ARTIKULO KʼAWUAITA 42
Bia kʼawuabara wãrĩnuta erbʉta
«Nekʼãrẽ jõmabera bia akʉidua akʉza nebiatrʉ erpanaidua» (1 TES. 5:21).
TRÃBI 142 Bedʼea zromata awuantayi Jeowa kʼarebadeba
KʼÃRẼTA ŨDUDAITA *
1. ¿Kʼãrẽa ẽbẽra mejãchaʉba kʼawuada ẽ saʉ̃ta ĩjãita?
IDI ewade religion mejãchaʉba jarapanʉ Daizezeba kãgabʉde yiwidʼipanʉta. Maʉ̃ kʼarea ẽbẽra mejãchaʉba kʼawuada ẽ saʉ̃ta ĩjãita. Maʉ̃ kʼarea ãyikʉza widipanʉ: «¿Religionʼarãra abapaibʉka?». Mawũã ẽ bʉrʉ, ¿Daizezeitara jõma yibiaka religionʼrãra? Dayirãra Jeowa ʉ̃rʉ Kʼawuabipanʉrã baera, ¿wãrĩnu ĩjãpanʉka dayirãba jaradiabʉra ẽbẽrarãʼa? ¿Dayirã iyaʼa yiwidʼibʉra iya bia akʉbʉta? ¿Dayirãba wãrĩnu ĩjãseabʉka maʉ̃ra? Maʉ̃ ʉ̃rʉ akʉdayi.
2. ¿Kʼãrẽa Pablobara kʼawuabasi wãrĩnuta erbʉta? (1 Tesalonicenses 1:5).
2 Apostol Pablobara kĩrãkita kʼawuabasi wãrĩnuta erbʉta (akʉra 1 Tesalonicenses 1:5). Iya bari ĩjã ẽ basi, awuarabʉrʉ ĩjãsi Daizeze Bedʼeata biʼia akʉbasi baera. Iyara ĩjãbasi «Daizezeba jõma bʉbisi iyi bedʼeara» (2 Tim. 3:16). ¿Iya kʼãrẽta kʼawuasi Daizeze Bedʼea akʉbʉdeba? Pablobara Daizeze Bedʼeadeba kĩrãkita ũdusi Jesura Dayirã ẽdrʉbibarita, maʉ̃ra judiora religion nokʼorabara kʼawuakĩrã ẽ basi. Daizeze ĩjãbʉa apanʉrabara jarapanasi Daizezera erpanʉta, mamina ãya nekʼãrẽ obʉdeba ũdubibasi maʉ̃ra mawũã ẽãta (Tito 1:16). Pablora awuarabasi, iya jõma Daizeze Bedʼeara daucha ĩjãbasi. «Jõma» «ũrãgʼa Daizezedʼera» jaradiasi akʉza osi (Hech. 20:27).
3. ¿Dayirãba jõma kʼawuabaibaraka bedʼea widibʉra biʼia kʼawua bʼaita wãrĩnuta erbʉta? (Akʉra rekuadro « Jeowaba nekʼãrẽ obʉra akʉza iya krĩchabʉra bedʼeakĩrãbasibʉrʉ, maʉ̃ra jõma jarabe ẽ bakasi»).
3 Ʉ̃kʉrʉba jarapanʉ religion wãrĩnubara jõma panʉibara bedʼea widipanʉra Daizeze Bedʼeade neẽmina. ¿Maʉ̃ra wãrĩnuka? Akʉdaya Pablo yizata. Iya wuabemara kristianora jarasi «Nekʼãrẽ jõmabera bia akʉidua», mamina akʉza jarasi bʉta nemejãcha iya kʼawua ẽãta (1 Tes. 5:21). Iya bʉsi «ne jõma daucha kʼawuabe ẽ» akʉza jarasi espejo torõrõabʉ akʉi kĩrãkʼabʉta (1 Cor. 13:9, 12). Pablobara jõma kʼawua ẽ basi, dayirãbida jõma kʼawuada ẽ. Mamina Pablobara biʼia kʼawuabasi Daizeze Bedʼeadebema nããra kʼawuadata Jeowa ʉ̃rʉ, iya maʉ̃ kʼawuabʉdeba kʼawuabasi wãrĩnuta erbʉta.
4. ¿Kʼãrẽta oseapanʉ kʼawuaita wãrĩnuta erbʉta akʉza kʼãrẽta kʼawuadai naʉ̃ artikulodera?
