ADZESUA ASƐM 42
Fa Gyedzi A No Mu Yɛ Dzen Suo Nokwar No Mu Pintsinn
“Hom nsɔ adze nyina nhwɛ; hom nsuo dza oye mu dzen.” —1 THESS. 5:21.
NDWOM 142 Hom Mma Yenkura Hɛn Enyidado No Mu Dzen
DZA YERUBOSUSU HO *
1. Ebɛnadze ntsi na nkorɔfo pii hɔn adwen etu afora?
ƆSOM mpempem pii na hɔnara wɔse wɔyɛ Christianfo, na wɔkã dɛ wɔsom Nyankopɔn wɔ nokwar mu. Ɔnnyɛ nwanwa dɛ iyi ama nkorɔfo pii hɔn adwen etu afora! Wobisa dɛ, “Aso ɔsom kortsee na ɔsɔ Nyankopɔn n’enyi, anaa ɔsom nyinara sɔ n’enyi?” Aso yɛgye dzi ankasa dɛ dza yɛkyerɛkyerɛ afofor no nye nokwar no, na ɔkwan a Jehovah Adasefo fa do som no na Jehovah gye to mu? Aso obotum ayɛ yie dɛ yebenya gyedzi a ɔtse dɛm? Hom mma yensusu adanse a ɔwɔ hɔ no ho.
2. Dɛ mbrɛ 1 Thessalonicafo 1:5 kyerɛ no, nna ebɛnadze ntsi na ɔsomafo Paul gye dzi ankasa dɛ ɔwɔ nokwar no mu?
2 Nna ɔsomafo Paul gye dzi ankasa dɛ ɔwɔ nokwar no mu. (Kenkan 1 Thessalonicafo 1:5.) Nna gyedzi a ɔtse dɛm no nngyina mbrɛ osi tse nka do. Mbom, ɔdze nsi sũaa Nyankopɔn n’Asɛm no. Nna ɔgye dzi dɛ “Kyerɛwsɛm biara fi [Nyankopɔn] ahom mu.” (2 Tim. 3:16) Ebɛnadze na Kyerɛwnsɛm a osũae no maa ohunii? Paul hun adanse a odzi mũ a ɔkyerɛ dɛ Jesus nye Messiah a wɔhyɛɛ noho bɔ no. Dɛm adanse yi, Jewfo nyamesom akandzifo no hyɛɛ da ara powee. Nna dɛm akandzifo a wɔyɛ ndabrabafo yi kã dɛ wɔyɛ Nyankopɔn n’ananmusifo, naaso wɔdze hɔn ndwuma paa no. (Titus 1:16) Nna Paul nntse dɛ dɛm akandzifo no, osiandɛ oenndzi Kyerɛwnsɛm no ne fã bi do, nna ɔammpow ne fã bi so. Nna ɔayɛ krado aber nyina dɛ ɔbɛkã “Nyankopɔn apam nyina” akyerɛ afofor, na noara so dze abɔ ne bra.—Andw. 20:27.
3. Aso ɔwɔ dɛ yenya hɛn nsɛmbisa nyina ho mbuae ana yaagye edzi ankasa dɛ yɛwɔ nokwar no mu anaa? (Hwɛ adakaba a wɔato dzin “ Jehovah No Ndwuma Nye N’adwen—‘Ɔdɔɔ Sõ Dɛ Wɔbɛkan’” no so.)
3 Nyimpa binom susu dɛ ɔwɔ dɛ nokwar som tum ma wonya asɛmbisa biara ho mbuae a nsɛmbisa a Bible nnkã ho asɛm mpo ka ho. Aso asɛm yi tɔ asomu? Hom mma yensusu Paul ho nhwɛ. Ɔhyɛɛ ne mfɛfo Christianfo no nkuran dɛ wɔnhwehwɛ “adze nyina” mu nhwɛ dɛ ɔyɛ nokwar a. Naaso noara kor yi ara so gyee too mu dɛ ndzɛmba beberee wɔ hɔ a nna ɔnntse ase. (1 Thess. 5:21) Ɔkãa dɛ, “Yenyim fã-na-fã.” Na ɔdze kaa ho dɛ, “yɛnam ahwehwɛ mu hu adze wɔ [abɛbu] mu.” (1 Cor. 13:9, 12) Nna ɔnnyɛ biribiara na Paul tse ase, na dɛmara so na ɔtse wɔ hɛn afamu. Naaso, nna Paul tse nokwasɛm a ɔfa Jehovah ne tsirmpɔw ho no ase. Nna ɔwɔ ndzɛmba pii a obotum egyina do akã dɛ ɔwɔ nokwar no mu!
