hmasa Khrihfa hna nih biaknak caah milem hman kha “an huat” tiah a ti. Tuchan ah, Jehovah Tehte Hna zong nih hmasa Khrihfa hna nih an chiahtami biaknak lam kha an zulh ve. Cucaah “mithiang” asiloah vancungmi hna milem hmangin thla kan cam lo i Jesuh sin hmanhah kan cam lo. Cun Ram hmelchunhnak thil hna hmaiah kun, biak ti bantuk zong kan tuah lo. Mi nih cutin kan tuah nakhnga an kan hnek hmanhah mah Jesuh bia hi zulh dingin bia kan khiah: “Bawipa na Pathian cu va bia.”—Matt. 4:10.

7. Jehovah Tehte Hna cu a dang biaknak hna he zei ti lam in dah an i thleidan?

⁷ Tuchan ah, mi tampi nih a min a thangmi phungchimtu hna bia kha ngaih an duh. Mah phungchimtu hna kha an uar tuk hna caah biak hmanh an duh hna. Mi tampi cu an church ah an kal i an cauk hna kha an cawk i mah hruaitu hna caah tangka tampi an pek. Mi cheukhat nih cun mah phungchimtu hna nih an chimmi paoh kha an zumh dih. Mah church ah a kal lengmangmi hna sinah Jesuh lang sehlaw zeitlukin dah an lung a cawlcangh lai ti cu mitthlam cuanter awk hmanhah a har. Mah he i ralchanh in a hmaanmi lam in Pathian a biami hna nih cun minung hnu kha an zul lo. Hruaitu pawl kha kan upat ko hna nain Jesuh i a fiangmi mah cawnpiaknak hi kan cohlan: “Nan dihlak in u le nau nan si.” (Matt. 23:8-10) Biaknaklei hruaitu an si ah, ramkhellei uktu an si ah minung kha kan bia hna lo. An i timhmi zong kha kan bawm hna lo. Mah canah khoikalei hmanhah kan ṭang lo i vawlei he kan i pehtlai lo. Cucaah kannih cu Khrihfa kan si tiah aa timi a dang biaknak pawl he cun kan i thleidang tuk.—Johan 18:36.

8. Jehovah nih a min kha upatnak pek sihseh law mi kip nih hngal hna seh ti a duh ti kha zeitindah kan hngalh khawh?

⁸ Voikhat cu Jesuh nih hitin thla a cam: “Ka Pa na min cu upatnak pe ko.” Jehovah theng nih mah thlacamnak kha vancung in awthangpi in a leh i a min cu upatnak ka pek lai tiah bia aa kam. (Johan 12:28) Jesuh nih phungchim rian a ṭuan chung vialte a Pa min kha upatnak a pek. (Johan 17:26) Cucaah a hmaanmi Khrihfa hna nih Pathian min hman le midang sinah a min hngalhter kha tinvo sung in an hmuh.

9. Kumzabu pakhatnak i Khrihfa hna nih Pathian min an upat kha zeitindah an langhter?

⁹ Kumzabu pakhatnak i Khrihfabu dirh a si hnu tlawmpal ah Jehovah nih ‘an zawn a ruah hna ti cu a chimh cang hna i cu a langhnak cu anmah lakin amah min putu dingah mi aa thimmi hna hi a si.’ (Lam. 15:14) Mah Khrihfa hna cu Pathian min hman le midang sinah a  min hngalhternak tinvo sung ruangah an i uangthlar. Lamkaltu pawl le zultu pawl nih phung an chim tik le Baibal an ṭial tikah Pathian min kha an hman. * Mah lam in mi sinah Pathian min a hngalhtertu an si kha an langhter.—Lam. 2:14, 21.

