1. Aiz zaite lok kosle prosn vichartat, ani kiteak?

AIZ sonvsarbhor zaite dhorm, te Kristanv zaun asat ani Devak manvota tea ritin tachi bhokti kortat mhunn sangtat. Ani heach pasot, “Ek khoro dhorm asa kai vo sogle dhorm Devak manvotat kai?” mhunn zaite lok vichartat. Amchea vixim kitem? Ami xikoitat tem sot, ani ami Jehova Devak manvota teach ritin tachi bhokti kortat mhunn amkam khatri asa kai? Ami hachi khatri koxi korunk zata hem zannam zaunk atam ami thodde purave polloum-ia.

2. 1 Tesalonikekarank 1:5-a pormonnem, aplea lagim sot asa mhunn apostl Pauluk kiteak khatri asli?

² Hea vixim, apostl Paulun kitem kelem tem ami zannam zaum-ia. (1 Tesalonikekarank 1:5 vachat.) Apostl Pauluk aplea lagim sot asa mhunn purnn khatri asli. Punn hi khatri, taka hem sot manunk borem dista hacher adarit nasli. Karonn Paulu bariksannen Devachea Utracho obheas kortalo. Ani taka lagon “sogllem Povitr Pustok Devachea preronnan boroilam” mhunn to patietalo. (2 Tim. 3:16) Devachea Utracho obheas kelolean, Jezu Kristuch bhasailʼlo Mesias mhunn taka khatreche purave mellʼlle. Punn tea kalla voilea dhormik fuddareamnim hem purave nakarle. Tem apunn lokank Devachea Utrantlem sot xikoitat mhunn sangtale, punn Devak manvona tench te kortale. (Titak 1:16) Tanchea bhaxen Paulun Devachea Utrantlim khoinchim sotam apunn manun ghetolo ani gheunchona tem vinchun kaddunk na. Tachea bodlek, “Devachi akʼkhi ievzonn” xikounk ani apnnaunk to toiar aslo.—Itihas 20:27.

3. Amchea lagim sot asa mhunn khatri asonk amchea lagim soglea prosnanche zobab asonk zai kai? (“ ‘Ucharum-Nozo Titlim’ Jehovachim Kamam ani Chintnam.” hem boks pasun polloiat.)

 ³ Khoro dhorm pallttat tanchea lagim soglea prosnanche zobab, mhunnche Bible-ant mellonant te zobab pasun asonk zai oxem thoddea lokank dista. Punn oxem zaunk xokta kai? Ami apostl Pauluchem udharonn polloum-ia. Tannem poilea xekddeantlea Kristanvank ‘sogllem topasun kaddat’ mhunn sanglolem, punn apnnank zaiteo vostu somzonk na mhunn tannem manun ghetlem. (1 Tes. 5:21) Karonn to sangta, “Kiteak amchi vidia opurnn.” (1 Kor. 13:9) Ani to fuddem mhunntta: “Ami arxantlean koxe goir-goir kitem polletanv.” (1 Kor. 13:12, Povitr Pustok - Novo Korar) Hacho orth, Pauluk soglem somzonk na ani amkam pasun soglem somzona. Punn Paulu Jehova vixim mullavim sotam zannam aslo ani taka lagon apnnam lagim sot aslem mhunn taka khatri asli!

4. Amchea lagim sot asa mhunn amchi khatri ami koxi ghott korunk zata, ani khorea Kristanvam vixim ami kitem polloitolim?

⁴ Amchea lagim sot asa mhunn amchi khatri ghott korunk ek vatt mhunnttlear, Jezun Devachi bhokti koxi keli ani aiz Jehovache Sakxi Devachi bhokti koxi kortat, tem sor korun pollovop. Tor hea lekhant, khore Kristanv kortat teo char vostu ami polloitolim. Teo mhunnttlear, (1) tim murti puza nakartat, (2) tim Jehovachea nanvak man ditat, (3) tim sotacho mog kortat, ani (4) tim eka-mekacho khub mog kortat.

