1. Akoz en kantite dimoun i konfize?

OZORDI i annan en kantite larelizyon ki dir ki zot Kretyen e ki zot ador Bondye dan en bon fason. Sanmenm sa en kantite dimoun i konfize! Zot demande, “Eski i annan en sel vre larelizyon, oubyen eski tou larelizyon i fer plezir Bondye?” Konman Temwen Zeova, eski nou asire ki sa ki nou pe ansennyen i laverite e ki lafason ki nou pe ador Zeova i sa sel fason ki fer li plezir? Eski nou vreman kapab annan sa lasirans? Annou vwar bann levidans.

2. Dapre 1 Tesalonisyen 1:5, akoz zapot Pol ti asire ki i ti’n trouv laverite?

² Zapot Pol ti asire ki i ti’n trouv laverite. (Lir 1 Tesalonisyen 1:5.) I pa ti krwar sa zis akoz i ti zwaye. O kontrer Pol ti etidye Parol Bondye o profon. I ti krwar ki “tou Lekritir i enspire par Bondye.” (2 Tim. 3:16) Ki i ti aprann dan Parol Bondye? Pol ti vwar laprev ki Zezi ti Mesi. Sa ti en keksoz ki bann sef larelizyon Zwif ti swazir pour inyore. Sa bann sef larelizyon ti ipokrit. Zot ti dir ki zot ansenny dimoun laverite konsernan Bondye me zot ti fer bann keksoz ki Bondye pa kontan. (Tit 1:16) Pol pa ti parey sa bann zonm, i pa ti swazir ki bout dan Parol Bondye i pou krwar e ki bout i pa pou krwar. I ti pare pour ansenny e aplik “tou keksoz lo lavolonte Bondye.”​—Akt 20:27.

3. Eski nou bezwen annan larepons pour tou nou kestyon pour nou asire ki nou dan laverite? (Vwar osi bwat “ Bann travay ek bann panse Zeova i ‘tro bokou pour rakonte.’”)

 ³ Serten dimoun i krwar ki vre larelizyon i devret kapab reponn tou kestyon, menm bann kestyon konsernan bann keksoz ki Labib pa koz lo la. Eski i normal pour zot ekspekte sa? Annou vwar legzanp zapot Pol. I ti ankouraz bann Kretyen dan premye syek pour “verifye tou keksoz” me i ti osi dir ki i annan en kantite keksoz ki i pa ti konpran. (1 Tesa. 5:21) I ti dir: “Nou konnesans pa konplet.” Apre i ti dir: “Sa ki nou vwar la konmela i brouye konmsi nou pe get dan en laglas metal.” (1 Kor. 13:9, 12) Pol pa ti konpran tou keksoz. Nou osi parey. Me Pol ti konpran bann laverite de baz konsernan Zeova. Sa ki Pol ti konnen ti fer li asire ki sa ki i krwar ladan, i laverite.

4. Ki mannyer nou kapab pli asire ki nou dan laverite e ki nou pou diskite konsernan bann vre Kretyen?

⁴ En fason nou kapab pli asire ki nou dan laverite, i ler nou konpar lafason ki Zezi ti ador Bondye avek lafason ki Temwen Zeova i ador Bondye ozordi. Dan sa lartik, nou pou vwar ki bann vre Kretyen i (1) pa ador zidol, (2) annan respe pour non Zeova, (3) kontan laverite e (4) kontan kanmarad en kantite.

5. Ki nou aprann avek legzanp Zezi konsernan sa bon fason pour ador Zeova e ki mannyer nou kapab aplik sa?

⁵ Zezi i kontan Zeova en kantite. Sa i fer ki ler Zezi ti dan lesyel e ler i ti lo later, i ti ador zis Zeova. (Lik 4:8) I ti ansenny son bann disip pour fer parey. Ni Zezi, ni son bann disip fidel pa ti servi stati ler zot ti ador Bondye. Bondye i  envizib, alor napa nanryen ki zonm pou kapab fer ki pou resanble li. (Iza. 46:5, NWT) Me ki Labib i dir konsernan fer bann stati pour bann swadizan sen e priy avek zot? Bondye ti donn pep Izrael sa Dis Komannman e sa enn dezyenm i dir: “Ou pa devret fer en stati oubyen okenn keksoz ki annan laform en keksoz ki anler dan lesyel oubyen anba lo later . . . Ou pa devret tonm azenou devan zot.” (Egz. 20:4, 5, NWT) Sa bann parol i montre ki Zeova pa oule nou ador zidol.

6. Ki legzanp Temwen Zeova i swiv ozordi dan lafason ki zot ador Bondye?

⁶ Bann istoryen i dir ki dan letan bann zapot, bann Kretyen ti ador zis Bondye. Par egzanp, sa liv History of the Christian Church i dir ki bann Kretyen dan premye syek “ti pou ay sa nide” pour annan stati dan bann landrwa ladorasyon. Ozordi Temwen Zeova i swiv legzanp sa bann Kretyen dan premye syek. Nou pa priy avek stati bann “sen” oubyen bann lanz. Nou pa ni menm priy avek Zezi. Nou pa salye paviyon oubyen fer okenn keksoz ki pou montre ki nou pe ador nou pei. Nenport keksoz ki dimoun i esey fer nou fer, nou determinen pour obei parol Zezi ki dir: “Se Zeova ou Bondye ki ou devret adore.”​—Mat. 4:10.