4. Gyedzi a yɛwɔ dɛ yɛwɔ nokwar no mu no, yebesi dɛn ahyɛ mu dzen? Ebɛnadze na yebosusu ho afa nokwar Christianfo ho?
4 Gyedzi a yɛwɔ dɛ yɛwɔ nokwar no mu no, sɛ yebotum ahyɛ mu dzen a, adze kor a yebotum ayɛ nye dɛ, yɛdze kwan a Jehovah Adasefo fa do som Nyankopɔn no bɔtoto ɔkwan a Jesus kyerɛɛ dɛ yɛmfa do nsom no ho. Adzesua yi mu no, yebohu dɛ nokwar Christianfo (1) pow abosonsɔr, (2) dzi Jehovah ne dzin nyi, (3) ma nokwar no som bo ma hɔn, na (4) wɔwɔ ɔdɔ a no mu yɛ dzen ma hɔnho.
YƐPOW ABOSONSƆR
5. Ebɛnadze na yebotum esũa efi Jesus hɔ wɔ kwan pa a ɔfaa do soom Nyankopɔn no ho, na yebesi dɛn dze dza ɔkyerɛkyerɛɛ hɛn no ayɛ edwuma?
5 Jesus wɔ ɔdɔ a no mu yɛ dzen ma Nyankopɔn. Iyi kaa no ma ɔsom Jehovah nkotsee ber a nna ɔwɔ sor nye ber a ɔbaa asaase do no. (Luke 4:8) Dɛmara na ɔkyerɛkyerɛɛ n’ekyirdzifo dɛ wɔnyɛ. Jesus o, n’esuafo anokwafo no o, hɔn mu biara ammfa ehonyi eenndzi dwuma wɔ no som mu. Nyankopɔn yɛ Sunsum, ntsi biribiara nnyi hɔ a nyimpa dasanyi bɛyɛ a yebotum dze egyina hɔ ama Jehovah! (Isa. 46:5) Na hɔn a nyimpa binom bu hɔn dɛ wɔyɛ ahotseweefo a wɔyɛ hɔn ehonyi na wɔbɔ hɔn mpaa no so ɛ? Mbra Du no mu no, ahyɛdze a otsĩa ebien a Jehovah dze mae nye dɛ: “Mma nnyɛ ohonyi bi, anaa adze a ɔwɔ wimu wɔ sor, anaa dza ɔwɔ asaase do wɔ famu, . . . ne saso mma woho: mma mmbɔ wo mu adze mma hɔn.” (Ex. 20:4, 5) Asɛm yi mu da hɔ ma hɔn a wɔpɛ dɛ wɔsɔ Nyankopɔn n’enyi no nyina.
6. Ebɛn ɔkwan na Jehovah Adasefo fa do som Nyankopɔn ndɛ?
6 Abakɔsɛm akyerɛwfo gye to mu dɛ tsetse Christianfo no soom Nyankopɔn nkotsee. Dɛ nhwɛdo no, nwoma bi a wɔato dzin History of the Christian Church kã dɛ nkyɛ tsetse Christianfo no “bɔpow koraa” dɛ wɔdze ehonyi bedzi dwuma wɔ mbea a wohyia mu som no. Ɔkwan a tsetse Christianfo no faa do soom Nyankopɔn no, ɔnoara na Jehovah Adasefo so fa do som Nyankopɔn ndɛ. Yɛmmbɔ “ahotseweefo” hɔn ehonyi anaa abɔfo mpaa. Yɛmmbɔ Jesus mpo mpaa. Na dɛmara so na yɛmmbɔ hɛn mu adze mma ɔman a yɛtse mu no n’ahyɛnsewdze ahorow. Ɔmmfa ho dza obesi biara no, yɛawe ataa do dɛ yebedzi asɛm a Jesus kãe yi do: “Sɔr Ewuradze wo Nyankopɔn.”—Matt. 4:10.