5. Devachi bhokti korchea vixim ami Jezu thaun kitem xiktat, ani Jezun xikoilam tem ami koxem pallunk zata?

⁵ Jezu Devacho khub mog kortalo dekhun to sorgar ani prithumer astana tannem sodanch fokot Jehovachich bhokti keli. (Lukas 4:8)  Ani toxem korunk tannem aplea xisank-ui xikoilem. Tannem ani tachea xisamnim aplea bhoktent murteo kednanch uzar korunk nant. Karonn Dev ek atmo aslolean taka ek akar diun, konnacheanuch tachi murti korunk zaina! (Iz. 46:5) Punn aiz thodde lok thoddeam munxank sant mhunn mantat, tancheo murteo kortat ani tankam magnnem kortat. Tem sarkem kai? Jehovan dilʼlea Dha Updesant dusro kaido oso aslo: “Mollbar vo sokla prithumecher vo prithume-pondlea udkamnim asat tea kosleach vostuncheo murti korum nakat . . . Ani tanche mukhar saxttangim poddun tankam bhozum nakat.” (Sutt. 20:4, 5) Tor hantuntlean amkam kollon ieta ki Devachea bhoktent murti uzar korop Devak avoddna.

6. Jehovache Sakxi aiz tachi bhokti koxi kortat?

⁶ Poilea xekddeantlea Kristanvamnim fokot Devachich bhokti keli mhunn itihaskar sangtat. Udharonnak, History of the Christian Church, hem pustok sangta ki bhoktent murteo uzar korop hea chintpachoch tim dves korta aslim. Tanchi dekh gheun, aiz Jehovache Sakxi pasun khoincheach santanchea vo ainzanchea murteank vo Jezuk pasun magnnem korinant, na mhunn sorkaranchi vo tanchea bavtteanchi pasun te bhokti korinant. Tor konnem-i amcher kitlo-i dobhav ghatlear pasun, Jezuchim utram pallunk ami amcho nichov kelʼlo asa. Tannem mhunnttlem: “Sorvespora tujea Devak tum bhoztoloi.”—Mt. 4:10.

7. Jehovachim Sakxim her dhorma poros koxim vegllim asat?

⁷ Aiz zaito lok, famad pastor-ancho ani dhormik fuddareancho pattlav kortat. Tim tanchea igorzamnim voitat, tanchim pustokam viktim ghetat, tankam ani te tenko ditat tea songottnnenk khub poixe ditat, ani thoddim zannam, te sangtat tem soglem dolle dhampun manun ghetat. Jezu pasun prithumer denvun ailear tim ghoddie itlim khuxal zaunchim nant jitlim tim hea munxanchim utram aikon khuxal zatat. Hea toren eka orthan, tim tanchi puza kortat. Punn Jehovache Sakxi oxem kainch korinant. Te fuddakar ghetoleank man ditat tem khorem, punn tea munxancho pattlav korinant. Karonn te Jezuchea utrak pallo ditat, zoim mhunnttlam: “Tumi sogllim bhav-bhoinn.” (Mt. 23:8-10) Tor Jehovachim Sakxim zalolean, ami khoinchea-i munxachi, zaum dhormik vo rajki fuddareanchi bhokti korinant ani tanchea kamank pasun ami tenko dinant. Ami khoincheach ritin hea sonvsarachim bhag zainant. Ani apunn Kristanv mhunn sangtat tea lokam poros ami vegllim asat.—Juanv 18:36.

8. Ami Jehovachea nanvak mhoima haddloli ani tem nanv sogleank sanglolem taka zai mhunn amkam koxem kollon ieta?

⁸ Jezun eka vellar oxem magnnem kelem: “Bapa, Tujea Nanvak mhoima zoddun ghe.” Tednam sorgar thaun ek vhodd avaz ailo ani Jehova Devan aplea nanvak apunn mhoima zoddun ghetolo mhunn utor dilem. (Juanv 12:28) Jezun hea prithumer porgottnni keli tednam tannem sodanch aplea Bapachea nanvak mhoima haddli. (Juanv 17:26) Tor Jezu bhaxen, Jehovachem nanv uzar korunk ani tachea vixim dusreank sangonk khorea Kristanvank vhodd man bhogta.