4 ¿Kʼãrẽta oseapanʉ kʼawuaita wãrĩnuta erbʉta? Nããra akʉibara Jesuba sãwũã yiwidʼimarẽã jaradia amaenata akʉza Jeowa ʉ̃rʉ Kʼawuabipanʉrãba opanʉta. Naʉ̃ artikulode kʼawuadayi, kristianora wãrĩnuaraba 1) nekʼãrẽ oma yiwidʼida ẽãta, 2) Jeowa trʉ̃ta wawia ũdubipanʉta, 3) kãgapanʉ wãrĩnu erpanʉra akʉza 4) soiduba yiya kãgapanʉta.
DAYIRÃRA NEKʼÃRẼ OMA YIWIDʼIDA Ẽ
5. Jesu sãwũã yiwidʼibadadeba, ¿kʼãrẽta kʼawuapanʉ akʉza dayirãba sãwũã oseapanʉ iyide kĩrãkʼa?
5 Jesu ʉ̃tʉbaside akʉza nama egorodebaside Jeowaʼabʉrʉ yiwidʼibasi, iya kãgabasi baera (Luc. 4:8). Iyi kʼaidupanʉraʼa jaradiasi iyabaʉ odamarẽã. Jesuba mia iyi kʼaidupanʉraba zokʼada ẽ basi nekʼãrẽ omata yiwidʼita. Jeowara jaurede baera miabaʉba parãna ẽ iyi kĩrãkʼachuta (Is. 46:5). ¿Biabʉka santoʼa apanʉra yiwidʼita? Daizezebara 10 bedʼea diadara, yi nããrabemane Jeowaba jarasi: «Bʉa orãra nekʼãrẽ oma ʉ̃tʉbemata, nekʼãrẽ drʉadebemata akʉza doedabemata. Maʉ̃ra nekʼãrẽ oma nãã sãkokode baraidua» (Éx. 20:4, 5). Maʉ̃ bedʼeabara kĩrãkʼita jarabʉ, Daizezeba kãgabʉde.
6. ¿Kʼãrẽ yizadeba yiwidʼipanʉ Jeowa ʉ̃rʉ Kʼawuabipanʉrãra idi ewadera?
6 Nekʼãrẽ berabarida ʉ̃rʉ estudiabarirabara jarasida nããrabema kristianorabara Daizeze abapaibʉrʉ yiwidʼipanasita. Libro kristianora nebʉra ʉ̃rʉ bedʼeabʉba jarabʉ «nããrabema kristianoraba bia akʉda ẽ bakasi» ãyaʼa jarasidabʉrʉ erpanamarẽã nekʼãrẽ oma yiwidʼita ãyi ãba yi jʉrebarimae (History of the Christian Church). Idi ewaride Jeowa ʉ̃rʉ Kʼawuabipanʉrãba abarika opanʉ kristianora siglo nããrabemaranebema kĩrãkʼa. Dayirãra yiwidʼi ẽ «santora», mia angelera, mia Jesuʼa. Akʉza bandera izareada ẽ. Kʼãrẽ berabaribʉrʉsida okĩrãpanʉ Jesuba jaradata: «Bʉ Nokʼo Daizezetrʉ ibia jaradua, izhi bedʼeatrʉ aribʼaedua» (Mat. 4:10).
7. ¿Kʼãrẽne awuarapanʉ Jeowa ʉrʉ Kʼawuabipanʉrãra wuabemara religionebara?
7 Idira ẽbẽra mejãchaʉta iglesiadebemara nokʼo kʼaidupanʉ. Ãya maʉ̃ra ẽbẽrarã mejãcha kãga baera ãyaʼa yiwidʼibʉ kĩrãkʼa ũdubibʉ. Maʉ̃ra iglesiadera mejãcha birabibʉ ẽbẽraba, edapanʉ ãya libro odata, platata mejãcha diapanʉ organizasion ãya erbʉa diaya akʉza maʉ̃ra bedʼeara jõma ĩjãpanʉ. Maʉ̃ra ẽbẽrarã mejãcha sobiabʉ maʉ̃ra pastorʼra ũdubʉrʉba Jesu ũdui audre. Mamina wãrĩnu Jeowa yiwidʼipanʉrabara nokʼorata erbʉ ẽ ãyi zokʼabarita. Yi nãã panʉra wawia ũdubipanʉmina ũrĩpanʉ bedʼea Jesuba kĩrãkʼita jaradara: «Marã jõma mebẽrãta bʼea» (Mat. 23:8-10). Dayirãra yiwidʼipanʉ ẽ ẽbẽrarã religionebemara mia politikadebemara. Politikadeda wãna ẽ, mia ãyi religione akʉza naʉ̃ drʉdebemara kĩrãkʼa panʉ ẽ. Mawũã opanʉneba ũdubipanʉ awuarapanʉta kristianora apanʉnebara (Juan 18:36).