7. Ebɛn nsonsonee kɛse na ɔda Jehovah Adasefo nye ɔsom afofor ntamu?
7 Ndɛ, nyimpa pii dzi asɔfo a wɔagye dzin ekyir. Hɔn ekyirdzifo pɛ hɔn asɛm araa ma ɔtse dɛ mbrɛ wɔsom hɔn mpo. Nyimpa bɔ pee do wɔ hɔn kyapor dan mu, wɔtɔ hɔn mbuukuu, na woyi sika akɛse dze boa dwuma biara a dɛm akandzifo yi dzi no. Nyimpa binom gye dza wɔkã biara dzi. Wɔpɛ hɔn asɛm araa ma sɛ wohu hɔn a, ɔtse dɛ mbrɛ woehu Jesus! Naaso, hɔn a wɔsom Jehovah nokwar mu no nnyi asɔfo. Ɔwɔ mu dɛ yɛda obu edzi kyerɛ hɔn a wodzi ndzɛmba enyim no dze, naaso yɛma Jesus n’asɛm a no mu da hɔ yi tsena hɛn adwen mu. Ɔkãa dɛ: “Hom nyina yɛ enuanom.” (Matt. 23:8-10) Yɛnnsom nyimpa, dɛ wɔyɛ nyamesom akandzifo anaa wiadze etumfo. Dɛmara so na yɛnntaa hɔn nyamesom anaa hɔn amanyɛsɛm mu dwumadzi biara ekyir. Yenngyina ɔfã biara na yɛtwe hɛnho fi wiadze no ho. Iyi nyina ma yɛda nsew wɔ ɔsom ahorow a wɔdɛ wɔyɛ Christianfo no ho.—John 18:36.
YEDZI JEHOVAH NE DZIN NYI
Nokwar Christianfo dze enyigye kã Jehovah ho asɛm kyerɛ afofor (Hwɛ nkyekyɛmu 8-10) *
8. Yesi dɛn hu dɛ Jehovah pɛ dɛ wɔhyɛ ne dzin no enyimnyam na wɔda no edzi kyerɛ obiara?
8 Ber bi, Jesus bɔɔ mpaa dɛ: “Egya, hyɛ wo dzin enyimnyam.” Jehovah nankasa fi sor dze ndze a no mu yɛ dzen buaa dɛm mpaabɔ yi, na ɔkãa dɛ ɔbɛhyɛ ne dzin enyimnyam. (John 12:28) Jesus hyɛɛ n’Egya ne dzin no enyimnyam wɔ n’asaase do ɔsom edwuma no nyina mu. (John 17:26) Ntsi, ntseasee wɔ mu dɛ nokwar Christianfo bu no dɛ ɔyɛ ho kwan dɛ wɔdze Nyankopɔn ne dzin no bedzi dwuma na wɔaada no edzi so akyerɛ afofor.
9. Ebɛn kwan do na tsetse Christianfo no daa no edzi dɛ wodzi Nyankopɔn ne dzin nyi?
9 Ber a wɔhyehyɛɛ tsetse Christianfo asafo no, annkyɛr koraa na Jehovah daan n’enyi “bɔhwɛɛ amanaman, dɛ oribeyi hɔn mu ɔman ama ne dzin.” (Andw. 15:14) Nna tsetse Christianfo no bu no dɛ ɔyɛ ho kwan kɛse dɛ wɔdze Nyankopɔn ne dzin bedzi dwuma na wɔaada no edzi akyerɛ afofor. Wɔdze Nyankopɔn ne dzin no dzii dwuma wɔ asɛnka mu nye ber a wɔrekyerɛw Bible mu nwoma ahorow no. * Wɔdaa no edzi dɛ wɔyɛ nkorɔfo a Nyankopɔn ne dzin da hɔn do.—Andw. 2:14, 21.
