1. Nemene la hna hnyingën hnene la itre atr enehila, nge pine nemen?

 AME enehila, nyimutre la itre hmi ka qaja ka hape, thei angatre la nyipici. Celë hi matre, itre xan a hnyingën ka hape, “Hapeu, caasi hi la nyipi hmi maine Akötresieti pena a kapa asë la nöjei hmi?” Ame koi epun, ka nyipici kö la itre ini hna hamën hnene la Itretre Anyipici Iehova? Angatre kö a atrunyi Akötresie thenge la aja i Nyidrë? Tro sa ce wang la itre mekun ka sa la itre hnying celë.

2. Thenge la 1 Thesalonika 1:5, pine nemene matre xecie koi Paulo aposetolo laka, nyidrëti ngöne la nyipici?

² Atre hnyawa hi Paulo aposetolo laka, nyidrëti ngöne la nyipici. (E jë la 1 Thesalonika 1:5.) Tha hnene kö laka, nyidrëti a madrin nge lolo la itre ini hnei nyidrëti hna kapa. Ngo hnene pe laka, hnei nyidrëti hna inine la Trengewekë i Akötresie. Ame koi nyidrë, “qaathene la ua i Akötresie la nöjei hna cinyihan asë.” (2 Tim. 3:16) Nemene la hnei nyidrëti hna inin? Hnei nyidrëti hna öhne laka, Iesu la Mesia hna thingehnaean, lo hna methinën hnene la itre hene ne hmi angetre Iudra. Angatr a qaja ka hape, itre hlue i Akötresieti angatr, ngo tha mama kö ngöne la itre huliwa i angatr. (Tito 1:16) Ame Paulo, tha hnei nyidrëti kö hna iëne la itre ini nyine troa mejiun kow. Hnei nyidrë hna inine me trongën “la eamo i Akötresie.”—Itre hu. 20:27.

3. Hapeu, nyipiewekë kö troa sa la nöjei hnyinge së, matre qaja ka hape, easë ngöne la nyipici? (Wange ju la hna eköhagen hna hape, “ ‘Kösaue Nge Tha Nune e Kö’ La Itre Huliwa Me Mekune i Iehova.”)

³ Ame koi itre xan, kola sa la nöjei hnying asë hnene  la nyipi hmi, tune lo itre hnying tha hna qaja kö hnei Tusi Hmitrötr. Ngo hapeu, ka nyipici kö lai? Hanawang la tulu i Paulo. Hnei nyidrëti hna ithuecatr kowe la itre Keresiano troa ‘waipengöne hnyawa la enyipicine la nöjei ewekë asë.’ Ngo atre hi nyidrë laka, hetre hnei nyidrëti hna tha trotrohnin. (1 Thes. 5:21) Öni Paulo: “Sine hi la atrehmekune the së,” nge “easë a thulu ngöne la ketre ithulu ka hajihaj.” (1 Kor. 13:9, 12) Tui Paulo, hetre ini fe hne së hna tha trotrohnin. Ngo ame pe, atre hi nyidrëti la aja i Iehova. Celë hi matre, xecie koi Paulo laka, nyidrëti hi ngöne la nyipici!

4. Nemene la ka amamane laka, easë hnyawa ngöne la nyipici, nge nemene la hne së hna troa ce wang göne la itre nyipi Keresiano?

⁴ Loi e tro sa ce wang la aqane melëne Iesu la nyipici ekö, memine la Itretre Anyipici Iehova enehila. Celë hi ka troa anyipicine laka, easë ngöne la nyipici. Tro fe sa ce wang laka, itre nyipi Keresiano a (1) nuetrije la itre idrola, (2) metrötrëne la ëje i Iehova, (3) hniine la nyipici, me (4) ihnimikeu.