DAYIRÃBA DAIZEZE TRɄ̃TA WAWIA ŨDUBIPANɄ
Kristianora wãrĩnuarabara soiduba jaradiapanʉ wuabemara Jeowa ʉ̃rʉ. (Akʉra parrapo 8-10 bayeda). *
8. ¿Sãwũã kʼawuapanʉ Jeowabara kãgabʉta iyi trʉ̃ra neneẽã erpanamarẽã akʉza dayirãba ũdukʼawuabimarẽã ẽbẽra jõmaʼa?
8 Ewari aba Jesuba yi Zezeʼa jarasi: «Zeze bʉ trʉ̃ra yi zroma babira». Jesuba wididara Jeowaba panʉsi, iya jarasi nemi jĩgʉa ʉ̃tʉba, mʉ̃ trʉ̃ra yi zroma babiyi (Juan 12:28). Jesuba nama egorode jaradiabasidera, ewari jõma yi zroma babisi yi Zeze trʉ̃ra (Juan 17:26). Maʉ̃ kʼarea yibia kristianoarabara Daizeze trʉ̃ zokʼaita akʉza wuabemara jaradiaita maʉ̃ trʉ̃ ʉ̃rʉ.
9. ¿Sãwũã ũdubisi kristianora siglo nããrabemarabara Daizeze trʉ̃ra wawia ũdubipanasita?
9 Kongregasion kristiana oda dããra ẽãne nããrabema siglode, Jeowabara «jʉrʉkata jʉrʉside pʉwʉrʉrata, maʉ̃ranebemata pʉwʉrʉ aba jidaita iyi trʉ̃ita» (Hech. 15:14). Maʉ̃ra kristianorãra mejãcha sobiapanasi Daizeze trʉ̃ta kʼawuapanʉ baera akʉza wuabemaraʼa jaradiapanʉ baera. Ãyara zokʼasida Daizeze trʉ̃ra ẽbẽrarã jaradiabaside akʉza Daizeze Bedʼea bʉsidade. * Mawũã opanʉneba ũdubisida ãyabʉrʉ Daizeze trʉ̃ra erbasita (Joel 2:32).
10. ¿Nekʼãrẽba ũdubibʉ Jeowa ʉ̃rʉ Kʼawuabipanʉrãbʉrʉ zokʼapanʉta Daizeze trʉ̃ra?
10 ¿Jeowa ʉ̃rʉ Kʼawuabipanʉrãra Daizezeba jidasika iyi trʉ̃ erbamarẽã? Akʉdaya kʼãrẽba ũdubibʉta mawũãta. Nokʼora religionʼrabara nejõma opanʉ Daizeze trʉ̃ meraita ẽbẽrarãba kʼawuada ẽ bamarẽã. Ãyi Daizeze Bedʼeadera Daizeze trʉ̃ra ãĩ bʉesida, ãyi iglesiadera kãgada ẽ maʉ̃ trʉ̃ zokʼaira. * ¿Ẽbẽra abaʉba jaraseabʉka Jeowa ʉ̃rʉ Kʼawuabipanʉrãbara zokʼada ẽãta Jeowa trʉ̃ra akʉza wawia ũdubipanʉ ẽãta? Dayirãbara wuabemara religionʼraira Daizeze trʉ̃ra audre jaradiapanʉ. Wãrĩnu bʼaira dayirã trʉ̃ba jarabʉ kĩrãkʼa, dayirãbara Jeowa ʉ̃rʉ kʼawuabipanʉ ẽbẽrarãra (Is. 43:10-12). Dayirãba Traducción del Nuevo Mundo opanʉ 240 millone audre akʉza naʉ̃nera Daizeze trʉ̃ra eda bʉepanʉ wuabemaraba ãĩ bʉedamae. Akʉza kartarãra ʉ̃tʉ zebipanʉ 1.000 ʉ̃ta bedʼea awuara awuaka Daizeze Bedʼeadeba adewara maʉ̃nebida Daizeze trʉ̃ra ũduseapanʉ.
DAYIRÃBA WÃRĨNU ERBɄRA KÃGA
11. ¿Nããrabema kristianorabara sãwũã ũdubisida wãrĩnuta erpanʉra kãgabʉta?