10. Ebɛn adanse na ɔwɔ hɔ a ɔkyerɛ dɛ Jehovah Adasefo yɛ nkorɔfo a Jehovah ne dzin da hɔn do?
10 Aso Jehovah Adasefo yɛ nkorɔfo a Nyankopɔn ne dzin da hɔn do? Hom mma yɛnhwɛ adanse yi. Ndɛ, nyamesom akandzifo pii ayɛ dza wobotum biara dɛ wɔbɛma nkorɔfo ehu dɛ Nyankopɔn nnyi dzin ankasa. Woeyi Nyankopɔn ne dzin efi hɔn Bible nkyerɛase ahorow mu. Afei so, binom abra dɛ mma wɔmmfa Nyankopɔn ne dzin nndzi dwuma wɔ hɔn asɔr mu. * Ɔda edzi kofee dɛ Jehovah Adasefo nkotsee na wɔdze Jehovah ne dzin no dzi dwuma, na iyi kyerɛ dɛ wɔdze obu na enyidzi a ɔfata ma dzin no. Ɔsom biara nnyi hɔ a ɔrema nkorɔfo ehu Nyankopɔn ne dzin no gyedɛ Jehovah Adasefo! Iyi kyerɛ dɛ yɛreyɛ dzin a ɔda hɛn do dɛ Jehovah Adasefo no ho edwuma. (Isa. 43:10-12) Yeetsintsim New World Translation of the Holy Scriptures no bɔbor ɔpepem 240. Beebi a Bible asekyerɛfo binom eyiyi Jehovah ne dzin no efi no, dɛm Bible yi dze ahyehyɛ hɔ. Afei so, yetsintsim Bible ho nwoma a ɔtwe adwen si Jehovah ne dzin do wɔ kasa bɔbor 1,000 mu!
NOKWAR NO SOM BO MA HƐN
11. Ebɛnadze na tsetse Christianfo no yɛe dze kyerɛɛ dɛ nokwar no som bo ma hɔn?
11 Nna nokwar no som bo ma Jesus. Nokwar a yɛrekã ho asɛm yi yɛ dza ɔfa Nyankopɔn nye dza ɔbɛyɛ nyina ho. Dza Jesus yɛe wɔ n’asetsena mu no daa no edzi dɛ nna ɔgye nokwar no dzi, na ɔkãa ho asɛm kyerɛɛ afofor. (John 18:37) Jesus n’ekyirdzifo no so, nna nokwar no som bo ma hɔn papaapa. (John 4:23, 24) Nokwasɛm nye dɛ ɔsomafo Peter kãa Christiansom ho asɛm dɛ ɔno nye “nokwar” kwan no. (2 Pet. 2:2) Nna nokwar no som bo ma tsetse Christianfo no papaapa. Dɛm ntsi, wɔpoow nyamesom nkyerɛkyerɛ, amambra, nye nsusui a ɔnye nokwar no nnhyia no. (Col. 2:8) Ndɛ so, nokwar Christianfo bɔ mbɔdzen dɛ ‘wɔbɛnantsew nokwar no mu,’ na wɔdze hɔn gyedzi nye hɔn asetsena kwan nyina gyina Bible no do pintsinn.—3 John 3, 4.
12. Sɛ hɔn a wodzi ndzɛmba enyim no hu dɛ no ho hia dɛ wɔyɛ nsesa a, ebɛnadze na wɔyɛ? Ebɛnadze ntsi na wɔyɛ nsesa a ɔtse dɛm?
12 Jehovah Adasefo nnkãe wɔ beebiara dɛ wonyim nokwar a ɔwɔ Bible mu no nyina. Ɔtɔ da a, wodzi mfom wɔ hɔn nkyerɛkyerɛ nye akwankyerɛ bi a wɔdze ma mu. Naaso, onnyi dɛ iyi yɛ hɛn nwanwa, osiandɛ Bible no ma no mu da hɔ dɛ, ber rokɔ do no, nokwar nyimdzee a Nyankopɔn no nkorɔfo wɔ no bɔdɔɔ sõ. (Col. 1:9, 10) Jehovah yi nokwar no edzi nkakrankakra. Ntsi, ɔwɔ dɛ yenya ɔpɛ dɛ yebenya abotar atweɔn dɛ nokwar no ne kan no bɔkɔ do ahyerɛn. (Mbɛ. 4:18) Sɛ hɔn a wodzi ndzɛmba enyim no hu dɛ, Kyerɛwnsɛm mu ntseasee bi a yɛwɔ anaa mbrɛ yesi yɛ ndzɛmba ahorow bi no, no ho hia dɛ yɛyɛ nsesa wɔ mu a, wɔnntwentweɔn hɔn ananadze koraa. Asɔrasɔr pii a wɔkã dɛ wɔyɛ Christianfo no, wɔyɛ nsesa mbrɛ ɔbɛyɛ a wɔbɔsɔ hɔn asɔrmba no enyi anaa wɔnye wiadze no bɔbɔ anan. Naaso, nsesa a Jehovah n’ahyehyɛdze no yɛ no twe hɛn bɛn Nyankopɔn, na ɔnye kwan a Jesus kyerɛɛ dɛ yɛmfa do nsom no hyia. (Jas. 4:4) Nnyɛ dza ɔrokɔ do ndɛ anaa mbrɛ nkorɔfo si yɛ hɔn adze no na yegyina do yɛ nsesa. Mbom nsesa a yɛyɛ no gyina Kyerɛwnsɛm mu ntseasee a odzi mũ do. Nokwar no som bo ma hɛn papaapa!—1 Thess. 2:3, 4.