10. Jehovah Tehte Hna cu Jehovah min caah miphun pakhat an si ti kha zeinihdah a langhter?

¹⁰ Jehovah Tehte Hna cu Jehovah min caah miphun pakhat an si maw? Langhtertu thil hna hi ruathmanh. Tuchan ah, biaknaklei hruaitu tampi nih Pathian cu pumpak min a ngei timi kong kha thuh awkah fakpi in an i zuam. Holh an lehmi Baibal ah Pathian min kha an hloh i thil sining cheukhat ahcun an church ah Pathian min hman kha an awnh hna lo. * Cucaah Jehovah Tehte Hna lawng hi Pathian min a upatmi an si ti cu a fiang ko. A dang biaknak phu hna nakin Pathian pumpak min kha mi sinah kan hngalhter deuh hna. Mah kong he aa tlaiin kannih nih Jehovah Tehte Hna timi kan min ningin nun awkah a si khawh chungin kan i zuam. (Isa. 43:10-12) A dang Baibal lettu hna nih an hlohnak zawn ah Jehovah min telh ṭhanmi Vawlei Thar Lehnak Baibal kha uk nuai 240 leng in kan chuah. Cun holhphun 1,000 lengin Jehovah min aa telmi Baibal hrambunhmi cauk hna zong kha kan chuah.

11. Hmasa Khrihfa hna nih biatak an duh kha zeitindah an langhter?

¹¹ Jesuh nih biatak kha a duh i Pathian kong le aa tinhnak kong biatak zong kha a duh. Jesuh cu biatak ningin a nung i midang sinah biatak kha a hngalhter hna. (Johan 18:37) Jesuh zultu taktak pawl zong nih biatak kha an duh ve. (Johan 4:23, 24) Cucaah lamkaltu Peter nih Khrihfa biaknak kha “biatak lam” tiah a auh. (2 Pet. 2:2) Biatak kha an duh tuk caah hmasa Khrihfa hna nih biaknaklei ruahnak, nunphung le biatak a ralchanhmi pumpak ruahnak hna kha an cohlang lo. (Kol. 2:8) Cu bantukin tuchan zongah, a hmaanmi Khrihfa hna nih an zumhnak le an nunning kha Jehovah Bia cungah hram an bunhnak thawngin “biatak chungah” um zungzal awkah an i zuam.—3 Johan 3, 4.

12. Uktu Bu nih kan hngalhthiam ning cu thlen a hau ti kha an hngalh tikah zeidah an tuah, mah thlennak kha zeicah an tuah?

¹² Jehovah Tehte Hna nih Baibal biatak kha kan hngalhthiam dih tiah an ti lo. A caan ah, Baibal cawnpiaknak an fianter ning asiloah Khrihfabu an dirh ning ah aa palhnak a um tawn. Mah nih kan khuaruah a harter awk a si lo. Baibal nih a caan a liam bantukin mi nih biatak kha an hngalhthiam chinchin lai tiah fiang tein a chim. (Kol. 1:9, 10) Jehovah nih biatak kha duhsah tein a phuan i biatak kha ṭha tein kan hngalhthiam khawh nakhnga lungsau tein kan hngah a hau. (Ptb. 4:18) Uktu Bu nih kan hngalhthiam ning asiloah thil cheukhat cu thlen a hau ti an hngalh tikah thlennak an tuah colh. Tuchan ah church tampi nih an mi pawl lungton an duh ca asiloah vawlei ah a min a thangmi si an duh caah an cawnpiaknak kha an thlen. Asinain Jehovah Tehte Hna nih cun Pathian he i naih deuh le Jesuh biak ningin biak an duh caah an cawnpiaknak kha an thlen. (Jeim 4:4) Thlennak kan tuah tikah vawlei mi pawl i an ruahnak aa thlen caah si loin Baibal kha ṭha deuh in kan hngalhthiam caah a si. Biatak kha kan duh.—1 Thes. 2:3, 4.

13. A hmaanmi Khrihfa hna nih a bik in an langhtermi sining cu zeidah a si, tuchan ah Jehovah Tehte Hna nih mah kha zeitindah an langhter?