7. Dan ki fason Temwen Zeova i diferan avek tou lezot larelizyon?

⁷ Ozordi, en kantite dimoun i kontan pour ekout bann paster ki popiler. Zot sitan admir sa bann paster ki i konmsi zot pe ador sa bann paster. En kantite dimoun i al zot lanmes, aste zot bann liv, donn zot ek zot bann lorganizasyon en kantite larzan. Serten dimoun i krwar tou sa ki sa bann paster i dir. Zot kontan pour vwar sa bann paster zis parey zot ti pou kontan pour vwar Zezi si i ti lo later. Me bann ki ador Zeova dan sa bon fason napa okenn sef lo later. Menm si nou annan respe pour bann ki pe dirize dan lorganizasyon Temwen Zeova, nou aksepte sa lansennyman Zezi ki dir: “Zot tou zot frer.” (Mat. 23:8-10) Nou pa ador zonm, ki swa zot bann sef relizye oubyen dirizan politik. Nou pa siport zot bann lobzektif. O kontrer nou reste separe avek sa lemonn. Dan sa fason, nou vreman diferan avek lezot larelizyon ki dir ki zot Kretyen.​—Zan 18:36.

8. Ki mannyer nou konnen ki Zeova i anvi ki son non i ganny glorifye e ki nou fer lezot konn son non?

⁸ En fwa, Zezi ti priye e dir: “Papa glorifye ou non.” Zeova ti reponn sa lapriyer avek en lavwa for sorti dan lesyel e i ti promet ki i ti pou glorifye son non. (Zan 12:28) Pandan son minister lo later, Zezi ti glorifye non son Papa. (Zan 17:26) Alor, bann vre Kretyen i santi ki i en loner pour servi non Bondye e pour fer lezot konn sa non.

9. Ki mannyer bann Kretyen dan premye syek ti montre ki zot annan respe pour non Bondye?

⁹ Dan premye syek, pa bokou letan apre ki kongregasyon Kretyen ti ganny etabli, Zeova ti “aksepte pour swazir dimoun parmi lezot nasyon pour ki zot vin en pep ki port son non.” (Akt 15:14) Sa bann Kretyen ti fyer pour servi non Bondye e pour fer lezot konn non Bondye. Bann zapot ek disip ti servi non Bondye ler zot ti anons sa bon nouvel e ler zot ti ekri bann liv Labib. * Dan sa fason,  zot ti montre ki zot ti bann sel dimoun ki ti pe fer lezot konn non Bondye.​—Akt 2:14, 21.

10. Ki mannyer nou konnen ki zis Temwen Zeova ki pe fer dimoun konn non Bondye?

¹⁰ Eski Temwen Zeova pe vreman fer dimoun konn non Bondye? Annou vwar bann levidans. Ozordi en kantite sef relizye pe fer tou sa ki zot kapab pour anpes dimoun konnen ki Bondye i annan en non. Zot in retir non Bondye dan zot tradiksyon Labib e dan serten ka, zot pa oule dimoun i servi non Bondye dan zot legliz. * I kler ki zis Temwen Zeova ki pe donn non Bondye sa respe ki i merite. Nou pe fer konn non Bondye avek bokou plis dimoun ki lezot larelizyon. Nou pe fer nou mye pour montre ki nou vreman bann Temwen Zeova. (Iza. 43:10-12) Nou’n enprim plis ki 240 milyon kopi New World Translation of the Holy Scriptures e nou’n met non Bondye dan bann plas kot lezot tradiksyon Labib in tire. Nou’n osi fer bann piblikasyon baze lo Labib dan plis ki mil langaz e nou’n servi non Bondye dan sa bann piblikasyon.

11. Ki mannyer bann Kretyen dan premye syek ti montre ki zot kontan laverite?

¹¹ Zezi ti kontan laverite, setadir laverite konsernan Bondye ek son plan. Zezi ti viv an armoni avek laverite e i ti  fer lezot konn sa laverite. (Zan 18:37) Bann vre disip Zezi ti osi kontan laverite. (Zan 4:23, 24) Annefe Pyer ti apel larelizyon Kretyen “laverite.” (2 Pyer 2:2) Bann Kretyen dan premye syek ti vreman kontan laverite, alor zot ti rezet bann lansennyman relizye, bann tradisyon ek bann lopinyon ki pa ti an armoni avek laverite. (Kol. 2:8) Pareyman ozordi, bann vre Kretyen i fer bokou zefor pour “kontinyen viv an armoni avek laverite.” Zot fer sir ki zot krwayans ek zot fason viv i baze lo Parol Zeova.​—3 Zan 3, 4.