YƐWƆ ƆDƆ A NO MU YƐ DZEN MA HƐNHO
13. Ebɛn su tsitsir na nokwar Christianfo da no edzi? Ebɛn kwan do na Jehovah Adasefo da su a ɔtse dɛm edzi ndɛ?
13 Nna wonyim tsetse Christianfo no dɛ wɔda su pa ahorow pii edzi. Naaso, nna su tsitsir a wɔdze nyim hɔn nye ɔdɔ. Jesus kãa dɛ: “Ɔnam yi do na nyimpa nyina bohu dɛ hom yɛ m’esuafo, sɛ hom wɔ ɔdɔ wɔ homho nkorkor a.” (John 13:34, 35) Ndɛ, Jehovah Adasefo a wɔwɔ wiadze nyina wɔ ɔdɔ ma hɔnho na koryɛ so wɔ hɔn ntamu. Ahyehyɛdze biara nnyi hɔ a ɔtse dɛ hɛndze no, osiandɛ ɔdɔ a yɛwɔ ma hɛnho no nngyina ɔman a yefi mu, hɛn honamenyi hwɛbea, anaa dzibea a yɛwɔ do. Yehu dɛ enuanom da ɔdɔ mapa a ɔtse dɛm edzi wɔ asafo nhyiamu, ɔmansin, nye ɔmantɔw ehyiadzi ase. Iyi ma yɛgye dzi paa dɛ hɛn som nye dza Jehovah gye to mu.
14. Dɛ mbrɛ Colossaefo 3:12-14 kyerɛ no, ebɛn ɔkwan tsitsir na yebotum afa do ada ɔdɔ a no mu yɛ dzen edzi akyerɛ hɛnho?
14 Kyerɛwnsɛm no tu hɛn fo dɛ yennya “ɔdɔ a no mu yɛ dzen” mma hɛnho nkorkor. (1 Pet. 4:8) Ɔkwan kor a yebotum afa do ada ɔdɔ a ɔtse dɛm edzi no nye dɛ yɛdze hɛn mfom bɛkyekyɛ hɛnho na yeebu hɛn enyi egu hɛn nuanom hɔn sintɔ do. Bio so, yɛhwehwɛ ho kwan a yɛdze bɛda ayamuyie nye ahɔhoyɛ edzi akyerɛ hɛn nuanom nyina a hɔn a wɔafom hɛn mpo ka ho. (Kenkan Colossaefo 3:12-14.) Ɔdɔ a ɔtse dɛm a yɛwɔ ma hɛnho no na ɔda hɛn edzi dɛ yɛyɛ nokwar Christianfo ampa.