¹³ Hmasa Khrihfa hna cu an ziaza ṭha tampi ruangah mi nih hngalh an si ko nain a bik in hngalh an sinak cu dawtnak ruangah a si. Jesuh nih hitin a ti: “Pakhat le pakhat nan zawn nan i ruah ahcun mi vialte nih hi hna hi amah a zultu kha an si tiah an in hngalh hna lai.” (Johan 13:34, 35) Tuchan ah, vawleicung pumpi ah a ummi Jehovah Tehte Hna cu pakhat le pakhat lungtak tein an i daw i an lung aa rual. Kan ram le kan nunphung cu aa khat lo nain chungkhar bantuk kan si caah a dang biaknak pawl he kan i thleidang. Mah kha pumhnak, civui le civuipi hna ah kan hmuh khawh. Mah nih Jehovah lung a lawmhtermi lam in kan biak ti kha zumh chinchin awkah a kan bawmh.

14. Kolose 3:12-14 ningin pakhat le pakhat cungah dawtnak langhter khawh ning a biapimi lamkhat cu zeidah a si?

¹⁴ Baibal nih “pakhat le pakhat lungtak tein i daw u” tiah tha a kan pek. (1 Pet. 4:8) Cu bantuk dawtnak langhter khawh ning lamkhat cu pakhat le pakhat kan i ngaihthiamnak thawngin le kan tlinlonak kan i maimilhpiaknak thawngin a si. Cun kan thin a kan huntertu an si hmanhah Khrihfabu chungmi dihlak cungah siannak le khualdawtnak langhternak caanṭha zong kan kawl. (Kolose 3:12-14 rel.) Cu bantuk dawtnak kan langhter  tikah a hmaanmi Khrihfa kan si ti kan langhtermi a si.

15. Hmasa Khrihfa hna nih an chiahtami biaknak lam kha zei ti lam in dah kan zulh khawh rih?

¹⁵ Hmasa Khrihfa hna nih an rak chiahtami a dang lam hna i telin biaknak lam kha kan zulh. Tahchunhnak ah, kannih cu mah hmasa Khrihfa hna bantukin dirh kan si. Anmah bantukin khualtlawng rianṭuantu, Khrihfa upa le bu rianṭuantu zong kan ngei hna. (Fil. 1:1; Titas 1:5) Cun anmah bantukin nupa sinak, ṭhitumnak, thi kong he aa tlaiin Pathian chimmi le Pathian nawlbia a zul duh lomi hna sinin Khrihfahbu kilvennak ti bantuk kong ah Jehovah nawlbia kha kan upat.—Lam. 15:28, 29; 1 Kor. 5:11-13; 6:9, 10; Heb. 13:4.

16. Efesa 4:4-6 in zeidah kan cawn khawh?

¹⁶ Jesuh nih mi tampi nih a zultu kan si tiah an ti lai nain an si taktak lai lo tiah a ti. (Matt. 7:21-23) Baibal nih ni hmanung bik caan ahcun mi tampi nih “biaknak phung hi a lenglei in an i tlaih” lai tiah a ti. (2 Tim. 3:1, 5) Asinain Baibal nih Pathian lung a tongmi “zumhnak pakhat” a um tiah fiang tein a chim.—Efesa 4:4-6 rel.

17. Tuchan ah ahote dah Jesuh hnu a zul i a hmaanmi zumhnak pakhat ningin a nung?

¹⁷ Tuchan ah a hmaanmi zumhnak pakhat ningin ahote dah a nung? Langhtertu thil hna kha kan hngalh cang hna. Jesuh cawnpiakmi le hmasa Khirhfa hna nih an zulhmi biaknak lam kha kan zulh. Mah a zulmi cu Jehovah Tehte Hna lawng kan si. Jehovah miphun pakhat si le Jehovah le aa tinhnak biatak kong hngalh cu zeitlukin dah tinvo sung a si. Cucaah kan dihlak in a fekmi zumhnak he biatak i tlaih peng kha kan duh.