12. Ki i arive ler Konsey Direkter i vwar ki zot bezwen fer azisteman dan nou konprenezon e akoz zot fer sa bann sanzman?

¹² Temwen Zeova pa dir ki zot toultan konpran tou sa ki dan Labib. Parfwa, zot in fer fot dan lafason ki zot in eksplik en lansennyman Labib oubyen lafason ki zot in organiz kongregasyon. Nou pa devret sirprann, parski Labib i dir ki pep Zeova pou konpran laverite pli byen anmezir ki letan i pase. (Kol. 1:9, 10) Zeova i fer konn laverite ptitapti e nou devret pare pour esper avek pasyans ziska ki nou konpran laverite pli byen. (Prov. 4:18) Ler Konsey Direkter i vwar ki nou bezwen fer azisteman dan nou konprenezon, zot fer sa sanzman deswit. En kantite larelizyon ozordi i sanz zot bann lansennyman akoz zot anvi fer plezir zot bann dimoun ouswa zot anvi vin popiler. Me Temwen Zeova i fer bann sanzman parski nou anvi vin pli pros avek Bondye e ador li dan menm fason ki Zezi ti ador li. (Zak 4:4) Ler nou fer bann sanzman, nou pa fer li akoz lopinyon bann dimoun dan sa lemonn in sanze me akoz nou konpran Labib pli byen. Nou kontan laverite!​—1 Tesa. 2:3, 4.

13. Ki sa kalite pli enportan ki bann Kretyen i demontre e ki mannyer Temwen Zeova i demontre sa kalite?

¹³ Bann Kretyen dan premye syek ti byen koni pour zot bann bon kalite. Me sa kalite pli enportan ki zot ti annan, i lanmour pour kanmarad. Zezi ti dir: “Par sa, tou dimoun pou konnen ki zot mon disip, si zot annan lanmour antre zot.” (Zan 13:34, 35) Temwen Zeova partou dan lemonn i annan sa vre lanmour parmi zot e zot ini. Nou diferan avek tou lezot larelizyon parski menm si nou sorti dan diferan pei e nou annan diferan kiltir, nou parey en fanmir. Nou vwar sa dan nou bann renyon ek lasanble. Sa i fer nou pli asire ki nou pe ador Zeova dan sa fason ki fer li plezir.

14. Dapre Kolosyen 3:12-14, ki mannyer nou kapab montre ki nou kontan kanmarad en kantite?

¹⁴ Labib i ankouraz nou pour “kontan kanmarad en kantite.” (1 Pyer 4:8) En fason ki nou demontre sa kalite lanmour i ler nou kontinyen siport kanmarad e pardonn kanmarad volonterman. Nou osi rod bann loportinite pour demontre zenerozite ek lospitalite anver tou nou bann frer ek ser dan kongregasyon menm anver bann ki’n ofans nou. (Lir Kolosyen 3:12-14.) Ler nou demontre sa kalite lanmour, nou montre ki nou bann vre Kretyen.

15. Dan ki lezot fason nou swiv legzanp bann Kretyen dan premye syek?

¹⁵ Nou swiv legzanp bann Kretyen dan premye syek dan lezot fason osi. Par egzanp, lafason ki nou ganny organize i menm fason ki sa bann Kretyen ti  ganny organize. Nou annan sirveyan rezyonal, ansyen ek bann serviter kongregasyon zis parey zot. (Fili. 1:1; Tit 1:5) Parey sa bann Kretyen, nou annan respe pour bann lalwa Zeova konsernan sèks ek maryaz. Nou dakor avek sa ki Bondye i dir konsernan disan e nou protez kongregasyon kont bann ki pa anvi swiv lalwa Bondye.​—Akt 15:28, 29; 1 Kor. 5:11-13; 6:9, 10; Ebr. 13:4.

16. Ki nou aprann dan Efezyen 4:4-6?

¹⁶ Zezi ti dir ki en kantite dimoun ti pou dir ki zot son bann disip me pa tou ki ti pou pe swiv li. (Mat. 7:21-23) Labib i dir nou ki dan bann dernyen zour, en kantite dimoun ti pou “fer krwar ki zot annan devosyon pour Bondye.” (2 Tim. 3:1, 5) Me Labib i osi dir nou ki i annan “en sel lafwa” ki annan laprouvasyon Bondye.​—Lir Efezyen 4:4-6.

17. Lekel ki pe swiv legzanp Zezi ozordi e ki pe ador Zeova dan sa bon fason?

¹⁷ Lekel ki pe vreman ador Bondye ozordi? Nou’n vwar levidans. Nou’n vwar legzanp ki Zezi in kite konsernan vre ladorasyon e lafason ki bann Kretyen dan premye syek ti swiv sa legzanp. I annan zis en sel larelizyon ki pe vreman ador Bondye dan sa bon fason e sa i Temwen Zeova. I en gran loner pour form parti pep Zeova e pour konn laverite lo Zeova ek son plan. Alor, annou fer tou sa ki nou kapab pour montre ki nou asire ki nou dan laverite.