“GYEDZI KOR”
15. Ebɛnadze na yɛyɛ dze kyerɛ dɛ yesũasua kwan a tsetse Christianfo no faa do somee no?
15 Kwan a nna tsetse Christianfo fa do som Nyankopɔn no, dɛm kwan no ara na hɛn so yɛfa do som. Wɔahyehyɛ hɛn dɛ mbrɛ nna wɔahyehyɛ tsetse Christianfo no. Dɛ nhwɛdo no, yɛwɔ ahwɛfo akwantufo, asafo mu mpanyimfo, nye asafo mu asomfo dɛ mbrɛ nna wɔwɔ no. (Phil. 1:1; Titus 1:5) Dɛ mbrɛ tsetse Christianfo no yɛe no, yedzi Nyankopɔn ne mbra a ɔfa awar na nda ho no do, yebu bɔgya dɛ ɔyɛ krɔnkrɔn, na yɛwɔ ɔpɛ dɛ yɛbɔbɔ asafo no ho ban efi ndzebɔnyɛfo a wonnu hɔnho no ho.—Andw. 15:28, 29; 1 Cor. 5:11-13; 6:9, 10; Heb. 13:4.
16. Ebɛnadze na yesũa fi asɛm a ɔwɔ Ephesusfo 4:4-6 no mu?
16 Jesus kãa dɛ nyimpa pii bɛkã dɛ wɔyɛ n’esuafo, naaso nnyɛ hɔn nyina na wɔbɛyɛ n’esuafo ankasa. (Matt. 7:21-23) Bio so, Bible no bɔɔ kɔkɔ dɛ nda a odzi ekyir mu no, nyimpa pii bɛyɛ hɔnho dɛ gyama “wɔwɔ nyamesompa” araa ma. (2 Tim. 3:1, 5) Naaso Bible no ma no mu da hɔ pefee dɛ “gyedzi kor” anaa ɔsom kor na Nyankopɔn gye to mu.—Kenkan Ephesusfo 4:4-6.
17. Ndɛ, woananom na wodzi Jesus n’ekyir na wɔsom Nyankopɔn nokwar mu?
17 Ndɛ, woananom na wɔsom Nyankopɔn nokwar mu? Yeesusu adanse a ɔwɔ hɔ no ho. Yɛahwɛ ɔkwan a Jesus kyerɛɛ dɛ yɛmfa do nsom Nyankopɔn nye mbrɛ tsetse Christianfo no faa ɔkwan a ɔtse dɛm do soom Nyankopɔn no. Sɛ yɛhwɛ adanse a yeesusu ho yi a, ɔma yehu dɛ Jehovah Adasefo hɔn som na Nyankopɔn gye to mu. Hwɛ ho kwan kɛse a yeenya dɛ yɛka Jehovah no nkorɔfo ho, na yenyim nokwar a ɔfa Jehovah nye dza ɔbɛyɛ nyinara ho no! Ɔmbra dɛ hɛn nyinara yɛbɔkɔ do dze gyedzi a no mu yɛ dzen esuo nokwar no mu pintsinn.
NDWOM 3 Hɛn Ahoɔdzen, Hɛn Enyidado Nye Hɛn Ahotodo
^ nky. 5 Adzesua yi mu no, yɛbɔhwɛ ɔkwan a Jesus kyerɛɛ dɛ yɛmfa do nsom Nyankopɔn. Afei so, yɛbɔhwɛ mbrɛ n’esuafo no faa ɔkwan a ɔtse dɛm do. Nkyii so, yɛbɔhwɛ adanse a ɔkyerɛ dɛ ndɛ Jehovah Adasefo nam ɔkwan a Jesus kyerɛɛ dɛ yɛmfa do nsom Nyankopɔn no do.
^ nky. 9 Hwɛ adakaba a wɔato dzin “Did the First Christians Use God’s Name?” (Aso Tsetse Christianfo No Dze Nyankopɔn Ne Dzin No Dzii Dwuma?) a ɔwɔ Ɔweɔn-Aban July 1, 2010 Borɔfo dze no mu, kr. 6.
^ nky. 10 Dɛ nhwɛdo no, afe 2008 mu no, Pope Benedict XVI hyɛɛ dɛ onnyi dɛ wɔdze Nyankopɔn ne dzin no “dzi dwuma anaa wɔbɔ dzin no” wɔ Catholic som, hɔn ndwom, anaa hɔn mpaabɔ mu.
^ nky. 63 MFONYIN NO HO NKYERƐKYERƐMU: Jehovah n’ahyehyɛdze no eyi New World Translation no edzi wɔ kasa bɔbor 200 mu; iyi ama nkorɔfo tum kenkan Bible a ɔdze Nyankopɔn ne dzin no dzi dwuma wɔ hɔnankasa hɔn kasaa mu.