11 Jesubara kãgabasi wãrĩnu Daizeze Bedʼea erbʉra akʉza Daizezeba oita kãgabʉsida. Jesura iya maʉ̃ wãrĩnu erbʉdebasi akʉza wuabemarabida jaradiabasi (Juan 18:37). Wãrĩnu Jesu kʼaidupanʉrabara soiduba kãga ãya wãrĩnu erpanʉra (Juan 4:23, 24). Pedrobara jarasi kristiano bʼaira o iyiarade wãi kĩrãkʼabʉta (2 Ped. 2:2). Nããrabema kristianorabara maʉ̃ wãrĩnura kãga baera ĩjãna ẽ basi religionʼraba jaradiabʉra, ãyi kulturaba akʉza wãrĩnuba jarabʉdebara ãya awuara krĩchabadasida (Col. 2:8). Idibida kristianora wãrĩnuarãra zarea opanʉ ãya wãrĩnu erbʉde panaita (3 Juan 3, 4). ¿Sãwũã opanʉ? Jõma ãya nekʼãrẽ opanʉra opanʉ Daizeze Bedʼeadeba, ãya ĩjãbʉsida.
12. Dayi nãã panʉraba ũdudara dayirãba ĩjãbʉta audre biʼia jara ũrĩbibarata, ¿kʼãrẽta opanʉ akʉza kʼãrẽa?
12 Idi ewade Jeowa pʉwʉrʉbara jarada ẽ jõma Daizeze Bedʼeade eda jarabʉra biʼia kʼawuapanʉta, edaʉde aña jaradiabada dayirãba ĩjãpanʉta akʉza organizasionta sãwũã erpanʉnebida. Mamina maʉ̃ kʼarea aña krĩchada ẽ baibara, Daizeze Bedʼeaba jaradiabʉ baera ewari berabari wãne Jeowa pʉwʉrʉbara audre bia ũrĩ wãnaita (Col. 1:9, 10). Jeowabara wãrĩnura ũdubi wã wika wikade, maʉ̃ kʼarea jʉ̃ãnaibara Jeowaba biʼia kʼawuabiyeda Daizeze Bedʼeata (Prov. 4:18). Dayi nãã panʉraba ũdudara dayirãba ĩjãbʉra audre biʼia jara ũrĩbibarata, ãyara ñabasea mawũã opanʉ. Ʉ̃kʉrʉ iglesiara kristianora apanʉraba nekʼãrẽ awuara opanʉnera ẽbẽrarãita mawũã ẽ bʉrʉ ãyita audre ũdukʼawuadamarẽã. Jeowa organizasionbara nekʼãrẽ awuara opanʉ Jeowaʼa yiwidʼibʉ ũdubita akʉza Jesuba obada kĩrãkʼa odaita (Sant. 4:4). Dayirãba nekʼãrẽ awuara opanʉ ẽ ẽbẽrarãba awuara krĩchabʉ baera awuarabʉrʉ audre ũrĩ wãna baera Daizeze Bedʼeaba jarabʉta. Kãgapanʉ dayirãba wãrĩnu erpanʉra (1 Tes. 2:3, 4).
DAYIRÃRA SOIDUBA YIYA KÃGAPANɄ
13. ¿Saʉ̃ nebia audre yibia kristianoaraba ũdubidaibarãra akʉza idi ewadera Jeowa ʉ̃rʉ Kʼawuabipanʉrãbara sãwũã ũdubipanʉ maʉ̃ra?
13 Siglo nããrabema kristianoraitara ãya nebia erbʉdebemara audre yibiabasi kãga ũdubita. Jesubara jarasi: «Mawũãtrʉ jõmaʉ̃ba kʼawuadʼaya marã mʉ pẽwã bʼeta, zhiya kʉãgʼa bʼebʉrʉ» (Juan 13:34, 35). Idi ewadera Jeowa ʉ̃rʉ Kʼawuabipanʉrãra yiya kãgapanʉ naʉ̃ drʉa jõmaʉ̃nẽ. Wuabemara religionʼranebara awuara opanʉ. Dayirãra drʉa awuara awuarakadebemamina mebẽrã kĩrãkʼapanʉ. Maʉ̃ kãgara ũdupanʉ ãba yi jʉrepanʉne akʉza asamblearane. Naʉ̃ba biʼia kʼawuabibʉ dayirãbara Jeowaba kãgabʉde yiwidiʼbarabʉta.