9. Poilea xekddeantlea Kristanvamnim Devachea nanvak man dilo mhunn tannim koxem dakhoilem?

⁹ Poilea xekddeant, Kristi sobha sthapon zaun thoddeach vella uprant Jehova Devan ‘aplea nanvak bhettoilʼli videxiam modli ek porza vinchun kaddli.’ (Itihas 15:14) Hea poilea xekddeantlea Kristanvank Devachem nanv uzar korunk ani tem herank kollit  korunk vhodd man bhogtalo. Tea pasot, tannim herank porgottnni keli ani Bible-antlim pustokam boroilim tednam tannim hem nanv uzar kelem. * Tor fokot tinch, lokank Devachem nanv kolloita ti porza mhunn tannim dakhoun dilem.—Itihas 2:14, 21.

10. Jehovachim Sakxim tachea nanva pasot vinchun kaddloli porza mhunn amkam kosle purave asat?

¹⁰ Aiz fokot Jehovachim Sakxim Devachea nanvak bhettoilʼli ek porza zaun asa. Oxem mhunnonk amkam kosle purave asat? Aiz zaitea dhormik fuddareamnim, Devachem nanv lipounk apnnachean zata titlo vavr kela. Zoxem, Bible bhaxantor kortana tannim Devachem nanv kaddun uddoilam. Toxench, hem nanv te herankui uzar korunk dinant. * Punn Jehovache Sakxi, Jehovachea nanvak favo to man diunk khub vavurtat. Hoi, ami Jehovachem nanv sonvsarbhor porgottʼttat ani oxem korpi anik khoinchoch dhorm na! Amchea songottnen, New World Translation of the Holy Scriptures, hea Bible-acheo 24 kotti poros chodd kopi chhapleat. Hea Bible-ant, jea-jea zagear her bhaxantor korpeamnim Jehovachem nanv kaddun uddoilam, tea-tea zagear tem porot ghatlolem asa. Toxench, ami 1,000-a poros chodd bhasamnim Bible-acher adarit prokaxonam toiar keleant jim Jehovachea nanva vixim chodd somzonni  ditat. Khorench! Ami Jehovache Sakxi Devachea nanvak bhettoilʼli porza zaunk khub vavurtat.—Iz. 43:10-12.

11. Poilea xekddeantlea Kristanvamnim sotacho mog kelo mhunn koxem dakhoilem?

¹¹ Jezun Deva vixim ani tachea udʼdexa vixim aslolea sotacho mog kelo. To heach sota pormonnem aplem jivit jielo ani tannem dusreankui sota vixim sanglem. (Juanv 18:37) Jezuche khore xis pasun sotacho khub mog kortat. (Juanv 4:23, 24) Tea pasot apostl Pedrun, Kristachi vatt ‘sotachi vatt’ mhunn sangli. (2 Ped. 2:2) Tor poilea xekddeantlea Kristanvank sotacho itlo mog aslo ki tannim khottea dhormacheo xikounneo, tancheo chali-riti, ani Devachea Utra add voitat toslea lokanchem chintop pois kelem. (Kol. 2:8) Teach bhaxen, aiz khore Kristanv “sota pormannem choltat.” Hacho orth, tanchi patienni Devachea Utracher adarit asa ani tea pormonnem tim jietat.—3 Juanv 3, 4.

12. Amchea somzonnent bodlav korcho poddtta tednam Sonchalon Monddoll kitem korta, ani kiteak?

¹² Bible-ant asa tem soglem tankam somzota, oxem Jehovachim Sakxim sangonant. Thoddea pavtti, Bible-antle umkech ek xikounne vixim amchi somzonni chuklea, vo sobhechi manddavoll koxi korchi hantunt ami chuki keleat. Punn vell voita toso amchi somzonni vaddtta mhunn Bible dakhoun dita. (Kol. 1:9, 10) Jehova amkam sovkas-sovkas sot kollit korta ani heach pasot ami pasiensan ravchi goroz asa. (Mho. 4:18) Tor amchi somzonni vo her kitea-i vixim bodlav korcho poddtta tednam Sonchalon Monddoll tem korunk fatti sorona. Karonn hea toren Jehova sangata amchi ixttagot ghott zata, Jezun Devachi bhokti keli teach ritin ami korunk pavtat, ani sotacho mog kortat mhunn ami dakhoitat. (Jak. 4:4) Tor lokanchem chintop bodolʼlam mhunn nhoi, punn Bible-a vixim amchi somzonni vaddlea mhunn ami he bodlav kortat. Punn aiz ami zaitea igorzamnim polloilem zalear te aplea lokank manvota tem korunk vo apleak ek nanv zoddunk aplea xikounnent bodlav kortat!—1 Tes. 2:3, 4.