5. Nemene la ini hne së hna xom qa ngöne la aqane atrunyi Akötresie hnei Iesu, nge tro sa nyitipu nyidrë tune kaa?

⁵ Tru la ihnimi Iesu koi Akötresie. Celë hi matre, hnei nyidrëti hna atrunyi Iehova e koho hnengödrai tune e celë fen. (Luka 4:8) Ketre, hnei Iesu hna upe la itretre drei nyidrë troa nyitipu nyidrë. Nge tha hnei angatre kö hna thili kowe la itre hnasaatr. Pine laka, ketre u Akötresie, matre thatreine kö tro sa xome la ketre ewekë matre  troa atrunyi nyidrë! (Is. 46:5) Hapeu, ijije kö tro sa thili kowe la itre idrola? Ame ngöne lo Trene lao Wathebo, hnei Iehova hna qaja ka hape: “The tro kö eö a nyi idola thatraqai ’ö, me acei tunëne la kete ewekë e koho hnengödrai, me e celë fen . . . the tro kö eö a thiliju kow’ it’ ej.” (Eso. 20:4, 5) Maine easa ajane troa amadrinë Akötresie, loi e tro sa trongëne la wathebo cili.

6. Drei la hna nyitipune hnene la Itretre Anyipici Iehova?

⁶ Önine la itre ka inamacan ka hape, Akötresieti hmekuje hi la hna atrun hnene la itre pane Keresiano ekö. Kolo fe a qaja ngöne la ketre itus (History of the Christian Church) ka hape, tha hnei angatre kö hna amë ngöne la itre uma ne hmi angatr “la itre hnasaatr me itre idrola” ke, itre ewekë lai hnei angatr hna sisin. Ame enehila, Itretre Anyipici Iehova a nyitipune la itre pane Keresiano. Tha easë kö a thili kowe la itre hnasaatr ka nyihatrene la itre angela, me thithi koi Iesu. Ketre, tha easë kö a thili kowe la itre ewekë ka nyihatrene la itre musi atr. Easë hmekuje hi a trongëne lo hna qaja hnei Iesu, ka hape: “Iehova Akötresi eö la nyine tro eö a thili kow.”—Mat. 4:10.

7. Nemene la eisapengönene la Itretre Anyipici Iehova memine la itre xaa hmi?

⁷ Ame enehila, alanyimu la itre ka dreng me atrune la itre hene ne hmi. Itre atr a tro kowe la itre uma hmitrötr, me itöne la itre itusi angatr, me kuië manie matre sajuëne la aja i angatr. Itre atr a drenge me wangatrune la itre hene ne hmi, matre thëthëhmi Iesu fe hë hnei angatr! Ngo tha celë kö la hne së hna kuca. Eje hi laka, easa metrötrëne la itre ka elemekene la huliwa së. Ngo atre fe hi së lo hna qaja hnei Iesu, ka hape: “Itre trejin asë pë hë nyipunie.” (Mat. 23:8-10) Tha easë kö a atrune la itre atr, tune la itre hene ne hmi me itre hene politik, me sajuëne la itre mekuna i angatr. Easë pe a iananyi memine la kuci politik memine la fene celë. Nge tha easë fe kö a sine la itre huliwa ne hmi.—Ioane 18:36.

8. Nemene la ka amamane laka, aja i Iehova tro sa atrune la ëje i Nyidrë?

⁸ Ame la ketre ijin, hnei Iesu hna thith me hape: “Kaka, epi tro pe a ahmitrötrëne la ëje i nyipë.” Hnei Iehova hna sa me qaja ka hape, tro Nyidrëti a ahmitrötrëne la ëje i Nyidrë. (Ioane 12:28) Ketre, hnei Iesu hna atrune la ëje ne la Keme i nyidrë ngöne la hna cainöj. (Ioane 17:26) Ketre tune fe, madrine catr la itre nyipi Keresiano troa qaja la ëje i Akötresie kowe la nöjei atr.

9. Tune kaa la aqane amamane la itre pane Keresiano laka, angatr a metrötrëne la ëje i Akötresie?

⁹ Ame lo kola acile la pane ekalesia ekö, hnei Iehova hna “iëne qaathe[ne la itre atre ne fen,] la ketre nöj thatraqane la ëje i nyidrë.” (Itre hu. 15:14) Tru la madrine i angatr troa qaja la ëje i Akötresie kowe la nöjei atr. Angatr a cainöjëne la ëje i Nyidrë ka hmitrötr, me cinyihane ej. * Angatre hi lai a amamane laka, angatre la nöje ka xome la ëje i Akötresie.—Itre hu. 2:14, 21.