14. Colosenses 3:12-14ba jarabʉdebara, ¿sãwũã ũdubiseapanʉ soiduba kãgara wuabemara?
14 Daizeze Bedʼeabara jarabʉ: «Mejãcha yi kãgapanaidua» (1 Ped. 4:8). Maʉ̃ kãgara ũdubipanʉ kĩrãduapanʉne wuabemaraba ne aña obʉrʉde. Jʉrʉpanʉ sãwũã mebẽrã bia edadaita akʉza nekʼãrẽ daya erbʉ diaita ãya nemitia osidamina dayirã ʉ̃rʉ (akʉra Colosenses 3:12-14). Maʉ̃ kãga ũdubipanʉba kʼawuabibʉ kʼairata kristianora wãrĩnura.
ĨJÃIRA «ABA»
15. Kristianora siglo nããrabemarane kĩrãkʼa akʉza, ¿kʼãrẽta opanʉ Daizezeʼa yiwidʼibʉta ũdubita?
15 Akʉza opanʉ kongregasion siglo nããrabemaba oamaenata nekʼãrẽ awuara opanʉneba. Bari jaraita kristianora siglo nabemane kĩrãkʼa ãba dauchanʉmʉ erpanʉ baera kongregasion akʉbari zõrãrãta, zõrãrã kongregasionebemarata akʉza zõrãra kʼarebabarirata (Filip. 1:1; Tito 1:5). Dayirãba sãwũã akʉpanʉta mia erkʼãĩ ʉ̃rʉ, juwa jidai ʉ̃rʉ, wa ʉ̃rʉ akʉza kongregasion bia akʉbʉdeba ẽbẽrarã Jeowa bedʼea ũrĩkĩrã ẽãnebara, opanʉ kristianora siglo nããrabemaraba oamaenata (Hech. 15:28, 29; 1 Cor. 5:11-13; 6:9, 10; Heb. 13:4).
16. ¿Kʼãrẽta kʼawuaseapanʉ Efesios 4:4-6ba jarabʉdebara?
16 Jesubara jarasi ẽbẽra mejãchaʉba jaradaibasita iyi kʼaidubemarata, mamina maʉ̃ra wãrĩnu ẽ baita (Mat. 7:21-23). Akʉza Daizeze Bedʼeabara jarabʉ ewari jõbodoarera «bayi Daizeze ĩjãbʉ abʉde aripe oẽãta» (2 Tim. 3:1, 5). Mamina Daizeze Bedʼeara jarabʉ ĩjãira abapaibʉta Daizezeba bia akʉbʉra (akʉra Efesios 4:4-6).
17. ¿Idi ewadera kʼairatrʉ wãrĩnu Jesu kʼaidupanʉ akʉza kʼairaba wãrĩnu opanʉ Daizezeba jarabʉta?
17 Idi ewadera ¿kʼairabʉrʉ aripe ĩjãpanʉ? Kʼawuasida sãwũã aripe opanʉta Jesuba jaradiadade sãwũã yiwidʼibarata Daizezeʼa. Adewara kristianora siglo nããrabemarabida mawũã osidata. Naʉ̃ba ũdubibʉ Jesuba jaradiada kĩrãkʼa opanʉra, Jeowa ʉ̃rʉ Kʼawuabipanʉrãta. Kʼãrẽaba yibia dayirãitara dayirãra Jeowa pʉwʉrʉ baera, wãrĩnuta kʼawuapanʉ baera Jeowa ʉ̃rʉ akʉza iya kʼãrẽta kãgabʉta dayirãita. Ewari jõmaʉ̃nẽ zarea odadrʉ wãrĩnuta erpanaita.
TRÃBI 3 Tú me das fuerza, confianza y valor
^ par. 5 Naʉ̃ artikulodera akʉdayi sãwũã aripe Jeowaʼa yiwidʼibarata Jesuba jaradiabadadeba akʉza sãwũã mawũã abarika osidata nããrabemara Jesu kʼaidubemaraba. Akʉza ũdubidayi sãwũã Jeowa ʉ̃rʉ Kʼawuabipaʉrãbara mawũã abarika opanʉta.
^ par. 9 Akʉra rekuadro «¿Empleaban los primeros cristianos el nombre de Dios?», La Atalaya 1 julio 2010de pagina 6.
^ par. 10 2008dera, Papa Benedicto XVI jarasi iglesia katolikadera Daizeze trʉ̃ra «zokʼada ẽ baibarata», mia ãyi trãbarabʉde, mia ãyi yiwidʼibarabʉde.
^ par. 63 POTORABA ŨDUBIBɄTA: Jeowa organizasionbara Traducción del Nuevo Mundo 200 ʉ̃ta bedʼea awuara awuaraka ʉ̃tʉ zebibʉda, ẽbẽrarãba ãyi bedʼeade akʉdamarẽã Daizeze trʉ̃ ʉ̃rʉ.