13. Khorea Kristanvam modem aslolo ek khas gunn khoincho, ani aiz Jehovachea Sakxeam modem ho gunn asa mhunn ami kiteak mhunnonk zata?

¹³ Jezun sanglem: “Ekamekacho mog korxat zalear, hache voilean tumi Mhoje xis mhonn sogllea monxank kolltolem.” (Juanv 13:34, 35) Poilea xekddeantlea Kristanvank tanchea zaitea borea gunnank lagon vollkhotale. Punn tanche modem aslolo ek khas gunn mhunnttlear, mog. Aiz, dusrea khoinchea-i dhormant dison iena toslo mog ani ekvott amkam sonvsarbhor aslolea Jehovachea Sakxeam modem dison ieta. Tim khoinchea-i desantlim vo khoinchea-i sonskrutaiechim aslear pasun tanchea sobhamnim, sorkitt zomatimnim, ani odhivexonamnim tanchea modem khoro mog asa mhunn amkam puravo melltta. Ani hea karonnak lagon, Jehovache Sakxi Jehova Devak manvota teach toren tachi bhokti kortat mhunn amkam khatri melltta.

14. Koloskarank 3:12-14 pormonnem, eka-mekak mog dakhounk ek mhotvachi vatt khoinchi?

¹⁴ “Ekamekak vhodda priti-mogan vagoiat” mhunn Bible amkam urba dita. (1 Ped. 4:8) Hem korunk ek vatt mhunnttlear ami eka-meka sangata pasiensan vagonk zai ani tankam bhogsunk zai. Toxench, sobhentlea soglea bhav-bhoinnank, amkam ghoddie dukhoileant tankam pasun, ami udarponn dakhounk zai ani tancho poramos korunk sondhi sodhunk zai. (Koloskarank 3:12-14 vachat.) Ami oxem kortat tednam ami khorim Kristanvam mhunn dakhoun ditat.

15. Anik khoinchea toren ami poilea xekddeantlea Kristanvam sarke asat?

¹⁵ Jehovachea songottnnent ji manddavoll asa, zoxem sorkittachi dekhrekh korpeank, vhoddilank ani sobhechea sevokank zobabdareo dilʼleo asat ti poilea xekddeantlea Kristanvanim kelʼlea manddavolli sarkich asa. (Filp. 1:1; Titak 1:5) Tea bhair, tanchea bhaxen ami pasun loingik sombonda vixim, kazara vixim, rogta vixim ani Devache kaide pallunk sodhinant tankam sobhentlean bhair kaddchea vixim Devache kaide pallttat.—Itihas 15:28, 29; 1 Kor. 5:11-13; 6:9, 10; Heb. 13:4.

16. Efezkarank 4:4-6-antlean ami kitem xiktat?

¹⁶ Zaite lok apunn Jezuche xis mhunn sangtole, punn te khoreponnim tacho pattlav korchenant, oxem Jezun sanglolem. (Mt. 7:21-23) Toxench, nimannea disamnim zaitim zannam “dhormvont monxanchem sovong ghetolim.” (2 Tim. 3:1, 5) Punn, Devak manvota toslo ‘ekuch bhavarth’ asa mhunn Bible-ant sanglolem asa.—Efezkarank 4:4-6 vachat.

17. Jezuche xikounne pormonnem aiz khorea bhavarthan konn choltat?

¹⁷ Tor sogle purave polloilea uprant, khori bhokti koxi korchi tem Jezun xikoilʼlea pormonnem ani poilea xekddeantle Kristanv kortale tea pormonnem, aiz konn kortat? Hoi, fokot Jehovache Sakxi khorea bhavarthan choltat. Tor, Jehovachea songottnneche bhag zavop ani Jehova ani tachea besanvam vixim zannam zavop kitlem khuxalkaiechem! Tor amchea lagim sot asa mhunn amchi khatri ami ghott korit ravum-ia.