10. Nemene la ka amamane laka, Itretre Anyipici Iehova la nöje ka xome la ëje i Akötresie?

 ¹⁰ Hapeu, Itretre Anyipici Iehova kö la nöje ka xome la ëje i Akötresie? Ame enehila, hnene la itre hene ne hmi hna juetrëne la ëje i Akötresie kowe la itre atr. Hnei angatr hna xometrije ej qa hnine la Tusi Hmitrötr, me wathebone la itre atr troa qaja la ëje i Nyidrë ngöne la angatr a hmi. * Eje hi, Itretre Anyipici Iehova hmekuje hi la ka qaja la ëje i Akötresie. Nge easa kuca la hne së hna atrein, matre troa metrötrëne la ëj hne së hna xom! (Is. 43:10-12) Eje hi, ase hë sasaithe la 240 milio lao Tusi Hmitrötr hna fejan tune lo hna hape, Tusi Hmitrötr Fene Ka Hnyipixe Hna Ujën. Ame ngöne la Tusi Hmitrötr cili, hna amë hmaca la ëje i Iehova ngöne la itre götrane hna xometrij hnene lo itre ka ujëne la Tusi Hmitrötr ekö. Ketre, easa fejan la itre itus ka qaja la ëje i Iehova ngöne la 1 000 nge hetre munëne lao qene hlapa!

11. Tune kaa la aqane amamane la itre pane Keresiano ekö laka, angatr a hniine la nyipici?

¹¹ Iesu a wangatrune la nyipici koi Akötresie me itre aja i Nyidrë. Hnei Iesu hna melëne la nyipici me cainöjën ej koi itre xan. (Ioane 18:37) Hnene fe la itretre drei Iesu hna wangatrune la nyipici. (Ioane 4:23, 24) Öni Peteru aposetolo  göne la hmi Keresiano ka hape, eje “la gojenyi ne nyipici.” (2 Pet. 2:2) Eje hi, itre pane Keresiano a hniine la nyipici. Celë hi matre, hnei angatre hna nuetrije la itre ini ka thoi, me itre aqane mekun, me aqane mel ka isazikeu memine la hna qaja hnei Tusi Hmitrötr. (Kol. 2:8) Ketre tune fe la itre nyipi Keresiano enehila, angatr a “tro ngöne la nyipici” me mel thenge la hna qaja hnei Tusi Hmitrötr.—3 Ioane 3, 4.

12. Nemene la hna kuca hnene la itre trejin ka elemekene la huliwa së ngöne la angatr a öhne laka, nyipiewekë troa wange hmaca la ketre ini, nge pine nemen?

¹² Tha hna qaja kö hnene la Itretre Anyipici Iehova ka hape, atrepengön asë hi angatre la nyipici. Ame ekö, ka tria fe la aqane trotrohnine angatr la itre xaa ini. Ngo tha sesëkötre kö së ke, öni Tusi Hmitrötr, troa mama trootro me lualai la nyipici ngöne la nyipi ijin. (Kol. 1:9, 10) Iehova la ka amamane la nyipici, matre nyipiewekë tro sa atreine itreqe hnyawa. (Ite edomë 4:18) Ame la kola öhne hnene la itre trejin ka elemekene la huliwa së laka, ka tria la aqane trotrohnine së la ketre ini, angatr a canga saze me amamane la nyipi aliene lai ini. Ame la itre xaa hmi, hnei angatr hna saze la itre xaa ini matre troa amadrinëne la itre atr me hane kepe angatr. Ngo ame pe la Itretre Anyipici Iehova, angatr a saze la itre xaa ini ka tria, matre troa easenyi koi Akötresie, me nyitipu Iesu. (Iako. 4:4) Ketre, tha easë kö a wange hmaca la ketre ini matre troa amadrinë itre xan, ngo pine laka, trotrohnine hë së la hna qaja hnei Tusi Hmitrötr. Easa hniine la nyipici!—1 Thes. 2:3, 4.

13. Nemene la thiina ka nyipiewekë thene la itre nyipi Keresiano, nge nemene la aqane amamane la Itretre Anyipici Iehova la thiina cili enehila?

¹³ Hnene la itre pane Keresiano hna amamane la itre thiina ka lolo. Ngo ame la thiina ka sisitria, tre, ihnim. Öni Iesu: “Qa ngöne lai, tro la nöjei atr asë a wangatrehmekune laka, nyipunieti la itretre drei ni, e tro nyipunie a ihnimikeu.” (Ioane 13:34, 35) Ame enehila, ka ihnim me caas la Itretre Anyipici Iehova e cailo fen. Tha ceitune kö la hmi së memine la itre xaa hmi ke, easa caas ngacama isa nöje së kö me aqane mele së. Celë hi hne së hna öhne ngöne la itre icasikeu me itre asabele. Kola anyipicine laka, easë hnyawa hi ngöne la nyipi hmi.

14. Thenge la Kolose 3:12-14, nemene la aqane tro sa amamane la ihnimi së kowe la itre xan?

¹⁴ Tusi Hmitrötr a qaja ka hape, “catre jë ihnimikeu.” (1 Pet. 4:8) Ame la ketre aqane tro sa amamane la ihnimi së, tre, ene la troa nue la ngazo ne la itre xan me xomihni angatr. Easa ajane troa amamane la ihnimi së me kuca la loi kowe la itre atrene la ekalesia, me kowe fe la itre ka akötrë së. (E jë la Kolose 3:12-14.) Celë hi thiina ka sisitria thene la itre nyipi Keresiano.

15. Nemene la itre götrane la hmi së ka ceitu memine la itre pane Keresiano ekö?

¹⁵ Ame ngöne la hmi së ke, hetre itre götrane ka ceitu memine la aqane hmi ne la itre pane Keresiano ekö. Celë hi ka mama ngöne la aqane eköthe la hmi së. Ame ekö, hna acile la itre aposetolo. Nge ame enehila, hna acile la itre trejin  ka iwai trootro, itre qatre thup, me itre atre ixatua. (Fil. 1:1; Tito 1:5) Ketre, easë fe a metrötrëne la itre wathebo i Iehova göne la ce meköle trefën, me faipoipo, me aqane troa huliwane la madra, memine la aqane troa thupëne la ekalesia qa ngöne la itre ka tha ietra.—Itre hu. 15:28, 29; 1 Kor. 5:11-13; 6:9, 10; Heb. 13:4.

16. Nemene la ini hne së hna xom qa ngöne la tusi Efeso 4:4-6?

¹⁶ Hnei Iesu hna perofetan laka, alanyimu la itre ka troa qaja ka hape, itre ka xötrethenge nyidrë, ngo tha trongëne pe angatr la itre ini qaathei nyidrë. (Mat. 7:21-23) Ketre, hnei Paulo aposetolo hna perofetan laka, ame ngöne la itre drai ne la pun, nyimutre la itre atr ka troa “nyi ka hmi.” (2 Tim. 3:1, 5) Ngo öni Tusi Hmitrötr, “casi hi la lapaun” hna kapa hnei Akötresie.—E jë la Efeso 4:4-6.

17. Drei la ka nyitipu Iesu enehila me lapaune tui nyidrë?

¹⁷ Drei la ka nyitipune la lapaune i Iesu enehila? Hne së hna ce wang la itre igötranene la nyipi hmi tune lo hna amamane hnei Iesu. Nge hne së fe hna ce wang la aqane nyitipu nyidrë hnene la itre pane Keresiano ekö. Celë hi matre, ijije hi tro sa qaja ka hape, Itretre Anyipici Iehova la ka nyitipu Iesu enehila. Drei la madrin ka tru troa sine la nöje i Iehova, me atre la nyipici göi Nyidrë me aja i Nyidrë! Haawe, the luelue kö së. Easë hnyawa hi ngöne la nyipi hmi!